REGOLAMENT TAL-KUMMISSJONI (KE) Nru 1100/2006

tas-17 ta’ Lulju 2006

li jistabbilixxi, għas-snin tas-suq 2006/07, 2007/08 u 2008/09, regoli dettaljati għall-ftuħ u l-amministrazzjoni ta’ kwoti tariffarji għaz-zokkor tal-kannamieli mhux raffinat għar-raffinar, li joriġina mill-pajjiżi l-anqas żviluppati, kif ukoll regoli dettaljati li japplikaw għall-importazzjoni ta’ prodotti tal-intestatura tariffarja 1701 li joriġinaw mill-pajjiżi l-inqas żviluppati

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 980/2005 tas-27 ta’ Ġunju 2005 li japplika skema ta’ preferenzi tariffarji ġeneralizzati (1) [traduzzjoni mhux uffiċjali], partikolarment l-Artikolu 12(6) tiegħu,

Wara li kkunsidrat ir-Regolament (KE) Nru 318/2006 tal-20 ta’ Frar 2006 dwar l-organizzazzjoni komuni tas-swieq fis-settur taz-zokkor (2) [traduzzjoni mhux uffiċjali], partikolarment l-Artikoli 23(4), 40(1) u 40(2)(f) tiegħu,

Billi:

(1)

L-Artikolu 12(4) tar-Regolament (KE) Nru 980/2005 jistabbilixxi li, għall-prodotti tal-intestatura tariffarja 1701 li joriġinaw minn pajjiż li, skont l-Anness I għal dak ir-Regolament, jibbenefika mill-arranġament speċjali għall-pajjiżi l-inqas żviluppati, id-dazji tat-Tariffa Doganali Komuni għandhom jitnaqqsu b’20 % fl-1 ta’ Lulju 2006, b’50 % fl-1 ta’ Lulju 2007, bi 80 % fl-1 ta’ Lulju 2008 u b’100 % fl-1 ta’ Lulju 2009.

(2)

Skont l-Artikolu 27 tar-Regolament (KE) Nru 318/2006 u l-Artikolu 36 tar-Regolament tal-Kummissjoni (KE) Nru 951/2006 tat-30 ta’ Ġunju 2006 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 318/2006 rigward il-kummerċ ma’ pajjiżi terzi fis-settur taz-zokkor (3) [traduzzjoni mhux uffiċjali], jistgħu jiġu imposti dazji addizzjonali għall-importazzjonijiet fejn jintlaħqu ċerti kundizzjonijiet. Fil-qafas tar-riforma tas-suq komuni fis-settur taz-zokkor, saru analiżi dwar il-kwantitajiet li setgħu jiġu importati mill-inqas pajjiżi żviluppati skont l-Artikolu 12(4) tar-Regolament (KE) Nru 980/2005. F’dawn il-limiti kwantitattivi, dawn l-importazzjonijiet x’aktarx ma jfixklux is-suq Komunitarju. Għalhekk, l-applikazzjoni sħiħa tad-dazji addizzjonali għal dawn l-importazzjonijiet tista’ tkun waħda sporporzjonata, u kwalunkwe dazji addizzjonali għal dawn l-importazzjonijiet għandhom jitnaqqsu b’mod proporzjonat mat-tnaqqis fid-dazji tat-Tariffa Doganali Komuni previsti fl-istess Artikolu, partikolarment meta jitqies l-għan li jkun hemm aċċess bla dazju u bla kwoti għal dawn l-importazzjonijiet skont ir-Regolament (KE) Nru 980/2005. L-importazzjonijiet skont l-Artikolu 12(5) tar-Regolament (KE) Nru 980/2005 mhumiex soġġetti għal dazji addizzjonali.

(3)

L-Artikolu 12(5) tar-Regolament (KE) Nru 980/2005 jistabbilixxi li, sakemm dawk id-dazji tat-Tariffa Doganali Komuni jiġu sospiżi kompletament, għandha tinfetaħ kwota tariffarja globali ta’ dazju żero għal kull sena tas-suq għaz-zokkor tal-kannamieli mhux raffinat għar-raffinar tal-kodiċi NM 1701 11 10, li joriġina mill-pajjiżi l-inqas żviluppati. Din il-kwota tariffarja kienet disponibbli permezz tar-Regolament tal-Kummissjoni (KE) Nru 1381/2002 tad-29 ta’ Lulju 2002 li jippreskrivi regoli dettaljati għall-ftuħ u l-amministrazzjoni tal-kwoti tat-tariffi għal zokkor tal-kannamieli mhux raffinat għar-raffinat, li joriġina fil-pajjiżi l-anqas żviluppati, għas-snin tas-suq 2002/03 sa 2005/06 (4), u għandha tkun disponibbli sat-30 ta’ Ġunju 2009. Għall-prodotti tal-kodiċi NM 17 011 110, il-kwota tariffarja għas-sena tas-suq 2006/07 għandha tkun ekwivalenti għal 1492 14 tunnellata, imfissra bħala “ekwivalenti ta’ zokkor abjad”. Għal kull waħda mis-snin tas-suq sussegwenti, il-kwota għandha tiżdied bi 15 % fuq il-kwota tas-sena tas-suq preċedenti.

