EUR-Lex Access to European Union law
This document is an excerpt from the EUR-Lex website
Document 52009DC0228
Report from the Commission to the Council and the European Parliament Operation of the Early Warning and Response System (EWRS) of the Community Network for the epidemiological surveillance and control of communicable diseases during 2006 and 2007 (Decision 2000/57/EC) (Text with EEA relevance)
Rapport mill-Kummissjoni lill-Kunsill u lill-Parlament Ewropew Ħidma tas-Sistema ta' Twissija u Tweġiba Bikrija tal-UE (EWRS) tan-Netwerk Komunitarju għas-sorveljanza epidemjoloġika u għall-kontroll ta' mard li jittieħed matul l-2006 u l-2007 (id-Deċiżjoni 2000/57/KE) (Test b'rilevanza għaż-ŻEE)
Rapport mill-Kummissjoni lill-Kunsill u lill-Parlament Ewropew Ħidma tas-Sistema ta' Twissija u Tweġiba Bikrija tal-UE (EWRS) tan-Netwerk Komunitarju għas-sorveljanza epidemjoloġika u għall-kontroll ta' mard li jittieħed matul l-2006 u l-2007 (id-Deċiżjoni 2000/57/KE) (Test b'rilevanza għaż-ŻEE)
/* KUMM/2009/0228 finali */
Rapport mill-Kummissjoni lill-Kunsill u lill-Parlament Ewropew Ħidma tas-Sistema ta' Twissija u Tweġiba Bikrija tal-UE (EWRS) tan-Netwerk Komunitarju għas-sorveljanza epidemjoloġika u għall-kontroll ta' mard li jittieħed matul l-2006 u l-2007 (id-Deċiżjoni 2000/57/KE) (Test b'rilevanza għaż-ŻEE) /* KUMM/2009/0228 finali */
[pic] | KUMMISSJONI TAL-KOMUNITAJIET EWROPEJ | Brussel 15.5.2009 KUMM(2009) 228 finali RAPPORT MILL-KUMMISSJONI LILL-KUNSILL U LILL-PARLAMENT EWROPEW Ħidma tas-Sistema ta' Twissija u Tweġiba Bikrija tal-UE (EWRS) tan-Netwerk Komunitarju għas-sorveljanza epidemjoloġika u għall-kontroll ta' mard li jittieħed matul l-2006 u l-2007 (id-Deċiżjoni 2000/57/KE) (Test b'rilevanza għaż-ŻEE) WERREJ 1. Introduzzjoni 3 2. Avvenimenti kkomunikati fl-2006 3 3. Reazzjoni u segwitu tal-avvenimenti ewlenin ikkomunikati fl-2006 3 3.1. Chikungunya f'La Réunion 3 3.2. Il-ħosba 4 3.3. Deni Lassa 4 3.4. Clostridium difficile 027 4 3.5. L-influwenza avjarja fil-bniedem 5 4. Avvenimenti kkomunikati fl-2007 5 5. Reazzjoni u segwitu tal-avvenimenti ewlenin ikkomunikati fl-2007 5 5.1. It-tuberkulosi 5 5.2. Chikungunya fl-Italja 6 5.3. Il-ħosba fil-Belġju 7 5.4. Il-leġjonellosi 7 6. Valutazzjoni tal-avvenimenti rrappurtati versu kritejri tal-komunikazzjoni 7 7. Ir-Regolamenti Internazzjonali tas-Saħħa l-ġodda (IHR) 9 8. Trasferiment tal-EWRS lill-ECDC 10 9. Konklużjonijiet 10 1. INTRODUZZJONI L-intenzjoni ta' dan ir-rapport hija li jinforma lill-Kunsill u lill-Parlament dwar l-avvenimenti ta' rilevanza Komunitarja li ġraw minħabba mard li jittieħed u li ġew ikkomunikati matul l-2006 u l-2007 permezz tas-Sistema ta' Twissija u Reazzjoni Bikrija tal-UE (EWRS) skont id-Deċiżjoni 2119/98/KE[1] tal-Kunsill u tal-Parlament u d-Deċiżjoni tal-Kummissjoni 2000/57/KE. 2. AVVENIMENTI KKOMUNIKATI FL-2006 Matul l-2006 total ta' 138 messaġġ ġew ippubblikati (2,6 messaġġi fil-ġimgħa), b'223 kumment. Mill-138 messaġġ, 37 kienu messaġġi ta' informazzjoni, 47 messaġġi b'livell ta' attivazzjoni 1, 22 b'livell ta' attivazzjoni 2, u żewġ messaġġi b'livell ta' attivazzjoni 3. Mit-30 messaġġ ippublikati bħala reazzjoni għal avvenimenti speċifiċi, 16 kienu dwar l-adozzjoni ta' miżuri, disgħa dwar koordinazzjoni ta' miżuri, u ħamsa dwar miżuri maħsuba jew ippjanati. Il-klassifikazzjoni tal-messaġġi skont il-pajjiż jew iż-żona tal-okkorrenza kienet: Il-Ġermanja (10 avvenimenti kkomunikati), Franza (8), l-Italja, Spanja, l-Iżvezja u d-Danimarka (7 kull wieħed), ir-Renju Unit u l-Awstrija (6), il-Belġju u s-Slovenja (5), il-Latvja u l-Iżrael (4) , il-Polonja, il-Litwanja u t-Turkija (3), il-Portugall, l-Estonja, il-Greċja, l-Olanda, in-Norveġja u Sierra Leone (2), u l-Ungerija, ir-Repubblika Ċeka, is-Slovakkja, ir-Rumanija, il-Gżejjer Faroe (id-Danimarka), La Réunion (Franza DOM-TOM), Saint Helena (ir-Renju Unit), il-Kroazja, il-Federazzjoni Russa, il-Mawritanja, l-Eġittu, it-Tuneżija, l-Iraq, l-Indja u t-Tajlandja (wieħed kull wieħed). Seba' avvenimenti involvew aktar minn pajjiż wieħed tal-UE, u tnejn involvew aktar minn pajjiż wieħed barra l-UE. Erba' avvenimenti ma ġewx identifikati skont l-oriġini ġeografika. Tmienja u erbgħin messaġġ, li għandhom x'jaqsmu ma’ 16-il avveniment kienu ppubblikati permezz tal-mezz selettiv ta' skambju. Tlieta u erbgħin avveniment kellhom x'jaqsmu mal-influwenza; 18 ma’ dijarea akuta; tmienja ma’ dijarea u salmonellożi; sebgħa ma' ħosba; sitta ma' leġjonellosi; ħamsa ma’ tuberkulożi; tnejn ma’ kolera, mewt ta' oriġini mhux spjegata, deni, avvelenament mill-ikel, deni emoraġiku, epatite, sindromu uremiku emolitiku, ħosba jew vCJD; u wieħed kull wieħed ma’ kampilobatterjożi, leptospirożi , listerjosi, settiċemija, xiġellosi, infezzjoni fit-tessuti rotob, infezzjoni trasmessa sesswalment, u deni tat-tifojde. Tmien messaġġi kienu kklassifikati bħala 'mhux applikabbli' u ħamsa bħala 'mhux imniżżla'. 3. REAZZJONI U SEGWITU TAL-AVVENIMENTI EWLENIN IKKOMUNIKATI FL-2006 3.1. Chikungunya f'La Réunion Fi Frar 2006, Franza kkomunikat epidemija kbira tal-vajrus Chikungunya fid-dipartiment Franċiż ekstra Ewropew ta' La Réunion. Malajr inxtered ma’ gżejjer oħra fl-Oċean Indjan u wasal l-Indja. Ir-riskju li l-vajrus Chikungunya jiġi l-UE kien ivvalutat mill-ECDC biex l-Istati Membri jingħataw għażliet għal stat aktar għoli ta' tħejjija. Kienet ippreparata informazzjoni dwar valutazzjoni tar-riskju għal vjaġġaturi f'żoni u minn żoni milquta u ċċirkulata lill-Istati Membri. Issemma wkoll ir-riskju minn donaturi tad-demm li jirritornaw minn żoni milquta, u l-awtoritajiet tas-saħħa pubblika responsabbli minn kwistjonijiet ta' sikurezza ematoloġika ġew mgħarrfa biex jingħataw iċ-ċans li japplikaw politika ta' diferiment għal donaturi tad-demm. 3.2. Il-ħosba F'Marzu 2006, il-Ġermanja kkomunikat numru ta' epidemiji ta' ħosba reġjonali fin-Nofsinhar u fil-Punent tal-pajjiż. Kienu rrappurtat epidemiji li involvew 58 każ fiż-żona ikbar ta' Stuttgart u 149 każ f' Land ta' North-Rhine-Westphalia. Investigazzjoni addizzjonali żvelat 1 018 każ ikkomunikati lill-awtoritajiet tas-saħħa bejn l-1 ta' Jannar u t-3 ta' Mejju 2006 f'North Rhine Westphalia, tfal ta’ età ikbar u adolexxenti kienu l-aktar affettwati. Dawn l-avvenimenti taw bidu għall-miżuri speċifiċi dwar saħħa pubblika bħala reazzjoni għall-avveniment (informazzjoni lill-awtoritajiet ta' saħħa lokali kollha, aktar kopertura dwar it-tilqim, kampanja ta' informazzjoni għal iskejjel, skejjel tat-trabi, ġenituri u tobba tal-familja). 3.3. Deni Lassa Fil-21 ta' Lulju 2006, il-Ġermanja kkomunikat il-każ ta' pazjent b'deni Lassa li vjaġġa minn Freetown (Sierra Leone) għadda minn Abidjan (Ivory Coast) u Brussell għal Frankfurt. Il-pazjent kien ma jiflaħx matul it-titjiriet u kellu fuqu kateter urinarju li ma jiffunzjonax, li ħarġet l-awrina minnu għal mas-sit tal-ajruplan, kutri u l-ħwejjeġ tal-pazjent. Filwaqt li r-riskju għall-passiġġieri l-oħra kien iġġudikat mill-ECDC bħala baxx, ġew miftiehma proċeduri tal-ittraċċar tal-kuntatt għal persuni kkunsidrati li huma f'riskju aktar għoli, u ġie stabbilit mekkaniżmu ta' koordinazzjoni li jinkludi l-Kummissjoni Ewropea, l-ECDC, l-Istitut Robert Koch, l-awtoritajiet tas-saħħa pubblika Belġjani, Sabena Airlines u l-WHO. Kitt ta' għodda u dokumenti ġie magħmul disponibbli b'mod mgħaġġel. Tnejn u disgħin persuna kienu mfittxija, 43 minnhom kienu mill-Istati Membri tal-UE (il-Belġju, il-Ġermanja, l-Italja, il-Polonja, ir-Renju Unit, Franza u Spanja). Kull wieħed minn dawn il-pajjiżi rċevew lista ta' persuni li kellhom jiġu ttraċċati permezz tal-għodda ta' skambju selettiv ta' informazzjoni disponibbli fl-EWRS. Stqarrija għall-istampa kienet miftiehma li tagħti l-Istati Membri messaġġ konsistenti kemm-il darba jħossu l-ħtieġa li jinfurmaw il-pubbliku. Għalkemm ma ġie identifikat l-ebda każ sekondarju, l-avveniment wera biċ-ċar il-valur tal-mekkaniżmu ta' koordinazzjoni u żvela ħtiġijiet addizzjonali biex jintużaw ma' avvenimenti simili fil-futur. 3.4. Clostridium difficile 027 Fit-28 ta' April 2006, Franza kkomunikat l-ewwel grupp ta' toxinotype III, marda assoċjata ma’ PCR-ribotype 027 Clostridium difficile fi sptar fit-tramuntana tal-pajjiż. L-informazzjoni wriet ix-xebh tal-grupp mal-varjanti epidemiċi diġa' iżolati minn epidemiji ta' marda assoċjata ma' Clostridium difficile f'pajjiżi oħra. Osservata fil-Kanada u fl-Istati Uniti sa mill-2003, PCR-ribotype 027 Clostridium difficile kienet involuta f'epidemiji fi sptarijiet fir-Renju Unit fl-2004 u fil-Belġju u fl-Olanda fl-2005. Miżuri ta' kontroll kienu implimentati fi Franzi fil-21 ta' Marzu 2006 mill-unità responsabbli mill-kontroll tal-infezzjoni u ma kien hemm l-ebda każ ieħor mill-11 ta' April 2006. Franza għaddiet l-esperjenza u l-lezzjonijiet li tgħallmet f'livell nazzjonali lill-Istati Membri l-oħra, u ġew diskussi għażliet ta' reazzjoni xierqa. Mill-2006, Clostridium difficile 027 kienet ukoll iżolata fil-Polonja, fil-Lussemburgu u fid-Danimarka. 3.5. L-influwenza avjarja fil-bniedem Fit-Turkija t-trasmissjoni tal-vajrus tal-influwenza H5N1 lill-bniedem tat bidu għal traffiku ta' messaġġi sinifikanti. Is-sitwazzjoni epidemjoloġika kienet aġġornata fuq bażi regolari f'każ ta' tixrid possibbli f'żoni ġeografiċi oħra. Għalkemm kien hemm aktar messaġġi dwar avvenimenti tal-influwenza avjarja minn avvenimenti oħra (43 messaġġ, jew 31,1 %), ħafna mill-informazzjoni kienet dwar każijiet ta' għasafar fl-UE u dwar miżuri meħuda f'livell nazzjonali biex jinfurmaw il-vjaġġaturi dwar iż-żoni milquta. 4. AVVENIMENTI KKOMUNIKATI FL-2007 Matul l-2007 kien hemm total ta' 85 messaġġ ippubblikat (1,6 messaġġi fil-ġimgħa), b'total ta' 300 kumment. Mill-85 messaġġ, 26 kienu messaġġi ta' informazzjoni, 32 messaġġi b'livell ta' attivazzjoni 1, tlieta b'livell ta' attivazzjoni 2, u wieħed kien messaġġ b'livell ta' attivazzjoni 3. Tlieta u għoxrin messaġġ kienu dwar miżuri meħuda bħala reazzjoni għal sitwazzjonijiet speċifiċi (12-il messaġġ dwar miżuri adottati, tmienja dwar miżuri ta' koordinazzjoni, u tlieta dwar miżuri maħsuba). L-oriġini ġeografika tal-inċidenti kienet: l-Italja (9); ir-Renju Unit (8); l-Indja (6); Spanja, il-Ġermanja, l-Irlanda u l-Ungerija (4 kull wieħed); Franza, l-Iżvezja, il-Portugall, il-Polonja, l-Estonja, il-Vjetnam, ir-Repubblika Ċeka, il-Kanada, Malta u l-Bulgarija (2); id-Danimarka, il-Belġju, il-Litwanja, it-Turkija, il-Latvja, in-Norveġja, il-Finlandja, it-Tajlandja, ir-Rumanija, ir-Repubblika Domenikana, in-Niġerja, il-Lussemburgu, iċ-Ċina u l-Uganda (wieħed kull wieħed). Erba' avvenimenti involvew aktar minn pajjiż wieħed tal-UE, u avveniment wieħed involva aktar minn pajjiż Ewropew wieħed barra mill-UE. Avveniment wieħed ma ġiex identifikat skont l-oriġini ġeografika. Mija disgħa u ħamsin messaġġ, li għandhom x'jaqsmu ma’ 14-il avveniment, kienu ppubblikati permezz tal-mezz selettiv ta' skambju. Għaxar avveniment kellhom x'jaqsmu mat-tuberkolożi u l-influwenza; sebgħa ma' leġjonellosi; ħamsa ma’ dijarea u salmonellożi; erbgħa ma' kolera u ħosba; tlieta ma’ dijarea akuta; tnejn ma' deni, avvelenament mill-ikel, deni emoraġiku u tuberkolożi li hi reżistenti għal diversi mediċini; u wieħed kull wieħed ma' cryptosporidiosis, laryngitis, melioidosis, meninġite, gattone, pnewmonja, rabja, settiċemija, xigellosi, sifilide, trichinosis u vCJD. Sittax-il messaġġ kienu kwotati bħala 'mhux applikabbli' u wieħed kien 'mhux imniżżel'. 