(1)

Is éard atá sa cheanglas cistí dílse breise dá dtagraítear in Airteagal 104a de Threoir 2013/36/AE ó Pharlaimint na hEorpa agus ón gComhairle (2) agus sa cheanglas maoláin chomhcheangailte a shainmhínítear i bpointe (6) den chéad fhomhír d’Airteagal 128 den Treoir sin ionchuir chun na méideanna ionsúcháin caillteanais agus athchaipitliúcháin a leagtar amach in Airteagal 45c(3) de Threoir 2014/59/AE a ríomh. Tá na ceanglais sin le húsáid ag údaráis réitigh chun an t-íoscheanglas le haghaidh cistí dílse agus dliteanais incháilithe (ICDI) dá dtagraítear in Airteagal 45(1) den Treoir sin a shocrú.

(2)

De réir Airteagal 45e(1) de Threoir 2014/59/AE, ní mór d’eintitis réitigh ICDI a chomhlíonadh ar bhonn comhdhlúite ar leibhéal an ghrúpa réitigh. D’fhéadfadh sé nach mbeadh grúpa réitigh mar a shainmhínítear é in Airteagal 2(1), (83b) de Threoir 2014/59/AE comhionann i gcónaí le grúpa mar a shainmhínítear é i bpointe (26) d’Airteagal 2(1) den Treoir sin, go háirithe nuair atá níos mó ná grúpa réitigh amháin sa ghrúpa sin. De réir Airteagal 11 de Rialachán (AE) Uimh. 575/2013 ó Pharlaimint na hEorpa agus ón gComhairle (3), tá feidhm ag an gceanglas cistí dílse breise agus leis an gceanglas maoláin chomhcheangailte maidir leis an máthairinstitiúid Aontais ar leibhéal comhdhlúite an ghrúpa. D’fhéadfadh sé, áfach, nach mbeadh feidhm ag na ceanglais sin maidir leis an eintiteas réitigh ar leibhéal comhdhlúite an ghrúpa réitigh mar d’fhéadfadh sé nach gcumhdódh an grúpa réitigh an grúpa iomlán. Is gá, dá bhrí sin, modheolaíocht a shonrú chun na ceanglais sin a mheas don chás sin.

(3)

Más ionann méid iomlán na risíochta ar phriacal atá ag grúpa réitigh agus beagnach iomlán mhéid na risíochta ar phriacal atá ag grúpa, is léiriú é nach bhfuil difríocht ábhartha idir na priacail ná na heilimintí priacail atá sa ghrúpa réitigh sin agus na cinn atá sa ghrúpa. Sa chás sin, ba cheart don údarás réitigh an ceanglas cistí dílse breise a bhfuil feidhm aige maidir leis an máthairinstitiúid Aontais ar leibhéal comhdhlúite an ghrúpa a úsáid mar mheastachán ar an gceanglas cistí dílse breise agus ICDI a bhfuil feidhm aige maidir leis an eintiteas réitigh ar leibhéal comhdhlúite an ghrúpa réitigh á chinneadh.

(4)

Mar an gcéanna, más féidir méid iomlán na risíochta ar phriacal atá ag grúpa réitigh a shannadh beagnach go hiomlán d’eintiteas amháin de chuid an ghrúpa réitigh sin, is léiriú é nach bhfuil difríocht ábhartha idir na priacail ná na heilimintí priacail atá sa ghrúpa réitigh sin agus na cinn atá san eintiteas sin de chuid an ghrúpa réitigh. Dá réir sin, i gcás nach bhfuil difríocht shuntasach idir méid iomlán na risíochta ar phriacal atá ag an ngrúpa réitigh agus méid iomlán na risíochta ar phriacal atá ag an eintiteas is mó de chuid an ghrúpa réitigh sin, ba cheart don údarás réitigh ceanglas cistí dílse breise an eintitis is mó sin a úsáid mar mheastachán ar an gceanglas cistí dílse breise agus ICDI don eintiteas réitigh ar leibhéal comhdhlúite an ghrúpa réitigh á chinneadh.

