EUR-Lex Access to European Union law
This document is an excerpt from the EUR-Lex website
Document 52016DC0087
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS EU Action Plan against Wildlife Trafficking
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Pjan ta’ Azzjoni tal-UE kontra t-Traffikar ta’ Organiżmi Selvaġġi
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Pjan ta’ Azzjoni tal-UE kontra t-Traffikar ta’ Organiżmi Selvaġġi
COM/2016/087 final
IL-KUMMISSJONI EWROPEA
Brussell, 26.2.2016
COM(2016) 87 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Pjan ta’ Azzjoni tal-UE kontra t-Traffikar ta’ Organiżmi Selvaġġi
{SWD(2016) 38 final}
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Pjan ta’ Azzjoni tal-UE kontra t-Traffikar ta’ Organiżmi Selvaġġi
1. Deskrizzjoni tal-isfond
It-traffikar ta’ organiżmi selvaġġi 1 sar wieħed mill-aktar reati organizzati li jħalli qligħ fid-dinja. Huwa diffiċli li wieħed jikkwantifika l-iskala eżatta tiegħu, iżda sorsi differenti 2 jikkalkulaw li dan it-traffikar iwassal għal qligħ ta’ bejn EUR 8 u 20 biljun fis-sena. Dan it-traffikar ikopri firxa wiesgħa ta’ speċijiet protetti, fosthom l-iljunfanti u r-rinoċeronti, il-qroll, il-pangolini, it-tigri u x-xadini l-kbar.
Problema li qiegħda tikber madwar id-dinja kollha…
Il-kummerċ illeċitu fl-avorju żdied b’aktar mid-doppju mill-2007 ’l hawn u issa huwa tliet darbiet iktar milli kien fl-1998. Bejn l-2007 u l-2013, il-kaċċa illegali għar-rinoċeronti żdiedet b’7 000 % fl-Afrika t’Isfel, tant li qiegħda tipperikola s-sopravivenza ta’ din l-ispeċi 3 . Bejn Novembru tal-2013 u April tal-2014 biss, l-awtoritajiet f’diversi pajjiżi ta’ tranżitu u ta’ destinazzjoni qabdu aktar minn 4 000 tunnellata ta’ injam skur tat-tip “rosewood”, li huwa f’periklu kbir li jinqered għal kollox, li kienu suspettati li kienu esportati illegalment mill-Madagaskar.
L-UE għandha rwol importanti fl-indirizzar ta’ dan it-traffikar, minħabba li l-Ewropa bħalissa hija suq destinatarju u ċentru għat-traffikar ta’ organiżmi selvaġġi li jkunu fi tranżitu lejn reġjuni oħrajn. L-Ewropa hija wkoll ir-reġjun minn fejn jinqabdu ċerti speċijiet għall-kummerċ illegali. F’dawn l-aħħar snin, l-Istati Membri rrappurtaw, b’mod partikulari, li għamlu qabdiet tal-avorju u tal-qrejjen tar-rinoċeronti fi tranżitu u li kien hemm importazzjonijiet illegali ta’ rettili u għasafar eżotiċi ħajjin, filwaqt li bosta tunnellati ta’ sallur f’periklu kbir inbiegħu b’mod illegali mill-UE lejn l-Asja.
… li għandha implikazzjonijiet kbar għall-istat tad-dritt, għall-kriminalità u għas-sigurtà
It-traffikar ta’ organiżmi selvaġġi għandu impatt qerriedi fuq il-bijodiversità, billi qed jhedded li jwassal għall-qerda ta’ xi speċijiet. Barra minn hekk, huwa joħloq inċentivi għal prassi korrotta u jiġi ffaċilitat minnhom, u b’hekk idgħajjef l-istat tad-dritt. B’mod partikulari f’xi reġjuni fl-Afrika, huwa għandu impatt negattiv ħafna fuq il-potenzjal għall-iżvilupp ekonomiku 4 .
Għall-kriminali, it-traffikar tal-organiżmi selvaġġi huwa attraenti ħafna minħabba li jħalli ħafna qligħ u, fil-biċċa l-kbira tal-pajjiżi, ma jingħatax prijorità għolja għall-infurzar meta mqabbel ma’ forom oħrajn ta’ traffikar u għalhekk ir-riskju tagħhom li jinqabdu u li jkollhom iħallsu l-pieni għalih huwa limitat ħafna. Ġew irrappurtati regolarment rabtiet bejn dan it-tip ta’ traffikar u l-ħasil tal-flus u forom oħrajn tal-kriminalità organizzata, bħat-traffikar tad-droga u tal-armi tan-nar 5 . Il-Kunsill tas-Sigurtà tan-Nazzjonijiet Uniti rrikonoxxa li t-traffikar tal-organiżmi selvaġġi fl-Afrika Ċentrali qiegħed iwassal għal kunflitti u jhedded is-sigurtà nazzjonali u reġjonali billi jipprovdi sors ta’ finanzjament għall-gruppi tal-milizzja 6 .
Profil internazzjonali ogħla…
Matul dawn l-aħħar snin żdiedet l-attenzjoni għat-traffikar tal-organiżmi selvaġġi fil-livell politiku internazzjonali, minħabba ż-żieda fl-iskala u fl-impatt tiegħu. F’Lulju tal-2015, l-Assemblea Ġenerali tan-Nazzjonijiet Uniti adottat l-ewwel riżoluzzjoni tagħha dwar dan is-suġġett, li kienet ikkofinanzjata mill-Istati Membri kollha tal-UE 7 . Din il-kwistjoni ġiet indirizzata b’mod speċifiku wkoll f’avvenimenti internazzjonali importanti oħrajn li ġew organizzati dan l-aħħar, pereżempju fil-konferenza ta’ livell għoli li saret f’Kasane fil-Botswana f’Marzu tal-2015 8 u fis-Summit tal-G7 li sar f’Ġunju tal-2015 9 . Minħabba f’hekk, il-komunità internazzjonali, fosthom l-UE u l-Istati Membri tagħha, intrabtet b’mod konġunt li zżid l-azzjonijiet tagħha kontra t-traffikar.
Ġew adottati għadd kbir ta’ miżuri kontra t-traffikar tal-organiżmi selvaġġi fil-kuntest tal-Konvenzjoni dwar il-Kummerċ Internazzjonali fl-Ispeċijiet ta’ Fawna u Flora Selvaġġi fil-Periklu (CITES), li hija trattat internazzjonali ewlieni li jirregola l-kummerċ internazzjonali fl-organiżmi selvaġġi li l-UE saret tifforma parti minnu fl-2015. L-Istati Uniti waqqfu Task Force Presidenzjali u adottaw strateġija nazzjonali kontra t-traffikar tal-organiżmi selvaġġi. Pajjiżi bi swieq ewlenin, bħaċ-Ċina, qegħdin juru involviment akbar, l-iktar permezz ta’ sforzi aktar b’saħħithom ta’ infurzar, kif ukoll ir-rieda li jikkooperaw aktar mill-qrib mal-UE fuq dawn il-kwistjonijiet. L-Unjoni Afrikana bdiet timplimenta strateġija mifruxa mal-kontinent kollu.
…li għandu jinbidel f’azzjonijiet konkreti
L-UE diġà wriet sens ta’ tmexxija fl-indirizzar tal-kummerċ illegali fir-riżorsi naturali billi adottat politiki ambizzjużi dwar il-prodotti tal-injam u tas-sajd. Dan il-Pjan ta’ Azzjoni tal-UE juri li l-UE hija lesta tilħaq l-aspettattivi u l-impenji internazzjonali tagħha, u li hija qiegħda tgħolli l-livell ta’ ambizzjoni tagħha fir-rigward tal-azzjonijiet kontra l-kummerċ illegali fl-organiżmi selvaġġi. Dan se jgħin ukoll biex jiġi żgurat li l-investimenti sinifikanti li saru fl-aħħar deċennji permezz tal-appoġġ tal-UE għall-iżvilupp għall-konservazzjoni tal-organiżmi selvaġġi madwar id-dinja kollha ma jiġux imminati mill-attivitajiet kriminali.