5. REAZZJONI U SEGWITU TAL-AVVENIMENTI EWLENIN IKKOMUNIKATI FL-2007 5.1. It-tuberkulosi Għaxar avvenimenti li għandhom x'jaqsmu mat-tuberkulosi kienu kkomunikati fl-2007. Erbgħa kellhom x'jaqsmu ma’ titjiriet ta' aktar minn tmien siegħat (Franza, l-Italja (2) u l-Ġermanja). Avveniment wieħed involva persuna li taħdem fi skola tat-trabi li kienet tilqa' fiha tfal minn diversi pajjiżi tal-UE (il-Lussemburgu). Inċident wieħed ikkonċerna pazjent li kien qed jattendi kors tas-sajf f'kulleġġ internazzjonali (l-Italja). Żewġ avvenimenti kellhom x'jaqsmu ma' każijiet ta' tuberkulosi li hi reżistenti għal diversi mediċini (MDR-TB) li kienu qed jivvjaġġaw b'karozza tal-linja (l-Iżvezja u Franza). Żewġ inċidenti involvew vjaġġi qosra tal-ajru: wieħed b'MDR-TB (Malta), u wieħed b'tuberkulosi estensivament reżistenti għal diversi mediċini (XDR-TB) (l-Iżlanda). Fost l-avvenimenti rrappurtati kien hemm każ ta' XDR-TB f'ċittadin Amerikan li kien qed jivvjaġġa fl-Ewropa, ikkomunikat fil-25 ta' Mejju mill-awtoritajiet ta' saħħa Taljani. Il-pazjent kien vjaġġa fuq titjira fit-tul mill-Atlanta (l-Istati Uniti) għal Pariġi (Franza). Huwa rritorna l-Kanada fuq titjira tal-Czech Airlines minn Praga għal Montreal u reġa' lura lejn l-Istati Uniti bil-karozza. Il-pazjent kien ddijanjostikat b'TB f'Marzu, u waqt li kien qed jivvjaġġa fl-Ewropa, kien infurmat, li t-tuberkulożi tiegħu kienet estensivament reżistenti għal diversi mediċini. L-ECDC għamlet valutazzjoni tat-theddida, u kkonkludiet li l-infettività tal-pazjent kienet baxxa ħafna u li ma kienx hemmx evidenza li XDR-TB hija aktar trasmissibbli mit-TB li hija sensittiva għal diversi mediċini. Madankollu, meta wieħed iqis is-serjetà tal-XDR-TB, l-ECDC irrakkomandat, bħala miżura prekawzjonarja, li tapplika l-linji ta' gwida tal-WHO fuq 'it-Tuberkolożi u l-Ivvjaġġar bl-Ajru' għaż-żewġ titjiriet trans-Atlantiċi (> titjiriet ta' tmien siegħat). Il-Kummissjoni ppresediet numru ta' laqgħat ta' koordinazzjoni mal-Istati Membri kkonċernati, l-ECDC, il-WHO, l-Istati Uniti, il-Kanada u d-Delagazzjonijiet tal-Kummissjoni fl-Istati Uniti u l-Kanada, u ġew implimentati miżuri koordinati tal-ittraċċar. Meta tqieset l-attenzjoni għolja ħafna tal-midja tal-massa, ġie miftiehem li jkun hemm stqarrija għall-istampa. L-avveniment enfasizza l-bżonn li jissaħħaħ il-mekkaniżmu eżistenti għall-ittraċċar tal-kuntatt u li f'każ ta' bżonn tittieħed linja komuni mal-mezzi tal-massa. Valutazzjoni tal-avvenimenti l-oħra tefgħet l-attenzjoni fuq kwistjonijiet bħal: (i) mistoqsijiet dwar ħarsien tad-dejta; (ii) il-potenzjal għal kreazzjoni ta' listi biex 'ma jtirux bihom' għall-UE; (iii) ir-responsabbilta' tal-linji tal-ajru u ta' kumpaniji tal-ivvjaġġar biex jiġbru, jipprovdu u jżommu d-dejta personali tal-ivvjaġġaturi għal miżuri ta' saħħa pubblika bħal dawn bħala ttraċċar tal-kuntatt; (iv) it-trasmissjoni ta' informazzjoni tal-passiġġieri lill-awtoritajiet ta' saħħa nazzjonali skont il-linji ta' gwida tal-WHO; u (v) ittraċċar tal-kuntatt biss f'każijiet ta' MDR/XDR-TB. 5.2. Chikungunya fl-Italja L-awtorità tas-saħħa pubblika Taljana identifikat epidemija kkawżata mill-vajrus ta' Chikungunya fiż-żona ta' Ravenna u rrappurtat l-avveniment fit-30 ta' Awissu 2007. Saż-żmien tal-komunikazzjoni n-numru ta' każijiet kien 131 u l-kurva tat-tendenza epidemika kienet qed tonqos. Dan kien l-ewwel rapport ta' trasmissjoni indiġena tal-vajrus ta' Chikungunya fl-Italja