(1)

Bunaíodh Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) le Rialachán (AE) 2016/794 ó Pharlaimint na hEorpa agus ón gComhairle (2) chun tacú agus treisiú le gníomhaíocht údaráis inniúla na mBallstát agus lena gcomhar frithpháirteach chun an choireacht thromchúiseach lena déantar difear do dhá Bhallstát nó níos mó, an sceimhlitheoireacht agus saghsanna eile coireachta a chosc agus a chomhrac lena ndéantar difear do leas coiteann a chumhdaítear le beartas de chuid an Aontais.

(2)

An tírdhreach slándála atá os comhair na hEorpa amach, is tírdhreach í a bhíonn ag síorathrú, tráth atá bagairtí slándála ag forbairt agus ag éirí níos casta. Baineann sceimhlitheoirí agus coirpigh eile leas as an gclaochlú digiteach agus as na teicneolaíochtaí nua, go háirithe idirnascacht agus doiléiriú na dteorainneacha idir an domhan fisiceach agus an domhan digiteach araon, mar shampla trína gcoireanna nó a gcéannachtaí a cheilt trí úsáid a bhaint as teicnící a bhíonn ag éirí níos sofaisticiúla i gcónaí. Tá sé cruthaithe ag sceimhlitheoirí agus coirpigh eile go bhfuil siad in ann an chaoi a n-oibrítear iad a oiriúnú agus gníomhaíochtaí coiriúla nua a fhorbairt le linn géarchéime, lena n-áirítear trí ghiaráil a dhéanamh ar uirlisí arna gcumasú ag an teicneolaíocht chun réimse agus scála a ngníomhaíochtaí coiriúla a iolrú agus a leathnú. Tá an sceimhlitheoireacht fós ina bagairt shuntasach ar shaoirse agus ar shlí mhaireachtála shaoránaigh an Aontais.

(3)

Scaipeann bagairtí atá ag forbairt agus bagairtí casta thar theorainneacha, cuimsíonn siad éagsúlacht coireanna a éascaíonn siad, agus tagann siad chun cinn i ngrúpaí coireachta eagraithe ilchoireachta a théann i mbun réimse leathan gníomhaíochtaí coiriúla. Toisc nach leor gníomhaíocht ar an leibhéal náisiúnta ná comhar trasteorann chun aghaidh a thabhairt ar na bagairtí trasnáisiúnta slándála sin, tá údaráis inniúla na mBallstát tar éis úsáid níos mó a bhaint as an tacaíocht agus as an saineolas a chuirtear ar fáil le Europol, chun an choireacht thromchúiseach agus an sceimhlitheoireacht a chosc agus a chomhrac. Ó tháinig Rialachán (AE) 2016/794 i bhfeidhm, tá méadú substaintiúil tar éis teacht ar thábhacht oibríochtúil chúraimí Europol. Thairis sin leis an timpeallacht bagartha nua, athraítear raon feidhme agus cineál na tacaíochta ó Europol a theastaíonn ó na Ballstáit agus a bhfuil súil acu léi chun saoránaigh a choimeád slán.

(4)

Ba cheart, dá bhrí sin, cúraimí breise a thabhairt do Europol leis an Rialachán seo, ionas go mbeadh Europol in ann tacaíocht níos fearr a thabhairt d’údaráis inniúla na mBallstát agus freagrachtaí na mBallstát i limistéar na slándála náisiúnta a leagtar síos in Airteagal 4(2) den Chonradh ar an Aontas Eorpach (CAE) á gcaomhnú go hiomlán ag an am céanna. Ba cheart sainordú treisithe Europol a chothromú le coimircí neartaithe maidir le cearta bunúsacha agus cuntasacht, dliteanas agus maoirseacht mhéadaithe, lena n-áirítear formhaoirseacht pharlaiminteach agus trí fhormhaoirseacht Bhord Bainistíochta Europol (“an Bord Bainistíochta”). Chun go mbeadh Europol in ann a shainordú treisithe a chomhlíonadh, ba cheart acmhainní leordhóthanacha daonna agus airgeadais a sholáthar dó chun tacú lena chúraimí breise.

(5)

De réir mar a thugann an tAontas aghaidh ar bhagairtí atá ag dul i méid ó ghrúpaí coireachta eagraithe agus ó ionsaithe sceimhlitheoireachta, ní mór a áireamh sa fhreagairt éifeachtach forfheidhmithe dlí go mbeidh fáil ar aonaid idirghabhála speisialta dea-oilte idir-inoibritheacha atá speisialaithe i ngéarchéimeanna de dhéantús an duine a rialú. San Aontas, comhoibríonn aonaid speisialta idirghabhála de chuid na mBallstáit ar bhonn Chinneadh 2008/617/CGB ón gComhairle (3). Ba cheart Europol a bheith in ann tacú leis na haonaid speisialta idirghabhála sin, trí thacaíocht theicniúil agus airgeadais a sholáthar de chomhlánú ar na hiarrachtaí atá a ndéanamh ag na Ballstáit.

(6)

Le blianta beaga anuas, tá cibirionsaithe ar mórscála, lena n-áirítear ionsaithe de thionscnamh tríú tíortha dírithe ar eintitis phoiblí agus phríobháideacha araon thar go leor dlínsí laistigh den Aontas agus lasmuigh de araon, agus rinneadh difear d’earnálacha éagsúla lena n-áirítear seirbhísí iompair, sláinte agus airgeadais. Tacaítear le cibirionsaithe den sórt sin a chosc, a bhrath, a imscrúdú agus a ionchúiseamh trí chomhordú agus comhoibriú idir gníomhaithe ábhartha, lena n-áirítear Gníomhaireacht an Aontais Eorpaigh um Chibearshlándáil (ENISA) a bunaíodh le Rialachán (AE) 2019/881 ó Pharlaimint na hEorpa agus ón gComhairle (4), údaráis inniúla maidir le slándáil na líonra agus córas faisnéise de réir bhrí Threoir (AE) 2016/1148 ó Pharlaimint na hEorpa agus ón gComhairle (5), údaráis inniúla na mBallstát agus páirtithe príobháideacha. Chun an comhar éifeachtach a aírithiú idir na gníomhaithe ábhartha uile ar leibhéal an Aontais agus ar an leibhéal náisiúnta maidir le cibirionsaithe agus cibearbhagairtí, ba cheart do Europol, dul i gcomhar le ENISA go háirithe trí fhaisnéis a mhalartú agus trí thacaíocht anailíseach a sholáthar sna réimsí a thagann faoi chuimsiú a sainorduithe faoi seach.

(7)

Tá ról ceannasach ag coirpigh ardriosca i líonraí coiriúla agus baineann ardriosca lena ngníomhaíochtaí coiriúla ó thaobh shlándáil inmheánach an Aontais de. Chun grúpaí coireachta eagraithe ardriosca agus a bpríomhbhaill a chomhrac, ba cheart Europol a bheith in ann tacú leis na Ballstáit chun a bhfreagairt imscrúdaithe a dhíriú ar bhaill agus príomhbhaill na líonraí sin a shainaithint, mar aon lena ngníomhaíochtaí coiriúla agus a sócmhainní airgeadais.

(8)

Leis na bagairtí a bhaineann leis an gcoireacht thromchúiseach, éilítear leo freagairt chomhordaithe, chomhleanúnach, ildisciplíneach agus ilghníomhaireachta. Ba cheart Europol a bheith in ann tionscnaimh slándála bunaithe ar ffaisnéis atá á stiúradh ag na Ballstáit a éascú agus tacú leo, agus é mar aidhm leis na tionscnaimh sin bagairtí tromchúiseacha coireachta a shainaithint, a chur in ord tosaíochta agus aghaidh a thabhairt orthu, mar shampla, an tArdán Eorpach Ildisciplíneach i gCoinne Bagairtí Coiriúla (Empact). Ba cheart Europol a bheith in ann tacaíocht riaracháin, lóistíochta, airgeadais agus oibríochta a sholáthar do thionscnaimh den sórt sin.

(9)

Is uirlis riachtanach é Córas Faisnéise Schengen (CFS) a bunaíodh le Rialachán (AE) 2018/1862 ó Pharlaimint na hEorpa agus ón gComhairle (6) i réimse an chomhair póilíneachta agus breithiúnais i ngnóthaí coiriúla chun leibhéal ard slándála a choinneáil ar bun laistigh de réimse na saoirse, na slándála agus an cheartais. Is mol é Europol le haghaidh malartú faisnéise san Aontas, mol a fhaigheann faisnéis luachmhar agus a choinníonn ó thríú tíortha agus ó eagraíochtaí idirnáisiúnta í faoi dhaoine a bhfuil amhras ann ina leith go bhfuil siad ag gabháil do choireanna a thagann faoi chuimsiú chuspóirí Europol. Laistigh de chuimsiú a chuspóirí agus a chúraim chun tacú leis na Ballstáit an choireacht thromchúiseach agus an sceimhlitheoireacht a chosc agus a chomhrac, ba cheart do Europol tacú leis na Ballstáit chun na sonraí a sholáthraíonn tríú tíortha agus eagraíochtaí idirnáisiúnta dó a phróiseáil, trína mholadh go n-iontrálfadh na Ballstáit foláirimh in CFS faoi chatagóir nua foláireamh faisnéise ar mhaithe leis an Aontas (“foláirimh faisnéise”), chun na foláirimh faisnéise sin a sholáthar d’úsáideoirí deiridh CFS. Chuige sin, ba cheart sásra tuairiscithe thréimhsiúil a chur ar bun chun a áirithiú go gcuirfear na Ballstáit agus Europol ar an eolas faoi thoradh an fhíoraithe agus na hanailíse ar na sonraí sin agus i dtaobh cibé acu ar iontráladh nó nár iontráladh an fhaisnéis in CFS. Na modúlachtaí le haghaidh comhar idir na Ballstát maidir le sonraí den sórt sin a phróiseáil agus foláirimh a iontráil in CFS, go háirithe maidir leis an gcomhrac i gcoinne na sceimhlitheoireachta, ba cheart iad a bheith faoi réir comhordaithe leanúnaigh i measc na mBallstát. Ba cheart don Bhord Bainistíochta na critéir a shonrú ar ar a mbonn ba cheart Europol a bheith in ann tograí a eisiúint maidir le faisnéis den sórt sin a iontráil in CFS.

