EUR-Lex Access to European Union law
This document is an excerpt from the EUR-Lex website
Document 52012DC0218
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS on the establishment of an Intergovernmental Agreement for the operations of the European Earth monitoring programme (GMES) from 2014 to 2020
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI dwar it-twaqqif ta' Ftehim Intergovernattiv għall-operazzjonijiet tal-programm Ewropew ta' monitoraġġ tad-Dinja (GMES) mill-2014 sal-2020
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI dwar it-twaqqif ta' Ftehim Intergovernattiv għall-operazzjonijiet tal-programm Ewropew ta' monitoraġġ tad-Dinja (GMES) mill-2014 sal-2020
/* COM/2012/0218 final */
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI dwar it-twaqqif ta' Ftehim Intergovernattiv għall-operazzjonijiet tal-programm Ewropew ta' monitoraġġ tad-Dinja (GMES) mill-2014 sal-2020 /* COM/2012/0218 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI
EWROPEW U LILL-KUMITAT TAR-REĠJUNI dwar it-twaqqif ta' Ftehim Intergovernattiv
għall-operazzjonijiet tal-programm Ewropew ta' monitoraġġ
tad-Dinja (GMES) mill-2014 sal-2020 (Test b'rilevanza għaż-ŻEE) 1. Introduzzjoni L-għan tal-programm GMES huwa li
jiżviluppa kapaċità Ewropea għall-osservazzjoni tad-Dinja ta'
kwalità għolja. Fi żmien meta l-imsieħba internazzjonali tal-UE
qegħdin jinvestu ħafna f'kapaċitajiet bħal dawn, rispons
ikkoordinat min-naħa tal-UE huwa ta' importanza strateġika.
Bħala tali, is-servizzi GMES se jġibu benefiċċji għal
firxa wiesgħa ta' politiki Ewropej. Il-programm jirrappreżenta wkoll
potenzjal sinifikanti għat-tkabbar ekonomiku u l-ħolqien
tal-impjiegi, b'konformità mal-istrateġija Ewropa 2020 għal
tkabbir intelliġenti, sostenibbli u inklużiv. Il-programm GMES tal-ġejjieni: il-qagħda attwali Fil-Komunikazzjoni tagħha bl-isem
"Baġit għall-Ewropa 2020"[1], il-Kummissjoni pproponiet li tiffinanzja
l-programm Ewropew ta' monitoraġġ tad-Dinja (GMES) lil hinn
mill-qafas finanzjarju multiannwali li jmiss (MFF) minħabba
r-restrizzjonijiet tal-baġit tal-UE biex jiffinanzja dan it-tip ta'
proġett fuq skala kbira. Madankollu, il-Kummissjoni hija impenjata sew li
tiżgura li l-GMES jirnexxi u, f’dan il-kuntest, f'Novembru 2011
adottat Komunikazzjoni[2]
li tipprovdi l-elementi ewlenija għad-definizzjoni ta' tmexxija xierqa u
finanzjament fuq medda ta’ żmien twil tal-programm GMES mill-2014 ’il
quddiem. B'mod partikolari, il-Kummissjoni pproponiet
li tistabbilixi fond speċifiku għall-GMES b'kontribuzzjonijiet
finanzjarji mis-27 Stat Membru kollha tal-UE abbażi tal-introjtu
nazzjonali gross (ING), u dan f'mudell simili għal dak tal-Fond Ewropew
għall-Iżvilupp. Dan jimplika t-twaqqif ta' ftehim intergovernattiv
bejn l-Istati Membri tal-UE li jiltaqgħu fi ħdan il-Kunsill.
L-immaniġġjar tal-fond għandu jiġi ddelegat
lill-Kummissjoni. Fis-16 ta' Frar 2012,
il-Parlament Ewropew adotta riżoluzzjoni dwar il-ġejjieni tal-GMES,
filwaqt li ddijkara preferenza għall-finanzjament tal-GMES skont l-MFF.
