Este documento é um excerto do sítio EUR-Lex
Documento 52014DC0244
COMMUNICATION FROM THE COMMISSION TO THE COUNCIL AND THE EUROPEAN PARLIAMENT The Review of export control policy: ensuring security and competitiveness in a changing world
KOMUNIKAZZJONI TAL-KUMMISSJONI LILL-KUNSILL U LILL-PARLAMENT EWROPEW L-analiżi tal-politika ta' kontroll tal-esportazzjoni: niżguraw sigurtà u kompetittività f'dinja li qed tinbidel
KOMUNIKAZZJONI TAL-KUMMISSJONI LILL-KUNSILL U LILL-PARLAMENT EWROPEW L-analiżi tal-politika ta' kontroll tal-esportazzjoni: niżguraw sigurtà u kompetittività f'dinja li qed tinbidel
/* COM/2014/0244 final */
KOMUNIKAZZJONI TAL-KUMMISSJONI LILL-KUNSILL U LILL-PARLAMENT EWROPEW L-analiżi tal-politika ta' kontroll tal-esportazzjoni: niżguraw sigurtà u kompetittività f'dinja li qed tinbidel /* COM/2014/0244 final */
KOMUNIKAZZJONI
TAL-KUMMISSJONI LILL-KUNSILL U LILL-PARLAMENT EWROPEW L-analiżi tal-politika ta' kontroll
tal-esportazzjoni: niżguraw sigurtà u kompetittività f'dinja li qed
tinbidel
1.
Introduzzjoni
L-UE hija produttur u esportatur ewlieni ta'
oġġetti b'użu doppju u għalhekk attur sinifikanti
fil-kontrolli tal-esportazzjoni fil-ġlieda kontra l-proliferazzjoni.
Is-sistema ta’ kontroll tal-UE fuq l-esportazzjonijiet beda lejn
l-aħħar tas-snin 1990 u ġie msaħħaħ gradwalment
matul l-aħħar għaxar snin, b’mod partikolari b’reazzjoni
għall-Istrateġija tal-UE kontra l-Proliferazzjoni ta’ Armi ta’ Qerda
Massiva (AQM) ta’ Diċembru 2003. Ir-Regolament (KE) Nru 428/2009[1] (minn
issa 'l quddiem "ir-Regolament") jimplimenta impenji internazzjonali
skont ir-Riżoluzzjoni tal-Kunsill tas-Sigurtà tan-Nazzjonijiet Uniti
(UNSCR) 1540(2004), kif ukoll ftehimiet internazzjonali rilevanti u
sistemai ta' kontroll tal-esportazzjoni multilaterali. Ir-Regolament
jippermetti ċ-ċirkolazzjoni libera ta’ oġġetti b’użu
doppju – b’xi eċċezzjonijiet – fl-UE u jistipula prinċipji
bażiċi u regoli komuni għall-kontroll tal-esportazzjoni,
it-trasferiment, is-senserija u t-tranżitu ta’ oġġetti
b’użu doppju. L-Artikolu 25 tar-Regolament jitlob
lill-Kummissjoni biex tanalizza l-implimentazzjoni tiegħu u
tippreżenta proposti għal emendi. Barra minn hekk, għaxar snin
wara l-adozzjoni tal-Istrateġija tal-UE kontra l-proliferazzjoni tad-AQM,
riċentement, il-Kunsill talab li jkun hemm tiftix kontinwu ta’ politika
effikaċi tal-UE kontra l-proliferazzjoni tal-AQM u għal analiżi
u tisħiħ tal-kontrolli tal-esportazzjoni[2]. Bħala l-ewwel pass
lejn it-tħejjija tal-analiżi, il-Kummissjoni ħarġet Green
Paper[3] li varat dibattitu
pubbliku wiesa' dwar is-sistema ta' kontroll tal-esportazzjoni tal-UE u,
f'Jannar 2013, ippubblikat Dokument ta' Ħidma tal-Persunal[4] li jidentifika
l-kwistjonijiet prinċipali mqajma minn aktar minn 100 persuna
interessata inkluż l-opinjonijiet tagħhom dwar l-evoluzzjonijiet
possibbli lejn sistema ta' kontroll tal-esportazzjoni tal-UE aktar integrat li
jiżgura s-sigurtà u kundizzjonijiet aktar ekwi. Rapport lill-Parlament
Ewropew u lill-Kunsill dwar l-implimentazzjoni tar-Regolament ġie adottat
fis-16 ta’ Ottubru 2013[5], biex b'hekk immarka
t-tieni pass fil-proċess ta’ analiżi. Din il-Komunikazzjoni timmira
lejn l-ippjanar ta’ direzzjoni għal kontrolli tal-esportazzjoni tal-UE, u
tidentifika alternattivi ta’ politika konkreti għall-modernizzazzjoni
tagħhom u l-adattament tagħhom għaċ-ċirkostanzi
teknoloġiċi, ekonomiċi u politiċi li qegħdin rapidament
jinbidlu. Din il-Komunikazzjoni ġiet identifikata wkoll
bħala inizjattiva fil-Programm dwar l-Idoneità u l-Prestazzjoni
tar-Regolamentazzjoni (REFIT).
2.
Kontrolli
tal-esportazzjoni f'ambjent li qed jinbidel fl-oqsma tas-sigurtà,
it-tekonoloġija u l-ekonomija: il-bżonn għall-analiżi
tal-politika ta' kontroll tal-esportazzjoni
Is-sistema globali kontra
l-peoliferazzjoni żviluppat konsiderevolment mill-bidu ta’ dan is-seklu, u
twaqqfu ostakoli b’saħħithom kontra l-proliferazzjoni. Il-kontrolli
tal-esportazzjoni jikkostittwixxu strument ewlieni fl-għodod kontra
l-proliferazzjoni iżda jridu jlaħħqu mat-theddid ta'
proliferazzjoni li qed jevolvi, żviluppi teknoloġiċi u
xjentifiċi u trasformazzjonijiet mal-attività ekonomika globali li
joħolqu sfidi ġodda għas-sigurtà u impatti fuq
il-kundizzjonijiet ekwi globali.
2.1. Riskji u theddidiet
għas-sigurtà li qed jevolvu jew li huma ġodda
Qed ikun
hemm dejjem aktar sfidi tal-proliferazzjoni tal-AQM u l-proliferazzjoni
tal-AQM għadha tikkostitwixxi waħda mill-akbar riskji
għas-sigurtà għall-UE, speċjalment hekk kif numru dejjem
akbar ta’ Stati qed jiżviluppa l-kapaċitajiet ta’ tħassib
ta’ proliferazzjoni. Il-kummerċ f’oġġetti sensittivi
għalhekk x’aktarx li jibqa’ mezz kruċjali biex jingħelbu
l-programmi ta’ proliferazzjoni fil-futur.