(10)

Tá ról tábhachtach ag EUROPOL maidir le tacaíocht a thabhairt don sásra meastóireachta agus faireacháin chun cur i bhfeidhm acquis Schengen a bunaíodh le Rialachán (AE) Uimh. 1053/2013 ón gComhairle (7) a fhíorú. Ba cheart do Europol, dá bhrí sin, arna iarraidh sin do na Ballstáit, saineolas, anailís, tuarascálacha agus faisnéis ábhartha eile atá aige a úsáid chun rannchuidiú leis an sásra meastóireachta agus faireacháin chun cur i bhfeidhm acquis Schengen a fhíorú.

(11)

Le measúnuithe riosca, cuidítear chun treochtaí nua a réamh-mheas agus chun aghaidh a thabhairt ar bhagairtí nua ó choireacht thromchúiseach agus ón sceimhlitheoireacht. Chun tacú leis an gCoimisiún agus leis na Ballstáit measúnuithe éifeachtacha riosca a dhéanamh, ba cheart do Europol measúnuithe anailíse ar bhagairtí a sholáthar don Choimisiún agus do na Ballstáit bunaithe ar an bhfaisnéis atá aige maidir le feiniméin agus treochtaí coireachta, gan dochar do dhlí an Aontais maidir le bainistíocht riosca custaim.

(12)

Maidir le cistiú an Aontais le haghaidh taighde faoin tslándáil, ionas go bhféadfar aidhm an chistithe a bhaint amach, acmhainneacht an taighde ar fad a fhorbairt agus aghaidh a thabhairt ar riachtanais an fhorfheidhmithe dlí, ba cheart do Europol cúnamh a thabhairt don Choimisiún príomhthéamaí taighde a shainaithint, agus cláir réime an Aontais um thaighde agus um nuálaíocht is ábhartha do chuspóirí Europol a tharraingt suas agus a chur chun feidhme. I gcás inarb ábhartha, ba cheart é a bheith indéanta do Europol torthaí a chuid gníomhaíochtaí taighde agus nuálaíochta a scaipeadh mar chuid dá rannchuidiú le sineirgí a chruthú idir gníomhaíochtaí taighde agus nuálaíochta comhlachtaí ábhartha de chuid an Aontais. Agus gníomhaíochtaí taighde agus nuálaíochta is ábhartha do chuspóirí Europol á gceapadh agus á gcoincheapadh aige, ba cheart Europol a bheith in ann dul i gcomhairle leis an Airmheán Comhpháirteach Taighde de chuid an Choimisiúin, i gcás inarb iomchuí. Ba cheart do Europol gach beart is gá a dhéanamh chun coinbhleachtaí leasa a sheachaint. Níor cheart do Europol maoiniú a fháil ar chlár ar leith de chuid an Aontais i gcás ina gcuidíonn sé leis an gCoimisiún chun príomhthéamaí taighde a shainaithint ná chun an clár sin a tharraingt suas agus a chur chun feidhme. Tá sé tábhachtach go mbeidh Europol in ann brath ar sholáthar cistithe leordhóthanaigh a fháil chun go bhféadfaidh sé cabhrú leis na Ballstáit agus leis an gCoimisiún i réimse an taighde agus na nuálaíochta.

(13)

Is féidir leis an Aontas agus leis na Ballstáit bearta sriantacha a bhaineann le hinfheistíocht dhíreach choigríche a ghlacadh ar fhorais na slándála nó an oird phoiblí. Chuige sin, le Rialachán (AE) 2019/452 ó Pharlaimint na hEorpa agus ón gComhairle (8), cuirtear ar bun creat maidir le hinfheistíochtaí díreacha coigríche isteach san Aontas a scagadh. Ní mór aird ar leith a thabhairt ar infheistíochtaí díreacha coigríche i dteicneolaíochtaí atá ag teacht chun cinn toisc go bhféadfadh impleachtaí suntasacha a bheith acu ar an tslándáil agus ar an ord poiblí, go háirithe nuair a bhíonn teicneolaíochtaí den sórt sin á n-úsáid ag údaráis inniúla na mBallstát. I bhfianaise rannpháirtíocht Europol maidir le faireachán a dhéanamh ar theicneolaíochtaí atá ag teacht chun cinn agus a rannpháirtíocht maidir le bealaí nua a fhorbairt chun na teicneolaíochtaí sin a úsáid chun críocha fhorfheidhmiú an dlí, go háirithe trína Shaotharlann Nuálaíochta agus trí Mhol Nuálaíochta maidir leis an tSlándáil Inmheánach, tá eolas fairsing ag Europol faoi na deiseanna a ghabhann leis na teicneolaíochtaí sin agus faoi na rioscaí a bhaineann lena n-úsáid. Ba cheart, dá bhrí sin, Europol a bheith in ann tacú leis na Ballstáit scagadh a dhéanamh ar infheistíochtaí díreacha coigrícha isteach san Aontas agus ar na rioscaí gaolmhara don tslándáil a bhaineann le gnóthais a sholáthraíonn teicneolaíochtaí, lena n-áirítear bogearraí arna n-úsáid ag Europol chun coireanna a thagann faoi chuimsiú chuspóirí Europol nó teicneolaíochtaí criticiúla a d’fhéadfaí a úsáid chun sceimhlitheoireacht a éascú a chosc agus a imscrúdú. Sa chomhthéacs sin, le saineolas Europol, ba cheart tacú le scagadh na n-infheistíochtaí díreacha coigrícha agus leis na rioscaí don tslándáil a bhaineann leo. Ba cheart aird ar leith a thabhairt ar cé acu a bhí nó nach raibh an t-infheisteoir coigríche rannpháirteach cheana féin i ngníomhaíochtaí lena ndéantar difear don tslándáil, cé acu an bhfuil nó nach bhfuil riosca tromchúiseach ann go mbíonn an t-infheisteoir coigríche rannpháirteach i ngníomhaíochtaí neamhdhleathacha nó coiriúla, agus an bhfuil an t-infheisteoir coigríche faoi rialú díreach nó indíreach ag rialtas tríú tír, lena n-áirítear trí fhóirdheontais.

(14)

Soláthraíonn Europol saineolas speisialaithe chun an choireacht thromchúiseach agus an sceimhlitheoireacht a chomhrac. Arna iarraidh sin do Bhallstát, ba cheart foireann Europol a bheith in ann tacaíocht oibríochtúil a sholáthar d’údaráis inniúla an Bhallstáit sin in oibríochtaí agus in imscrúduithe, go háirithe trí mhalartú faisnéise trasteorann a éascú agus tacaíocht fhóiréinseach agus theicniúil a sholáthar in oibríochtaí agus in imscrúduithe, lena n-áirítear i gcomhthéacs foirne comhpháirteacha imscrúdaithe. Arna iarraidh sin do Bhallstát, ba cheart foireann Europol a bheith i dteideal a bheith i láthair le linn bearta imscrúdaithe a dhéanamh sa Bhallstát sin. Níor cheart é a bheith de chumhacht ag foireann Europol bearta imscrúdaitheacha a dhéanamh.

(15)

Ar cheann de chuspóirí Europol, tá tacú agus treisiú le gníomhaíocht údaráis inniúla na mBallstát agus lena gcomhar frithpháirteach chun saghsanna coireachta a dhochraíonn leas coiteann atá ina ábhar do bheartas de chuid an Aontais a chosc agus a chomhrac. Chun an tacaíocht sin a neartú, ba cheart Stiúrthóir Feidhmiúcháin Europol (“an Stiúrthóir Feidhmiúcháin”) a bheith in ann a mholadh do na húdaráis inniúla de chuid Ballstáit go ndéanfadh said imscrúdú a thionscnamh, a chur i gcrích nó a chomhordú maidir le coir nach mbaineann ach leis an mBallstát sin amháin ach a dhochraíonn leas coiteann atá ina ábhar do bheartas de chuid an Aontais. Ba cheart do Europol Eurojust agus, i gcás inarb ábhartha, Oifig an Ionchúisitheora Phoiblí Eorpaigh (“OIPE”) a cuireadh ar bun le Rialachán (AE) 2017/1939 ón gComhairle (9), a chur ar an eolas faoi aon togra den sórt sin.

(16)

Ach céannacht agus sonraí pearsanta áirithe daoine atá faoi drochamhras nó daoine ciontaithe a bhfuiltear sa tóir orthu bunaithe ar chinneadh breithiúnach náisiúnta, a fhoilsiú, méadaítear seans na mBallstát go ndéanfar daoine aonair den sórt sin a aimsiú agus a ghabháil. Chun tacú leis na Ballstáit le daoine aonair den sórt sin a aimsiú agus a ghabháil, ba cheart Europol a bheith in ann faisnéis a fhoilsiú ar a shuíomh gréasáin maidir leis na héalaithigh is mó a bhfuil tóir orthu san Eoraip a mhéid a bhaineann le cionta coiriúla a thagann faoi chuimsiú chuspóirí Europol. Chun na críche céanna sin, ba cheart do Europol soláthar faisnéise ón bpobal do na Ballstáit agus Europol i dtaca leis na daoine sin a éascú.

(17)

Nuair a fhionnfaidh Europol go dtagann na sonraí pearsanta a fhaigheann sé faoina chuspóirí, ba cheart Europol a bheith in ann na sonraí pearsanta sna ceithre staid seo a leanas a phróiseáil.. Sa chéad staid„ baineann na sonraí pearsanta a bhfuair Europol le haon cheann de na catagóirí d’ábhair sonraí a liostaítear in Iarscríbhinn II a ghabhann le Rialachán (AE) 2016/794 (“Iarscríbhinn II”). Sa dara staid, is éard atá sna sonraí pearsanta a fuarthas sonraí imscrúdaitheacha ina bhfuil sonraí nach mbaineann le haon cheann de na catagóirí d’ábhair sonraí a liostaítear in Iarscríbhinn II ach ar sholáthair Ballstát, OIPE, Eurojust nó tríú tír iad de bhun iarraidh ar thacaíocht Europol le haghaidh imscrúdú coiriúil sonrach, ar choinníoll go bhfuil an Ballstát sin, OIPE, Eurojust nó an tríú tír sin údaraithe chun sonraí imscrúdaitheacha den sórt sin a phróiseáil i gcomhréir leis na ceanglais nós imeachta agus na coimircí is infheidhme faoi dhlí an Aontais agus faoin dlí náisiúnta. Sa staid sin, ba cheart Europol a bheith in ann na sonraí imscrúdaitheacha sin a phróiseáil chomh fada agus a thacaíonn sé leis an imscrúdú coiriúil shonrach sin. Sa tríú staid, d’fhéadfadh nach mbaineann na sonraí pearsanta a fuarthas leis na catagóirí d’ábhair sonraí a liostaítear in Iarscríbhinn II agus nár soláthraíodh iad de bhun iarraidh ar thacaíocht Europol le haghaidh imscrúdú coiriúil sonrach. Sa staid sin, ba cheart Europol a bheith in ann a fhíorú an gcomhfhreagraíonn na sonraí pearsanta d’aon cheann de na catagóirí d’ábhair sonraí sin. Sa cheathrú staid, tíolacadh na sonraí pearsanta chun críocha tionscadail taighde agus nuálaíochta, agus ní bhaineann siad leis na catagóirí d’ábhair sonraí a liostaítear in Iarscríbhinn II.

