Miżuri restrittivi tal-UE kontra l-proliferazzjoni u l-użu ta’ armi kimiċi

SOMMARJU TA’:

Id-Deċiżjoni (PESK) 2018/1544 — miżuri restrittivi kontra l-proliferazzjoni u l-użu ta’ armi kimiċi

Ir-Regolament (UE) 2018/1542 — miżuri restrittivi kontra l-proliferazzjoni u l-użu ta’ armi kimiċi

X’INHU L-GĦAN TAR-REGOLAMENT U TAD-DEĊIŻJONI?

Flimkien, id-deċiżjoni (adottata fil-kuntest tal-politika estera u ta’ sigurtà komuni tal-UE) u r-regolament (adottat fuq il-bażi tal-Artikolu 215 tat-Trattat dwar il-Funzjonament tal-Unjoni Ewropea (TFUE)) jintroduċu reġim ġdid tal-UE għal sanzjonijiet “tematiċi”, biex tiġi miġġielda t-theddida mill-użu u l-proliferazzjoni ta’ armi kimiċi*.

Id-deċiżjoni tobbliga lill-pajjiżi tal-UE biex jimponu projbizzjoni fuq l-ivvjaġġar mal-UE kollha u tipprevedi ffriżar tal-assi mmirat lejn l-individwi, l-entitajiet jew il-korpi involuti fl-iżvilupp u l-użu ta’ armi kimiċi.
Ir-regolament jimplimenta dawk il-miżuri li jaqgħu taħt it-TFUE, b’mod partikolari l-iffriżar tal-assi.
Dawn il-miżuri jikkontribwixxu għall-isforzi tal-UE biex tindirizza l-proliferazzjoni u l-użu ta’ armi kimiċi u l-isforzi tagħha biex tappoġġja l-Organizzazzjoni għall-Projbizzjoni ta’ Armi Kimiċi (OPCW) u s-Segretarjat Tekniku tagħha.

PUNTI EWLENIN

Id-Deċiżjoni (PESK) 2018/1544

Id-deċiżjoni tirrikjedi li l-pajjiżi tal-UE jipprevjenu d-dħul fi jew it-tranżitu mit-territorju tagħhom ta’ persuni u entitajiet fil-mira li huma direttament responsabbli għall-iżvilupp u l-użu ta’ armi kimiċi, kif ukoll dawk li jipprovdu appoġġ finanzjarju, tekniku jew materjali, u dawk li jassistu, jinkoraġġixxu u li huma assoċjati magħhom.

Huma permessi xi eċċezzjonijiet inkluż, pereżempju:

pajjiż tal-UE mhuwiex obbligat li jirrifjuta d-dħul fit-territorju tiegħu ta’ ċittadini tiegħu stess;
pajjiż tal-UE li jkun marbut b’obbligu tad-dritt internazzjonali, bħal pajjiż li jospita organizzazzjoni intergovernattiva internazzjonali;
pajjiż tal-UE li huwa pajjiż ospitanti tal-Organizzazzjoni għas-Sigurtà u l-Kooperazzjoni fl-Ewropa.

Il-pajjiżi tal-UE għandhom jiffriżaw kwalunkwe fond u riżorsa ekonomika* li jappartjenu għal, li huma miżmuma jew ikkontrollati minn persuni jew entitajiet fil-mira. Eċċezzjonalment, huma jistgħu jawtorizzaw ir-rilaxx ta’ wħud minn dawn il-fondi jekk, pereżempju, dawn ikunu meħtieġa:

għall-ħtiġijiet bażiċi tal-individwu jew l-entità fil-mira;
għall-ħlas ta’ servizzi legali;
għall-ħlas ta’ tariffi jew imposti ta’ servizzi ta’ kustodja jew ġestjoni normali ta’ fondi jew riżorsi ekonomiċi ffriżati;
biex tiġi ssodisfata deċiżjoni tal-qorti jew arbitrali li tippreċedi l-iffriżar tal-assi.

