(1)

Permezz tar-Regolament (KE) Nru 74/2004, il-Kunsill impona dazju protettiv definittiv fuq l-importazzjonijiet fil-Komunità ta' bjankerija tas-sodda tal-qoton li taqa' taħt il-kodiċi NM ex 6302 21 00 (kodiċi TARIC 6302210081, 6302210089), ex 6302 22 90 (kodiċi TARIC 6302229019), ex 6302 31 00 (kodiċi TARIC 6302310090) u ex 6302 32 90 (kodiċi TARIC 6302329019), li toriġina mill-Indja. Minħabba n-numru kbir ta' partijiet li qegħdin jikkooperaw, intagħżel kampjun tal-produtturi esportaturi Indjani u ġew imposti rati ta' dazju individwali li jvarjaw minn 4,4 % sa 10,4 % fuq il-kumpanniji inklużi fil-kampjun, filwaqt li kumpanniji oħrajn li qegħdin jikkooperaw li m'humiex inklużi fil-kampjun ġew attribwiti rata ta' dazju ta' 7,6 %. Ġiet imposta rata ta' dazju ta' 10,4 % fuq il-kumpanniji li jew ma għamlux lilhom infushom magħrufin jew li ma kkooperawx fl-investigazzjoni.

(2)

L-Artikolu 2 tar-Regolament (KE) Nru 74/2004 jistipula li fejn kwalunkwe produttur esportatur ġdid fl-Indja jipprovdi biżżejjed evidenza lill-Kummissjoni li huwa ma esportax lejn il-Komunità l-prodotti deskritti fl-Artikolu 1(1) ta' dak ir-Regolament matul il-perijodu ta' investigazzjoni (mill-1 ta' Ottubru 2001 sat-30 ta' Settemrbu 2002) (l-“ewwel kriterju”), li m'huwiex relatat ma' xi esportatur jew produttur fl-Indja li huwa soġġett għall-miżuri kontra s-sussidji imposti b'dak ir-Regolament (it-“tieni kriterju”) u li huwa fil-fatt esporta lejn il-Komunità dawk il-prodotti kkonċernati wara l-perijodu ta' investigazzjoni li fuqu huma bbażati l-miżuri, jew daħal f'obbligu kuntrattwali irrevokabbli li jesporta kwantità sinifikanti lejn il-Komunità (it-“tielet kriterju”), allura l-Artikolu 1(3) ta' dak ir-Regolament jista' jiġi emendat billi l-produttur esportatur ġdid jingħata rata ta' dazju applikabbli għall-kumpanniji li qegħdin jikkooperaw li m'humiex inklużi fil-kampjun, jiġifieri 7,6 %.

(3)

Ir-Regolament (KE) Nru 2143/2004 (3) żied ħmistax-il kumpannija mal-lista ta' esportaturi/importaturi Indjani elenkati fl-Anness għar-Regolament (KE) Nru 74/2004.

(4)

Tlettax-il kumpannija Indjana applikaw sabiex jingħataw l-istess status (“status ta' applikant ġdid”) bħal dak tal-kumpanniji li jikkooperaw fl-investigazzjoni oriġinali mhux inklużi fil-kampjun.

(5)

Erbgħa mill-kumpaniji Indjani li talbu status ta' applikant ġdid ma weġbux kwestjonarju u waħda ma pprovdietx informazzjoni supplimentari mitluba wara li kienet ippreżentat tweġiba mhux kompleta għall-kwestjonarju. Għaldaqstant, ma kienx possibbli li jiġi vverifikat jekk dawn il-kumpanniji sodisfawx il-kriterji stabbiliti fl-Artikolu 2 tar-Regolament (KE) Nru 74/2004, u t-talbiet tagħhom kellhom jiġu rrifjutati.

(6)

It-tmien kumpanniji l-oħra wieġbu l-kwestjonarju li kien maħsub sabiex jivverifika jekk huma kkonformawx mad-dispożizzjonijiet ta' l-Artikolu 2 tar-Regolament (KE) Nru 74/2004.

(7)

L-evidenza pprovduta minn ħamsa mill-esportaturi/produtturi Indjani msemmijin hawn fuq hija meqjusa biżżejjed biex tingħatalhom ir-rata ta' dazju applikabbli għall-kumpanniji li qegħdin jikkooperaw mhux inklużi fil-kampjun (jiġifieri 7,6 %) u konsegwentament sabiex dawn jiġu miżjudin fil-lista ta' esportaturi/produtturi fl-Anness (l-“Anness”) għar-Regolament (KE) Nru 74/2004.

(8)

Fir-rigward tat-tliet esportaturi/produtturi Indjani l-oħrajn, tnejn esportaw il-prodott konċernat lejn il-Komunità matul il-perijodu ta' investigazzjoni oriġinali (jiġifieri mill-1 ta' Ottubru 2001 sat-30 ta' Settembru 2002) u wieħed ma kienx kapaċi jipprovdi ebda evidenza li ma esportax lejn il-Komunità matul il-perijodu ta' investigazzjoni.

(9)

F'dawn iċ-ċirkostanzi, ġie meqjus li għat-tliet kumpanniji li saret referenza għalihom hawn fuq, għall-inqas wieħed mill-kriterji stabbiliti fl-Artikolu 2 tar-Regolament (KE) Nru 74/2004, jiġifieri, l-ewwel kriterju, ma ġiex sodisfatt. Għaldaqstant, il-pretensjonijiet tagħhom kellhom jiġu rifjutati.

(10)

Kumpanniji li għalihom ma ngħatax status ta' applikant ġdid ġew informati bir-raġunijiet ta' din id-deċiżjoni u ngħataw l-opportunità li jwasslu l-opinjonijiet tagħhom bil-miktub.

(11)

L-argumenti u s-sottomissjonijiet kollha magħmulin mill-partijiet interessati ġew analizzati u meqjusin kif dovut fejn dan kien meħtieġ,