u fl-Ewropa. L-epidemija kienet marbuta ma’ vjaġġatur li kien qed jirritorna mill-Indja. Trasmissjoni lokali kienet possibbli minħabba l-preżenza tan-nemusa Aedes albopictus fiż-żona. Ir-reazzjoni ta' malajr tal-awtorità tas-saħħa Taljana malajr temmet din l-epidemija. Informazzjoni kienet imxerrda b'mod ħafif permezz tal-EWRS, u l-Kummissjoni - flimkien mal-ECDC - għenet l-Istati Membri biex iqawwu t-tħejjija tagħhom, itejbu l-arranġamenti tagħhom ta' twissija u sorveljanza bikrija, iżidu l-kapaċità tagħhom biex jiddijanjostikaw Chikungunya, jimplimentaw miżuri ta' mira ta' sikurezza ematoloġika, u jintensifikaw l-iċċekkjar fuq oġġetti impurtati bħal lucky bambu u tajers użati (vettura probabbli għal importazzjoni tal-vector). 5.3. Il-ħosba fil-Belġju Fit-30 ta' Ottubru 2007 il-Belġju kkomunikat epidemija ta' 22 każ ta' ħosba fost il-komunità ta' Lhud ortodossi f'Antwerp. L-indiċi tal-każ kien student Amerikan ta' 17-il sena, li kien qed jistudja f'Londra u jżur il-familjari tiegħu f'Antwerp. Epidemiji preċedenti ta' ħosba fil-komunitajiet Lhud ultra-ortodossi kienu ġew irrappurtati fir-Renju Unit u fl-Iżrael (importati mir-Renju Unit). Il-kopertura baxxa tat-tilqim kontra l-ħosba fil-komunità Lhudija ultra-ortodossa kienet apparentament il-kawża tal-epidemija. L-informazzjoni kienet iċċirkolata b'mod mgħaġġel mill-Belġju u nfirxet sew. Kollaborazzjoni mill-viċin mal-Kunsill Ewropew Lhudi kienet ta' valur importanti fil-mod ta' kif intlaħaq il-grupp vulnerabbli f'dawk il-komunitajiet fl-Unjoni Ewropea, li s-soltu jkollha għarfien baxx tar-riskju marbut ma’ kopertura baxxa dwar it-tilqim. 5.4. Il-leġjonellosi F'Jannar, il-punti ta' kuntatt tal-EWRS fl-Isvezja, fil-Finlandja u fin-Norveġja kkomunikaw erba' każijiet tal-marda ta' Leġjonellosi ddijanjostikati f'mistiedna li qagħdu fl-istess lukanda fil-Phuket (it-Tajlandja). Il-każijiet kollha kienu rrappurtati lill-Grupp ta' Ħidma Ewropew għall-Infezzjonijiet tal-Leġjonella (EWGLI). Inħarġet stqarrija għall-istampa dwar miżuri adottati mill-Finlandja. L-istituti Nordiċi ħadmu mill-viċin mal-EWGLI u operaturi turistiċi, li nformaw lill-awtorità responsabbli f'livell lokali sabiex jidentifikaw u jittrattaw is-sors ta' infezzjoni biex jipprevjenu aktar każijiet. Ġiet stabbilita b'mod mgħaġġel proċedura tal-ittraċċar tal-kuntatt: Fejn possibbli kienu identifikati u kkuntattjati 284 turist Ewropew minn 11-il Stat Membru tal-UE. Il-persuni kkuntattjati kienu infurmati dwar l-espożizzjoni possibbli u mogħtija parir li jfittxu kura medikali kemm-il darba jiżviluppaw sintomi li jissuġġerixxu leġjonellosi. Passi simili kienu meħuda wara grupp tal-marda ta' Leġjonellosi f'lukanda Bulgara f'Lulju 2007. 6. VALUTAZZJONI TAL-AVVENIMENTI RRAPPURTATI VERSU KRITEJRI TAL-KOMUNIKAZZJONI L-ECDC kienet mitluba mill-Kummissjoni biex tagħmel valutazzjoni ta' jekk l-avvenimenti rrappurtati skont id-Deċiżjoni 2119/98/KE qablux mal-kriterji speċifikati fl-Anness I mad-Deċiżjoni 2000/57/KE. L-għan kien li jipprovdi lill-Kummissjoni u lill-Istati Membri b'evidenza xjentifika biex jissaħħu l-arranġamenti ta' rappurtaġġ skont il-leġiżlazzjoni attwali tal-UE dwar mard li jittieħed u biex tiġi pprovduta bażi għall-użu aktar effiċjenti tal-għodda tal-IT. Ir-rapport sħiħ dwar il-valutazzjoni kien ippreżentat mill-ECDC u diskuss mal-Istati Membri u huwa disponibbli fuq talba. Il-figuri ewlenin huma spjegati fil-qosor hawn taħt. Total ta' 195 inċident (livelli ta' attivazzjoni 1, 2, u 3) ikkomunikati permezz tal-EWRS bejn Mejju 2004 u Diċembru 2007 kienu rriveduti indipendentament minn tliet esperti tal-ECDC. Kull inċident kien ivvalutat biex jaraw jekk jaqbilx mal-erba’ kriterji fl-Anness I[2] mad-Deċiżjoni 2000/57/KE. Mill-195 messaġġ li ċċirkolaw, 163 (83,6 %) qablu ma' tal-inqas wieħed mill-erba' kriterji f'Anness I. Tnejn u tletin (16,4 %) ma qablu mal-ebda kriterju. Ħafna mill-avvenimenti (104 -53,3 %) qablu ma’ kriterja waħda. Il-klassifikazzjoni ta' messaġġi ppubblikati skont in-numru tal-kriterji li qablu magħha hija mniżżla fit-tabella li ġejja. Tip ta' messaġġ | Nru ta' messaġġi li jaqblu mal-kriterji fl-Anness I | Total | 0 | 1 | 2 | 3 | Livell ta' attivazzjoni 1 tal-EWRS | 22 | 85 | 30 | 4 | 141 | Livell ta' attivazzjoni 2 tal-EWRS | 10 | 17 | 21 | 48 | Livell ta' attivazzjoni 3 tal-EWRS | 2 | 4 | 6 | Total | 32 | 104 | 55 | 4 | 195 | Mill-195 messaġġ ippubblikati, 11-il messaġġ qablu ma' kriterja 1 (5,6 %), 87 messaġġ ma' kriterja 2 (44,6 %), 36 messaġġ ma’ kriterja 3 (18,5 %) u 92 messaġġ ma' kriterja 4 (47,1 %). L-erba’ raġunijiet ewlenin għal rappurtaġġ kienu: 66 messaġġ (33,8 %) kienu ppubblikati minħabba fatturi li indikaw potenzjal għal propagazzjoni internazzjonali; 35 messaġġ (17,9 %) biex jistaqsu jekk ġewx osservati jew irrappurtati riċentament f'pajjiż ieħor każijiet relatati b’mod epidemjoloġiku tal-istess marda; 26 (13,3 %) biex isiru jafu jekk kienx issuspettat li s-sors tal-epidemija huwa xi prodott tal-ikel jew oġġetti oħra li ġew impurtati jew esportati lejn/minn pajjiżi oħra; u 23 (11,8 %) minħabba li l-avveniment attira jew kien probabbli li jattira livell għoli ta' midja tal-massa internazzjonali jew attenzjoni politika. Konformità mal-kriterji tal-komunikazzjoni fid-Deċiżjoni 2000/57/KE tidher li hija tajba, għalkemm hemm spazju sinifikanti għal titjib. Il-valutazzjoni żvelat xi ftit diffikultajiet fl-evalwazzjoni ta' jekk l-avvenimenti rrappurtati qablux mal-kriterji tal-EWRS fuq bażi esklussiva tal-informazzjoni pprovduta fil-qofol tal-messaġġ. Iż-żewġ kriterji ewlenin assoċjati mal-proċess ta' rappurtaġġ huma l-iggruppar ta' każijiet spazjali jew temporali tal-marda b'riskju ta' propagazzjoni bejn l-Istati Membri fil-Komunità (kriterju 2) u l-okkurrenza ta' marda li tista' teħtieġ azzjoni kkoordinata u fil-ħin mill-Komunità biex tiġi kkontrollata (kriterju 4). Huwa interessanti li wieħed jinnota li waħda mir-raġunijiet ewlenin għal rappurtaġġ hija l-attenzjoni politika jew tal-mezzi tal-massa li l-avveniment jista' jiġġenera. Se jkun meħtieġ xogħol addizzjonali biex tiġi analizzata t-tendenza tal-inċident irrappurtat (u mhux sempliċiment il-messaġġ) fuq medda ta' żmien biex ikun hemm aktar dettalji dwar progress fl-implimentazzjoni tal-proċess ta' komunikazzjoni u biex il-Kummissjoni u l-Istati Membri jingħataw għażliet dwar kif jistgħu jtejbuha. Aktar valutazzjoni tal-avvenimenti mhux irrappurtati permezz tal-EWRS se tkun ta' importanza kruċjali sabiex ikun hemm stampa sħiħa u biex tiġi vvalutata l-konformità mad-Deċiżjoni tal-Kunsill u tal-Parlament 2119/98/KE u mad-Deċiżjoni tal-Kummissjoni 2000/57/KE. 7. IR-REGOLAMENTI INTERNAZZJONALI TAS-SAħħA L-ġODDA (IHR) Ir-Regolamenti Internazzjoni tas-Saħħa l-ġodda (IHR) ġew adottati mill-Assemblea Dinjija tas-Saħħa fit-22 ta' Mejju 2005 u daħlu fis-seħħ fil-15 ta' Ġunju 2007. L-Annessi mad-Deċiżjonijiet 2119/98/KE. 2000/96/KE 2000/57/KE ġew emendati biex jadattaw il-leġiżlazzjoni attwali tal-UE dwar mard li jittieħed għall-IHR il-ġodda. B'mod partikolari ġie introdott l-obbligu ta' rappurtaġġ, permezz tal-EWRS, tal-avveniment kollha li ġraw minħabba mard li jittieħed u li ġew ikkomunikati lill-WHO skont l-IHR (id-Deċiżjoni tat-28 ta' April 2008 li temenda d-Deċiżjoni 2000/57/KE). Fl-interessi tal-konsistenza bejn il-komunikazzjonijiet lin-Netwerk Komunitarju u mill-Istati Membri lill-WHO skont l-IHR il-ġodda, ġiet żviluppata funzjoni ta' IT fl-EWRS biex tinforma lill-WHO dwar avvenimenti kkomunikati skont id-Deċiżjoni 2119/98/KE. Biex tissodisfa l-ħtieġa espressa mill-Istati Membri għal forum ta' diskussjoni għall-koordinament tal-aspetti prattiċi tal-implimentazzjoni tal-IHR, il-Kummissjoni stabbilixxiet, minbarra l-punti ta' kuntatt tal-EWRS, grupp ta' Punti Fokali Nazzjonali tal-IHR fl-Unjoni Ewropea, li ltaqa' għall-ewwel darba fi Stokkolma fil-31 ta' Mejju 2007. Il-maġġoranza tal-Istati Membri (23 mis-27), in-Norveġja u l-Iżlanda appuntaw bħala Punti Fokali Nazzjonali tal-IHR l-istess istituzzjonijiet magħżula bħala punti ta' kuntatt tal-EWRS. Il-Kummissjoni tippresedi dan il-grupp darbtejn fis-sena; il-WHO tipparteċipa f'dawn il-laqgħat, li jistgħu wkoll joffru opportunità li jirrevedu l-avvenimenti kkomunikati permezz tal-EWRS u jiddiskutu l-implikazzjonijiet tagħhom għal notifikazzjoni permezz tal-IHR. Il-Kummissjoni tipprevedi li toffri soluzzjonijiet addizzjonali biex issaħħaħ in-komunikazzjonijiet tal-IHR, li se jkunu assoċjati mill-viċin mas-sistemi eżistenti ta' komunikazzjoni elettroniċi tal-UE u li jkunu rrikonoxxuti sew mill-WHO. 8. TRASFERIMENT TAL-EWRS LILL-ECDC Skont ir-Regolamenti bażi tagħha l-ECDC ilha mis-17 ta' Novembru 2007 tuża l-applikazzjoni tal-EWRS. Bħal fl-imgħoddi l-Kummissjoni tibqa' responsabbli għall-aspetti l-oħra, inkluża l-'awtorizazzjoni ta' ġestjoni ta' min juża s-servizz'. Il-punti ta' kuntatt tal-EWRS fl-Istati Membri għadhom appuntati b'mod formali billi jindirizzaw il-ħatriet u t-talbiet għal aċċess għall-Kummissjoni permezz ta' Rappreżentazzjonijiet Permanenti. L-applikazzjoni attwali mhijiex differenti mill-applikazzjoni tal-EWRS preċedenti, u għalhekk ma hemmx differenza fl-użu tas-sistemà ħlief għal passwords u logins, billi politika ġdida dwar password ġiet introdotta biex issaħħaħ is-sigurtà (l-applikazzjoni l-ġdida hija issa aċċessibbli permezz tal-internet). Din l-applikazzjoni l-ġdida ilha aċċessibbli mis-17 ta' Novembru 2007 f': https://ewrs.ecdc.europa.eu. 9. KONKLUżJONIJIET Ċifri għall-EWRS fl-2006 u fl-2007 jikkonfermaw it-tendenzi tas-snin preċedenti. In-numru u t-tipoloġija tal-messaġġi kkomunikati kienu kumparabbli mal-2004 u l-2005. Messaġġi ta' 'livell ta' informazzjoni' kienu l-maġġoranza tal-messaġġi tal-EWRS. In-numru totali ta' messaġġi li ġew iċċirkolati fl-2007 kien inqas minn dak tal-2006. Dan probabbilment jirriżulta min-numru akbar ta' messaġġi li għandhom x'jaqsmu mal-avvenimenti ta' influwenza avjarja kkomunikati fl-2006 aktar milli minn bidla fil-proċess ta' komunikazzjoni. Hija ppjanata analiżi addizzjonali tal-messaġġi kkomunikati minn meta kien hemm it-tnedija tal-għodda ta' IT tal-EWRS (1999) u għandha tiġġenera aktar evidenza dwar it-tendenza tal-użu tal-EWRS fuq medda ta' żmien u se tkun strumentali fl-armonizzazzjoni tal-użu tas-sistema, li tiffoka aktar fuq kwistjonijiet ta' ġestjoni milli fuq valutazzjoni. Bħal fi snin preċedenti, numru limitat ta' avvenimenti rrappurtati fl-2006 u fl-2007 biss kellhom bżonn ta' koordinazzjoni madwar il-Komunità. Ir-rapport preżenti ffoka fuq l-avvenimenti li taw bidu għal din ir-reazzjoni f'livelli differenti u li enfasizzaw numru ta' żoni speċifiċi li għandhom bżonn aktar attenzjoni. L-epidemija ta' Chikungunya fl-Italja enfasizzat ir-rwol potenzjali tal-bidla fil-klima fil-bdil tal-epidemjoloġija tal-marda li tinġarr minn vektor fl-UE u l-bżonn ta' approċċ reġjonali għal monitoraġġ u r-reazzjoni għal dawn il-mard (eż. vajrus tal-Punent tan-Nil). B'mod partikolari, dan wera li marda li għadha qatt ma ġiet irrappurtata fl-UE tista' dejjem tisfida l-kapaċitajiet għar-reazzjoni u l-koordinament f'livell Komunitarju. Iż-żieda qawwija f'każijiet ta' ħosba rrappurtati minn numru ta' Stati Membri tenfasizza l-importanza li jkun hemm approċċ ikkoordinat biex jinkiseb u jinżamm livell għoli ta' kopertura dwar it-tilqim madwar l-Ewropa, bil-ħsieb tal-mira li tiġi eliminati l-ħosba sal-2010. Proċeduri tal-ittraċċar tal-kuntatt kienu implimentati f'okkażjonijiet diversi. Ir-riżultati żvelaw li, għalkemm proċeduri ta' koordinazzjoni ġew stabbiliti b'mod mgħaġġel, mekkaniżmi għandhom jissaħħu sabiex jiġu traċċati malajr il-persuni kkonċernati u fl-istess ħin ikunu konformi mal-leġiżlazzjoni attwali dwar il-ħarsien ta' data personali. Id-diffikultajiet maġġuri fil-ksib ta' data minn linji tal-ajru għadhom jeżistu. Numru ta' avvenimenti kellhom bżonn ftehim dwar messaġġi tal-mezzi tal-massa indirizzata lil udjenzi kbar. Laqgħat ta' koordinazzjoni tal-awtoritajiet tal-EWRS fl-Istati Membri kienu partikolarment ta' użu għall-firxa ta' linji komuni li kellhom jittieħdu mal-mezzi tal-massa; madankollu, kien ċar li biex tiġi żviluppata forma ta' reazzjoni aktar strutturata hemm bżonn ta' aktar xogħol. Il-Kummissjoni u l-Istati Membri, megħjuna mill-ECDC, adattaw malajr għall-isfida tal-IHR il-ġodda. Leġiżlazzjoni eżistenti dwar mard li jittieħed diġà ġiet adattata u se tkun segwita fl-2010 minn proposta għal pakkett ta' strumenti legali li jkopru theddid għas-saħħa minn mard li ma jittieħedx. Fuq medda qasira ta' żmien, se jiġu proposti strumenti speċifiċi biex isaħħu l-ittraċċar tal-kuntatt għal skopijiet ta' saħħa pubblika. Ġew attivati mekkaniżmi biex jindirizzaw id-dimensjoni globali tal-avvenimenti rrapurtati barra mill-UE imma b'impatt possibbli f'livell Komunitarju, meta meħtieġ, sabiex tkun iffaċilitata u msaħħa l-ġestjoni ta' dawk l-avvenimenti filwaqt li jittieħed kont tar-riżorsi disponibbli bħall-Programm Ewropew għat-Taħriġ fl-Epidemjoloġija tal-Intervent (EPIET ) , li huwa issa kkoordinat mill-ECDC b'kollaborazzjoni mill-viċin tal-WHO. Huwa ppjanat titjib sostanzjali tal-applikazzjoni tal-IT tal-EWRS sabiex tinkiseb konsistenza mal-għanijiet ewlenin ġodda ta' komunikazzjoni li l-Kummissjoni u l-ECDC qed jiżviluppaw. B'mod partikolari, ir-rabta mal-għan ewlieni EPIs tal-ECDC[3] se tipprovdi bażi soda għal skambju ta' informazzjoni epidemjoloġika dwar avvenimenti speċifiċi. L-għodda li l-Kummissjoni tuża biex tgħin lill-Istati Membri biex jifirxu data u informazzjoni f'sitwazzjonijiet ta' kriżi se jgħinu lill-EWRS biex taħdem bla xkiel kull meta numru kbir ta' messaġġi jkunu ppubblikata permezz tas-sistema. Finalment, xi ftit tibdiliet żgħar fl-applikazzjoni 'tfittxija sempliċi' (għeluq tal-avvenimenti, kontenut tal-messaġġ, sindromu/marda, patoġenu, raġuni ta' rappurtaġġ, u pajjiż tal-okkurrenza) huma neċessarji u se jiġu introdotti dalwaqt. Il-bżonn ta' dawn it-tibdiliet 'żgħar' kien identifikat wkoll fir-rapport preċedenti, iżda l-fażi tat-trasferiment tal-EWRS ippreveniet dan it-tip ta' titjib. [pic][pic][pic][pic][pic] [1] ĠU L 268, 3.10.1998, p. 1. [2] Avveniment għandu jiġi rrappurtat lill-EWRS jekk waħda jew aktar mill-kriterji li ġejjin ikunu sodisfatti:1. Epidemiji ta' mard li jittieħed li jestendi għal aktar minn Stat Membru wieħed tal-Komunità.2. Gruppi spazjali jew temporali ta' każijiet ta' mard ta' tip simili, jekk l-aġenti patoġeniċi jkunu l-kawża possibbli u jkun hemm ir-riskju ta' propagazzjoni bejn l-Istati Membri ġewwa l-Komunità.3. Gruppi spazjali jew temporali ta' każijiet ta' mard ta' tip simili barra l-Komunità, jekk l-aġenti patoġeniċi jkunu l-kawża possibbli u jkun hemm ir-riskju ta' propagazzjoni lejn il-Komunità.4. Il-feġġa jew il-qawmien mill-ġdid ta' mard li jittieħed jew ta' mikrobu li jinfetta li jista' jeħtieġ azzjoni fil-pront u koordinata tal-Komunità biex jiġi kontrollat. [3] .