(1)

Le Rialachán Tarmligthe (AE) 2016/2376 ón gCoimisiún (2), deonaíodh maolú ar íosmhéid tagartha caomhnaithe (MCRS) na mbreallach maighdeogach go dtí fad iomlán 22 mm in uiscí teorann na hIodáile i bhFo-limistéir Gheografacha 9, 10, 17 agus 18 an Choimisiúin Ghinearálta Iascaigh don Mheánmhuir (CGIM), tar éis moladh comhpháirteach a chuir an Iodáil isteach, agus is í an Iodáil an Ballstát aonair ag a bhfuil leas díreach bainistíochta ina uiscí teorann. Bhí feidhm aige ón 1 Eanáir 2017 go dtí an 31 Nollaig 2019.

(2)

Le Rialachán Tarmligthe (AE) 2020/3 ón gCoimisiún (3), arna leasú le Rialachán Tarmligthe (AE) 2020/2237 (4), cuireadh síneadh leis an maolú sin ón 1 Eanáir 2020 go dtí an 31 Nollaig 2022.

(3)

An 18 Márta 2022, chuir an Iodáil moladh comhpháirteach nua faoi bhráid an Choimisiúin, i gcomhréir le nós imeachta Airteagal 15(3) de Rialachán (AE) 2019/1241, inar iarradh an maolú ar Iarscríbhinn IX a ghabhann le Rialachán (AE) 2019/1241 a bhunú a mhéid a bhaineann le MCRS na mbreallach maighdeogach sna huiscí teorann céanna san Iodáil. Chuathas i gcomhairle go cuí le MEDAC agus tacaíonn sé leis an moladh comhpháirteach.

(4)

Rinne an Coiste Eolaíoch, Teicniúil agus Eacnamaíoch um Iascach (STECF) measúnú ar an moladh comhpháirteach agus ar an bhfianaise eolaíoch thacaíochta a chuir an Iodáil isteach ag a seisiún iomlánach idir an 21 agus an 25 Márta 2022 (STECF 22-01) (5). Chuir STECF i dtábhacht gur tháinig méadú ar bhithmhais tráchtála nó gur fhan sí gan athrú i 9 n-urrann as 13 cinn a ndearnadh faireachán orthu idir 2017 agus 2020. Tháinig STECF ar an gconclúid gur éisc fhásta atá i ngabhálacha na mbreallach maighdeogach agus gur éisc fhásta, a mhairfidh tar éis iad a chur i ngrinneall na farraige, atá i mbreallaigh róbheaga aischurtha den chuid is mó. Mheas STECF nach ndéanann an t-iascach sin difear don chodán neamhaibí de dhaonra na mbreallach maighdeogach ar fud an domhain mar thoradh ar an maolú reatha ar MCRS, agus go bhfuil an laghdú ar MCRS ó 25 mm go 22 mm fós comhsheasmhach leis an gcuspóir maidir le cosaint na n-iasc óg a áirithiú, mar a cheanglaítear le hAirteagal 18 de Rialachán (AE) 2019/1241. Thairis sin, léirigh fianaise eolaíoch go bhfuil méid 22 mm níos mó ná méid na mbreallach maighdeogach aibí (idir 11 mm agus 12 mm) agus go bhfuil siad in ann líon mór úicítí a tháirgeadh, rud a chinnteodh saothrú inbhuanaithe na mbreallach maighdeogach, ar choinníoll go ndéantar bainistíocht iomchuí ar na hiascaigh. Sa chomhthéacs sin, thug STECF dá aire go bhfuil patrún saothraithe na mbreallach maighdeogach in uiscí teorann na hIodáile lena mbaineann in ann an iasclann a chosaint, limistéar na linnte pórúcháin a chosaint agus a fheabhsú agus an mheá a ndéanann cosaint chósta agus obair chothaithe difear di a athghníomhachtú. Dá bhrí sin, measann an Coimisiún go gcomhlíonann MCRS 22 mm na mbreallach maighdeogach, mar aon leis na bearta arna nglacadh ag an Iodáil ó bhí feidhm ag an maolú, na coinníollacha a leagtar amach in Airteagal 15(4), pointe (d), de Rialachán (AE) 2019/1241.

(5)

Mar sin féin, leis na gnéithe sa phlean bainistíochta, chinn STECF nach féidir measúnú a dhéanamh ar na tionchair a bheidh ag an athrú ar bhearta MCRS amach anseo agus go mbeadh gá le samhaltú daonra chun meastóireacht a dhéanamh ar na tionchair a bheidh ag an athrú ar bhearta MCRS amach anseo agus chun éifeacht choibhneasta MCRS a scaradh ó éifeachtaí eile an phlean agus ó fhachtóirí comhshaoil. Ghlac an Iodáil go hoifigiúil leis na sonraí ábhartha maidir le samhaltú daonra a chur isteach.

(6)

Ar bhonn na faisnéise a bailíodh ag an gcéim seo sa mholadh comhpháirteach, i measúnú MEDAC agus i measúnú STECF (STECF 22-01) agus ar bhonn na ngealltanas a thug lucht riaracháin na hIodáile, measann an Coimisiún go gcomhlíonann an maolú ar MCRS na ceanglais a bunaíodh le haghaidh bearta teicniúla in Airteagail 15 agus 18 de Rialachán (AE) 2019/1241.

(7)

Dá bhrí sin, ba cheart Iarscríbhinn IX a ghabhann le Rialachán (AE) 2019/1241 a leasú dá réir.

(8)

I bplean bainistíochta na hIodáile, sonraítear go ndéanfaidh an Iodáil dlúthfhaireachán ar stoic na mbreallach maighdeogach trí thuarascálacha a chuirfear chuig an gCoimisiún gach bliain.

(9)

Tá na bearta a mholtar sa mholadh comhpháirteach i gcomhréir le hAirteagal 18(3) de Rialachán (AE) Uimh. 1380/2013 ó Pharlaimint na hEorpa agus ón gComhairle (6) agus 15(4) de Rialachán (AE) 2019/1241.

(10)

Ós rud é go mbíonn tionchar díreach ag na bearta dá bhforáiltear sa Rialachán seo ar na gníomhaíochtaí eacnamaíocha a bhaineann le hiascaigh agus ar phleanáil shéasúr iascaireachta shoithí an Aontais, ba cheart don Rialachán seo teacht i bhfeidhm díreach tar éis a fhoilsithe,