Il-Komunikazzjoni ġiet diskussa wkoll fil-Kunsill, b'mod partikolari dwar
jekk għandux ikun hemm finanzjament permezz ta' fond intergovernattiv,
imma ma ntlaħqet l-ebda konklużjoni. Ir-riskji
assoċjati mad-dewmien Mill-bidu
tiegħu fl-1998, il-programm GMES la qatt esperjenza żieda
fl-ispejjeż u lanqas dewmien sinifikanti. Madankollu, il-possibbiltà ta’
interruzzjoni fl-operazzjonijiet tkun ta' detriment għall-utenti, tpoġġi
fir-riskju l-investimenti li saru s'issa u l-kredibbiltà tal-programm. Barra
minn dan, twassal ukoll għal żieda fl-ispejjeż. Fil-fażi preoperattiva tagħhom,
is-servizzi GMES wasslu għal sinerġiji sinifikanti fl-investimenti
nazzjonali jew reġjonali. Mill-bidu tal-2012, hemm żewġ servizzi
GMES li jaħdmu: is-servizz GMES ta' monitoraġġ tal-Art u
s-servizz GMES għal Rispons ta' Emerġenza, li bħalissa
qegħdin jintużaw mill-komunitajiet tal-utenti rispettivi
tagħhom. Interruzzjoni fit-twassil ta' dawn is-servizzi toħloq lakuna
importanti ta' informazzjoni u jkollha impatt negattiv fuq l-attivitajiet
tal-utenti. Dan ikun veru wkoll għas-servizzi GMES l-oħra li
jitwasslu b'mod preoperattiv, bħalma huma s-servizzi GMES ta'
monitoraġġ tal-Ibħra u tal-Atmosfera li għadhom f'fażi
ta' żvilupp. F'dan ir-rigward, l-inċertezzi attwali fil-preparazzjoni
tal-fażi operattiva diġà qegħdin itellfu l-impenn tal-partijiet
interessati, kemm dawk mill-komunitajiet tal-protezzjoni ċivili, dawk
ambjentali jew xjentifiċi kif ukoll mill-kumpaniji privati, notevolment
l-SMEs tas-servizzi downstream. L-inċertezzi fil-fażi operattiva
jirriskjaw li jwasslu wkoll għal diffikultajiet fl-iskjerament
tal-komponent tal-ispazju, li l-ewwel tliet satelliti Sentinel se jkunu lesti
biex jiġu varati fih fl-2013. Il-Kunsill tal-Aġenzija Spazjali
Ewropea (ESA) ta' April 2012 kellu dubji dwar l-opportunità li jiġi
awtorizzat il-varar tagħhom mingħajr ma jkun hemm aktar ċarezza
dwar l-operazzjonijiet u l-arranġamenti istituzzjonali tagħhom
fil-ġejjieni. Dewmien fil-varar tagħhom iwassal għal
spejjeż sinifikanti żedja b'mod partikolari
għall-ħażna tas-satellita f'kundizzjonijiet adegwati. Barra minn
hekk, it-telf riċenti tal-ENVISAT[3],
li serviet ferm aktar mill-ħajja nominali tagħha, iwassal biex id-dejta
tas-Sentinel tkun aktar meħtieġa b'mod urġenti mill-utenti
Ewropej. Filwaqt li l-pożizzjoni tal-Kummissjoni
fir-rigward tal-finanzjament tal-GMES lil hinn mill-qafas finanzjarju
multiannwali ma nbidlitx, hi għadha impenjata li tappoġġa
lill-Istati Membri fit-twaqqif tal-ftehim intergovernattiv meħtieġ u
li tipprepara r-regolamenti meħtieġa għall-operazzjonijiet
tal-GMES b'mod f'waqtu, sabiex tevita li jkun hemm interruzzjonijiet
tal-programm. It-twaqqif ta' ftehim intergovernattiv,
flimkien ma' regolament li jimplimenta dak il-ftehim u regolament finanzjarju,
se jdum daqsxejn. Billi jridu jkunu fis-seħħ fl-1 ta' Jannar 2014,
il-Kummissjoni tħeġġeġ lill-Istati Membri biex jibdew
il-preparazzjoni tal-ftehim intergovernattiv mingħajr aktar dewmien. Sabiex jiffaċilita d-diskussjonijiet li
għadhom għaddejjin, l-anness ta' din il-Komunikazzjoni jinkludi
abbozz aktar iddettaljat tal-elementi ewlenin ta' ftehim intergovernattiv li
jista' jservi bħala bażi għan-negozjazzjoni. 2. Il-Fond għall-GMES Fil-Komunikazzjoni tagħha ta'
Novembru 20112, il-Kummissjoni kkonfermat li l-envelopp
finanzjarju massimu meħtieġ għall-attivitajiet GMES bejn l-2014
u l-2020 huwa ta' EUR 5 841 miljun fi prezzijiet kostanti. S'issa ġew esplorati tliet alternattivi
fost is-soluzzjonijiet possibbli għall-finanzjament tal-GMES, kollha kemm
huma lil hinn mill-qafas finanzjarju mill-2014 'il quddiem: fond speċifiku
għall-GMES (simili għall-mudell magħżul għall-Fond
Ewropew għall-Iżvilupp), għażla ta’ kooperazzjoni mtejba
(li tkun tinvolvi lill-Istati Membri li huma interessati sew fil-programm) u
fl-aħħar nett, l-għażla ta' parteċipazzjoni
mill-industrija li permezz tagħha r-responsabbiltajiet u l-fondi jinqasmu
mal-protagonisti ekonomiċi. Il-Kummissjoni diġà indikat li
fil-valutazzjoni tagħha hi mhix favur l-aħħar żewġ
alternattivi billi minn naħa l-kooperazzjoni mtejba tpoġġi
lid-dimensjoni tal-UE-27 tal-programm f'riskju u, min-naħa l-oħra,
l-esperjenza miksuba bil-proġett Galileo diġà wriet li huwa
diffiċli fuq medda qasira ta’ żmien li wieħed jattira u
jżomm lis-settur privat u dan ma jkunx konformi mad-dimensjoni
tal-programm li jkun għall-ġid pubbliku. Għal dawn ir-raġunijiet,
il-Kummissjoni pproponiet li twaqqaf fond speċifiku għall-GMES. Dan
il-fond għandu jkun ibbażat fuq il-kontribuzzjonijiet mis-27 Stat
Membru kollha. Għalkemm din hija deċiżjoni li fl-aħħar
mill-aħħar taqa' esklużivament fil-mandat tal-Istati Membri,
il-Kummissjoni tistieden lill-Istati Membri kollha biex jissieħbu fl-isforz,
sabiex jiżguraw u jikkonsolidaw id-dimensjoni Ewropea tal-programm GMES. Dan ikun jeħtieġ ftehim
intergovernattiv bejn l-Istati Membri kollha tal-UE li jiltaqgħu fi
ħdan il-Kunsill. L-elementi ewlenin ta' ftehim bħal dan huma
ddettaljati aktar fl-Anness ta' din il-Komunikazzjoni. Il-ftehim intergovernattiv jispeċifika
l-kontribuzzjonijiet finanzjarji mis-27 Stat Membru kollha tal-UE
abbażi tal-introjtu nazzjonali gross (ING) tagħhom li jkopri
l-perjodu mill-1 ta' Jannar 2014 sal-31 ta' Diċembru 2020.
