Kartiera Ewropea tal-Identità Diġitali

PUNTI EWLENIN

Il-qafas Ewropew għall-identità diġitali

Il-qafas Ewropew għall-identità diġitali jinkludi tliet konfigurazzjonijiet.

• Kartiera Ewropea tal-Identità Diġitali. il-persuni fiżiċi u ġuridiċi kollha ser ikunu jistgħu jidentifikaw lilhom infushom permezz ta’ apparat mobbli biex jaċċessaw servizzi pubbliċi u privati madwar l-Ewropa kollha, waqt li jibqa’ jkollhom kontroll sħiħ tad-data tagħhom stess.
• Rikonoxximent reċiproku tal-iskemi elettroniċi ta’ identifikazzjoni. Kull Stat Membru ser jaċċetta mezzi elettroniċi ta’ identifikazzjoni minn Stati Membri oħra għal awtentifikazzjoni transkonfinali biex jaċċessaw servizz pubbliku.
• Servizzi fiduċjarji. Dawn jinkludu qafas legali għal servizzi bħal firem elettroniċi, siġilli u kronogrammi, flimkien ma’ lista ta’ servizzi fiduċjarji ġodda bħall-ġestjoni ta’ apparati tal-ħolqien ta’ firma elettronika mill-bogħod kwalifikata, il-ġestjoni ta’ apparati għall-ħolqien ta’ siġilli elettroniċi mill-bogħod kwalifikati,il-ħruġ ta’ attestazzjoni elettronika kwalifikata ta’ attributi, servizzi ta’ arkivjar elettroniku kwalifikat u reġistri elettroniċi kwalifikati, li jassikuraw li tranżazzjonijiet ikunu sikuri, siguri u affidabbli.

Il-Kartiera Ewropea tal-Identità Diġitali

Il-Kartiera Ewropea tal-Identità Diġitali hi mezz ta’ identifikazzjoni elettronika li tippermetti li utent jaħżen, jiġġestjona u jivvalida b’mod sigur id-data ta’ identifikazzjoni ta’ persuna u attestazzjonijiet elettroniċi ta’ attributi Il-persuni li jużaw il-kartiera f’kapaċità personali ser ikunu jistgħu jiffirmaw b’mod elettroniku l-validità legali, mingħajr ebda ħlas.

Il-karatteristiċii tagħha jinkludu dawn li ġejjin:

• Rabta ma’ identitajiet diġitali nazzjonali. Il-kartieri jistgħu jkunu marbuta mal-identitajiet diġitali nazzjonali tal-utenti.
• Awtentifikazzjoni. L-utenti jistgħu jawtentifikaw online kif ukoll offline, u jassikuraw li d-data tkun maqsuma biss b’mod selettiv.
• Prova ta’ attributi personali. L-utenti jistgħu jixxerjaw dokumenti diġitali, bħal liċenzji tas-sewqan, dokumenti tal-ivvjaġġar, akkademiċi u kwalifiki vokazzjonali u dokumenti tal-kont bankarju.
• Kontroll tad-data. L-utenti jistgħu jagħżlu liema aspetti tal-identità u data tagħhom huma jaqsmu ma’ partijiet terzi u jiġġestjonaw (pereżempju jitolbu, jaħżnu, jaqsmu jew iħassru) id-data tagħhom stess.
• Ġenerazzjoni ta’ psewdonimu. Għal aktar privatezza, l-utenti jistgħu jiġġeneraw psewdonimi kkriptjati maħżuna lokalment ġol-kartiera.
• Konnessjonijiet siguri. Il-kartiera tħalli qsim dirett u sigur ta’ data, u awtentifikazzjoni ma’ Kartieri Ewropej tal-Identità Diġitali.
• Trasparenza. L-utenti jistgħu jaċċessaw reġistru tat-tranżazzjoni, jaraw dashboard komuni u jużaw firem elettroniċi kwalifikati.

Sors miftuħ u sigurtà

Għal trasparenza sħiħa, is-software tal-applikazzjoni tal-kartiera hu liċenzjat sors miftuħ. Waqt li ċerti komponenti jistgħu jibqgħu mhux mikxufa għal raġuniijiet ta’ sigurtà, dan l-approċċ ta’ sors miftuħ għandu l-għan li jrawwem il-fiduċja u l-innovazzjoni madwar il-qafas kollu.

Salvagwardji u aċċessibiltà

• Użu volontarju. Il-kartiera tibqa’ fakultattiva għal kollox għaċ-ċittadini kollha, bi protezzjonijiet robusti kontra diskriminazzjoni għal dawk li jagħżli li ma jużawhiex.
• Ebda spejjeż moħbija. Il-ħruġ ta’ kartiera, l-użu u l-verifika tagħha huma bla ħlas għall-individwi, bl-Istati Membri jkopru l-ispejjeż tal-validazzjoni biex jiggarantixxu li l-kartiera tibqa’ aċċessibbli.
• Limiti stretti tal-ipproċessar tad-data. L-ipproċessar tad-data hu maħsub li jkun limitat għal dak li hu neċessarju biex il-kartiera tiffunzjona. Ebda data personali addizzjonali ma tista’ tkun aċċessata jew maħżuna mill-fornituri tal-kartiera.

Konformità u akkontabilità

Standards rigorużi għal reġistrazzjoni, monitoraġġ ui validazzjoni jassikuraw li biss entitajiet verifikati jużaw il-kartiera. Partijiet dipendenti¹ li joffru servizzi permezz tal-kartiera ser jirreġistraw fi ħdan l-Istat Membru tagħhom, u jżommu akkontabilità u traċċabilità.