Il-Pjan ta’ Azzjoni huwa ta’ kontribut kbir għall-Miri ta’ Żvilupp Sostenibbli stabbiliti fil-kuntest tal-Aġenda 2030 għall-Iżvilupp Sostenibbli maqbula mill-kapijiet tal-Istati waqt Summit tan-Nazzjonijiet Uniti li sar f’Settembru tal-2015. L-Għan numru 15, li għandu x’jaqsam mal-bijodiversità, jistabbilixxi l-mira li “tittieħed azzjoni urġenti sabiex jintemmu l-kaċċa illegali u t-traffikar ta’ speċijiet protetti tal-flora u tal-fawna u jiġu indirizzati kemm id-domanda u kemm il-provvista tal-prodotti illegali magħmula mill-organiżmi selvaġġi” 10 .
Il-Parlament Ewropew appella għal Pjan ta’ Azzjoni f’riżoluzzjoni li huwa adotta f’Jannar tal-2014 11 . Waqt konsultazzjoni mal-partijiet interessati dwar l-approċċ tal-UE b’rabta mal-ġlieda kontra t-traffikar tal-organiżmi selvaġġi li l-Kummissjoni Ewropea nediet fi Frar tal-2014, ħafna Stati Membri tal-UE, organizzazzjonijiet internazzjonali, NGOs u negozji kkonċernati wkoll kienu favur Pjan ta’ Azzjoni tal-UE 12 .
Jeħtieġ li l-UE u l-Istati Membri tagħha jindirizzaw il-problema flimkien. Regoli għall-UE kollha li jirregolaw il-kummerċ fl-organiżmi selvaġġi ilhom fis-seħħ fl-Istati Membri kollha mill-1983 13 , u dawn jimplimentaw is-CITES, u fl-2007 l-Kummissjoni ħarġet rakkomandazzjoni dwar l-infurzar 14 .
Madankollu, rapporti jiżvelaw li jeżistu differenzi sinifikanti fil-mod kif l-Istati Membri jimplimentaw u jinfurzaw dawn ir-regoli komuni 15 . Dan jirrappreżenta riskju kbir; il-kriminali faċilment jistgħu jisfruttaw din is-sitwazzjoni billi jbiddlu r-rotot kummerċjali tagħhom skont il-bżonn, kif urew għadd ta’ każijiet f’dawn l-aħħar snin. Minn diversi rapporti u matul il-konsultazzjoni mal-partijiet interessati, irriżulta wkoll li n-nuqqas ta’ għarfien u ta’ involviment politiku wkoll huma ta’ xkiel kbir biex jiġi miġġieled b’mod effettiv it-traffikar tal-organiżmi selvaġġi.
L-UE u l-Istati Membri tagħha ntrabtu b’mod konġunt, permezz ta’ Pjan ta’ Azzjoni, li jieħdu serje ta’ miżuri, li jimplimentaw l-impenji internazzjonali komuni u li jirrikonoxxu f’livell politiku l-importanza li tiġi indirizzata din il-problema, u dan huwa mod kif jiġi żgurat infurzar aktar uniformi fl-UE kollha. Dan se jgħin biex tissaħħaħ il-kredibbiltà tal-UE madwar id-dinja kollha meta din titlob lis-sħab globali tagħha jieħdu azzjonijiet aktar b’saħħithom kontra t-traffikar tal-organiżmi selvaġġi.
Fl-implimentazzjoni ta’ dan il-Pjan ta’ Azzjoni, ser ikun essenzjali li jkun hemm ħidma mill-qrib mal-partijiet interessati, fosthom mal-organizzazzjonijiet tas-soċjetà ċivili u mas-setturi kummerċjali rilevanti, fuq ħafna miżuri speċifiċi, sabiex l-għarfien u l-għarfien espert disponibbli jintużaw bl-aħjar mod possibbli u jiġi żgurat impatt massimu.
2. L-elementi tal-Pjan ta’ Azzjoni
Il-Pjan ta’ Azzjoni tal-UE fih sensiela ta’ miżuri li l-istituzzjonijiet tal-UE u/jew l-Istati Membri tal-UE jridu jieħdu. Dawn il-miżuri huma deskritti fl-Anness ta’ din il-Komunikazzjoni.
Jidher b’mod ċar li ser ikunu meħtieġa biżżejjed finanzi u riżorsi umani sabiex jiġu appoġġjati dawn il-miżuri. Dan il-Pjan ta’ Azzjoni jipprovdi l-impetu u l-qafas biex ir-riżorsi eżistenti tal-UE jintużaw aħjar. Il-miżuri huma ddisinjati essenzjalment biex itejbu l-kooperazzjoni bejn il-parteċipanti kollha kkonċernati, biex l-għodod u l-politiki eżistenti jintużaw b’mod aktar effettiv u biex jissaħħu s-sinerġiji bejniethom sabiex it-traffikar tal-organiżmi selvaġġi jkun jista’ jiġi indirizzat b’mod aħjar fl-UE u mad-dinja kollha.
Il-miżuri, li huma ddisinjati biex jindirizzaw problema kumplessa b’mod olistiku billi jinvolvu lill-organizzazzjonijiet rilevanti kollha, huma bbażati fuq tliet prijoritajiet:
(1) il-prevenzjoni tat-traffikar tal-organiżmi selvaġġi u l-indirizzar tal-kawżi prinċipali tiegħu,
(2) l-implimentazzjoni u l-infurzar tar-regoli eżistenti u l-ġlieda b’mod aktar effettiv kontra l-kriminalità organizzata b’rabta mal-organiżmi selvaġġi, u
(3) it-tisħiħ tas-sħubija globali tal-pajjiżi tal-oriġini, konsumaturi u ta’ tranżitu kontra t-traffikar tal-organiżmi selvaġġi.
L-għanijiet u l-azzjonijiet relatati magħhom li jidħlu f’kull prijorità huma spjegati fid-dettall fit-tabella mogħtija fl-Anness.
Il-prijorità numru 1: Il-prevenzjoni tat-traffikar tal-organiżmi selvaġġi u l-indirizzar tal-kawżi prinċipali tiegħu
Ser isiru sforzi sabiex titnaqqas id-domanda għall-prodotti illegali li ġejjin mill-organiżmi selvaġġi u l-provvista tagħhom kemm fl-UE kif ukoll mad-dinja kollha billi jintużaw l-għodod multilaterali (tas-CITES) u l-għodod speċifiċi tal-UE disponibbli, billi jiġu appoġġjati kampanji speċifiċi u billi jkompli jiġi llimitat il-kummerċ fl-avorju fl-UE u minnha (l-għan 1.1 – ara t-tabella mogħtija fl-Anness). Mod importanti ta’ kif jiġu indirizzati l-kawżi prinċipali tat-traffikar tal-organiżmi selvaġġi huwa li jiġi żgurat li l-komunitajiet rurali fil-pajjiżi tal-oriġini jipparteċipaw aktar fil-konservazzjoni tal-organiżmi selvaġġi u li jibbenifikaw aktar minnha (l-għan 1.2).
Qasam ta’ prijorità ieħor huwa l-involviment b’mod aktar attiv mas-setturi kummerċjali rilevanti, li jvarjaw minn dawk attivi fil-kummerċ tal-organiżmi selvaġġi jew li jużaw prodotti li ġejjin mill-organiżmi selvaġġi għal dawk li jipprovdu servizzi għal dan il-kummerċ. Dan jirrifletti l-impenn tal-UE lejn il-ġestjoni responsabbli tal-ktajjen globali tal-provvista 16 (l-għan 1.3). Fl-aħħarnett, ser jittieħdu miżuri bilaterali u multilaterali sabiex tiġi indirizzata l-korruzzjoni, li hija fattur abilitanti kruċjali għat-traffikar tal-organiżmi selvaġġi tul il-katina tal-infurzar (l-għan 1.4).
Il-prijorità numru 2: L-implimentazzjoni u l-infurzar tar-regoli eżistenti u l-ġlieda b’mod aktar effettiv kontra l-kriminalità organizzata b’rabta mal-organiżmi selvaġġi
Għalkemm ir-regoli tal-UE u internazzjonali eżistenti dwar il-kummerċ fl-organiżmi selvaġġi b’mod ġenerali huma xierqa, bosta studji u rapporti jiżvelaw diffikultajiet sinifikanti fl-implimentazzjoni u l-infurzar tagħhom 17 . Dan jgħodd b’mod partikulari għall-fenomenu relattivament ġdid tal-kriminalità organizzata b’rabta mal-organiżmi selvaġġi. Għandhom jiġu analizzati n-nuqqasijiet fl-implimentazzjoni għall-Istati Membri kollha u għandhom jiġu żviluppati strateġiji biex dawn in-nuqqasijiet jiġu indirizzati, sabiex jiġi żgurat li r-regoli eżistenti jiġu infurzati b’mod aktar konsistenti fl-UE kollha (l-għan 2.1).