Il-globalizzazzjoni
u l-attività dejjem akbar ta' atturi mhux Statali involuti fi programmi
klandestini ta' proliferazzjoni wasslu għal konfluwenza ta'
theddidiet għas-sigurtà transnazzjonali li bihom attivitajiet
illeċiti jikkonverġu u traffikant tad-droga jista' jaġixxi
wkoll bħala terrorist jew proliferatur. It-theddida tat-terroristi u
l-vulnerabbiltà għall-attakki nonkonvenzjonali jkomplu
jeħtieġu attenzjoni speċjali, notevolment minħabba
l-profil dejjem jinbidel tat-terroristi u n-natura globalizzata
tat-terroriżmu.
Il-proliferaturi
huma dinamiċi u jfasslu strateġiji li dejjem jevolvu
tal-proliferazzjoni biex jesplojtaw il-vulnerabbiltà tal-kummerċ
globali interkonness u tas-sistemi ta’ informazzjoni. Huma jelaboraw
tekniki dejjem aktar sofistikati biex jevadu l-kontrolli bl-użu ta’
netwerks ta’ appoġġ kkaratterizzati bil-preżenza ta’
varjetà ta’ atturi mhux Statali (inklużi operaturi leġittimi li
ma jkun hemm l-ebda suspett dwarhom bħal fornituri li ma jkunux
midħla tar-riskji ta’ proliferazzjoni, l-aġenziji
tal-iffinanzjar, l-operaturi tat-trasport, korpi xjentifiċi u
akkademiċi) u billi jċaqilqu oġġetti sensittivi minn
żoni b’istituzzjonijiet domestiċi u ċentri tat-trasbord dgħajfa.
2.2. Żviluppi
xjentifiċi u teknoloġiċi rapidi
L-innovazzjoni
u t-tixrid ta' avvanzi teknoloġiċi għandhom rwol ewlieni
fil-ħolqien ta' riskji ġodda ta' proliferazzjoni: is-sigurtà
tal-gvernijiet, iżda wkoll tal-kumpaniji u taċ-ċittadini,
għandha komponent teknoloġiku dejjem jikber. Teknoloġiji
ġodda jqiegħdu t-tfassil u l-manifattura tal-armi
raġġunġibbli minn grupp akbar ta’ persuni, biex b'hekk
ikattru t-theddid. Barra minn hekk, id-diffużjoni rapida
tat-teknoloġija tal-informatika qed tesponi ekonomiji moderni għal
riskji ġodda indotti mill-konnettività assoċjata man-netwerks
globali tal-kummerċ u d-dejta - inkluż il-ħolqien ta’
"għodod ċibernetiċi" speċifiċi
għas-sorveljanza, il-monitoraġġ, l-ittraċċar u
l-interċettazzjoni tal-massa. Is-sigurtà ċibernetika llum hija
kruċjali għas-sigurtà tal-UE u l-"proliferazzjoni
ċibernetika" saret dimensjoni importanti tal-kontrolli
tal-esportazzjoni.
L-esportazzjonijiet
huma dejjem aktar trażmessi, mhux trasportati. Fl-epoka tal-cloud
computing, flussi ta’ informazzjoni li fihom teknoloġija sensittiva
jistgħu jintużaw biex jipproduċu kwantitajiet bla limitu
ta’ oġġetti sensittivi u jippreżentaw sfida kbira għal
kontroll tal-esportazzjoni, speċjalment minħabba
l-inapplikabilità ta’ kontrolli fuq il-fruntieri, u d-diffikultà
għall-kumpaniji biex jiżguraw il-konformità (pereżempju
fir-rigward tal-arkitettura tal-IT, il-kollaborazzjoni fl-inġinerija,
l-ivvjaġġar ta’ esperti, eċċ). Għalhekk
il-kontrolli tal-esportazzjoni jeħtieġ li joperaw
"onlajn" fil-kuntest ta' dinja konnessa globalment, li fiha
trasfermenti teknoloġiċi intanġibbli (ITT- intagible
technology transfers)[6]
saru dejjem aktar sinifikanti vis-à-vis iċ-ċaqliq
fiżiku tal-oġġetti.
Ir-riċerka
xjentifika twassal għal avvanzi straordinarji li jkunu ta’
benefiċċju għas-soċjetà, iżda r-riskju li
r-riċerka tista' tkun użata ħażin toħloq tensjoni
dejjem akbar bejn il-prinċipju tat-trasparenza fix-xjenza u
t-tħassib dwar is-sigurtà. Dibattiti ssottolinjaw il-ħtieġa
li tkun ikkunsidrata n-natura golabli tax-xjenza u l-fluss ħieles
tal-informazzjoni xjentifika[7],
iżda enfasizzaw ukoll il-ħtieġa li jkun indirizzat
ir-riskju assoċjat mal-abbuż potenzjali tar-riċerka
xjentifika u li tkun żgurata l-valutazzjoni indipendenti
tal-implikazzjonijiet tas-sigurtà.
2.3. Katini ta’ forniment
globali u kundizzjonijiet ekwi
Is-sigurtà
saret element ewlieni għal katini ta' forniment responsabbli. Il-kontrolli
tal-esportazzjoni jeħtieġ li jipproteġu l-kummerċ
leġittimu mir-riskji assoċjati mat-tranżazzjonijiet
illeċiti fi żmien meta l-flussi kummerċjali qed isiru aktar
kumplessi u vulnerabbli, hekk kif qed jinħoloq kummerċ globali
aktar rapidu u dematerjalizzat mill-multiplikazzjoni tal-flussi
transfruntieri ta' oġġetti, investiment, servizzi, kompetenzi u
nies assoċjati man-netwerks internazzjonali tal-produzzjoni.
L-użu ta’ intermedjarji, kumpaniji tal-isem, punti ta' żvijar u
ta’ trasbord, immultiplikaw in-numru u t-tipi ta’ atturi u attivitajiet
involuti fi trasferimenti sensittivi għall-proliferazzjoni.
L-iżvilupp ta' servizzi onlajn u tal-kummerċ elettroniku
jżid sfidi ġodda minħabba li l-kummerċ diġitali
għandu jibqa' miftuħ u sigur.
Iż-żieda
fil-katini ta' valur mondjali u fil-kapaċitajiet ta' manifattura
internazzjonali twassal għal żieda fid-disponibbiltà barranija
ta' oġġetti b'użu doppju. Is-sjieda u l-operazzjoni ta’ industriji
b’użu doppju hija dejjem aktar internazzjonalizzata u issa hemm
varjetà kbira ta’ atturi involuti. Dan jaffettwa b’mod fundamentali
l-kunċett ta’ “fornitur” li jinsab fil-qalba ta’ kontroll
tal-esportazzjoni u juri l-ħtieġa għal kontrolli tal-esportazzjoni
flessibbli li jaġġustaw għal realtajiet ekonomiċi li
qed jinbidlu.