(5)

I gcás ina bhfuil grúpa réitigh níos casta agus nach féidir a shainiúlachtaí a chuimsiú go hiomlán trí fhreagairt don cheanglas cistí dílse breise a bhfuil feidhm aige maidir leis an máthairinstitiúid Aontais ar leibhéal comhdhlúite an ghrúpa nó maidir leis an eintiteas is mó de chuid an ghrúpa réitigh, ba cheart do na húdaráis réitigh meastacháin éagsúla a úsáid le haghaidh cheanglas cistí dílse breise an eintitis réitigh ar leibhéal comhdhlúite an ghrúpa réitigh. I gcás ina bhfuil an ceanglas cistí dílse breise a bhfuil feidhm aige maidir leis an máthairinstitiúid Aontais ar leibhéal comhdhlúite an ghrúpa níos airde ná ceanglas cistí dílse breise gach eintitis de chuid an ghrúpa réitigh, ba cheart an ceanglas cistí dílse breise a bhfuil feidhm aige maidir leis an máthairinstitiúid Aontais ar leibhéal comhdhlúite an ghrúpa a bheith mar bhonn le meastachán a dhéanamh ar cheanglas cistí dílse breise an eintitis réitigh ar leibhéal comhdhlúite an ghrúpa réitigh. Sa chás sin, ba cheart do na húdaráis réitigh, ar bhonn na faisnéise a chuirfidh an t-údarás inniúil ar fáil, féachaint leis an meastachán sin a choigeartú chun priacail shonracha an ghrúpa réitigh a léiriú i gcomparáid le priacail na máthairinstitiúide Aontais ar leibhéal comhdhlúite an ghrúpa. Ba cheart a chur san áireamh leis an gcoigeartú sin go bhféadfadh sé nach mbeadh priacail áirithe an ghrúpa réitigh in eintitis eile de chuid an ghrúpa nach cuid den ghrúpa réitigh iad nó go bhféadfadh sé nach mbeadh priacail áirithe atá sna heintitis sin de chuid an ghrúpa sa ghrúpa réitigh féin.

(6)

Más airde ceanglas aonair amháin nó níos mó sa ghrúpa réitigh ná an ceanglas cistí dílse breise a bhfuil feidhm aige maidir leis an máthairinstitiúid Aontais ar leibhéal comhdhlúite an ghrúpa, is léiriú é gurb ann do phriacail nó d’eilimintí priacail neamhghnácha laistigh den ghrúpa réitigh. D’fhéadfadh níos lú tábhacht a bheith ag baint leis na priacail nó na heilimintí priacail neamhghnácha sin nuair a mheastar iad sa ghrúpa ar an leibhéal comhdhlúite, mar shampla de bhrí go bhféadfaí iad a fhritháireamh le fachtóirí priacail frithchúitimh lasmuigh den ghrúpa réitigh. Chun ceanglas cistí dílse breise an eintitis réitigh ar leibhéal comhdhlúite an ghrúpa réitigh a mheas, ba cheart don údarás réitigh, dá bhrí sin, nuair a thagann an cás seo chun cinn, meastachán atá bunaithe ar choigeartuithe ar an gceanglas cistí dílse breise, a bhfuil feidhm aige maidir leis an máthairinstitiúid Aontais ar leibhéal comhdhlúite an ghrúpa, a chur i gcomparáid le meastachán atá bunaithe ar mheán ualaithe cheanglais cistí dílse breise na n-eintiteas uile de chuid an ghrúpa réitigh. Ba cheart don údarás réitigh úsáid a bhaint as an meastachán lena soláthraítear an ceanglas níos airde mar ionchur chun ICDI a chinneadh don eintiteas réitigh ar leibhéal comhdhlúite an ghrúpa réitigh.

(7)

Chun ceanglas cistí dílse breise an eintitis réitigh a mheas ar leibhéal comhdhlúite an ghrúpa réitigh le haghaidh grúpaí níos casta, ba cheart do na húdaráis réitigh, i gcás inar féidir, ar bhonn na faisnéise a chuirfidh an t-údarás inniúil ar fáil, ceanglas cistí dílse breise na máthairinstitiúide Aontais a choigeartú ar leibhéal comhdhlúite an ghrúpa lena léiriú nach mbaineann roinnt priacal nó eilimintí priacail a chumhdaítear leis an gceanglas cistí breise sin leis an ngrúpa réitigh lena mbaineann, mar shampla mar gheall ar a gcineál nó ar a suíomh geografach. Ba cheart do na húdaráis réitigh, freisin, i gcás inar féidir, ar bhonn na faisnéise a chuirfidh an t-údarás inniúil ar fáil, coigeartuithe a dhéanamh ar an gceanglas sin chun a chur san áireamh nach léirítear priacail nó eilimintí priacail áirithe de chuid an ghrúpa réitigh go hiomlán sa cheanglas sin nó go nglanluacháiltear iad laistigh de, ach go bhfuil siad ábhartha, mar sin féin, maidir leis an ngrúpa réitigh sin. Ba cheart na coigeartuithe go léir a bheith bunaithe ar fhaisnéis a chuirfidh na húdaráis inniúla ábhartha ar fáil, i gcás ina bhfuil sí ar fáil, ós rud é go bhfuil na húdaráis sin freagrach as meastachán a dhéanamh ar na priacail leanúnacha a bhfuil na heintitis i ngrúpa neamhchosanta orthu. I gcás nach féidir na coigeartuithe sin a dhéanamh, ba cheart don údarás réitigh úsáid a bhaint as ceanglas cistí dílse breise gan choigeartú na máthairinstitiúide Aontais ar leibhéal comhdhlúite an ghrúpa chun meastachán a dhéanamh ar cheanglais cistí dílse breise an eintitis réitigh ar leibhéal comhdhlúite an ghrúpa réitigh.

