Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Summaries of EU Legislation

Timpeallacht Eorpach ionaid ilfhreastail mhuirí

 

ACHOIMRE AR:

Rialachán (AE) 2019/1239 lena mbunaítear timpeallacht Eorpach ionaid ilfhreastail mhuirí

CAD IS AIDHM LEIS AN RIALACHÁN?

  • Tugtar isteach leis timpeallacht Eorpach ionaid ilfhreastail mhuirí idir–inoibritheach ag a bhfuil comhéadain chomhchuibhithe*, chun oibleagáidí um thuairisciú* a shimpliú le haghaidh long a bheidh ag teacht isteach agus ag fanacht i gcalafoirt an Aontais Eorpaigh (AE) nó a bheidh ag imeacht uathu.
  • Féachtar leis feabhas a chur ar iomaíochas agus ar éifeachtúlacht earnáil an iompair mhuirí Eorpaigh tríd an ualach riaracháin a laghdú, comhpháirteanna agus seirbhísí digiteacha a thabhairt isteach chun na córais náisiúnta reatha a chomhchuibhiú agus an gá le páipéarachas a laghdú.

PRÍOMHPHOINTÍ

Is é an timpeallacht Eorpach Ionaid Ilfhreastail Mhuirí an creat dlíthiúil agus teicniúil le haghaidh tarchur leictreonach faisnéise maidir le hoibleagáidí um thuairisciú le haghaidh long a thugann cuairt ar chalafoirt AE. Is gréasán ionad ilfhreastail náisiúnta muirí* é ag a bhfuil comhéadain chomhchuibhithe tuairiscithe agus cuimsítear ann malartuithe sonraí ag baint úsáid as SafeSeaNet agus córais eile, mar aon le seirbhísí maidir le:

  • clárlann úsáideoirí agus bainistíocht rochtana,
  • comhsheirbhís seolacháin;
  • bunachar sonraí long um thimpeallacht Eorpach Ionaid Ilfhreastail Mhuirí,
  • bunachar sonraí comhchoiteanna suíomhanna,
  • bunachar sonraí comhchoiteann ábhar guaiseach,
  • bunachar sonraí um shláintíocht long.

An tacar sonraí comhchoiteann um thimpeallacht Eorpach Ionaid Ilfhreastail Mhuirí a bhunú

Coimeádtar sa rialachán an t–ionad ilfhreastail mhuirí náisiúnta reatha i ngach Ballstát AE mar an mbonn le haghaidh timpeallacht Eorpach ionaid ilfhreastail mhuirí atá neodrach ó thaobh na teicneolaíochta de agus atá idir–inoibritheach.

Tá sé de chumhacht ag an gCoimisiún Eorpach gníomhartha tarmligthe a ghlacadh chun tacar sonraí comhchoiteann um thimpeallacht Eorpach Ionaid Ilfhreastail Mhuirí a bhunú, ina gcuimsítear agus ina gcuirtear in oiriúint na ceanglais is ábhartha sa reachtaíocht náisiúnta reatha nó i reachtaíocht reatha AE. Ní mór do na Ballstáit fógra a thabhairt don Choimisiún maidir le hoibleagáidí agus ceanglais um thuairisciú ar bith a thiocfadh as an reachtaíocht náisiúnta agus maidir le gnéithe sonraí ar bith ar mian leo a chur sa tacar sonraí um thimpeallacht Eorpach Ionaid Ilfhreastail Mhuirí.

Le Rialachán Tarmligthe (AE) 2023/205 forlíontar Rialachán (AE) 2019/1239 trí Iarscríbhinn nua I a chruthú, lena dtugtar le chéile an fhaisnéis go léir nach mór do long a sholáthar nuair a thugann sí cuairt ar chalafort. Éascaítear leis sin sonraí a chomhroinnt agus a athúsáid ar bhealach níos éifeachtaí, laghdaítear an t–ualach riaracháin do dhearbhóirí agus cuirtear feabhas ar mhalartú sonraí idir na húdaráis náisiúnta. Leagtar amach leis an rialachán tarmligthe chomh maith an tacar sonraí um thimpeallacht Eorpach Ionaid Ilfhreastail Mhuirí dá bhforáiltear faoi Airteagal 3 de Rialachán (AE) 2019/1239 in Iarscríbhinn II nua. Cuirtear san áireamh leis sin tuairisciú éigeantach reatha atá leagtha amach i reachtaíocht an Aontais, reachtaíocht idirnáisiúnta agus reachtaíocht náisiúnta.

