Il-monitoraġġ tal-kummerċ fil-prekursuri tad-drogi fl-Unjoni Ewropea

PUNTI EWLENIN

• Ir-Regolament jiddistingwi bejn sustanzi skedati u sustanzi mhux skedati⁵ sustanzi.
• Hemm tliet kategoriji ta’ sustanzi skedati fl-Anness I tar-regolament.
  • Kategorija 1: l-aktar sustanzi sensittivi, li minnhom jistgħu jiġu prodotti drogi illeċiti bl-aktar mod faċli (eż. 1-phenyl-2-propanone, efedrina, piperonal).
  • Kategorija 2: sustanzi inqas sensittivi (eż. sottokategorija 2A: anidride aċetiku; sottokategorija 2B:phenylacetic acid, anthranilic acid, piperidine u potassju permanganat).
  • Kategorija 3: sustanzi kimiċi bl-ingrossa, li jista’ jkollhom tipi differenti ta’ użi fil-proċess ta’ manifattura (eż. aċeton, aċidu idrokloriku).

Obbligi tal-operaturi

• Operaturi li jixtiequ jqiegħdu sustanzi ta’ kategorija 1 u 2 fis-suq għandhom:
  • jaħtru uffiċjal responsabbli għall-kummerċ ta’ sustanzi skedati;
  • jinnotifikaw jew jaġġornaw lill-awtoritajiet nazzjonali kompetenti bid-dettalji tal-uffiċjal.
• Dawn għandhom jiddokumentaw u jittikkettaw it-tranżazzjonijiet kollha u jżommu r-rekords għal 3 snin.

Liċenzja għas-sustanzi tal-kategorija 1

• L-operaturi u l-utenti għandhom jiksbu liċenzja mill-awtoritajiet rilevanti tal-Istat Membru tal-UE li fih huma bbażati qabel ma jkunu jistgħu jippossjedu jew iqiegħdu fis-suq sustanzi ta’ kategorija 1. L-awtoritajiet rilevanti jistgħu jagħtu liċenzji speċjali lill-ispiżeriji, lill-ispiżeriji tal-mediċina veterinarja, lil ċerti tipi ta’ awtoritajiet pubbliċi jew lill-forzi armati.
• Operatur li jkollu liċenzja jista’ jipprovdi biss sustanzi tal-kategorija 1 lill-operaturi jew lill-utenti li jkollhom ukoll liċenzja u li jkunu ffirmaw dikjarazzjoni tal-konsumatur (ara hawn taħt).
• Qabel ma jagħtu liċenzja, l-awtoritajiet rilevanti għandhom jivverifikaw il-kompetenza u l-integrità tal-applikant.
• Il-liċenzja tista’ tiġi sospiża jew revokata mill-awtoritajiet meta jkun hemm bażi raġonevoli biex wieħed jemmen li d-detentur m’għadux persuna kompetenti u idonea biex ikollu liċenzja, jew li l-kundizzjonijiet li taħthom ingħatat il-liċenzja m’għadhomx sodisfatti.

Reġistrazzjoni għal sustanzi tal-kategorija 2

• L-operaturi għandhom jiksbu reġistrazzjoni mill-awtoritajiet rilevanti tal-Istat Membru fejn huma stabbiliti qabel ma jqiegħdu fis-suq sustanzi ta’ kategorija 2.
• Mill-1 ta’ Lulju 2015, l-utenti għandhom jiksbu reġistrazzjoni mill-awtoritajiet tal-Istat Membru fejn huma stabbiliti qabel ma jipposjedu sustanzi tas-sottokategorija 2A. L-awtoritajiet jistgħu jagħtu reġistrazzjonijiet speċjali lill-ispiżeriji, lill-ispiżeriji tal-mediċina veterinarja, lil ċerti tipi ta’ awtoritajiet pubbliċi jew lill-forzi armati.
• Kwalunkwe operatur li jkollu reġistrazzjoni jista’ jipprovdi biss sustanzi tas-sottokategorija 2A lil operaturi jew utenti oħra li jkollhom ukoll reġistrazzjoni u li jkunu ffirmaw dikjarazzjoni tal-konsumatur (ara hawn taħt).

Ir-regoli ddettaljati dwar l-għoti ta’ liċenzji u reġistrazzjonijiet huma stabbiliti fir-Regolament (UE) 2015/1011.

Dikjarazzjoni tal-konsumatur

• L-operaturi kollha li jfornu lil konsumatur b’sustanza ta’ kategorija 1 jew 2 għandhom jiksbu dikjarazzjoni mingħand il-konsumatur li turi l-użu speċifiku jew l-użi speċifiċi tas-sustanzi skedati. Hija meħtieġa dikjarazzjoni separata għal kull sustanza skedata.
• Operatur li jipprovdi sustanzi tal-kategorija 1 għandu jittimbra u jniżżel id-data tal-kopja tad-dikjarazzjoni, u jiċċertifika li din tkun kopja vera tal-oriġinal. Din il-kopja għandha dejjem takkumpanja s-sustanzi li qed jiġu mċaqalqa fi ħdan l-UE u għandha tiġi ppreżentata lill-awtoritajiet fuq talba.

