IL-KUMMISSJONI EWROPEA
Brussell, 10.6.2020
COM(2020) 232 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
li jevalwa l-applikazzjoni u l-ambitu tad-Direttiva 2011/61/UE tal-Parlament Ewropew u tal-Kunsill dwar Manigers ta' Fondi ta' Investiment Alternativi
WERREJ
1.
INTRODUCTION
1.1
Background
1.2
Legal basis
1.3
Methodology and consultation process
2. ASSESSING THE APPLICATION AND THE SCOPE OF THE AIFMD
2.1 Impact on AIFs and AIFMs
2.2 Impact on investors
2.3 Impact on monitoring and assessment of systemic risk
2.4 Impact of rules on investment in private companies and in/or for the benefit of developing countries
ABBREVJAZZJONIJIET
AIF
Fondi ta’ Investimenti Alternattivi
AIFM
Maniġers ta’ Fondi ta’ Investiment Alternattivi
AIFMD
Direttiva dwar il-Maniġers ta’ Fondi ta’ Investimenti Alternattivi 2011/61/UE
AuM
Assi mmaniġġjati
CLO
Obbligu ta’ self kollateralizzat
CMU
Unjoni tas-Swieq Kapitali
CRD
Direttiva dwar ir-Rekwiżiti tal-Kapital
CSD
Depożitorju Ċentrali tat-Titoli
DĠ FISMA
Direttorat Ġenerali għall-Istabilità Finanzjarja, is-Servizzi Finanzjarji u l-Unjoni tas-Swieq Kapitali
BĊE
Bank Ċentrali Ewropew
EGESC
Grupp ta’ Esperti tal-Kumitat Ewropew tat-Titoli
ELTIF
Fond Ewropew tal-Investiment fuq Terminu Twil
ESMA
Awtorità Ewropea dwar it-Titoli u s-Swieq
BERS
Bord Ewropew dwar ir-Riskju Sistemiku
UE
L-Unjoni Ewropea
EuVECA
Fond Ewropew ta' Kapital ta' Riskju
FSB
Bord għall-Istabilità Finanzjarja
IMSC
Kumitat Permanenti dwar l-Immaniġġjar tal-Investiment
IOSCO
Organizzazzjoni Internazzjonali tal-Kummissjonijiet tat-Titoli
NAV
Valur nett tal-assi
NCA
Awtorità Nazzjonali Kompetenti
NPPR
Reġim nazzjonali ta’ pjazzament privat
MiFID
Direttiva dwar is-Swieq fl-Istrumenti Finanzjarji
UCITS
Impriżi ta’ Investiment Kollettiv f’Titoli Trasferibbli
1.
INTRODUZZJONI
1.1
Sfond
Id-Direttiva dwar Maniġers ta’ Fondi ta’ Investiment Alternattivi (AIFMD) ġiet adottata wara l-kriżi finanzjarja globali, li esponiet ċerti dgħufijiet tas-swieq finanzjarji u s-sistemi regolatorji tagħhom. B’riżultat ta’ dan, il-Mexxejja tal-G20 qablu dwar il-ħtieġa għal iktar regolamentazzjoni tal-industrija finanzjarja biex jitnaqqas ir-riskju u d-daqs ta’ kriżijiet finanzjarji futuri. Dan kien jinkludi wkoll is-settur ta’ ġestjoni ta’ investiment alternattiv li jeħtieġ li tissaħħaħ sorveljanza superviżorja kkordinata u biex tiżdied it-trasparenza tal-investituri. Biex jiġu appoġġati l-objettivi tal-G20, l-Organizzazzjoni Internazzjonali tal-Kummissjonijiet tat-Titoli (IOSCO) ħarġet prinċipji ta’ livell għoli għar-regolamenti tal-fondi spekulattivi biex tiggwida l-iżvilupp ta’ standards internazzjonali f’dan il-qasam.