(4)	Il-ftuħ u l-amministrazzjoni ta’ dawk il-kwoti tariffarji għandhom ikunu implimentati fil-qafas tas-sistema kummerċjali komuni stabbilita bir-Regolament (KE) Nru 318/2006, partikolarment rigward is-sistema tal-applikazzjonijiet għal-liċenzji tal-importazzjoni.

(5)

Il-kwantitajiet ta’ zokkor għar-raffinar li jibbenefikaw mid-dazji mnaqqsa tat-Tariffa Doganali Komuni jew mill-kwoti tariffarji globali għandhom ikunu importati taħt kundizzjonijiet ta’ raffinar li jilħqu l-bżonnijiet ta’ provvista tradizzjonali tal-Istati Membri, imsemmija fl-Artikolu 29 tar-Regolament (KE) Nru 318/2006.

(6)

Biex ikun żgurat prezz adegwat għaz-zokkor mhux raffinat li jiġi esportat mill-inqas pajjiżi żviluppati lejn il-Komunità, għandu jiġi ffissat prezz minimu li jrid jitħallas mir-raffinaturi. Il-prezz tax-xiri li jitħallas għandu jkun mill-inqas ekwivalenti għall-prezz iggarantit imsemmi fl-Artikolu 30(1) tar-Regolament (KE) Nru 318/2006.

(7)

Ir-regoli ġenerali dwar il-liċenzji tal-importazzjoni, previsti fir-Regolament tal-Kummissjoni (KE) Nru 1291/2000 tad-9 ta’ Ġunju 2000 li jistabbilixxi regoli dettaljati komuni għall-applikazzjoni tal-liċenzji tal-importazzjoni u tal-esportazzjoni u ta’ ċertifikati ta’ ffissar bil-quddiem għal prodotti agrikoli (5), kif ukoll ir-regoli dettaljati speċjali għas-settur taz-zokkor, stabbiliti bir-Regolament (KE) Nru 951/2006, għandhom japplikaw. Għall-ġestjoni tal-importazzjonijiet u sabiex ikun żgurat li jiġu rispettati l-limiti annwali, huma meħtieġa regoli dettaljati dwar il-ħruġ ta’ liċenzji tal-importazzjoni għaz-zokkor mhux raffinat.

(8)

Peress li l-kwoti tariffarji globali ma jipprevedux marġini li jeċċedu dawk il-kwantitajiet, id-dazju tat-Tariffa Doganali Komuni, imnaqqas skont l-Artikolu 12(4) tar-Regolament (KE) Nru 980/2005, għandu japplika għall-kwantitajiet kollha importati f’eċċess għal dawk li jidhru fil-liċenzji tal-importazzjoni. Sabiex jiġi evitat eċċess ta’ importazzjoni ta’ zokkor mhux raffinat fil-Komunità mill-pajjiżi l-inqas żviluppati, dispożizzjonijiet huma meħtieġa biex jiżguraw li l-kwantitajiet importati ta’ zokkor jiġu effettivament raffinati sal-aħħar tas-sena tas-suq konċernata jew sa ċerta data stabbilita mill-Istat Membru.

(9)

Minħabba l-bżonn ta’ provvista tradizzjonali stabbilita għal kull Stat Membru fis-settur taz-zokkor għar-raffinar u minħabba l-ħtieġa biex jinżamm kontroll strett fir-rigward tat-tqassim tal-kwantitajiet ta’ zokkor li jridu jiġu importati, huwa xieraq li l-ħruġ, kif ukoll it-trasferiment, tal-liċenzji tal-importazzjoni jkunu ristretti għar-raffinaturi full-time.

(10)	Peress li s-sena tas-suq għall-2006/07 iddum 15-il xahar u li s-snin tas-suq 2007/08 u 2008/09 jibdew minn Ottubru tal-ewwel sena sa Settembru tas-sena ta’ wara, il-volumi tal-kwoti tariffarji annwali previsti fl-Artikolu 12(5) tar-Regolament (KE) Nru 980/2005 għandhom għaldaqstant jiġu aġġustati.

