Adeżjoni tal-Unjoni Ewropea fil-Konvenzjoni ta’ Istanbul
SOMMARJU TA’:
Il-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika Istanbul, 11.V.2011,
Id-Deċiżjoni (UE) 2017/865 dwar l-iffirmar tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika fir-rigward ta’ materji relatati mal-kooperazzjoni ġudizzjarja f’materji kriminali
Id-Deċiżjoni (UE) 2017/866 dwar l-iffirmar tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika fir-rigward ta’ ażil u non-refoulement
Id-Deċiżjoni (UE) 2023/1075 dwar il-konklużjoni tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika fir-rigward tal-istituzzjonijietl u l-amministrazzjoni pubblika tal-Unjoni
Id-Deċiżjoni (UE) 2023/1076 dwar il-konklużjoni tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika fir-rigward ta’ materji relatati mal-kooperazzjoni ġudizzjarja f’materji kriminali, ażil u non-refoulement
X’INHU L-GĦAN TAL-KONVENZJONI U TAD-DEĊIŻJONI?
- Il-Konvenzjoni ta’ Istanbul għandha l-għan li toħloq qafas legali biex tipproteġi n-nisa kontra kull forma ta’ vjolenza, u tindirizza:
- miżuri legali li jikkriminalizzaw forom differenti ta’ vjolenza fuq in-nisa;
- protezzjoni tal-vittma u servizzi ta’ appoġġ;
- vjolenza abbażi tal-ġeneru fil-migrazzjoni u l-ażil.
- Deċiżjonijiet (UE) 2017/865 u 2017/866 jawtorizzaw lill-Unjoni Ewropea (UE) biex tiffirma l-konvenzjoni.
- Deċiżjonijiet (UE) 2023/1075 u 2023/1076 jirratifikaw il-konvenzjoni f’isem l-UE. L-UE issa hija marbuta b’regoli ambizzjużi u komprensivi biex tipprevjeni u tiġġieled il-vjolenza fuq in-nisa u vjolenza domestika fir-rigward ta’ kooperazzjoni ġudizzjarja f’materji kriminali, ażil u non-refoulement, u fir-rigward tal-istituzzjonijiet u amministrazzjonijiet pubbliċi tagħha.
- Is-sitt Stati Membri tal-UE li għad ma rratifikawx il-konvenzjoni huma stess ser ikunu marbuta biss mill-acquis, li jimplimenta l-konvenzjoni. Kull materja oħra koperta mill-konvenzjoni tibqa’ fi ħdan il-kompetenza tal-Istati Membri. Biex tiżgura l-protezzjoni sħiħa tal-konvenzjoni għal nisa f’dawk is-sitt Stati Membri, dawn tal-aħħar iridu jirratifikaw il-konvenzjoni huma stess flimkien mal-UE.
PUNTI EWLENIN
Definizzjonijiet użati fil-konvenzjoni
- Vjolenza kontra n-nisa tfisser ksur tad-drittijiet tal-bniedem u forma ta’ diskriminazzjoni kontra n-nisa u tirreferi għal kull att ta’ vjolenza abbażi tal-ġeneru li jwassal jew x’aktarx iwassal għal dannu fiżiku, sesswali, psikoloġiku jew ekonomiku jew tbatija għan-nisa, inkluż theddid ta’ tali atti, kooerzzjoni jew priġunerija arbitrarja, sew jekk tkun fil-ħajja pubblika kif ukoll jekk il-ħajja privata.
- Vjolenza domestika tfisser kull att ta’ vjolenza fiżika, sesswali, psikoloġika jew ekonomika li sseħħ fi ħdan il-familja jew unità domestika jew bejn eks konjugi jew eks sieħba jew bejn konjugi jew sieħba kurrenti sew jekk l-awtur jaqsam jew ikun qasam jew le l-istess residenza mal-vittma.
- Ġeneru tfisser rwoli, imġiba, attivitajiet u attributi mibnija b’mod soċjali li soċjetà speċifikata tqis xierqa għan-nisa u għall-irġiel.