Dan jistabbilixxi l-"Kunsill tal-GMES" bħala l-awtorità ewlenija
ta' kontroll tal-fond li primarjament għandha s-setgħa li tadotta
l-baġit ġenerali, li tapprova l-implimentazzjoni tal-baġit u
l-kontijiet tas-sena preċedenti, li tapprova l-konklużjoni ta' kull
ftehim mal-Istati Membri, pajjiżi terzi, organizzazzjonijiet
internazzjonali governattivi u dawk mhux governattivi, jew organizzazzjonijiet
nazzjonali tal-Istati Membri. Biex tiġi żgurata l-kontinwità
tal-programm, ċerti dispożizzjonijiet tal-fond għall-GMES
għandhom jiġu applikati fuq bażi provviżorja mill-1 ta’ Jannar 2014
sakemm isseħħ ir-ratifikazzjoni mis-27 Stat Membru. 3. L-Implimentazzjoni tal-Fond
għall-GMES Il-ftehim intergovernattiv huwa l-ewwel pass
fil-bini tal-programm GMES lil hinn mill-2013, li għandu jkompli jiġi
żviluppat, fir-rigward tal-modalitajiet ta' implimentazzjoni, f'regolament
li jimplimentah. Ir-regolament dwar l-operazzjonijiet tal-GMES
għandu jinkludi regoli biex jiżgura l-forniment bla interruzzjoni lil
dawk li jieħdu d-deċiżjonijiet fl-UE u fl-Istati Membri
tagħha ta' dejta preċiża u affidabbli u informazzjoni dwar
kwistjonijiet ambjentali, il-bidla fil-klima u kwistjonijiet ta' sigurtà. Hu
għandu jikkontribwixxi wkoll għall-istabbiltà u t-tkabbir ekonomiku
billi jqawwi l-applikazzjonijiet kummerċjali f'bosta setturi differenti
permezz ta' aċċess sħiħ u miftuħ
għall-informazzjoni tal-GMES u d-dejta tal-osservazzjoni. Regolament bħal dan għandu jistipula
r-regoli ta' amministrazzjoni, immaniġġjar, implimentazzjoni, kontabilità,
awditjar u rilaxx applikabbli għall-fond għall-GMES. Għandu
jiġi adottat mill-Kunsill u mill-Parlament fuq proposta mill-Kummissjoni.
Għandu jinkludi wkoll id-dispożizzjonijiet rigward il-programmar u
l-implimentazzjoni tal-azzjonijiet GMES, inklużi r-regoli dwar
il-ftehimiiet ta' delegazzjoni u fuq l-għoti ta' kuntratti u
għotjiet. Għandu jinkludi wkoll dispożizzjonijiet adegwati biex
jippermetti lill-Kummissjoni li tistrieħ fuq l-ispeċjalizzazzjoni ta'
parti terza fis-segwitu u l-monitoraġġ tal-implimentazzjoni tal-GMES. Sabiex ikun żgurat li l-GMES idum fit-tul
huwa importanti li, tintgħażel liema struttura tintgħażel,
il-programm GMES għandu jkollu l-kapaċità operattiva
meħtieġa – jiġifieri f'dawk li huma riżorsi u kompetenza,
kif ukoll il-kapaċità legali xierqa biex jagħmel użu
mir-riżorsi u jwettaq l-azzjonijiet GMES sabiex jissodisfa
l-għanijiet tal-programm b'konformità mal-istennijiet tal-utenti. 4. Konklużjonijiet Meta wieħed iqis iż-żmien
meħtieġ għall-preparazzjoni tal-arranġamenti
meħtieġa għall-fażi operattiva u r-riskju ta'
interruzzjoni, il-Kummissjoni: –
tħeġġeġ lill-Istati Membri biex
jagħtu bidu għall-miżuri meħtieġa għall-adozzjoni