L-iffissar b’mod konġunt tal-prijoritajiet tal-infurzar u l-għoti ta’ appoġġ iddedikat min-naħa tal-Europol u tal-Eurojust għall-każijiet transkonfinali ser jgħinu biex il-kontrolli u l-infurzar ikunu aktar strateġiċi fin-natura tagħhom. F’konformità mal-Aġenda tal-UE dwar is-Sigurtà, fl-2016 ser jinbeda eżerċizzju ta’ rieżami sabiex jiġi vvalutat jekk il-qafas leġiżlattiv attwali tal-UE biex tiġi indirizzata l-kriminalità ambjentali, b’mod partikulari l-kriminalità organizzata b’rabta mal-organiżmi selvaġġi, huwiex adattat għall-iskop tiegħu.
L-iskop tal-għan 2.2 huwa li jsaħħaħ il-kapaċità tal-oqsma kollha tal-katina tal-infurzar u tal-ġudikatura biex tkun tista’ tittieħed azzjoni effettiva kontra t-traffikar tal-organiżmi selvaġġi fl-UE. Dan jirrikjedi azzjoni nazzjonali sabiex jittejbu l-kooperazzjoni u l-koordinazzjoni bejn l-aġenziji u l-komunikazzjoni u l-fluss tad-dejta bejniethom permezz tal-iskambju tal-aqwa prassi fil-livell tal-UE. Jeħtieġ li tittejjeb il-bażi tal-għarfien dwar il-każijiet ta’ traffikar tal-organiżmi selvaġġi, u t-taħriġ huwa essenzjali.
Il-ġlieda b’mod aktar effettiv kontra l-kriminalità organizzata (l-għan 2.3) fil-qasam tat-traffikar tal-organiżmi selvaġġi teħtieġ sensibilizzazzjoni mmirata fost l-ispeċjalisti dwar il-kriminalità organizzata, iċ-ċiberkriminalità u l-ħasil tal-flus. Barra minn hekk, l-Istati Membri kollha għandhom jimplimentaw l-impenji internazzjonali li ħadu sabiex jiżguraw li l-liġijiet tagħhom dwar il-kriminalità organizzata jkunu jkopru t-traffikar tal-organiżmi selvaġġi u li jkunu jistgħu jiġu imposti l-pieni x-xierqa għat-traffikar. Fl-aħħarnett, trid tittejjeb il-kooperazzjoni internazzjonali dwar l-infurzar (l-għan 2.4) permezz tal-parteċipazzjoni fl-operazzjonijiet internazzjonali tal-infurzar tal-liġijiet, tal-assistenza teknika u ta’ appoġġ finanzjarju mmirat.
Il-prijorità numru 3: It-tisħiħ tas-sħubija globali tal-pajjiżi tal-oriġini, konsumaturi u ta’ tranżitu kontra t-traffikar tal-organiżmi selvaġġi
Ser jittieħdu diversi miżuri sabiex jiżdied il-finanzjament għall-pajjiżi li qegħdin jiżviluppaw biex dawn jiġu appoġġati fl-isforzi tagħhom fil-ġlieda kontra t-traffikar tal-organiżmi selvaġġi, u sabiex dan l-appoġġ isir aktar effettiv u jibda jintuża b’mod aktar strateġiku. Dan ser isir permezz ta’ valutazzjonijiet komprensivi tal-ħtiġijiet u billi jkun hemm koordinazzjoni iktar effettiva tal-appoġġ ma’ donaturi oħrajn (l-għan 3.1). Sabiex tissaħħaħ is-sħubija globali kontra t-traffikar tal-organiżmi selvaġġi, l-għodod diplomatiċi tal-UE u tal-Istati Membri tagħha, flimkien ma’ għodod oħrajn, b’mod partikulari l-politika kummerċjali tal-UE, għandhom jintużaw b’mod aktar effettiv fir-relazzjonijiet mal-pajjiżi tal-oriġini, konsumaturi u ta’ tranżitu ewlenin u mal-organizzazzjonijiet reġjonali rilevanti (l-għan 3.2).
Għandhom jiġu żviluppati għodod aħjar sabiex jiġu indirizzati r-rabtiet li jeżistu f’xi reġjuni bejn it-traffikar tal-organiżmi selvaġġi u s-sigurtà (l-għan 3.3). Fl-aħħarnett, għandhom jintużaw il-proċessi multilaterali eżistenti fil-ftehimiet u fil-fora internazzjonali sabiex din il-kwistjoni tinżamm fuq l-aġenda globali, sabiex jinżamm l-impenn politiku u sabiex tiġi mmonitorjata l-implimentazzjoni tal-impenji. Il-Konferenza li jmiss tal-Partijiet tas-CITES, li ser issir f’Settembru tal-2016, ser tkun partikularment importanti għal dan l-iskop (l-għan 3.4).
3. Il-monitoraġġ u l-evalwazzjoni
Il-Pjan ta’ Azzjoni jkopri l-ħames snin mill-2016 sal-2020. It-tabella mogħtija fl-Anness tassenja kull miżura lil attur tal-UE (is-servizzi tal-Kummissjoni, is-SEAE, l-Europol u l-Eurojust) u/jew lill-Istati Membri u tistabbilixxi skeda taż-żmien għall-implimentazzjoni ta’ dawn il-miżuri. Is-servizzi tal-Kummissjoni u s-SEAE ser jistabbilixxu tabella ta’ valutazzjoni sabiex jimmonitorjaw l-implimentazzjoni.
Il-Grupp ta’ infurzar tal-UE b’rabta mal-kummerċ fl-organiżmi selvaġġi, li twaqqaf bir-Regolament tal-Kunsill (KE) Nru 338/97 u li huwa magħmul mir-rappreżentanti tal-awtoritajiet tal-infurzar tal-Istati Membri tal-UE, għandu jirrevedi l-progress li jkun qed isir darbtejn fis-sena. Sa Lulju tal-2018, il-Kummissjoni għandha tibgħat rapport lill-Kunsill u lill-Parlament Ewropew dwar il-progress li jkun sar fl-implimentazzjoni tal-Pjan ta’ Azzjoni u dwar jekk il-prijoritajiet u l-għanijiet tiegħu humiex xierqa u rilevanti. Fl-2020 ser jiġu evalwati l-progress li jkun sar fit-trażżin tat-traffikar tal-organiżmi selvaġġi u s-suċċess tal-Pjan ta’ Azzjoni. Abbażi ta’ dan, il-Kummissjoni se tqis x’azzjoni ulterjuri hija meħtieġa.
Grupp ta’ bejn is-servizzi fil-Kummissjoni se jikkoordina l-attivitajiet fl-oqsma kkonċernati u se jiżgura li s-servizzi rilevanti kollha tal-Kummissjoni u s-SEAE jwettqu l-kompiti allokati lilhom.
4. Ir-rabtiet ma’ inizjattivi u politiki oħrajn tal-UE
Il-Pjan ta’ Azzjoni ser jieħu post ir-Rakkomandazzjoni tal-Kummissjoni 2007/425/KE li tidentifika sensiela ta’ azzjonijiet għall-infurzar tar-Regolament (KE) Nru 338/97 dwar il-protezzjoni ta’ speċi ta’ fawna u flora selvaġġi billi jkun regolat il-kummerċ fihom.
Il-Pjan ta’ Azzjoni ser jiġi implimentat b’tali mod li tiġi żgurata l-konsistenza mal-politiki eżistenti tal-UE li għandhom effett fuq il-kummerċ illegali fir-riżorsi naturali. Dawn jinkludu l-Pjan ta’ Azzjoni tal-UE dwar l-Infurzar tal-Liġi, it-Tmexxija u l-Kummerċ fis-Settur Forestali (FLEGT), il-politika tal-UE b’rabta mal-ġlieda kontra s-sajd illegali, mhux irrappurtat u mhux irregolat (is-sajd IUU) u l-inizjattivi tal-UE kontra t-traffikar tal-iskart, tad-droga, tal-oġġetti foloz, tal-armi tan-nar jew tal-bnedmin, il-ħasil tal-flus u l-flussi finanzjarji illeċiti.
