EUR-Lex Access to European Union law
This document is an excerpt from the EUR-Lex website
Document 52012PC0224
Proposal for a COUNCIL REGULATION amending Regulation (EC) No 954/2006 imposing a definitive anti-dumping duty on imports certain seamless pipes and tubes, of iron or steel originating in Croatia, Romania, Russia and Ukraine
Proposta għal REGOLAMENT TAL-KUNSILL li jemenda r-Regolament (KE) Nru 954/2006 li jimponi dazju antidumping definittiv fuq l-importazzjonijiet ta' ċerti pajpijiet u tubi mingħajr saldaturi, tal-ħadid jew tal-azzar, li joriġinaw fil-Kroazja, ir-Rumanija, ir-Russja u l-Ukraina
Proposta għal REGOLAMENT TAL-KUNSILL li jemenda r-Regolament (KE) Nru 954/2006 li jimponi dazju antidumping definittiv fuq l-importazzjonijiet ta' ċerti pajpijiet u tubi mingħajr saldaturi, tal-ħadid jew tal-azzar, li joriġinaw fil-Kroazja, ir-Rumanija, ir-Russja u l-Ukraina
/* COM/2012/0224 final - 2012/0112 (NLE) */
Proposta għal REGOLAMENT TAL-KUNSILL li jemenda r-Regolament (KE) Nru 954/2006 li jimponi dazju antidumping definittiv fuq l-importazzjonijiet ta' ċerti pajpijiet u tubi mingħajr saldaturi, tal-ħadid jew tal-azzar, li joriġinaw fil-Kroazja, ir-Rumanija, ir-Russja u l-Ukraina /* COM/2012/0224 final - 2012/0112 (NLE) */
MEMORANDUM TA' SPJEGAZZJONI 1. Il-kuntest tal-proposta Ir-raġunijiet għall-proposta u
l-għanijiet tagħha Din il-proposta hija dwar l-implimentazzjoni
tas-sentenza tal-Qorti tal-Ġustizzja tal-Unjoni Ewropea tal-kawżi
konġunti C-191/09 P u C-200/09 P, il-Kunsill tal-Unjoni Ewropea
kontra Interpipe Nikopolsky Seamless Tube Plant Niko Tube ZAT u Interpipe
Nizhnedneprovsky Tube Rolling Plant VAT ("Interpipe"). Permezz
tas-sentenza, il-Qorti tal-Ġustizzja sostniet is-sentenza tal-Qorti Ġenerali
dwar il-kawża T-249/06, li permezz tagħha ġie annullat
l-Artikolu 1 tar-Regolament tal-Kunsill (KE) Nru 954/2006, sakemm
id-dazju antidumping iffissat għall-esportazzjonijiet lejn l-Unjoni
Ewropea minn Interpipe kien ġie stabbilit abbażi tal-prezzijiet
tal-esportazzjoni li kienu ġew aġġustati għal
kummissjonijiet għal bejgħ permezz ta' kummerċjant affiljat. Il-kuntest ġenerali Din il-proposta
qed issir fil-kuntest tal-Artikolu 266 tat-Trattat dwar il-Funzjonament
tal-Unjoni Ewropea li skontu l-istituzzjonijiet tal-Unjoni Ewropea li l-att
tagħhom ġie ddikjarat null, ikunu meħtieġa jieħdu
l-miżuri neċessarji sabiex jikkonformaw mas-sentenza tal-Qorti
tal-Ġustizzja. Id-dispożizzjonijiet eżistenti
fil-qasam tal-proposta Ir-Regolament
tal-Kunsill (KE) Nru 954/2006 jimponi dazju antidumping definittiv fuq
l-importazzjonijiet ta' ċerti pajpijiet u tubi mingħajr saldaturi,
tal-ħadid jew tal-azzar, li joriġinaw fil-Kroazja, ir-Rumanija,
ir-Russja u l-Ukraina. Konsistenza mal-politiki u
l-għanijiet l-oħra tal-Unjoni Mhux applikabbli. 2. Il-konsultazzjoni
mal-partijiet interessati u l-valutazzjoni tal-impatt Il-konsultazzjoni mal-partijiet
interessati Il-partijiet interessati li
tikkonċernahom l-implimentazzjoni diġà kellhom il-possibbiltà li
jiddefendu l-interessi tagħhom matul l-iżvelar, skont
id-dispożizzjonijiet tar-Regolament tal-Kunsill (KE) Nru 1225/2009
dwar il-protezzjoni kontra l-importazzjonijiet li huma l-oġġett ta'
dumping minn pajjiżi mhux membri tal-Komunità Ewropea (ir-Regolament bażiku). Il-ġbir u l-użu
tal-għarfien espert Ma kienx hemm ħtieġa ta' esperti
esterni. Il-valutazzjoni tal-impatt Din il-proposta ħarġet
mill-implimentazzjoni tas-sentenza tal-Qorti tal-Ġustizzja tal-Unjoni
Ewropea fil-kawża konġunta C-191/09 P u C-200/09 P li hija
dwar l-implimentazzjoni tar-Regolament bażiku. Ir-Regolament bażiku ma jipprevedix
valutazzjoni ġenerali tal-impatt iżda fih lista eżawrjenti ta'
kundizzjonijiet li jridu jiġu vvalutati. 3. L-elementi legali
tal-proposta Sommarju tal-azzjoni proposta Il-Kunsill, permezz tar-Regolament tal-Kunsill
(KE) Nru 954/2006, impona dazju antidumping definittiv fuq
l-importazzjonijiet ta' ċerti pajpijiet u tubi mingħajr saldaturi,
tal-ħadid jew tal-azzar, li joriġinaw fil-Kroazja, ir-Rumanija,
ir-Russja u l-Ukraina. L-applikanti, il-grupp Interpipe, ikkontestaw
ir-Regolament (KE) Nru 954/2006, fost l-oħrajn, quddiem il-Qorti
tal-Prim'Istanza (QPI) fir-rigward tal-kalkolu tar-rata tad-dazju individwali
tagħhom. Bis-sentenza tagħha tal-10 ta' Marzu 2009,
il-QPI annullat l-Artikolu 1 tar-Regolament (KE) Nru 954/2006 sakemm
id-dazju antidumping iffissat għall-esportazzjonijiet mill-applikanti
jaqbeż dak li kien ikun applikabbli li kieku l-prezz tal-esportazzjoni ma
kienx ġie aġġustat għal kummissjoni meta sar il-bejgħ
permezz ta' Sepco (kumpanija tal-bejgħ relatata mal-applikanti). Wara
l-appelli tal-Kunsill u tal-Kummissjoni u l-kontroappell tal-applikanti,
il-Qorti tal-Ġustizzja tal-Unjoni Ewropea tat l-aħħar
deċiżjoni tagħha fis-sentenza tagħha tas-16 ta' Frar 2012
("is-Sentenza") billi rrifjutat l-appell u l-kontroappell u
għalhekk ikkonfermat is-sentenza tal-QPI (illum il-Qorti Ġenerali). Sabiex timplimenta is-Sentenza, ir-rata
tad-dazju għall-grupp Interpipe inħadmet mill-ġdid u
rriżultat f'rata tad-dazju antidumping differenti. Għaldaqstant qed jiġi propost li
l-Kunsill jadotta l-proposta mehmuża għal Regolament li jemenda
r-Regolament (KE) 954/2006. Bażi legali L-Artikolu 266 tat-Trattat dwar
il-Funzjonament tal-Unjoni Ewropea. Ir-Regolament tal-Kunsill (KE)
Nru 1225/2009 tat-30 ta’ Novembru 2009 dwar il-protezzjoni
kontra l-importazzjonijiet li huma l-oġġett ta' dumping minn
pajjiżi mhux membri tal-Komunità Ewropea. Il-prinċipju tas-sussidjarjetà Il-proposta taqa' taħt il-kompetenza
esklussiva tal-Unjoni. Għaldaqstant, il-prinċipju tas-sussidjarjetà
ma japplikax. Il-prinċipju tal-proporzjonalità Il-proposta hija konformi mal-prinċipju
tal-proporzjonalità għar-raġunijiet li ġejjin: Il-forma ta' azzjoni hi deskritta
fir-Regolament bażiku msemmi hawn fuq u ma tħalli l-ebda ambitu
għal deċiżjoni nazzjonali. Mhix applikabbli indikazzjoni ta' kif
il-piż finanzjarju u amministrattiv li jaqa' fuq l-Unjoni, il-gvernijiet
nazzjonali, l-awtoritajiet reġjonali u lokali, l-operaturi ekonomiċi
u ċ-ċittadini, jitnaqqas kemm jista' jkun u jkun proporzjonat mal-għan
tal-proposta. L-għażla tal-istrumenti L-istrumenti proposti: regolament. Mezzi oħra ma jkunux adattati
għar-raġuni(jiet) li ġejja/in: Ir-Regolament bażiku msemmi hawn fuq ma
jipprevedix għażliet oħra. 4. L-implikazzjoni
baġitarja Il-proposta għandha implikazzjonijiet
għall-baġit tal-Unjoni. Id-dazju antidumping emendat se jiġi
applikat b'lura biex b'hekk iwassal għal rimborż tad-differenza
fid-dazji miġbura abbażi tar-rata tad-dazju oriġinali u r-rata
tad-dazju emendata. L-impatt finali fuq il-baġit ġie stmat li
jlaħħaq EUR 3,5 miljun, ara d-dikjarazzjoni finanzjarja
leġiżlattiva mehmuża. 2012/0112 (NLE) Proposta għal REGOLAMENT TAL-KUNSILL li jemenda r-Regolament (KE) Nru 954/2006
li jimponi dazju antidumping definittiv fuq l-importazzjonijiet ta' ċerti
pajpijiet u tubi mingħajr saldaturi, tal-ħadid jew tal-azzar, li
joriġinaw fil-Kroazja, ir-Rumanija, ir-Russja u l-Ukraina IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b’mod partikolari l-Artikolu 266
tiegħu, Wara li kkunsidra r-Regolament tal-Kunsill
(KE) Nru 1225/2009 tat-30 ta' Novembru 2009 dwar
il-protezzjoni kontra l-importazzjonijiet li huma l-oġġett ta'
dumping minn pajjiżi mhux membri tal-Komunità Ewropea[1] ("ir-Regolament
bażiku"), u b'mod partikolari l-Artikolu 9(4) tiegħu, Wara li kkunsidra l-proposta mressqa
mill-Kummissjoni Ewropea ("il-Kummissjoni") wara li kkonsultat
mal-Kumitat Konsultattiv, Billi: A. IL-PROĊEDURA (1) F'Marzu 2005,
il-Kummissjoni bdiet investigazzjoni[2]
fir-rigward tal-importazzjonijiet ta' ċerti pajpijiet u tubi mingħajr
saldaturi ("SPT") li joriġinaw, fost l-oħrajn, mill-Ukraina
("investigazzjoni oriġinali"). F'Ġunju 2006 ġew
imposti dazji antidumping definittivi mir-Regolament tal-Kunsill (KE)
Nru 954/2006[3],
kif l-aħħar emendat mir-Regolament tal-Kunsill (KE) Nru 812/2008[4]. Barra minn hekk,
fit-30 ta' Novembru 2007, il-Kummissjoni ppubblikat Avviż
f'Il-Ġurnal Uffiċjali tal-Unjoni Ewropea, li jirrifletti bidla
fl-isem ta' żewġ produtturi esportaturi Ukraini[5]. (2) Fit-8 ta' Settembru 2006,
Interpipe Nikopolsky Seamless Tubes Plant Niko Tube u Interpipe
Nizhnedneprovsky Tube Rolling Plant ("il-grupp Interpipe" jew
"l-applikanti") ressqu talba[6]
quddiem il-Qorti tal-Prim'Istanza tal-Komunitajiet Ewropej ("QPI")
sabiex jiġi annullat ir-Regolament tal-Kunsill (KE) Nru 954/2006
safejn dan jaffettwa lilhom. (3) Fir-rigward ta' CJSC
Nikopolosky Seamless Tubes Plant Niko Tube u OJSC Nizhnedneprovsky Tube Rolling
Plant (NTRP), ġie mfakkar li l-ismijiet tal-kumpaniji tagħhom tbiddlu
fi Frar 2007 għal CJSC Interpipe Nikopolsky Seamless Tubes Plant Niko
Tube u OJSC Interpipe Nizhnedneprovsky Tube Rolling Plant, rispettivament[7]. Sussegwentement, CJSC
Interpipe Nikopolsky Seamless Tubes Plant Niko Tube twaqqfet bħala entità
legali u d-drittijiet u l-obbligi kollha tagħha tal-proprjetà u dawk li
mhumiex tal-proprjetà ttieħdu minn LLC Interpipe Niko Tube, li ġiet
stabbilita f'Diċembru 2007. (4) Bis-sentenza tagħha
tal-10 ta' Marzu 2009[8],
il-QPI annullat l-Artikolu 1 tar-Regolament (KE) Nru 954/2006 sakemm
id-dazju antidumping iffissat għall-esportazzjonijiet mill-applikanti
jaqbeż dak li kien ikun applikabbli kieku l-prezz tal-esportazzjoni ma
kienx ġie aġġustat għal kummissjoni meta sar il-bejgħ
permezz tal-kumpanija tal-bejgħ relatata. (5) Il-Kunsill tal-Unjoni Ewropea
u l-Kummissjoni, kif ukoll l-applikanti, ressqu appelli li jitolbu lill-Qorti
tal-Ġustizzja tal-Unjoni Ewropea ("ECJ") biex tħassar
is-sentenza tal-QPI tal-10 ta' Marzu 2009. Fis-16 ta' Frar 2012,
l-ECJ ċaħdet l-appelli u l-kontroappell ("is-Sentenza")[9] u għalhekk ikkonfermat
is-sentenza tal-QPI (issa l-Qorti Ġenerali)
tal-10 ta' Marzu 2009. (6) Konsegwentement
l-Artikolu 1 tar-Regolament tal-Kunsill (KE) Nru 954/2006 ġie
annullat sakemm id-dazju antidumping impost fuq l-esportazzjonijiet lejn
l-Unjoni Ewropea ta' oġġetti magħmula u esportati mill-grupp
Interpipe ikun qabeż dak li kien ikun applikabbli li kieku l-prezz
tal-esportazzjoni ma kienx ġie aġġustat għal kummissjoni
meta sar il-bejgħ permezz tal-kumpanija tal-bejgħ relatata. (7) Huwa rikonoxxut mill-Qrati[10] li, f'kawżi fejn
il-proċediment fih bosta stadji, l-annullament ta' wieħed minn dawn
l-istadji ma jannullax il-proċediment kollu. Il-proċediment
antidumping huwa eżempju ta' proċediment b'bosta stadji.
Għaldaqstant, l-annullament ta' partijiet tar-Regolament antidumping
definittiv ma jimplikax l-annullament tal-proċediment kollu qabel l-adozzjoni
tar-Regolament inkwistjoni. Min-naħa l-oħra, skont
l-Artikolu 266 tat-Trattat dwar il-Funzjonament tal-Unjoni Ewropea,
l-istituzzjonijiet tal-Unjoni huma obbligati jikkonformaw mas-Sentenza
tal-Qrati tal-Unjoni Ewropea. Għalhekk, l-Istituzzjonijiet tal-Unjoni,
meta jikkonformaw mas-Sentenza, għandhom il-possibbiltà li jirrimedjaw
l-aspetti tar-Regolament ikkontestat li wasslu għall-annullament
tiegħu, filwaqt li ma jbiddlux il-partijiet mhux ikkontestati li mhumiex
affettwati mis-Sentenza[11].
(8) Dan ir-Regolament jara li
jiġu kkoreġuti l-aspetti tar-Regolament tal-Kunsill (KE)
Nru 954/2006 R li nstab li kienu inkonsistenti mar-Regolament bażiku,
u li għalhekk wasslu biex jiġu annullati partijiet ta' dak
ir-Regolament. Is-sejbiet l-oħra kollha li saru fir-Regolament tal-Kunsill
(KE) Nru 954/2006 jibqgħu validi. (9) Għalhekk, skont
l-Artikolu 266 tat-Trattat dwar il-Funzjonament tal-Unjoni Ewropea,
ir-rata ta' dazju antidumping għall-grupp Interpipe ġiet ikkalkulata
mill-ġdid abbażi tas-Sentenza. B. VALUTAZZJONI ĠDIDA TAS-SEJBIET
IBBAŻATA FUQ IS-SENTENZA TAL-QORTI TAL-ĠUSTIZZJA (10) F'dan ir-Regolament, l-aspett
indirizzat tas-Sentenza huwa l-kalkolazzjoni tal-marġni tad-dumping, b'mod
iżjed speċifiku l-kalkolazzjoni tal-aġġustament li sar
fil-prezz tal-esportazzjoni għal differenzi fil-kummissjonijiet skont
l-Artikolu 2(10)(i) tar-Regolament bażiku. (11) Kif spjegat
fil-premessi (131) u (134) tar-Regolament tal-Kunsill (KE)
Nru 954/2006, il-prezz tal-esportazzjoni kien aġġustat għal
kummissjonijiet skont l-Artikolu 2(10)(i) tar-Regolament bażiku
għal bejgħ li sar permezz tal-kumpanija tal-bejgħ relatata. (12) Il-QPI fis-Sentenza
tagħha sabet, u iktar tard l-ECJ ikkonfermat, li l-Istituzzjonijiet
tal-Unjoni fit-tqabbil tal-valur normali mal-prezz tal-esportazzjoni, ma
kellhomx jagħmlu aġġustament għal kummissjonijiet f'dan
il-każ partikolari. (13) Għalhekk, il-marġni
tad-dumping ġie kkalkulat mill-ġdid mingħajr ma ġie
aġġustat il-prezz tal-esportazzjoni għal differenzi
fil-kummissjonijiet. (14) It-tqabbil ta' dan il-prezz
medju peżat tal-esportazzjoni li ġie kkalkulat mill-ġdid
mal-medja peżata tal-valur normali kif misjub waqt l-investigazzjoni
oriġinali skont it-tip tal-prodott meta joħroġ mill-fabbrika
wera li jeżisti dumping. Il-marġni stabbilit tad-dumping, espress
bħala persentaġġ tal-prezz tal-importazzjoni tas-CIF
mal-fruntiera tal-Unjoni, bid-dazju mhux imħallas huwa ta' 17,7 %. C. L-IŻVELAR (15) Il-partijiet interessati
kollha li huma kkonċernati bl-implimentazzjoni tas-Sentenza ġew
mgħarrfa bil-proposta ta' reviżjoni tar-rati tad-dazju antidumping
applikabbli għall-grupp Interpipe. Huma ngħataw ukoll perjodu li
matulu setgħu jagħmlu rappreżentazzjonijiet wara dan
l-iżvelar skont id-dispożizzjonijiet tar-Regolament bażiku. D. KONKLUŻJONI (16) Abbażi tar-rata tad-dazju
applikabbli hawn fuq għall-grupp Interpipe għandha tiġi emendata
kif xieraq. Ir-rata emendata għandha tapplika b'lura mid-data meta dak
ir-Regolament tal-Kunsill (KE) Nru 954/2006 daħal fis-seħħ,
f'dan is-sens: ħlas lura u remissjoni jridu jintalbu mill-awtoritajiet
doganali nazzjonali skont il-leġiżlazzjoni doganali applikabbli. Pereżempju,
jekk ħlas lura jew remissjoni jintalab skont l-Artiklolu 236(2)
tar-Regolament tal-Kunsill (KEE) Nru 2913/92 li jistabbilixxi Kodiċi
Doganali Komunitarju, fil-prinċipju, dan irid jingħata biss jekk
it-talba tkun saret meta titressaq applikazzjoni lill-uffiċċju
doganali xieraq f'perjodu ta' tliet snin mid-data li fiha l-ammont ta' dawk
id-dazji jkun ġie kkomunikat lid-debitur. (Pereżempju, jekk id-dazju
nġabar ftit wara d-dħul fis-seħħ tar-Regolament tal-Kunsill
(KE) Nru 954/2006, u t-talba għal rimborż saret fi żmien
tliet snin mid-data li fiha l-ammont ta' dazji jkun ġie kkomunikat
lid-debitur, normalment it-talba għandha tingħata, sakemm din tissodisfa
wkoll ir-rekwiżiti l-oħra kollha.) ADOTTA DAN IR-REGOLAMENT: Artikolu 1 L-entrata dwar
CJSC Interpipe Nikopolsky Seamless Tubes Plant Niko Tube u OJSC Interpipe
Nizhnedneprovsky Tube Rolling Plant, fit-tabella tal-Artikolu 1
tar-Regolament tal-Kunsill (KE) Nru 954/2006, għandha tinbidel b'dan
li ġej: Kumpanija || Dazju antidumping || kodiċi addizzjonali TARIC LLC Interpipe Niko Tube u OJSC Interpipe Nizhnedneprovsky Tube Rolling Plant (Interpipe NTRP) || 17,7% || A743 Artikolu 2 Abbażi ta'
dan, ir-rata tad-dazju applikabbli għall-grupp Interpipe għandha
tiġi emendata kif xieraq. Ħlas lura u remissjoni jridu jintalbu
mill-awtoritajiet doganali nazzjonali skont il-leġiżlazzjoni doganali
applikabbli. Artikolu 3 Dan ir-Regolament
għandu jidħol fis-seħħ fil-jum wara dak tal-pubblikazzjoni
tiegħu f'Il-Ġurnal Uffiċjali tal-Unjoni Ewropea. Dan ir-Regolament għandu jorbot
fl-intier tiegħu u japplika direttament fl-Istati Membri kollha. Magħmul fi Brussell, Għall-Kunsill Il-President
[…] DIKJARAZZJONI FINANZJARJA LEĠIŻLATTIVA
GĦAL PROPOSTI LI GĦANDHOM IMPATT BAĠITARJU LIMITAT
ESKLUSSIVAMENT FUQ IN-NAĦA TAD-DĦUL 1. ISEM IL-PROPOSTA: Ir-Regolament tal-Kunsill li jemenda r-Regolament
tal-Kunsill (KE) Nru 954/2006 li jimponi dazju antidumping definittiv fuq
l-importazzjonijiet ta' ċerti pajpijiet u tubi mingħajr saldaturi,
tal-ħadid jew tal-azzar, li joriġinaw fil-Kroazja, ir-Rumanija,
ir-Russja u l-Ukraina. 2. IL-LINJI TAL-BAĠIT: Il-Kapitolu u
l-Artikolu: 120 L-ammont stmat
għas-sena kkonċernata: EUR 19 171 200 000 3. L-IMPATT FINANZJARJU Il-proposta ma għandhiex impatt finanzjarju
fuq in-nefqa iżda għandha impatt finanzjarju fuq id-dħul –
l-effett huwa kif ġej: (EUR miljun b'post deċimali
wieħed) || || Il-linja tal-baġit || Id-dħul[12] || 2012 || 2013 L-Artikolu 120 || Impatti fuq ir-riżorsi proprji || -2.6 || 0 4. MIŻURI KONTRA L-FRODI Mhux applikabbli. 5. RIMARKI OĦRA Il-Qorti tal-Prim'Istanza annullat parzjalment
l-Artikolu 1 tar-Regolament tal-Kunsill (KE) Nru 954/2006 safejn
għandu x'jaqsam mal-grupp Interpipe ("l-applikanti",
jiġifieri CJSC Interpipe Nikopolsky Seamless Tubes Plant Niko Tube u OJSC
Interpipe Nizhnedneprovsky Tube Rolling Plant). Wara l-appell tal-Kunsill u
tal-Kummissjoni u l-kontroappell tal-applikanti, il-Qorti tal-Ġustizzja
tal-Unjoni Ewropea tat id-deċiżjoni finali tagħha fis-sentenza
tagħha tas-16 ta' Frar 2012 billi rrifjutat l-appell u
l-kontroappell u għalhekk ikkonfermat is-sentenza tal-QPI (illum il-Qorti
Ġenerali). Minħabba f'hekk, id-dazju antidumping definittiv għall-applikanti
jonqos minn 25,1 % għal 17,7 %. Ir-rati l-ġodda tad-dazju
għandhom, f'konformità mas-sentenza tal-qorti, jiġu applikati b'lura
mid-data meta daħal fis-seħħ id-dazju antidumping,
jiġifieri it-30 ta' Ġunju 2006. L-ammonti ta' dazji li tħallsu
mill-impożizzjoni tal-miżuri antidumping sal-aħħar ta'
Frar 2012 ġew stmati skont l-informazzjoni li toħroġ
mill-bazi ta' dejta tal-istatistiki dwar l-importazzjonijiet. Għaldaqstant jidher li l-ammonti
eliġibbli għal rimborż huma ta' madwar EUR 3,5 miljun.
Ir-rimborż għandu jintalab mill-awtoritajiet doganali nazzjonali
skont il-leġiżlazzjoni doganali applikabbli tal-Unjoni u
għalhekk l-ammont proprju se jiddependi fuq l-ammonti mitluba
mill-importaturi. Abbażi ta' dak
ta' hawn fuq, l-impatt finali fuq in-naħa tad-dħul tal-baġit
huwa ta' EUR 2,6 miljun, jiġifieri l-ammont eliġibbli wara
li jitnaqqsu 25 % tal-ispejjeż tal-ġbir. [1] ĠU L 343, 22.12.2009, p. 51. [2] ĠU C 77, 31.3.2005, p. 2. [3] ĠU L 175, 29.6.2006,
p. 4. [4] ĠU L 220, 15.8.2008,
p. 1. [5] ĠU C 288, 30.11.2007,
p. 34. [6] ĠU C 261, 28.10.2006, p. 28. [7] ĠU C 288, 30.11.2007, p. 34. [8] Il-kawża
T-249/06 - Interpipe Niko Tube u Interpipe NTRP versus il-Kunsill [2009]
II-00383 [9] ĠU C 98, 31.03.2012, p. 2. [10] Il-kawża T-2/95 Industrie des poudres sphériques (IPS) v
il-Kunsill [1998] ECR II-3939. [11] Il-kawża C-458/98 P IPS v il-Kunsill [2000] ECR
I-08147. [12] F'dak li għandu x'jaqsam ma' riżorsi proprji
tradizzjonali (dazji agrikoli, imposti fuq iz-zokkor, dazji tad-dwana)
l-ammonti indikati jridu jkunu ammonti netti, jiġifieri ammonti grossi
wara li jitnaqqsu 25 % tal-ispejjeż tal-ġbir.