Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32015R1905

Regolament tal-Kummissjoni (UE) 2015/1905 tat-22 ta' Ottubru 2015 li jemenda l-Anness II tar-Regolament (KE) Nru 183/2005 tal-Parlament Ewropew u tal-Kunsill fir-rigward tal-ittestjar ta' żjut, xaħmijiet u prodotti derivati minnhom għad-diossini (Test b'rilevanza għaż-ŻEE)

ĠU L 278, 23.10.2015, p. 5–10 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/reg/2015/1905/oj

Date of document:
22/10/2015; Data ta' adozzjoni
Date of effect:
12/11/2015; Dħul fis-seħħ Data tal-pubblikazzjoni +20 Ara Art. 2
Date of effect:
23/04/2016; Applikazzjoni parzjali Ara Art. 2
Date of end of validity:
No end date
Author:
Il-Kummissjoni Ewropea
Responsible body:
Directorate-General for Health and Food Safety
Form:
Regolament
Treaty:
Trattat dwar il-Funzjonament tal-Unjoni Ewropea
Legal basis:
Link
Link
Link
Select all documents mentioning this document
Modifies:
Relation Act Comment Subdivision concerned From To
Modifies 32005R0183 Tlestija anness II Test 12/11/2015
Modifies 32005R0183 Sostituzzjoni anness II Test 12/11/2015
Modified by:
Relation Act Comment Subdivision concerned From To
Corrected by 32015R1905R(01) (FR)
Instruments cited:
Link

23.10.2015   

MT

Il-Ġurnal Uffiċjali tal-Unjoni Ewropea

L 278/5

REGOLAMENT TAL-KUMMISSJONI (UE) 2015/1905

tat-22 ta' Ottubru 2015

li jemenda l-Anness II tar-Regolament (KE) Nru 183/2005 tal-Parlament Ewropew u tal-Kunsill fir-rigward tal-ittestjar ta' żjut, xaħmijiet u prodotti derivati minnhom għad-diossini

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament Nru 183/2005 tal-Parlament Ewropew u tal-Kunsill (KE) tat-12 ta' Jannar 2005 li jistabbilixxi l-ħtiġijiet għall-iġjene tal-għalf (1), u b'mod partikolari l-Artikolu 27 tiegħu,

Billi:

(1)

Ir-Regolament (KE) Nru 183/2005 jistipula regoli ġenerali dwar l-iġjene tal-għalf, kif ukoll kundizzjonijiet u arranġamenti biex jiġi żgurat li jiġu rispettati l-kundizzjonijiet tal-ipproċessar għall-minimizzazzjoni u l-kontroll tal-perikli potenzjali. Dan jistipula wkoll li l-istabbilimenti kummerċjali tal-għalf għandhom ikunu rreġistrati mal-awtorità kompetenti, jew approvati minnha. Barra minn hekk, l-operaturi tan-negozji tal-għalf li jinsabu aktar 'l isfel fil-katina tal-għalf għandhom l-obbligu li jixtru l-għalf biss mingħand stabbilimenti li huma rreġistrati jew approvati.

(2)

L-Anness II tar-Regolament (KE) Nru 183/2005 jistabbilixxi rekwiżiti għan-negozji tal-għalf għajr dawk li jinsabu fil-livell tal-produzzjoni primarja. B'mod partikolari, dan jeżiġi li r-rekwiżiti dwar l-ittestjar għad-diossini stipulati f'dak l-Anness jiġu riveduti sas-16 ta' Marzu 2014.

(3)

Id-definizzjoni ta' prodotti derivati minn żjut veġetali stabbilita fl-Anness II tar-Regolament (KE) Nru 183/2005 għandha tiġi emendata sabiex jiġi ċċarat li dik id-definizzjoni ma tkoprix il-prodotti derivati minn żejt raffinat u addittivi tal-għalf awtorizzati b'konformità mar-Regolament (KE) Nru 1831/2003 tal-Parlament Ewropew u tal-Kunsill (2).

(4)

Id-definizzjoni ta' taħlit tax-xaħmijiet stipulata fl-Anness II tar-Regolament (KE) Nru 183/2005 għandha tiġi emendata wkoll sabiex tiġi ċċarata d-differenza bejn it-taħlit tax-xaħmijiet, u l-proċess ta' ħażna ta' lottijiet konsekuttivi ta' xaħmijiet u żjut mingħajr ma dawn jiġu mħallta. Barra minn hekk, għandu jiġi ċċarat meta x-xaħmijiet imħallta jkunu qed jitqiesu bħala għalf kompost u meta dawn ikunu materjali tal-għalf.

