Politiki ta’ rimunerazzjoni fis-settur tas-servizzi finanzjarji

 

SOMMARJU TA’:

Rakkomandazzjoni 2009/384/KE - politiki ta’ rimunerazzjoni fis-settur tas-servizzi finanzjarji

X’INHU L-GĦAN TAR-RAKKOMANDAZZJONI?

Għandha l-għan li tistabbilixxi prinċipji ġenerali applikabbli għall-prattiki ta’ rimunerazzjoni fis-settur tas-servizzi finanzjarji li jimmiraw li jevitaw kwalunkwe teħid eċċessiv ta’ riskju f’dan is-settur, b’mod partikolari minn banek u ditti ta’ investiment.

PUNTI EWLENIN

Ir-rakkomandazzjoni tapplika għal:

• kumpaniji finanzjarji bl-uffiċċju rreġistrat tagħhom jew bl-uffiċċju ewlieni tagħhom fit-territorju ta’ pajjiż tal-UE;
• remunerazzjoni ta’ dawk il-kategoriji ta’ persunal li l-attivitajiet professjonali tagħhom għandhom impatt materjali fuq il-profil tar-riskju tal-kumpanija.

Ir-rakkomandazzjoni ma tapplikax għal miżati u kummissjonijiet riċevuti minn intermedjarji u fornituri esterni tas-servizzi f’każ ta’ attivitajiet esternalizzati.

Politika ta’ rimunerazzjoni

• Il-politika ta’ rimunerazzjoni għandha tkun konformi mal-istrateġija kummerċjali, l-objettivi, il-valuri u l-interessi fit-tul tal-kumpanija finanzjarja, bħal prospetti ta’ tkabbir sostenibbli jew il-protezzjoni tal-klijenti u l-investituri fil-kors tas-servizzi pprovduti.
• Il-politika ta’ rimunerazzjoni għandha tkun ir-riżultat ta’ bilanċ bejn komponenti fissi u varjabbli. Il-komponent fiss għandu jirrappreżenta proporzjon għoli biżżejjed tar-rimunerazzjoni totali li tippermetti lill-impriża li topera politika ta’ bonus kompletament flessibbli.
• L-istruttura tal-politika ta’ rimunerazzjoni għandha tiġi aġġornata regolarment sabiex tikkorrispondi mal-iżvilupp tal-kumpanija.
• Fejn ir-rimunerazzjoni hija relatata mal-prestazzjoni, għandha tiġi evalwata skont ir-riskji attwali jew futuri mingħajr ma titħalla barra biex titqies l-ispiża tal-kapital użat u l-likwidità meħtieġa.
• Il-proċeduri segwiti għandhom ikunu ċari, iddokumentati u internament trasparenti.
• Il-bord superviżorju għandu jistabbilixxi l-prinċipji ġenerali tal-politika ta’ rimunerazzjoni tal-impriża finanzjarja u jkun responsabbli għall-implimentazzjoni tiegħu.
• Il-funzjonijiet ta’ kontroll, id-dipartimenti tar-riżorsi umani u l-esperti esterni għandhom ikunu involuti wkoll fit-tfassil tal-politika ta’ rimunerazzjoni.
• Il-politika ta’ rimunerazzjoni għandha, almenu kull sena, tkun soġġetta għal reviżjoni interna ċentrali u indipendenti minn funzjonijiet ta’ kontroll għall-konformità mal-politiki u l-proċeduri definiti mill-bord superviżorju.

Żvelar

L-informazzjoni dwar il-politika ta’ rimunerazzjoni għandha tiġi żvelata mill-impriża fil-forma ta’ dikjarazzjoni indipendenti jew żvelar perjodiku u għandha telenka:

• informazzjoni dwar il-proċess tat-teħid tad-deċiżjonijiet li jiddefinixxi l-politika ta’ rimunerazzjoni magħżula;
• informazzjoni dwar ir-rabta bejn il-paga u l-prestazzjoni;
• kriterji tal-kejl tal-prestazzjoni;
• il-kriterji tal-prestazzjoni li fuqhom huwa bbażat id-dritt għal ishma, għażliet jew komponenti varjabbli tar-rimunerazzjoni;
• il-parametri u r-raġunament prinċipali għal kwalunkwe skema ta’ bonus annwali u kwalunkwe benefiċċju ieħor mhux fi flus.

Superviżjoni

L-awtoritajiet kompetenti għandhom iwettqu attivitajiet superviżorji, billi jqisu:

• id-daqs tal-kumpanija;
• in-natura tal-attivitajiet tagħha;
• il-kumplessità tal-attivitajiet tagħha.

Il-kumpaniji finanzjarji għandhom, barra minn hekk, jibagħtu lill-awtoritajiet kompetenti dikjarazzjoni li tindika l-livell ta’ konformità mal-prinċipji mogħtija hawn fuq dwar il-politika ta’ rimunerazzjoni.

SFOND

Il-prattiki ta’ rimunerazzjoni fis-settur finanzjarju, b’mod partikolari fil-banek u fid-ditti tal-investiment, wasslu għal teħid eċċessiv ta’ riskji. Dawn il-prattiki kkontribixxew, sa ċertu punt, għal telf sinifikanti mġarrab minn impriżi finanzjarji kbar u kienu parzjalment responsabbli għall-kriżi finanzjarja ta’ Ottubru 2008. Il-komunikazzjoni “Nixprunaw l-Irkupru Ewropew”, ippubblikata mill-Kummissjoni Ewropea fir-rebbiegħa tal-2009, ippreżentat pjan li kellu l-għan li jirrestawra u jżomm sistema finanzjarja stabbli u affidabbli. Din ir-rakkomandazzjoni dwar il-politiki ta’ rimunerazzjoni kienet parti mill-istrateġija proposta mill-pjan.

DOKUMENT EWLIENI

Rakkomandazzjoni tal-Kummissjoni 2009/384/KE tat-30 ta’ April 2009 dwar politiki ta’ rimunerazzjoni fis-settur tas-servizzi finanzjarji (ĠU L 120, 15.5.2009, pp. 22–27)

DOKUMENTI RELATATI

Regolament (UE) Nru 575/2013 tal-Parlament Ewropew u tal-Kunsill tas-26 ta’ Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (ĠU L 176, 27.6.2013, pp. 1–337)

Emendi suċċessivi għar-Regolament (UE) Nru 575/2013 ġew inkorporati fid-dokument oriġinali. Din il-verżjoni konsolidata hija ta’ valur dokumentarju biss.

Direttiva 2013/36/UE tal-Parlament Ewropew u tal-Kunsill tas-26 ta’ Ġunju 2013 dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE (ĠU L 176, 27.6.2013, pp. 338–436)

Ara l-verżjoni konsolidata.

Komunikazzjoni għall-Kunsill Ewropew tar-rebbiegħa — Nixprunaw l-irkupru Ewropew`— Volum 1 (COM(2009) 114 final, 4.3.2009)

l-aħħar aġġornament 31.07.2018