(1)

An 31 Bealtaine 2013, ghlac an Chomhairle Cinneadh 2013/255/CBES (1).

(2)

Is cúis mhór imní don Chomhairle fós an staid sa tSiria. Tar éis níos mó ná 13 bliana, is fada ó bheith thart an choinbhleacht sa tSiria agus tá sí fós ina húdar fulaingthe agus éagobhsaíochta. De dheasca chrith talún tragóideach an 6 Feabhra 2023, ghéaraigh ar an bhfíor-dhrochstaid dhaonnúil a bhí sa tír cheana, agus mhéadaigh riachtanais mhuintir na Siria.

(3)

Meabhraítear don Chomhairle nach bhfuil sé i gceist le bearta sriantacha an Aontais, lena n-áirítear na bearta sin a glacadh i bhfianaise na staide sa tSiria, go gcuirfí isteach ar sholáthar na cabhrach daonnúla, lena n-áirítear cúnamh leighis, ná bac a chur ar an soláthar sin. Leis na bearta sriantacha arna nglacadh i bhfianaise na staide sa tSiria, níl srian ar an trádáil i bhformhór na n-earnálacha idir an tAontas agus an tSiria, lena n-áirítear i mbia agus i gcógas. Thairis sin, a mhéid a bhaineann le bearta aonair, tá eisceachtaí i bhfeidhm lenar féidir cistí agus acmhainní eacnamaíocha a chur ar fáil do dhaoine ainmnithe agus d’eintitis ainmnithe, i gcás ina bhfuil na cistí nó na hacmhainní eacnamaíocha sin riachtanach d’aon toisc chun fóirithint dhaonnúil a chur ar fáil sa tSiria nó chun cúnamh a thabhairt don daonra sibhialta sa tSiria agus chun na críche sin amháin. I gcásanna áirithe, is gá réamhúdarú a fháil ón údarás náisiúnta inniúil ábhartha.

(4)

Sna conclúidí uaithi an 20 Bealtaine 2021 maidir leis an ‘Teachtaireacht ón gCoimisiún chuig Parlaimint na hEorpa agus chuig an gComhairle i ndáil le gníomhaíocht dhaonnúil an Aontais: dúshláin nua, na prionsabail chéanna’, d’athdhearbhaigh an Chomhairle a tiomantas aon tionchair dhiúltacha neamhbheartaithe a d’fhéadfadh a bheith ag bearta sriantacha an Aontais ar ghníomhaíocht dhaonnúil ar bhonn prionsabal a sheachaint agus, i gcás nach féidir iad a sheachaint, iad a mhaolú a mhéid is féidir. D’athdhearbhaigh an Chomhairle go gcomhlíonann bearta sriantacha an Aontais na hoibleagáidí uile faoin dlí idirnáisiúnta, go háirithe an dlí idirnáisiúnta um chearta an duine, an dlí daonnúil idirnáisiúnta agus an dlí idirnáisiúnta um dhídeanaithe. Chuir sí i dtreis a thábhachtaí atá sé cloí go hiomlán le prionsabail dhaonnúla agus leis an dlí daonnúil idirnáisiúnta i mbeartas smachtbhannaí an Aontais, lena n-áirítear trí eisceachtaí daonnúla a áireamh go comhsheasmhach i gcórais beart sriantach i gcás inarb ábhartha, agus trína áirithiú go mbeidh creat éifeachtach i bhfeidhm le haghaidh na húsáide a bhaineann eagraíochtaí daonnúla as na heisceachtaí sin.

(5)

An 9 Nollaig 2022, ghlac Comhairle Slándála na Náisiún Aontaithe (CSNA) Rún 2664 (2022) ó Chomhairle Slándála na Náisiún Aontaithe, á mheabhrú di na rúin a ghlac sí roimhe seo lena bhforchuirtear bearta smachtbhannaí mar fhreagairt ar bhagairtí ar an tsíocháin agus ar an tslándáil idirnáisiúnta, agus á chur i dtábhacht di nach mór do na bearta arna ndéanamh ag Ballstáit na Náisiún Aontaithe chun na smachtbhannaí is gá a chur chun feidhme, oibleagáidí na mBallstát sin faoin dlí idirnáisiúnta a chomhlíonadh nach bhfuil na bearta sin ceaptha iarmhairtí díobhálacha daonnúla a bheith acu do phobail shibhialtacha nó iarmhairtí díobhálacha do ghníomhaíochtaí daonnúla ná dóibh siúd a dhéanann gníomhaíochtaí daonnúla. Chinn CSNA i mír 1 de Rún 2664 (2022) ó Chomhairle Slándála na Náisiún Aontaithe go gceadaítear cistí, sócmhainní airgeadais nó acmhainní eacnamaíocha eile a sholáthar, a phróiseáil nó a íoc nó earraí agus seirbhísí is gá a sholáthar chun seachadadh tráthúil cúnaimh dhaonnúil a áirithiú nó chun tacú le gníomhaíochtaí eile a thacaíonn le riachtanais bhunúsacha an duine ag gníomhaithe áirithe agus nach sárú iad ar na reo sócmhainní arna bhforchur ag CSNA nó ag a Choistí Smachtbhannaí.