Il-profil
tal-industriji b’teknoloġija avvanzata qed jinbidel ukoll.
It-tiċpir bejn it-teknoloġija ċivili u dik tad-difiża
u l-bażijiet industrijali u l-multiplikazzjoni ta’ oġġetti
b’karatteristiċi ta' użu doppju inċerti jagħmluha
dejjem aktar diffiċli li ssir distinzjoni bejn trasferimenti purament
ċivili jew dawk b’użu doppju. Bħala riżultat ta' dan,
il-kummerċ b’użu doppju matul is-snin żdied b’mod
konsistenti biex jirrappreżenta porzjon imdaqqas ta’ kummerċ
barrani[8].
Is-settur tiegħu li jkopri firxa wiesgħa u r-ramifikazzjonijiet
tal-prodott joħolqu sfidi operazzjonali minħabba l-volum dejjem
akbar tal-applikazzjonijiet u d-diversità tagħhom.
Il-kontrolli
tal-esportazzjoni jirrappreżentaw fattur kompetittiv ewlieni, hekk
kif l-ekonomija tal-Ewropa taqleb għall-manifattura b'valur
miżjud għoli u innovattiva, u l-katini ta' valur Ewropej huma
partijiet integrali tal-katini ta' valur mondjali. F’dan il-kuntest,
livelli differenzjati ta’ kontrolli f’pajjiżi terzi joħolqu
distorsjonijiet tal-kompetizzjoni għad-detriment tal-kumpaniji tal-UE
li joperaw globalment. Barra minn hekk, xi parametri ta' kontroll
diverġenti li għadhom hemm u xi każijiet ta' "implimentazzjoni
assimetrika" tal-kontrolli jistgħu kultant jaffettwaw
l-implimentazzjoni konsistenti tal-kontrolli u l-kundizzjonijiet ekwi
fl-UE.
3. Lil hinn mill-materjalità
u l-fruntieri: lejn sistema ta' kontroll tal-kummerċ strateġika
bbażata fuq ir-riskju.
Bis-sistema
ta’ kontroll tal-esportazzjoni attwali, l-UE ppruvat tikseb bilanċ bejn
is-sigurtà u l-kummerċ. Is-sistema hija ġeneralment
meqjusa b’saħħitha u effikaċi u tipprovdi sisien istituzzjonali
u legali sodi. Iżda ma tistax tibqa' statika: jeħtieġ li tkun
evalwata mill-ġdid u aġġornata sabiex tkun tista'
tiffaċċja sfidi ġodda u tiġġenera kapaċitajiet
moderni ta' kontroll li l-UE teħtieġ għall-għaxar snin li
ġejjin u aktar. Dan jista’ jinkiseb billi jingħata impetu ġdid
għall-iżvilupp ta’ mudell integrat ta’ kontroll tal-kummerċ
strateġiku xprunat mir-riskju u msejjes fuq id-direzzjonijiet segwenti:
Analiżi
msejsa fuq ir-riskju tal-bilanċ bejn il-ħtieġa ta’
regolamentazzjoni tal-kummerċ u t-tnaqqis tal-piżijiet
regolatorji li jiżguraw li l-leġiżlazzjoni tkun ċara u
proporzjonata. Azzjonijiet mhux regolatorji - linji gwida, l-ippuljar
tar-riżorsi eċċ. - jistgħu wkoll jiġi
maħsuba biex jarmaw is-sistema ta’ kontroll tal-UE b’għodda
flessibbli biex jirreaġixxi għal sfidi ġodda filwaqt li
jiżguraw kundizzjonijiet indaqs fis-suq intern tal-UE.
Approċċ
integrat biex titjieb il-koerenza tal-"pilastri" kollha ta'
kontroll tal-esportazzjoni (il-leġiżlazzjoni, il-liċenzjar
minn qabel, l-implimentazzjoni, l-infurzar, is-sensibilizzazzjoni) permezz
tal-iżvilupp ta’ netwerk ta’ kontroll komuni tal-UE,
b'appoġġ għal fokus akbar fuq l-implimentazzjoni u
l-infurzar konsistenti bil-ħsieb li jitnaqqsu d-distorsjonijiet
tal-kompetizzjoni u titejjeb is-sigurtà.
It-trasparenza
u l-involviment mal-partijiet interessati u rwol aktar prominenti għas-settur
privat ikunu punt kruċjali għal approċċ integrat li
jippermetti lill-operaturi jaqdu bis-sħiħ ir-rwoli komplementari
tagħhom, u b’hekk jiġi ottimizzat l-użu tar-riżorsi u
jingħata sostenn effikaċi lill-konformità.
Il-proliferazzjoni
titwettaq f'kuntest internazzjonali u l-politika ta' kontroll
tal-esportazzjoni jeħtieġ li tinkludi dimensjoni
internazzjonali. L-iżvilupp ta’ sistema integrata jippermetti azzjoni
esterna tal-UE aktar attiva, it-tisħiħ tal-proċessi multilaterali
li jikkostitwixxi l-qalba tas-sistema ta’ kontroll tal-esportazzjoni
globali filwaqt li jipprovdi wkoll bażi għal relazzjonijiet ta’
benefiċċju reċiproku ma’ sħab ewlenin. Dan,
min-naħa tiegħu, isaħħaħ is-sigurtà tal-UE
nfisha.
3.1. Prijorità 1:
Aġġustar għal ambjent tas-sigurtà li qed jevolvi u
tisħiħ tal-kontribut tal-UE għas-sigurtà internazzjonali
Is-sistema tal-UE ta’ kontroll
tal-esportazzjoni għandha tirreaġixxi għall-konsiderazzjonijiet
ta’ politika barranija li qed jinbidlu u tlaħħaq ma’
approċċi ġodda għas-sigurtà. Jeħtieġ li tintegra
l-implikazzjonijiet tas-sigurtà ta' għadd dejjem jikber ta’
teknoloġiji emerġenti u firxa usa’ ta’ oġġetti b’użu
doppju, sabiex ikun żgurat l-użu paċifiku tagħhom.