Comhéadain chomhchuibhithe tuairiscithe

Glacfaidh an Coimisiún gníomhartha cur chun feidhme lena leagfar síos na sonraíochtaí feidhmiúla agus teicniúla maidir leis an modúl comhéadan comhchuibhithe tuairiscithe le haghaidh na n–ionad ilfhreastail muirí náisiúnta, d’fhonn go mbeidh siad idir-inoibritheach le teicneolaíochtaí úsáideoirí agus córais tuairiscithe éagsúla.

Le Rialachán Cur Chun Feidhme (AE) 2023/204 leagtar síos sonraíochtaí, caighdeáin agus nósanna imeachta teicniúla don timpeallacht Eorpach Ionaid Ilfhreastail Mhuirí.

Prionsabal na haonuaire

Foráiltear leis an gCoinbhinsiún maidir le hÉascú Muirthrácht Idirnáisiúnta nach mór do na húdaráis phoiblí i ngach aon chás gan ach faisnéis tuairiscithe riachtanach a iarraidh agus líon na míreanna a theorannú chomh íseal agus is féidir. Faoin rialachán, ní mór do na Ballstáit a áirithiú nach n–iarrfar ar oibreoirí loinge an fhaisnéis riachtanach a chur ar fáil ach uair amháin in aghaidh na cuairte ar chalafort, agus go gcoimeádfar sonraí ábhartha a chuirfear ar fáil lena n–athúsáid.

Comhsheirbhísí

Mar chomhpháirteanna den timpeallacht Eorpach Ionaid Ilfhreastail Mhuirí, bunaíonn an Coimisiún an méid seo a leanas:

  • córas comhchoiteann um chlárlann úsáideoirí agus um bainistíocht sonraí do dhearbhóirí agus do sholáthraithe seirbhísí sonraí i gcásanna ina bhfuil fíordheimhniú ag teastáil;
  • comhsheirbhís seolacháin bhreise agus deonach, ar an gcoinníoll gur cuireadh an modúl comhéadan comhchuibhithe tuairiscithe chun feidhme go hiomlán;
  • bunachar sonraí long ina bhfuil liosta d’fhaisnéis agus de shaintréithe aitheantais soithí mar aon le taifid maidir le díolúintí ó thuairisciú long;
  • bunachar sonraí comhchoiteann suíomhanna ina bhfuil liosta tagartha de chóid suímh agus de chóid saoráidí calafoirt atá liostaithe i mbunachar sonraí an Chórais Chomhtháite Dhomhanda le haghaidh Faisnéis i dtaca leis an Loingseoireachta de chuid na hEagraíochta Muirí Idirnáisiúnta;
  • bunachar sonraí comhchoiteann teagmhas ábhar guaiseach ina bhfuil liosta de na hearraí dainséaracha agus truailliúcháin nach mór fógra a thabhairt ina leith;
  • bunachar sonraí comhchoiteann um shláintíocht long ar féidir sonraí maidir le dearbhuithe muirí sláinte a ghlacadh agus a stóráil ann;
  • plean ilbhliantúil cur chun feidhme, a athbhreithnítear gach bliain.

Glacann an Coimisiún plean ilbhliantúil cur chun feidhme ar a ndéanann sé athbhreithniú bliantúil, i ndiaidh comhairliúcháin iomchuí le saineolaithe ó na Ballstáit.

Ainmníonn gach Ballstát údarás náisiúnta inniúil ag a mbeidh sainordú dlíthiúil chun gníomhú mar chomhordaitheoir náisiúnta don timpeallacht Eorpach Ionaid Ilfhreastail Mhuirí.

Ní théann an rialachán i gcion ar an malartú faisnéise idir údaráis chustaim, nó idir údaráis chustaim agus gnólachtaí a úsáideann na teicnící leictreonacha próiseála sonraí dá dtagraítear i Rialachán (AE) Uimh. 952/2013 ar Chód Custaim an Aontais (féach an achoimre).