ANNESS – Tabella ta’ azzjonijiet
Il-prijorità numru 1 – Il-prevenzjoni tat-traffikar tal-organiżmi selvaġġi u l-indirizzar tal-kawżi prinċipali tiegħu
|
Azzjonijiet |
Min hu responsabbli għall-azzjonijiet |
Ir-riżultati mistennija |
L-iskeda taż-żmien |
|
|
L-għan 1.1 It-tnaqqis tad-domanda għall-prodotti illegali li ġejjin mill-organiżmi selvaġġi u tal-provvista tagħhom |
1. Żieda fl-appoġġ għall-kampanji ta’ sensibilizzazzjoni u għall-kampanji mmirati lejn it-tnaqqis tad-domanda fl-UE u madwar id-dinja kollha |
IL-KUMMISSJONI/ L-HRVP 18 / L-ISTATI MEMBRI |
It-teħid ta’ azzjonijiet u l-provvediment ta’ finanzjament għas-sensibilizzazzjoni u għat-tnaqqis tad-domanda għall-prodotti illegali li ġejjin mill-organiżmi selvaġġi f’pajjiżi importanti li mhumiex Stati Membri tal-UE u fl-UE, b’mod partikulari għal speċijiet innegozjati illegalment f’numri kbar fl-UE |
Azzjoni kontinwa, bl-ewwel pass importanti jintlaħaq fi tmiem l-2016 |
|
IL-KUMMISSJONI/ L-ISTATI MEMBRI |
Il-kondiviżjoni tal-għodod u tal-materjali ta’ sensibilizzazzjoni eżistenti fost l-Istati Membri |
Fi tmiem l-2016 |
||
|
2. Iktar limitazzjoni tal-kummerċ fl-avorju fl-UE u minnha |
IL-KUMMISSJONI |
Il-ħruġ ta’ linji gwida min-naħa tal-Kummissjoni sabiex tkun żgurata interpretazzjoni uniformi tar-regoli tal-UE bil-għan li tiġi sospiża l-esportazzjoni tal-avorju mhux maħdum ta’ qabel il-Konvenzjoni u jiġi ggarantit li fl-UE jiġu nnegozjati biss oġġetti tal-avorju antiki legali |
Fi tmiem l-2016 |
|
|
L-ISTATI MEMBRI |
L-Istati Membri ma joħorġux dokumenti ta’ esportazzjoni jew ta’ riesportazzjoni għall-avorju mhux maħdum ta’ qabel il-Konvenzjoni L-Istati Membri joħorġu biss ċertifikati għall-kummerċ fl-UE għall-oġġetti tal-avorju antiki abbażi tal-kriterji ddefiniti fil-linji gwida |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
3. It-tnaqqis jew il-projbizzjoni tal-importazzjonijiet mhux sostenibbli tal-ispeċijiet fil-periklu fl-UE billi jiġi propost li dawn jitniżżlu fl-Appendiċijiet tas-CITES (pereżempju l-ispeċijiet tar-rettili rari) |
IL-KUMMISSJONI |
It-tressiq ta’ proposti ġodda għall-elenkar fl-Appendiċijiet tas-CITES sabiex dawn jitqiesu mill-Konferenzi tal-Partijiet (CoPs) tas-CITES |
Azzjoni kontinwa, bl-ewwel pass importanti jintlaħaq f’April tal-2016 |
|
|
L-għan 1.2 L-iżgurar li l-komunitajiet rurali fil-pajjiżi tal-oriġini jipparteċipaw fil-konservazzjoni tal-organiżmi selvaġġi u jibbenifikaw minnha |
4. It-tisħiħ tal-parteċipazzjoni tal-komunitajiet rurali fil-ġestjoni u fil-konservazzjoni tal-organiżmi selvaġġi |
IL-KUMMISSJONI/ L-ISTATI MEMBRI |
Il-fatt li l-ħtieġa għal parteċipazzjoni xierqa tal-komunitajiet rurali fid-disinn u fl-implimentazzjoni tal-miżuri kontra t-traffikar tal-organiżmi selvaġġi tibda titqies bħala prijorità fil-politiki u fil-finanzjament rilevanti tal-Istati Membri u tal-UE |
Azzjoni kontinwa, bl-ewwel pass importanti jintlaħaq fi tmiem l-2016 |
|
5. L-għoti ta’ appoġġ għall-iżvilupp ta’ għajxien alternattiv u sostenibbli għall-komunitajiet li jgħixu fil-ħabitats tal-organiżmi selvaġġi jew qribhom |
IL-KUMMISSJONI/ L-HRVP/ L-ISTATI MEMBRI |
Il-fatt li l-għoti ta’ appoġġ għal attivitajiet ekonomiċi sostenibbli li minnhom jibbenifikaw il-komunitajiet rurali li jgħixu fil-ħabitats tal-organiżmi selvaġġi jew qribhom jibda jitqies bħala prijorità fil-politiki tal-Istati Membri u tal-UE dwar il-finanzjament tal-appoġġ għaż-żoni rurali fil-pajjiżi tal-oriġini |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
L-għan 1.3 Iż-żieda fl-involviment tas-settur kummerċjali fl-isforzi sabiex jiġi miġġieled it-traffikar tal-organiżmi selvaġġi u jitħeġġeġ l-użu ta’ sorsi sostenibbli għall-prodotti li ġejjin mill-organiżmi selvaġġi |
6. Is-sensibilizzazzjoni tas-setturi kummerċjali li jinnegozjaw fil-prodotti li ġejjin mill-organiżmi selvaġġi fl-UE jew minnha jew li jiffaċilitaw it-tali kummerċ |
IL-KUMMISSJONI |
L-identifikazzjoni tal-parteċipanti ewlenin fis-setturi kummerċjali marbutin mal-kummerċ fl-organiżmi selvaġġi fil-livell tal-UE u t-twaqqif ta’ mezzi ta’ komunikazzjoni regolari bejn dawn il-parteċipanti u l-Kummissjoni dwar kwistjonijiet marbutin mal-kummerċ fl-organiżmi selvaġġi |
Fi tmiem l-2016 |
|
IL-KUMMISSJONI |
L-organizzazzjoni ta’ sessjonijiet tal-Grupp ta’ infurzar tal-UE b’rabta mal-kummerċ fl-organiżmi selvaġġi ma’ parteċipanti kummerċjali sabiex jiġu diskussi kwistjonijiet speċifiċi (pereżempju l-mediċina tradizzjonali Ċiniża, l-annimali domestiċi eżotiċi, l-industrija ta’ lussu, it-turiżmu għall-kaċċa, it-trasport, il-kumpaniji tal-kurrieri u l-kummerċ elettroniku) |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
7. L-għoti ta’ appoġġ għall-inizjattivi tas-settur privat biex jitrażżan il-kummerċ illegali fl-organiżmi selvaġġi u jitħeġġeġ l-użu ta’ sorsi sostenibbli għall-prodotti li ġejjin mill-organiżmi selvaġġi fl-UE jew minnha |
IL-KUMMISSJONI/ L-ISTATI MEMBRI |
L-għoti ta’ appoġġ għall-inizjattivi mmexxija mis-settur privat u għas-sħubiji pubbliċi-privati eżistenti u l-kondiviżjoni tal-aqwa prassi sabiex jitħeġġu inizjattivi ġodda |
Fi tmiem l-2017 |
|
|
L-għan 1.4 L-indirizzar tal-korruzzjoni marbuta mat-traffikar tal-organiżmi selvaġġi |
8. L-għoti ta’ appoġġ għall-inizjattivi biex tiġi miġġielda l-korruzzjoni marbuta mat-traffikar tal-organiżmi selvaġġi fil-livelli nazzjonali, reġjonali u internazzjonali |
IL-KUMMISSJONI/ L-HRVP |
L-inklużjoni tat-traffikar tal-organiżmi selvaġġi fil-politika u fl-għodod tal-UE kontra l-korruzzjoni (l-iktar bħala parti mid-djalogi ma’ pajjiżi terzi ewlenin li jirċievu appoġġ baġitarju) |
Azzjoni kontinwa, bl-ewwel pass importanti jintlaħaq fi tmiem l-2016 |
|
IL-KUMMISSJONI/ L-HRVP/ L-ISTATI MEMBRI |
L-indirizzar tal-kwistjoni f’laqgħat bilaterali ma’ pajjiżi sħab ewlenin u fil-fora multilaterali rilevanti, fosthom fil-G7, fil-G20 u fil-Konvenzjoni tan-Nazzjonijiet Uniti kontra l-Korruzzjoni |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