(18)

I gcomhréir le hAirteagal 73 de Rialachán (AE) 2018/1725 ó Pharlaimint na hEorpa agus ón gComhairle (10), i gcás inarb infheidhme agus a mhéid is féidir, tá Europol le hidirdhealú soiléir a dhéanamh idir sonraí pearsanta a bhaineann leis na catagóirí d’ábhair sonraí a liostaítear in Iarscríbhinn II.

(19)

I gcás ina n-úsáideann na Ballstáit bonneagar Europol chun sonraí pearsanta a mhalartú maidir le coireanna nach dtagann faoi chuimsiú chuspóirí Europol, níor cheart rochtain a bheith ag Europol ar na sonraí sin agus ba cheart a mheas gur “próiseálaí” é de bhun Airteagal 87 de Rialachán (AE) 2018/1725. Sna cásanna sin, ba cheart Europol a bheith in ann na sonraí sin nach mbaineann leis na catagóirí d’ábhair sonraí a liostaítear in Iarscríbhinn II a phróiseáil. I gcás ina n-úsáideann na Ballstáit bonneagar Europol chun sonraí pearsanta a mhalartú maidir le coireanna a thagann faoi chuimsiú chuspóirí Europol agus ina dtugann siad rochtain ar na sonraí sin do Europol, ba cheart feidhm a bheith ag na ceanglais atá nasctha leis na catagóirí d’ábhair sonraí a liostaítear in Iarscríbhinn II i ndáil le haon phróiseáil eile a dhéanann Europol ar na sonraí sin.

(20)

Agus prionsabal an íoslaghdaithe sonraí á urramú, ba cheart Europol a bheith in ann a fhíorú an mbaineann sonraí pearsanta a fhaightear i gcomhthéacs coireanna a chosc agus a chomhrac, ar coireanna iad a thagann faoi chuimsiú a chuspóirí, le ceann amháin de na catagóirí d’ábhair sonraí a liostaítear in Iarscríbhinn II. Chuige sin, ba cheart do Europol a bheith in ann réamh-anailís a dhéanamh ar shonraí pearsanta a fhaightear chun a chinneadh cibé acu a mbaineann nó nach mbaineann na sonraí sin le haon cheann de na catagóirí d’ábhair sonraí sin agus chun na críche sin amháin trí na sonraí pearsanta sin a sheiceáil i gcoinne na sonraí atá ina seilbh aige cheana, gan tuilleadh anailíse a dhéanamh ar na sonraí pearsanta sin. Ba cheart an réamh-anailís sin a dhéanamh sula ndéanfaidh Europol sonraí a phróiseáil le haghaidh cros-seiceála, anailís straitéiseach, anailís oibríochtúil nó malartú faisnéise agus tar éis do Europol a áirithiú go bhfuil na sonraí i dtrácht ábhartha agus riachtanach chun a chuid cúraimí a chomhlíonadh, agus ba cheart í a dhéanamh ar leithligh ón bpróiseáil sin. A luaithe a fhionnfaidh Europol go mbaineann na sonraí pearsanta sin leis na catagóirí d’ábhair sonraí a liostaítear in Iarscríbhinn II, ba cheart do Europol a bheith in ann na sonraí pearsanta sin a phróiseáil le haghaidh cros-seiceála, anailís straitéiseach, anailís oibríochtúil nó malartú faisnéise. Má thagann Europol ar an tátal nach mbaineann na sonraí pearsanta sin leis na catagóirí d’ábhair sonraí a liostaítear in Iarscríbhinn II, ba cheart dó na sonraí sin a scriosadh.

(21)

D’fhéadfadh sé go n-athródh catagóiriú sonraí pearsanta i dtacar sonraí ar leith le himeacht ama mar thoradh ar fhaisnéis nua a thagann chun cinn i gcomhthéacs imscrúduithe coiriúla, mar shampla maidir le tuilleadh daoine faoi amhras. Ar an gcúis sin, ba cheart cead a bheith ag Europol sonraí pearsanta a phróiseáil i gcás ina bhfuil sé fíor-riachtanach agus comhréireach chun críche catagóirí d’ábhair sonraí lena mbaineann na sonraí i dtrácht a chinneadh ar feadh tréimhse nach faide ná 18 mí ón uair a fhionnann Europol go dtagann na sonraí pearsanta sin faoi chuimsiú a chuspóirí. Ba cheart do Europol a bheith in ann síneadh suas go 3 bliana a chur leis an tréimhse i gcásanna a bhfuil údar cuí leo agus ar choinníoll go bhfuil síneadh den sórt sin riachtanach agus comhréireach. Ba cheart an Maoirseoir Eorpach ar Chosaint Sonraí (MECS) a chur ar an eolas faoin síneadh. I gcás nach bhfuil gá a thuilleadh le sonraí pearsanta a phróiseáil chun catagóirí d’ábhair sonraí a chinneadh agus nach bhfuil údar léi a thuilleadh, agus in aon chás tar éis dheireadh na huastréimhse próiseála, ba cheart do Europol na sonraí pearsanta a scriosadh.

(22)

Tá méid na sonraí a bhailítear in imscrúduithe coiriúla ag dul i méid agus tá tacair sonraí níos casta anois. Cuireann na Ballstáit tacair mhóra chasta sonraí faoi bhráid Europol, agus iarrtar anailís oibríochtúil Europol chun naisc le coireanna seachas iad is ábhar don imscrúdú sa chomhthéacs inar bailíodh iad agus le coirpigh eile i mBallstáit eile agus lasmuigh den Aontas a shainaithint. Ós rud é gur féidir le Europol naisc thrasteorann den sórt sin a bhrath ar bhealach is éifeachtaí ná na Ballstáit trí anailís a dhéanamh astu féin ar na sonraí, ba cheart Europol a bheith in ann tacú le himscrúduithe coiriúla na mBallstát ach tacair mhóra chasta sonraí a phróiseáil chun naisc thrasteorann den sórt sin a shainaithint ar choinníoll go gcomhlíontar na diancheanglais agus coimircí a leagtar amach sa Rialachán seo. I gcás inar gá sin chun tacú go héifeachtach le himscrúdú coiriúil sonrach a leanann go fóill i mBallstát, ba cheart Europol a bheith in ann próiseáil a dhéanamh ar na sonraí imscrúdaitheacha a n-údaraítear do na húdaráis náisiúnta iad a phróiseáil san imscrúdú coiriúil sonrach sin i gcomhréir le ceanglais nós imeachta agus coimircí is infheidhme faoin dlí náisiúnta agus a chuirtear faoi bhráid Europol ina dhiaidh sin. Ba cheart a áireamh leis sin sonraí pearsanta i gcásanna nach raibh Ballstát in ann a fhionnadh an mbaineann na sonraí sin leis na catagóirí d‘ábhair sonraí a liostaítear in Iarscríbhinn II. I gcás ina dtugann Ballstát, OIPE nó Eurojust sonraí imscrúdaitheacha do Europol agus tacaíocht Europol á hiarraidh acu d’imscrúdú coiriúil sonrach a leanann go fóill, ba cheart Europol a bheith in ann na sonraí sin a phróiseáil chomh fada agus a thacaíonn sé leis an imscrúdú coiriúil sonrach sin, i gcomhréir le ceanglais nós imeachta agus coimircí is infheidhme faoi dhlí an Aontais nó faoin dlí náisiúnta.

(23)

Chun a áirithiú go bhfuil aon phróiseáil a dhéantar i gcomhthéacs imscrúdú coiriúil ar shonraí riachtanach agus comhréireach, ba cheart do na Ballstáit a áirithiú go gcomhlíontar dlí an Aontais agus dlí náisiúnta nuair a chuireann siad sonraí imscrúdaitheacha faoi bhráid Europol. Agus sonraí imscrúdaitheacha á gcur faoi bhráid Europol chun tacaíocht Europol a iarraidh i gcomhair imscrúdú coiriúil sonrach, ba cheart do na Ballstáit scála agus castacht na próiseála sonraí lena mbaineann agus cineál agus tábhacht an imscrúdaithe a mheas. Ba cheart do na Ballstáit Europol a chur ar an eolas, i gcomhréir le ceanglais nós imeachta agus coimircí nós imeachta is infheidhme faoina ndlí náisiúnta, nuair nach bhfuil siad údaraithe a thuilleadh sonraí a phróiseáil san imscrúdú coiriúil sonrach i dtrácht, ar imscrúdú é a leanann go fóill. Níor cheart do Europol ach sonraí pearsanta a phróiseáil, ar sonraí iad nach dtagann faoi na catagóirí d’ábhair sonraí a liostaítear in Iarscríbhinn II i gcás ina ndeánann sé a mheas nach bhfuil sé indéanta tacú le himscrúdú coiriúil sonrach a leanann go fóill gan na sonraí pearsanta sin a phróiseáil. Ba cheart do Europol an measúnú sin a dhoiciméadú. Ba cheart do Europol sonraí den sórt sin a choimeád deighilte go feidhmiúil ó shonraí eile agus níor cheart iad a phróiseáil ach i gcás inar gá don tacaíocht d’imscrúdú coiriúil sonrach i dtrácht, ar imscrúdú é a leanann go fóill, mar shampla i gcás leide nua.