- Vjolenza abbażi tal-ġeneru kontra n-nisa hi vjolenza diretta kontra mara għax hi mara jew li taffettwa n-nisa b’mod sproporzjonat.
Objettivi
Il-konvenzjoni għandha l-għan li:
- tipproteġi lin-nisa kontra kull forma ta’ vjolenza, u timpedixxi, tipproċedi u telimina l-vjolenza kontra n-nisa u l-vjolenza domestika.
- tgħin biex telimina d-diskriminazzjoni kontra n-nisa u tippromwovi l-ugwaljanza bejn in-nisa u l-irġiel, inkluż billi tagħti l-ħiliet lin-nisa;
- tfassal qafas, politiki u miżuri komprensivi biex tipproteġi u tassisti lill-vittmi;
- tippromwovi l-kooperazzjoni internazzjonali fuq din il-kwistjoni;
- tipprovdi appoġġ għal organizzazzjonijiet u aġenziji tal-infurzar tal-liġi biex jikkooperaw flimkien biex jeliminaw il-vjolenza kontra n-nisa u l-vjolenza domestika;
- twaqqaf mekkaniżmu ta’ monitoraġġ li jiżgura li l-miżuri huma implimentati b’mod effettiv.
Drittijiet fundamentali, ugwaljanza u nondiskriminazzjoni
Firmatarji jridu jieħdu azzjoni leġiżlattiva biex jippromwovu u jipproteġu d-dritt ta’ kulħadd, speċjalment tan-nisa, biex jgħixu b’mod liberu minn vjolenza fil-pubbliku u fil-privat, inkluż billi:
- jikkundannaw u jipprojbixxu kull forma ta’ diskriminazzjoni kontra n-nisa;
- jinkorporaw il-prinċipju tal-ugwaljanza bejn in-nisa u l-irġiel fil-kostituzzjonijiet nazzjonali tagħhom;
- jabolixxu liġijiet u prattiċi li jiddiskriminaw kontra n-nisa.
Prevenzjoni
Il-prevenzjoni tinvolvi l-qerda tal-preġudizzji, drawwiet, tradizzjonijiet u prattiċi oħra bbażati fuq l-idea ta’ inferjorità tan-nisa jew sterjotipi ta’ rwoli għal nisa u irġiel, inkluż permezz ta’
- l-edukazzjoni,
- taħriġ għal għarfien,
- taħriġ professjonali,
- intervenzjoni preventiva u programmi ta’ trattament,
- is-settur privat u l-parteċipazzjoni tal-media.
Protezzjoni u appoġġ
Il-partijiet għall-konvenzjoni jridu jipproteġu lill-vittmi minn atti addizzjonali ta’ vjolenza billi jwettqu l-obbligi ta’ rapportar u jipprovdu lill-vittmi b’:
- informazzjoni rilevanti,
- servizzi ġenerali u ta’ appoġġ speċjalizzat,
- assistenza meta jkun hemm ilmenti individwali u kollettivi,
- refuġji,
- linji għall-għajnuna,
- appoġġ għall-vittmi ta’ vjolenza sesswali,
- protezzjoni u appoġġ għal tfal li jagħtu x-xhieda.
Rimedji legali
Firmatarji jridu jipprovdu lill-vittmi b’rimedji kontra l-atturi, u kontra awtoritajiet tal-istat li jonqsu fid-dover tagħhom li jipprevjenu u jipproteġu (jekk ikun fl-ambitu tagħhom), inkluż billi jindirizzaw dawn li ġejjin:
- proċedimenti u rimedji ċivili,
- kumpens,
- kustodja tal-minuri, drittijiet għall-aċċess, u sikurezza,
- konsegwenzi ċivili ta’ żwieġijiet sfurzati,
- vjolenza psikoloġika jew fiżika,
- segwiment ta’ persuni bil-moħbi,
- vjolenza sesswali, inkluż stupru,
- mutilazzjoni sesswali feminili,
- abort furzat u sterilizzazzjoni furzata,
- fastidju sesswali,
- reati tal-“unur”,
- sanzjonijiet.