fil-waqt ta' ftehim intergovernattiv u ta' regolament
għall-operazzjonijiet tal-programm GMES u –
ittenni l-impenn tagħha li tappoġġa
lill-Istati Membri f'dan il-proċess. Anness L-elementi
ewlenin ta' abbozz ta' FTEHIM INTERGOVERNATTIV dwar
it-twaqqif ta' fond intergovernattiv għall-programm Ewropew ta'
monitoraġġ tad-Dinja (GMES) għall-perjodu bejn l-2014 u l-2020 bejn ir-Rappreżentanti
tal-Gvernijiet tal-Istati Membri, li jiltaqgħu fi ħdan il-Kunsill,
dwar il-finanzjament tal-programm Ewropew ta' monitoraġġ tad-Dinja
(GMES) għall-perjodu bejn l-2014 u l-2020 IR-RAPPREŻENTANTI
TAL-GVERNIJIET TAL-ISTATI MEMBRI TAL-UNJONI EWROPEA, LI JILTAQGĦU FI
ĦDAN IL-KUNSILL, Billi: (1) [Kapital inizjali…]. (2) [Kapital inizjali…]. (3) [Kapital inizjali…]. FTIEHMU KIF ĠEJ: Twaqqif tal-Fond għall-GMES 1. Permezz ta' dan il-Ftehim,
l-Istati Membri jistabbilixxu bejniethom fond biex jiffinanzjaw il-programm
Ewropew ta' monitoraġġ tad-Dinja msejjaħ GMES, li minn hawn 'il
quddiem jissejjaħ il-"Fond għall-GMES". 2. Il-Fond għall-GMES se
jiffinanzja l-operazzjonijiet u l-azzjonijiet kollha tal-programm GMES.
Għal dan il-għan, jista' juża l-istrumenti finanzjarji kollha li
hu jqis meħtieġa jew li huma l-aħjar biex jinkisbu
l-għanijiet tal-GMES. 3. Il-Fond għall-GMES
għandu jkollu Regolament li jistipula r-regoli ta' amministrazzjoni,
immaniġġjar, implimentazzjoni, kontabilità, awditjar u rilaxx
applikabbli għall-fond. Għandu jiġi adottat mill-Kunsill u
mill-Parlament fuq proposta mill-Kummissjoni. 4. Dan ir-Regolament għandu
jinkludi fih id-dispożizzjonijiet rigward it-tħaddim tal-Fond
għall-GMES u l-ipprogrammar u l-implimentazzjoni tal-azzjonijiet GMES,
inklużi r-regoli li jirregolaw id-delega tas-setgħat
lill-Kummissjoni, ir-regoli dwar il-ftehimiet ta' delega ma' agenziji rregolati
mil-liġi tal-Unjoni, entitajiet stabbiliti mill-Komunitajiet u minn
entitajiet speċjalizzati oħra tal-Unjoni, u entitajiet tas-settur
pubbliku nazzjonali jew internazzjonali jew entitajiet irregolati minn
liġi privata b'missjoni għas-servizz pubbliku, u r-regoli dwar
l-għoti ta' kuntratti u għotjiet. 5. Barra minn hekk,
ir-Regolament għandu jistipula l-obbligi ta' kontroll u ta' awditjar
tal-Istati Membri fl-implimentazzjoni tal-baġit kif ukoll
ir-responsabbiltajiet li jirriżultaw minn dan. Għandu jistipula wkoll
ir-responsabbiltajiet u r-regoli ddettaljati għal kull entità li jiġu
ddelegati lilha setgħat ta' mmaniġġjar tal-baġit,
fir-rigward tal-parti tagħhom fit-twettiq tan-nefqa tagħhom stess. Sorveljanza u mmaniġġjar 6. Il-Fond għall-GMES
għandu jkun issorveljat minn Kunsill tal-GMES, magħmul minn
rappreżentant wieħed maħtur minn kull Stat Membru u presedut
mill-Kummissjoni. 7. L-immaniġġjar
tal-Fond għall-GMES għandu jiġi ddelegat lill-Kummissjoni.