Il-pajjiżi tal-UE għandhom jinnotifikaw lill-pajjiżi l-oħra tal-UE u lill-Kummissjoni Ewropea f’dawn il-każijiet.

Il-Kunsill huwa responsabbli għat-tfassil u l-emendar tal-lista ta’ individwi u entitajiet fil-mira fl-anness għad-deċiżjoni Il-Kunsill għandu jaġixxi b’unanimità abbażi ta’ proposta jew minn pajjiż tal-UE jew mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà.

Il-Kunsill imbagħad jikkomunika d-deċiżjoni tiegħu lill-individwu(i) jew lill-entità(ajiet) fil-mira jew direttament (jekk l-indirizz tagħhom ikun magħruf) jew indirettament permezz tal-pubblikazzjoni ta’ avviż.

Regolament (UE) 2018/1542

Ir-regolament:

jikkomplementa d-deċiżjoni u jistabbilixxi serje ta’ definizzjonijiet;
jirrikjedi li l-fondi u r-riżorsi ekonomiċi kollha li jappartjenu għal, li huma miżmuma jew ikkontrollati minn kwalunkwe individwu jew korp fil-mira identifikat mill-Kunsill u elenkat fl-Anness I jiġu ffriżati.
jistabbilixxi l-każijiet eċċezzjonali fejn ċerti fondi ffriżati jistgħu jiġu rilaxxati u l-kundizzjonijiet għandhom jiġu ssodisfati — ara hawn fuq fir-rigward tad-Deċiżjoni (PESK) 2018/1544.

L-istituzzjonijiet finanzjarji jew ta’ kreditu li jirċievu fondi ttrasferiti minn partijiet terzi fil-kont ta’ individwu jew korp elenkat jistgħu jikkreditaw il-kontijiet iffriżati, iżda kwalunkwe żieda f’dawn il-kontijiet se tiġi ffriżata wkoll. L-istituzzjoni għandha tinforma lill-awtorità kompetenti rilevanti bi kwalunkwe tranżazzjoni ta’ dan it-tip mingħajr dewmien.

L-iffriżar ta’ fondi u riżorsi ekonomiċi jew ir-rifjut li tali fondi jew riżorsi ekonomiċi jsiru disponibbli, imwettaq bona fide fuq il-bażi li tali azzjoni tkun konformi ma’ dan ir-regolament, ma għandux joħloq responsabbiltà ta’ kwalunkwe tip min-naħa tal-individwu jew tal-korp li jkun qed jimplimentah, jew tad-diretturi jew l-impjegati tiegħu, sakemm ma jiġix ippruvat li l-fondi u r-riżorsi ekonomiċi ġew iffriżati jew miżmuma b’riżultat ta’ negliġenza.

Kwalunkwe għarfien jew involviment intenzjonali fl-attivitajiet biex jiġu evitati l-miżuri (projbizzjoni fuq l-ivvjaġġar u/jew iffriżar tal-assi) huwa pprojbit.

Ir-regolament japplika:

fi ħdan it-territorju tal-UE, inkluż fl-ispazju tal-ajru tagħha;
abbord kull inġenju tal-ajru jew kull bastiment fil-ġurisdizzjoni ta’ pajjiż tal-UE;
għal kull individwu fit-territorju jew barra mit-territorju tal-UE li jkun ċittadin ta’ pajjiż tal-UE;
għal kull individwu jew korp, fit-territorju jew barra mit-territorju tal-UE, li jkun inkorporat jew kostitwit skont il-liġi ta’ pajjiż tal-UE;
għal kull persuna ġuridika, entità jew korp fir-rigward ta’ kwalunkwe kummerċ imwettaq, kollu kemm hu jew parti minnu, fl-UE.

MINN META JAPPLIKAW ID-DEĊIŻJONI U R-REGOLAMENT?

Id-deċiżjoni u r-regolament ilhom japplikaw mis-16 ta’ Ottubru 2018.