Miżuri protettivi dwar l-investigazzjoni, prosekuzzjoni, liġi proċedurali
Kwistjonijiet indirizzati jinkludu:
- rispons immedjat, prevenzjoni u protezzjoni,
- analiżi u ġestjoni tar-riskju,
- għeluq tal-emerġenza, ordnijiet ta’ trażżin u ta’ protezzjoni,
- għajnuna legali,
- l-estenzjoni tal-istatut ta’ limitazzjonijiet.
Migrazzjoni u ażil
Kwistjonijiet indirizzati jinkludu:
- status ta’ residenza,
- talbiet ta’ ażil ibbażati fuq il-ġeneru,
- non-refoulement.
DATA TAD-DĦUL FIS-SEĦĦ
Il-konvenzjoni kienet iffirmajta f’isem l-UE fit-13 ta’ Ġunju 2017, u l-proċedura kienet kompluta bid-depożitu ta’ żewġ strumenti ta’ approvazzjoni flt-28 ta’ Ġunju 2023 li wassal għad-dħul fis-seħħ tal-konvenzjoni għall-UE fl-1 ta Ottubru 2023
SFOND
Għal aktar informazzjoni, ara:
DOKUMENTI PRINĊIPALI
Il-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika Istanbul, 11.V.2011 (ĠU L 143I, 2.6.2023, pp. 7–32)
Id-Deċiżjoni tal-Kunsill (UE) 2017/865 tal-11 ta’ Mejju 2017 dwar l-iffirmar, f’isem l-Unjoni Ewropea, tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika fir-rigward ta’ materji relatati mal-kooperazzjoni ġudizzjarja f’materji kriminali (ĠU L 131, 20.5.2017, pp. 11–12)
Id-Deċiżjoni tal-Kunsill (UE) 2017/866 tal-11 ta’ Mejju 2017 dwar l-iffirmar, f’isem l-Unjoni Ewropea, tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika fir-rigward tal-asil u n-non-refoulement (ĠU L 131, 20.5.2017, pp. 13–14)
Id-Deċiżjoni tal-Kunsill (UE) 2023/1075 tal-1 ta’ Ġunju 2023 dwar il-konklużjoni, f’isem l-Unjoni Ewropea, tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika fir-rigward tal-istituzzjonijiet u l-amministrazzjoni pubblika tal-Unjoni (ĠU L 143I, 2.6.2023, pp. 1–3)
Id-Deċiżjoni tal-Kunsill (UE) 2023/1076 tal-1 ta’ Ġunju 2023 dwar il-konklużjoni, f’isem l-Unjoni Ewropea, tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika fir-rigward ta’ materji relatati mal-kooperazzjoni ġudizzjarja f’materji kriminali, l-ażil u n-non-refoulement (ĠU L 143I, 2.6.2023, pp. 4–6)
DOKUMENTI RELATATI
Ir-Regolament (UE) 2021/692 tal-Parlament Ewropew u tal-Kunsill tat-28 ta’ April 2021 li jistabbilixxi l-Programm dwar iċ-Ċittadini, l-Ugwaljanza, id-Drittijiet u l-Valuri u li jħassar ir-Regolament tal-Kunsill (UE) Nru 1381/2013 tal-Parlament Ewropew u tal-Kunsill u r-Regolament tal-Kunsill (UE) Nru 390/2014 (ĠU L 156, 5.5.2021, pp. 1–20)
Il-Komunikazzjoni tal-Kummissjoni lill-Parliament Ewropew, lill-Kunsill, lill-Kumitat Ekonomiku u Soċjali Ewropew u l-Kumitat tar-Reġjuni — Unjoni ta’ Ugwaljanza: Strateġija tal-Ugwaljanza bejn il-Ġeneri 2020-2025 (COM(2020) 152 final, 5.3.2020).
l-aħħar aġġornament 12.10.2023