Jeħtieġ li timxi dejjem aktar lil hinn mill-qasma artifiċjali
bejn is-sigurtà interna u dik esterna u tindirizza r-riskji ta’ proliferazzjoni
evolventi li qed jiċċaqalqu b'mod transfruntier u bejn
il-ġuriżdizzjonijiet. ·
Il-Kummissjoni
se tikkunsidra li timxi lejn approċċ ta' "sigurtà
tal-bniedem"[9]
li jirrikonoxxi li s-sigurtà u d-drittijiet tal-bniedem huma intrinsikament
marbuta. Dan jista’ jinvolvi evoluzzjoni lejn kunċett ta’
oġġetti “strateġiċi” li jindirizzaw mhux biss, u
strettament, oġġetti b’użu aħħari possibbli militari
iżda wkoll jkollhom użu aħħar possibbli fil-proliferazzjoni
tal-AQM, iżda wkoll l-adozzjoni ta' approċċ usa'
għas-sigurtà. Dan jista’ jimplika wkoll kjarifika ta’ kriterji ta’
kontroll li jqisu implikazzjonijiet usa’ tas-sigurtà, inkluż l-effett
potenzjali fuq is-sigurtà ta’ persuni pereżempju permezz tat-terroriżmu
jew ksur tad-drittijiet tal-bniedem. Dan l-approċċ
isaħħaħ ukoll il-koerenza mal-kontrolli l-oħra ta' sigurtà
tal-kummerċ u jikkonverġu max-xejriet internazzjonali,
pereżempju t-Trattat dwar il-Kummerċ tal-Armi (ATT-Arms Trade Treaty)[10] u
l-Protokoll dwar l-Armi tan-Nar tan-NU. ·
Il-Kummissjoni
se tqis l-iżvilupp ta’ approċċ ta’ “sigurtà intelliġenti”
biex tadatta għat-trasformazzjonijiet ta’ oġġetti b’użu
doppju u l-proliferazzjoni ta’ teknoloġiji ġodda u tindirizza
l-kumplessità dejjem tiżdied tal-katina tal-forniment internazzjonali. Dan
jista’ jinvolvi kunsiderazzjoni tal-għażliet li ġejjin:
L-iżvilupp
ta’ "kapaċità ta’ reazzjoni teknoloġika tal-UE"
għal kontribut attiv għad-diskussjonijiet tekniċi
ħafna tal-listi ta’ kontroll, imma wkoll biex tkun żgurata
reazzjoni rapida għall-isfidi maħluqa mit-teknoloġiji
emerġenti (bħal cloud computing, manifattura addittiva
(l-istampar 3D), nanoteknoloġija) kif ukoll dekontroll ta’
oġġetti li skadew jew li huma disponibbli sew
kummerċjalment. Dan il-mekkaniżmu jista’ jibni fuq kompetenzi
esperti disponibbli fl-awtoritajiet ta’ kontroll tal-esportazzjoni u fuq
l-impenn strutturat mal-industrija. Dan jista’ jimplika wkoll
l-iżvilupp ta’ gwida fejn it-teknoloġiji jirrappreżentaw
żvilupp ewlieni għan-negozji li jippreżentaw riskji u
jitlob għal trasparenza, ċarezza legali u approċċ
komuni.
It-tfassil
ta' reazzjoni effikaċi min-naħa tal-UE għall-użu
taċ-ċiberspazju għal attivitajiet ta’ proliferazzjoni u
kjarifika ta’ kontrolli taċ-ċibergħodod[11].
Dan jista’ jimplika azzjonijiet tal-UE biex tippromwovi
deċiżjonijiet multilaterali dwar iċ-ċibergħodod,
jew għażliet alternattivi bħall-introduzzjoni ta’ listi
awtonomi tal-UE jew ta’ mekkaniżmu speċifiku li jkopri kollox,
li ma jxekkilx il-kompetittività tal-industrija tat-teknoloġija
tal-informazzjoni u tal-komunikazzjoni (ICT) tal-UE u l-integrazzjoni
tagħha fil-katini tal-forniment globali.
Approċċi
għall-kontroll modernizzati li jindirizzaw il-porożità
tal-kummerċ legali u illeċitu jistgħu
jinkludu għażliet biex tissaħħaħ il-bażi
ġuridika u biex jiġu aġġornati ċerti modalitajiet
ta’ kontroll sabiex ikunu koperti l-aspetti u l-atturi kollha fil-katina
ta’ kontrolli u jkunu indirizzati l-applikazzjonijiet diverġenti
tal-kontrolli u l-vulnerabilitajiet relatati. Dan jista’ jinvolvi
l-iċċarar tal-kunċett ta’ esportazzjoni u esportatur sabiex
ikopri l-varjetà ta’ attivitajiet u atturi involuti fil-katini
tal-forniment globali, l-analiżi tad-determinazzjoni tal-awtorità
kompetenti (speċjalment għal kumpaniji li mhumiex fl-UE),
l-aġġornament tal-kontroll tal-assistenza teknika,
it-tisħiħ tal-konsistenza u l-infurzar ta’ kontrolli ta’
tranżitu u ta’ senserija kif ukoll l-introduzzjoni ta’
dispożizzjonijiet legali speċifiċi biex jikkumbattu
ċ-ċirkomvenzjoni u jindirizzaw tranżazzjonijiet li jinvolvu
persuni tal-UE irrispettivament mill-post fejn jinsabu. Barra minn hekk,
l-għażliet rigward l-introduzzjoni ta’ modalitajiet ġodda
ta’ kontroll u s-sħubija mas-settur privat jistgħu
jikkontribwixxu għaċ-ċaqliq tal-enfasi fuq monitoraġġ
tal-użu aħħari u jiffaċilitaw l-esportazzjonijiet
leġittimi u d-detezzjoni ta’ kummerċ illeċitu.
·
Il-Kummissjoni
tista’ teżamina għażliet għall-promozzjoni ta’
strateġija speċifika li tiżgura "kontroll immaterjali” u
tindirizza l-isfida ppreżentata minn Trasferimenti Intanġibbli
tat-Teknoloġija (ITT - Intangible Transfers of Technology), inkluża
l-ħtieġa li jkun iċċarat il-kontroll ta’ "riċerka
b’użu doppju”, filwaqt li jkunu evitati ostakoli żejda
għall-fluss ħieles tal-għarfien u l-kompetittività globali
tax-xjenza u t-teknoloġija tal-UE.
Il-kjarifika
tal-qafas legali li japplika għall-ITT tista’ tinvolvi analiżi
ta' dispożizzjonijiet legali u/jew il-provvediment ta' gwida dwar
kunċetti bażiċi li japplikaw għal trasferimenti
elettroniċi ta’ teknoloġija kkontrollata. Tista’ wkoll
tikkonċerna l-modalitajiet ta’ kontroll u l-introduzzjoni ta’
għodod speċifiċi biex jiffaċilitaw il-fluss liberu
tat-teknoloġija (pereżempju l-Awtorizzazzjonijiet Ġenerali
tal-UE għall-Esportazzjoni (EUGEAs) għal riċerka u żvilupp
bejn kumpanija u oħra) filwaqt li ssaħħaħ
it-traċċabilità u l-infurzar tal-ITT permezz ta’
approċċ li jiffoka fuq dispożizzjonijiet ta’ kontroll ta’
qabel it-trasferiment - pereżempju r-reġistrazzjoni,
l-awtoawditjar - u l-monitoraġġ wara t-trasferiment -
pereżempju awditi ta’ konformità - aktar milli dwar
it-trażmissjoni nnifisha;
Involviment
immirat u kkordinat għal komunitajiet
ta' riċerka akkademika madwar l-UE jistgħu jqajmu
kuxjenza dwar ir-regoli applikabbli u jippromwovu l-implimentazzjoni effikaċi minn xjenzjati u ħaddiema
tal-laboratorju. Għażliet oħra bħalma hija
t-tħejjija ta’ kodiċi ta’ kondotta għax-xjenzjati impenjati
fit-twettiq ta’ riċerka b’użu doppju jistgħu wkoll ikunu
previsti.
