IL-KUMMISSJONI EWROPEA
Brussell, 19.2.2020
COM(2020) 67 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Insawru l-futur diġitali tal-Ewropa
EUR-Lex Access to European Union law
This document is an excerpt from the EUR-Lex website
Document 52020DC0067
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS Shaping Europe's digital future
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Insawru l-futur diġitali tal-Ewropa
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Insawru l-futur diġitali tal-Ewropa
COM/2020/67 final
IL-KUMMISSJONI EWROPEA
Brussell, 19.2.2020
COM(2020) 67 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Insawru l-futur diġitali tal-Ewropa
Insawru l-futur diġitali tal-Ewropa
1.Introduzzjoni
It-teknoloġiji diġitali qed ibiddlu mill-qiegħ il-ħajja tagħna ta’ kuljum, il-mod kif naħdmu u nagħmlu n-negozju, u l-mod kif in-nies jivvjaġġaw, jikkomunikaw u jirrelataw flimkien. Il-komunikazzjoni diġitali, l-interazzjoni mal-midja soċjali, il-kummerċ elettroniku u l-intrapriżi diġitali qed jittrasformaw id-dinja tagħna b’mod kostanti. Dawn qed jiġġeneraw ammont dejjem akbar ta’ data li, jekk tinġabar u tintuża, tista’ twassal għal mezzi u livelli totalment ġodda ta’ ħolqien tal-valur. Din hija trasformazzjoni fundamentali daqs dik ikkawżata mir-rivoluzzjoni industrijali.
Fil-linji gwida politiċi tagħha, il-President tal-Kummissjoni von der Leyen enfasizzat il-ħtieġa li l-Ewropa tmexxi t-tranżizzjoni lejn pjaneta b’saħħitha u dinja diġitali ġdida. Din l-isfida doppja tat-trasformazzjoni ekoloġika u diġitali trid timxi id f’id. Kif stabbilit fil-Patt Ekoloġiku Ewropew, din teħtieġ bidla immedjata fid-direzzjoni lejn soluzzjonijiet aktar sostenibbli li jkunu aktar effiċjenti fir-riżorsi, ċirkolari u newtrali għall-klima. Din teħtieġ li kull ċittadin, kull impjegat, kull persuna tan-negozju jkollha opportunità ġusta, kull fejn tgħix, li taħsad il-benefiċċji tas-soċjetà dejjem aktar diġitalizzata tagħna.
Soluzzjonijiet diġitali bħas-sistemi tal-komunikazzjoni, l-intelliġenza artifiċjali jew it-teknoloġiji kwantistiċi jistgħu jarrikkixxu ħajjitna b’diversi modi. Iżda minbarra l-benefiċċji, it-teknoloġiji diġitali għandhom ir-riskji u l-kostijiet tagħhom. Iċ-ċittadini m’għadhomx iħossuhom fil-kontroll fuq dak li jiġri mid-data personali tagħhom u qed jitgħabbew iżżejjed dejjem aktar b’solleċitazzjonijiet artifiċjali tal-attenzjoni tagħhom. U l-attivitajiet ċibernetiċi malizzjużi jistgħu jheddu l-benesseri personali tagħna jew ifixklu l-infrastrutturi kritiċi tagħna.
Din it-trasformazzjoni sostantiva tas-soċjetà titlob riflessjoni profonda fil-livelli kollha tas-soċjetà dwar kif l-Ewropa tista’ tegħleb dawn ir-riskji u l-isfidi bl-aħjar mod u tkompli tegħlibhom. Din se tkun teħtieġ sforz enormi, iżda l-Ewropa bla dubju għandha l-mezzi biex twassal dan il-ġejjieni diġitali għal kulħadd.
2.Il-viżjoni u l-għanijiet tagħna
Il-Kummissjoni trid soċjetà Ewropea li taħdem b’soluzzjonijiet diġitali msejsa fuq il-valuri komuni tagħna, u li jarrikkixxu l-ħajja ta’ kull wieħed u waħda minna: in-nies irid ikollhom l-opportunità li jiżviluppaw personalment, li jagħżlu liberament u b’mod sikur, li jinvolvu ruħhom fis-soċjetà u dan irrispettivament mill-età, mill-ġeneru jew mill-isfond professjonali tagħhom. In-negozji jeħtieġu qafas li jippermettilhom jiftħu, ikabbru, jiġbru u jużaw id-data bejniethom, jinnovaw u jikkompetu jew jikkooperaw b’mod ġust. U l-Ewropa jeħtieġ ikollha għażla u ssegwi t-trasformazzjoni diġitali bil-mod tagħha stess.
Għal sovranità teknoloġika Ewropea, qabelxejn irridu niżguraw l-integrità u r-reżiljenza tal-infrastruttura tad-data, tan-netwerks u tal-komunikazzjonijiet tagħna. Din teħtieġ il-ħolqien ta’ kundizzjonijiet tajbin biex l-Ewropa tiżviluppa u tuża l-kapaċitajiet ewlenin tagħha stess, u b’hekk titnaqqas id-dipendenza tagħna fuq partijiet oħra tad-dinja fir-rigward tal-aktar teknoloġiji kruċjali. B’dawn il-kapaċitajiet tissaħħaħ l-abbiltà tal-Ewropa li tiddefinixxi r-regoli u l-valuri tagħha stess fl-era diġitali. Is-sovranità teknoloġika Ewropea mhijiex definita kontra xi ħadd iżda tiffoka fuq il-bżonnijiet taċ-ċittadini Ewropej u tal-mudell soċjali Ewropew. L-UE se tibqa’ miftuħa għal kull min ikun lest isegwi r-regoli Ewropej u jilħaq l-istandards Ewropej, irrispettivament minn fejn ikun bbażat.
Jenħtieġ li ċ-ċittadini jingħataw is-setgħa li jieħdu deċiżjonijiet aħjar abbażi tat-tagħrif miksub minn data mhux personali. U d-data jenħtieġ tkun disponibbli għal kulħadd – kemm jekk tkun entità pubblika jew privata, kbira jew żgħira, negozju ġdid jew ġgant. Dan se jgħin lis-soċjetà tisfrutta l-innovazzjoni u l-kompetizzjoni bl-aqwa mod u tiżgura li kulħadd jibbenefika minn dividend diġitali. Jenħtieġ li din l-Ewropa diġitali tirrifletti l-aqwa kwalitajiet tal-Ewropa – il-ftuħ, il-ġustizzja, id-diversità, id-demokrazija u l-kunfidenza
Għall-ħames snin li ġejjin, il-Kummissjoni se tiffoka fuq tliet għanijiet ewlenin biex tiżgura li s-soluzzjonijiet diġitali jgħinu lill-Ewropa taqbad triqitha lejn trasformazzjoni diġitali li taħdem għall-benefiċċju tan-nies b’rispett lejn il-valuri tagħna. Dan se jqiegħed ukoll lill-Ewropa f’pożizzjoni ta’ trendsetter fid-dibattitu globali.
·Teknoloġija li taħdem għan-nies: L-iżvilupp, il-varar u l-użu ta’ teknoloġija li tagħmel differenza reali fil-ħajja ta’ kuljum tan-nies. Ekonomija b’saħħitha u kompetittiva li tiżviluppa u ssawwar it-teknoloġija b’mod li jirrispetta l-valuri Ewropej.
·Ekonomija ġusta u kompetittiva: Suq uniku bla intoppi, fejn kumpaniji ta’ kull daqs u f’kull settur ikunu jistgħu jikkompetu b’termini ugwali, u jkunu jistgħu jiżviluppaw, jikkummerċjalizzaw u jużaw teknoloġiji, prodotti u servizzi diġitali fuq skala li ssaħħaħ il-produttività u l-kompetittività globali tagħhom, u l-konsumaturi jistgħu jkunu kunfidenti li d-drittijiet tagħhom jiġu rispettati.
·Soċjetà miftuħa, demokratika u sostenibbli: Ambjent affidabbli li fih iċ-ċittadini jħossuhom imsaħħa fil-mod kif jaġixxu u jinteraġixxu, inkluż fir-rigward tad-data li jipprovdu kemm online kif ukoll offline. Rotta Ewropea għal trasformazzjoni diġitali li ssaħħaħ il-valuri demokratiċi tagħna, tirrispetta d-drittijiet fundamentali tagħna u tikkontribwixxi għal ekonomija sostenibbli, newtrali għall-klima u effiċjenti fir-riżorsi.
Biex l-Ewropa tinfluwenza tassew il-mod kif is-soluzzjonijiet diġitali jiġu żviluppati u użati fuq skala globali, jeħtieġ li minnha nnifisha tkun attur diġitali b’saħħtu, indipendenti u bi skop. Sabiex tikseb dan, hemm bżonn qafas ċar li jippromwovi interazzjonijiet affidabbli u li jaħdmu b’mod diġitali bejn is-soċjetà, kemm għan-nies kif ukoll għan-negozji. Mingħajr din l-enfasi fuq il-fiduċja, il-proċess vitali tat-trasformazzjoni diġitali ma jistax jirnexxi.
Il-ħolqien ta’ Ewropa lesta għall-era diġitali hija puzzle kumplessa b’ħafna biċċiet interkonnessi; bħal f’kull puzzle, ma tkunx tista’ tara l-istampa kollha qabel ma tgħaqqad il-biċċiet kollha flimkien. It-taqsimiet li ġejjin se jiddeskrivu kif il-Kummissjoni beħsiebha tgħaqqad din il-puzzle u tibdel il-viżjoni tagħha f’realtà.
A.Teknoloġija li taħdem għan-nies
L-Ewropa għandha storja twila u ta’ suċċess fit-teknoloġija u fil-kreattività. L-Ewropa tkun l-aktar b’saħħitha meta taġixxi flimkien u tgħaqqad il-forzi tagħha bejn l-UE u l-Istati Membri tagħha; meta tinvolvi r-reġjuni u l-muniċipalitajiet, l-akkademja, is-soċjetà ċivili, l-istituzzjonijiet finanzjarji, in-negozji u l-intrapriżi soċjali. Hemm bżonn li l-Ewropa tgħaqqad l-investimenti tagħha fir-riċerka u fl-innovazzjoni, taqsam l-esperjenzi tagħha u tikkoopera bejn il-pajjiżi. Il-ftehimiet riċenti biex ikun hemm ħidma flimkien f’oqsma bħas-supercomputing u l-mikroelettronika wrew li l-kollaborazzjoni tista’ tkun effettiva ħafna. Se jsegwu inizjattivi simili fl-oqsma ewlenin tal-mewġa li jmiss ta’ teknoloġiji innovattivi. Il-promozzjoni tat-trasformazzjoni diġitali tal-amministrazzjonijiet pubbliċi madwar l-Ewropa hija kruċjali wkoll f’dan ir-rigward.
L-Ewropa trid tinvesti aktar fil-kapaċitajiet strateġiċi li jippermettulna niżviluppaw u nużaw soluzzjonijiet diġitali fuq skala kbira u biex nistinkaw għal interoperabbiltà f’infrastrutturi diġitali ewlenin, bħan-netwerks 5G (u 6G) estensivi tal-futur u t-teknoloġija profonda 1 . Biex nieħdu biss eżempju wieħed: il-konnettività hija l-aktar element fundamentali tat-trasformazzjoni diġitali. Hija propju dak li jippermetti l-fluss tad-data, il-kollaborazzjoni tan-nies kull fejn ikunu, u l-konnessjoni ta’ aktar oġġetti mal-internet, u b’hekk tittrasforma l-manifattura, il-mobbiltà u l-katini loġistiċi. Il-konnettività tal-Gigabits 2 ,li taħdem b’infrastrutturi siguri tal-fibra u tal-5G, hija vitali jekk irridu nisfruttaw il-potenzjal tat-tkabbir diġitali tal-Ewropa. Għal dan il-għan, huma meħtieġa investimenti adegwati fil-livelli tal-UE, nazzjonali u reġjonali biex jintlaħqu l-objettivi tal-konnettività tal-UE għall-2025., 3
Il-Qafas Finanzjarju Pluriennali l-ġdid tal-UE se jikkontribwixxi għal dawn l-objettivi. L-għan huwa li tinkiseb aktar kapaċità strateġika fejn hi l-aktar importanti u li din tkun aħjar – permezz ta’ programmi ta’ finanzjament immirati 4 , u li jsir użu mill-garanzija InvestEU u mill-fondi strutturali u ta’ żvilupp rurali 5 . Dan il-finanzjament pubbliku jrid jintuża biex jiġġenera l-investiment privat, għax flimkien biss nistgħu neliminaw il-lakuni tal-investiment. L-Unjoni tas-Swieq Kapitali se tiffaċilita l-aċċess lill-kumpaniji innovattivi u tat-teknoloġiji avvanzati għal finanzjamenti bbażati fuq is-suq madwar l-UE kollha. Għalhekk, jeħtieġ niżguraw li jkun hemm firxa wiesgħa ta’ ekwità privata u pubblika disponibbli biex tiġi ffinanzjata l-innovazzjoni diġitali.
Jeħtieġ li l-Ewropa tinvesti fil-konnettività, fit-teknoloġija profonda u fil-kapital uman, kif ukoll fl-infrastrutturi intelliġenti tal-enerġija u tat-trasport. Għall-infrastruttura diġitali u għan-netwerks biss, l-UE għandha diskrepanza fl-investiment ta’ EUR 65 biljun fis-sena 6 . L-implimentazzjoni tar-riformi u ż-żieda fl-investimenti fir-Riċerka u l-Iżvilupp u fil-varar teknoloġiku jistgħu jrendu 14 % ta’ tkabbir addizzjonali kumulattiv tal-PDG sal-2030. Jekk nieħdu azzjoni malajr (pereżempju billi nżidu l-investimenti u nadottaw miżuri sal-2022 minflok sal-2025) dan iwassal għal żieda addizzjonali ta’ 3,2 % fil-PDG u ħolqien ta’ impjiegi pożittiv sal-2030 7 . Din hija spinta soċjoekonomika li l-Ewropa ma tistax titlef.
Madankollu, l-investiment fl-innovazzjoni huwa biss parti minn din il-kwistjoni. Trasformazzjoni diġitali reali trid tibda miċ-ċittadini u n-negozji Ewropej meta jafdaw li l-applikazzjonijiet u l-prodotti tagħhom huma siguri. Aktar ma nkunu interkonnessi, aktar inkunu vulnerabbli għall-attivitajiet ċibernetiċi malizzjużi. Biex nindirizzaw din it-theddida li dejjem qed tikber, jeħtieġ naħdmu flimkien f’kull stadju: nistabbilixxu regoli konsistenti għall-kumpaniji u mekkaniżmi aktar b’saħħithom għal kondiviżjoni proattiva tal-informazzjoni; niżguraw kooperazzjoni operattiva bejn l-Istati Membri, u bejn l-UE u l-Istati Membri; nibnu sinerġiji bejn ir-reżiljenza ċibernetika ċivili u d-dimensjonijiet tal-infurzar tal-liġi u tad-difiża taċ-ċibersigurtà 8 ; niżguraw li l-infurzar tal-liġi u l-awtoritajiet ġudizzjarji jkunu jistgħu jaħdmu b’mod effettiv billi niżviluppaw għodod ġodda li jintużaw kontra l-kriminali ċibernetiċi; u fl-aħħar iżda mhux l-inqas, irridu nissensibilizzaw liċ-ċittadini tal-UE dwar iċ-ċibersigurtà 9 .
Is-sens ta’ sikurezza u sigurtà mhuwiex biss kwistjoni ta’ ċibersigurtà. Iċ-ċittadini jeħtieġ ikunu kapaċi jafdaw lit-teknoloġija nnifisha, kif ukoll il-mod kif tintuża. Dan huwa partikolarment importanti fir-rigward tal-kwistjoni tal-intelliġenza artifiċjali. F’dan ir-rigward, il-Kummissjoni Ewropea qed tippreżenta White Paper dwar il-ħolqien ta’ ekosistemi ta’ eċċellenza u ta’ fiduċja fil-qasam tal-Intelliġenza Artifiċjali, abbażi tal-valuri Ewropej.
It-titjib tal-edukazzjoni u tal-ħiliet huwa parti ewlenija tal-viżjoni globali għat-trasformazzjoni diġitali fl-Ewropa. Il-kumpaniji Ewropej jeħtieġu impjegati li jkunu midħla tat-teknoloġija diġitali biex jirnexxu fis-suq globali mmexxi mit-teknoloġija. Min-naħa tagħhom, il-ħaddiema jeħtieġu kompetenzi diġitali biex jirnexxu fis-suq tax-xogħol, li qed isir dejjem aktar diġitalizzat u li qed jinbidel malajr 10 . Jista’ jkun hemm u jrid ikun hemm aktar nisa li jkollhom karrieri sodisfaċenti fit-teknoloġija, u jeħtieġ li t-teknoloġija Ewropea tibbenefika mill-ħiliet u mill-kompetenzi tan-nisa.
Madankollu, il-ħtieġa tal-ħiliet diġitali tmur ferm lil hinn mis-suq tal-impjiegi. Peress li t-teknoloġiji diġitali jidħlu fil-ħajja professjonali u privata tagħna, li wieħed ikollu mill-inqas litteriżmu u ħiliet diġitali bażiċi saret prekundizzjoni għall-parteċipazzjoni effettiva fis-soċjetà tal-lum.
Hekk kif jiġu awtonomizzati aktar proċessi, id-diġitalizzazzjoni se twassal għal bidliet lil hinn mis-settur tat-teknoloġija. Għadd kbir ta’ okkupazzjonijiet se jiġu trasformati kompletament. It-tranżizzjoni diġitali trid tkun ekwa u ġusta u tinkoraġġixxi lin-nisa biex jieħdu sehem sħiħ. Is-sħab soċjali għandhom rwol kruċjali f’dan il-kuntest. Fl-istess ħin, il-promozzjoni tal-innovazzjoni u d-diffużjoni teknoloġika huma prerekwiżiti għal kwalità ta’ ħajja tajba, għal opportunitajiet tax-xogħol u għall-eliminazzjoni tad-distakki eżistenti fil-parteċipazzjoni, b’mod partikolari fiż-żoni rurali u remoti li qed iġarrbu tixjiħ u tnaqqis fil-popolazzjoni.
Qed jitfaċċaw ukoll sfidi ġodda fir-rigward tal-kundizzjonijiet tax-xogħol. L-għadd dejjem jikber ta’ pjattaformi online ħoloq opportunitajiet ġodda biex in-nies jaqilgħu l-għajxien tagħhom, jew biex jidħlu jew jibqgħu fis-suq tax-xogħol. Fl-istess ħin, ħoloq għadd ta’ kwistjonijiet ġodda b’rabta mal-protezzjonijiet legali tal-persuni li għalkemm m’għandhomx status ta’ ħaddiem xorta jbatu minn uħud mill-vulnerabbiltajiet tagħhom. Għalhekk, il-Kummissjoni se tipproponi qafas imsaħħaħ għall-ħaddiema tal-pjattaformi.
Azzjonijiet ewlenin
- White Paper dwar l-Intelliġenza Artifiċjali li tistabbilixxi l-alternattivi għall-qafas leġiżlattiv għal Intelliġenza Artifiċjali affidabbli, (adottata flimkien ma’ din il-Komunikazzjoni), b’segwitu dwar is-sikurezza, ir-responsabbiltà, id-drittijiet fundamentali u d-data (Q4 2020).
- Il-bini u l-varar ta’ kapaċitajiet diġitali konġunti avvanzati fl-oqsma tal-Intelliġenza Artifiċjali, taċ-ċibersigurtà, tas-supercomputing, tal-computing kwantistiku, tal-komunikazzjoni kwantistika u tal-blockchain. Strateġiji Ewropej dwar il-kwantum u l-blockchain (Q2 2020) kif ukoll Regolament rivedut tal-EuroHPC 11 dwar is-supercomputing
- L-aċċellerazzjoni tal-investimenti fil-konnettività tal-Gigabits tal-Ewropa, permezz tar-reviżjoni tad-Direttiva dwar it-Tnaqqis tal-Ispiża tal-Broadband 12 , Pjan ta’ Azzjoni aġġornat dwar il-5G u s-6G u Programm ġdid tal-Politika tal-Ispettru tar-Radju (2021). Se jiġu introdotti kurituri 5G għal mobbiltà konnessa u awtomatizzata, li jinkludu kurituri ferrovjarji (2021-2030) (2021-2023).
- Strateġija Ewropea dwar iċ-ċibersigurtà, li tinkludi l-istabbiliment ta’ Unità taċ-Ċibersigurtà konġunta, Rieżami tad-Direttiva dwar is-Sigurtà tan-Netwerks u tas-Sistemi tal-Informazzjoni (NIS) 13 u li tagħti spinta lis-suq uniku għaċ-ċibersigurtà.
- Pjan ta’ Azzjoni għall-Edukazzjoni Diġitali biex tingħata spinta lill-litteriżmu u lill-kompetenzi diġitali fil-livelli kollha tal-edukazzjoni (Q2 2020).
- Aġenda għall-Ħiliet imsaħħa biex jissaħħu l-ħiliet diġitali fis-soċjetà kollha u Garanzija għaż-Żgħażagħ imsaħħa li tpoġġi enfasi qawwi fuq il-ħiliet diġitali fit-tranżizzjonijiet bikrija tal-karriera (Q2 2020).
- Inizjattiva biex jittejbu l-kundizzjonijiet tax-xogħol tal-ħaddiema tal-pjattaformi (2021).
- Strateġija ta’ interoperabbiltà msaħħa tal-gvernijiet tal-UE biex jiġu żgurati koordinazzjoni u standards komuni għal flussi u servizzi tad-data siguri u mingħajr fruntieri fis-settur pubbliku. (2021)
B.Ekonomija ġusta u kompetittiva
F’dinja li kull ma’ jmur qed tiċkien, fejn it-teknoloġija qed tikseb dejjem aktar importanza, jeħtieġ li l-Ewropa tkompli taġixxi u tiddeċiedi b’mod indipendenti u tnaqqas id-dipendenza żejda fuq soluzzjonijiet diġitali maħluqa bnadi oħra.
Għall-iżvilupp ta’ bosta prodotti u servizzi, hemm bżonn li d-data tkun disponibbli faċilment u b’mod wiesa’, li tkun faċilment aċċessibbli u sempliċi biex tintuża u tiġi pproċessata. Id-data saret fattur ewlieni tal-produzzjoni, u l-valur li toħloq irid jinqasam lura mas-soċjetà kollha li tipparteċipa fil-forniment tad-data. Għalhekk, jeħtiġilna nibnu suq uniku Ewropew ġenwin tad-data – spazju Ewropew tad-data bbażat fuq ir-regoli u l-valuri Ewropej.
Bosta kumpaniji Ewropej – u b’mod partikolari l-SMEs – damu ma adottaw soluzzjonijiet diġitali, u għalhekk għadhom ma bbenefikawx minnhom u tilfu opportunitajiet biex jespandu. Il-Kummissjoni se taħdem biex tindirizza din il-kwistjoni permezz ta’ Strateġija Industrijali ġdida tal-UE li tistabbilixxi azzjonijiet li jiffaċilitaw it-tranżizzjoni lejn industrija tal-UE aktar diġitali, nadifa, ċirkolari u kompetittiva fuq livell globali. Din se tinkludi wkoll strateġija għall-SMEs, parti vitali mill-ekonomija Ewropea, li ta’ spiss tkun imxekkla min-nuqqas ta’ ħiliet disponibbli u minn nuqqas ta’ aċċess għall-finanzi u għas-swieq.
Sabiex jiftħu u jikbru fl-Ewropa, l-SMEs jeħtieġu suq uniku bla intoppi, u mingħajr it-tfixkil ta’ regolamenti lokali jew nazzjonali diverġenti li, b’mod partikolari, iżidu l-piżijiet amministrattivi għal kumpaniji iżgħar. Jeħtieġu regoli ċari u proporzjonati li jiġu infurzati b’mod effettiv u uniformi madwar l-UE, li jipprovdulhom suq domestiku b’saħħtu immens li minnu jvaraw lilhom infushom fix-xena dinjija.
Fl-era diġitali, l-iżgurar ta’ kundizzjonijiet ekwi għan-negozji kbar u żgħar huwa aktar importanti minn qatt qabel. Dan jissuġġerixxi li r-regoli li japplikaw offline – mir-regoli tal-kompetizzjoni u tas-suq uniku, tal-protezzjoni tal-konsumatur, tal-proprjetà intellettwali, tat-tassazzjoni u tad-drittijiet tal-ħaddiema – jenħtieġ japplikaw ukoll online. Il-konsumaturi jeħtieġ ikunu jistgħu jafdaw il-prodotti u s-servizzi diġitali daqs kemm jafdaw kull prodott u servizz ieħor. Jeħtieġ li tingħata attenzjoni lill-aktar konsumaturi vulnerabbli u li jiġi żgurat l-infurzar tal-liġijiet dwar is-sikurezza, anke fir-rigward tal-prodotti li joriġinaw minn pajjiżi terzi. Hemm xi pjattaformi li kisbu skala sinifikanti li effettivament tippermettilhom jaġixxu bħala gwardjani privati tas-swieq, tal-klijenti u tal-informazzjoni. Irridu niżguraw li r-rwol sistemiku ta’ ċerti pjattaformi online u s-saħħa fis-suq li jiksbu ma jpoġġux il-ġustizzja u l-ftuħ tas-swieq tagħna f’periklu.
Fir-rigward tal-liġi tal-kompetizzjoni tal-UE b’mod speċifiku, is-sisien tagħha huma rilevanti għall-industriji diġitali daqs kemm huma rilevanti għall-industriji tradizzjonali. Il-liġi tal-kompetizzjoni tal-UE serviet lill-Ewropa sew billi kkontribwiet għal ambjent ekwu fejn is-swieq iservu lill-konsumaturi. Fl-istess ħin, huwa importanti li r-regoli tal-kompetizzjoni jibqgħu adattati għal dinja li qed tinbidel malajr, li qed issir dejjem aktar diġitali u li trid issir aktar ekoloġika. B’dan il-ħsieb, bħalissa l-Kummissjoni qed tirrifletti dwar l-effettività tal-mod kif jiġu applikati r-regoli attwali, pereżempju fir-rigward tar-rimedji tal-antitrust, u qed twettaq ukoll evalwazzjoni u rieżami tar-regoli nfushom sabiex tiżgura li dawn jissodisfaw l-isfidi diġitali u ekoloġiċi tal-lum.
Diġà qed jitwettqu rieżamijiet tar-regoli li jirregolaw il-ftehimiet orizzontali u vertikali u tal-avviż tad-definizzjoni tas-swieq, kif ukoll kontroll tal-“idoneità” ta’ diversi linji gwida dwar l-għajnuna mill-Istat. Fost il-kwistjonijiet ewlenin għall-futur diġitali tal-Ewropa hemm l-aċċess għad-data, il-ġbir u l-kondiviżjoni tad-data, u l-bilanċ bejn il-kummerċ online u offline. Ir-rieżami tal-avviż tad-definizzjoni tas-swieq se jqis ukoll mudelli ta’ negozju diġitali ġodda – bħas-servizzi “mingħajr ħlas” li l-utenti jaċċessaw meta jipprovdu d-data tagħhom – u l-implikazzjonijiet tagħhom għar-restrizzjonijiet kompetittivi. Il-kontroll tal-idoneità li qed isir tal-Komunikazzjoni tal-Kummissjoni tal-2014 dwar il-Proġetti Importanti ta’ Interess Ewropew Komuni (IPCEI) huwa mfassal biex jiġi vvalutat jekk huwiex meħtieġ aġġornament biex jiġu ċċarati aktar il-kundizzjonijiet li skonthom ikunu jistgħu jitkomplew b’mod effettiv il-proġetti ewlenin immexxija mill-Istati Membri f’setturi strateġiċi ewlenin għall-futur diġitali u ekoloġiku tal-Ewropa.
Il-Kummissjoni qed tippjana wkoll li tniedi inkjesta settorjali li jkollha enfasi qawwija fuq dawn is-swieq ġodda u emerġenti li qed isawru l-ekonomija u s-soċjetà tagħna.
Madankollu, il-politika tal-kompetizzjoni waħedha ma tistax tindirizza l-problemi sistemiċi kollha li jistgħu jinqalgħu fl-ekonomija tal-pjattaformi. Abbażi tal-loġika tas-suq uniku, jistgħu jkunu meħtieġa regoli addizzjonali biex jiġu żgurati l-kontestabbiltà, il-ġustizzja u l-innovazzjoni u l-possibbiltà tad-dħul fis-suq, kif ukoll l-eżistenza ta’ interessi pubbliċi li jmorru lil hinn mill-kompetizzjoni jew mill-kunsiderazzjonijiet ekonomiċi.
L-iżgurar tal-ġustizzja fl-ekonomija diġitali hija sfida ewlenija. Fid-dinja diġitali mingħajr fruntieri, għadd żgħir ta’ kumpaniji bl-akbar sehem mis-suq jiksbu l-maġġoranza tal-profitti fuq il-valur li jinħoloq f’ekonomija bbażata fuq id-data. Dawk il-profitti ta’ spiss ma jiġux intaxxati fil-post fejn jiġu ġġenerati minħabba regoli tat-taxxa korporattiva antikwati, u dan ifixkel il-kompetizzjoni. Huwa għalhekk li l-Kummissjoni se tfittex li tindirizza l-isfidi tat-taxxa li jirriżultaw mid-diġitalizzazzjoni tal-ekonomija.
Azzjonijiet ewlenin
- Strateġija Ewropea għad-Data biex l-Ewropa ssir mexxejja globali fl-ekonomija aġli mil-lat ta’ data (Frar 2020), li tħabbar qafas leġiżlattiv għall-governanza tad-data (Q4 2020) u l-possibbiltà ta’ Att dwar id-Data (2021).
- Valutazzjoni u rieżami kontinwu tal-idoneità tar-regoli tal-kompetizzjoni tal-UE għall-era diġitali (2020-2023), u t-tnedija ta’ inkjesta settorjali (2020).
- Fil-kuntest tal-pakkett tal-Att dwar is-Servizzi Diġitali, il-Kummissjoni se tesplora aktar ir-regoli ex ante biex tiżgura li s-swieq ikkaratterizzati minn pjattaformi kbar li għandhom effetti sinifikanti tan-netwerk u li jaġixxu bħala gwardjani, jibqgħu ġusti u kontestabbli għall-innovaturi, għan-negozji u għall-parteċipanti ġodda fis-suq. (Q4 2020).
-
- Proposta ta’ Pakkett dwar l-Istrateġija Industrijali li jippreżenta firxa ta’ azzjonijiet li jiffaċilitaw it-trasformazzjoni lejn industriji tal-UE nodfa, ċirkolari, diġitali u kompetittivi globalment, li jinkludu lill-SMEs u t-tisħiħ tar-regoli tas-suq uniku.
- Il-ħolqien ta’ qafas li jippermetti Finanzi Diġitali konvenjenti, kompetittivi u siguri, li jinkludi proposti leġiżlattivi dwar il-kriptoassi, u dwar ir-reżiljenza diġitali, operazzjonali u ċibernetika fis-settur finanzjarju, u strateġija għal suq integrat tal-pagamenti tal-UE li jappoġġa s-servizzi u s-soluzzjonijiet tal-pagamenti diġitali pan-Ewropej (Q3 2020);
- Komunikazzjoni dwar it-Tassazzjoni tal-Intrapriżi għas-seklu 21, li tqis il-progress li sar fil-kuntest tal-Organizzazzjoni għall-Kooperazzjoni u l-Iżvilupp Ekonomiċi (OECD) fl-indirizzar tal-isfidi tat-taxxa li jirriżultaw mid-diġitalizzazzjoni tal-ekonomija.
- It-twettiq ta’ Aġenda tal-Konsumatur ġdida, li tagħti s-setgħa lill-konsumaturi biex jagħmlu għażliet infurmati u jkollhom rwol attiv fit-trasformazzjoni diġitali (Q4 2020).
C.Soċjetà miftuħa, demokratika u sostenibbli
In-nies għandhom dritt għal teknoloġija li jistgħu jafdaw. Dak li huwa illegali offline jrid ukoll ikun illegali online. Filwaqt li ma nistgħux inbassru l-futur tat-teknoloġija diġitali, il-valuri u r-regoli etiċi Ewropej u n-normi soċjali u ambjentali jridu japplikaw ukoll fl-ispazju diġitali.
F’dawn l-aħħar snin, l-Ewropa wittiet it-triq lejn internet miftuħ, ġust, inklużiv u li jiffoka fuq in-nies permezz tar-Regolament Ġenerali dwar il-Protezzjoni tad-Data li jistabbilixxi l-istandards u r-regoli tiegħu għall-kooperazzjoni bejn il-pjattaformi u n-negozji. Sabiex tipproteġi lid-demokraziji Ewropej u l-valuri li jirfduhom, il-Kummissjoni se tkompli tiżviluppa u timplimenta regoli innovattivi u proporzjonati għal soċjetà diġitali affidabbli. Soċjetà diġitali bħal din jenħtieġ tkun kompletament inklużiva, ġusta u aċċessibbli għal kulħadd.
F’dan il-kuntest, huwa essenzjali li jissaħħu u jiġu mmodernizzati r-regoli applikabbli għas-servizzi diġitali madwar l-UE, filwaqt li jiġu ċċarati r-rwoli u r-responsabbiltajiet tal-pjattaformi online. Il-bejgħ ta’ oġġetti illeċiti, perikolużi jew foloz, u d-disseminazzjoni tal-kontenut illegali jridu jiġu indirizzati b’mod effettiv online daqs kemm jiġu indirizzati offline.
Li jkun hemm fiduċja fid-dinja online jfisser ukoll li l-konsumaturi jkollhom aktar kontroll u responsabbiltà għad-data u l-identità tagħhom. Huma meħtieġa regoli aktar ċari dwar it-trasparenza, l-imġiba u r-responsabbiltà ta’ dawk li jaġixxu bħala l-gwardjani tal-informazzjoni u tal-fluss tad-data, kif ukoll infurzar effettiv tar-regoli eżistenti. Jenħtieġ ukoll li n-nies ikunu jistgħu jikkontrollaw l-identità tagħhom online, meta tkun meħtieġa l-awtentikazzjoni biex ikollhom aċċess għas-servizzi online. Hija meħtieġa identità elettronika (eID) pubblika aċċettata universalment sabiex il-konsumaturi jkollhom aċċess għad-data tagħhom u jużaw il-prodotti u s-servizzi li jridu b’mod sigur mingħajr ma jkollhom jużaw pjattaformi mhux relatati u jikkondividu d-data magħhom bla bżonn. L-Ewropej jistgħu jibbenefikaw ukoll mill-użu tad-data biex itejbu t-teħid tad-deċiżjonijiet pubbliċi kif ukoll dawk privati.
F’dinja fejn il-biċċa l-kbira tad-dibattiti pubbliċi u tar-reklamar politiku bdew isiru online, irridu wkoll inkunu lesti naġixxu biex niddefendu d-demokraziji tagħna bil-qawwa. Iċ-ċittadini jridu tweġibiet sinifikanti li jindirizzaw it-tentattivi ta’ manipulazzjoni tal-ispazju tal-informazzjoni, ta’ spiss permezz ta’ kampanji ta’ diżinformazzjoni mmirati u kkoordinati. L-Ewropa teħtieġ aktar trasparenza fil-modi ta’ kif l-informazzjoni tiġi kondiviża u ġestita fuq l-internet. Midja ta’ kwalità affidabbli hija essenzjali għad-demokrazija u għad-diversità kulturali. Fid-dawl ta’ dan, il-Kummissjoni se tippreżenta Pjan ta’ Azzjoni Ewropew għad-Demokrazija u pjan ta’ azzjoni speċifiku għas-settur tal-midja u dak awdjoviżiv.
Il-komponent diġitali se jkun kruċjali wkoll biex jintlaħqu l-ambizzjonijiet tal-Patt Ekoloġiku Ewropew 14 u l-Għanijiet ta’ Żvilupp Sostenibbli 15 . Bħala faċilitaturi b’saħħithom tat-tranżizzjoni lejn is-sostenibbiltà, is-soluzzjonijiet diġitali jistgħu javvanzaw l-ekonomija ċirkolari, jappoġġaw id-dekarbonizzazzjoni tas-setturi kollha u jnaqqsu l-impronta ambjentali u soċjali tal-prodotti li jitqiegħdu fis-suq tal-UE. Pereżempju, is-setturi ewlenin bħall-agrikoltura ta’ preċiżjoni, it-trasport u l-enerġija jistgħu jibbenefikaw immens mis-soluzzjonijiet diġitali biex jilħqu l-objettivi ambizzjużi tas-sostenibbiltà tal-Patt Ekoloġiku Ewropew.
Is-soluzzjonijiet diġitali, u d-data b’mod partikolari, se jippermettu wkoll approċċ ta’ ċiklu tal-ħajja integrat b’mod sħiħ, mit-tfassil permezz tal-għażla tal-provvista tal-enerġija, tal-materja prima u ta’ elementi kontributuri oħra, sal-prodotti finali u mbagħad sal-istadju ta’ tmiem il-ħajja. Pereżempju, jekk insegwu fejn u meta l-elettriku huwa l-aktar meħtieġ nistgħu nżidu l-effiċjenza enerġetika u nużaw inqas fjuwils fossili.
Madankollu, huwa ċar ukoll li s-settur tal-ICT jeħtieġ jgħaddi wkoll mit-trasformazzjoni ekoloġika tiegħu. L-impronta ambjentali ta’ dan is-settur hija sinifikanti, u hija stmata għal bejn il-5 u d-9 % tal-użu tal-elettriku totali tad-dinja u għal aktar minn 2 % tal-emissjonijiet kollha 16 . Iċ-ċentri tad-data u tat-telekomunikazzjonijiet jeħtieġ isiru aktar effiċjenti fl-enerġija, jużaw mill-ġdid l-enerġija mill-iskart u jużaw aktar sorsi ta’ enerġija rinnovabbli. Dawn jistgħu u jenħtieġ isiru newtrali għall-klima sal-2030.
Huwa importanti wkoll il-mod kif it-tagħmir tal-ICT jitfassal, jinxtara, jiġi kkunsmat u riċiklat. Lil hinn mir-rekwiżiti tal-effiċjenza enerġetika tal-Ekodisinn, it-tagħmir tal-ICT irid isir ċirkolari għalkollox – imfassal biex iservi aktar, biex tkun tista’ ssirlu manutenzjoni kif suppost, biex ikun jista’ jinkludi materjal riċiklat u biex ikun jista’ jiġi żarmat u riċiklat faċilment.
Is-setgħa tad-data hija essenzjali wkoll fis-settur tas-saħħa. Ir-reġistri tas-saħħa diġitalizzati, li jinġabru fi spazju Ewropew tad-data dwar is-saħħa, jistgħu jwasslu għal trattament aħjar ta’ kundizzjonijiet kroniċi maġġuri, inkluż il-kanċer u l-mard rari, iżda wkoll għall-aċċess ugwali għal servizzi tas-saħħa ta’ kwalità għolja għaċ-ċittadini kollha.
Azzjonijiet ewlenin
- Regoli ġodda u riveduti li japprofondixxu s-Suq Intern għas-Servizzi Diġitali, billi jżidu u jarmonizzaw ir-responsabbiltajiet tal-pjattaformi online u tal-fornituri tas-servizzi tal-informazzjoni u jsaħħu s-sorveljanza fuq il-politiki tal-kontenut tal-pjattaformi fl-UE. (Q4 2020, bħala parti mill-pakkett tal-Att dwar is-Servizzi Diġitali).
- Reviżjoni tar-Regolament eIDAS biex tittejjeb l-effettività tiegħu, jiġu estiżi l-benefiċċji tiegħu għas-settur privat u jiġu promossi identitajiet diġitali fdati għall-Ewropej kollha (Q4 2020).
-
- Pjan ta’ Azzjoni medjatiku u awdjoviżiv li jappoġġa t-trasformazzjoni diġitali u l-kompetittività tas-settur awdjoviżiv u tal-midja, biex jiġi stimulat l-aċċess għal kontenut ta’ kwalità u l-pluraliżmu tal-midja (Q4 2020)
- Pjan ta’ Azzjoni Ewropew għad-Demokrazija li jtejjeb ir-reżiljenza tas-sistemi demokratiċi tagħna, li jappoġġa l-pluraliżmu tal-midja u jindirizza t-theddid ta’ intervent estern fl-elezzjonijiet Ewropej (Q4 2020).
- L-inizjattiva “Destinazzjoni d-Dinja”, għall-iżvilupp ta’ mudell diġitali tad-Dinja (“Tewmi Diġitali tad-Dinja”) li jtejjeb il-kapaċitajiet ta’ tbassir u ta’ ġestjoni tal-kriżijiet ambjentali tal-Ewropa (Żmien: mill-2021).
- Inizjattiva tal-apparat elettroniku ċirkolari, li timmobilizza l-istrumenti eżistenti u ġodda f’konformità mal-qafas ta’ politika għall-prodotti sostenibbli tal-pjan ta’ azzjoni għall-ekonomija ċirkolari li jmiss, sabiex jiġi żgurat li l-apparati jiġu mfassla bil-ħsieb tad-durabbiltà, il-manutenzjoni, iż-żarmar, l-użu mill-ġdid u r-riċiklaġġ, u inkluż id-dritt għal tiswija jew aġġornament biex jiġi estiż iċ-ċiklu tal-ħajja tal-apparati elettroniċi u jiġi evitat li jsiru obsoleti qabel iż-żmien (2021).
- Inizjattivi biex jinkisbu ċentri tad-data newtrali għall-klima, li jkunu effiċjenti ħafna fl-użu tal-enerġija u sostenibbli sa mhux aktar tard mill-2030 u miżuri ta’ trasparenza għall-operaturi tat-telekomunikazzjoni dwar l-impronta ambjentali tagħhom.
- Il-promozzjoni ta’ reġistri elettroniċi tas-saħħa bbażati fuq format ta’ skambju Ewropew komuni biex iċ-ċittadini Ewropej jingħataw aċċess sigur għad-data dwar is-saħħa madwar l-UE u għall-iskambju tagħha. Spazju Ewropew tad-data dwar is-saħħa li jtejjeb l-aċċessibbiltà għad-data dwar is-saħħa f’termini ta’ sikurezza u sigurtà u jippermetti riċerka, dijanjożi u trattamenti mmirati u aktar malajr (mill-2022).
3.Id-dimensjoni internazzjonali – l-Ewropa bħala attur globali
Il-mudell Ewropew kien ta’ ispirazzjoni għal diversi sħab oħra madwar id-dinja huma u jfittxu jindirizzaw l-isfidi ta’ politika, u dan jenħtieġ ma jkunx differenti f’dak li għandu x’jaqsam mal-aspett diġitali.
F’termini ġeopolitiċi, jenħtieġ li l-UE tisfrutta s-setgħa regolatorja, il-kapaċitajiet industrijali u teknoloġiċi msaħħa, il-qawwiet diplomatiċi u l-istrumenti finanzjarji esterni tagħha biex timbotta l-approċċ Ewropew u ssawwar l-interazzjonijiet globali. Dan jinkludi l-ħidma li saret skont il-ftehimiet ta’ assoċjazzjoni u tal-kummerċ, kif ukoll il-ftehimiet milħuqa f’korpi internazzjonali bħan-Nazzjonijiet Uniti, l-OECD, l-ISO u l-G20 bl-appoġġ tal-Istati Membri tal-UE.
Preżenza diġitali b’saħħitha fil-politika tat-tkabbir, tal-viċinat u tal-iżvilupp tal-UE se tippermetti t-tkabbir u tixpruna l-iżvilupp sostenibbli, inkluż l-użu ta’ ICT ekoloġika fil-pajjiżi u fir-reġjuni sħab, bi qbil mal-impenn tal-Ewropa għall-Aġenda 2030 għall-Iżvilupp Sostenibbli. Il-konklużjonijiet tat-Task Force dwar l-Ekonomija Diġitali tal-Unjoni Afrikana u tal-UE se jirfdu l-appoġġ għat-trasformazzjoni diġitali fl-Afrika, inkluż il-ħolqien ta’ Suq Diġitali Uniku Afrikan hekk kif isir disponibbli l-finanzjament permezz tal-Qafas Finanzjarju Pluriennali l-ġdid tal-UE.
Bosta pajjiżi madwar id-dinja allinjaw il-leġiżlazzjoni tagħhom mas-sistema b’saħħitha tal-protezzjoni tad-data tal-UE. Biex jerġa’ jkollha dan is-suċċess, l-UE jenħtieġ tippromwovi b’mod attiv il-mudell tagħha ta’ internet globali sikur u miftuħ.
F’termini ta’ standards, is-sħab kummerċjali tagħna ngħaqdu mal-proċess immexxi mill-UE li stabbilixxa b’suċċess l-istandards globali għall-5G u għall-Internet tal-Oġġetti. L-Ewropa issa trid tkun mexxejja fil-proċess tal-adozzjoni u tal-istandardizzazzjoni tal-ġenerazzjoni teknoloġika l-ġdida: il-blockchain, is-supercomputing, it-teknoloġiji kwantistiċi, l-algoritmi u l-għodod li jippermettu l-kondiviżjoni tad-data u l-użu tad-data 17 .
Fir-rigward tal-kummerċ u tal-investiment, il-Kummissjoni se tkompli tindirizza r-restrizzjonijiet mhux ġustifikati għall-kumpaniji Ewropej f’pajjiżi terzi, bħar-rekwiżiti ta’ lokalizzazzjoni tad-data, u se tħabrek biex tilħaq għanijiet ambizzjużi f’termini ta’ aċċess għas-suq, ir-rispett tal-proprjetà intellettwali, ir-riċerka u l-iżvilupp, u l-programmi tal-istandardizzazzjoni. Id-diskussjonijiet li għaddejjin dwar il-bini ta’ alleanza tad-data affidabbli ma’ sħab tal-istess fehma tagħna, li jaqsmu l-valuri u l-istandards għoljin tagħna, jistgħu jtejbu l-flussi tad-data u l-ġabra tad-data ta’ kwalità għolja disponibbli.
L-UE hija l-aktar reġjun miftuħ għall-kummerċ u għall-investiment fid-dinja u se tibqa’ dan, dment li kull min jiġi hawnhekk għan-negozju jaċċetta u jirrispetta r-regoli tagħna. Il-Kummissjoni se tuża l-istrumenti kollha għad-dispożizzjoni tagħha biex tiżgura li kulħadd jirrispetta l-leġiżlazzjoni tal-UE u r-regoli internazzjonali biex jinżamm ambjent ekwu fis-settur diġitali. Se tipproponi wkoll regoli ġodda fejn meħtieġ, bħax-xogħol li għaddej bħalissa biex jiġi żviluppat strument legali li jindirizza l-effetti distorsivi tas-sussidji barrani fis-suq intern.
L-Istrateġija Globali għall-Kooperazzjoni Diġitali se tippreżenta approċċ Ewropew għat-trasformazzjoni diġitali li jibni fuq l-istorja twila u ta’ suċċess tagħna fl-oqsma tat-teknoloġija, tal-innovazzjoni u tal-inġenwità, li jkun ibbażat fuq il-valuri Ewropej, inkluż dak tal-ftuħ, u se twassalhom fuq ix-xena internazzjonali u tinvolvi lis-sħab tagħna. Din se tirrifletti wkoll fuq l-ħidma tal-UE fl-Afrika u fi bnadi oħra fir-rigward tal-Għanijiet ta’ Żvilupp Sostenibbli, “Digital4Development” u t-tisħiħ tal-kapaċitajiet.
L-Ewropa tinsab fuq quddiem nett fl-indirizzar tal-interferenzi manipulattivi fl-ispazju tal-informazzjoni tagħha u żviluppat approċċi u strumenti importanti. Se tkompli taħdem mill-qrib mas-sħab internazzjonali tagħha, bħall-G7, biex jinstabu approċċi komuni bil-ħsieb li jiġu żviluppati normi u standards internazzjonali.
Azzjonijiet ewlenin
- Strateġija Globali għall-Kooperazzjoni Diġitali (2021).
- White Paper dwar strument għas-sussidji barranin (Q2 2020).
- Ċentru Diġitali għall-Iżvilupp li se jibni u jikkonsolida approċċ għall-UE kollha kemm hi li jippromwovi l-valuri tal-UE u jimmobilizza l-Istati Membri tal-UE u l-industrija tal-UE, l-Organizzazzjonijiet tas-Soċjetà Ċivili (CSOs), l-istituzzjonijiet finanzjarji, l-għarfien espert u t-teknoloġiji fid-diġitalizzazzjoni.
- Strateġija għall-istandardizzazzjoni, li tippermetti l-varar ta’ teknoloġiji interoperabbli li jirrispettaw ir-regoli tal-Ewropa, u li tippromwovi l-approċċ u l-interessi tal-Ewropa fix-xena globali (Q3 2020).
- Immappjar tal-opportunitajiet u pjan ta’ azzjoni għall-promozzjoni tal-approċċ Ewropew fir-relazzjonijiet bilaterali u fil-fora multilaterali (Q2 2020).
4.Konklużjoni
It-teknoloġiji diġitali, avvanzati kemm huma avvanzati, jibqgħu biss għodod. Ma jistgħux isolvu l-problemi kollha tagħna. Minkejja dan, qed jagħmlu possibbli affarijiet li sa ġenerazzjoni ilu lanqas biss konna nimmaġinawhom. Is-suċċess tal-Istrateġija Diġitali tal-Ewropa se jitkejjel f’kemm inkunu kapaċi nħaddmu dawn l-għodod biex inwettqu beni pubbliċi għaċ-ċittadini Ewropej.
L-ekonomija aġli mil-lat ta’ data u l-potenzjal trasformattiv enormi tagħha se jaffettwawna lkoll u l-Ewropa tinsab lesta biex taħtaf bis-sħiħ il-vantaġġi li se ġġib magħha. Madankollu, sabiex din it-trasformazzjoni diġitali tirnexxi bis-sħiħ, jeħtieġ noħolqu l-oqfsa t-tajba biex niżguraw teknoloġija affidabbli u biex nagħtu lin-negozji l-fiduċja, il-kompetenzi u l-mezzi biex jiddiġitalizzaw. Il-koordinazzjoni tal-isforzi bejn l-UE, l-Istati Membri, ir-reġjuni, is-soċjetà ċivili u s-settur privat hija essenzjali biex niksbu dan u nsaħħu t-tmexxija diġitali tal-Ewropa.
L-Ewropa tista’ tkun il-mexxejja ta’ din it-trasformazzjoni diġitali u tistabbilixxi l-istandards globali fir-rigward tal-iżvilupp teknoloġiku. Aktar importanti minn hekk, tista’ tagħmel dan filwaqt li tiżgura l-inklużjoni u r-rispett ta’ kull bniedem. It-trasformazzjoni diġitali tista’ taħdem biss jekk taħdem għal kulħadd u mhux biss għal ftit. Dan se jkun tassew proġett Ewropew – soċjetà diġitali bbażata fuq il-valuri Ewropej u r-regoli Ewropej – li jista’ tassew jispira lill-bqija tad-dinja.
Is-supercomputing, it-teknoloġiji kwantistiċi, il-blockchain u l-kapaċitajiet tal-cloud siguri u pan-Ewropej
Il-Komunikazzjoni tal-Kummissjoni “Konnettività għal Suq Uniku Diġitali Kompetittiv – Lejn Soċjetà Ewropea tal-Gigabits”, COM/2016/0587 final.
Dawn l-objettivi jeħtieġu li l-familji Ewropej kollha, rurali jew urbani, ikollhom konnettività tal-internet ta’ mill-inqas “100 Mbps, li tista’ tiġi aġġornata għal veloċità bil-Gigabits”. Dan jirrifletti l-aspettattiva tal-Kummissjoni li, kulma jmur f’dan id-deċennju, l-unitajiet domestiċi se jkunu jeħtieġu dejjem aktar il-veloċitajiet ta’ 1 Gbps. Dan jaqbel mal-osservazzjoni tal-Kummissjoni li t-talbiet tal-kapaċità tan-netwerk qed jikbru b’mod esponenzjali u li hemm bżonn jiġu żgurati investimenti sostenibbli f’netwerks li kapaċi joffru veloċitajiet tal-Gigabits simetriċi (jiġifieri għall-upload u għad-download) biex ikunu adegwati għall-ekonomija Ewropea tad-data wara l-2025. Il-muturi soċjoekonomiċi ewlenin kollha, bħall-iskejjel, l-isptarijiet u n-negozji jenħtieġ jibbenefikaw diġà mill-konnettività tal-Gigabits b’veloċitajiet ta’ upload u download indaqs sa mhux aktar tard mill-2025.
Il-Programm Ewropa Diġitali (DEP), il-Faċilità Nikkollegaw l-Ewropa (FNE 2), Orizzont Ewropa, il-Programm Spazjali.
Il-FEŻR, il-FAEŻR.
Restoring EU competitiveness, (Inreġġgħu lura l-kompetittività tal-UE), il-BEI, 2016. Ir-Rapport tal-BEI dwar l-Investiment 2019/20, Accelerating Europe’s Transformation, (Inħaffu t-Trasformazzjoni tal-Ewropa), jikkonferma li huwa meħtieġ investiment pubbliku fuq skala kbira biex tiġi appoġġata d-diġitalizzazzjoni tal-infrastruttura.
Shaping the digital transformation (Insawru t-trasformazzjoni diġitali), Studju mwettaq għall-Kummissjoni Ewropea, McKinsey Global Institute (li għandu jiġi ppubblikat fit-tieni kwart tal-2020)
Is-sett ta’ għodod tal-UE għas-sigurtà tal-5G li ġie ppubblikat riċentement jikkostitwixxi pass importanti għax jistabbilixxi sett ta’ miżuri robusti u komprensivi għal approċċ koordinat tal-UE biex ikollna netwerks 5G siguri.
It-tisħiħ taċ-ċibersigurtà se jkun kontribut ewlieni lejn il-bini ta’ Unjoni tas-Sigurtà ġenwina u effettiva.
Aktar minn 90 % tal-impjiegi diġà jitolbu mill-anqas ħiliet diġitali bażiċi, iżda 43 % taċ-ċittadini Ewropej u aktar minn terz tal-forza tax-xogħol tal-UE huma neqsin minnhom.
Ir-Regolament tal-Kunsill (UE) Nru 2018/1488 tat-28 ta’ Settembru 2018.
Id-Direttiva 2014/61/UE tal-Parlament Ewropew u tal-Kunsill tal-15 ta’ Mejju 2014.
Id-Direttiva (UE) 2016/1148 tal-Parlament Ewropew u tal-Kunsill tas-6 ta’ Lulju 2016
Il-Patt Ekoloġiku Ewropew, COM(2019) 640 final, il-11 ta’ Diċembru 2019: https://ec.europa.eu/info/sites/info/files/european-green-deal-communication_en.pdf
L-Għanijiet ta’ Żvilupp Sostenibbli (SDG) huma ġabra ta’ 17-il għan globali mfassla biex ikunu “pjan ta’ azzjoni għall-kisba ta’ futur aħjar u aktar sostenibbli għal kulħadd”. Dawn ġew stabbiliti mill-Assemblea Ġenerali tan-NU, bħala parti mir-Riżoluzzjoni tan-NU 70/1, fl-2015: https://www.un.org/sustainabledevelopment/sustainable-development-goals/ .
Il-Forum Dinji dwar l-Enerġija: https://www.enerdata.net/publications/executive-briefing/expected-world-energy-consumption-increase-from-digitalization.html .
Pereżempju, l-użu tal-istandard tal-fatturar elettroniku tal-UE fl-Awstralja, fi New Zealand u f’Singapore, kien ta’ suċċess, qed jaġixxi bħala faċilitatur tal-kummerċ għan-negozji tal-UE u qed jiġi kkunsidrat għall-użu fil-livell internazzjonali.