IL-KUMMISSJONI/ L-ISTATI MEMBRI |
It-tressiq ta’ proposta rilevanti għal riżoluzzjoni biex din titqies waqt is-17-il Konferenza tal-Partijiet tas-CITES |
F’April tal-2016 |
Il-prijorità numru 2 – L-implimentazzjoni u l-infurzar tar-regoli eżistenti u l-ġlieda b’mod aktar effettiv kontra l-kriminalità organizzata b’rabta mal-organiżmi selvaġġi
|
Azzjonijiet |
Min hu responsabbli għall-azzjonijiet |
Ir-riżultati mistennija |
L-iskeda taż-żmien |
|
|
L-għan 2.1 L-iżgurar ta’ implimentazzjoni aktar uniformi tar-regoli tal-UE dwar il-kummerċ fl-organiżmi selvaġġi u l-iżvilupp ta’ approċċ aktar strateġiku għall-kontrolli u l-infurzar tar-regoli kontra t-traffikar tal-organiżmi selvaġġi fil-livell tal-UE |
9. L-iżvilupp ta’ strateġiji biex titjieb il-konformità mal-leġiżlazzjoni tal-UE dwar l-organiżmi selvaġġi fil-livell nazzjonali |
IL-KUMMISSJONI |
It-twettiq ta’ valutazzjoni, min-naħa tal-Kummissjoni, tan-nuqqasijiet fl-implimentazzjoni tar-regolamenti tal-UE dwar il-kummerċ fl-organiżmi selvaġġi f’kull Stat Membru u t-tressiq ta’ rakkomandazzjonijiet dwar kif jistgħu jittejbu dawn in-nuqqasijiet |
Fi tmiem l-2016 |
|
L-ISTATI MEMBRI |
L-implimentazzjoni tar-rakkomandazzjonijiet fl-Istati Membri |
Fl-2017 |
||
|
IL-KUMMISSJONI |
Il-monitoraġġ b’mod proattiv tal-implimentazzjoni tar-regoli tal-UE dwar l-importazzjoni tat-trofej tal-kaċċa fl-UE sabiex ikun żgurat li t-tali trofej ikunu ta’ oriġini legali u sostenibbli |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
10. It-titjib fir-rata ta’ identifikazzjoni tal-attivitajiet illegali |
L-ISTATI MEMBRI |
Minbarra l-kontrolli fil-punti tal-qsim tal-fruntiera meħtieġa skont ir-Regolament tal-Kunsill (KE) Nru 338/97, l-iżgurar tal-monitoraġġ u tal-infurzar tal-konformità fil-pajjiż, b’mod partikulari permezz ta’ kontrolli regolari fuq in-negozjanti u d-detenturi, bħall-ħwienet li jbiegħu l-annimali domestiċi, dawk li jnisslu l-annimali u l-pjanti u l-mixtliet |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
11. Iż-żieda fl-isforzi sabiex tiġi żgurata l-implimentazzjoni tal-pjan direzzjonali tal-UE biex jinqerdu l-qtil, l-insib u l-kummerċ illegali tal-għasafar (li hija rilevanti wkoll fil-kuntest tal-prijorità numru 1) |
IL-KUMMISSJONI |
Il-forniment ta’ finanzjament għat-Task Force Intergovernattiva dwar il-qtil illegali tal-għasafar fil-Mediterran stabbilita fil-qafas tal-Konvenzjoni dwar l-Ispeċijiet Migratorji u l-organizzazzjoni tal-ewwel laqgħa ta’ din it-Task Force |
F’nofs l-2016 |
|
|
IL-KUMMISSJONI/ L-ISTATI MEMBRI |
It-teħid ta’ azzjonijiet sabiex jittejbu l-monitoraġġ u l-infurzar nazzjonali tal-konformità |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
12. Id-definizzjoni u l-valutazzjoni regolari tar-riskji ta’ prijorità |
L-ISTATI MEMBRI |
Id-definizzjoni fil-livell nazzjonali tal-prijoritajiet ta’ infurzar fir-rigward tal-ispeċijiet u tal-prodotti fil-mira (bħas-sallur, l-avorju, il-qrejjen tar-rinoċeronti u r-rettili u l-għasafar ħajjin), tar-rotot tal-kummerċ u tal-metodi ta’ kuntrabandu |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
IL-KUMMISSJONI/ L-Europol/L-ISTATI MEMBRI |
Qbil fuq prijoritajiet għall-UE kollha, abbażi ta’ valutazzjoni komuni bbażata fuq ir-riskji, milħuq fil-Grupp ta’ infurzar tal-UE b’rabta mal-kummerċ fl-organiżmi selvaġġi, b’kooperazzjoni mal-Europol |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
13. It-titjib fil-kooperazzjoni fost l-Istati Membri b’rabta mal-każijiet ta’ traffikar transkonfinali tal-organiżmi selvaġġi |
IL-KUMMISSJONI/ L-Europol/L-Eurojust |
L-allokazzjoni ta’ biżżejjed riżorsi fl-Europol u fl-Eurojust sabiex ikun jista’ jsir ix-xogħol b’rabta mal-ġlieda kontra t-traffikar tal-organiżmi selvaġġi |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
L-Europol/L-Eurojust/L-ISTATI MEMBRI |
It-twettiq ta’ operazzjonijiet konġunti regolari mill-Istati Membri tal-UE li jinvolvu l-kooperazzjoni transkonfinali (iffaċilitati mill-Europol) |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
L-Europol/L-Eurojust/L-ISTATI MEMBRI |
It-twaqqif ta’ skwadri ta’ investigazzjoni konġunti li fihom ikunu involuti l-Europol u/jew l-Eurojust |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
14. Ir-rieżami tal-politika tal-UE u tal-qafas leġiżlattiv tagħha b’rabta mal-kriminalità ambjentali f’konformità mal-Aġenda Ewropea dwar is-Sigurtà |
IL-KUMMISSJONI |
Analiżi tal-effettività tad-Direttiva 2008/99/KE, fosthom f’dak li għandu x’jaqsam mas-sanzjonijiet kriminali li japplikaw għat-traffikar tal-organiżmi selvaġġi fl-UE kollha |
Fl-2016 |
|
|
L-għan 2.2 Iż-żieda tal-kapaċità tal-partijiet kollha tal-katina tal-infurzar u tal-ġudikatura biex ikun jista’ jiġi miġġieled it-traffikar tal-organiżmi selvaġġi |
15. It-titjib tal-kooperazzjoni, tal-koordinazzjoni, tal-komunikazzjoni u tal-fluss tad-dejta bejn l-aġenziji tal-infurzar responsabbli fl-Istati Membri |
L-ISTATI MEMBRI |
Id-dħul fis-seħħ, f’kull Stat Membru, ta’ mekkaniżmu ta’ koordinazzjoni (bħal task force bejn l-aġenziji u/jew Memorandum ta’ Qbil) bejn l-aġenziji rilevanti (jiġifieri d-dwana, is-servizzi ta’ spezzjoni, il-pulizija u l-awtoritajiet ta’ ġestjoni u ta’ infurzar tas-CITES), u l-fatt li l-awtoritajiet kollha b’responsabbiltà f’dan il-qasam ikollhom aċċess għall-mezzi ta’ komunikazzjoni rilevanti |
F’nofs l-2017 |
|
L-ISTATI MEMBRI |
Analiżi mill-Istati Membri tal-għażliet għall-iskambju tad-dejta bejn l-awtoritajiet responsabbli għal dan il-qasam skont il-leġiżlazzjoni nazzjonali |
F’nofs l-2017 |
||
|
IL-KUMMISSJONI/ L-ISTATI MEMBRI |
Il-ġbir u l-kondiviżjoni fil-livell tal-UE tal-aqwa prassi għall-kooperazzjoni bejn l-aġenziji u għall-monitoraġġ u l-infurzar effettivi tal-konformità fl-Istati Membri permezz tal-Grupp ta’ infurzar tal-UE b’rabta mal-kummerċ fl-organiżmi selvaġġi |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
