(1)

Foráiltear le Rialachán (AE) 2015/2283 nach bhféadfar ach bianna núíosacha atá údaraithe agus a áirítear ar liosta an Aontais a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

Ar liosta an Aontais a leagtar amach san Iarscríbhinn a ghabhann le Rialachán Cur Chun Feidhme (AE) 2017/2470, áirítear lachtíotól mar bhia núíosach údaraithe.

(4)

Le Cinneadh Cur Chun Feidhme (AE) 2017/450 ón gCoimisiún (3), údaraíodh, i gcomhréir le Rialachán (CE) Uimh. 258/97 ó Pharlaimint na hEorpa agus ón gComhairle (4), lachtíotól a chur ar an margadh mar bhia núíosach lena úsáid i bhfoirm capsúil nó táibléid i bhforbhianna mar a shainmhínítear i dTreoir 2002/46/CE ó Pharlaimint na hEorpa agus ón gComhairle (5) agus atá beartaithe don phobal fásta.

(5)

Le Rialachán Cur Chun Feidhme (AE) 2018/1293 ón gCoimisiún (6) údaraíodh leathnú ar úsáid an bhia núíosaigh lachtíotól i bhfoirm púdair ar an uasleibhéal údaraithe atá ann cheana i gcomhréir le Rialachán (AE) 2015/2283.

(6)

An 31 Deireadh Fómhair 2023, chuir an chuideachta H.C. Clover Productos y Servicios, S.L., iarratas faoi bhráid an Choimisiúin chun coinníollacha úsáide an bhia núíosaigh lachtíotól a athrú i gcomhréir le hAirteagal 10(1) de Rialachán (AE) 2015/2283. D’iarr an t-iarratasóir go n-áireofaí ampaill leachtanna, buidéil dáilte braoin agus cineálacha eile leachtanna comhchosúla, mar chineálacha ceadaithe lachtíotóil, lena n-úsáid i bhforbhianna.

(7)

Measann an Coimisiún nach dócha go mbeidh tionchar ag an nuashonrú a iarradh ar liosta an Aontais ar shláinte an duine agus nach gá don Údarás Eorpach um Shábháilteacht Bia (‘an tÚdarás’) meastóireacht sábháilteachta a dhéanamh i gcomhréir le hAirteagal 10(3) de Rialachán (AE) 2015/2283. An measúnú sábháilteachta atá mar bhonn le húdarú lachtíotóil ar uasleibhéal 20 g/lá i bhforbhianna, níl sé nasctha le foirm shonrach ina gcuirtear na forbhianna ar fáil don tomhaltóir agus, dá bhrí sin, ní dhéanann an fhoirm difear do phróifíl sábháilteachta an bhia núíosaigh. Tráth an údaraithe, bhí foirmeacha an bhia núíosaigh sin teoranta do chapsúil, do tháibléid nó do phúdair toisc gurb iad sin na foirmeacha a mhol an t-iarratasóir lena mbaineann. Ós rud é nach mbaineann na húsáidí atá beartaithe san iarratas seo ach le foirmeacha in ampaill leachtanna, i mbuidéil dáilte braoin agus i bhfoirmeacha comhchosúla eile leachtanna, agus na huasleibhéil údaraithe lachtíotóil i bhforbhianna á gcoinneáil an tráth céanna, measann an Coimisiún gur cheart coinníollacha úsáide lachtíotóil a theorannú don tagairt chineálach d’fhorbhianna agus dá bhfoirmeacha a shainmhínítear in Airteagal 2 de Threoir 2002/46/CE. Beidh sé sin comhsheasmhach leis na húdaruithe eile le haghaidh bianna núíosacha a úsáidtear i bhforbhianna nach bhfuil foirm an fhorbhia ábhartha dóibh maidir le sábháilteacht an bhia núíosaigh.

(8)

Is leor na forais atá san fhaisnéis a chuirtear ar fáil san iarratas chun a shuí go bhfuil na hathruithe a iarradh ar choinníollacha úsáide an bhia núíosaigh, trí aon fhoirm lachtíotóil ceadaithe atá le húsáid i bhforbhianna a chur san áireamh, go bhfuil siad i gcomhréir le hAirteagal 12 de Rialachán (AE) 2015/2283 agus gur cheart iad a fhormheas.

(9)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,