Wara l-approvazzjoni mill-Kunsill Ewropew ta’ dawn l-impenji internazzjonali msemmija, u fid-dawl tar-rapport tal-Parlament Ewropew, il-Kummissjoni Ewropea (minn hawn 'il quddiem “il-Kummissjoni”) ħarġet Proposta għal qafas regolatorju li jirregola l-Maniġers ta’ Fondi ta’ Investiment Alternattivi (AIFM). L-AIFMD ġie adottat fit-8 ta’ Ġunju 2011. Wara t-traspożizzjoni tagħha fis-sistemi legali nazzjonali, l-AIFMD daħlet fis-seħħ fit-22 ta’ Lulju 2013.
L-AIFMD tfittex li tikseb approċċ superviżorju koerenti għar-riskji tas-sistema finanzjarja, li tipprovdi protezzjoni ta’ livell għoli għall-investitur u wkoll li tiffaċilita l-integrazzjoni tas-suq tal-AIF. L-AIFMs huma meħtieġa jieħdu miżuri biex jiġġestixxu r-riskji u jiżguraw it-trasparenza meħtieġa rigward l-attivitajiet tal-fondi ta’ investiment alternattiv (AIF) immaniġġjati tagħhom filwaqt li jkunu jistgħu jimmaniġġjaw u jikkummerċjalizzaw l-AIF ma’ investituri professjonali madwar l-Unjoni b’awtorizzazzjoni unika.
1.2
Il-bażi ġuridika
Dan ir-rapport tħejja skont l-Artikolu 69 tal-AIFMD. Il-Kummissjoni hija meħtieġa tirrevedi l-applikazzjoni u l-ambitu tal-AIFMD b’enfasi fuq l-esperjenza miksuba fl-applikazzjoni tad-Direttiva. Huwa meħtieġ li jiġi vvalutat l-impatt tad-Direttiva fuq l-investituri, l-AIFs, l-AIFMs fl-Unjoni u f’pajjiżi terzi biex jiġi stabbilit sa fejn intlaħqu l-objettivi segwiti mill-AIFMD.
Dan ir-rapport jissodisfa l-mandat tal-Kummissjoni li tipprovdi lill-Parlament Ewropew u lill-Kunsill b’valutazzjoni tal-funzjonament tal-AIFMD u meta possibbli tindika l-oqsma fejn jista’ jkun meħtieġ titjib. Barra minn hekk, ir-rapport jeżamina l-metodi ta’ kalkolu ta’ ingranaġġ kif meħtieġ skont l-Artikolu 6 tar-Regolament Delegat tal-Kummissjoni (UE) Nru 231/2013 (AIFMR), li jissupplimenta l-AIFMD. Id-Dokument ta’ Ħidma tal-Kummissjoni (SWD(2020)110: Id-dokument ta’ Ħidma tal-Persunal tal-Kummissjoni li jivvaluta l-applikazzjoni u l-kamp ta’ applikazzjoni tad-Direttiva 2011/61/UE tal-Parlament Ewropew u tal-Kunsill dwar Maniġers ta’ Fondi ta’ Investiment Alternattivi) jipprovdi aktar informazzjoni dwar il-konklużjonijiet Rapport indipendenti tal-KPMG ġie ppubblikat ukoll.
1.3
Il-metodoloġija u l-proċess ta’ konsultazzjoni
Il-Kummissjoni inkarigat kuntrattur estern - KPMG - biex iwettaq Stħarriġ Ġenerali u studju bbażat fuq l-evidenza biex tivvaluta l-impatt tal-AIFMD..
L-istudju empiriku kopra 15-il Stati Membri tal-UE. Huwa vvaluta jekk ir-regoli speċifiċi tal-AIFMD humiex effettivi, effiċjenti, koerenti u rilevanti, u jekk appoġġawx il-miżuri tal-UE fil-kisba tal-objettivi ġenerali, speċifiċi u operazzjonali tad-Direttiva.