Aisghairm

Aisghairtear le Rialachán (AE) 2019/1239 Treoir 2010/65//AE (féach an achoimre) ón 15 Lúnasa 2025.

CÉN UAIR ATÁ TOSACH FEIDHME AN RIALACHÁIN?

Tá sé i bhfeidhm ón 15 Lúnasa 2025.

CÚLRA

Le haghaidh tuilleadh faisnéise, féach:

PRÍOMHTHÉARMAÍ

Modúl comhéadain chomhchuibhithe tuairiscithe. Comhpháirt meánearraí (bogearraí) den ionad ilfhreastail náisiúnta muirí trínar féidir faisnéis a mhalartú idir an córas faisnéise a úsáideann an dearbhóir agus an t–ionad ilfhreastail mhuirí náisiúnta ábhartha.
Oibleagáid um thuairisciú. An fhaisnéis a cheanglaítear le reachtaíocht agus ceanglais AE, idirnáisiúnta agus náisiúnta (dá dtagraítear san Iarscríbhinn) nach mór a sholáthar i ndáil le cuairt ar chalafort.
Ionad ilfhreastail muirí náisiúnta. Ardán teicniúil atá bunaithe agus a oibrítear ar bhonn náisiúnta chun faisnéis a fháil, a mhalartú agus a chur ar aghaidh go leictreonach chun oibleagáidí um thuairisciú a chomhlíonadh, lena n–áirítear bainistíocht ar chearta rochtana, modúl comhéadain chomhchuibhithe tuairiscithe agus comhéadan grafach úsáideora, chomh maith le naisc le córais agus bunachair shonraí na n–údarás ábhartha ar an leibhéal náisiúnta agus ar leibhéal AE.

PRÍOMHDHOICIMÉAD

Rialachán (AE) 2019/1239 ó Pharlaimint na hEorpa agus ón gComhairle an 20 Meitheamh 2019 lena mbunaítear timpeallacht Eorpach Ionaid Ilfhreastail Mhuirí agus lena aisghairtear Treoir 2010/65/AE (IO L 198, 25.7.2019, lgh. 64–87).

DOICIMÉID GHAOLMHARA

Rialachán Tarmligthe (AE) 2023/205 ón gCoimisiún an 7 Samhain 2022 lena bhforlíontar Rialachán (AE) 2019/1239 a mhéid a bhaineann le tacar sonraí na timpeallachta Eorpaí Ionaid Ilfhreastail Mhuirí agus lena leasaítear an Iarscríbhinn a ghabhann leis (IO L 33, 3.2.2023, lgh. 24–230).

Rialachán Cur Chun Feidhme (AE) 2023/204 gCoimisiún an 28 Deireadh Fómhair 2022 lena leagtar síos na sonraíochtaí teicniúla, caighdeáin agus nósanna imeachta maidir leis an timpeallacht Eorpach Ionaid Ilfhreastail Mhuirí de bhun Rialachán (AE) 2019/1239 ó Pharlaimint na hEorpa agus ón gComhairle (IO L 33, 3.2.2023, lgh. 1–23).

Rialachán (AE) Uimh. 910/2014 ó Pharlaimint na hEorpa agus ón gComhairle an 23 Iúil 2014 maidir le ríomh–shainaitheantas agus seirbhísí iontaoibhe le haghaidh ríomh–idirbheart sa mhargadh inmheánach agus lena n–aisghairtear Treoir 1999/93/CE (IO L 257, 28.8.2014, lgh. 73–114).

Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custam an Aontais (athmhúnlú) (IO L 269, 10.10.2013, lgh. 1–101).

Rinneadh leasuithe comhleanúnacha ar Rialachán (AE) Uimh. 952/2013 a chorprú sa bhuntéacs. Níl ach luach doiciméadach ag an leagan comhdhlúite.

Treoir 2010/65/AE ó Pharlaimint na hEorpa agus ón gComhairle an 20 Deireadh Fómhair 2010 maidir le foirmiúlachtaí tuairiscithe le haghaidh long atá ag teacht isteach i gcalafoirt na mBallstát agus/nó ag imeacht ó chalafoirt na mBallstát agus lena n–aisghairtear Treoir 2002/6/CE (IO L 283, 29.10.2010, lgh. 1–10).

Féach an leagan comhdhlúite.

Nuashonraithe 21.04.2023

Top