Fond Soċjali għall-Klima

 

SOMMARJU TA’:

Ir-Regolament (UE) 2023/955 li jistabbilixxi Fond Soċjali għall-Klima u li jemenda r-Regolament (UE) 2021/1060

X’INHU L-GĦAN TAR-REGOLAMENT?

Bħala parti mill-pakkett lest għall-mira ta’ 55 %, huwa jistabbilixxi l-Fond Soċjali għall-Klima mfassal biex jintuża mill-Istati Membri tal-Unjoni Ewropea (UE) biex:

• jappoġġjaw miżuri u investimenti biex inaqqsu l-emissjonijiet fis-setturi tat-trasport bit-triq u l-bini, inaqqsu l-ispejjeż għall-unitajiet domestiċi vulnerabbli, il-mikrointrapriżi u l-utenti tat-trasport b’mod partikolari affettwati mill-inklużjoni ta’ emissjonijiet ta’ gassijiet serra minn bini u trasport bit-triq fil-kamp ta’ applikazzjoni tad-Direttiva 2003/87/KE (ara s-sommarju);
• jiffinanzjaw appoġġ temporanju għad-dħul dirett għall-unitajiet domestiċi vulnerabbli u għall-utenti tat-trasport.

PUNTI EWLENIN

Unitajiet domestiċi vulnerabbli, mikrointrapriżi u utenti tat-trasport

Id-Direttiva 2003/87/KE tistabbilixxi sistema ta’ skambji ta’ kwoti ta’ emissjonijiet ta’ gassijiet serra biex tippromwovi tnaqqis fl-emissjonijiet, inkluż mill-bini u t-trasport bit-triq. Tliet gruppi fil-mira tal-Fond Soċjali għall-Klima huma identifikati bir-Regolament (UE) 2023/955 bħala li huma affettwati b’mod sinifikanti mill-impatt tal-ispiża tal-iskambju l-ġdid tal-emissjonijiet għall-bini u t-trasport bit-triq:

• unitajiet domestiċi vulnerabbli huma definiti bħala dawk li jesperjenzaw il-faqar fl-enerġija, inklużi dawk bi dħul baxx u dħul medju baxx, u li ma għandhomx il-mezzi biex jirrinovaw il-bini fejn jgħixu;
• mikrointrapriżi vulnerabbli huma dawk li ma għandhomx il-mezzi biex jirrinovaw il-bini fejn jgħixu, jixtru vetturi b’emissjonijiet żero jew baxxi jew jaqilbu għal modi sostenibbli alternattivi tat-trasport, inkluż it-trasport pubbliku;
• utenti vulnerabbli tat-trasport huma definiti bħala individwi u unitajiet domestiċi li jesperjenzaw faqar tat-trasport, inklużi dawk bi dħul baxx u dħul medju baxx, u li ma għandhomx il-mezzi biex jixtru vetturi b’emissjonijiet żero jew baxxi jew biex jibdlu għal modi alternattivi sostenibbli tat-trasport, inkluż it-trasport pubbliku.

Pjanijiet soċjali għall-klima

Kull Stat Membru għandu jissottometti pjan soċjali għall-klima lill-Kummissjoni Ewropea wara li jikkonsulta mal-awtoritajiet lokali u reġjonali, l-imsieħba ekonomiċi u soċjali u s-soċjetà ċivili. Il-pjanijiet għandhom ikopru miżuri u investimenti biex jindirizzaw l-impatt tal-ipprezzar tal-karbonju għas-setturi tal-bini u tat-trasport bit-triq fuq unitajiet domestiċi vulnerabbli, mikrointrapriżi u utenti tat-trasport sabiex jiżguraw tisħin, tkessiħ u mobbiltà affordabbli.

Miżuri u investimenti eliġibbli

Il-pjanijiet jistgħu jinkludu l-appoġġ għall-miżuri u l-investimenti li ġejjin biex jitfasslu għal impatt dejjiemi:

• ir-rinnovazzjoni tal-bini, b’mod partikolari għal unitajiet domestiċi vulnerabbli u għall-mikrointrapriżi li jokkupaw il-bini bl-agħar prestazzjoni, inkluż għal kerrejja u persuni li jgħixu f’akkomodazzjoni soċjali;
• l-aċċess għal akkomodazzjoni affordabbli effiċjenti fl-użu tal-enerġija, inkluż akkomodazzjoni soċjali;
• id-dekarbonizzazzjoni tal-bini, bħall-elettrifikazzjoni tat-tisħin, it-tkessiħ u t-tisjir, permezz ta’ aċċess għal sistemi affordabbli u effiċjenti fl-enerġija;
• l-integrazzjoni tal-ġenerazzjoni u l-ħżin tal-enerġija rinnovabbli, inkluż permezz ta’ komunitajiet tal-enerġija rinnovabbli, komunitajiet tal-enerġija taċ-ċittadini u klijenti attivi oħra biex jippromwovu l-awtokonsum tal-enerġija rinnovabbli;
• informazzjoni, edukazzjoni, għarfien u pariri mmirat dwar miżuri u investimenti kosteffettivi, appoġġ disponibbli għar-rinnovazzjonijiet tal-bini u l-effiċjenza fl-enerġija u alternattivi sostenibbli u affordabbli fil-mobilità u t-trasport;
• aċċess għal vetturi u roti b’emissjonijiet żero jew baxxi, inkluż appoġġ finanzjarju jew inċentivi fiskali;
• l-infrastruttura pubblika u privata, inkluż ix-xiri ta’ vetturi b’emissjonijiet żero jew baxxi, infrastruttura għar-rikarikar u r-riforniment tal-fjuwil u l-iżvilupp ta’ suq ta’ roti użati b’emissjonijiet żero;
• inċentivi biex jintuża trasport pubbliku affordabbli u aċċessibbli;
• entitajiet privati u pubbliċi li jiżviluppaw u jipprovdu mobilità sostenibbli fuq talba, servizzi kondiviżi tal-mobilità u għażliet attivi dwar il-mobbiltà.

L-Istati Membri jistgħu jinkludu fil-pjanijiet tagħhom appoġġ għal dħul dirett għall-utenti vulnerabbli tal-unitajiet domestiċi u tat-trasport biex inaqqsu l-impatt taż-żieda fil-prezzijiet tat-trasport bit-triq u tal-karburanti għat-tisħin. Tali appoġġ dirett għandu:

• jkun temporanju u jonqos maż-żmien;
• jirrappreżenta mhux aktar minn 37.5 % tal-ispejjeż totali stmati tal-pjan.

Finanzjament

Massimu ta’ EUR 65 biljun mill-1 ta’ Jannar 2026 sal-31 ta’ Diċembr 2032 huma allokati għall-fond. Barra minn hekk, l-Istati Membri għandhom jikkontribwixxu mill-inqas 25 % tal-ispejjeż totali stmati tal-pjanijiet tagħhom.

L-Istati Membri jistgħu jitolbu trasferimenti lill-fond mill-programmi tal-politika ta’ koeżjoni taħt ġestjoni kondiviża stabbilita bir-Regolament (UE) 2021/1060. L-Istati Membri jistgħu wkoll jittrasferixxu sa 15 % tal-allokazzjoni tagħhom mill-fond għall-programmi tal-politika ta’ koeżjoni.

Informazzjoni

Dawk li jirċievu appoġġ mill-fond għandhom jiġu infurmati dwar fejn joriġinaw il-fondi, inkluż meta dawn jibbenefikaw minn dawn il-fondi permezz ta’ intermedjarji. L-informazzjoni għandha tinkludi l-emblema tal-UE u l-kliem “iffinanzjat mill-Unjoni Ewropea — Fond Soċjali dwar il-Klima”.

Trasparenza

Il-Kummissjoni għandha tibgħat il-pjanijiet sottomessi mill-Istati Membri, u d-deċiżjonijiet, simultanjament u fuq termini ugwali lill-Parlament Ewropew u lill-Kunsill tal-Unjoni Ewropea mingħajr dewmien żejjed.

MINN META BEDA JAPPLIKA R-REGOLAMENT?

Dan japplika mit-30 ta’ Ġunju 2024.

SFOND

Ir-regolament jemenda l-Artikolu 26 (it-trasferiment tar-riżorsi) tar-Regolament (UE) 2021/1060 — regoli komuni dwar il-fondi tal-UE (2021–2027).

Għal aktar informazzjoni, ara:

• Lest għall-mira ta’ 55 % (Kunsill Ewropew — Kunsill tal-Unjoni Ewropea)
• Fond Soċjali għall-Klima (Kummissjoni Ewropea)
• Mistoqsijiet u tweġibiet — In-negozjar tal-emissjonijiet — It-tqegħid ta’ prezz fuq il-karbonju (Kummissjoni Ewropea).

DOKUMENT PRINĊIPALI

Ir-Regolament (UE) 2023/955 tal-Parlament Ewropew u tal-Kunsill tal-10 ta’ Mejju 2023 li jistabbilixxi Fond Soċjali għall-Klima u li jemenda r-Regolament (UE) 2021/1060 (ĠU L 130, 16.5.2023, pp. 1–51).

DOKUMENTI RELATATI

Id-Direttiva 2003/87/EC tal-Parlament Ewropew u tal-Kunsill tat-13 ta’ Ottubru 2003 li tistabbilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità u li temenda d-Direttiva 96/61/KE (ĠU L 275, 25.10.2003, pp. 32–46).