(8)

Ní athraíonn ráta an chaipitil mhaolánaigh caomhantais ó institiúid go hinstitiúid. Ba cheart an ráta sin a úsáid, dá bhrí sin, mar mheastachán ar chaipiteal maolánach caomhantais an eintitis réitigh ar leibhéal comhdhlúite an ghrúpa réitigh.

(9)

Chun struchtúr pleanáilte an ghrúpa a léiriú tar éis chur chun feidhme na straitéise réitigh tosaíochta, ba cheart ceanglais maoláin arb é is aidhm leo aghaidh a thabhairt ar phriacal sistéamach, eadhon, maolán na n-institiúidí a bhfuil tábhacht shistéamach dhomhanda ag gabháil leo, maolán na n-institiúidí eile a bhfuil tábhacht shistéamach ag gabháil leo agus an maolán maidir le priacal sistéamach, a mheas, mar réamhshocrú, a bheith comhionann leis na ceanglais arna socrú don eintiteas is gaire, ó thaobh mhéid iomlán na risíochta ar phriacal de, don ghrúpa réitigh.

(10)

De réir phointe (a) (ii) den chéad fhomhír d’Airteagal 45c(3) de Threoir 2014/59/AE, is é an méid athchaipitliúcháin an méid a chuireann ar chumas an ghrúpa réitigh a d’eascair as réiteach comhlíonadh an cheanglais cistí dílse breise, i measc ceanglais eile, a athbhunú ar leibhéal an ghrúpa réitigh chomhdhlúite, tar éis chur chun feidhme na straitéise réitigh tosaíochta. De réir an seachtú fomhír d’Airteagal 45c(3) de Threoir 2014/59/AE, beidh an méid is gá chun a áirithiú, tar éis réitigh, go mbeidh an t-eintiteas réitigh in ann muinín leordhóthanach sa mhargadh a chaomhnú ar feadh tréimhse iomchuí cothrom leis an gceanglas maoláin chomhcheangailte a mbeidh feidhm aige tar éis chur i bhfeidhm na n-uirlisí réitigh lúide an cúlchiste fritimthriallach. Is cuid de ICDI é an méid athchaipitliúcháin, lena n-áirítear an méid is gá chun muinín sa mhargadh a chaomhnú, agus féadfar é a choigeartú síos nó suas faoi mhíreanna 3 agus 7 d’Airteagal 45c de Threoir 2014/59/AE chun na hathruithe ar an ngrúpa réitigh tar éis chur i bhfeidhm na n-uirlisí réitigh a léiriú. Dá réir sin, níor cheart a mheas ach an ceanglas cistí dílse breise agus an ceanglas maoláin chomhcheangailte, arna gcur i bhfeidhm ar an eintiteas réitigh ar leibhéal comhdhlúite an ghrúpa réitigh, a úsáidtear chun ICDI a chalabrú. Ba cheart an meastachán sin a bheith gan dochar, áfach, d’aon choigeartuithe ar an méid athchaipitliúcháin, lena n-áirítear an méid is gá chun muinín sa mhargadh a chaomhnú, agus ICDI á shocrú faoi Threoir 2014/59/AE.

(11)

Tá an Rialachán seo bunaithe ar na dréachtchaighdeáin theicniúla rialála arna gcur faoi bhráid an Choimisiúin ag an Údarás Baincéireachta Eorpach.

(12)

Tá comhairliúcháin oscailte phoiblí seolta ag an Údarás Baincéireachta Eorpach maidir leis na dréachtchaighdeáin theicniúla rialála ar a bhfuil an Rialachán seo bunaithe, tá anailís déanta aige ar na costais agus na tairbhí a d’fhéadfadh a bheith ag baint leo, agus tá comhairle iarrtha aige ón nGrúpa Geallsealbhóirí Baincéireachta a bunaíodh i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (4),