(5)

Jixraq li jinstabu l-prodotti li jkunu jidhru b'mod ċar li huma kkontaminati bid-diossini malli jidħlu fil-katina tal-għalf, u għalhekk għandu jiġi ċċarat li r-rekwiżiti dwar il-monitoraġġ tad-diossini stipulati fl-Anness II tar-Regolament (KE) Nru 183/2005 japplikaw għall-operaturi kollha tan-negozji tal-għalf li jqiegħdu l-għalf fis-suq, inklużi l-importaturi.

(6)

Sabiex jiġi żgurat li jkun hemm traċċabbiltà u informazzjoni xierqa dwar l-għalf, għandha tiġi enfasizzata l-konformità mar-rekwiżiti dwar it-tikkettar stabbiliti fir-Regolament (KE) Nru 767/2009 tal-Parlament Ewropew u tal-Kunsill (3) u b'mod partikolari l-konformità mad-denominazzjonijiet, l-ispeċifikazzjonijiet u n-numri fir-Regolament tal-Kummissjoni (UE) Nru 68/2013 (4).

(7)

Jeħtieġ li r-rekwiżit ta' analiżi rappreżentattiva għal kull kwantità kbira jitwettaq fuq il-bażi ta' kampjun rappreżentattiv. Għalhekk huwa xieraq li f'intervalli regolari jittieħdu kampjuni inkrimentali li jiffurmaw il-kampjun aggregat, eż. mill-inqas kampjun wieħed inkrementali għal kull 50 tunnellata, b'konformità mad-dispożizzjonijiet dwar it-teħid tal-kampjuni kif stipulat mir-Regolament tal-Kummissjoni (KE) Nru 152/2009 (5).

(8)

Ir-riżultati tal-ittestjar għad-diossini stabbilit fir-Regolament (KE) Nru 183/2005, ir-rapporti (6) tal-verifiki tal-Uffiċċju Alimentari u Veterinarju tal-Kummissjoni u l-fatt li ma ġew notifikati l-ebda kampjuni mhux konformi ta' prodotti derivati minn żjut veġetali lis-Sistema ta' Twissija Rapida għall-Ikel u l-Għalf (7), ħlief għal distillati tal-aċidi grassi minn raffinar fiżiku u deodistillati, juri li dawk il-prodotti ma għandhomx riskju għoli ta' kontaminazzjoni mid-diossini. Għaldaqstant, għal dawn il-prodotti huwa xieraq li jitnaqqsu r-rekwiżiti stipulati fl-Anness II tar-Regolament (KE) Nru 183/2005 fir-rigward tal-ittestjar ta' 100 % għad-diossini.

(9)

Sabiex tiġi ċċarata r-responsabbiltà għall-ittestjar ta' prodotti importati għad-diossini, fl-Anness II tar-Regolament (KE) Nru 183/2005 għandha tiġi stabbilita dispożizzjoni speċifika. Din għandha tiżgura wkoll li l-prodotti importati jkollhom livell ta' sikurezza li jkun simili ta' dak tal-prodotti magħmula fl-Unjoni.

(10)

Is-sistema stabbilita bl-Anness II tar-Regolament (KE) Nru 183/2005 bl-għan li jkun hemm evidenza, permezz ta' ċertifikat li juri li tkun saret l-analiżi obbligatorja fuq lott speċifiku, għandha tiġi emendata b'diversi speċifikazzjonijiet dwar il-kompiti tal-operaturi differenti tan-negozji tal-għalf sabiex jiġu ċċarati r-responsabbiltajiet tad-diversi atturi fil-katina tal-għalf.

(11)

Il-miżuri stipulati f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

L-Anness II tar-Regolament (KE) Nru 183/2005 huwa emendat skont l-Anness ta' dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Il-punt 2(h) tal-paragrafu (3)(b) tal-Anness ta' dan ir-Regolament għandu japplika mit-23 ta' April 2016.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-22 ta' Ottubru 2015.

Għall-Kummissjoni

Il-President

Jean-Claude JUNCKER

(1)  ĠU L 35, 8.2.2005, p. 1

(2)  Ir-Regolament (KE) Nru 1831/2003 tal-Parlament Ewropew u tal-Kunsill tat-22 ta' Settembru 2003 fuq l-additivi għall-użu fl-għalf tal-annimali (ĠU L 268, 18.10.2003, p. 29)

(3)  Ir-Regolament (KE) Nru 767/2009 tal-Parlament Ewropew u tal-Kunsill tat-13 ta' Lulju 2009 dwar it-tqegħid fis-suq u l-użu ta' għalf (ĠU L 229, 1.9.2009, p. 1)

(4)  Ir-Regolament tal-Kummissjoni (UE) Nru 68/2013 tas-16 ta' Jannar 2013 dwar il-Katalgu tal-materjali tal-għalf (ĠU L 29, 30.1.2013, p. 1)

(5)  Ir-Regolament tal-Kummissjoni (KE) Nru 152/2009 tas-27 ta' Jannar 2009 li jistabbilixxi l-metodi ta' teħid ta' kampjuni u analiżi għall-kontroll uffiċjali tal-għalf (ĠU L 54, 26.2.2009, p. 1)

(6)  http://ec.europa.eu/food/fvo/audit_reports/index.cfm: In-numri tal-verifiki 2013-6748, 2013-6749, 2013-6750, 2013-6751, 2013-6752, 2013-6753, 2014-7036, 2014-7037 u 2014-7038

(7)  http://ec.europa.eu/food/safety/rasff/portal/index_en.htm

ANNESS

L-Anness II tar-Regolament (KE) Nru 183/2005 huwa emendat kif ġej:

(1)

Fit-Taqsima bit-titolu “DEFINIZZJONIJIET”, il-punti (b) u (c) jinbidlu bil-punti (b) u (c) li ġejjin, filwaqt li jiżdied il-punt (d) li ġej:

“(b)

‘prodotti li ġejjin minn żjut u xaħmijiet’ tfisser kull prodott li ġej b'mod dirett jew indirett minn żjut jew xaħmijiet mhux raffinati jew li jkun ġie rkuprat permezz tal-ipproċessar jew id-distillazzjoni oleokimika jew tal-bijodiżil, jew l-irfinar kimiku jew fiżiku, minbarra

—

iż-żejt raffinat,

—

prodotti li ġejjin minn żejt raffinat u

—

addittivi tal-għalf;

(c)

‘taħlit tax-xaħmijiet’ tfisser il-manifattura ta' għalf kompost jew, fil-każ tal-komponenti kollha li huma parti mill-istess entrata fil-PARTI C tal-Anness tar-Regolament tal-Kummissjoni (UE) Nru 68/2013 (*) li huma derivati mill-istess speċijiet ta' pjanti jew annimali, il-manifattura ta' materjali tal-għalf permezz tat-taħlit ta' żjut mhux raffinati, żjut raffinati, xaħmijiet tal-annimali, żjut irkuprati minn operaturi tan-negozji tal-ikel li jaqgħu fi ħdan l-ambitu tar-Regolament (KE) Nru 852/2004 jew prodotti li ġejjin minnhom biex jiġi prodott żejt jew xaħam imħallat, bl-eċċezzjoni

—

tal-proċess ta' ħażna biss ta' lottijiet konsekuttivi u

—

t-taħlit, b'mod esklussiv, ta' żjut raffinati;

(d)

‘żejt jew xaħam raffinat’ tfisser żejt jew xaħam li jkun għadda minn proċess ta' raffinar kif imsemmi fin-Nru 53 tal-glossarju tal-proċessi elenkati fil-Parti B tal-Anness tar-Regolament (UE) Nru 68/2013.

(*)  Ir-Regolament tal-Kummissjoni (UE) Nru 68/2013 tas-16 ta' Jannar 2013 dwar il-Katalgu tal-materjali tal-għalf (ĠU L 29, 30.1.2013, p. 1).”"

(2)

Fit-Taqsima bit-titolu “PRODUZZJONI”, il-punt 8 jinbidel b'dan li ġej, u jiżdied il-punt 9 li ġej:

“8.

It-tikkettar tal-prodotti għandu jindika b'mod ċar jekk dawn humiex maħsub għall-użu fl-għalf jew għal skopijiet oħra. Jekk lott partikolari ta' prodott jiġi ddikjarat li mhuwiex maħsub għall-użu fl-għalf, dik id-dikjarazzjoni ma tkunx tista' tinbidel wara minn operatur fi stadju aktar tard tal-katina.

9.

Fit-tikkettar tal-materjali tal-għalf skont l-Artikolu 16 tar-Regolament (KE) Nru 767/2009 tal-Parlament Ewropew u tal-Kunsill (**) għandhom jintużaw, fejn disponibbli, id-denominazzjonijiet stabbiliti fir-Regolament (UE) Nru 68/2013.

(**)  Ir-Regolament (KE) Nru 767/2009 tal-Parlament Ewropew u tal-Kunsill tat-13 ta' Lulju 2009 dwar it-tqegħid fis-suq u l-użu ta' għalf (ĠU L 229, 1.9.2009, p. 1).”"

(3)

It-Taqsima bit-titolu “MONITORAĠĠ TAD-DIOSSINI” hija emendata kif ġej:

(a)

L-intestatura ta' dik it-Taqsima tinbidel b'din li ġejja:

“MONITORAĠĠ TAD-DIOSSINI GĦAŻ-ŻJUT, IX-XAĦMIJIET U L-PRODOTTI DERIVATI”

(b)

Il-punt 2 jinbidel b'dan li ġej:

“2.

Biex jissupplimentaw is-sistema ta' HACCP tal-operaturi tan-negozji tal-għalf, l-analiżijiet imsemmija fil-punt 1 għandhom jitwettqu minn tal-inqas bil-frekwenzi li ġejjin (jekk mhux speċifikat b'mod aktar preċiż, lott ta' prodotti għall-analiżi m'għandux ikun akbar minn 1 000 tunnellata):

(a)

L-operaturi tan-negozji tal-għalf li jipproċessaw xaħmijiet u żjut veġetali mhux raffinati:

(i)

100 % tal-lottijiet tal-prodotti derivati minn żjut u xaħmijiet ta' oriġini veġetali, ħlief għal dawn li ġejjin:

—

gliċerina,

—

leċitina,

—

gomom,

—

il-prodotti li ssir referenza għalihom f'(ii);

(ii)

żjut aċidużi minn raffinar kimiku, materja prima xaħmija għall-produzzjoni tas-sapun, għajnuniet tal-filtrazzjoni użati, trab tal-ibbliċjar użat u lottijiet li deħlin ta' żejt tal-ġewż tal-indi mhux raffinati għandhom jiġu analizzati u dokumentati bħala parti mis-sistema tal-HACCP.

(b)

L-operaturi ta' negozji tal-għalf li jipproduċu xaħam tal-annimali, inklużi proċessuri tax-xaħam tal-annimali:

(i)

analiżi rappreżentattiva waħda għal kull 5 000 tunnellata b'minimu ta' analiżi rappreżentattiva waħda kull sena ta' xaħam tal-annimali u prodotti li ġejjin minnu li jagħmlu parti minn materjal tal-kategorija 3, kif imsemmi fl-Artikolu 10 tar-Regolament (KE) Nru 1069/2009 tal-Parlament Ewropew u tal-Kunsill (***) jew minn stabbiliment approvat b'konformità mal-Artikolu 4 tar-Regolament (KE) Nru 853/2004 tal-Parlament Ewropew u tal-Kunsill (****).

(c)

L-operaturi ta' negozji tal-għalf li jipproduċu żejt tal-ħut:

(i)

100 % tal-lottijiet taż-żejt tal-ħut jekk dan ikun prodott minn:

—

prodotti li ġejjin minn żejt tal-ħut minbarra żejt tal-ħut raffinat;

—

setturi tas-sajd bl-ebda storja ta' monitoraġġ, ta' oriġini mhux speċifikata jew mill-Baħar Baltiku;

—

prodotti li ġejjin mill-ħut u magħmula minn stabbilimenti li jimmanifatturaw il-ħut għall-konsum mill-bniedem, liema stabbilimenti mhumiex approvati mill-UE;

—

stokkafixx jew menhaden;

(ii)

100 % tal-lottijiet ta' prodotti li jkunu ħerġin u li ġejjin minn żejt tal-ħut minbarra żejt tal-ħut raffinat;

(iii)

analiżi rappreżentattiva għal kull 2 000 tunnellata, fir-rigward taż-żejt tal-ħut mhux imsemmi fil-punt (i);

(iv)

żejt tal-ħut dekontaminat permezz ta' trattament approvat b'mod uffiċjali skont kif imsemmi fl-Anness VIII tar-Regolament (KE) Nru 767/2009 u fir-Regolament tal-Kummissjoni (UE) 2015/786 (*****) għandu jiġi analizzat u dokumentat bħala parti mis-sistema tal-HACCP.

(d)

Tqegħid fis-suq ta' għalf mill-industrija oleokimika:

(i)

100 % tal-lottijiet li deħlin ta' xaħmijiet tal-annimali li mhumiex koperti mill-punt (b) jew (h), ta' żejt tal-ħut mhux kopert mill-punt (c) jew (h), ta' żjut u xaħmijiet irkuprati minn operaturi ta' negozji tal-ikel li jaqgħu fil-kamp ta' applikazzjoni tar-Regolament (KE) Nru 852/2004 u ta' xaħmijiet u żjut imħallta;

(ii)

100 % tal-lottijiet tal-prodotti derivati minn żjut u xaħmijiet imqiegħda fis-suq bħala għalf, ħlief għal dawn li ġejjin:

—

gliċerina,

—

aċidi grassi puri distillati minn proċessi ta' qsim,

—

il-prodotti li ssir referenza għalihom f'(iii);

(iii)

aċidi grassi mhux raffinati minn proċessi ta' qsim, aċidi grassi esterifikati bil-gliċerol, monogliċeridi u digliċeridi ta' aċidi grassi, imluħa ta' aċidi grassi u lottijiet li deħlin ta' żejt tal-ġewż tal-indi mhux raffinati għandhom jiġu analizzati u dokumentati bħala parti mis-sistema tal-HACCP.

(e)

Tqegħid fis-suq ta' għalf mill-industrija tal-bijodiżil:

(i)

100 % tal-lottijiet li deħlin ta' xaħmijiet tal-annimali li mhumiex koperti mill-punt (b) jew (h), ta' żejt tal-ħut mhux kopert mill-punt (c) jew (h), ta' żjut u xaħmijiet irkuprati minn operaturi ta' negozji tal-ikel li jaqgħu fil-kamp ta' applikazzjoni tar-Regolament (KE) Nru 852/2004 u ta' xaħmijiet u żjut imħallta;

(ii)

100 % tal-lottijiet tal-prodotti derivati minn żjut u xaħmijiet imqiegħda fis-suq bħala għalf, ħlief għal dawn li ġejjin:

—

gliċerina,

—

leċitina,

—

gomom,

—

il-prodotti li ssir referenza għalihom f'(iii);

(iii)

żjut aċidużi minn raffinar kimiku, materja prima xaħmija għall-produzzjoni tas-sapun u żejt tal-ġewż tal-indi mhux raffinati għandhom jiġu analizzati u dokumentati bħala parti mis-sistema tal-HACCP.

(f)

Stabbilimenti li jħalltu x-xaħam:

(i)

100 % tal-lottijiet li deħlin ta' żejt tal-ġewż tal-indi mhux ipproċessat, ta' xaħmijiet tal-annimali li mhumiex koperti mill-punt (b) jew (h), ta' żejt tal-ħut mhux kopert mill-punt (c) jew (h), ta' żjut u xaħmijiet irkuprati minn operaturi ta' negozji tal-ikel li jaqgħu fil-kamp ta' applikazzjoni tar-Regolament (KE) Nru 852/2004, ta' xaħmijiet u żjut imħallta u prodotti derivati minn żjut u xaħmijiet, għajr dawn li ġejjin:

—

gliċerina,

—

leċitina,

—

gomom,

—

il-prodotti li ssir referenza għalihom f'(ii);

(ii)

żjut aċidużi minn raffinar kimiku, aċidi grassi mhux raffinati minn proċessi ta' qsim, aċidi grassi puri distillati minn proċessi ta' qsim u materja prima xaħmija għall-produzzjoni tas-sapun għandhom jiġu analizzati u dokumentati bħala parti mis-sistema tal-HACCP

jew

(iii)

100 % tal-lottijiet ta' xaħmijiet u żjut imħallta maħsuba biex jintużaw bħala għalf.

L-operatur tan-negozju tal-għalf għandu jiddikjara lill-awtorità kompetenti liema alternattiva biħsiebu jagħżel.