F’dan ir-rapport is-sejbiet tal-KPMG huma kkumplimentati minn sorsi oħra ta’ informazzjoni, inklużi aġġornamenti rilevanti tad-data u informazzjoni miksuba permezz ta’ diversi flussi ta’ ħidma tal-Kummissjoni, l-ESMA u l-Bord Ewropew dwar ir-Riskju Sistemiku ((BERS)). L-interazzjonijiet tal-Kummissjoni mal-partijiet ikkonċernati, li jinkludu l-awtoritajiet nazzjonali kompetenti (NCAs), ir-rappreżentanti tal-industrija u l-assoċjazzjonijiet għall-protezzjoni tal-investituri, permezz ta’ konsultazzjonijiet pubbliċi, laqgħat bilaterali jew multilaterali tqiesu wkoll. Pubblikazzjonijiet akkademiċi u statistiċi appoġġaw intużaw bħala sostenn għat-tħejjija ta’ dan ir-rapport. Pereżempju, ir-Rapporti Statistiċi Annwali tal-ESMA dwar l-AIFs tal-UE kienu partikolarment utli fid-deskrizzjoni tas-suq tal-AIF tal-UE. Ġew kkunsidrati eżempji individwali ta’ ineffiċjenzi ta’ regoli partikolari tal-Unjoni.
Fis-27 ta’ Settembru 2019, il-persunal tal-Kummissjoni kkonsulta l-Grupp ta’ Esperti tal-Kumitat Ewropew tat-Titoli (EGESC) li kien qed jirrappreżenta lill-Istati Membri biex jirċievu feedback tekniku u ta’ politika dwar kwistjonijiet materjali li jappartjenu għall-applikazzjoni u l-kamp ta’ applikazzjoni tal-AIFMD. Il-membri tal-EGESC ġew mistiedna jagħmlu sottomissjonijiet bil-miktub u r-rapport iqis il-pożizzjonijiet tal-membri tal-EGESC.
Fit-22 ta’ Ottubru 2019 il-persunal tal-Kummissjoni ppreżenta l-elementi ewlenin ta’ dan ir-Rapport lill-Kumitat Permanenti dwar il-Ġestjoni tal-Investiment tal-ESMA (IMSC) u fittex il-kontribut tiegħu abbażi tal-esperjenza superviżorja tal-NCAs.
2. EVALWAZZJONI TAL-APPLIKAZZJONI U L-AMBITU TAL-AIFMD
L-AIFMD hija pilastru sinifikanti tal-Unjoni tas-Swieq Kapitali (CMU) li tiffaċilita l-monitoraġġ imtejjeb tar-riskji għas-sistema finanzjarja u l-ġbir transfruntiera tal-kapital għall-investimenti f’assi alternattivi. L-AIFMD kellha rwol importanti fil-ħolqien ta’ suq intern għall-AIFs u t-tisħiħ tal-qafas regolatorju u superviżorju għall-AIFMs fl-Unjoni. L-AIFMs issa qed joperaw b’aktar trasparenza għall-investituri u s-superviżuri.
2.1 L-Impatt fuq l-AIFs u l-AIFMs
Is-suq tal-AIF tal-UE kien fuq perkors ta’ tkabbir kontinwu kif imkejjel minn assi netti tal-AIFs u l-AuM b’attività transfruntiera notevoli tal-AIFMs. Mill-adozzjoni tal-AIFMD fl-2011, l-assi netti totali tal-AIFs kważi triplikaw fid-daqs minn EUR 2,3 triljun għal EUR 5,9 triljun. Id-distribuzzjoni transfruntiera tal-AIFs aktar minn irduppjat bejn Ġunju 2017 u Ottubru 2019 li żdied minn 3 % għal 5,8 % tal-AIFs. F’dan ir-rigward, il-passaport AIFM huwa kkonfermat li hu fattur importanti. Il-maġġoranza tal-AIFMs, l-awtoritajiet pubbliċi u l-investituri istituzzjonali li wieġbu għall-Istħarriġ Ġenerali rrappurtaw li l-aċċess għas-swieq nazzjonali kien żdied minħabba l-AIFMD, għalkemm 34% rrappurtaw ukoll żieda fil-ħin għat-tqegħid fis-suq..
