(1)

Tháinig an Coinbhinsiún um Eitlíocht Shibhialta Idirnáisiúnta (“Coinbhinsiún Chicago”), lena rialaítear aeriompar idirnáisiúnta, i bhfeidhm an 4 Aibreán 1947. Bunaíodh an Eagraíocht Eitlíochta Sibhialta Idirnáisiúnta (ICAO) leis.

(2)

Is Stáit Chonarthacha i gCoinbhinsiún Chicago iad Ballstáit an Aontais agus is comhaltaí de chuid ICAO iad, agus tá stádas breathnóra ag an Aontas i gcomhlachtaí áirithe ICAO. Tá ionadaithe ó shé Bhallstát i gComhairle ICAO faoi láthair.

(3)

De bhun Airteagal 54 de Choinbhinsiún Chicago, féadfaidh Comhairle ICAO caighdeáin agus cleachtais mholta (“SARPanna”) idirnáisiúnta a ghlacadh, agus iad a ainmniú mar Iarscríbhinní a ghabhann le Coinbhinsiún Chicago.

(4)

Tá Comhairle ICAO, ag a 228ú seisiún, chun glacadh le Leasú 93 ar Iarscríbhinn 10, Imleabhar I a ghabhann le Coinbhinsiún Chicago.

(5)

Is é an phríomhchuspóir atá ag Leasú 93 ar Iarscríbhinn 10, Imleabhar I a ghabhann le Coinbhinsiún Chicago tacú le tabhairt isteach an chórais dhomhanda ilbhuíne dé-mhinicíochta um loingseoireacht satailíte (DFMC GNSS) trí fhorálacha a chur léi le haghaidh minicíochtaí breise oibríochta le haghaidh an chórais suite dhomhanda (GPS), an chórais dhomhanda um loingseoireacht satailíte (GLONASS) agus an chórais mhéadúcháin bunaithe ar shatailítí (SBAS), agus trí fhorálacha le haghaidh chóras nua BeiDou um loingseoireacht satailíte (BDS) agus chóras Galileo a thabhairt isteach. Tá sé de chuspóir aige freisin tacú le maolú grádáin ianaisféaraigh le haghaidh an chórais mhéadúcháin ar an talamh (GBAS).

(6)

Is iomchuí an seasamh atá le glacadh thar ceann an Aontais i gComhairle ICAO a leagan síos toisc go mbeidh Leasú 93 ar Iarscríbhinn 10, Imleabhar I a ghabhann le Coinbhinsiún Chicago ina cheangal faoin dlí idirnáisiúnta agus go bhféadfadh sé tionchar cinntitheach a bheith aige ar ábhar dhlí an Aontais, eadhon Rialachán Cur Chun Feidhme (AE) 2017/373 ón gCoimisiún (1).

(7)

An seasamh atá le glacadh thar ceann an Aontais ag an 228ú seisiún de Chomhairle ICAO nó ag aon seisiún ina dhiaidh sin, maidir le glacadh Leasú 93 ar Iarscríbhinn 10, Imleabhar I a ghabhann le Coinbhinsiún Chicago mar a leagadh amach i Litir Stáit 2021/41, ba cheart dó tacú leis an leasú seo agus é a chomhlíonadh ina iomláine. Ba cheart do Bhallstáit an Aontais atá ina gcomhaltaí de Chomhairle ICAO, ag gníomhú dóibh go comhpháirteach chun leas an Aontais, an seasamh sin a chur in iúl.

(8)

A luaithe a ghlactar le Leasú 93 ar Iarscríbhinn 10, Imleabhar I a ghabhann le Coinbhinsiún Chicago agus a thagann in éifeacht, beidh sé ina cheangal ar Bhallstáit uile ICAO, lena n-áirítear Ballstáit uile an Aontais, i gcomhréir le Coinbhinsiún Chicago, agus laistigh de na teorainneacha a leagtar amach ann.

(9)

De bhun Airteagal 38 de Choinbhinsiún Chicago, más dofheidhmithe d’aon Stát aon chaighdeán nó aon nós imeachta idirnáisiúnta arna ghlacadh ag ICAO a chomhlíonadh go huile agus go hiomlán, nó a rialacháin nó a chleachtais féin a chur i gcomhréir go hiomlán le haon chaighdeán nó aon nós imeachta idirnáisiúnta den sórt sin, nó má mheasann sé é a bheith riachtanach rialacháin nó cleachtais a ghlacadh atá éagsúil ar aon dóigh leis na rialacháin nó na cleachtais arna mbunú le caighdeán idirnáisiúnta, ba cheart go dtabharfadh an Stát sin fógra láithreach do ICAO maidir leis na difríochtaí idir a chleachtas féin agus an cleachtas arna bhunú leis an gcaighdeán idirnáisiúnta.

