Is-sistema eCall immuntata fil-vettura — approvazzjoni tat-tip

PUNTI EWLENIN

Dan ir-regolament japplika għal:

• karozzi (kategorija M1 — karozzi tal-passiġġieri li ma jkunx fihom iktar minn tmien sedili minbarra s-sedil tas-sewwieq);
• vetturi kummerċjali ħfief (kategorija N1 — vetturi użati biex jittrasportaw merkanzija b’massa massima li ma taqbiżx it-3.5 tunnellati).

L-obbligi tal-manifatturi

It-tipi kollha ġodda tal-vetturi għandhom:

• ikunu mgħammra b’sistema eCall fil-vettura bbażata fuq in-numru 112 installata b’mod permanenti;
• ikunu magħmula b’tali mod li:
  • jekk ikun hemm inċident gravi, individwat permezz tas-sensuri jew proċessuri tal-vetturi, eCall lin-numru ta’ emerġenza 112 tiġi attivata b’mod awtomatiku,
  • il-faċilità tal-eCall tista’ wkoll tiġi attivata manwalment;
• iwissu lill-okkupanti tal-vettura jekk ikun hemm falliment kritiku tas-sistema li ma tħallihomx jużaw is-sistema tal-eCall,
• jiżguraw li r-riċevituri għas-sistemi eCall huma kompatibbli ma’ Galileo u mas-sistemi ta’ navigazzjoni bis-satellita EGNOS.

Rekwiżiti tekniċi u proċeduri tat-test

Permezz ta’ att delegat, il-Kummissjoni Ewropea adottat ir-Regolament Delegat (UE) 2017/79. Dan ir-regolament jissuplimenta u jemenda r-Regolament (UE) 2015/758 fl-istabbiliment ta’ rekwiżiti tekniċi dettaljati u proċeduri ta’ testijiet għall-approvazzjoni tat-tip tal-KE ta’ vetturi bil-mutur fir-rigward tas-sistemi tagħhom tal-eCall ibbażata fuq 112 fil-vettura, unitajiet tekniċi separati u komponenti.

Privatezza u protezzjoni tad-data

Kwalunkwe data personali pproċessata permezz tas-sistema eCall trid tikkonforma mar-regoli tal-UE dwar il-protezzjoni tad-data u l-privatezza (ara s-sommarju). Ir-regolament jistabbilixxi wkoll għadd ta’ regoli speċifiċi, inkluż:

• id-data personali tintuża biss biex tiġi ttrattata emerġenza, tinżamm biss sakemm ikun hemm bżonnha biex tiġi ttratta l-emerġenza, u mbagħad titħassar;
• il-manifatturi jiżguraw li s-sistema ma hijiex traċċabbli jew soġġetta għal segwiment kontinwu;
• id-data tal-memorja interna tas-sistema hija mħassra kontinwament u awtomatikament;
• l-informazzjoni dwar l-użu tad-data personali hija inkluża fil-manwal tas-sewwieq.

Mill-31 ta’ Marzu 2018, l-approvazzjoni tat-tip KE se tingħata biss lil vetturi u sistemi tal-eCall li jikkonformaw ma’ dan ir-regolament.