Il-Kummissjoni għandha tkun responsabbli mill-implimentazzjoni finanzjarja
tal-baġit approvat mill-Kunsill tal-GMES u għandha tkun responsabbli
mill-implimentazzjoni finanzjarja tal-proġetti u l-programmi. 8. Il-Kummissjoni għandha
timplimenta l-azzjonijiet iffinanzjati mill-Fond għall-GMES. Għal dan
il-għan, tista' tiddelega kompiti ta' implimentazzjoni lill- (a)
aġenziji rregolati mil-liġi tal-Unjoni; (b)
entitajiet stabbiliti mill-Komunitajiet u
entitajiet speċjalizzati oħra tal-Unjoni, sakemm dan ikun kompatibbli
mal-kompiti ta' kull entità kif definit fl-att bażiku; (c)
entitajiet tas-settur pubbliku nazzjonali jew
internazzjonali jew entitajiet rregolati mil-liġi privata b’missjoni ta’
servizz pubbliku li jipprovdu garanziji finanzjarji adegwati u li jikkonformaw
mal-kondizzjonijiet stipulati fir-Regolament li jimplimenta dan il-ftehim. 9. Madankollu, meta tagħmel
dan, il-Kummissjoni ma tistax tiddelega s-setgħat li tgawdi minnhom hi
skont it-Trattati jew skont dan il-Ftehim meta dawn jinvolvu miżura kbira
ta' diskrezzjoni li timplika għażliet politiċi. 10. Għall-irkupru
ta' ammonti ta' flus li tħallsu bla mistħoqq,
id-deċiżjonijiet tal-Kummissjoni għandhom ikunu b'konformità
mal-Artikolu 299 tat-TFUE. Il-Kunsill tal-GMES 11. Il-Kunsill
tal-GMES, b’maġġoranza kkwalifikata, għandu jkollu s-setgħa
ta' żewġ terzi tal-membri tiegħu li jivvutaw biex: (a)
jadotta l-baġit ġenerali u japprova
l-implimentazzjoni tal-baġit u l-kontijiet tas-sena preċedenti,
flimkien mal-karta tal-bilanċ tal-assi u l-obbligazzjonijiet tal-Fond
għall-GMES, wara li jkun ħa nota tar-rapport tal-awditur estern; (b)
jiddeċiedi fuq kull miżura tal-programmi
ta' finanzjament, inklużi permezz ta' strumenti finanzjarji dedikati; (c)
jiddeċiedi fuq it-termini u l-kundizzjonijiet
li jirregolaw l-adeżjoni ta' pajjiżi terzi; (d)
japprova l-konklużjoni ta' kull ftehim
mal-Istati Membri, pajjiżi terzi, organizzazzjonijiet governattivi u mhux
governattivi internazzjonali, jew organizzazzjonijiet nazzjonali tal-Istati
Membri. 12. Il-Kunsill
tal-GMES għandu jkollu s-setgħa, b’maġġoranza sempliċi
tal-membri tiegħu li jivvutaw: (a)
li jiddeċiedi dwar l-aġġustament
tal-kontribuzzjonijiet annwali għall-Fond għall-GMES mill-Istati
Membri tiegħu; (b)
li jaħtar l-awdituri u li jiddeċiedi dwar
it-tul tal-ħatriet tagħhom; (c)
li jadotta r-regoli ta' proċedura tiegħu
stess; (d)
li jadotta r-rakkomandazzjonijiet lill-Istati
Membri dwar emendi għal dan il-Ftehim; (e)
li jkun responsabbli minn kull miżura ta'
mmaniġġjar mhux fdata lill-Kummissjoni ggarantita mit-tħaddim
sew tal-Fond għall-GMES. 13. Il-Kunsill tal-GMES
għandu jiddeċiedi b'unanimità tal-Istati Membri tiegħu dwar
l-esklużjoni ta' Stat Membru, il-kundizzjonijiet ta' esklużjoni
bħal din, kif ukoll dwar ix-xoljiment jew il-likwidazzjoni tal-Fond
għall-GMES. 14. Kull Stat Membru għandu
jkollu għadd ta' voti fil-Kunsill tal-GMES, li jkunu proporzjonati
għall-kontribut tagħhom għall-Fond għall-GMES. Madankollu,
Stat Membru m'għandu jkollu l-ebda vot fil-Kunsill tal-GMES jekk l-ammont
tal-arretrati tal-kontribuzzjonijiet ikun aktar mill-ammont ivvalutat
tal-kontribuzzjonijiet tiegħu għas-sena finanzjarja attwali. L-Istati
Membri li jastjenu għandhom jiġu kkunsidrati daqslikieku ma vvutawx. 15. L-għadd totali tal-voti
għandu jkun 999, kif imqassam hawn taħt: Stat Membru || Voti il-Belġju || 29 il-Bulgarija || 3 ir-Repubblika Ċeka || 12 id-Danimarka || 19 il-Ġermanja || 203 l-Estonja || 1 l-Irlanda || 12 il-Greċja || 17 Spanja || 85 Franza || 157 l-Italja || 126 Ċipru || 1 il-Latvja || 2 il-Litwanja || 2 il-Lussemburgu || 3 l-Ungerija || 8 Malta || 1 il-Pajjiżi l-Baxxi || 48 l-Awstrija || 24 il-Polonja || 29 il-Portugall || 14 ir-Rumanija || 10 is-Slovenja || 3 is-Slovakkja || 6 il-Finlandja || 15 l-Isvezja || 31 ir-Renju Unit || 138 Total || 999 16. Il-Kunsill tal-GMES jista'