Dan ir-tapport juri li l-effikaċja tal-passaport tal-AIFM tal-UE jbati minn gold-plating nazzjonali, diverġenzi fir-regoli nazzjonali ta’ kummerċjalizzazzjoni, interpretazzjonijiet li jvarjaw tal-AIFMD minn superviżuri nazzjonali u l-kamp ta’ applikazzjoni limitat tiegħu. L-AIFMs iżgħar li ma jistgħux jikkonformaw mar-rekwiżiti kollha tal-AIFMD m’għandhomx għażla ħlief jirrinunzjaw li jżidu l-kapital fi Stati Membri oħra jew iħabbtu wiċċhom ma’ ostakli sinifikanti għall-aċċess għas-suq. Barra minn hekk, il-passaport AIFM jippermetti l-kummerċjalizzazzjoni biss lill-investituri professjonali, u dan jerġa’ jirrestrinġi l-attivitajiet transfruntiera tal-AIFMs billi investituri semiprofessjonali u bl-imnut jistgħu jiġu avviċinati biss skont regoli nazzjonali li jvarjaw (u li huma ħafna drabi restrittivi). Id-distribuzzjoni tal-AIF hija soġġetta għar-regoli tal-MiFID II, li jiddifferenzjaw bejn l-investituri fil-livell tal-konsumatur u dawk professjonali, għalhekk, kwalunkwe bidla fid-definizzjonijiet tat-tipi ta’ investituri fl-AIFMD teħtieġ li tieħu kont tal-interazzjoni tal-AIFMD mad-dispożizzjonijiet tal-MiFID II.
L-AIFs huma offruti lil investituri mhux professjonali minn banek u kumpaniji tal-assigurazzjoni. Dawn l-intermedjarji finanzjarji jippromwovu attivament l-iktar fondi interni, minflok ma joffru wkoll firxa usa’ ta’ AIFs ta’ parti terza. Madankollu, is-sitwazzjoni qed tinbidel b’sehem tas-suq tal-pjattaformi online li qed jespandi. Il-flussi ta’ ħidma tal-Kummissjoni relatati mas-CMU qed jiffukaw fuq it-titjib tad-distribuzzjoni għal prodotti ta’ investiment fl-Unjoni u r-reviżjoni tar-rekwiżiti ta’ divulgazzjoni. L-eżitu ta’ dawk il-flussi ta’ ħidma se jkollhom impatt ukoll l-AIFs u l-AIFMs ibbażati f’pajjiżi terzi, li attwalment jistgħu jaċċessaw biss investituri fi Stati Membri individwali abbażi tal-liġijiet nazzjonali — stabbiliti f’Reġimi Nazzjonali ta’ Pjazzament Privat (NPPRs).
Ir-rwol tal-NPPRs huwa rikonoxxut mill-partijiet ikkonċernati bħala fattur importanti fl-iżvilupp tas-suq minħabba n-nuqqas ta’ attivazzjoni tal-passaport AIFM għal entitajiet ta’ pajjiżi terzi. B’riżultat ta’ dan, l-investituri fl-Istati Membri b’reġimi bħal dawn setgħu jaċċessaw is-swieq globali għas-servizzi finanzjarji u jiddiversifikaw l-allokazzjonijiet ta’ investiment tagħhom. Madankollu, l-NPPRs ivarjaw fost l-Istati Membri u, aktar importanti minn hekk, huma meħtieġa li jimplimentaw biss għadd limitat ħafna tar-rekwiżiti tal-AIFMD. Dan joħloq kundizzjonijiet mhux ekwi bejn AIFMs mhux tal-UE u tal-UE. Xi Stati Membri eskludew għal kollox l-aċċess għas-suq għal entitajiet minn pajjiżi terzi. Xi Stati Membri ssuġġerew aktar armonizzazzjoni tal-NPPRs, filwaqt li oħrajn jikkunsidraw li l-attivazzjoni tal-passaport tal-AIFMD għal entitajiet ta’ pajjiżi terzi, segwit minn tneħħija gradwali tal-NPPRs, tkun soluzzjoni aħjar għal din il-problema.