3.2. Prijorità 2: Promozzjoni
ta' konverġenza ta’ kontroll tal-esportazzjoni u kundizzjonijiet ekwi
globali
Minkejja r-rikonoxximent
internazzjonali dejjem jikber ta’ kontrolli tal-esportazzjoni, l-istandards ta’
kontroll differenzjati f’pajjiżi terzi joħolqu distorsjonijiet tal-kompetizzjoni
u l-lakuni fil-katina globali tal-forniment li l-proliferaturi jistgħu
jieħdu vantaġġ minnhom. Il-politika tal-UE għandha
għalhekk tippromwovi konverġenza lejn kontrolli effikaċii u
globali għal katini tal-forniment globali, sabiex ineħħu l-isfida
għall-industrija ta’ konformità simultanja ma’ regolamenti differenti u
biex isostnu kundizzjonijiet ekwi għal kulħadd.
Il-Kummissjoni
tista’ tikkunsidra li twaqqaf mekkaniżmu effikaċi ta’
aġġornament regolari tal-listi ta’ kontoll tal-UE waqt li
tuża l-kompetenzi esperti mill-awtoritajiet nazzjonali, biex
jiġi żgurat li l-listi ta’ kontroll huma f’konformità
mal-iżviluppi teknoloġiċi u kummerċjali u biex
jiġu mminimizzati d-distorsjonijiet tal-kompetizzjoni assoċjati
ma’ kontrolli skaduti.
Għalkemm
l-arkitettura tal-liċenzjar tal-UE hija ġeneralment meqjusa
sodisfaċenti, il-proċessi ta’ liċenzjar għadhom qed
iħallu impatt fuq il-kompetittività. Għaldaqstant,
il-Kummissjoni se tfittex modi biex tottimizza l-arkitettura u
l-proċessi tal-liċenzjar sabiex tevita il-proċeduri goffi
ta' liċenzjar u timminimizza d-dewmien u d-distorsjonijiet
fil-kompetizzjoni. Dan jista’ jinkludi għażliet għal:
o
L-introduzzjoni
ta’ sistema ta’ analiżi regolari tal-Awtorizzazzjonijiet Ġenerali
Nazzjonali għall-Esportazzjoni (NGEAs) u d-diskussjoni dwar il-possibbiltà
li jiġu ttrasformati f'EUGEAs u li jiġu estiżi mal-UE kollha
kemm hi; o
Bidla
lejn liċenzjar miftuħ permezz tal-introduzzjoni ta’ EUGEAs
addizzjonali, l-analiżi tal-bilanċ bejn azzjoni effiċjenti
għal kontra l-proliferazzjoni u t-tnaqqas tal-piż
għall-awtoritajiet tal-liċenzjar u l-esportaturi permezz ta' livell
proporzjonat ta’ kontroll, pereżempju: § “Kunsinni
ta’ valur żgħir” biex tiġi ffaċilitata l-esportazzjoni ta’
kwantitajiet żgħar ta’ oġġetti li jippreżentaw riskju
ta’ proliferazzjoni baxx; § “Kriptaġġ”,
li jippermetti l-esportazzjoni ta’ oġġetti tal-ICT li jintużaw
b’mod wiesa’ fil-proċessi industrijali u joperaw f’ambjent kompetittiv
ħafna; § “Trasferimenti
teknoloġiċi bejn il-kumpaniji” għal skopijiet ta’ riċerka u
żvilupp; § “Trasferimenti
intra-UE” għall-oġġetti tal-Anness IV[12], li
jippermettu modalitajiet ta' kontroll li ma jostakolawx iċ-ċaqliq
ħieles ta’ oġġetti u t-teknoloġija fis-Suq Uniku; § “Proġetti
kbar” li jippermettu lill-awtoritajiet li jħarsu lejn l-"istampa
kollha" aktar minn akkumulazzjoni ta’ applikazzjonijiet individwali
għal-liċenzjar. o
Ir-reviżjoni
tal-parametri (id-destinazzjonijiet, l-oġġetti) għal EUGEAs
eżistenti sabiex ikun żgurat li huma aġġornati, u
l-armonizzazzjoni ta’ xi kundizzjonijiet ta’ liċenzjar u rekwiżiti
sabiex tiġi promossa implimentazzjoni konsistenti madwar l-UE, inkluż
il-perjodu ta’ validità ta’ liċenzji individwali u ta’ ċaħdiet.
It-tħejjija ta’ linji gwida għal prattiki ta’ liċenzjar
konsistenti, li jinkludu l-aħjar prattiki pereżempju dwar
iż-żmien għall-ipproċessar, tista’ wkoll tkun ikkunsidrata.
Il-Kummissjoni se tivvaluta
l-għażliet biex tippromwovi l-konverġenza globali
tal-kontrolli tal-esportazzjoni bil-għan li jkun iffaċilitat
il-kummerċ f’oġġetti b’użu doppju. Dan jista' jinkludi azzjonijiet għall-promozzjoni
ta' rapreżentanza koerenti,
komprensiva u unita tal-UE fis-sistemi[13] bħala riflessjoni tar-rwol
tagħha kontra
l-proliferazzjoni u fil-kummerċ. Jista’ wkoll jinvolvi
sensibilizzazzjoni u koperazzjoni attivi esterni biex biex jasssitu
pajjiżi sħab biex jiżviluppaw regolamenti konverġenti,
kif ukoll jiżviluppaw djalogi ta’ kontroll tal-esportazzjoni ma’
sħab kummerċjali ewlenin bil-għan li jiġu evitati
rekwiżiti regolatorji konfliġġenti u jitnaqqas il-piż
amministrattiv fuq l-industriji orjentati għall-esportazzjoni.