jiddelega lill-Kummissjoni, permezz ta' mandat, kull kompetenza
meħtieġa, lil hinn mis-setgħat ta' mmaniġġjar
tiegħu, il-kompitu li jinkisbu l-għanijiet tal-GMES u li tiġi
rrevokata kull delega bħal din. Il-Kompożizzjoni tal-Fond għall-GMES 17. Il-Fond għall-GMES
għandu jikkonsisti f'EUR 5 841 miljun, fil-prezzijiet tal-2011,
ikkontribwiti mill-Istati Membri abbażi tal-Introjtu Nazzjonali Gross
tagħhom u għandu jkopri l-perjodu mill-1 ta' Jannar 2014
sal-31 ta' Diċembru 2020. Għall-ewwel sena
tal-operazzjonijiet, l-Istati Membri għandhom jagħmlu disponibbli
l-fondi li ġejjin qabel it-30 ta' Settembru 2013: Stat Membru || Il-koeffiċjent tal-kontribuzzjoni || Il-kontribuzzjoni tal-2014 f'EUR[4] il-Belġju || 2,93% || 24 451 749 il-Bulgarija || 0,31% || 2 573 644 ir-Repubblika Ċeka || 1,25% || 10 398 781 id-Danimarka || 1,91% || 15 917 693 il-Ġermanja || 20,34% || 169 693 249 l-Estonja || 0,13% || 1 056 893 l-Irlanda || 1,23% || 10 304 449 il-Greċja || 1,72% || 14 378 433 Spanja || 8,49% || 70 851 816 Franza || 15,72% || 131 203 971 l-Italja || 12,55% || 104 702 411 Ċipru || 0,14% || 1 183 430 il-Latvja || 0,16% || 1 294 145 il-Litwanja || 0,24% || 2 004 516 il-Lussemburgu || 0,33% || 2 757 700 l-Ungerija || 0,79% || 6 553 633 Malta || 0,05% || 425 091 il-Pajjiżi l-Baxxi || 4,81% || 40 095 555 l-Awstrija || 2,38% || 19 861 219 il-Polonja || 2,92% || 24 377 945 il-Portugall || 1,36% || 11 329 104 ir-Rumanija || 1,04% || 8 681 881 is-Slovenja || 0,28% || 2 363 824 is-Slovakkja || 0,55% || 4 616 893 il-Finlandja || 1,50% || 12 521 438 l-Isvezja || 3,06% || 25 492 378 ir-Renju Unit || 13,82% || 115 336 728 Total || 100% || 834 430 583 18. Il-Kunsill tal-GMES
għandu jiddeċiedi dwar l-aġġustament tal-kontribuzzjoni
annwali tal-Istati Membri għal kull sena sussegwenti abbażi
tal-metodu tat-tqassim b'konformità mal-Introjtu Nazzjonali Gross rispettiv
tal-Istati Membri. Id-deċiżjoni ta' aġġustament
għandha tiġi implimentata mill-Kummissjoni u għandha tiġi
infurzata b'konformità mal-Artikou 299 tat-TFUE. Ġaladarba
nnotifikati dwar id-deċiżjoni ta' aġġustament, l-Istati
Membri għandu jkollhom ir-responsabbiltà li jħallsu l-ammonti dovuti
tagħhom qabel it-30 ta' Settembru. 19. L-approprjazzjonijiet
finanzjarji tal-Fond għall-GMES ma għandhomx jibqgħu impenjati
wara l-31 ta' Diċembru 2020, sakemm il-Kunsill tal-Unjoni
Ewropea ma jiddeċidix mod ieħor b'unanimità, fuq proposta
mill-Kummissjoni. Kontribuzzjonijiet għall-Fond għall-GMES 20. Kull sena, il-Kummissjoni
għandha tistabbilixxi u tikkomunika lill-Kunsill tal-GMES sat-30 ta' Settembru
dikjarazzjoni tal-impenji, il-pagamenti u l-ammont annwali tas-sejħiet
għall-kontribuzzjonijiet li għandhom isiru fis-sena baġitarja
annwali u s-sentejn baġitarji li ġejjin. 21. Dawn l-ammonti għandhom
jiġu bbażati fuq il-kapaċità li jingħata l-livell propost
tar-riżorsi b'mod effettiv. 22. Fuq proposta mill-Kummissjoni,
il-Kunsill tal-GMES għandu jiddeċiedi b'maġġoranza
kkwalifikata, fuq il-limitu tal-ammont annwali tal-kontribuzzjoni
għat-tieni sena wara l-proposta mill-Kummissjoni (n+2) u, fi ħdan
il-limitu li ġie deċiż għas-sena preċedenti, fuq
l-ammont annwali tas-sejħa għall-kontribuzzjoni għall-ewwel sena
wara l-proposta mill-Kummissjoni (n+1). 23. Kieku l-kontribuzzjonijiet
kellhom ivarjaw mill-bżonnijiet attwali tal-GMES matul is-sena finanzjarja
inkwistjoni, il-Kummissjoni għandha tressaq lill-Kunsill tal-GMES proposti