Notifika tal-awtoritajiet

L-operaturi għandhom:

• jinnotifikaw lill-awtoritajiet kompetenti immedjatament dwar kwalunkwe ċirkostanza, bħal ordnijiet jew tranżazzjonijiet mhux tas-soltu li jissuġġerixxu li s-sustanzi jistgħu jiġu ddevjati għall-manifattura illeċita ta’ drogi narkotiċi jew sustanzi psikotropiċi;
• jipprovdu lill-awtoritajiet kompetenti l-informazzjoni rilevanti f’forma ta’ sommarju dwar it-tranżazzjonijiet tagħhom li jinvolvu sustanzi skedati;
• ma jiżvelaw l-ebda data personali miġbura għajr lill-awtoritajiet kompetenti.

L-awtoritajiet rilevanti tal-Istati Membri – segħat u obbligi

• L-Istati Membri għandhom jadottaw miżuri li jippermettu lill-awtoritajiet rilevanti tagħhom iwettqu d-dmirijiet tagħhom ta’ kontroll u monitoraġġ. Dawn jistgħu wkoll jadottaw miżuri li jippermettu lill-awtoritajiet rilevanti tagħhom jikkontrollaw u jimmonitorjaw transazzjonijiet suspettużi li jinvolvu sustanzi mhux skedati. B’mod partikolari, dawn il-miżuri għandhom jinkludu:
  • li jiksbu informazzjoni dwar kwalunkwe ordni għal, jew operazzjonijiet li jinvolvu, sustanzi skedati jew mhux skedati;
  • li jidħlu fil-bini tan-negozju tal-operaturi u tal-utenti biex jiksbu evidenza ta’ irregolaritajiet;
  • fejn meħtieġ, li jżommu u jissekwestraw konsenji li jonqsu milli jikkonformaw ma’ dan ir-regolament jew li jimpedixxu l-użu ta’ sustanzi mhux skedati għall-manifattura illeċita ta’ drogi narkotiċi jew sustanzi psikotropiċi.
• Dawn għandhom jiżguraw li l-awtoritajiet kompetenti jirrispettaw l-informazzjoni kummerċjali kunfidenzjali u jintroduċu u jinfurzaw penali għall-ksur tar-regoli.

Bażi tad-data Ewropea

Ir-Regolament joħloq bażi tad-data Ewropea dwar il-prekursuri tad-droga. Din isservi biex:

• tissimplifika l-proċedura għall-Istati Membri biex jirrapportaw sekwestri u vjeġġi mwaqqfa;
• iżżomm lista ta’ operaturi u utenti liċenzjati jew irreġistrati tal-UE li jinnegozjaw jew jużaw b’mod legali l-prekursuri tad-droga;
• tippermetti lill-operaturi jipprovdu lill-awtoritajiet rilevanti, f’forma ta’ sommarju, l-informazzjoni dwar it-tranżazzjonijiet tagħhom li jinvolvu sustanzi skedati.

Atti ta’ implimentazzjoni u delegati

• Ir-Regolament (UE) 2015/1013 jistabbilixxi regoli dwar il-liċenzjar u r-reġistrazzjoni ta’ operaturi u utenti u l-elenkar tagħhom fil-bażi tad-data Ewropea dwar il-prekursuri tad-droga, il-forniment mill-operaturi ta’ informazzjoni meħtieġa għall-monitoraġġ tal-kummerċ u l-awtorizzazzjoni ta’ esportazzjonijiet u importazzjonijiet fil-qasam tal-prekursuri tad-droga.
• Ir-Regolament (UE) 2015/1011:
  • jistabbilixxi l-kundizzjonijiet għall-għoti ta’ liċenzji u ta’ reġistrazzjonijiet;
  • jiddetermina l-każijiet fejn mhijiex meħtieġa liċenzja jew reġistrazzjoni;
  • jistabbilixxi l-kriterji biex jintwera l-iskop legali ta’ tranżazzjoni;
  • jiddetermina l-informazzjoni meħtieġa għall-monitoraġġ tal-kummerċ; u
  • jispeċifika r-rekwiżiti li jikkonċernaw l-informazzjoni li għandha tiġi pprovduta dwar l-implimentazzjoni tal-miżuri ta’ monitoraġġ fir-rigward tal-kummerċ tal-prekursuri tad-droga.
• Ir-Regolamenti (UE) 2016/1443, (UE) 2018/729 u (UE) 2020/1737 jestendu l-lista ta’ sustanzi ta’ kategorija 1.

Revoka

Ir-Regolament iħassar id-Direttiva 92/109/KEE, id-Direttivi 93/46/KEE, 2001/8/KE u 2003/101/KE u r-Regolamenti (KE) Nru 1485/96u (KE) Nru 1533/2000.