(1)

Permezz tar-Regolament tal-Kunsill (KE) Nru 980/2005 tas-27 ta’ Ġunju 2005 li japplika skema ta’ preferenzi tariffarji ġeneralizzati (3), il-Komunità tat preferenzi tariffarji ġeneralizzati lill-Kambodja.

(2)

Ir-Regolament (KEE) Nru 2454/93 jistabbilixxi d-definizzjoni tal-kunċett tal-oriġini tal-prodotti biex jintuża għall-għanijiet tal-iskema ta' preferenzi tariffarji ġeneralizzati. Ir-Regolament (KEE) Nru 2454/93 jistipula wkoll derogi għal dik id-definizzjoni li jiffavorixxu lill-pajjiżi benefiċjarji l-anqas żviluppati li jibbenefikaw mis-sistema ġeneralizzata ta' preferenzi (GSP) jekk dawn ikunu ressqu quddiem il-Kummissjoni talba apposta għal dak il-għan.

(3)

Il-Kambodja bbenfikat minn deroga ta’ dan it-tip għal ċerti tessuti mill-1997 ’l hawn, bl-aħħar każ ta’ dan iseħħ bis-saħħa tar-Regolament tal-Kummissjoni (KE) Nru 1614/2000 (4). Il-validità tar-Regolament (KE) Nru 1614/2000 ġiet estiża sal-31 ta’ Diċembru 2006.

(4)

Il-Kambodja, permezz ta’ ittra bid-data tad-29 ta' Ġunju 2006, ressqet talba ħalli tittawwal id-deroga skont l-Artikolu 76 tar-Regolament (KEE) Nru 2454/93.

(5)

Meta l-validità tar-Regolament (KE) Nru 1614/2000 ittawlet sal-31 ta' Diċembru 2006, kien mistenni li regoli tal-oriġini GSP ġodda, aktar sempliċi u aktar kompatibbli mal-iżvilupp ikunu fis-seħħ qabel ma tiskadi d-deroga. Madankollu r-regoli tal-orġini GSP il-ġodda mhumiex mistennija li jiġu adottati qabel il-31 ta’ Diċembru 2006.

(6)

L-applikazzjoni tar-regoli tal-oriġini GSP li jinsabu fis-seħħ bħalissa jkollhom effett negattiv fuq l-investiment, u l-impjiegi fil-Kambodja, kif ukoll fuq il-ħila tal-industrija eżistenti fil-Kambodja li tibqa’ tesporta lejn il-Komunità.

(7)

Il-perjodu mtawwal għandu jqis iż-żmien meħtieġ sabiex jiġu adottati u implimentati r-regoli tal-oriġini GSP il-ġodda. Barra minn hekk, l-interessi tal-kummerċjanti li jikkonkludu kuntratti kemm fil-Kambodja u fil-Komunità, kif ukoll l-istabbiltà tal-industrija Kambodjana, jeħtieġu li d-deroga tittawwal għal perjodu li jkun biżżejjed sabiex jippermetti l-kontinwazzjoni jew il-konklużjoni ta' kuntratti magħmula fuq medda itwal ta' żmien.

(8)

Id-deroga, għaldaqstant, għandha tittawwal sal-31 ta’ Diċembru 2008. Madankollu, sabiex jiġi żgurat trattament ġust għall-Kambodja u għal pajjiżi oħra fost l-anqas żviluppati, il-ħtieġa li titkompla d-deroga għandha tiġi analizzata mill-ġdid hekk kif ir-regoli tal-oriġini GSP il-ġodda jiġu adottati.

(9)

Ir-Regolament (KE) Nru 1614/2000, għalhekk, għandu jiġi emendat skont dan.

(10)

Il-miżuri stipulati f'dan ir-Regolament huma konformi mal-opinjoni tal-Kumitat tal-Kodiċi Doganali,

(1)

Fl-ewwel paragrafu, id-data l-“31 ta' Diċembru 2006” għandha tinbidel bil-“31 ta’ Diċembru 2008”;

(2)

It-tieni paragrafu għandu jinbidel b’dan li ġej:

“Il-ħtieġa li titkompla d-deroga għandha madankollu tiġi analizzata mill-ġdid hekk kif ir-regoli tal-oriġini l-ġodda tas-sistema ġeneralizzata tal-preferenzi jiġu adottati.”