16. It-titjib tal-bażi tal-għarfien dwar il-kontrolli, l-investigazzjonijiet, il-prosekuzzjonijiet u l-proċedimenti ġudizzjarji kontra t-traffikar tal-organiżmi selvaġġi |
L-ISTATI MEMBRI |
Il-forniment aktar sistematiku, min-naħa tal-Istati Membri, tad-dejta kwalitattiva u statistika rilevanti, inkluża d-dejta dwar il-kontrolli, l-investigazzjonijiet, il-qabdiet, il-każijiet ta’ prosekuzzjoni u s-sentenzi, inklużi l-pieni imposti, lill-Kummissjoni u ta’ informazzjoni sistematika lill-Europol dwar il-każijiet kollha marbutin mal-kriminalità organizzata u/jew li għandhom implikazzjonijiet transkonfinali |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
IL-KUMMISSJONI/ L-ISTATI MEMBRI |
Is-simplifikazzjoni tal-metodoloġija għall-ġbir tad-dejta fil-qasam tat-traffikar tal-organiżmi selvaġġi madwar l-UE kollha u s-sensibilizzazzjoni tal-gruppi ta’ esperti rilevanti dwar l-istatistika dwar il-kriminalità |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
IL-KUMMISSJONI/ L-ENPE |
It-twaqqif ta’ bażi tad-dejta fl-ENPE 19 li jkun fiha l-każistika dwar it-traffikar tal-organiżmi selvaġġi mill-Istati Membri sabiex tiġi ffaċilitata l-kondiviżjoni tal-għarfien |
F’nofs l-2017 |
||
|
17. Iż-żieda fit-taħriġ għall-partijiet kollha tal-katina tal-infurzar, fosthom l-attivitajiet konġunti tat-taħriġ |
IL-KUMMISSJONI |
L-inklużjoni tat-taħriġ dwar it-traffikar tal-organiżmi selvaġġi fil-programm tal-istituzzjonijiet tat-taħriġ tal-UE bħas-CEPOL, l-ERA u oħrajn |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
IL-KUMMISSJONI/ L-ISTATI MEMBRI |
Il-ġbir u l-kondiviżjoni tal-materjal tat-taħriġ eżistenti fl-UE |
Fi tmiem l-2016 |
||
|
IL-KUMMISSJONI |
L-eliġibbiltà tat-taħriġ dwar il-ġlieda kontra t-traffikar tal-organiżmi selvaġġi għal appoġġ finanzjarju fil-qafas tad-diversi strumenti finanzjarji tal-UE rilevanti (LIFE, il-Fond għas-Sigurtà Interna, eċċ.) |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
L-ISTATI MEMBRI |
L-għoti ta’ taħriġ regolari fl-Istati Membri għall-katina kollha tal-infurzar jew tal-ġudikatura, fosthom sessjonijiet konġunti tat-taħriġ li jlaqqgħu flimkien lill-aġenziji tal-infurzar rilevanti, lill-prosekuturi u lill-imħallfin |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
18. It-tisħiħ tan-netwerks ta’ dawk li jaħdmu fil-qasam fil-livelli nazzjonali u reġjonali jew, fejn applikabbli, it-twaqqif tagħhom, u t-titjib tal-kooperazzjoni bejniethom |
L-ISTATI MEMBRI |
Appoġġ għat-twaqqif tan-netwerks nazzjonali rilevanti f’kull Stat Membru |
F’nofs l-2017 |
|
|
IL-KUMMISSJONI |
L-organizzazzjoni ta’ laqgħat konġunti tan-netwerks rilevanti tal-UE 20 |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
19. It-titjib tal-kura tal-pjanti jew tal-annimali ħajjin li jkunu nqabdu jew li jkunu ġew ikkonfiskati |
L-ISTATI MEMBRI |
Id-disponibbiltà, fl-Istati Membri kollha, ta’ faċilitajiet għaż-żamma temporanja tal-kampjuni ħajjin li jkunu nqabdu jew li jkunu ġew ikkonfiskati u d-dħul fis-seħħ ta’ mekkaniżmi għaż-żamma ta’ dawn il-kampjuni f’post ġdid għal żmien twil meta jkun hemm bżonn. L-għoti ta’ għajnuna lil Stati Membri oħrajn. |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
L-għan 2.3 Il-ġlieda b’mod aktar effettiv kontra l-kriminalità organizzata b’rabta mal-organiżmi selvaġġi |
20. Il-valutazzjoni regolari tat-theddida kkawżata mit-traffikar organizzat tal-organiżmi selvaġġi fl-UE |
L-Europol |
L-inklużjoni, fil-Valutazzjonijiet tat-Theddid Gravi tal-Kriminalità Organizzata (is-SOCTAs), ta’ valutazzjoni tat-theddid ikkawżat mit-traffikar tal-organiżmi selvaġġi, abbażi tad-dejta u, fejn ikun possibbli, tal-valutazzjonijiet nazzjonali tat-theddid ipprovduti mill-Istati Membri |
Azzjoni kontinwa, bl-ewwel pass importanti jintlaħaq fl-ewwel sitt xhur tal-2017 |
|
21. It-tisħiħ tal-kapaċità tal-esperti rilevanti li jindirizzaw ir-rabtiet bejn it-traffikar tal-organiżmi selvaġġi u l-kriminalità organizzata, fosthom iċ-ċiberkriminalità u l-flussi finanzjarji illeċiti relatati magħhom |
IL-KUMMISSJONI/ L-ISTATI MEMBRI |
It-twettiq ta’ attivitajiet ta’ sensibilizzazzjoni fil-fora rilevanti (in-Netwerk tal-prosekuturi speċjalizzati fil-kriminalità organizzata (REFCO), u l-unitajiet nazzjonali li jaħdmu kontra l-kriminalità organizzata u ċ-ċiberkriminalità u dawk tal-investigazzjoni finanzjarja) |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
L-ISTATI MEMBRI |
It-tisħiħ tal-kapaċità tal-unitajiet kompetenti li jindirizzaw it-traffikar tal-organiżmi selvaġġi onlajn u l-iżgurar tal-eżistenza ta’ mezzi biex tinkiseb l-għajnuna mingħand unitajiet speċjalizzati fiċ-ċiberkriminalità f’każijiet speċifiċi (pereżempju fl-investigazzjonijiet dwar il-web inviżibbli u dwar l-abbuż tal-muniti virtwali). |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
IL-KUMMISSJONI/ L-ISTATI MEMBRI |
It-tpoġġija tal-kwistjoni fuq l-aġenda tal-FATF 21 , tal-CARIN 22 u tal-Grupp Egmont tal-Unitajiet tal-Intelligence Finanzjarja |
Fi tmiem l-2016 |
||
|
IL-KUMMISSJONI/ L-ISTATI MEMBRI |
L-FATF intalbet tħejji gwida dwar ir-rabtiet bejn il-ħasil tal-flus u t-traffikar tal-organiżmi selvaġġi |
Fi tmiem l-2016 |
||
|
L-ISTATI MEMBRI |
L-organizzazzjoni ta’ taħriġ dwar l-investigazzjonijiet dwar il-flussi finanzjarji illeċiti marbutin mat-traffikar tal-organiżmi selvaġġi |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
22. L-iżgurar min-naħa tal-Istati Membri, f’konformità mal-impenji internazzjonali li jkunu ħadu, li t-traffikar organizzat tal-organiżmi selvaġġi jikkostitwixxi reat serju fl-UE kollha skont il-Konvenzjoni tan-Nazzjonijiet Uniti Kontra l-Kriminalità Organizzata Transnazzjonali, jiġifieri li dan jiġi kkastigat b’sentenza massima ta’ mill-inqas erba’ snin il-ħabs |
L-ISTATI MEMBRI |
Analiżi tal-leġiżlazzjoni nazzjonali rilevanti u l-emendar tagħha fejn ikun hemm bżonn |
