RÁITIS ÓNG COIMISIÚN

Rialachán (AE) 2021/1060 ó Pharlaimint na hEorpa agus ón gComhairle an 24 Meitheamh 2021 lena leagtar síos forálacha coiteanna maidir le Ciste Forbraíochta Réigiúnaí na hEorpa, Ciste Sóisialta na hEorpa Plus, an Ciste Comhtháthaithe, an Ciste um Aistriú Cóir agus an Ciste Eorpach Muirí, Iascaigh agus Dobharshaothraithe agus rialacha airgeadais maidir leis na cistí sin agus maidir leis an gCiste um Thearmann, Imirce agus Lánpháirtíocht, an Ciste Slándála Inmheánaí agus an Ionstraim le haghaidh Tacaíocht Airgeadais don Bhainistiú Teorainneacha agus don Bheartas Víosaí — Glacadh an ghnímh reachtaigh

(2021/C 269 I/01)

Ráiteas maidir leis an imréiteach réamh-mhaoinithe

Cuireadh san áireamh sna huasteorainneacha íocaíochta i rialachán CAI an toimhde go ndéanfaí an réamh-mhaoiniú uile a imréiteach ar bhonn bliantúil. Measann an Coimisiún go bhféadfaí dul níos faide ná uasteorainneacha CAI is infheidhme maidir le leithreasuithe íocaíochta a bheith mar thoradh ar an gcomhaontú ar ar tháinig na comhreachtóirí maidir le CPR, agus na próifílí íocaíochta a bhfuiltear ag súil leo á gcur san áireamh. D’fhéadfadh riaráiste íocaíochta a bheith mar thoradh air sin sa dara leath den chéad tréimhse eile.

Ráiteas maidir leis an gcomhphlé struchtúrtha faoi bhearta sealadacha chun Cistí a úsáid mar fhreagairt ar imthosca eisceachtúla agus neamhghnácha

Leis na forálacha a ghlac na comhreachtóirí, ceanglaítear ar an gCoimisiún an Pharlaimint agus an Chomhairle a chur ar an eolas láithreach faoin measúnú ar an gcás maidir leis na himthosca eisceachtúla agus neamhghnácha. Cuireann na comhreachtóirí de cheangal ar an gCoimisiún iad a chur ar an eolas láithreach maidir leis an obair leantach atá beartaithe trí bhearta sealadacha chun na Cistí a úsáid agus chun aird chuí a thabhairt ar na seasaimh a ghlacfar agus na tuairimí a chuirfear in iúl tríd an gcomhphlé struchtúrtha a bhféadfaidh an Pharlaimint nó an Chomhairle cuireadh a thabhairt don Choimisiún chuige.

Níl na ceanglais sin i gcomhréir le hAirteagal 291(2) agus (3) CFAE agus Rialachán maidir le Nós Imeachta Coistí Uimh. 182/2011, rialacháin nach bhforáiltear iontu maidir le haon rannpháirtíocht ón bParlaimint agus ón gComhairle i rialú ar fheidhmiú na gcumhachtaí cur chun feidhme arna dtabhairt don Choimisiún. D’fhéadfadh cásanna ina mbeadh cumhachtaí cur chun feidhme an Choimisiúin srianta a bheith mar thoradh orthu. Dá bhrí sin, ní féidir leis an gCoimisiún na ceanglais sin a chomhlíonadh ach amháin a mhéid nach gcuireann siad sin isteach ar a gcumhachtaí cur chun feidhme mar a rialaítear iad faoi Airteagal 291 CFAE agus Rialachán maidir le Nós Imeachta Coistí Uimh. 182/2011.

Ní féidir na forálacha sin a mhacasamhlú in aon chás i gcreat dlíthiúil eile i gcás nach ndéantar foráil maidir le haon imthosca eisceachtúla agus neamhghnácha.

Ráiteas maidir leis na bearta breise chun buiséad an Aontais agus Next Generation EU i gcoinne calaoise agus neamhrialtachtaí trína cheangal go n-úsáidtear aon uirlis mianadóireachta sonraí amháin arna soláthar ag an gCoimisiún

Le Pointí 30 go 33 den Chomhaontú Idirinstitiúideach idir Parlaimint na hEorpa, an Chomhairle agus an Coimisiún maidir le smacht buiséadach, comhar in ábhair bhuiséadacha agus bainistíocht fhónta airgeadais, chomh maith le hacmhainní dílse nua, lena n-áirítear treochlár maidir le hacmhainní dílse nua a thabhairt isteach, ceanglaítear ar an gCoimisiún córas comhtháite idir-inoibritheach faisnéise agus faireacháin a chur ar fáil, lena n-áirítear uirlis aonair mianadóireachta sonraí agus scórála riosca chun measúnú agus anailís a dhéanamh ar na sonraí atá ag teastáil d’fhonn go gcuirfidh na Ballstáit i bhfeidhm ar bhealach ginearálaithe é. Thairis sin, d’aontaigh na trí institiúid go n-oibreoidís i gcomhar le chéile go dúthrachtach, le linn an nós imeachta reachtaigh a bhaineann leis na bunghníomhartha ábhartha, chun obair leantach maidir leis an ngné seo ar na conclúidí ón gComhairle Eorpach i mí Iúil 2020 a áirithiú.

Measann an Coimisiún nach leor an comhaontú ar tháinig na comhreachtóirí air faoi Airteagal 69(2) (freagrachtaí na mBallstát) maidir le húsáid éigeantach aon uirlis mianadóireachta sonraí amháin agus bailiú agus anailísiú sonraí a bhaineann le húinéirí tairbhiúla fhaighteoirí an chistithe, nach leor é chun feabhas a chur ar chosaint bhuiséad an Aontais agus Next Generation EU in aghaidh calaoise agus neamhrialtachtaí agus chun seiceálacha éifeachtúla ar choinbhleachtaí leasa, neamhrialtachtaí, saincheisteanna cistithe dúbailte agus mí-úsáid choiriúil na gcistí a áirithiú. Dá bhrí sin, an cur chuige ar ar aontaigh na comhreachtóirí i Rialachán na bhForálacha Coiteanna, ní léiríonn an cur chuige sin go hiomchuí uaillmhian agus spiorad inmhianaithe an Chomhaontaithe Idirinstitiúidigh.

Ráiteas maidir le buiséad an Aontais a chosaint trí chéatadán de na híocaíochtaí chuig cláir bainistíochta comhroinnte a choinneáil siar

Maidir leis an gcomhaontú arna dhéanamh ag na comhreachtóirí chun an ráta coinneála ar íocaíochtaí bainistíochta comhroinnte a laghdú ó 10 % go 5 %, measann an Coimisiún go gcruthaíonn sé riosca méadaithe go n-íocfaidh buiséad an Aontais méideanna a ndéantar neamhrialtachtaí difear dóibh.

Chun an riosca sin a íoslaghdú, bainfidh an Coimisiún úsáid iomchuí as briseadh íocaíochtaí le cláir agus íocaíochtaí a chur ar fionraí nuair a mheasann sé nach leor an ráta coinneála 5 % chun méid aon neamhrialtacht fhéideartha a chumhdach.