(1)

Le Treoir 2005/72/CE ón gCoimisiún (2), áirítear meitiream mar shubstaint ghníomhach in Iarscríbhinn I a ghabhann le Treoir 91/414/CEE ón gComhairle (3).

(2)

De réir Airteagal 78(3) de Rialachán (CE) Uimh. 1107/2009, substaintí gníomhacha a áirítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

Formheas na substainte gníomhaí meitiream, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 31 Eanáir 2024.

(4)

Cuireadh iarratais faoi bhráid na hIodáile, an Ballstát is rapóirtéir, agus faoi bhráid na Ríocht Aontaithe, an Ballstáit is comhrapóirtéir, chun formheas na substainte gníomhaí meitiream a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) laistigh den tréimhse ama dá bhforáiltear san Airteagal sin.

(5)

Chuir na hiarratasóirí na sainchomhaid fhorlíontacha riachtanacha faoi bhráid an Bhallstáit is rapóirtéir, an Bhallstáit is comhrapóirtéir, an Choimisiúin agus an Údaráis Eorpaigh um Shábháilteacht Bia (‘an tÚdarás’) i gcomhréir le hAirteagal 6 de Rialachán Cur Chun Feidhme (AE) Uimh. 844/2012. Chinn an Ballstát is rapóirtéir na hiarratais a bheith inghlactha.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis agus an Choimisiúin í an 2 Samhain 2017.

(7)

Chuir an tÚdarás an dréacht-tuarascáil maidir le measúnú ar athnuachan in iúl do na hiarratasóirí agus do na Ballstáit chun barúlacha a fháil uathu agus sheol sé comhairliúchán poiblí ina leith. Chuir an tÚdarás na barúlacha a fuarthas ar aghaidh chuig an gCoimisiún. Chuir an tÚdarás an sainchomhad achomair forlíontach ar fáil don phobal.

(8)

An 20 Márta 2023, chuir an tÚdarás an chonclúid uaidh (6) in iúl don Choimisiún maidir le cé acu is féidir nó nach féidir coinne a bheith leis go gcomhlíonfaidh meitiream na critéir formheasa dá bhforáiltear in Airteagal 4 de Rialachán (CE) Uimh. 1107/2009. Shainaithin an tÚdarás roinnt príomhréimsí imní. Go háirithe, tháinig sé ar an gconclúid maidir le luachanna tagartha maidir le meitiream agus a mheitibilítí ábhartha atá gníomhach go fuingicídeach, go sáraítear na luachanna sin le haghaidh teagmháil oibreoirí, daoine ar an láthair agus cónaitheoirí i ngach úsáid ionadaíoch. Ina theannta sin, shainaithin an tÚdarás ardriosca d’orgánaigh uisceacha agus ardriosca ar an láthair d’artrapóid nach spriocartrapóid iad le haghaidh gach úsáide ionadaíche. Tháinig an tÚdarás ar an gconclúid freisin go gcomhlíonann meitiream na critéir is gá lena shainaithint mar shuaiteoirí inchríneacha i gcás daoine maidir le módúlacht na faireoga tíoróidigh.

(9)

I gcomhréir le hAirteagal 13(3a), an tríú fomhír, de Rialachán Cur Chun Feidhme (AE) Uimh. 844/2012, tugadh an deis don iarratasóir faisnéis bhreise a chur isteach chun aghaidh a thabhairt ar na critéir formheasa maidir le hairíonna suaite inchrínigh a leagtar amach i bpointe 3.6.5 agus pointe 3.8.2 d’Iarscríbhinn II a ghabhann le Rialachán (CE) Uimh. 1107/2009.

(10)

An 24 Bealtaine 2023 chuir an Coimisiún dréacht-tuarascáil athnuachana maidir le meitiream agus dréacht den Rialachán seo faoi bhráid an Bhuanchoiste um Plandaí, Ainmhithe, Bia agus Beatha.

(11)

D’iarr an Coimisiún ar na hiarratasóirí a mbarúlacha a chur isteach maidir le conclúidí an Údaráis. Thairis sin, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012, d’iarr an Coimisiún ar an iarratasóir a bharúlacha a chur isteach i leith na dréacht-tuarascála athnuachana. Chuir na hiarratasóirí a mbarúlacha isteach agus rinneadh scrúdú cúramach orthu.

(12)

D’ainneoin na n-argóintí a rinne an t-iarratasóir, ní fhéadfaí an t-ábhar imní a bhaineann leis an tsubstaint ghníomhach a chur as an áireamh.

(13)

Dá réir sin, maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil meitiream, níor suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009. Dá bhrí sin, is iomchuí gan formheas na substainte gníomhaí sin a athnuachan.

(14)

Dá bhrí sin, ba cheart Rialachán Cur Chun Feidhme (AE) Uimh. 540/2011 a leasú dá réir sin.

(15)

Ba cheart am leordhóthanach a thabhairt do na Ballstáit údaruithe maidir le táirgí cosanta plandaí ina bhfuil meitiream a tharraingt siar.

(16)

Maidir le táirgí cosanta plandaí ina bhfuil meitiream, i gcás ina ndeonóidh na Ballstáit aon tréimhse cairde i gcomhréir le hAirteagal 46 de Rialachán (CE) Uimh. 1107/2009, níor cheart an tréimhse sin a bheith níos faide ná 12 mhí ó dháta theacht i bhfeidhm an Rialacháin seo.

(17)

Le Rialachán Cur Chun Feidhme (AE) 2023/114 ón gCoimisiún (7) cuireadh síneadh leis an tréimhse formheasa ar meitiream go dtí an 31 Eanáir 2024 chun go bhféadfar an próiseas athnuachana a chur i gcrích sula rachaidh tréimhse formheasa na substainte gníomhaí sin in éag. Mar sin féin, ós rud é go ndearnadh cinneadh gan an formheas a athnuachan roimh dhul in éag na tréimhse formheasa sin ar cuireadh síneadh léi, ba cheart tús a bheith le feidhm an Rialacháin seo tráth is luaithe ná an dáta sin.

(18)

Leis an Rialachán seo, ní chuirtear cosc ar iarratas eile a chur isteach maidir leis an tsubstaint ghníomhach meitiream a fhormheas de bhun Airteagal 7 de Rialachán (CE) Uimh. 1107/2009.

(19)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,