Il-Kummissjoni ma evalwatx il-funzjonament tal-passaport ta’ pajjiż terz tal-AIFMD peress li passaport bħal dan għadu ma ġiex attivat u għalhekk ma hemm l-ebda informazzjoni tas-suq li tista’ tiġi studjata.
2.2 L-impatt fuq l-investituri
Abbażi tal-valutazzjoni dettaljata fid-Dokument ta’ Ħidma tal-Persunal, ir-reġim depożitarju, ir-regoli dwar il-kunflitti ta’ interess, ir-rekwiżiti ta’ divulgazzjoni u ta’ trasparenza jipproteġu l-interessi tal-investituri, li huwa utli biex tinbena l-fiduċja tal-investituri fis-swieq finanzjarji. Iċ-ċifri tas-suq juru żieda fil-bejgħ ta’ AIFs b’parteċipazzjoni dejjem akbar ta’ investituri fil-livell tal-konsumatur f’diversi Stati Membri. L-attivitajiet transfruntiera għandhom potenzjal li jikbru iktar fid-dawl tar-regoli adottati reċentement fil-kuntest tal-Unjoni tas-Swieq Kapitali.
Sistema ddedikata li tirregola l-funzjonijiet u r-responsabbiltà tad-depożitorji rriżultat bħala miżura effettiva għat-tisħiħ tal-protezzjoni tal-investitur. Qed tiffunzjona tajjeb, minkejja li jistgħu jkunu meħtieġa kjarifiki mmirati biex jiġu indirizzati sitwazzjonijiet fejn l-AIFMs jużaw ġestjoni tal-kollateral bi tliet partijiet jew meta depożitarji ċentrali tat-titoli (CSDs) jaġixxu bħala kustodji.
B’mod aktar sinifikanti, in-nuqqas ta’ passaport ta’ depożitu jmur kontra l-ispirtu tas-suq uniku. Minħabba l-għażla limitata ta’ dawn il-fornituri ta’ servizzi fi swieq iżgħar, hemm ukoll biża’ ta’ riskju ta’ konċentrazzjoni fejn depożitarju wieħed jista’ jżomm l-assi tal-AIFs kollha stabbiliti fi Stat Membru.
Fir-rigward tar-regoli ta’ valutazzjoni, li huma meħtieġa biex jiġi stabbilit is-sehem ta’ kull investitur f’AIF partikolari u għall-monitoraġġ tal-prestazzjoni tal-AIF, dan ir-Rapport jikkonkludi li l-AIFMD ġabet magħha xi dixxiplina u struttura fil-proċess ta’ valutazzjoni tal-assi tal-AIF. Madankollu, jista’ jkun hemm kwistjonijiet b’natura binarja tar-regoli ta’ valwazzjoni, fejn l-użu konġunt ta’ valwaturi interni u esterni jiġi eskluż, kif ukoll b’inċertezza dwar ir-responsabbiltà ta’ valwaturi esterni, li huwa ddeterminat skont il-liġijiet nazzjonali. Madankollu, ma kienx hemm biżżejjed evidenza li tissuġġerixxi li d-dispożizzjonijiet dwar id-divulgazzjoni tal-AIFMD jeħtieġ li jiġu emendati.
Filwaqt li jinvolvu ċerti spejjeż għall-industrija, ir-regoli tal-AIFMD dwar id-divulgazzjonijiet kisbu fil-biċċa l-kbira l-objettiv li l-investituri jkunu jistgħu jagħmlu deċiżjonijiet ta’ investiment infurmati. Il-ħtieġa li jiġu żvelati l-kunflitti ta’ interess hija partikolarment apprezzata mill-investituri f’assi alternattivi peress li dan huwa wieħed mit-tħassib prinċipali tagħhom. L-analizi tindika li l-AIFMD żiedet it-trasparenza rigward il-prodotti u s-servizzi offruti.. Madankollu, ma ġiex identifikat liema elementi tar-rekwiżiti tad-divulgazzjoni jistgħu jkunu superfluwi meta jitqies li xi investituri professjonali jitolbu informazzjoni oħra flimkien ma’ dik preskritta mill-AIFMD.