Fi tmiem l-2017 |
|
|
23. L-analiżi, min-naħa tal-Istati Membri, f’konformità mar-Riżoluzzjoni tal-AĠNU, tal-leġiżlazzjoni nazzjonali dwar il-ħasil tal-flus biex ikun żgurat li r-reati marbutin mat-traffikar tal-organiżmi selvaġġi jkunu jistgħu jiġu ttrattati bħala reati predikati u tkun tista’ tittieħed azzjoni dwarhom skont il-leġiżlazzjoni domestika dwar ir-rikavat mill-attività kriminali |
L-ISTATI MEMBRI |
Analiżi tal-leġiżlazzjoni nazzjonali rilevanti u l-emendar tagħha fejn ikun hemm bżonn |
Fi tmiem l-2017 |
|
|
L-għan 2.4 It-titjib tal-kooperazzjoni internazzjonali dwar l-infurzar tar-regoli kontra t-traffikar tal-organiżmi selvaġġi |
24. Iż-żieda fil-kooperazzjoni dwar l-infurzar bejn l-Istati Membri u l-atturi tal-infurzar tal-UE u pajjiżi ewlenin li mhumiex Stati Membri tal-UE u netwerks reġjonali oħrajn għall-infurzar tar-regoli marbutin mal-organiżmi selvaġġi u netwerks globali rilevanti (il-Konsorzju Internazzjonali għall-Ġlieda kontra t-Traffikar tal-Organiżmi Selvaġġi (l-ICCWC) 23 u n-Netwerk Internazzjonali għall-Konformità mar-regoli ambjentali u għall-Infurzar tagħhom (l-INECE)) |
IL-KUMMISSJONI/ L-Europol |
L-organizzazzjoni ta’ laqgħat konġunti li jinvolvu lill-Europol, lill-Grupp ta’ infurzar tal-UE b’rabta mal-kummerċ fl-organiżmi selvaġġi u lin-netwerks reġjonali rilevanti għall-infurzar tar-regoli (pereżempju l-ASEAN-WEN u t-Task Force tal-Ftehim ta’ Lusaka), kif ukoll lill-INECE. |
Azzjoni kontinwa, bl-ewwel pass importanti jintlaħaq fi tmiem l-2016 |
|
IL-KUMMISSJONI |
Il-kondiviżjoni tal-aqwa prassi fil-kooperazzjoni dwar l-infurzar |
Fi tmiem l-2016 |
||
|
L-ISTATI MEMBRI/ L-Europol |
Il-parteċipazzjoni tal-Istati Membri f’operazzjonijiet konġunti tal-infurzar tal-liġi internazzjonali, bl-għajnuna tal-Europol |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
25. L-appoġġ għall-bini tal-kapaċità għall-infurzar tal-liġi fil-pajjiżi ewlenin tal-oriġini u ta’ destinazzjoni, fosthom l-infurzar f’siti protetti |
IL-KUMMISSJONI/ L-HRVP/ L-ISTATI MEMBRI |
L-għoti ta’ appoġġ finanzjarju kontinwu għall-attivitajiet tal-ICCWC, fosthom l-evalwazzjonijiet tas-sistemi tal-infurzar ibbażati fuq il-Manwal tal-ICCWC dwar il-kriminalità b’rabta mal-foresti u mal-organiżmi selvaġġi |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
IL-KUMMISSJONI/ L-HRVP/ L-ISTATI MEMBRI |
Il-kunsiderazzjoni tar-riżultati tar-rakkomandazzjonijiet tal-Manwal tal-ICCWC fl-appoġġ immirat mogħti lil pajjiżi terzi |
Azzjoni kontinwa, bl-ewwel pass importanti jintlaħaq fi tmiem l-2016 |
Il-prijorità numru 3 - It-tisħiħ tas-sħubija globali tal-pajjiżi tal-oriġini, konsumaturi u ta’ tranżitu kontra t-traffikar tal-organiżmi selvaġġi
|
Azzjonijiet |
Min hu responsabbli għall-azzjonijiet |
Ir-riżultati mistennija |
L-iskeda taż-żmien |
|
|
L-għan 3.1 L-għoti ta’ aktar appoġġ lill-pajjiżi li qegħdin jiżviluppaw, li jkun aktar effettiv u ffukat b’mod iktar strateġiku |
26. L-iżgurar li t-traffikar tal-organiżmi selvaġġi jitqies għall-finanzjament tal-UE fil-kuntest tal-programmi rilevanti fl-oqsma tal-ġestjoni tar-riżorsi naturali, tal-ambjent, tal-kriminalità organizzata, tas-sigurtà u tal-governanza |
IL-KUMMISSJONI/ L-HRVP |
L-“Approċċ Strateġiku għall-Konservazzjoni tal-Organiżmi Selvaġġi fl-Afrika” 24 jservi bħala l-bażi għall-programmazzjoni tal-appoġġ għall-iżvilupp rilevanti L-iżvilupp ta’ aktar approċċi strateġiċi tematiċi jew reġjonali Il-mobilizzazzjoni ta’ flussi ta’ finanzjament tal-kooperazzjoni għall-iżvilupp, inklużi l-Fond Ewropew għall-Iżvilupp (l-FEŻ), l-istrument ta’ finanzjament tal-kooperazzjoni għall-iżvilupp (DCI), l-Istrument li jikkontribwixxi għall-istabbiltà u l-paċi u strumenti finanzjarji oħrajn bħall-Istrument ta’ Sħubija, għall-ħidma kontra t-traffikar tal-organiżmi selvaġġi, fil-limiti tal-pakketti finanzjarji maqbula tal-programmi kontributuri, u l-esplorazzjoni ta’ sorsi ta’ finanzjament possibbli oħrajn |
Azzjoni kontinwa, bl-ewwel pass importanti jintlaħaq fi tmiem l-2016 |
|
27. Iż-żieda fl-effettività tal-appoġġ finanzjarju għall-ġlieda kontra t-traffikar tal-organiżmi selvaġġi |
IL-KUMMISSJONI/ L-HRVP/ L-ISTATI MEMBRI |
L-organizzazzjoni ta’ laqgħat regolari fil-pajjiżi ewlenin biex jiġu kkoordinati l-attivitajiet tad-donaturi Il-pajjiżi benefiċjarji jintalbu jirrappurtaw dwar kif il-miżuri kontra t-traffikar tal-organiżmi selvaġġi ffinanzjati mill-UE kienu effettivi biex tiġi indirizzata l-problema (bl-użu ta’ indikaturi bħan-numru ta’ qabdiet u n-numru ta’ prosekuzzjonijiet imwettqa b’suċċess) |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
L-għan 3.2 It-tisħiħ tal-azzjonijiet kontra t-traffikar tal-organiżmi selvaġġi u l-kawżi prinċipali tiegħu u l-koordinazzjoni aħjar tagħhom mal-pajjiżi rilevanti tal-oriġini, ta’ tranżitu u ta’ destinazzjoni |
28. Iż-żieda fid-djalogu mal-pajjiżi ewlenin tal-oriġini, ta’ tranżitu u ta’ destinazzjoni, fosthom id-djalogu mal-komunitajiet lokali, mas-soċjetà ċivili u mas-settur privat |
IL-KUMMISSJONI/ L-HRVP/ L-ISTATI MEMBRI |
L-identifikazzjoni tal-pajjiżi ta’ prijorità It-twaqqif ta’ strutturi speċifiċi għad-djalogu u għall-kooperazzjoni teknika L-inklużjoni b’mod sistematiku ta’ dan is-suġġett fl-aġenda tad-djalogi politiċi u settorjali u tal-laqgħat ta’ livell għoli ma’ pajjiżi jew reġjuni terzi ewlenin |
Azzjoni kontinwa, bl-ewwel pass importanti jintlaħaq fi tmiem l-2016 |
|
L-HRVP/ L-ISTATI MEMBRI |
It-twaqqif tan-netwerk tal-punti fokali fid-delegazzjonijiet u fl-ambaxxati fil-pajjiżi rilevanti, filwaqt li jintużaw, fejn xieraq, l-istrutturi eżistenti bħan-Netwerk Diplomatiku Ekoloġiku |
Fi tmiem l-2016 |
||
|
29. L-użu proattiv tal-istrumenti u tal-politiki kummerċjali tal-UE biex jiġu appoġġjati l-azzjonijiet kontra t-traffikar tal-organiżmi selvaġġi |
IL-KUMMISSJONI/ L-HRVP |