(10)

De bhun Airteagal 90 de Choinbhinsiún Chicago, tagann aon Iarscríbhinn nó aon leasú ar Iarscríbhinn arna ghlacadh ag Comhthionól ICAO in éifeacht laistigh de 3 mhí tar éis í a thíolacadh do Stáit Chonarthacha ICAO, nó ag deireadh cibé tréimhse ama is faide a fhorordóidh Comhairle ICAO, mura rud é go léiríonn tromlach Stát Conarthach ICAO a míshástacht le Comhairle ICAO idir an dá linn.

(11)

Tar éis do Chomhairle ICAO Leasú 93 ar Iarscríbhinn 10, Imleabhar I a ghabhann le Coinbhinsiún Chicago a ghlacadh, rud atá le fógairt ag Ardrúnaí ICAO trí bhithín nós imeachta litreach Stáit de chuid ICAO, ba cheart gurb é an seasamh atá le glacadh thar ceann an Aontais gan míshástacht a léiriú agus fógra a thabhairt maidir le comhlíonadh an leasuithe sin, ar choinníoll go nglacfar leis an leasú sin gan aon athruithe suntasacha. I gcás ina n-imeodh dlí an Aontais ó na SARPanna nuaghlactha tar éis dháta beartaithe cur i bhfeidhm na SARPanna sin, ba cheart aon difríocht idir na SARPanna áirithe sin a chur in iúl do ICAO. Ba cheart an seasamh atá le glacadh thar ceann an Aontais i leith aon difríochta den sórt sin a bheith bunaithe ar dhoiciméad i scríbhinn a chuirfeadh an Coimisiún faoi bhráid na Comhairle chun é a phlé agus a fhormheas. Ba cheart do Bhallstáit uile an Aontais an seasamh sin a chur in iúl, ag gníomhú dóibh go comhpháirteach chun leas an Aontais.

(12)

Anuas air sin, tá Comhairle ICAO, ag an 228ú seisiún dá cuid, le leasú a ghlacadh ar na Treoracha Teicniúla maidir le hIompar Sábháilte Earraí Contúirteacha d’Aer (ICAO Doic. 9284) chun gairis ghníomhacha rianúcháin arna gcumhachtú ag ceallraí beaga litiam a cheadú i mbagáiste seiceáilte isteach. Tagann an t-ábhar faoi Iarscríbhinn 18 a ghabhann le Coinbhinsiún Chicago — Iompar Sábháilte Earraí Contúirteacha d’Aer.

(13)

Maidir leis an leasú, cheadófaí do phaisinéirí agus don chriú gairis ghníomhacha rianúcháin arna gcumhachtú ag ceallraí beaga litiam a iompar ina mbagáiste seiceáilte isteach, rud a thoirmisctear le ICAO 9284 mar gheall ar an gceanglas gairis ina bhfuil cealla nó ceallra litiam i mbagáiste seiceáilte isteach a mhúchadh.

(14)

Is iomchuí an seasamh atá le glacadh thar ceann an Aontais laistigh de Chomhairle ICAO a bhunú ós rud é go mbeadh tionchar díreach ag na hathruithe atá beartaithe ar ICAO Doic. 9284 ar na rialacha maidir le hiompar earraí contúirteacha i Rialachán (AE) Uimh. 965/2012 ón gCoimisiún (2), ina dtagraítear go sainráite don doiciméad sin ó ICAO, agus féadfaidh siad, dá bhrí sin, tionchar cinntitheach a imirt ar ábhar dhlí an Aontais.

(15)

Maidir leis an seasamh atá le glacadh thar ceann an Aontais le linn an 228ú seisiún de Chomhairle ICAO nó ag aon seisiún ina dhiaidh sin maidir le glacadh an Leasaithe ar ICAO Doic. 9284, ba cheart don seasamh sin tacú leis an leasú seo. Ba cheart do Bhallstáit an Aontais atá ina gcomhaltaí de Chomhairle ICAO, ag gníomhú dóibh go comhpháirteach chun leas an Aontais, an seasamh sin a chur in iúl,