3.3. Prijorità 3: L-Iżvilupp ta'
sistema ta’ kontroll tal-esportazzjoni tal-UE effikaċi u kompetittiva
L-istruttura b’diversi livelli
ta’ kontrolli tal-esportazzjoni tal-UE tipprovdi għal sistema unika u
flessibbli, iżda każijiet ta’ applikazzjoni diverġenti
jistgħu kultant jikkompromettu l-effikaċja kumplessiva tagħhom. Il-Kummissjoni
għandha għalhekk, tivvaluta l-għażliet biex tkun
indirizzata l-"implimentazzjoni assimetrika" tal-kontrolli sabiex
timminimizza d-distorsjonijiet tal-kompetizzjoni u l-kostijiet
tat-tranżazzjonijiet assoċjati mal-kontrolli fl-UE. ·
Deċiżjonijiet
diverġenti għall-kontroll ta’ spiss jiġu attribwiti għal
nuqqas perċeput ta’ politika armonizzata tal-UE dwar il-kontroll tal-esportazzjoni
u speċjalment għal valutazzjoni tar-riskju diverġenti li hi
sottostanti għad-deċiżjonijiet ta’ kontroll. Approċċ
ibbażat fuq ir-riskju, ibbażat fuq l-iżvilupp ta’ qafas komuni għall-ġestjoni
tar-riskju jista' jiżgura aktar konsistenza fl-identifikazzjoni ta’
tranżazzjonijiet ta’ riskju għoli waqt li jottimizza l-użu
tar-riżorsi madwar l-UE u jnaqqas id-distorsjonijiet tal-kompetizzjoni
minħabba deċiżjonijiet diverġenti għall-kontroll. ·
Kontrolli
li jkopru kollox[14]
jibqgħu għodda essenzjali sabiex jiġi evitat l-użu ta’
oġġetti mhux elenkati għall-proliferazzjoni, iżda
l-implimentazzjoni żbilanċjata qajmet tħassib f’termini ta’
ċarezza legali, distorsjonijiet tal-kompetizzjoni u lakuni fil-katina
tal-kontrolli. Konverġenza akbar tista’ tinkiseb permezz
tal-armonizzazzjoni tal-kunċett ta’ kontrolli li jkopru kollox u
t-tisħiħ ta’ konsultazzjoni biex tkun żgurata l-applikazzjoni
tagħhom fl-UE kollha u tissaħħaħ politika kontra
t-twaqqigħ tal-prezz. Din tista' tkun appoġġata permezz ta’
skambju regolari ta’ informazzjoni u l-istabbiliment ta’ bażi tad-dejta
komprensiva tal-UE. Xi informazzjoni tista' tkun skambjata ma’ dwani u
aġenziji oħra sabiex jittejjeb l-infurzar, jew tista' tkun
disponibbli pubblikament. It-trasparenza tista’ tappoġġa d-diliġenza
dovuta tal-operaturi biex jiżguraw li l-katina tal-forniment hija sigura. ·
Il-Kummissjoni
tista’ tivvaluta l-għażliet għal rievalwazzjoni kritika ta’
kontrolli ta’ trasferimenti intra-UE sabiex jitnaqqsu kemm jista’ jkun
l-ostakli li fadal fis-Suq Uniku, filwaqt li jinżamm kontroll strett fuq
l-aktar oġġetti sensittivi b’użu doppju. Dan jista’ jinkludi
analiżi tal-Anness IV biex jiffoka fuq lista aġġornata
tal-aktar oġġetti sensittivi u/jew l-introduzzjoni ta’ EUGEA
għal trasferimenti intra-UE, inklużi trasferimenti ta’
teknoloġija. Il-kundizzjonijiet u r-rekwiżiti xierqa, inklużi
l-għażliet għal verifika wara l-kunsinna fil-UE, jistgħu
jitfasslu biex jikkumpensaw għat-tneħħija ta’ liċenzjar ta’
qabel u biex ikunu żgurati s-sigurtà tat-trasferimenti u d-disponibbiltà
tal-informazzjoni.
3.4.
Prijorità 4: Sostenn għal implimentazzjoni u infurzar effikaċji u
konsistenti tal-kontroll tal-esportazzjoni
Il-politika ta’ kontroll
tal-esportazzjoni ma għandhiex tiffoka biss fuq l-istabbiliment ta' regoli
għall-kontroll tal-kummerċ leġittimu, iżda tikkunsidra
wkoll il-prelazzjoni u l-interruzzjoni ta’ kummerċ illeċitu.
Implimentazzjoni u l-infurzar konsistenti madwar l-UE huma essenzjali sabiex
jiġi indirizzat ir-riskju ta’ evażjoni tal-proċessi ta’
kontroll, iżda n-nuqqas ta’ statistika u intelligence sodi madwar l-UE
għadu jtappan politika effikaċi u reazzjonijiet operazzjonali.
Il-Kummissjoni se tanalizza l-għażliet li ġejjin biex
tiżviluppa qafas aktar integrat ta' implimentazzjoni u infurzar: ·
B’aktar
minn 40 000 applikazzjoni fis-sena, il-kontrolli tal-esportazzjoni huma
impenjattivi f’termini ta’ riżorsi amministrattivi fl-awtoritajiet ta’
kontroll. L-iżvilupp ta’ netwerk ta’ kontroll tal-esportazzjoni tal-UE
jista’ jsaħħaħ il-kapaċità ġenerali tas-sistema filwaqt
li jottimizza l-użu tar-riżorsi amministrattivi u jikkontrolla
l-kostijiet amministrattivi, permezz ta’ dawn l-għażliet li
ġejjin:
Skambju ta’
informazzjoni strutturat imtejjeb bejn l-awtoritajiet ta’ kontroll
tal-esportazzjoni dwar id-dejta tal-liċenzjar u informazzjoni
rilevanti oħra (pereżempju destinazzjonijiet, utenti
aħħarin, okkorrenzi u ksur) jistgħu jippermettu
aċċess għal informazzjoni kritika lill-awtoritajiet
kompetenti kollha, abbażi tal-ħtiġijiet identifikati b’mod
ċar sabiex tiġi evitata informazzjoni żejda.
L-Infrastruttura sigura tal-IT "DUeS"[15]
tista' tkun estiża biex issostni kondiviżjoni imsaħħa
tal-informazzjoni.
Koperazzjoni
strateġika u operazzjonali mtejba b'aġenziji
għall-infurzar, pereżempju id-dwana, tista' tinkiseb billi tkun
żgurata l-integrazzjoni tal-prijoritajiet tal-kontroll
tal-esportazzjoni fiċ-ċikli relevanti ta' politika[16],
billi jikkondividu informazzjoni permezz ta' sistemi ta' skambju mal-UE
kollha, biex b'hekk jiżviluppaw għodod komuni
għall-ġestjoni tar-riskju u jimplimentaw operazzjonijiet
konġunti. L-iskambju ta’ informazzjoni fil-mira dwar l-attività ta’
infurzar jippermetti ħarsa ġenerali kumplessiva aħjar
tal-effikaċja tal-kontrolli madwar l-UE, u l-kondiviżjoni
tal-aħjar prattiki, u tista' tintuża fil-formulazzjoni
tal-politika pereżempju għall-identifikazzjoni ta’ kummerċ
illeċitu.