(24)

Ba cheart Europol a bheith in ann próiseáil a dhéanamh ar shonraí pearsanta is gá don tacaíocht a thugann sé d’imscrúdú coiriúil sonrach i mBallstát amháin nó níos mó i gcás ina soláthraíonn tríú tír na sonraí sin, ar choinníoll gur ábhar í an tríú tír do chinneadh leordhóthanachta i gcomhréir le Treoir (AE) 2016/680 ó Pharlaimint na hEorpa agus ón gComhairle (11) (“cinneadh leordhóthanachta”); go bhfuil comhaontú idirnáisiúnta leis an tríú tír tugtha chun críche ag an Aontas de bhun Airteagal 218 den Chonradh ar Fheidhmiú an Aontais Eorpaigh (CFAE), a n-áirítear ann aistriú sonraí pearsanta chun críocha fhorfheidhmiú an dlí (“comhaontú idirnáisiúnta”); nó go bhfuil comhaontú comhair lena gceadaítear malartú sonraí pearsanta a tugtha chun críche idir Europol agus an tríú tír sin roimh theacht i bhfeidhm Rialachán (AE) 2016/794 (“comhaontú comhair”); nó go bhfuil foráil déanta do choimircí iomchuí i ndáil le cosaint sonraí pearsanta in ionstraim atá ceangailteach nó go gcinneann Europol, bunaithe ar mheasúnú ar na himthosca go léir a bhaineann le haistriú sonraí pearsanta, gurb ann do na coimircí sin sa tríú tír sin agus ar choinníoll go bhfuair an tríú tír na sonraí i gcomhthéacs imscrúdú coiriúil i gcomhréir leis na ceanglais nós imeachta agus na coimircí is infheidhme faoin dlí náisiúnta coiriúil. I gcás ina ndéanann tríú tír sonraí imscrúdaitheacha a sholáthar do Europol, ba cheart do Europol a dheimhniú nach follasach go bhfuil líon na sonraí pearsanta díréireach ó thaobh imscrúdú coiriúil sonrach lena dtacaíonn Europol sa Bhallstát lena mbaineann i mBallstát lena dtacaíonn Europol, agus, a mhéid is féidir, nach bhfuil aon chomharthaí oibiachtúla ann gur bailíodh sonraí imscrúdaitheacha sa tríú tír de shárú follasach ar chearta bunúsacha. I gcás ina gcinneann Europol nach bhfuil na coinníollacha sin á gcomhlíonadh, níor cheart dó na sonraí a phróiseáil agus bac heart dó iad a scriosadh. I gcás ina soláthraíonn tríú tír sonraí imscrúdaitheacha do Europol, ba cheart d’Oifigeach Cosanta Sonraí Europol a bheith in ann fógra a thabhairt do MECS i gcás inarb iomchuí.

(25)

Chun a áirithiú gur féidir le Ballstát tuarascálacha Europol a úsáid i gcomhthéacs imeachtaí breithiúnacha tar éis imscrúdú coiriúil, ba cheart do Europol a bheith in ann na sonraí imscrúdaitheacha lena mbaineann a stóráil arna iarraidh sin don Bhallstát sin, ag OIPE nó ag Eurojust chun críche fírinneacht, iontaofacht agus inrianaitheacht phróiseas na faisnéise coiriúla a áirithiú. Ba cheart do Europol sonraí den sórt sin a choimeád deighilte go feidhmiúil ó shonraí eile ach amháin fad is a bhíonn na himeachtaí breithiúnacha a bhaineann leis an imscrúdú coiriúil sin ar siúl sa Bhallstát. Thairis sin, is gá rochtain údarás inniúil breithiúnach a áirithiú chomh maith leis na cearta chun cosanta, go háirithe ceart daoine atá faoi dhrochamhras nó daoine cúisithe nó a ndlíodóirí rochtain a fháil ar ábhair an cháis. Chun na críche sin, ba cheart do Europol taifead a choinneáil ar an bhfianaise ar fad agus ar na modhanna trína ndearna Europol an fhianaise sin a sholáthar nó a fháil chun go mbeidh an chosaint in ann grinnscrúdú éifeachtach a dhéanamh ar an bhfianaise.

(26)

Ba cheart Europol a bheith in ann sonraí pearsanta atá faighte aige roimh theacht i bhfeidhm an Rialacháin seo, ar sonraí iad nach mbaineann le catagóirí d’ábhair sonraí a liostaítear in Iarscríbhinn II, i gcomhréir leis an Rialachán seo, a phróiseáil in dhá staid. Sa chéad staid, ba cheart Europol a bheith in ann na sonraí pearsanta sin a phróiseáil mar thaca le himscrúdú coiriúil nó chun fírinneacht, iontaofacht agus inrianaitheacht phróiseas na faisnéise coiriúla a áirithiú, ar choinníoll go gcomhlíontar na ceanglais a leagtar amach sna socruithe idirthréimhseacha maidir le próiseáil sonraí pearsanta a fhaightear mar thaca le himscrúdú coiriúil. Sa dara staid, ba cheart Europol a bheith in ann a fhíorú freisin an mbaineann na sonraí pearsanta den sórt sin le ceann de na chatagóirí d’ábhair sonraí a liostaítear in Iarscríbhinn II trí réamhanailís a dhéanamh ar na sonraí pearsanta ar feadh tréimhse nach faide ná 18 mí ón dáta a bhfuarthas na sonraí den chéad uair, nó i gcásanna a bhfuil údar leo agus ina bhfuil réamhúdarú ó MECS, ar feadh tréimhse is faide. Níor cheart an uastréimhse ina ndéantar na sonraí pearsanta a phróiseáil chun críche réamhanailís den sórt sin a bheith níos faide ná 3 bliana ón dáta a bhfuair Europol na sonraí den chéad uair.

(27)

Éilítear dlúthchomhar idir údaráis inniúla na mBallstát lena mbaineann i gcásanna trasteorann a bhfuil an choireacht thromchúiseach nó an sceimhlitheoireacht i gceist leo. Soláthraíonn Europol uirlisí chun tacú le comhar den sórt sin in imscrúduithe, go háirithe tríd an malartú faisnéise. Chun an comhar sin a fheabhsú a thuilleadh in imscrúduithe coiriúla sonracha trí anailís oibríochtúil chomhpháirteach, ba cheart do na Ballstáit a bheith in ann Ballstáit eile a cheadú an fhaisnéis a chuir siad faoi bhráid Europol a rochtain go díreach, gan dochar d’aon srianta ginearálta nó sonracha a chuireann siad ar rochtain na faisnéise sin. Ba cheart aon phróiseáil a dhéanann na Ballstáit ar shonraí pearsanta in anailís oibríochtúil chomhpháirteach a dhéanamh i gcomhréir leis an Rialachán seo agus le Treoir (AE) 2016/680.

(28)

Ba cheart do Europol agus do OIPE socrú oibre a thabhairt i gcrích lena leagtar amach modúlachtaí a gcomhair, agus aird chuí á tabhairt ar a gcuid inniúlachtaí faoi seach. Ba cheart do Europol oibriú i ndlúthchomhar le OIPE agus tacú go gníomhach le himscrúduithe OIPE arna iarraidh sin dó, lena n-áirítear trí thacaíocht anailíseach agus faisnéis ábhartha a sholáthar. Ba cheart do Europol dul i gcomhar le OIPE, ón nóiméad a thuairiscítear cion amhrasta do OIPE go dtí an nóiméad a chinneann OIPE cibé acu ba cheart an cás a ionchúiseamh nó a dhiúscairt. Ba cheart do Europol, gan moill mhíchuí, aon iompar coiriúil a chur in iúl do OIPE a mbeadh OIPE in ann a inniúlacht a fheidhmiú ina leith. Chun comhar oibríochtúil idir Europol agus OIPE a fheabhsú, ba cheart do Europol é a chur ar chumas OIPE, ar bhonn córas “amas a fháil/gan amas a fháil”, rochtain a fháil ar shonraí atá ag Europol nach dtugann fógra ach do Europol amháin i gcás amais, i gcomhréir leis an Rialachán seo, lena n-áirítear aon srianta arna sonrú ag an soláthraí a sholáthair an fhaisnéis do Europol. Má chumhdaítear an fhaisnéis sin le srian a shonraigh Ballstát, ba cheart do Europol an t-ábhar a tharchur chuig an mBallstát sin, chun a chuid oibleagáidí faoi Rialachán (AE) 2017/1939 a chomhlíonadh. Ba cheart don Bhallstát lena mbaineann OIPE a chur ar an eolas ina dhiaidh sin i gcomhréir lena nós imeachta náisiúnta. Ba cheart feidhm a bheith ag na rialacha maidir le tarchur sonraí pearsanta chuig comhlachtaí an Aontais a leagtar amach sa Rialachán seo maidir le comhar Europol le OIPE. Ina theannta sin, ba cheart Europol a bheith in ann tacú le himscrúduithe OIPE trí anailís a dhéanamh ar thacair mhóra agus chasta sonraí, i gcomhréir leis na coimircí agus na ráthaíochtaí cosanta dlí dá bhforáiltear sa Rialachán seo.

(29)

Ba cheart do Europol oibriú i ndlúthchomhar leis an Oifig Eorpach Frith-Chalaoise chun calaois, éilliú agus aon ghníomhaíocht neamhdhleathach eile lena ndéantar difear do leasanna airgeadais an Aontais a bhrath. Chuige sin, ba cheart do Europol aon fhaisnéis a bhféadfadh OLAF a inniúlacht a fheidhmiú ina leith a tharchur chuig OLAF gan moill mhíchuí. Ba cheart feidhm a bheith ag na rialacha maidir le tarchur sonraí pearsanta chuig comhlachtaí an Aontais a leagtar amach sa Rialachán seo maidir le comhar Europol le OLAF.

(30)

Is minic a bhíonn naisc lasmuigh den Aontas ag an gcoireacht thromchúiseach agus an sceimhlitheoireacht. Is féidir le Europol sonraí pearsanta a mhalartú le tríú tíortha ach cosaint príobháideachais agus cearta agus saoirsí bunúsacha na n-ábhar sonraí a chosaint. I gcás ina bhfuil sé fíor-riachtanach chun coir shonrach a thagann faoi chuimsiú chuspóirí Europol a imscrúdú, ba cheart a cheadú don Stiúrthóir Feidhmiúcháin, ar bhonn cás ar chás, catagóir aistrithe sonraí pearsanta chuig tríú tíortha a údarú, i gcás ina mbaineann an chatagóir aistrithe den sórt sin leis an gcás sonrach céanna, inarb iad na catagóirí céanna sonraí pearsanta agus na catagóirí céanna d’ábhair sonraí atá i gceist, agus go bhfuil sé riachtanach agus comhréireach chun críoch imscrúdú a dhéanamh ar choir shonrach, agus ina gcomhlíonann sé ceanglais uile an Rialacháin seo. Maidir le haistrithe aonair a chumhdaítear le catagóir aistrithe, ba cheart é a bheith indéanta gan a áireamh ach cuid de na catagóirí sin de shonraí pearsanta agus na catagóirí sin d’ábhair sonraí a bhfuil aistriú ina leith údaraithe ag an Stiúrthóir Feidhmiúcháin.. Ba cheart é a bheith indéanta freisin catagóir aistrithe sonraí pearsanta a údarú sna cásanna sonracha seo a leanas: i gcás ina bhfuil gá le haistriú sonraí pearsanta chun leasanna ríthábhachtacha an ábhair sonraí nó duine eile a chosaint, nó i gcás ina bhfuil aistriú sonraí pearsanta fíor-riachtanach chun bagairt láithreach thromchúiseach ar shlándáil phoiblí Ballstáit nó tríú tír a chosc; i gcás inar críoch an aistrithe sonraí pearsanta leasanna dlisteanacha an ábhair sonraí a choimirciú, nó, i gcásanna aonair, chun críocha cionta coiriúla a chosc, a fhiosrú, a bhrath nó a ionchúiseamh nó chun smachtbhannaí coiriúla a fhorghníomhú; nó chun éilimh dhlíthiúla a bhunú, a fheidhmiú nó a chosaint, ar éilimh iad a bhaineann le cion coiriúil sonrach a fhiosrú nó a ionchúiseamh.