Impenji ambizzjużi biex jiġi miġġieled it-traffikar tal-organiżmi selvaġġi proposti mill-UE biex jiġu inklużi fil-Ftehimiet ta’ Kummerċ Ħieles fil-ġejjieni, pereżempju mal-Ġappun u mal-Istati Uniti tal-Amerka (is-Sħubija Trans-Atlantika ta’ Kummerċ u ta’ Investiment (TTIP)) Il-monitoraġġ proattiv tal-implimentazzjoni tal-impenji assoċjati mat-traffikar tal-organiżmi selvaġġi inklużi fil-Ftehimiet ta’ Kummerċ Ħieles eżistenti u fis-sistema GSP+ L-inklużjoni tal-kwistjoni tat-traffikar tal-organiżmi selvaġġi fl-aġenda tad-djalogi kummerċjali bilaterali tal-UE mas-sħab ewlenin u fl-aġenda tal-Kumitat tad-WTO għall-Kummerċ u l-Ambjent |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
30. It-tisħiħ tal-kooperazzjoni fil-ħidma kontra t-traffikar tal-organiżmi selvaġġi ma’ organizzazzjonijiet reġjonali rilevanti, bħall-Unjoni Afrikana, is-SADC, il-Komunità tal-Afrika tal-Lvant u l-ASEAN, u f’fora multilaterali rilevanti, bħall-ASEM |
IL-KUMMISSJONI/ L-HRVP |
L-inklużjoni regolari ta’ dan is-suġġett fl-aġenda tal-laqgħat ta’ livell għoli |
Azzjoni kontinwa, bl-ewwel pass importanti jintlaħaq fi tmiem l-2016 |
|
|
L-għan 3.3 L-indirizzar tad-dimensjoni tas-sigurtà tat-traffikar tal-organiżmi selvaġġi |
31. It-titjib tal-bażi tal-għarfien u l-iżvilupp ta’ strateġiji biex jiġu indirizzati r-rabtiet bejn it-traffikar tal-organiżmi selvaġġi u s-sigurtà |
IL-KUMMISSJONI/ L-HRVP |
It-tnedija ta’ studju biex tittejjeb il-bażi tal-għarfien dwar ir-rabtiet bejn it-traffikar tal-organiżmi selvaġġi u forom oħrajn tal-kriminalità organizzata u l-finanzjament ta’ gruppi tal-milizzja jew ta’ gruppi terroristiċi |
F’nofs l-2016 |
|
IL-KUMMISSJONI/ L-HRVP/ L-ISTATI MEMBRI |
Abbażi tar-riżultati, isir qbil dwar il-passi li jmiss fil-fora rilevanti tal-UE |
F’nofs l-2017 |
||
|
IL-KUMMISSJONI/ L-HRVP/ L-ISTATI MEMBRI |
Il-kunsiderazzjoni tad-dimensjoni tas-sigurtà tat-traffikar tal-organiżmi selvaġġi fil-valutazzjonijiet globali tal-UE dwar is-sitwazzjoni fil-pajjiżi rilevanti li mhumiex Stati Membri tal-UE |
Fi tmiem l-2016 |
||
|
L-HRVP/ L-ISTATI MEMBRI |
Iż-żieda fil-kooperazzjoni bejn in-Nazzjonijiet Uniti u l-UE dwar il-kummerċ illegali fl-organiżmi selvaġġi fil-kuntest taż-żamma tal-paċi u tal-ġestjoni tal-kriżijiet |
Azzjoni kontinwa, bl-ewwel pass importanti jintlaħaq fi tmiem l-2016 |
||
|
L-għan 3.4 It-tisħiħ tal-isforzi multilaterali biex jiġi miġġieled it-traffikar tal-organiżmi selvaġġi |
32. L-għoti ta’ appoġġ għall-adozzjoni u l-implimentazzjoni ta’ deċiżjonijiet, riżoluzzjonijiet u dikjarazzjonijiet politiċi qawwija dwar it-traffikar tal-organiżmi selvaġġi fl-istrumenti internazzjonali u fil-fora multilaterali |
IL-KUMMISSJONI/ L-HRVP/ L-ISTATI MEMBRI |
Indirizzar tal-kwistjoni fil-kuntest ta’ dawn li ġejjin: is-CITES – inkluż, fejn ikun meħtieġ, billi jingħata appoġġ għas-sanzjonijiet kummerċjali fil-każijiet ta’ nuqqas ta’ konformità; il-Konvenzjoni dwar l-Ispeċijiet Migratorji – il-Pjan ta’ Azzjoni ta’ Tuneż għall-2013 sal-2020 dwar il-qerda tal-qtil, l-insib u l-kummerċ illegali tal-għasafar selvaġġi skont il-Konvenzjoni ta’ Berna dwar il-Konservazzjoni tal-Annimali Selvaġġi u tal-Abitati Naturali Ewropej; l-inizjattivi multilaterali rilevanti fil-livell globali (in-Nazzjonijiet Uniti, il-proċessi ta’ segwitu ta’ Londra u ta’ Kasane, il-G7, il-G20, eċċ.) Il-monitoraġġ regolari, min-naħa tal-UE u tal-Istati Membri tagħha, tal-implimentazzjoni tal-impenji meħudin f’dawn il-fora |
Azzjoni kontinwa, bl-ewwel pass importanti jintlaħaq fi tmiem l-2016 |
Dan huwa ddefinit bħala l-kummerċ illegali, internazzjonali u mhux, ta’ annimali u pjanti selvaġġi u ta’ prodotti dderivati minnhom, u reati interkonnessi mill-qrib magħhom bħall-kaċċa illegali.
https://www.unodc.org/unodc/en/frontpage/2014/May/wildlife-crime-worth-8-10-billion-annually.html
https://cites.org/eng/international_dimension_of_illegal_wildlife_trade http://www.gfintegrity.org/report/briefing-paper-transnational-crime/
Id-Dokument ta’ Ħidma tal-Persunal tal-Kummissjoni li jakkumpanja lil din il-Komunikazzjoni (SWD(2016) 38) juri f’aktar dettall l-iskala tat-traffikar ta’ organiżmi selvaġġi madwar id-dinja u r-rwol tal-UE fil-kummerċ illegali.
Ara d-dokument SWD(2016) 38.
Ara d-dokument SWD(2016) 38.
Ir-Riżoluzzjoni 2134 (2014) u r-Riżoluzzjoni 2136 (2014); “Rapport tas-Segretarju Ġenerali dwar is-sitwazzjoni fl-Afrika Ċentrali u l-attivitajiet tal-Uffiċċju Reġjonali tan-Nazzjonijiet Uniti għall-Afrika Ċentrali”, tat-30 ta’ Novembru 2015.
Ir-Riżoluzzjoni 69/314.
Il-Mira 15.7.
Ara r-Riżoluzzjoni tal-Parlament Ewropew tal-15 ta’ Jannar 2014 (2013/2747(RSP)).
Ara d-dokumenti COM (2014) 64 u SWD (2014) 347.
Ir-Regolament tal-Kunsill (KE) Nru 338/97.
ĠU L 159, 20.6.2007, p. 45.
Ara d-dokument SWD(2016) 38.
Ara d-dokument COM (2015) 497, “Kummerċ għal Kulħadd – Lejn politika aktar responsabbli għall-kummerċ u l-investiment”.
Ara d-dokument SWD(2016) 38.
Ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà/il-Viċi President tal-Kummissjoni Ewropea.
In-Netwerk tal-prosekuturi Ewropej fil-qasam tal-ambjent.
Bħal, pereżempju, il-Grupp ta’ infurzar tal-UE b’rabta mal-kummerċ fl-organiżmi selvaġġi, in-Netwerk tal-prosekuturi Ewropej fil-qasam tal-ambjent (l-ENPE), il-Forum Ewropew tal-imħallfin fil-qasam tal-ambjent (l-EUFJE), l-IMPEL, il-Grupp tal-Proġett għall-Koordinazzjoni tal-attivitajiet marbutin mal-protezzjoni tas-saħħa, tal-wirt kulturali u tal-ambjent (PARCS), u l-EnviCrimeNet.
It-Task Force ta’ Azzjoni Finanzjarja.
In-Netwerk tal-Interaġenziji Camden għall-Irkupru tal-Assi.
Dan jinkludi lill-Interpol, lis-Segretarjat tas-CITES, lill-Organizzazzjoni Dinjija Doganali, lill-UNODC u lill-Bank Dinji.
Id-dokument ippubblikat fl-2015 mill-Uffiċċju tal-Pubblikazzjonijiet tal-Unjoni Ewropea msejjaħ “Akbar mill-iljunfanti – Kontributi għal approċċ strateġiku tal-UE għall-konservazzjoni tal-organiżmi selvaġġi fl-Afrika – Sinteżi”.