Koerenza
mtejba bejn l-istituzzjonijiet differenti tal-UE u l-Istati Membri u
l-identifikazzjoni ta’ sinerġiji bejn strumenti ta’ kontroll
kummerċjali relatat mas-sigurtà, pereżempju permezz
tal-iżvilupp ta’ infrastruttura tal-IT komuni bħala pjattaforma
komuni biex issostni l-iskambju ta’ informazzjoni madwar l-UE, tista’
żżid l-impatt globali ta’ l-azzjonijiet kontra l-proliferazzjoni
tal-UE. Koerenza ma’ politiki u r-regolamenti oħra tal-UE relatati
mill-qrib, pereżempju skont il-Pjan ta’ Azzjoni tal-UE dwar
is-sigurtà kimika, bijoloġika, radjoloġika u nukleari,
ir-Regolament (UE) Nru 98/2013 dwar il-prekursuri esplożivi u
r-Regolament (UE) Nru 258/2012 dwar l-armi tan-nar għandha tkun
żgurata wkoll.
Matul
l-aħħar għaxar snin kien hemm kapaċitajiet estensivi
dwar kwistjonijiet relatati mal-AQM, inkluż programmi sinifikanti
dwar is-sensibilizzazzjoni dwar il-kontroll tal-esportazzjoni lil
pajjiżi terzi, filwaqt li inizjattivi fi ħdan l-UE għadhom
fl-istadji bikrin tagħhom. L-iżvilupp ta' programm tal-UE
immirat gaħll-bini ta' kapaċità u taħriġ
għall-uffiċjali reelvanti, inkluż dwana u aġenziji
tal-fruntieri, jista' jżid il-kapaċità biex ikun prevenut u
detet it-traffikkar transfruntier tal-oġġetti
strateġiċi. L-ippuljar ta’ kompetenzi esperti pereżempju
permezz tal-iżvilupp ulterjuri tal-“Pula ta’ esperti”, jista’ wkoll
isaħħaħ il-katina ta’ kontroll tal-UE.
·
F’ekonomiji
moderni, is-settur privat għandu l-aktar rwol kruċjali fil-katina ta’
kontroll. Għalhekk, sħubijiet mas-settur privat jistgħu
jsaħħu ħafna s-sigurtà u r-reżiljenza tal-katina ta’
forniment globali. L-operaturi huma f’pożizzjoni tajba biex jinnutaw
l-kummerċ illeċitu u jipproteġu teknoloġija sensittiva,
filwaqt konformità kummerċjali li mhux ekwa toħloq distorsjonijiet
kummerċjali u tiftaħ opportunitajiet għall-isfruttament ta’
punti debboli fil-katini tal-forniment. Il-ħolqien ta’ dawn
il-kundizzjonijiet jiddependi fuq kordinazzjoni aħjar u fehim bejn
il-gvernijiet u s-settur privat u jista’ jimplika diversi azzjonijiet
bħal:
Sforzi ta' konformità jistgħu jkunu rikonoxxuti
permezz tal-proċessi ta'
faċilitazzjoni tal-kontroll u esportazzjoni rapida billi
jistabbilixxu standards ċari ta' konformità fis-settur privat għall-użu ta' mekkaniżmi
simplifikati (bħal EUGEAs, NGEAs, Liċenzji Globali) bħala privileġġ
sostanzjali mogħti lill-esportaturi affidabbli. Dan jista’ jinkludi rekwiżiti legali u/jew linji
gwida sabiex l-operaturi jidentifikaw, jimmaniġjaw u
jimmitigaw ir-riskju tagħhom ta’ espożizzjoni
għall-proliferazzjoni billi jidħlu għal viġilanza
msaħħa għal oġġetti li jqajmu livell għoli
ta' tħassib permezz tad-diliġenza dovuta u rekwiżiti ta'
żvelar, inkluż ir-rappurtar ta’ tranżazzjonijiet
suspettużi. Filwaqt li l-kostijiet għan-negozju għandhom
jkun minimizzat u l-awtoregolamentazzjoni mħeġġa,
rekwiżiti standard għall-“Programmi
ta’ Konformità Interna” (ICPs - Internal Compliance Programmes)
jistgħu jsostnu kundizzjonijiet ekwi fl-UE. Il-konformità u
l-kompetittività jsaħħu lil xulxin, minħabba li
l-konformità tnaqqas ir-riskju ta’ forniment mhux mistenni ta’
oġġetti b’użu doppju għal programmi ta’ tħassib
li jesponu lid-ditti għal penali u ħsara fir-reputazzjoni. Barra
minn hekk, għażliet biex jippromwovu l-konverġenza
mal-programm tal-“operaturi fdati” (AEO)
tad-dwana jistgħu jnaqqsu d-duplikazzjoni tal-kontrolli u joffru modi
kosteffikaċi kemm għall-operaturi u kif ukoll
għall-amministrazzjonijiet.
It-trasparenza
u sensibilizzazzjoni kordinata jistgħu
jkunu passi kritiċi biex jipprovdu ċarezza dwar
ir-rekwiżiti, isostnu l-isforzi
ta' konformitàtal-operaturi u jtejbu l-kapċità tagħhom
biex jimplimentaw kontrolli, biex
b'hekk joħolqu kundizzjonijiet li fihom kull element tal-katina ta'
forniment huwa reżiżtenti għall-"kontaminazzjoni"
minn kummerċ illeċitu. Din tista' tinvolvi l-pubblikazzjoni ta' rapporti u informazzjoni ta' kontroll mhux sensittiva ,
inkluż gwida li tippromwovi parttiki tajba ta' konformità.
L-iżvilupp
ta’ għodod ta’ appoġġ komuni tal-UE għall-operaturi
ekonomiċi pereżempju għodod
tal-IT standardizzati u sistemi ta’ liċenzjar elettroniku,
jistgħu’ wkoll jappoġġaw l-isforzi ta' konformità
mill-kumpaniji.
·
Kontrolli tal-esportazzjoni jirriflettu l-impenji
internazzjonali u jirrappreżentaw salvagwardja ewlenija
għall-integrità tal-kummerċ internazzjonali u għalhekk huma
essenzjali biex tissaħħaħ l-effikaċja globali tagħhom.
L-għażliet għall-implimentazzjoni koperattiva
tal-kontrolli ma’ sħab esterni jistgħu jiġu eżaminati biex
ikun iffaċilitat il-kummerċ sikur f’oġġetti
strateġiċi, pereżempju permezz tal-iżvilupp ta’
monitoraġġ tal-użu aħħari ta’ kumpaniji ta’
pajjiżi terzi, kif ukoll rikonoxximent reċiproku tal- valutazzjonijiet.