(31)

Níor cheart aistrithe nach bhfuil bunaithe ar údarú an Stiúrthóra Feidhmiúcháin, cinneadh leordhóthanachta, comhaontú idirnáisiúnta ná comhaontú comhair a cheadú ach amháin i gcás ina bhfuil coimircí iomchuí ann maidir le sonraí pearsanta a chosaint dá bhforáiltear in ionstraim atá ceangailteach ó thaobh dlí nó i gcás ina gcinneann Europol, ar bhonn measúnaithe ar na himthosca ar fad a bhaineann le haistriú sonraí pearsanta go bhfuil coimircí den sórt sin ann. Chun críocha an mheasúnaithe sin, ba cheart Europol a bheith in ann comhaontuithe déthaobhacha arna dtabhairt i gcrích idir Ballstáit agus tríú tíortha a chur san áireamh lena gceadaítear malartú sonraí pearsanta, agus cibé acu a bheidh nó nach mbeidh aistriú sonraí pearsanta faoi réir oibleagáidí rúndachta agus phrionsabal na sonraíochta, lena n-áiritheofar nach ndéanfar na sonraí a phróiseáil chun críocha eile seachas críocha an aistrithe. Ina theannta sin, tá sé tábhachtach go gcuirfidh Europol san áireamh cibé acu a d’fhéadfaí nó nach bhféadfaí úsáid a bhaint as na sonraí pearsanta chun pionós an bháis nó aon chineál íde cruálaí nó mídhaonna a iarraidh, a ghearradh nó a chur i gcrích. Ba cheart do Europol a bheith in ann coimircí breise a éileamh.

(32)

Chun tacú leis na Ballstáit dul i gcomhar le páirtithe príobháideacha i gcás ina bhfuil faisnéis is ábhartha chun an choireacht thromchúiseach agus an sceimhlitheoireacht a chosc agus a chomhrac ag na páirtithe príobháideacha sin, ba cheart Europol a bheith in ann sonraí pearsanta ó pháirtithe príobháideacha a fháil agus, i gcásanna sonracha inar gá agus inar comhréireach, sonraí pearsanta a mhalartú le páirtithe príobháideacha.

(33)

Baineann coirpigh úsáid níos mó agus níos mó as seirbhísí a thairgeann páirtithe príobháideacha chun cumarsáid agus gníomhaíochtaí neamhdhleathacha a dhéanamh. Déanann ciontóirí gnéis dúshaothrú ar leanaí agus roinneann siad pictiúir agus físeáin ar ábhar mí-úsáide gnéasaí leanaí iad ar fud an domhain ar ardáin ar líne nó le piaraí trí sheirbhísí cumarsáide idirphearsanta atá neamhspleách ar uimhir. Baineann sceimhlitheoirí úsáid as na seirbhísí a thairgeann soláthraithe seirbhíse ar líne chun saorálaithe a earcú, ionsaithe a phleanáil agus a chomhordú, agus bolscaireacht a scaipeadh. Déanann cibearchoirpigh brabús as digitiú na sochaithe agus as easpa litearthachta digití agus scileanna digiteacha eile an phobail i gcoitinne ach úsáid a bhaint as an bhfioscaireacht agus as an innealtóireacht shóisialta chun cineálacha eile cibearchoireachta a dhéanamh, mar shampla camscéimeanna ar líne, ionsaithe bogearraí éirice nó calaois íocaíochta. Mar thoradh ar an úsáid mhéadaithe a bhaineann coirpigh as seirbhísí ar líne, tá líon na sonraí pearsanta atá ag páirtithe príobháideacha, lena n-áirítear sonraí síntiúsóirí, sonraí tráchta agus sonraí ábhair, a d’fhéadfadh a bheith ábhartha d’imscrúduithe coiriúla ag dul i méid.

(34)

I bhfianaise go bhfeidhmíonn an t-idirlíon gan beann ar theorainneacha, is féidir go mbeidh an soláthraí seirbhíse ar líne agus an bonneagar digiteach ina stóráiltear na sonraí pearsanta ar leithligh faoi réir dlínsí náisiúnta éagsúla, laistigh den Aontas nó lasmuigh de. Dá bhrí sin, d’fhéadfadh sé go mbeadh tacair sonraí ag páirtithe príobháideacha is ábhartha maidir le forfheidhmiú an dlí agus ina bhfuil sonraí pearsanta a thagann faoi inniúlacht roinnt dlínsí chomh maith le sonraí pearsanta nach féidir a chur i leith aon dlínse ar leith go héasca. Is féidir é a bheith deacair d’údaráis inniúla na mBallstát anailís éifeachtach a dhéanamh ar thacair ildlínse nó neamh-inchurtha sonraí den sórt sin trí réitigh náisiúnta. Thairis sin, níl aon phointe teagmhála aonair faoi láthair do pháirtithe príobháideacha a chinneann tacair shonraí a chomhroinnt go dleathach agus go deonach le húdaráis inniúla na mBallstát. Dá réir sin, ba cheart bearta a bheith i bhfeidhm ag Europol chun comhar le páirtithe príobháideacha a éascú, lena n-áirítear maidir le malartú faisnéise.

(35)

Chun a áirithiú go bhfuil pointe teagmhála ag páirtithe príobháideacha ar leibhéal an Aontais chun tacair sonraí nó tacair sonraí ildlínse a sholáthar go dleathach agus go deonach ar tacair sonraí nó tacair sonraí, ildlínse iad nach bhféadfaí a chur go héasca i leith dlínse sonrach amháin nó roinnt dlínsí sonracha a chomhroinnt go dleathach, ba cheart do Europol a bheith in ann sonraí pearsanta a fháil go díreach ó pháirtithe príobháideacha chun críche na Ballstáit a sholáthar leis an bhfaisnéis is gá chun a ndlínse a bhunú agus chun coireanna a fhiosrú faoina ndlínse faoi seach, i gcomhréir leis an Rialachán seo. D’fhéadfaí a áireamh san fhaisnéis sin tuarascálacha a bhaineann le hábhar a ndéantar modhnú air, ar féidir glacadh leis go réasúnach go bhfuil baint aige le gníomhaíochtaí coiriúla a thagann faoi chuimsiú chuspóirí Europol.

(36)

Chun a áirithiú go bhfaigheann na Ballstáit an fhaisnéis is gá chun imscrúduithe a thionscnamh lena ndéantar an choireacht thromchúiseach agus an sceimhlitheoireacht a chosc agus a chomhrac gan moill mhíchuí, ba cheart Europol a bheith in ann sonraí pearsanta a phróiseáil agus a anailísiú chun na haonaid náisiúnta lena mbaineann a shainaithint agus na sonraí pearsanta agus aon torthaí ar a chuid anailíse agus a fhíoraithe ar shonraí den sórt sin atá ábhartha chun críocha dlínse a shuí, a chur ar aghaidh chuig na haonaid náisiúnta sin agus chun na coireanna sin lena mbaineann a imscrúdú faoina ndlínse faoi seach. Ba cheart Europol a bheith in ann na sonraí pearsanta agus torthaí a anailíse agus a fhíoraithe ar shonraí den sórt sin is ábhartha chun críocha dlínse a shuí, a chur ar aghaidh chuig pointí teagmhála nó údaráis de chuid na tríú tíortha lena mbaineann, nuair is ábhar iad na sonraí sin do chinneadh leordhóthanachta, nó a bhfuil comhaontú idirnáisiúnta nó comhaontú comhair tugtha i gcrích leo, nó i gcás ina bhforáiltear do choimircí iomchuí maidir le sonraí pearsanta a chosc in ionstraim atá ceangailteach ó thaobh dlí de, nó i gcás ina gcinneann Europol, bunaithe ar mheasúnú ar na himthosca go léir a bhaineann le haistriú na sonraí pearsanta, gurb ann do na coimircí sin sna tríú tíortha sin. I gcás nach bhfuil an tríú tír lena mbaineann ina hábhar do chinneadh leordhóthanachta den sórt sin, nó ina páirtí i gcomhaontú idirnáisiúnta ná i gcomhaontú comhair den sórt sin, nó in éagmais ionstraim atá ceangailteach ó thaobh dlí de, nó i gcás nach gcinneann Europol gurb ann do choimircí iomchuí, ba cheart Europol a bheith in ann toradh a anailíse agus a fhíoraithe ar shonraí den sórt sin a aistriú chuig an tríú tír lena mbaineann i gcomhréir leis an Rialachán seo.

(37)

I gcomhréir le Rialachán (AE) 2016/794, i gcásanna áirithe agus faoi réir coinníollacha, d’fhéadfadh sé a bheith riachtanach agus comhréireach go n-aistreodh Europol sonraí pearsanta chuig páirtithe príobháideacha nach bhfuil bunaithe laistigh den Aontas nó i dtríú tír is ábhar do chinneadh leordhóthanachta nó a bhfuil comhaontú idirnáisiúnta nó comhaontú comhair tugtha i gcrích leo, nó i gcás nach bhforáiltear do choimircí iomchuí maidir le sonraí pearsanta a chosaint, in ionstraim atá ceangailteach ó thaobh dlí de, nó i gcás nár chinn Europol gurb ann do choimircí iomchuí. I gcásanna den sórt sin, ba cheart an t-aistriú a bheith faoi réir údarú roimh ré ón Stiúrthóir Feidhmiúcháin.