(6)

An 14 Feabhra 2023, ghlac an Chomhairle Cinneadh (CBES) 2023/338 (2) lenar tugadh isteach an díolúine dhaonnúil de bhun Rún 2664 (2022) ó Chomhairle Slándála na Náisiún Aontaithe i gcórais beart sriantach an Aontais lena dtugtar éifeacht do bhearta arna gcinneadh ag CSNA nó ag a Choistí Smachtbhannaí. An 31 Márta 2023, ghlac an Chomhairle Cinneadh (CBES) 2023/726 (3) lenar tugadh isteach an díolúine dhaonnúil de bhun Rún 2664 (2022) ó Chomhairle Slándála na Náisiún Aontaithe i gcórais beart sriantach an Aontais lena dtugtar éifeacht do na bearta arna gcinneadh ag CSNA nó ag a Choistí Smachtbhannaí agus sna bearta comhlántacha arna gcinneadh ag an gComhairle. An 27 Samhain 2023, ghlac an Chomhairle Cinneadh (CBES) 2023/2686 (4) lenar tugadh an díolúine dhaonnúil i gcórais áirithe beart sriantach de chuid an Aontais, ar mhaithe leis na gníomhaithe dá dtagraítear i Rún 2664 (2022) ó Chomhairle Slándála na Náisiún Aontaithe, le heagraíochtaí agus gníomhaireachtaí ar dheonaigh an tAontas an Deimhniú Comhpháirtíochta Daonnúla dóibh, nó atá deimhnithe nó aitheanta ag Ballstát, agus ag sainghníomhaireachtaí na mBallstát.

(7)

An 23 Feabhra 2023, ghlac an Chomhairle Cinneadh (CBES) 2023/408 (5), lenar tugadh isteach díolúine maidir le sócmhainní daoine nádúrtha nó dlítheanacha agus eintiteas ainmnithe a reo, agus maidir leis na srianta ar chistí agus acmhainní eacnamaíocha a chur ar fáil dóibh, ar mhaithe le heagraíochtaí idirnáisiúnta agus catagóirí sainithe áirithe gníomhaithe a bhfuil baint acu le gníomhaíochtaí daonnúla, ar feadh tréimhse tosaigh 6 mhí, go dtí an 24 Lúnasa 2023. An 14 Iúil 2023, ghlac an Chomhairle Cinneadh(CBES) 2023/1467 (6) a chuir síneadh leis an díolúine go dtí an 24 Feabhra 2024. An 18 Nollaig 2023, ghlac an Chomhairle Cinneadh (CBES) 2023/2876 (7) lenar cuireadh síneadh breise leis an díolúine go dtí an 1 Meitheamh 2024 d’fhonn seachadadh tapa na cabhrach a éascú agus intuarthacht agus deimhneacht dhlíthiúil a chur ar fáil do na gníomhaithe a bhaineann tairbhe as an díolúine sin.

(8)

Chun comhsheasmhacht a mhéadú idir córais beart sriantach an Aontais agus na bearta sriantacha arna nglacadh ag CSNA nó ag a Choistí Smachtbhannaí, agus chun a áirithiú go seachadfar cúnamh daonnúil go leanúnach agus go tráthúil nó chun tacú le gníomhaíochtaí eile a thacaíonn le riachtanais bhunúsacha an duine, measann an Chomhairle gur cheart díolúine a thabhairt isteach ó na bearta reo sócmhainní is infheidhme maidir le daoine nádúrtha agus dlítheanacha, eintitis nó comhlachtaí arna n-ainmniú faoi Chinneadh 2013/255/CBES, agus ó na srianta ar chistí agus acmhainní eacnamaíocha a chur ar fáil dóibh, ar mhaithe leis na gníomhaithe dá dtagraítear i Rún 2664 (2022) ó Chomhairle Slándála na Náisiún Aontaithe agus le heagraíochtaí agus gníomhaireachtaí ar dheonaigh an tAontas an Deimhniú Comhpháirtíochta Daonnúla dóibh nó le heagraíochtaí agus gníomhaireachtaí atá deimhnithe nó aitheanta ag Ballstáit, agus ag sainghníomhaireachtaí na mBallstát, agus gur cheart an díolúine sin a chur in ionad na díolúine a tugadh isteach le Cinneadh (CBES) 2023/408. Ba cheart feidhm a bheith ag an díolúine sin go dtí an 1 Meitheamh 2025 i gcomhréir le dáta deiridh chur i bhfeidhm Chinneadh 2013/255/CBES, á chur san áireamh, gan dochar don athbhreithniú ar Chinneadh 2013/255/CBES, go bhfuil sé beartaithe ag an gComhairle síneadh breise a chur leis an díolúine sin tar éis an 1 Meitheamh 2025. Thairis sin, measann an Chomhairle gur cheart an sásra maolúcháin atá ann faoi láthair le haghaidh na n-eagraíochtaí agus na ngníomhaithe sin atá rannpháirteach i ngníomhaíochtaí daonnúla ach nach féidir leo leas a bhaint as an díolúine dhaonnúil sin, a leasú. Ina theannta sin, measann an Chomhairle freisin gur cheart clásal athbhreithniúcháin a bhaineann leis na heisceachtaí sin a thabhairt isteach.

(9)

Tá gá le gníomhaíocht bhreise ón Aontas chun bearta áirithe atá sa Chinneadh seo a chur chun feidhme.

(10)

Ba cheart, dá bhrí sin, Cinneadh 2013/255/CBES a leasú dá réir sin,

(1)

Cuirtear an méid a leanas in ionad Airteagal 28a:

(2)

In Airteagal 34, cuirtear an mhír a leanas leis:

‘Déanfar na heisceachtaí dá dtagraítear in Airteagal 28a(1) go (4) a mhéid a bhaineann le hAirteagal 28(1), (2) agus (5) a athbhreithniú go tráthrialta, agus, ar a laghad, gach 12 mhí, nó ar iarraidh phráinneach ó aon Bhallstát, ón Ardionadaí, nó ón gCoimisiún tar éis d’athrú ó bhonn teacht ar na himthosca.’.