Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol)

 

ACHOIMRE AR:

Rialachán (AE) 2016/794 maidir le Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol)

CAD IS AIDHM LEIS AN RIALACHÁN?

• Cuirtear ar bun leis rialacha maidir le Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol), lena n–áirítear córas lenar féidir le Parlaimint na hEorpa, i dteannta le parlaimintí náisiúnta, faireachán a dhéanamh ar ghníomhaíochtaí Europol ar bhonn polaitiúil.
• Déantar caidreamh seachtrach Europol a oiriúnú do rialacha Chonradh Liospóin leis.
• Le Rialachán leasaitheach (AE) 2022/991 neartaítear sainordú Europol maidir le coireacht thromchúiseach agus sceimhlitheoireacht a chomhrac agus maidir le dul i ngleic le bagairtí slándála atá ag teacht chun cinn.

PRÍOMHPHOINTÍ

Cuspóirí

Is iad cuspóirí Europol tacaíocht a thabhairt dóibh seo a leanas agus iad a neartú:

• gníomh arna dhéanamh ag údaráis forfheidhmithe dlí i mBallstáit an Aontais Eorpaigh (AE);
• comhar frithpháirteach i measc na mBallstát maidir leis an sceimhlitheoireacht, coireacht thromchúiseach a théann i gcion ar dhá Bhallstát nó níos mó agus cineálacha coireachta a théann i gcion ar chomhleas arna chumhdach le beartas AE a chosc agus a chomhrac.

Sainchúraimí

Leagtar amach leis an rialachán sraith cúraimí sonracha chun na cuspóirí sin a bhaint amach lena n–áirítear:

• faisnéis choiriúil a bhailiú, a stóráil, a phróiseáil, a anailísiú agus a chomhroinnt, lena n–áirítear faisnéis choiriúil.
• fógra a thabhairt do na Ballstáit, trí aonaid náisiúnta Europol, maidir le faisnéis agus ceangal ar bith idir cionta coiriúla a bhaineann leo;
• gníomhaíochtaí imscrúdaitheacha agus oibriúcháin a chomhordú, a eagrú agus a chur chun feidhme chun tacaíocht a thabhairt d’údaráis na mBallstát agus iad a neartú;
• measúnuithe bagartha, anailísí straitéiseacha agus oibriúcháin agus tuarascálacha ginearálta staide a ullmhú;
• páirt a ghlacadh i bhfoirne comhpháirteacha um imscrúdú;
• lárionaid saineolais AE a fhorbairt chun cineálacha áirithe coireachta a chomhrac, mar shampla Ionad Cibearchoireachta na hEorpa;
• tacaíocht a thabhairt do na Ballstáit chun dul i ngleic leis an gcoireacht a éascaítear, a chuirtear chun cinn agus a dhéantar ag baint úsáid as an idirlíon.

Grinnscrúdú

Gabhann coimircí cosanta sonraí, maoirseacht dhaonlathach agus sásraí freagrachta le cumhachtaí Europol lena áirithiú go ndéanfar gníomhaíochtaí agus cúraimí na gníomhaireachta agus na cearta agus saoirsí bunúsacha, mar atá cumhdaithe sa Chairt um Chearta Bunúsacha á gcomhlíonadh go hiomlán.

• Déanann an Maoirseoir Eorpach ar Chosaint Sonraí (MECS) faireachán ar phróiseáil Europol ar shonraí pearsanta agus beidh nós imeachta soiléir ann do shaoránaigh chun déileáil le hiarratais faoi dhlí AE.
• Déanann Grúpa um Ghrinnscrúdú Parlaiminteach Comhpháirteach, maoirseacht ar obair Europol, le comhaltaí ó Pharlaimint na hEorpa agus ó pharlaimintí náisiúnta.

Rialachán leasaitheach (AE) 2022/991

Leis an rialachán leasaitheach:

• déantar cumas oibríochtúil Europol maidir le comhar le páirtithe príobháideacha a neartú (rialacha maidir le sonraí pearsanta a mhalartú le páirtithe príobháideacha agus anailís a dhéanamh ar na sonraí sin);
• cuirtear ar chumas Europol sonraí pearsanta a roinnt le páirtithe príobháideacha áirithe chun scaipeadh an mhéid seo a leanas a chosc:
  • ábhar ar líne a bhaineann leis an sceimhlitheoireacht nó antoisceachas foréigneach i gcásanna géarchéime, agus
  • ábhar ar líne maidir le drochúsáid ghnéasach leanaí;
• leagtar amach rialacha maidir le hanailís a dhéanamh ar olltiomsú sonraí (tacair shonraí atá rómhór nó róchasta lena láimhseáil ag bogearraí traidisiúnta feidhmchlár próiseála sonraí) ar aon dul le riachtanais oibriúcháin Europol agus i gcomhréir le cearta bunúsacha, lena n–áirítear bonn dlíthiúil nua do Europol chun olltiomsú sonraí a phróiseáil chun tacú le himscrúdú coiriúil atá fós ar siúl;
• neartaítear maoirseacht sheachtrach Europol a dhéanann MECS agus maoirseacht inmheánach Europol a dhéantar trína fheidhm cosanta sonraí, agus tugtar isteach leis ról nua oifigigh um chearta bunúsacha;
• tugtar cumhachtaí nua do Europol chun:
  • imscrúdú coiriúil a thionscnamh i mBallstát AE maidir le coireanna a théann i gcion ar leas coiteann atá cumhdaithe faoi bheartas AE, gan ga a bheith le gné thrasteorann den choir lena mbaineann — ní cheanglaítear ar an mBallstát lena mbaineann, áfach, Europol a chur ar an eolas má chinneann sé gan an togra a ghlacadh,
  • a mholadh go gcuirfidh na Ballstáit foláirimh faisnéise isteach i gcóras faisnéise Schengen;
• cuirtear feabhas ar an gcomhar le hOifig an Ionchúisitheora Phoiblí Eorpaigh (OIPE) trí chóras amas / gan amas a thabhairt isteach trínar féidir le OIPE rochtain indíreach a fháil ar shonraí Europol a bhaineann le cionta laistigh de shainordú OIPE;
• maidir le taighde agus nuálaíocht, tugtar isteach rialacha maidir le húsáid a bhaint as teicneolaíochtaí atá ag teacht chun cinn, iniúchadh a dhéanamh ar chuir chuige nua agus réitigh chomhchoiteanna teicneolaíochta a fhorbairt — lena n–áirítear maidir le forbairt, oiliúint, tástáil agus bailíochtú algartam;
• maidir leis an gcreat cosanta sonraí is infheidhme maidir le Europol, ionchorpraítear sa rialachán na rialacha ábhartha i Rialachán (AE) 2018/1725 (féach an achoimre) maidir le cosaint daoine nádúrtha i ndáil le sonraí pearsanta oibríochtúla a phróiseáil;
• méadaítear an mhaoirseacht agus an chuntasacht pharlaiminteach le rannpháirtíocht, mar bhreathnóirí, dhá chomhalta den Grúpa um Ghrinnscrúdú Parlaiminteach Comhpháirteach Europol i gcruinnithe Bhord Bainistíochta Europol chun cúrsaí neamhoibríochtúla a phlé, agus neartaítear oibleagáidí tuairiscithe Europol;
• soláthraítear an deis do Europol sonraí pearsanta a aistriú chuig tíortha nach tíortha den Aontas Eorpach iad i gcásanna a bhfuil údar cuí leo agus nuair a bhíonn cosaintí iomchuí ann.

Gníomh dlíthiúil MECS, Meán Fómhair 2022

I mí Mheán Fómhair 2022, d’iarr MECS go ndéanfadh Cúirt Bhreithiúnais an Aontais Eorpaigh Airteagail 74a agus 74b de Rialachán Europol (Rialachán (AE) 2016/794, arna leasú le déanaí le Rialachán (AE) 2022/991)) a neamhniú, lena soiléirítear go bhfuil feidhm ag na rialacha nua arna leagan síos ag na comhreachtóirí maidir le próiseáil olltiomsú sonraí maidir leis na sonraí go léir a bhí i seilbh Europol go dleathach tráth chur i bhfeidhm an rialacháin leasaithigh (i.e. an 28 Meitheamh 2022).

Beidh na hairteagail sin bailí go dtí go mbeidh cinneadh déanta ag an gCúirt Bhreithiúnais.

Aisghairm

Aisghairtear leis an rialachán cinneadh Europol a bhí ann roimhe seo, Cinneadh 2009/371/CGB agus cuirtear in ionad an chinnidh sin é.

CÉN UAIR ATÁ TOSACH FEIDHME AN RIALACHÁIN?

Tá sé i bhfeidhm ón 1 Bealtaine 2017 cé is moite d’airteagail áirithe atá i bhfeidhm ón 13 Meitheamh 2016.

• comhaontuithe agus conarthaí dlíthiúla a cuireadh i gcrích faoi Chinneadh 2009/371/AE — Airteagal 71,
• socruithe idirthréimhseacha a bhaineann leis an mbord bainistíochta) — Airteagal 72 agus
• socruithe idirthréimhseacha a bhaineann leis an bhfoireann — Airteagal 73.

Tá feidhm ag na hathruithe a tugadh isteach le Rialachán leasaitheach (AE) 2022/991 ón 28 Meitheamh 2022.

CÚLRA

Le haghaidh tuilleadh faisnéise, féach:

• Maidir le Europol (Europol).

PRÍOMHDHOICIMÉAD

Rialachán (AE) 2016/794 ó Pharlaimint na hEorpa agus ón gComhairle an 11 Bealtaine 2016 maidir le Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) lena n–aisghairtear Cinntí 2009/371/CGB, 2009/934/CGB, 2009/935/CGB, 2009/936/CGB agus 2009/968/CGB ón gComhairle agus a ghabhann ionad na gCinntí sin (IO L 135, 24.5.2016, lgh. 53–114).

Ionchorpraíodh leasuithe comhleanúnacha ar Rialachán (AE) 2016/794 sa téacs bunaidh. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin agus lena n–aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lgh. 39–98).

Rialachán (AE) 2017/1939 ón gComhairle an 12 Deireadh Fómhair 2017 lena gcuirtear chun feidhme comhar feabhsaithe maidir le bunú Oifig an Ionchúisitheora Phoiblí Eorpaigh (“OIPE”) (IO L 283, 31.10.2017, lgh. 1–71).

Féach an leagan comhdhlúite.

Cinneadh Réime 2002/465/CGB ón gComhairle an 13 Meitheamh 2002 maidir le foirne comhpháirteacha um imscrúdú (IO L 162, 20.6.2002, lgh. 1–3).

Nuashonraithe 18.01.2023