(38)

Chun a áirithiú gur féidir le Europol na haonaid náisiúnta ábhartha uile lena mbaineann a shainaithint, ba cheart dó a bheith in ann páirtithe príobháideacha a chur ar an eolas nuair nach leor an fhaisnéis a thug siad chun a chur ar chumas Europol na haonaid náisiúnta lena mbaineann a shainaithint. Chuirfeadh sé sin ar a gcumas do na páirtithe príobháideacha sin a chinneadh cibé acu atá nó nach bhfuil sé chun a leasa féin faisnéis bhreise a chomhroinnt le Europol agus cibé acu is féidir nó nach féidir leo déanamh amhlaidh go dleathach. Chuige sin, ba cheart do Europol a bheith in ann páirtithe príobháideacha a chur ar an eolas faoi fhaisnéis atá in easnamh, a mhéid is gá sin chun na haonaid náisiúnta lena mbaineann a shainaithint, agus chun na críche sin amháin. Ba cheart feidhm a bheith ag coimircí speisialta maidir le haistrithe faisnéise ó Europol chuig páirtithe príobháideacha i gcás nach bhfuil an páirtí príobháideach lena mbaineann bunaithe laistigh den Aontas ná i dtríú tír is ábhar do chinneadh leordhóthanachta nó a bhfuil comhaontú idirnáisiúnta nó comhaontú comhair tugtha i gcrích leo, nó i gcás nach bhforáiltear do choimircí iomchuí maidir le sonraí pearsanta a chosaint, in ionstraim atá ceangailteach ó thaobh dlí de, nó i gcás nár chin Europol gurb ann do choimircí iomchuí.

(39)

I gcás ina gcomhroinneann Ballstáit, tríú tíortha, eagraíochtaí idirnáisiúnta nó páirtithe príobháideacha tacair sonraí ildlínse nó tacair sonraí nach féidir a chur i leith dlínse sonrach amháin nó roinnt dlínsí sonracha le Europol, d’fhéadfadh sé go bhfuil na tacair sonraí sin nasctha le sonraí pearsanta atá ag páirtithe príobháideacha. I gcásanna den sórt sin, ba cheart do Europol a bheith in ann iarraidh a chur chuig na Ballstáit, trína n-aonaid náisiúnta, chun na sonraí pearsanta atá i seilbh páirtithe príobháideacha atá bunaithe nó a bhfuil ionadaí dlíthiúil acu ar chríoch na mBallstát sin a fháil. Níor cheart iarraidh den sórt sin a dhéanamh ach amháin i gcás inar gá faisnéis bhreise a fháil ó pháirtithe príobháideacha den sórt sin chun na haonaid náisiúnta lena mbaineann a shainaithint. Ba cheart an iarraidh a bheith réasúnaithe agus chomh beacht agus is féidir. Ba cheart na sonraí pearsanta ábhartha, ar cheart dóibh a bheith ar na cinn is lú íogaireacht agus a bheith teoranta go docht don mhéid atá riachtanach agus comhréireach chun na haonaid náisiúnta lena mbaineann a shainaithint, a sholáthar do Europol i gcomhréir le dlí is infheidhme na mBallstát sin. Ba cheart d’údaráis inniúla na mBallstát lena mbaineann measúnú a dhéanamh ar an iarraidh ó Europol agus cinneadh a dhéanamh i gcomhréir lena ndlí náisiúnta féin géilleadh dó. Aon phróiseáil sonraí arna déanamh ag páirtithe príobháideacha agus iarrataí den sórt sin ó údaráis inniúla na mBallstát á bpróiseáil acu, ba cheart an phróiseáil sonraí sin leanúint de bheith faoi réir na rialacha is infheidhme, go háirithe maidir le cosaint sonra. Ba cheart do na páirtithe príobháideacha na sonraí iarrtha a sholáthar d’údaráis inniúla na mBallstát lena dtarchur breise chuig Europol. In go leor cásanna, d’fhéadfadh sé nach mbeadh na Ballstáit lena mbaineann in ann nasc a bhunú lena ndlínse seachas de bhua go bhfuil an páirtí príobháideach ag a bhfuil na sonraí ábhartha bunaithe ina ndlínse nó go bhfuil ionadaí dlíthiúil aige ina ndlínse. D’ainneoin cibé atá nó nach bhfuil dlínse acu maidir leis an gcoir shonrach, ba cheart do na Ballstáit a áirithiú, ar aon chor„ gur féidir leis na húdaráis inniúla sonraí pearsanta a fháil ó pháirtithe príobháideacha chun críche an fhaisnéis is gá a sholáthar do Europol atá riachtanach chun a chuid cuspóirí a bhaint amach, i gcomhréir iomlán le ráthaíochtaí nós imeachta faoin dlí náisiúnta.

(40)

Chun a áirithiú nach gcoimeádann Europol na sonraí pearsanta a fhaightear go díreach ó pháirtithe príobháideacha níos faide ná mar is gá chun na haonaid náisiúnta lena mbaineann a shainaithint, ba cheart feidhm a bheith ag teorainneacha ama maidir leis an stóráil a dhéanann Europol ar shonraí pearsanta. A luaithe a bheidh gach bealach atá ar fáil do Europol chun na haonaid náisiúnta lena mbaineann a shainaithint úsáidte aige, agus nach féidir a bheith ag súil leis go réasúnach go n-aithneofar aonaid náisiúnta eile lena mbaineann, ní gá agus ní comhréireach a thuilleadh na sonraí pearsanta sin a stóráil chun na haonaid náisiúnta lena mbaineann a shainaithint. Ba cheart do Europol na sonraí pearsanta a scriosadh laistigh de 4 mhí tar éis a dtarchur deireanach, a n-aistriú deireanach chuig aonad náisiúnta nó a n-aistriú deireanach a dhéanamh chuig an bpointe teagmhála de chuid tríú tír nó chuig údarás tríú tír, mura rud é, i gcomhréir le dlí an Aontais agus an dlí náisiúnta, go ndéanann aonad náisiúnta, pointe teagmhála nó údarás lena mbaineann na sonraí pearsanta a chur faoi bhráid Europol arís laistigh den tréimhse sin mar shonraí dá chuid. Má bhí na sonraí pearsanta a chuireadh isteach arís mar chuid de thacar níos mó sonraí pearsanta, níor cheart do Europol ach na sonraí pearsanta sin a chuir aonad náisiúnta, pointe teagmhála nó údarás lena mbaineann isteach arís a choimeád.

(41)

Níor cheart go ndéanfadh comhar idir Europol agus páirtithe príobháideacha gníomhaíochtaí na nAonad um Fhaisnéis Airgeadais (AFAnna) arna bunú de bhun Threoir (AE) 2015/849 ó Pharlaimint na hEorpa agus ón gComhairle (12) a dhúbailt ná cur isteach orthu, agus níor cheart go mbainfeadh sé ach le faisnéis nach bhfuil le soláthar cheana do AFAnna i gcomhréir leis an Treoir sin.. Ba cheart do Europol leanúint den chomhar le AFAnna, go háirithe trí na haonaid náisiúnta.

(42)

Ba cheart do Europol a bheith in ann an tacaíocht is gá a sholáthar d’údaráis inniúla na mBallstát chun idirghníomhú le páirtithe príobháideacha, go háirithe tríd an mbonneagar is gá a sholáthar le haghaidh idirghníomhaíocht den sórt sin, mar shampla, nuair a tharchuireann údaráis inniúla na mBallstát ábhar sceimhlitheoireachta ar líne nó nuair a sheolann siad orduithe baint anuas a bhaineann le hábhar den sórt sin chuig soláthraithe seirbhíse ar líne de bhun Rialachán (AE) 2021/784 ó Pharlaimint na hEorpa agus ón gComhairle (13) nó nuair a mhalartaíonn siad faisnéis le páirtithe príobháideacha i gcomhthéacs cibirionsaithe. Mar a n-úsáideann na Ballstáit bonneagar Europol le malartú a dhéanamh ar shonraí pearsanta a bhaineann le coireanna nach dtagann faoi chuimsiú chuspóirí Europol, níor cheart rochtain a bheith ag Europol ar na sonraí sin. Ba cheart do Europol a áirithiú, trí mheáin theicniúla, go bhfuil a bhonneagar teoranta go docht do chainéal a chur ar fáil d’idirghníomhaíochtaí den sórt sin idir údaráis inniúla na mBallstát agus páirtí príobháideach, agus go ndéanfaidh Europol foráil maidir leis na coimircí uile is gá i gcoinne rochtain ag páirtí príobháideach ar fhaisnéis ar bith eile i gcórais Europol, ar faisnéis í nach bhfuil baint aici leis an malartú leis an bpáirtí príobháideach sin.

(43)

Tionscnaítear le hionsaithe sceimhlitheoireachta scaipeadh mórscála trí ardáin ar líne d’ábhar sceimhlitheoireachta ina dtaispeántar díobháil á déanamh don bheatha nó do shláine choirp, nó ina n-iarrtar go ndéanfaí díobháil don bheatha nó do shláine choirp go luath, rud a éascaíonn glóiriú na sceimhlitheoireachta agus soláthar oiliúna sceimhlitheoireachta, mar aon le radacú agus earcú daoine aonair eile i ndeireadh thiar. Thairis sin, is minice anois a úsáidtear an t-idirlíon chun ábhar mí-úsáide gnéasaí leanaí a thaifeadadh nó a chomhroinnt, rud a bhuanaíonn an díobháil do na híospartaigh toisc gur féidir an t-ábhar a iolrú agus a scaipeadh go héasca. Chun na coireanna a thagann faoi chuimsiú chuspóirí Europol a chosc agus a chomhrac, ba cheart Europol a bheith in ann tacú le gníomhaíochtaí na mBallstát chun aghaidh a thabhairt go héifeachtach ar scaipeadh ábhair sceimhlitheoireachta i gcomhthéacs géarchéimeanna ar líne a eascraíonn as fíortheagmhais atá fós sa siúl nó a tharla le déanaí, agus ar scaipeadh ar líne ábhair mí-úsáide gnéasaí leanaí ar líne, agus chun tacú le gníomhaíochtaí soláthraithe seirbhíse ar líne i gcomhréir lena n-oibleagáidí faoi dhlí an Aontais agus ina ngníomhaíochtaí deonacha. Chuige sin, ba cheart do Europol a bheith in ann sonraí pearsanta ábhartha a mhalartú, lena n-áirítear sínithe digiteacha uathúla neamh-athintiontaithe (“haiseanna”), seoltaí IP nó URLanna a bhaineann le hábhar den sórt sin, le páirtithe príobháideacha atá bunaithe laistigh den Aontas nó i dtríú tír is ábhar do chinneadh leordhóthanachta, nó, a bhfuil comhaontú idirnáisiúnta nó comhaontú comhair tugtha i gcrích leo, nó i gcás ina bhforáiltear do choimircí iomchuí maidir le sonraí pearsanta a chosc in ionstraim atá ceangailteach ó thaobh dhlí de, nó i gcás in gcinnfidh Europol, ar bhonn measúnaithe ar na himthosca go léir a bhaineann le haistriú sonraí pearsanta, gurb ann do na coimircí sin sa tríú tír sin. Níor cheart malartuithe sonraí pearsanta den sórt sin a dhéanamh chun críocha ábhar sceimhlitheoireachta agus ábhar ar líne a bhaineann le mí-úsáid ghnéasach leanaí a bhaint, go háirithe nuair atáthar ag súil le hiolrú easpónantúil agus mearscaipeadh an inneachair agus an ábhair sin ar fud roinnt soláthraithe seirbhíse ar líne. Níor cheart a thuiscint ó aon ní dá bhfuil sa Rialachán seo go gcuirfear bac ar Bhallstát orduithe baint anuas a úsáid dá bhforáiltear i Rialachán (AE) 2021/784 mar ionstraim chun aghaidh a thabhairt ar ábhar sceimhlitheoireachta ar líne.