biex temenda l-ammonti ta' kontribuzzjoni, u l-Kunsill tal-GMES għandu
jieħu deċiżjoni b'maġġoranza kkwalifikata. 24. Is-sejħiet għall-kontribuzzjoni
ma jistgħux ikunu aktar mil-limitu msemmi fil-paragrafi hawn fuq u lanqas
ma jista' jiżdied il-limitu ħlief meta jiddeċiedi l-Kunsill
tal-GMES permezz ta' maġġoranza kkwalifikata f'każijiet ta'
bżonnijiet speċjali li jirriżultaw minn ċirkustanzi
eċċezzjonali jew mhux previsti. F'dan il-każ, il-Kummissjoni u
l-Kunsill tal-GMES għandhom jiżguraw li l-kontribuzzjonijiet
jikkorrispondu għall-pagamenti mistennija. 25. Kull sena, il-Kummissjoni,
għandha tikkomunika lill-Kunsill tal-GMES sat-30 ta' Ottubru
l-istimi tagħha tal-impenji, il-ħlasijiet u l-kontribuzzjonijiet
għal kull sena ta' wara. 26. Ir-regoli ddettaljati
għall-pagament tal-kontribuzzjonijiet mill-Istati Membri għandhom
jiġu ddeterminati permezz tar-Regolament li jimplimenta dan il-Ftehim. Riżorsi oħra tal-Fond għall-GMES 27. Kieku pajjiż ġdid
kellu jaderixxi mal-UE, l-allokazzjoni tal-kontribuzzjonijiet tiġi
emendata permezz ta' deċiżjoni tal-Kunsill tal-GMES. 28. Ir-riżorsi finanzjarji
jistgħu jiġu aġġustati b'deċiżjoni tal-Kunsill
tal-GMES li jaġixxi b'maġġoranza kkwalifikata. 29. Kull Stat Membru jista',
mingħajr ħsara għar-regoli u l-proċeduri dwar it-teħid
ta' deċiżjonijiet stipulati fir-regolament, jipprovdi
lill-Kummissjoni b'kontribuzzjonijiet sabiex jappoġġa
l-għanijiet tal-GMES. L-Istati Membri jistgħu jikkofinanzjaw
proġetti jew programmi fil-qafas ta' inizjattivi speċifiċi li
għandhom jiġu mmaniġġati mill-Kummissjoni, il-BEI jew kull
entità tal-Unjoni jew organizzazzjoni li magħha l-Fond għall-GMES
stabbilixxa ftehim ta' sħubija jew lil min ġew fdati ċerti
kompiti ta' implimentazzjoni. 30. Ir-Regolament li jimplimenta
dan il-Ftehim għandu jinkludi d-dispożizzjonijiet meħtieġa
għall-kofinanzjament tal-Fond għall-GMES, kif ukoll
għall-kofinanzjament tal-attivitajiet implimentat mill-Istati Membri. 31. L-Istati Membri għandhom
jinfurmaw lill-Kunsill tal-GMES bil-quddiem dwar il-kontribuzzjonijiet
tagħhom. Azzjonijiet skont il-Fond għall-GMES 32. L-operazzjonijiet tas-Servizzi
GMES (a)
L-attivitajiet operattivi tas-Servizzi tal-GMES: –
attivitajiet sistematiċi/ta' rutina globali
għall-monitoraġġ u t-tbassir tal-istat tas-sottosistemi dinjin
fil-livelli reġjonali u globali li jkopru b'mod partikolari l-ambjent
marin, l-atmosfera u l-kwalità tal-arja, l-art globali u s-servizzi ta'
monitoraġġ tal-bidla fil-klima; –
attivitajiet reġjonali/lokali fuq talba li
jkopru b’mod partikolari, l-immaniġġjar ta’ emerġenzi,
is-sigurtà u s-servizzi pan-Ewropej ta' monitoraġġ tal-art, fl-Ewropa
jew barra minnha. (b)
L-attivitajiet tal-iżvilupp jikkonsistu
fit-titjib tal-kwalità u l-prestazzjoni tas-servizzi eżistenti,
l-iżvilupp ta’ elementi ta’ servizzi ġodda u t-trawwim
tal-utilizzazzjoni min-naħa tas-setturi li jistgħu jiggwadanjaw
mill-programm; 33. L-operazzjonijiet
tal-komponent tal-ispazju 34. L-attivitajiet operattivi
tal-osservazzjonijiet li jkunu saru fl-ispazju: (a)
operazzjonijiet tal-infrastruttura spazjali
dedikata (jiġifieri missjonijiet Sentinelli); (b)
aċċess għal missjonijiet ta'
partijiet terzi; (c)
distribuzzjoni ta' dejta; (d)
għajnuna teknika lill-Kummissjoni biex
tiġbor u torganizza r-rekwiżiti tad-dejta tas-servizzi; (e)
identifikazzjoni tad-diskrepanzi fl-osservazzjoni,
li jikkontribwixxu għall-ispeċifikazzjoni ta' missjonijiet ġodda
fl-ispazju. 35. Attivitajiet ta’ żvilupp: (a)
id-disinn u l-akkwist ta’ elementi ġodda
tal-infrastruttura spazjali; (b)
il-provvediment ta’ appoġġ tekniku
lill-Kummissjoni għat-traduzzjoni ta' rekwiżiti ta' servizz fi