2.3 Impatt fuq il-monitoraġġ u l-valutazzjoni tar-riskju sistemiku
Sabiex jiġu mmonitorjati u mitigati r-riskji makro li jirriżultaw mill-attivitajiet tal-AIFMs huwa meħtieġ li jiġu identifikati l-entitajiet rilevanti biex jiġi żgurat li huma jissodisfaw ir-rekwiżiti bażiċi biex jimmaniġġjaw l-investimenti kollettivi tagħhom b’mod professjonali u responsabbli għall-benefiċċju tal-investituri. Ma nstabet l-ebda evidenza li tissuġġerixxi li l-limiti tal-AIFMD ta’ assi taħt ġestjoni (AuM), li fuqhom l-attivitajiet tal-AIFMs jistgħu joħolqu riskju sistemiku sinifikanti, għandhom jiġu aġġustati.
Is-sett ta’ għodod disponibbli għall-NCAs skont l-AIFMD għal finijiet ta’ stabbiltà finanzjarja, inkluża l-possibbiltà li jiġu imposti limiti ta’ ingranaġġ fuq AIFM jew li jiġu sospiżi tifdijiet fl-interess tal-pubbliku, huma meqjusa utli. Il-BERS jirrakkomanda iktar titjib u armonizzazzjoni ta’ dawk il-miżuri. Dan jinkludi rakkomandazzjoni biex jiġu ċċarati r-rwoli rispettivi tal-NCAs u l-kooperazzjoni tagħhom f’każijiet fejn is-sospensjoni tat-tifdijiet għandhom implikazzjonijiet transfruntieri ta’ stabbiltà finanzjarja. Sabiex jiġi deċiż jekk hemmx bżonn kwalunkwe intervent fis-swieq finanzjarji, l-NCAs jenħtieġ li jkunu jistgħu jivvalutaw ix-xejriet fl-industrija tal-AIF u jimmonitorjaw it-theddid għall-istabbiltà finanzjarja meta jitqiesu s-swieq li fihom qed isir in-negozjar ta’ AIFs. Din hija r-raġuni għar-rekwiżiti tar-rappurtar superviżorju tal-AIFMD.
Dawn ir-rekwiżiti ta’ rapportar superviżorju huma kkonfermati li huma meħtieġa għas-superviżuri biex jimmonitorjaw ir-riskji għas-sistema finanzjarja fis-setturi u l-fruntieri kollha. Madankollu, analiżi aktar mill-qrib tindika l-ħtieġa li tiġi kkunsidrata s-simplifikazzjoni tagħhom, filwaqt li wieħed ikun konxju tal-ispejjeż irrekuperabbli diġà mġarrba mill-AIFMs konformi. Hemm ukoll duplikazzjonijiet ma’ liġijiet oħra tal-Unjoni, bħar-rappurtar lill-BĊE għal finijiet statistiċi, li jappoġġaw il-każ għall-aġġustament tal-mudell ta’ rapportar attwali skont l-AIFMR.
Tendenza osservabbli ta’ espansjoni tas-self mhux bankarju tqajjem tħassib dwar l-istabbiltà finanzjarja. Xi informazzjoni granulari dwar ċerti klassijiet ta’ assi, bħal self ingranat u obbligi ta’ self kollateralizzati (CLOs), kif ukoll l-informazzjoni dwar ir-rabtiet indiretti bejn il-banek u l-entitajiet mhux bankarji bħalissa hija nieqsa iżda hija ta’ rilevanza għas-superviżjoni makroprudenzjali. Diversi partijiet ikkonċernati talbu lill-Kummissjoni tivvaluta mill-ġdid il-każ għall-istabbiliment ta’ standards komuni għal AIFs li joriġinaw minn self.