4. Konklużjoni
L-operaturi ekonomiċi,
l-Istati Membri u ċ-ċittadini fl-UE kollha għandhom interess
f’kontrolli effikaċii tal-esportazzjoni, li jiżguraw is-sigurtà billi
jiġġieldu kontra l-kummerċ illeċitu filwaqt li
jiffaċilitaw il-kummerċ leġittimu. Approċċ tal-UE u
qafas regolatorju aġġornati jsaħħu s-sigurtà u l-integrità
tal-katina ta’ forniment. Dan se jeħtieġ skambju aktar sistematiku
tal-informazzjoni u l-kordinazzjoni tar-riskju bejn l-awtoritajiet
tal-liċenzjar u oħrajn kif ukoll l-involviment mas-settur privat u
koperazzjoni internazzjonali aktar mill-qrib. Qabel ma tieħu inizjattivi
konkreti għall-azzjoni, il-Kummissjoni tistieden lill-Kunsill u
lill-Parlament Ewropew biex iqisu l-approċċ stabbilit f’din
il-Komunikazzjoni. B’mod parallel, il-Kummissjoni se twettaq valutazzjoni
tal-impatt tal-għażliet ta' analiżi deskritti fil-qosor f’din
il-Komunikazzjoni biex tidentifika l-aktar azzjonijiet regolatorji u mhux
regolatorji xierqa biex jinġiebu fis-seħħ. B’referenza għal
REFIT, il-Kummissjoni se tivvaluta l-kostijiet u l-benefiċċji assoċjati
mad-diversi għażliet, notevolment fir-rigward ta’ simplifikazzjoni
regolamentarja u tnaqqis tal-piż potenzjali. _______________ Lista
ta’ akronimi ATT || Trattat dwar il-Kummerċ tal-Armi DUeS || Is-Sistema Elettronika b’Użu Doppju (Dual-Use Electronic System) UE || L-Unjoni Ewropea EUGEA || Awtorizzazzjoni Ġenerali Nazzjonali tal-Esportazzjoni ICP || Programm ta’ Konformità Interna ICT / IT || Teknoloġija tal-Informazzjoni (u l-Komunikazzjoni) ITT || Trasferiment ta' Teknoloġija Intanġibbli NGEA || Awtorizzazzjoni Ġenerali Nazzjonali tal-Esportazzjoni REFIT || Programm dwar l-Idoneità u l-Prestazzjoni Regolatorja AQM || Armi ta' Qerda Massiva UNSCR || Ir-Riżoluzzjoni tal-Kunsill tas-Sigurtà tan-Nazzjonijiet Uniti [1] ĠU L 134,
id-29 ta' Mejju 2009, p. 1. [2] Il-Konklużjonijiet
tal-Kunsill dwar l-iżgurar ta' tiftix kontinwu ta’ politika effikaċi
tal-UE dwar l-isfidi l-ġodda ppreżentati mill-proliferazzjoni
tal-armi ta’ qerda massiva (AQM) u s-sistemi tat-twassil tagħhom, il-21 ta’ Ottubru 2013. [3] COM(2011) 393
tat-30 ta’ Ġunju 2011. [4] SWD(2013) 7
tas-17 ta' Jannar 2013. [5] COM(2013) 710
tas-16 ta' Ottubru 2013. [6]
It-trasferiment tat-teknoloġija intanġibbli jinkludi kemm
it-trasferiment ta’ informazzjoni teknika permezz ta’ mezzi elettroniċi u
t-trasferiment tal-għarfien u tal-ħiliet minn persuni. [7] C(2012) 4890 finali
dwar l-aċċess għall-informazzjoni xjentifika u l-konservazzjoni
tagħha. [8] L-esportazzjonijiet
b’użu doppju kkontrollati mill-UE huma stmati li għandhom valur ta'
madwar 2,5 % tal-esportazzjonijiet totali tal-UE. Għal aktar
informazzjoni fuq il-kummerċ b'użu doppju tal-UE, irreferi għal
COM(2013) 710 finali. [9] L-approċċ ta'
“sigurtà tal-bniedem” għandu l-intenzjoni li jpoġġi lin-nies
fil-qalba ta’ politika tal-UE dwar il-kontroll tal-esportazzjoni, b’mod
partikolari billi jirrikonoxxi r-rabtiet bejn id-drittijiet tal-bniedem,
il-paċi u s-sigurtà. [10] L-ATT għandu
l-għan li jnaqqas il-kummerċ illeċitu tal-armi billi
jistabbilixxi regoli ta’ trasparenza u standards ta’ etika komuni
tal-kummerċ internazzjonali ta’ armi konvenzjonali. [11] Ara wkoll
il-Komunikazzjoni Konġunta lill-Parlament Ewropew, lill-Kunsill,
lill-Kumitat Ekonomiku u Soċjali Ewropew u lill-Kumitat tar-Reġjuni
dwar "Strateġija ta’ Sigurtà Ċibernetika tal-Unjoni Ewropea:
Ċiberspazju Miftuħ, Sikur u Sigur”, JOIN(2013) 1 finali,
is-7 ta’ Frar 2013. [12] L-Anness IV
tar-Regolament (KE) Nru 428/2009 jelenka oġġetti b'użu
doppju partikolarment sensittivi, soġġetti wkoll għal kontrolli
ta’ trasferimenti intra-UE. [13] Ara pereżempju
l-Arranġamenti Ġenerali dwar id-Dikjarazzjonijiet tal-UE
f’organizzazzjonijiet multilaterali, Doc. 15901/11,
l-24 ta’ Ottubru 2011 [14] L-hekk imsejħa
“kontrolli li jkopru kollox” japplikaw għal oġġetti b’użu
doppju mhux elenkati b'użu aħħari potenzjalment militari jew
għall-proliferazzjoni. [15] Is-Sistema Elettronika
b’Użu Doppju (Dual-Use Electronic System) [16] Speċifikament
fir-rigward tad-dwana, l-iżvilupp ta' Strateġija u Pjan ta'
Azzjoni dwar il-ġestjoni tar-Riskju u s-Sigurtà tal-Katini ta' Forniment ġdida
mitluba mill-Kunsill fit-18 ta' Ġunju 2013 jipprovdi
opportunitàewlenija biex ikun ikkunsidrat kif Qafas Komuni
għal-Ġestjoni tar-Riskju għall-kontrolli tad-dwana jista'
jkun sfruttat bl-aħjar mod biex isostni l-kollaborazzjoni
għal-liċenzjar tad-dwana, l-infurzar u l-faċilitazzjoni
tal-kummerċ fil-futur.