SFOND

Ir-reġim il-ġdid ta’ miżuri restrittivi, jew ta’ sanzjonijiet, ġie adottat mill-UE fil-15 ta’ Ottubru 2018 bħala segwitu għall-konklużjonijiet tal-Kunsill tal-Ewropa ta’ Ġunju 2018, li talab l-adozzjoni malajr kemm jista’ jkun ta’ reġim ġdid ta’ miżuri restrittivi tal-UE biex jiġu indirizzati l-użu u l-proliferazzjoni ta’ armi kimiċi.

L-ewwel sanzjonijiet taħt ir-reġim il-ġdid ġew introdotti f’Jannar 2019 li rriżultaw fl-emenda tad-deċiżjoni u tar-regolament (ara “Dokumenti relatati”).

TERMINI EWLENIN

Armi kimiċi: l-armi kimiċi kif iddefinit fil-Konvenzjoni dwar l-Armi Kimiċi (CWC), huma dawn li ġejjin, meħuda flimkien jew separatament:

(a) sustanzi tossiċi u l-prekursuri tagħhom, ħlief meta jkunu maħsuba għal skopijiet li mhumiex ipprojbiti skont din il-Konvenzjoni, dment li t-tipi u l-kwantitajiet ikunu konsistenti ma’ dawn l-iskopijiet;

(b) munizzjon u apparat, iddiżinjati speċifikament biex jikkawżaw mewt jew ħsara oħra permezz tal-proprjetajiet tossiċi ta’ dawk is-sustanzi tossiċi speċifikati fis-subparagrafu (a), li jiġu rilaxxati bħala riżultat tat-tħaddim ta’ tali munizzjon u apparat;

(c) kwalunkwe tagħmir iddiżinjat speċifikament għall-użu b’konnessjoni diretta mat-tħaddim ta’ munizzjon u apparat speċifikati fis-subparagrafu (b).

Riżorsi ekonomiċi: assi ta’ kwalunkwe tip, kemm tanġibbli kif ukoll intanġibbli, mobbli jew immobbli, li mhumiex fondi, iżda li jistgħu jintużaw biex jinkisbu fondi, oġġetti jew servizzi.

DOKUMENTI EWLENIN

Id-Deċiżjoni tal-Kunsill (PESK) 2018/1544 tal-15 ta’ Ottubru 2018 li tikkonċerna miżuri restrittivi kontra l-proliferazzjoni u l-użu ta’ armi kimiċi (ĠU L 259, 16.10.2018, pp. 25-30)

Emendi suċċessivi għad-Deċiżjoni tal-Kunsill (PESK) 2018/1544 ġew inkorporati fit-test oriġinali. Din il-verżjoni konsolidata hija ta’ valur dokumentarju biss.

Ir-Regolament tal-Kunsill (UE) 2018/1542 tal-15 ta’ Ottubru 2018 li jikkonċerna miżuri restrittivi kontra l-proliferazzjoni u l-użu ta’ armi kimiċi (ĠU L 259, 16.10.2018, pp. 12-21)

Ara l-verżjoni konsolidata.

DOKUMENTI RELATATI

Ir-Regolament ta’ Implimentazzjoni tal-Kunsill (UE) 2019/84 tal-21 ta’ Jannar 2019 li jimplimenta r-Regolament (UE) 2018/1542 li jikkonċerna miżuri restrittivi kontra l-proliferazzjoni u l-użu ta’ armi kimiċi (ĠU L 18I, 21.1.2019, pp. 1-3)

Id-Deċiżjoni tal-Kunsill (PESK) 2019/86 tal-21 ta’ Jannar 2019 li temenda d-Deċiżjoni (PESK) 2018/1544 li tikkonċerna miżuri restrittivi kontra l-proliferazzjoni u l-użu ta’ armi kimiċi (ĠU L 18I, 21.1.2019, pp. 10-12)

Verżjoni konsolidata tat-Trattat dwar il-Funzjonament tal-Unjoni Ewropea — Parti Ħamsa — L-azzjoni esterna tal-Unjoni — Titolu IV — Miżuri restrittivi — Artikolu 215 (ex Artikolu 301 TEC) (ĠU C 202, 7.6.2016, p. 144)

l-aħħar aġġornament 05.04.2019