Fir-rigward tal-metodi ta’ kalkolu tal-ingranaġġ, fil-prinċipju, il-metodi grossi u ta’ impenn kif previsti attwalment fl-AIFMR huma meqjusa bħala xierqa minn ħafna partijiet interessati.. Madankollu, jistgħu jintalbu xi aġġustamenti mill-konklużjoni tal-ħidma tal-Bord għall-Istabilità Finanzjarja (FSB) u tal-IOSCO f’dan il-qasam, li jiffoka fuq ir-rappurtar tad-data, kif ukoll ir-rakkomandazzjonijiet tal-BERS għal miżuri mtejba għall-valutazzjoni tar-riskji makroprudenzjali.
Il-monitoraġġ tar-riskju sistemiku u s-superviżjoni tas-settur tal-AIF jeħtieġu kooperazzjoni superviżorja effettiva. L-AIFMD tistabbilixxi regoli dwar il-kompetenzi tal-NCAs u l-interazzjoni tagħhom mal-ESMA għandha rwol importanti. Filwaqt li l-AIFMD tipprovdi l-qafas meħtieġ għall-NCAs biex jikkooperaw, l-effikaċja tar-regoli għadha ma ġietx ittestjata.
L-ESMA, min-naħa l-oħra, qed taqdi rwol ċentrali fil-ħolqien ta’ konverġenza akbar tal-istandards tal-AIFMD fis-suq intern billi tikkoordina l-pożizzjonijiet tal-NCAs. L-armonizzazzjoni ta’ forom u proċessi u ġestjoni ċentrali ta’ bażijiet ta’ data mill-AETS jistgħu jsaħħu aktar il-konverġenza fl-implimentazzjoni u l-applikazzjoni tal-AIFMD. Kif spjegat fil-valutazzjoni dettaljata fid-Dokument ta’ Ħidma tal-Persunal, il-ħruġ ta’ linji gwida wrew li huma għodda utli oħra biex tinkiseb implimentazzjoni u applikazzjoni uniformi tal-AIFMD madwar l-Unjoni. Pereżempju l-linji gwida tal-ESMA dwar ir-regoli tal-AIFMD dwar ir-remunerazzjoni tal-AIMF.
Ġew introdotti regoli ta’ remunerazzjoni fl-AIFMD biex tiġi promossa ġestjoni tar-riskju effettiva u soda billi jiġu allinjati l-inċentivi ta’ ħlas mal-prestazzjoni sostenibbli. Bidla rappurtata mill-varjabbli lejn remunerazzjoni fissa tidher li introduċiet aktar stmerrija tar-riskju fis-settur kollettiv ta’ ġestjoni ta’ investiment alternattiv u żiedet l-għarfien ġenerali tas-sistemi ta’ remunerazzjoni xierqa. Minkejja din it-tendenza, ir-regoli tal-AIFMD dwar ir-remunerazzjoni jista’ jkollhom bżonn jiġu emendati biex jinġiebu f’konformità mar-reġimi simili previsti f’leġiżlazzjoni settorjali oħra, bħad-Direttiva dwar ir-Rekwiżiti ta’ Kapital (CRD) li nbidlet reċentement. Dan tal-aħħar jistabbilixxi istituzzjonijiet de minimis u l-ammonti ta’ remunerazzjoni li jistgħu jiġu eżentati milli jiddifferixxu l-ħlas varjabbli.
2.4 Impatt tar-regoli dwar l-investiment f’kumpaniji privati u fi/jew għall-benefiċċju ta’ pajjiżi li qed jiżviluppaw
Ir-regoli tal-AIFMD dwar ir-rapportar superviżorju, id-depożitarju, il-ġestjoni tar-riskju u r-remunerazzjoni ma jqisux b’mod espliċitu l-ispeċifiċitajiet kollha tal-ġestjoni tal-investimenti ta’ ekwità privata. Rekwiżiti ta’ trasparenza meta fond ta’ ekwità privata jakkwista ishma f’kumpaniji privati u d-dispożizzjonijiet kontra l-iżmembrament tal-assi ma jkunux ta’ piż żejjed iżda ma kienx possibbli li jiġi stabbilit il-valur miżjud tagħhom minħabba n-nuqqas ta’ data disponibbli.