(44)

Chun dúbláil iarrachtaí agus cur isteach féideartha ar imscrúduithe a sheachaint agus chun an t-ualach ar na soláthraithe seirbhísí óstála a ndearnadh difear dóibh a íoslaghdú, ba cheart do Europol cúnamh a thabhairt d’údaráis inniúla na mBallstát, faisnéis a mhalartú leo agus dul i gcomhar leo maidir le sonraí pearsanta a tharchur chuig páirtithe príobháideacha agus a aistriú chucu chun aghaidh a thabhairt ar ghéarchéimeanna ar líne agus ar scaipeadh ar line ábhair a bhaineann le mí-úsáid ghnéasach leanaí ar líne.

(45)

Leagtar amach i Rialachán (AE) 2018/1725 rialacha maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais. Cé go bhfuil feidhm ag Rialachán (AE) 2018/1725 maidir le próiseáil sonraí pearsanta riaracháin ag Europol nach mbaineann le himscrúduithe coiriúla, amhail sonraí foirne, níl feidhm ag Airteagal 3, pointe (2), ná ag Caibidil IX den Rialachán sin, lena rialaítear próiseáil sonraí pearsanta, maidir le Europol faoi láthair. Chun cosaint aonfhoirmeach chomhsheasmhach daoine nádúrtha a áirithiú maidir le sonraí pearsanta a phróiseáil, ba cheart feidhm a bheith ag Caibidil IX de Rialachán (AE) 2018/1725 maidir le Europol i gcomhréir le hAirteagal 2(2) den Rialachán sin, agus ba cheart é a chomhlánú le forálacha sonracha maidir leis na hoibríochtaí sonracha próiseála ba cheart do Europol a dhéanamh chun a chúraimí a chur i gcrích. Dá bhrí sin, ba cheart cumhachtaí maoirseachta MECS maidir le hoibríochtaí próiseála Europol a threisiú, i gcomhréir leis na cumhachtaí ábhartha is infheidhme maidir le próiseáil sonraí pearsanta riaracháin a bhfuil feidhm acu maidir le hinstitiúidí, comhlachtaí, oifigí agus gníomhaireachtaí uile an Aontais faoi Chaibidil VI de Rialachán (AE) 2018/1725. Chuige sin, i gcás ina ndéanann Europol sonraí pearsanta a phróiseáil chun críoch oibríochtúla, ba cheart do MECS a bheith in ann a cheangal ar Europol a áirithiú go bhfuil a oibríochtaí próiseála i gcomhréir leis an Rialacháin seo, agus a cheangal go ndéanfar sreabha sonraí chuig faighteoir i mBallstát, i dtríú tír nó in eagraíocht idirnáisiúnta a chur ar fionraí, agus ba cheart do MECS a bheith in ann fíneáil riaracháin a ghearradh i gcás neamhchomhlíontadh ag Europol.

(46)

D’fhéadfadh próiseáil catagóirí speisialta sonraí pearsanta a leagtar amach i Rialachán (AE) 2016/679 ó Pharlaimint na hEorpa agus ón gComhairle (14) a bheith i gceist le próiseáil sonraí chun críocha an Rialacháin seo. Níor cheart a mheas go córasach gur próiseáil catagóirí speisialta sonraí pearsanta atá i bpróiseáil grianghraf ós rud é nach gcumhdaítear grianghraif leis an sainmhíniú ar shonraí bithmhéadracha faoi Airteagal 3, pointe (18), de Rialachán (AE) 2018/1725 ach amháin nuair a dhéantar iad a phróiseáil trí mhodh sonrach teicniúil lena gceadaítear sainaithint uathúil nó fíordheimhniú uathúil duine nádúrtha.

(47)

Coimirce thábhachtach atá i sásra an réamhchomhairliúcháin ina dtéitear i gcomhairle le MECS dá bhforáiltear le Rialachán (AE) 2018/1725 do chineálacha nua oibríochtaí próiseála. Níor cheart feidhm a bheith ag an sásra sin maidir le gníomhaíochtaí sonracha oibríochtúla aonair, amhail na tionscadail anailíse oibríochtúla, áfach, ach maidir le húsáid córas nua teicneolaíochta faisnéise chun sonraí pearsanta agus aon athruithe suntasacha ar na córais sin a phróiseáil, ar sonraí nó athruithe iad lena mbainfeadh ardriosca do chearta agus saoirsí ábhar sonraí. Níor cheart a bheith in ann an tréimhse atá ann do MECS chun comhairle i scríbhinn maidir leis na comhairliúcháin sin a sholáthar a chur ar fionraí. I gcás gníomhaíochtaí próiseála a bhfuil tábhacht shuntasach ag baint leo ó thaobh fheidhmiú chúraimí Europol, ar gníomhaíochtaí iad atá fíorphráinneach, ba cheart an fhéidearthacht a bheith ag Europol, ar bhonn eisceachtúil, an phróiseáil a thionscnamh tar éis an réamhchomhairliúchán a sheoladh, fiú mura bhfuil an teorainn ama chun comhairle i scríbhinn a sholáthar ó MECS imithe in éag fós. D’fhéadfadh práinn teacht chun cinn i gcásanna a bhfuil tábhacht shuntasach leo i ndáil le feidhmiú chúraimí Europol, nuair is gá an phróiseáil a dhéanamh chun bagairt láithreach ciona a thagann faoi chuimsiú Europol a chosc agus a chomhrac agus chun leasanna ríthábhachtacha an ábhair sonraí nó duine eile a chosaint. Ba cheart do Oifigeach Cosanta Sonraí Europol a bheith rannpháirteach i measúnú a dhéanamh ar phráinn na próiseála sin agus ar an ngá atá léi sula rachaidh in éag an teorainn ama atá ann do MECS chun freagairt ar réamhchomhairliúchán. Ba cheart do Oifigeach Cosanta Sonraí Europol formhaoirseacht a dhéanamh ar phróiseáil den sórt sin. Ba cheart MECS a bheith in ann a chumhachtaí a fheidhmiú i ndáil leis an bpróiseáil sin.

(48)

I bhfianaise na ndúshlán atá ann do shlándáil an Aontais de dheasca mearfhorbairt theicneolaíoch agus saothrú teicneolaíochtaí nua ag sceimhlitheoirí agus coirpigh eile, is gá d’údaráis inniúla na mBallstát a gcumais teicneolaíochta a neartú chun na sonraí is gá chun imscrúdú a dhéanamh ar choireanna coiriúla a shainaithint, a dhaingniú agus anailísiú. Ba cheart a cheadú do Europol tacú leis na Ballstáit maidir le teicneolaíochtaí atá ag teacht chun cinn a úsáid, le bealaí cur chuige nua a fhiosrú agus le réitigh theicneolaíocha choiteanna a fhorbairt do na Ballstáit chun na coireanna a thagann faoi chuimsiú chuspóirí Europol a chosc agus a chomhrac ar bhealach níos fearr. Ag an am céanna, ba cheart do Europol a áirithiú go bhfuil forbairt, úsáid agus imscaradh teicneolaíochtaí nua á dtreorú ag prionsabail na trédhearcachta agus na hinmhínitheachta, na cothroime agus na cuntasachta, agus nach mabineann said sin an bonn de chearta agus saoirsí bunúsacha agus go bhfuil siad i gcomhréir le dlí an Aontais. Chuige sin, ba cheart do Europol a bheith in ann tionscadail taighde agus nuálaíochta a chur chun feidhme maidir le hábhair a chumhdaítear leis an Rialachán seo laistigh de raon feidhme ginearálta na dtionscadal taighde agus nuálaíochta arna mbunú ag an mBord Bainistíochta i ndoiciméad ceangailteach. Ba cheart an doiciméad sin a nuashonrú i gcás inarb iomchuí agus a chur ar fáil do MECS. Níor cheart é a bheith indéanta do na tionscadail sin próiseáil sonraí pearsanta a áireamh ach amháin ar choinníoll go gcomhlíonfar coinníollacha áirithe, eadhon go bhfuil géarghá le sonraí pearsanta a phróiseáil, nach féidir cuspóir an tionscadail ábhartha a bhaint amach trí shonraí neamhphearsanta a úsáid, amhail sonraí sintéiseacha nó anaithnide, agus go bhfuil lánurraim do chearta bunúsacha á háirithiú ag an am céanna, go háirithe neamh-idirdhealú.

Níor cheart próiseáil catagóirí speisialta sonraí pearsanta chun críocha taighde agus nuálaíochta a cheadú ach amháin i gcás ina bhfuil fíorghá leis sin. I bhfianaise a íogaire atá próiseáil den sórt sin, ba cheart feidhm a bheith ag coimircí breise iomchuí, lena n-áirítear bréagainmniú. Chun claonadh sa chinnteoireacht algartamach a chosc, ba cheart cead a bheith ag Europol sonraí pearsanta a phróiseáil nach mbaineann leis na catagóirí d’ábhair sonraí a liostaítear in Iarscríbhinn II. Níor cheart do Europol logaí den phróiseáil sonraí pearsanta go léir arna déanamh a choinneáil i gcomhthéacs a chuid tionscadal taighde agus nuálaíochta chun críche cruinneas thoradh na próiseála sonraí a fhíorú agus chun na críche sin amháin agus níor cheart dó na logaí sin a choinneáil ach a fhad is gá chun an cruinneas a fhíorú. Níor cheart go nglacfaí leis na forálacha le haghaidh uirlisí nua a fhorbairt ag Europol mar bhunús dlí chun iad a imscaradh ar leibhéal an Aontais nó ar an leibhéal náisiúnta. Chun nuálaíocht a spreagadh agus sineirgí sna tionscadail taighde agus nuálaíochta a threisiú, tá sé tábhachtach go gcuirfeadh Europol dlús lena chomhar le líonraí ábhartha chleachtóirí na mBallstát agus le gníomhaireachtaí eile de chuid an Aontais laistigh dá n-inniúlachtaí faoi seach sa réimse sin, agus tacú le cineálacha gaolmhara comhair eile amhail tacaíocht rúnaíochta do Mol Nuálaíochta an Aontais Eorpaigh um Shlándáil Inmheánach mar líonra comhoibríoch de shaotharlanna nuálaíochta.