(11)	Sabiex titħares il-kwantità tal-kwota annwali stabbilita bir-Regolament (KE) Nru 980/2005, l-Istati Membri għandhom jikkomunikaw lill-Kummissjoni l-kwantitajiet ta’ zokkor mhux raffinat imfissra bħala “ekwivalenti ta’ zokkor abjad”.

(12)	Biex l-importazzjonijiet ikunu ġestiti b’mod effettiv, l-Istati Membri għandhom iżommu kont tad-dejta rilevanti u jinnotifikawha lill-Kummissjoni.

(13)

Għal finijiet ta’ kontroll, l-importazzjonijiet għandhom ikunu soġġetti għas-sorveljanza msemmija fl-Artikolu 308(d) tar-Regolament tal-Kummissjoni (KEE) Nru 2454/93 tat-2 ta’ Lulju 1993 li jiffissa d-dispożizzjonijiet għall-implimentazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komunitarju (6).

(14)	Id-dispożizzjonijiet dwar il-prova tal-oriġini, stabbiliti fl-Artikoli 67 sa 97 tar-Regolament tal-Kummissjoni (KEE) Nru 2454/93, jistabbilixxu d-definizzjoni tal-kunċett ta’ prodotti li joriġinaw, li għandha tintuża għall-finijiet tal-preferenzi ġeneralizzati tat-tariffa.

(15)	Il-Kumitat ta’ Ġestjoni taz-Zokkor ma tax opinjoni fiż-żmien stabbilit mill-President tiegħu.

(16)	Il-miżuri previsti f’dan ir-Regolament huma skont l-opinjoni tal-Kumitat tal-Preferenzi Ġeneralizzati,

ADOTTAT DAN IR-REGOLAMENT:

Artikolu 1

Dan ir-Regolament jistabbilixxi, għas-snin tas-suq 2006/07, 2007/08 u 2008/09:

—	ir-regoli għall-ftuħ u l-amministrazzjoni tal-kwoti tariffarji globali għaz-zokkor tal-kannamieli mhux raffinat għar-raffinar tal-kodiċi NM 1701 11 10, imsemmija fl-Artikolu 12(5) tar-Regolament (KE) Nru 980/2005, u

—	ir-regoli li japplikaw għall-importazzjoni tal-prodotti tal-intestatura tariffarja 1701, għall-finijiet tal-Artikolu 12(4) u (5) tar-Regolament (KE) Nru 980/2005.

Artikolu 2

Għall-finijiet ta’ dan ir-Regolament:

—	“sena tas-suq” tfisser is-sena tas-suq msemmija fl-Artikolu 1(2) tar-Regolament (KE) Nru 318/2006, li tibda mill-1 ta’ Ottubru u tintemm fit-30 ta’ Settembru tas-sena ta’ wara, ħlief għas-sena tas-suq 2006/07 li tibda fl-1 ta’ Lulju 2006 u tintemm fit-30 ta’ Settembru 2007,

—

“raffinatur full-time” tfisser unità tal-produzzjoni: — li l-attività unika tagħha tikkonsisti fir-raffinar ta’ zokkor tal-kannamieli mhux raffinat importat, jew — li, fis-sena tas-suq 2004/05, kienet irraffinat kwantità ta’ mill-inqas 15 000 tunnellata ta’ zokkor tal-kannamieli mhux raffinat importat,

—	il-piż “tel quel” ifisser il-piż taz-zokkor fl-istat naturali tiegħu.

Artikolu 3

1.   Il-kwoti tariffarji globali li ġejjin b’dazju żero, imfissra bħala “ekwivalenti ta’ zokkor abjad”, għandhom jinfetħu għall-importazzjonijiet ta’ zokkor tal-kannamieli mhux raffinat għar-raffinar tal-kodiċi NM 1701 11 10, li joriġinaw minn pajjiż li, skont l-Anness I għar-Regolament (KE) Nru 980/2005, jibbenefika mill-arranġament speċjali għall-pajjiżi l-inqas żviluppati:

—	192 113 tunnellata għas-sena tas-suq mill-1 ta’ Lulju 2006 sat-30 ta’ Settembru 2007;

—	178 030,75 tunnellata għas-sena tas-suq mill-1 ta’ Ottubru 2007 sat-30 ta’ Settembru 2008;

—	148 001,25 tunnellata għas-sena tas-suq mill-1 ta’ Ottunru 2008 sat-30 ta’ Ġunju 2009.

Il-kwoti għandu jkollhom in-numri tal-ordni 09.4360, 09.4361 u 09.4362, rispettivament.

Kull kwota għandha tinfetaħ fl-ewwel jum tas-sena tas-suq ikkonċernata u għandha tibqa’ miftuħa sal-aħħar jum ta’ dik is-sena tas-suq.

Id-dazji kollha tat-Tariffa Doganali Komuni, kif ukoll kwalunkwe dazji addizzjonali msemmija fl-Artikolu 27 tar-Regolament (KE) Nru 318/2006 u soġġetti għall-Artikolu 36 tar-Regolament (KE) Nru 951/2006, ma japplikawx għall-importazzjonijiet taħt dawn il-kwoti.

2.   Għall-importazzjonijiet, għajr dawk imsemmija fil-paragrafu 1, tal-prodotti tal-intestatura tariffarja 1701 li joriġinaw mill-pajjiżi l-inqas żviluppati, id-dazji tat-Tariffa Doganali Komuni (CCT), kif ukoll id-dazji addizzjonali msemmija fl-Artikolu 27 tar-Regolament (KE) Nru 318/2006 u soġġetti għall-Artikolu 36 tar-Regolament (KE) Nru 951/2006, għandhom jitnaqqsu skont l-Artikolu 12(4) tar-Regolament (KE) Nru 980/2005, b’20 % fl-1 ta’ Lulju 2006, b’50 % fl-1 ta’ Lulju 2007 u bi 80 % fl-1 ta’ Lulju 2008; dawn għandhom jiġu sospiżi kompletament mill-1 ta’ Lulju 2009.

Dawn l-importazzjonijiet għandhom jingħataw numru ta’ referenza skont il-perjodu tal-importazzjoni u r-rata tat-tnaqqis li tapplika.

In-numri ta’ referenza u r-rati tal-CCT u d-dazji addizzjonali li japplikaw għandhom ikunu kif ġej:

(a)	għall-perjodu tal-importazzjoni mill-1 ta’ Lulju 2006 sat-30 ta’ Ġunju 2007, in-numru ta’ referenza huwa 09.4370 u l-frazzjoni tal-CCT u tad-dazji addizjonali li jridu jitħallsu hi ta’ 80 %;

(b)	għall-perjodu tal-importazzjoni mill-1 ta’ Lulju 2007 sat-30 ta’ Ġunju 2008, in-numru ta’ referenza huwa 09.4371 u l-frazzjoni tal-CCT u tad-dazji addizjonali li jridu jitħallsu hi ta’ 50 %;

(c)	għall-perjodu tal-importazzjoni mill-1 ta’ Lulju 2008 sat-30 ta’ Ġunju 2009, in-numru ta’ referenza huwa 09.4372 u l-frazzjoni tal-CCT u tad-dazji addizjonali li jridu jitħallsu hi ta’ 20 %;

(d)	għall-perjodu tal-importazzjoni mill-1 ta’ Lulju 2009 sat-30 ta’ Settembru 2009, in-numru ta’ referenza huwa 09.4373 u l-frazzjoni tal-CCT u tad-dazji addizjonali li jridu jitħallsu hi ta’ 0 %.

In-numri ta’ referenza japplikaw għal kwantità li ma tkunx limitata fil-volum.

Artikolu 4

L-importazzjonijiet imsemmija fl-Artikolu 3(1) u (2) jeħtieġu liċenzja tal-importazzjoni maħruġa skont ir-Regolament (KE) Nru 1291/2000 u r-Regolament (KE) Nru 951/2006, soġġetti għad-dispożizzjonijiet ta’ dan ir-Regolament.

Artikolu 5

1.   L-applikazzjonijiet għal-liċenzji tal-importazzjoni għandhom ikunu sottomessi lill-awtorità kompetenti fl-Istat Membru li jimporta kkonċernat.

2.   Fil-limiti msemmija fl-Artikolu 6(2), l-applikazzjonijiet għal-liċenzji tal-importazzjoni għaz-zokkor għar-raffinar fil-qafas tal-bżonn ta’ provvista tradizzjonali msemmi fl-Artikolu 29(1) u (2) tar-Regolament (KE) Nru 318/2006, jistgħu jiġu sottomessi biss, għas-sena tas-suq ikkonċernata, lill-awtoritajiet kompetenti fl-Istati Membri, minn:

—	ir-raffinaturi full-time tal-Istat Membru kkonċernat, sat-30 ta’ Ġunju tas-sena tas-suq,

—	kwalunkwe raffinatur Komunitarju full-time, mit-30 ta’ Ġunju sat-tmiem tas-sena tas-suq.

3.   Fil-każ tal-importazzjonijiet msemmija fl-Artikolu 3(1), l-applikazzjonijiet għal-liċenzji tal-importazzjoni jistgħu jiġu sottomessi mill-ewwel jum tas-sena tas-suq sad-data li fiha jiġi limitat il-ħruġ tal-liċenzji tal-importazzjoni msemmija fl-Artikolu 6(2).

Fil-każ tal-importazzjonijiet msemmija fl-Artikolu 3(2), l-applikazzjonijiet għal-liċenzji tal-importazzjoni jistgħu jiġu sottomessi mill-ewwel jum tal-perjodu tal-importazzjoni relevanti.

4.   L-applikazzjonijiet għal-liċenzji tal-importazzjoni għandhom jiġu sottomessi lill-awtorità kompetenti fl-Istat Membru li fih l-applikant huwa rreġistrat għal finijiet ta’ VAT.

5.   Għandha tkun awtorizzata applikazzjoni waħda biss għal liċenzja tal-importazzjoni għal kull numru tal-ordni għal kull ġimgħa għal kull applikant. Fejn, f’ġimgħa partikolari, tiġi sottomessa iktar minn applikazzjoni waħda minn applikant għal numru tal-ordni partikolari, l-applikazzjonijiet kollha tal-applikant għal dak in-numru tal-ordni għal dik il-ġimgħa għandhom jiġu rrifjutati, u għaldaqstant il-garanziji ppreżentati għandhom jakkumulaw favur l-Istat Membru kkonċernat.

6.   L-applikazzjonijiet għal-liċenzji tal-importazzjoni għandhom jindikaw s-sena tas-suq li magħha dawn huma kkonċernati, u jekk iz-zokkor huwiex għar-raffinar jew għal finijiet oħra barra r-raffinar.

7.   L-applikazzjonijiet għal-liċenzji tal-importazzjoni għandhom ikunu akkumpanjati bi:

(a)	prova li l-applikant issottometta garanzija ta’ EUR 20 għal kull tunnellata tal-kwantità ta’ zokkor indikata fil-Kaxxa 17 tal-applikazzjoni għal-liċenzja tal-importazzjoni;

(b)	kopja oriġinali tal-liċenzja tal-esportazzjoni (konformi mal-mudell stabbilit fl-Anness), maħruġa mill-awtoritajiet fil-pajjiż benefiċjarju li jesporta, għal ammont ekwivalenti għal dak mogħti fl-applikazzjoni għal-liċenzja tal-importazzjoni;

(c)	fil-każ ta’ zokkor għar-raffinar, dikjarazzjoni mill-operatur approvat skont l-Artikolu 17 tar-Regolament (KE) Nru 318/2006 li l-kwantità se tiġi rraffinata qabel tmiem il-perjodu ta’ tliet xhur wara t-tmiem tal-perjodu tal-validità tal-liċenzja tal-importazzjoni;

(d)

garanzija mill-operatur approvat biex ikun żgurat li l-prezz tax-xiri mħallas huwa mill-inqas ekwivalenti għall-prezz garantit imsemmi fl-Artikolu 30(1) tar-Regolament (KE) Nru 318/2006, kif ukoll kopja ta’ dokument vinkolanti relatat mat-tranżazzjoni u ffirmat kemm mix-xerrej kif ukoll mill-fornitur.

Kopja, attestata mill-awtoritajiet kompetenti fil-pajjiż benefiċjarju li jesporta, tal-Formola A taċ-ċertfikat tal-oriġini prevista fl-Artikolu 9(1) tista’ tinħareġ minflok il-liċenzja tal-esportazzjoni msemmija f’(b).

8.   L-applikazzjonijiet għal-liċenzji tal-importazzjoni, kif ukoll il-liċenzji maħruġa, għandhom jinkludu d-dettalji li ġejjin:

(a)	fil-Kaxxa 8: il-pajjiż jew il-pajjiżi tal-oriġini (il-pajjiż jew il-pajjiżi inklużi fl-arranġament speċjali għall-pajjiżi l-inqas żviluppati, skont il-kolonna D tal-Anness I għar-Regolament (KE) Nru 980/2005),

(b)	fil-Kaxxi 17 u 18: il-kwantità taz-zokkor, imfissra bħala “ekwivalenti ta’ zokkor abjad”,

(c)

fil-Kaxxa 20: — fil-każ tal-importazzjonijiet imsemmija fl-Artikolu 3(1): “Zokkor tal-kannamieli mhux raffinat għar-raffinar, importat skont l-Artikolu 12(5) tar-Regolament (KE) Nru 980/2005. Nru tal-ordni …” (in-numru tal-ordni indikat fl-Artikolu 3(1) għas-sena tas-suq ikkonċernata) (jew minn tal-inqas waħda mill-frażijiet ekwivalenti f’lingwa uffiċjali oħra tal-Komunità). — Fil-każ tal-importazzjonijiet imsemmija fl-Artikolu 3(2): “Zokkor importat skont l-Artikolu 12(4) tar-Regolament (KE) Nru 980/2005. Nru ta’ referenza …” (in-numru ta’ referenza indikat fl-Artikolu 3(2) għall-perjodu tal-importazzjoni kkonċernat) (jew minn tal-inqas waħda mill-frażijiet ekwivalenti f’lingwa uffiċjali oħra tal-Komunità).

Artikolu 6

1.   L-Istati Membri għandhom iżommu kont tal-applikazzjonijiet għal-liċenzji tal-importazzjoni sottomessi għaz-zokkor għar-raffinar.

2.   Meta Stat Membru għal sena tas-suq partikolari jkun irċieva applikazzjonijiet għal-liċenzji tal-importazzjoni għaz-zokkor għar-raffinar li jkunu ekwivalenti għal jew li jeċċedu l-limitu msemmi fl-Artikolu 29(3) tar-Regolament (KE) Nru 318/2006, l-Istat Membru għandu jinnotifika lill-Kummissjoni li l-livell tal-bżonn ta’ provvista tradizzjonali tiegħu ntlaħaq. Fejn jixraq, l-Istat Membru għandu jispeċifika l-koeffiċjent ta’ allokazzjoni, fi proporzjon għall-bilanċ li jifdal li jrid jingħata għal kull applikazzjoni għal liċenzja tal-importazzjoni għaz-zokkor għar-raffinar.

3.   Fejn l-applikazzjonijiet għal-liċenzji tal-importazzjoni għaz-zokkor għar-raffinar għal sena tas-suq partikolari jkunu ekwivalenti għall-kwantità totali msemmija fl-Artikolu 29(3) tar-Regolament (KE) Nru 318/2006, il-Kummissjoni għandha tinnotifika lill-Istati Membri li l-limitu għall-bżonn ta’ provvista tradizzjonali f’livell ta’ Komunità ntlaħaq.

Mid-data tan-notifika msemmija fl-ewwel subparagrafu u sat-tmiem tas-sena tas-suq imsemmija, ir-restrizzjoni prevista fl-Artikolu 5(2) ma tapplikax aktar.

Artikolu 7

1.   L-Istati Membri għandhom jinnotifikaw lill-Kummissjoni, sa mhux aktar tard mill-ewwel ġurnata tax-xogħol tal-ġimgħa ta’ wara, dwar il-kwantitajiet ta’ zokkor mhux raffinat jew abjad (fejn meħtieġ, imfisser bħala “ekwivalenti ta’ zokkor abjad”), li għal dan l-applikazzjonijiet għal-liċenzji tal-importazzjoni jkunu ġew sottomessi matul il-ġimgħa preċedenti wara li jkun ġie applikat il-koeffiċjent ta’ allokazzjoni previst fl-Artikolu 6(2). L-Istati Membri għandhom jispeċifikaw is-sena tas-suq ikkonċernata, il-kwantitatjiet skont il-pajjiż tal-orġini u skont il-kodiċi NM bi tmien figuri, u jekk iz-zokkor huwiex għar-raffinar jew għal finijiet oħra għajr ir-raffinar. Jekk ma tkun ġiet sottomessa l-ebda applikazzjoni għal-liċenzja tal-importazzjoni, l-Istati Membri għandhom xorta waħda jinnotifikaw lill-Kummissjoni.

2.   Il-Kummissjoni għandha tikkalkula t-total ta’ kull ġimgħa tal-kwantitajiet li għalihom kienu sottomessi l-applikazzjonijiet għal-liċenzji tal-importazzjoni.

3.   Fil-każ tal-kwoti tariffarji globali msemmija fl-Artikolu 3(1), fejn l-applikazzjonijiet għal-liċenzji tal-importazzjoni jeċċeddu l-kwantità tal-kwota għas-sena tas-suq kurrenti, il-Kummissjoni għandha tistabbilixxi koeffiċjent ta’ allokazzjoni fi proporzjon għall-bilanċ li jifdal għall-Istati Membri biex japplikawh għal kull applikazzjoni għal-liċenzja tal-importazzjoni, u għandha tinnotifika lill-Istati Membri li l-kwantità massima tal-kwota kkonċernata ntlaħqet u l-ebda applikazzjoni oħra għal liċenzja tal-importazzjoni mhi permessa.

4.   Fejn it-total ta’ kull ġimgħa msemmi fil-paragrafu 2 jiżvela l-eżistenza ta’ kwantitajiet disponibbli ta’ zokkor li għalihom l-kwantità massima tkun intlaħqet qabel, il-Kummissjoni għandha tinforma lill-Istati Membri li l-kwantità massima m’għadhiex aktar milħuqa.

Artikolu 8

1.   Il-liċenzji tal-importazzjoni għandhom jinħarġu fit-tielet ġurnata tax-xogħol wara dik tan-notifika msemmija fl-Artikolu 7(1). Il-kwantitajiet maħruġa għandhom iqisu l-limitazzjoni imposta mill-Kummissjoni skont l-Artikolu 7(3).

2.   Għall-importazzjonijiet imsemmija fl-Artikolu 3(1), il-liċenzji tal-importazzjoni għandhom ikunu validi sat-tmiem tas-sena tas-suq li magħha dawn huma relatati.

Għall-importazzjonijiet imsemmija fl-Artikolu 3(2), il-liċenzji tal-importazzjoni għandhom ikunu validi sat-tmiem tal-perjodu tal-importazzjoni li miegħu dawn huma relatati.

3.   L-Istati Membri għandhom jinnotifikaw lill-Kummissjoni dwar il-kwantitajiet ta’ zokkor li għalihom inħarġu l-liċenzji tal-importazzjoni matul il-ġimgħa ta’ qabel, u għandhom jispeċifikaw il-pajjiż tal-oriġini u jekk iz-zokkor huwiex għar-raffinar jew għal finijiet oħra għajr ir-raffinar.

4.   Meta liċenzja tal-importazzjoni tkun ittrasferita skont l-Artikolu 9 tar-Regolament (KE) Nru 1291/2000, id-dententur titulari għandu jinforma immedjatament lill-awtoritajiet kompetenti fl-Istat Membru li jkun ħareġ iċ-ċertifikat oriġinali.

5.   B’deroga mill-Artikolu 35(2) tar-Regolament (KE) Nru 1291/2000, jekk il-liċenzja tal-importazzjoni għaz-zokkor għal finijiet għajr ir-raffinar tiġi ritornata lill-awtorità li toħroġha:

(a)	fl-ewwel 60 ġurnata tal-validità tagħha, il-garanzija mitlufa titnaqqas bi 80 %;

(b)	bejn il-61 jum tal-validità tagħha u l-15-il jum wara t-tmiem tal-validità tagħha skont il-paragrafu 2, il-garanzija mitlufa għandha titnaqqas b’50 %.

6.   L-Istati Membri għandhom jinnotifikaw simultanjament lill-Kummissjoni dwar il-kwantitajiet li għalihom il-liċenzji tal-importazzjoni kienu ritornati mid-data tan-notifikazzjoni preċedenti tagħhom għal dan l-effett. Il-kwantitajiet stabbiliti fil-liċenzji ritornati skont il-paragrafu 5 jistgħu jiġu allokati mill-ġdid.

Artikolu 9

1.   Il-prova tal-istatus tal-oriġini tal-importazzjonijiet imsemmija fl-Artikolu 3(1) u (2) għandha tingħata permezz tal-Formola A taċ-ċertifikat tal-oriġini skont l-Artikoli 67 sa 97 tar-Regolament (KEE) Nru 2454/93.

2.   Fl-importazzjoni u flimkien mal-prova tal-oriġini msemmija fil-paragrafu 1, għandu jiġi ppreżentat dokument supplementari lill-awtoritajiet doganali, li jkollu:

(a)	in-numru tas-serje tal-Formola A taċ-ċertifikat tal-oriġini msemmija fil-paragrafu 1, u l-pajjiż benefiċjarju li fih dan iħareġ;

(b)

kif jixraq:   Il-frażi “Nru tal-ordni … — Regolament (KE) Nru 1100/2006” (jiġifieri, in-numru tal-ordni indikat fl-Artikolu 3(1) għas-sena tas-suq ikkonċernata), jew   il-frażi “Nru ta’ referenza … — Regolament (KE) Nru 1100/2006” (jiġifieri, in-numru ta’ referenza indikat fl-Artikolu 3(2) għall-perjodu tal-importazzjoni kkonċernat) (jew minn tal-inqas waħda mill-frażijiet ekwivalenti f’lingwa uffiċjali oħra tal-Komunità);

(c)	id-data tat-tagħbija taz-zokkor fil-pajjiż benefiċjarju li jesporta, u s-sena tas-suq li fiha ssir il-kunsinna;

(d)	il-kodiċi NM bi tmien figuri taz-zokkor.

3.   Il-parti interessata għandha tipprovdi lill-awtorità kompetenti fl-Istat Membru tar-rilaxx għaċ-ċirkolazzjoni libera, u għal finijiet ta’ kontroll ta’ mill-inqas il-kwantitajiet, kopja tad-dokument supplementari msemmi fil-paragrafu 2 li jkollu fih l-informazzjoni dwar l-operazzjoni tal-importazzjoni, partikolarment il-grad tal-polarizzazzjoni indikat, u l-kwantitajiet “tel quel” skont il-piż li kienu attwalment impurtati.

4.   Fejn il-liċenzji tal-importazzjoni jiġu ttrasferiti skont l-Artikolu 8(4), l-Istati Membri għandhom jiġbru l-Formoli A taċ-ċertifikati tal-oriġini mimlija u jibagħtu kopja taċ-ċertifikati lill-Istat Membru li jkun ħareġ inizjalment il-liċenzja tal-importazzjoni.

Artikolu 10

1.   Kull Stat Membru għandu jżomm kont tal-kwantitajiet importati ta’ zokkor mhux raffinat u zokkor abjad flimkien maċ-ċertifikati tal-oriġini msemmija fl-Artikoli 9(1), u fejn ikun meħtieġ dan għandu jikkonverti l-kwantitajiet ta’ zokkor mhux raffinat f'“ekwivalenti ta’ zokkor abjad” fuq il-bażi tal-polarizzazzjoni ddikjarata, billi japplika l-metodi stabbiliti fil-Punt III tal-Anness I għar-Regolament (KE) Nru 318/2006.

2.   Skont l-Artikolu 50(1) tar-Regolament (KE) Nru 1291/2000, id-dazji tat-Tariffa Doganali Komuni, imnaqqsa skont l-Artikolu 12(4) tar-Regolament (KE) Nru 980/2005 u li japplikaw fid-data tar-rilaxx għaċ-ċirkolazzjoni libera, għandhom japplikaw għall-kwantitajiet kollha ta’ zokkor abjad “tel quel”, skont il-piż, jew ta’ zokkor mhux raffinat konvertit f'“ekwivalenti ta’ zokkor abjad”, li kien impurtat f’ammonti ikbar minn dawk murija fil-liċenzja tal-importazzjoni msemmija fl-Artikolu 5.

3.   L-intrapriża li applikat għal-liċenzja tal-importazzjoni għar-raffinar għandha, fi żmien tliet xhur wara t-tmiem tal-limitu ta’ żmien stabbilit għar-raffinar skont l-Artikolu 5(7)(c), tippreżenta prova aċċettabbli tar-raffinar lill-Istat Membru li ħareġ il-liċenzja.

4.   Ħlief f’każ ta’ forza maġġuri, jekk iz-zokkor ma jkunx raffinat fil-limitu taż-żmien stabbilit, l-intrapriża li applikat għal-liċenzja jkollha tħallas ammont ta’ EUR 500 għal kull tunnellata għall-kwantitajiet ikkonċernati.

Artikolu 11

L-Istati Membri msemmija fl-Artikolu 29 tar-Regolament (KE) Nru 318/2006 għandhom jikkomunikaw lill-Kummissjoni:

(a)	qabel it-tmiem ta’ kull xahar, il-kwantitajiet ta’ zokkor espressi skont il-piż “tel quel” u bħala “ekwivalenti ta’ zokkor abjad”, li ġew importati attwalment fit-tielet xahar ta’ qabel;

(b)

qabel l-1 ta’ Marzu, għas-sena tas-suq ta’ qabel: (i) il-kwantità totali li kienet importata attwalment għal dik is-sena tas-suq: — fil-forma ta’ zokkor għar-raffinar, imfisser skont il-piż “tel quel” u bħala “ekwivalenti ta’ zokkor abjad”, — fil-forma ta’ zokkor għajr għar-raffinar, imfisser skont il-piż “tel quel” u bħala “ekwivalenti ta’ zokkor abjad” (ii) il-kwantità ta’ zokkor, imfissra skont il-piż “tel quel” u bħala “ekwivalenti ta’ zokkor abjad”, li ġiet raffinata attwalment.

Artikolu 12

1.   In-notifiki msemmija fl-Artikolu 7(1), l-Artikolu 8(6) u l-Artikolu 11 għandhom isiru b’mezzi elettroniċi skont il-format previst mill-Kummissjoni lill-Istati Membri.

2.   Fuq talba mill-Kummissjoni, l-Istati Membri għandhom jipprovdu dettalji dwar il-kwanitajiet ta’ zokkor rilaxxat għaċ-ċirkolazzjoni libera taħt l-arranġamenti ta’ tariffa preferenzjali matul kwalunkwe xhar partikolari, skont l-Artikolu 308(d) tar-Regolament (KEE) Nru 2454/93.

Artikolu 13

Dan ir-Regolament jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Lulju 2006.

ANNESS

Mudell tal-liċenzja tal-esportazzjoni msemmija fl-Artikolu 5(7)(b)