Maniġers ta’ fondi ta’ ekwità privati, li minħabba d-daqs tal-portafoll ġestit tagħhom ma jaderixxux mal-parametri regolatorji tal-AIFMD jew tar-Regolament EuVECA, jiltaqgħu ma’ ostakli sinifikanti biex jikkummerċjalizzaw il-fondi tagħhom fi Stati Membri oħra. Konsegwentement, xi wħud jargumentaw li l-AIFMD tista’ tiġi emendata biex takkomoda aħjar is-settur tal-ekwità privata billi tneħħi imposti mhux meħtieġa u tfittex modi aktar effettivi biex tipproteġi kumpaniji jew emittenti mhux kwotati.
Ma kienx hemm biżżejjed evidenza li tippermetti li jiġi ddeterminat l-impatt tal-AIFMD fuq l-investiment fil-pajjiżi li qed jiżviluppaw jew għall-benefiċċju tagħhom. Madankollu, l-AIFMD ma tidhirx li timponi restrizzjonijiet regolatorji li jfixklu dawn l-investimenti.
Wara s-sottomissjoni ta’ dan ir-rapport lill-koleġiżlaturi tal-UE, l-AIFMD teħtieġ li l-Kummissjoni, jekk jitqies xieraq, tressaq proposti, inklużi emendi għall-AIFMD. Il-Kummissjoni għadha qed tivvaluta l-ħtieġa għal proposti ulterjuri f’dan il-qasam.
Ta’ min iżomm amment il-passi leġiżlativi oħra li l-UE ħadet reċentement fis-settur tal-ġestjoni tal-assi. Il-pakkett dwar id-Distribuzzjoni tal-Fond Transkonfinali ta’ Fondi ta’ Investiment ġie adottat fost l-oħrajn biex tiżdied it-trasparenza fir-rigward ta’ tariffi regolatorji mitluba mill-NCAs għall-ipproċessar ta’ notifiki tal-AIF u fir-rigward tar-regoli nazzjonali dwar il-kummerċjalizzazzjoni. Ir-rekwiżiti ta’ segregazzjoni tal-assi fejn il-kustodja tal-assi hija ddelegata lil parti terza ġew razzjonalizzati bl-emendi reċenti tar-Regolament Delegat tal-Kummissjoni 231/2013. L-emendi għad-Direttiva dwar ir-Rekwiżiti Kapitali jipprovdu li l-AIFMs li jappartjenu għall-istess grupp korporattiv jew konglomerat se jkollhom japplikaw ir-regoli tal-AIFMD dwar ir-remunerazzjoni u b’hekk jevitaw li jkunu soġġetti għal diversi settijiet ta’ regoli li jirregolaw intermedjarji finanzjarji differenti. Ir-Regolament tal-UE dwar divulgazzjonijiet relatati mas-sostenibbiltà fis-settur tas-servizzi finanzjarji għandu jiżgura l-koerenza tal-oqfsa regolatorji differenti tal-UE. Ir-Regolament dwar il-Fond Ewropew ta’ Kapital ta’ Riskju (EuVECA) li nbidel reċentement fetaħ l-użu tad-denominazzjonijiet “EuVECA” għal maniġers ta’ impriżi ta’ investiment kollettiv awtorizzati skont l-AIFMD u kabbar il-parametri ta’ investiment.
Madankollu, kwistjonijiet oħra li tqajmu f’dan ir-rapport jistgħu jeħtieġu aktar azzjoni fil-livell tal-Unjoni biex japprofondixxu s-suq tal-UE għal AIFs u jirreaġixxu fil-ħin għall-iżviluppi teknoloġiċi li jiżguraw li l-qafas legali AIFMD ikun adatt għall-iskop.