(49)

Ba cheart príomhról a bheith ag Europol maidir le cuidiú leis na Ballstáit chun réitigh theicneolaíochta nua a fhorbairt bunaithe ar intleacht shaorga is ábhartha maidir le cuspóirí Europol a bhaint amach, agus a théann chun tairbhe d’údaráis inniúla na mBallstát ar fud an Aontais. Ba cheart an chabhair sin a sholáthar agus lánurraim á tabhairt do chearta agus saoirsí bunúsacha, lena n-áirítear neamh-idirdhealú. Ba cheart príomhról a bheith ag Europol maidir le forbairt agus imscaradh intleachta saorga a chur chun cinn atá eiticiúil, iontaofa agus dírithe ar an duine agus atá faoi réir ag cosaintí i dtéarmaí slándála, sábháilteachta, trédhearcachta, inmhínitheachta agus ceart bunúsach.

(50)

Ba cheart do Europol MECS a chur ar an eolas sula seolann sé na tionscadail taighde agus nuálaíochta dá chuid lena mbaineann próiseáil sonraí pearsanta. Ba cheart do Europol a Bhord Bainistíochta a chur ar an eolas faoi, nó dul i gcomhairle leis, i gcomhréir le critéir áirithe ar cheart iad a leagan amach sna treoirlínte ábhartha. Níor cheart do Europol sonraí chun críche tionscadail taighde agus nuálaíochta a phróiseáil gan toiliú ón mBallstát, ón gcomhlacht Aontais, ón tríú tír nó ón eagraíocht idirnáisiúnta a chuir na sonraí faoi bhráid Europol, ach amháin má tá údarú roimh ré tugtha ag an mBallstát, an comhlacht Aontais, an tríú tír nó ag an eagraíocht idirnáisiúnta sin i dtaca leis an bpróiseáil sin chun na críche sin. Maidir le gach tionscadal agus roimh an bpróiseáil, ba cheart do Europol measúnú tionchair ar chosaint sonraí a dhéanamh chun a áirithiú go ndéanfar an ceart chun cosaint sonraí agus cearta agus saoirsí bunúsacha uile ábhar sonraí a urramú go hiomlán. Ba cheart a áireamh leis an measúnú tionchair ar chosaint sonraí measúnú ar oiriúnacht, riachtanas agus comhréireacht na sonraí pearsanta atá le próiseáil chun cuspóir sonrach an tionscadail, lena n-áirítear an ceanglas maidir le híoslaghdú sonraí agus measúnú ar aon chlaonadh a d’fhéadfadh a bheith sa toradh agus sna sonraí pearsanta atá le próiseáil chun cuspóir sonrach an tionscadail chomh maith leis na bearta atá beartaithe chun aghaidh a thabhairt ar na rioscaí sin. Ba cheart forbairt uirlisí nua ag Europol a bheith gan dochar don bhunús dlí, lena n-áirítear an bonn le haghaidh na sonraí pearsanta atá i gceist a phróiseáil, a bheadh de dhíth ina dhiaidh sin chun iad a imscaradh ar leibhéal an Aontais nó ar an leibhéal náisiúnta.

(51)

Chun uirlisí breise agus cumais bhreise a sholáthar do Europol, ní mór maoirseacht dhaonlathach agus cuntasacht Europol a threisiú. Is ionann grinnscrúdú comhpháirteach parlaiminteach agus gné thábhachtach den fhaireachán polaitiúil ar ghníomhaíochtaí Europol. Chun faireachán polaitiúil éifeachtach a chumasú ar an mbealach a bhaineann Europol úsáid as uirlisí breise agus cumais bhreise, arna soláthar dó faoin Rialachán seo, ba cheart do Europol faisnéis mhionsonraithe bhliantúil a sholáthar don Ghrúpa um Ghrinnscrúdú Parlaiminteach Comhpháirteach (GGPC) agus do na Ballstáit maidir le forbairt, úsáid agus éifeachtacht na n-uirlisí agus na gcumas sin agus na torthaí ar iad a úsáid, go háirithe faoi thionscadail taighde agus nuálaíochta mar aon le gníomhaíochtaí nua nó bunú aon lárionad nua speisialaithe laistigh de Europol. Thairis sin, ba cheart cuireadh a thabhairt do bheirt ionadaithe ó GGPC, duine acu do Pharlaimint na hEorpa agus duine eile do na parlaimintí náisiúnta chun dhá thoghcheantar GGPC a léiriú, freastal ar dhá ghnáthchruinniú ar a laghad de chuid an Bhoird Bainistíochta in aghaidh na bliana chun labhairt leis an mBord Bainistíochta thar ceann GGPC agus chun plé a dhéanamh ar an tuarascáil bhliantúil chomhdhlúite ar ghníomhaíochtaí, ar an doiciméad clársceidealaithe aonair agus ar an mbuiséad bliantúil, ar cheisteanna agus freagraí i scríbhinn ó GGPC, chomh maith le caidreamh seachtrach agus comhpháirtíochtaí seachtracha, agus róil agus freagrachtaí éagsúla an Bhoird Bainistíochta agus GGPC á n-urramú ag an am céanna i gcomhréir leis an Rialachán seo. Féadfaidh an Bord Bainistíochta, in éineacht le hionadaithe GGPC, a chinneadh cad iad na hábhair eile ar díol spéise polaitiúla iad a bheidh le plé. I gcomhréir leis an ról maoirseachta atá ag GGPC, níor cheart cearta vótála a bheith ag an dá ionadaí de chuid GGPC ar an mBord Bainistíochta. Ba cheart gníomhaíochtaí taighde agus nuálaíochta pleanáilte a leagan amach sa doiciméad clársceidealaithe aonair ina bhfuil clársceidealú ilbhliantúil agus clár oibre bliantúil Europol agus iad a tharchur chuig GGPC.

(52)

Tar éis togra a fháil ón Stiúrthóir Feidhmiúcháin, ba cheart don Bhord Bainistíochta Oifigeach um Chearta Bunúsacha a ainmniú a bheadh freagrach as tacú le Europol urraim do chearta bunúsacha a choimirciú ina ghníomhaíochtaí agus ina chúraimí uile, go háirithe tionscadail taighde agus nuálaíochta Europol agus an malartú sonraí pearsanta le páirtithe príobháideacha. Ba cheart é a bheith indéanta ball d’fhoireann Europol atá ann cheana agus ar cuireadh oiliúint speisialta ar an mball foirne sin maidir le dlí agus cleachtas na gceart bunúsach a ainmniú mar Oifigeach um Chearta Bunúsacha. Ba cheart don Oifigeach um Chearta Bunúsacha oibriú i ndlúthchomhar leis an Oifigeach Cosanta Sonraí laistigh de raon feidhme a n-inniúlachtaí faoi seach. A mhéid a bhaineann le gnóthaí cosanta sonraí, ba cheart freagracht iomlán a bheith ar an Oifigeach Cosanta Sonraí.

(53)

Ós rud é nach féidir leis na Ballstáit cuspóir an Rialacháin seo, is é sin tacú agus treisiú le húdaráis inniúla na mBallstát agus a gcomhar frithpháirteach maidir le coireacht thromchúiseach a théann i bhfeidhm ar dhá Bhallstát nó níos mó a chosc agus a chomhrac, mar aon le sceimhlitheoireacht agus saghasanna coireachta a dhochraíonn leas coiteann atá ina ábhar do bheartas de chuid an Aontais, a ghnóthú go leordhóthanach mar gheall ar ghné thrasteorann na coireachta tromchúisí agus na sceimhlitheoireachta agus an gá le freagairt chomhordaithe do bhagairtí slándála gaolmhara, agus gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 de CAE. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(54)

I gcomhréir le hAirteagal 3 de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal le CAE agus CFAE, tá fógra tugtha ag Éirinn gur mian léi a bheith rannpháirteach i nglacadh agus i gcur i bhfeidhm an Rialacháin seo.

(55)

I gcomhréir le hAirteagal 1 agus le hAirteagal 2 de Phrótacal Uimh. 22 maidir le seasamh na Danmhairge, atá i gceangal le CAE agus le CFAE, níl an Danmhairg rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm.

(56)

Chuathas i gcomhairle le MECS i gcomhréir le hAirteagal 42(1) de Rialachán (AE) 2018/1725 agus thug sé a thuairim uaidh an 8 Márta 2021 (15).

(57)

Leis an Rialachán seo, urramaítear go hiomlán na cearta agus coimircí bunúsacha, agus cloítear leis na prionsabail atá aitheanta go háirithe i gCairt um Chearta Bunúsacha an Aontais Eorpaigh (“an Chairt”), go háirithe an ceart chun measa ar an saol príobháideach agus ar shaol an teaghlaigh agus an ceart chun sonraí pearsanta a chosaint dá bhforáiltear in Airteagal 7 agus Airteagal 8 den Chairt, chomh maith le hAirteagal 16 CFAE. I bhfianaise a thábhachtaí atá sonraí pearsanta a phróiseáil in obair an fhorfheidhmithe dlí go ginearálta, agus sa tacaíocht a sholáthraíonn Europol go háirithe, ba cheart coimircí, sásraí maoirseachta daonlathaí agus cuntasachta feabhsaithe a bheith san áireamh leis an Rialachán seo chun a áirithiú go gcomhlíontar go hiomlán cearta bunúsacha de réir mar atá cumhdaithe sa Chairt, go háirithe na cearta chun comhionannais os comhair an dlí, chun neamh-idirdhealú, agus chun leigheas éifeachtach os comhair na cúirte náisiúnta inniúla i gcoinne aon cheann de na bearta a dhéantar de bhun an Rialacháin seo, agus gníomhaíochtaí agus cúraimí Europol á gcur i gcrích. Tá aon phróiseáil ar shonraí pearsanta faoin Rialachán seo teoranta don mhéid sin atá riachtanach agus comhréireach go docht, agus faoi réir coinníollacha soiléire, ceanglais dhochta agus maoirseacht éifeachtach ag MECS.

(58)

Ba cheart, dá bhrí sin, Rialachán (AE) 2016/794 a leasú dá réir sin.

(59)

Ionas go bhféadfar na bearta dá bhforáiltear sa Rialachán seo a chur i bhfeidhm go pras, ba cheart an Rialachán seo a theacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh,