Sabiex tikseb l-għan ewlieni tagħha li żżomm stabbiltà fil-prezzijiet għaż-żona tal-euro kollha, l-Eurosistema tuża sett ta’ strumenti u proċeduri tal-politika monetarja. Dawn jipprovdu l-qafas operazzjonali għall-implimentazzjoni tad-deċiżjonijiet tal-politika monetarja fil-prattika.
Il-linja gwida fiha revoli dwar l-istrumenti u l-proċeduri tal-politika monetarja tal-Eurosistema.
L-istrumenti tal-politika monetarja huma:
operazzjonijiet tas-suq miftuħ, li għandhom l-għan li jmexxu r-rati tal-imgħax, jirregolaw il-provvista tal-flus fis-suq finanzjarju u jindikaw il-pożizzjoni tal-politika monetarja fiż-żona tal-euro;
faċilitajiet permanenti, li għandhom l-għan li jipprovdu u jassorbu l-likwidità mil-lum għal għada;
rekwiżiti minimi ta’ riżerva (l-ammont minimu ta’ riżervi li bank kummerċjali għandu jżomm mal-bank ċentrali nazzjonali (BĊN) tagħhom), li huma speċifikati fir-Regolament (KE) Nru 2531/98 u r-Regolament (UE) 2021/378 (ara s-sommarju rilevanti).
L-operazzjonijiet tas-suq miftuħ tal-Eurosistema huma eżegwiti permezz ta’ proċeduri ta’ sejħa għall-offerti1 jew permezz ta’ proċeduri bilaterali, meta l-BĊN, jew, jekk xieraq, il-Bank Ċentrali Ewropew (BĊE), jittrattaw direttament ma’ kontroparti2 waħda jew aktar, jew permezz ta’ boroż jew aġenti tas-suq, mingħajr l-użu ta’ proċeduri tal-offerti.
Kontropartijiet eliġibbli
Kontropartijiet għall-operazzjonijiet tal-politika monetarja3 tal-Eurosistema għandhom jissodisfaw il-kriterji li ġejjin biex jipparteċipaw f’dawn l-operazzjonijiet:
jissodisfaw ir-rekwiżiti tar-riżervi minimi tal-Eurosistema;
ikunu mħarsa mill-awtoritajiet rilevanti skont id-Direttiva 2013/36/EU dwar is-superviżjoni prudenzjali ta’ istituzzjonijiet ta’ kreditu (ara s-sommarju) u r-Regolament (UE) Nru 575/2013 dwar ir-rekwiżiti prudenzjali għall-istituzzjonijiet ta’ kreditu (ara s-sommarju);
ikunu sodi finanzjarjament;
jissodisfaw ir-rekwiżiti kuntrattwali u regolatorji kollha speċifikati mill-BĊE jew mill-BĊN.
Assi eliġibbli
Biex jieħdu sehem fl-operazzjonijiet ta’ kreditu tal-Eurosistema, il-kontropartijiet għandhom jipprovdu lill-Eurosistema b’assi li huma aċċettati bħala kollateral għal operazzjonijiet bħal dawn. Ir-regoli dwar il-mobilizzazzjoni u l-ġestjoni tal-kollateral huma stabbiliti fil-Linja Gwida UE) 2024/3129 tal-Bank Ċentrali Ewropew (BĊE/2024/22).
Sanzjonijiet għal nuqqas ta’ konformità mal-obbligi tal-kontropartijiet
L-Eurosistema tista’ timponi sanzjonijiet, kemm finanzjarji kif ukoll mhux finanzjarji, fuq kontropartijiet li jonqsu milli jissodisfaw ir-rekwiżiti minimi tar-riżerva jew milli jikkonformaw mar-regoli operattivi.
Miżuri diskrezzjonali
L-Eurosistema tista’ tagħżel li tagħmel dan li ġej f’każ ta’ tħassib dwar is-solidità finanzjarja tal-kontroparti jew tħassib ieħor ġustifikat:
tissospendi, tillimita jew teskludi, abbażi tal-kawtela, l-aċċess ta’ kontroparti għall-operazzjonijiet tal-politika monetarja tagħha, inkluż meta r-rekwiżiti tal-fondi proprji ma jiġux issodisfati jew informazzjoni dwar il-kapital jew il-proporzjonijiet ta’ ingranaġġ mhuwiex komplut jew ma jsirx disponibbli;
tirrifjuta jew tillimita l-użu ta’ assi jekk tqis li kwistjoni, emittent, debitur jew garanti jonqos milli jissodisfa r-rekwiżiti tal-kwalità ta’ kreditu tas-sistema jew jekk kwalunkwe kontroparti tkun soġġetta għal miżuri restrittivi jew l-aċċess tagħha għall-operazzjonijiet tal-politika monetarja tal-Eurosistema jkun ġie sospiż, limitat jew eskluż;
tillimita l-aċċess tal-kontropartijiet għall-operazzjonijiet tal-politika monetarja tal-Eurosistema jekk jitqiesu mill-awtoritajiet rilevanti li “qed ifallu jew x’aktarx li jfallu”.