speċifikazzjonijiet ta' missjonijiet spazjali ġodda
bl-appoġġ ta' operaturi tal-infrastruttura spazjali; (c)
il-koordinazzjoni tal-iżvilupp ta'
attivitajiet spazjali, inklużi l-iżviluppi mmirati lejn
il-modernizzazzjoni u l-ikkumplimentar tal-kapaċità tal-osservazzjoni
tal-ispazju. 36. L-attivitajiet operattivi
tal-osservazzjonijiet in situ tal-GMES: (a)
koordinazzjoni tal-provvediment ta' dejta in
situ għas-servizzi tal-GMES b'arranġamenti amministrattivi ad
hoc mal-operaturi in situ; (b)
koordinazzjoni tal-provvediment ta' parti terza
fid-dejta in situ fil-livell internazzjonali; (c)
forniment ta' għajnuna teknika
għat-traduzzjoni tar-rekwiżiti ta' dejta ta' servizz tal-GMES fi
speċifikazzjonijiet ta' netwerks u infrastruttura ta' osservazzjoni in
situ; (d)
interazzjoni ma' operaturi in situ biex
jippromwovu konsistenza fl-attivitajiet ta' żvilupp relatati
mal-kapaċità tal-osservazzjoni tal-GMES. Parteċipazzjoni ta’ pajjiżi terzi u organizzazzjonijiet
internazzjonali 37. Il-Kunsill tal-GMES jista'
jikkonkludi ftehimiet internazzjonali, inklużu l-ammissjoni tagħhom
fil-Fond għall-GMES, mal-pajjiżi terzi li ġejjin: (a)
il-pajjiżi tal-Assoċjazzjoni Ewropea
tal-Kummerċ Ħieles (EFTA) li huma Partijiet Kontraenti
għall-Ftehim taż-ŻEE b’konformità mal-kundizzjonijiet stabbiliti
fil-Ftehim taż-ŻEE; (b)
il-pajjiżi kandidati għas-sħubija
fl-Unjoni, kif ukoll kandidati potenzjali inklużi fil-proċess ta’
stabbilizzazzjoni u assoċjazzjoni skont il-Ftehimiet ta’ Qafas, jew
taħt Protokoll għal Ftehim ta’ Assoċjazzjoni, dwar
il-prinċipji ġenerali għall-parteċipazzjoni ta’ dawk
il-pajjiżi fil-programmi tal-Unjoni, konklużi ma’ dawk
il-pajjiżi; (c)
il-Konfederazzjoni Svizzera, pajjiżi terzi
oħra mhux imsemmija fil-punti (1) u (2), u organizzazzjonijiet
internazzjonali, skont il-ftehimiet konklużi mill-Unjoni ma’ dawn
il-pajjiżi terzi jew organizzazzjonijiet internazzjonali, skont
l-Artikolu 218 tat-TFUE, li għandu jistabbilixxi l-kundizzjonijiet u
r-regoli ddettaljati għall-involviment tagħhom. Adozzjoni u dħul fis-seħħ 38. L-Istati Membri għandhom
jinnotifikaw lis-Segretarju Ġenerali tal-Kunsill tal-Unjoni Ewropea dwar
it-tlestija tal-proċeduri interni meħtieġa għad-dħul
fis-seħħ ta' dan il-Ftehim. 39. Dan il-Ftehim għandu
jidħol fis-seħħ fl-ewwel ġurnata tat-tieni xahar wara
n-notifika lis-Segretarju Ġenerali tal-Kunsill tal-Unjoni Ewropea dwar
it-tlestija tal-proċeduri interni meħtieġa għad-dħul fis-seħħ
tiegħu mill-aħħar Stat Membru li se jagħmel dan il-pass. 40. Dan il-Ftehim ma għandux
jibqa' fis-seħħ wara l-31 ta' Diċembru 2020 u
l-ebda impenn legali jew finanzjarju ma jista' jsir wara dik id-data. 41. Mingħajr ħsara
għal dan t'hawn fuq, il-pagamenti u l-obbligi kollha li jirriżultaw
mill-impenji li jkun responsabbli għalihom il-Fond għall-GMES jew li
jsiru f'ismu qabel il-31 ta' Diċembru 2020 għandhom
ikunu sodisfatti mill-Fond għall-GMES sal-31 ta' Diċembru 2023.
Wara din id-data, kull obbligu pendenti għandu jerġa' lura għall-Istati
Membri. 42. Is-Segretarju Ġenerali
tal-Kunsill tal-Unjoni Ewropea għandu jaġixxi bħala
depożitarju għal dan il-Ftehim li għandu jiġi ppubblikat f'Il-Ġurnal
Uffiċjali tal-Unjoni Ewropea. B'XHIEDA TA' DAN, ir-Rappreżentati hawn taħt iffirmati tal-Gvernijiet
tal-Istati Membri, li jiltaqgħu fi ħdan il-Kunsill, iffirmaw dan
il-Ftehim. [1] COM (2011)
500 finali tad-29.06.2011 [2] COM (2011)
831 finali tat-30.11.2011 [3] L-ENVISAT
hija missjoni xjentifika tas-satelliti tal-ESA. Tnediet fl-2002 u kellha abbord 10 strumenti. Hija l-akbar
missjoni ċivili ta' osservazzjoni tad-Dinja. Fl-2007 kienet diġà
waslet fit-tmiem tal-ħajja mistennija tagħha. [4] Sors: Eurostat 2012