L-emendi suċċessivi għad-Direttiva 2003/87/KE ġew inkorporati fit-test oriġinali. Din il-verżjoni konsolidata għandha valur dokumentarju biss.

Id-Direttiva (UE) 2023/1791 tal-Parlament Ewropew u tal-Kunsill tat-13 ta’ Settembru 2023 dwar l-effiċjenza enerġetika u li temenda r-Regolament (UE) 2023/955 (riformulazzjoni) (ĠU L 231, 20.9.2023, pp. 1–111).

Ir-Regolament (UE) 2021/1056 tal-Parlament Ewropew u tal-Kunsill tal-24 ta’ Ġunju 2021 li jistabbilixxi l-Fond għal-Tranżizzjoni Ġusta (ĠU L 231, 30.6.2021, pp. 1–20).

Ara l-verżjoni konsolidata.

Ir-Regolament (UE) 2021/1060 tal-Parlament Ewropew u tal-Kunsill tal-24 ta’ Ġunju 2021 li jistipula dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew Plus, il-Fond ta’ Koeżjoni, il-Fond għal Tranżizzjoni Ġusta u l-Fond Ewropew għall-Affarijiet Marittimi, is-Sajd u l-Akkwakultura u r-regoli finanzjarji għalihom u għall-Fond għall-Ażil u l-Migrazzjoni, il-Fond għas-Sigurtà Interna u l-Istrument għall-Appoġġ Finanzjarju għall-Politika tal-Ġestjoni tal-Fruntieri u tal-Viżi (ĠU L 231, 30.6.2021, pp. 159–706).

Ara l-verżjoni konsolidata.

Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewoprew u lill-Kumitat tar-Reġjuni — Il-Pjan ta’ Azzjoni tal-Pilastru Ewropew tad-Drittijiet Soċjali (COM(2021) 102 final, 4.3.2021).

Ir-Regolament (UE) 2021/241 tal-Parliament Ewropew u tal-Kunsill tat-12 ta’ Frar 2021 li jistabbilixxi l-Faċilità għall-Irkupru u r-Reżiljenza (ĠU L 57, 18.2.2021, pp. 17–75).

Ara l-verżjoni konsolidata.

Ir-Regolament (UE, Euratom) 2020/2092 tal-Parlament Ewropew u tal-Kunsill tas-16 ta’ Diċembru 2020 dwar reġim ġenerali ta’ kondizzjonalità għall-protezzjoni tal-baġit tal-Unjoni (ĠU L 433 I, 22.12.2020, pp. 1–10).

Ara l-verżjoni konsolidata.

Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Il-Patt Ekoloġiku Ewropew (COM(2019) 640 final, 11.12.2019).

Ir-Regolament (UE) 2018/1999 tal-Parlament Ewropew u tal-Kunsill tal-11 ta’ Diċembru 2018 dwar il-Governanza tal-Unjoni tal-Enerġija u tal-Azzjoni Klimatika, li jemenda r-Regolamenti (KE) Nru 663/2009 u (KE) Nru 715/2009 tal-Parlament Ewropew u tal-Kunsill, id-Direttivi 94/22/KE, 98/70/KE, 2009/31/KE, 2009/73/KE, 2010/31/UE, 2012/27/UE u 2013/30/UE tal-Parlament Ewropew u tal-Kunsill, id-Direttivi tal-Kunsill 2002/119/KE u (UE) 2015/652 u li jħassar ir-Regolament (UE) Nru 525/2013 tal-Parlament Ewropew u tal-Kunsill (ĠU L 328, 21.12.2018, pp. 1–77).

Ara l-verżjoni konsolidata.

Id-Direttiva (UE) 2018/2001 tal-Parlament Ewropew u tal-Kunsill tal-11 ta’ Diċembru 2018 dwar il-promozzjoni tal-użu tal-enerġija minn sorsi rinnovabbli (riformulazzjoni) (ĠU L 328, 21.12.2018, pp. 82–209).

Ara l-verżjoni konsolidata.

Id-Deċiżjoni tal-Kunsill (UE) 2016/1841 tal-5 ta’ Ottubru 2016 dwar il-konklużjoni, f’isem l-Unjoni Ewropea, tal-Ftehim ta’ Pariġi adottat skont il-Konvenzjoni Qafas tan-Nazzjonijiet Uniti dwar it-Tibdil fil-Klima (ĠU L 282, 19.10.2016, pp. 1–3).

Il-Ftehim ta’ Pariġi (ĠU L 282, 19.10.2016, pp. 4-18).

Id-Direttiva 2010/31/UE tal-Parlament Ewropew u tal-Kunsill tad-19 ta’ Mejju 2010 dwar ir-rendiment tal-bini fl-użu tal-enerġija (riformulazzjoni) (ĠU L 153, 18.6.2010, pp. 13–35).

Ara l-verżjoni konsolidata.

l-aħħar aġġornament 11.12.2023