Il-linja gwida fiha wkoll għadd ta’ regoli li jirregolaw l-arranġamenti kuntrattwali jew regolatorji tal-BĊN komuni għall-operazzjonijiet kollha tal-politika monetarja tal-Eurosistema, il- qsim ta’ informazzjoni u l-konformità mal-leġiżlazzjoni dwar il-ġlieda kontra l-ħasil tal-flus u l-ġlieda kontra l-finanzjament tat-terroriżmu.
MINN META TAPPLIKA L-LINJA GWIDA?
Il-linja gwida ilha tapplika mill-, minbarra l-Artikolu 142 (appoġġ ta’ likwidità fir-rigward ta’ titoli ggarantiti b’assi), li ilu japplika mill-.
SFOND
Skont l-Artikolu 127(1) tat-Trattat dwar il-Funzjonament tal-Unjoni Ewropea, l-objettiv tas-Sistema Ewropea ta’ Banek Ċentrali (SEBĊ) huwa li żżomm stabbiltà fil-prezzijiet.
L-Artikolu 127(2) tat-trattat jiddikjara li l-kompiti bażiċi tas-SEBĊ huma li:
jiddefinixxu u jimplimentaw l-politika monetarja tal-UE;
imexxu operazzjonijiet ta’ kambju internazzjonali;
iżommu u jiġġestixxu r-riżervi uffiċjali tal-muniti barranin tal-Istati Membri;
jippromwovu l-funzjonament bla intoppi tas-sistemi tal-pagamenti.
L- istatut tas-SEBĊ u tal-BĊE jipprevedi li:
il-BĊE u l-BĊN jistgħu jwettqu operazzjonijiet tas-suq miftuħ u ta’ kreditu;
il-BĊE jista’ jirrikjedi lill-istituzzjonijiet ta’ kreditu stabbiliti fl-Istati Membri jżommu riżervi minimi fil-kontijiet tagħhom mal-BĊE u mal-BĊNi skont l-għanijiet tal-politika monetarja.
TERMINI EWLENIN
Proċedura ta’ sejħa għall-offerti. Proċedura li biha l-Eurosistema tipprovdi likwidità lil, jew tirtira l-likwidità mis-suq fejn il-BĊN jidħol fi tranżazzjonijiet billi jaċċetta offerti sottomessi mill-kontropartijiet wara tħabbir pubbliku.
Kontroparti. Istituzzjoni li tissodisfa l-kriterji ta’ eliġibbiltà tal-Eurosistema biex taċċessa l-operazzjonijiet tal-politika monetarja tagħha.
Operazzjonijiet tal-politika monetarja. Operazzjonijiet tas-suq miftuħ u faċilitajiet permanenti.
DOKUMENT PRINĊIPALI
Il-linji gwida (UE) 2015/510 tal-Bank Ċentrali Ewropew tad- dwar l-implimentazzjoni tal-qafas tal-politika monetarja tal-Eurosistema (BĊE/2014/60) (riformulazzjoni) (ĠU L 91, , pp. 3–135).
Emendi suċċessivi għal-Linja Gwida (UE) 2015/510 ġew inkorporati fit-test oriġinali. Din il-verżjoni konsolidata għandha valur dokumentarju biss.
DOKUMENTI RELATATI
Il-linji gwida (UE) 2024/3129 tal-Bank Ċentrali Ewropew tat- dwar il-ġestjoni ta’ kollateral f’operazzjonijiet ta’ kreditu tal-Eurosistema (BĊE/2024/22) (ĠU L, 024/3129, ).
Verżjoni konsolidata tat-Trattat dwar il-Funzjonament tal-Unjoni Ewropea — It-Tielet Parti — Politiki u azzjonijiet interni tal-Unjoni — Titolu VIII — Politika ekonomika u monetarja — Kapitolu 2 — Politika monetarja — l-Artikolu 127 (ex Artikolu 105 TKE) (ĠU C 202, , pp. 102–103).
Verżjoni konsolidata tat-Trattat dwar il-Funzjonament tal-Unjoni Ewropea — Protokoll (Nru 4) dwar l-Istatuti tas-Sistema Ewropea ta’ Banek Ċentrali u tal-Bank Ċentrali Ewropew (ĠU C 202, , pp. 230–250).
Ir-Regolament (UE) Nru 575/2013 tal-Parlament Ewropew u tal-Kunsill tas- dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (ĠU L 176, , pp. 1–337).
Id-Direttiva 2013/36/UE tal-Parlament Ewropew u tal-Kunsill tas- dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE (ĠU L 176, , pp. 338–436).
Ir-Regolament tal-Kunsill (KE) Nru 2531/98 tat- li għandu x’jaqsam mal-applikazzjoni ta’ riżervi minimi tal-Bank Ċentrali Ewropew (ĠU L 318, , pp. 1–3).