(g)

Il-produtturi tal-għalf kompost għall-annimali li jipproduċu l-ikel, għajr dawk imsemmija fil-punt (f):

(i)

100 % tal-lottijiet li deħlin ta' żejt tal-ġewż tal-indi mhux ipproċessat, ta' xaħmijiet tal-annimali li mhumiex koperti mill-punt (b) jew (h), ta' żejt tal-ħut mhux kopert mill-punt (c) jew (h), ta' żjut u xaħmijiet irkuprati minn operaturi ta' negozji tal-ikel li jaqgħu fil-kamp ta' applikazzjoni tar-Regolament (KE) Nru 852/2004, ta' xaħmijiet u żjut imħallta u prodotti derivati minn żjut u xaħmijiet, għajr dawn li ġejjin:

—

gliċerina,

—

leċitina,

—

gomom,

—

il-prodotti li ssir referenza għalihom f'(ii);

(ii)

żjut aċidużi minn raffinar kimiku, aċidi grassi mhux raffinati minn proċessi ta' qsim, aċidi grassi puri distillati minn proċessi ta' qsim; għajnuniet tal-filtrazzjoni, trab tal-ibbliċjar u materja prima xaħmija għall-produzzjoni tas-sapun għandhom jiġu analizzati u dokumentati bħala parti mis-sistema tal-HACCP;

(iii)

1 % tal-lottijiet fir-rigward tal-għalf kompost immanifatturat li fih il-prodotti msemmija f'(i) u (ii).

(h)

Importaturi li jqiegħdu fis-suq l-għalf li ġej:

(i)

100 % tal-lottijiet importati ta' żejt tal-ġewż tal-indi, xaħmijiet tal-annimali, żjut tal-ħut, żjut u xaħmijiet irkuprati minn operaturi tan-negozju tal-ikel, xaħmijiet u żjut imħallta, tokoferols estratti minn żejt veġetali u aċetat tat-tokoferol magħmul minnhom, kif ukoll prodotti li ġejjin minn żjut u xaħmijiet, ħlief għal dawn li ġejjin:

—

gliċerina,

—

leċitina,

—

gomom,

—

il-prodotti li ssir referenza għalihom f'(ii);

(ii)

żjut aċidużi minn raffinar kimiku, aċidi grassi mhux raffinati minn proċessi ta' qsim, aċidi grassi puri distillati minn proċessi ta' qsim u materja prima xaħmija għall-produzzjoni tas-sapun għandhom jiġu analizzati u dokumentati bħala parti mis-sistema tal-HACCP.

(***)  Ir-Regolament (KE) Nru 1069/2009 tal-Parlament Ewropew u tal-Kunsill tal-21 ta' Ottubru 2009 li jistabbilixxi regoli tas-saħħa li jirrigwardaw prodotti sekondarji tal-annimali jew derivati minnhom mhux maħsuba għall-konsum mill-bniedem u li jħassar ir-Regolament (KE) Nru 1774/2002 (Regolament dwar prodotti sekondarji tal-annimali) (ĠU L 300, 14.11.2009, p. 1)."

(****)  Ir-Regolament (KE) Nru 853/2004 tal-Parlament Ewropew u tal-Kunsill tad-29 ta' April 2004 li jistabbilixi ċerti regoli speċifiċi ta' iġjene għall-ikel li joriġina mill-annimali (ĠU L 139, 30.4.2004, p. 55)."

(*****)  Ir-Regolament tal-Kummissjoni (UE) 2015/786 tad-19 ta' Mejju 2015 li jiddefinixxi l-kriterji ta' aċċettabilità għall-proċessi ta' detossifikazzjoni applikati għal prodotti maħsuba għall-għalf tal-annimali stipulati fid-Direttiva 2002/32/KE tal-Parlament Ewropew u tal-Kunsill (ĠU L 125, 21.5.2015, p. 10)”"

(c)

Il-punti 4, 5 u 6 jinbidlu b'dan li ġej:

“4.

Fejn operatur ta' negozju tal-għalf ikollu prova dokumentata li lott ta' prodott, jew il-komponenti kollha ta' lott ta' prodott kif imsemmi fil-punt 2, li jkun(u) dieħel/daħlu fl-istabbiliment tiegħu ikun(u) diġà ġie/ġew analizzati fi stadju aktar bikri tal-produzzjoni, l-ipproċessar jew id-distribuzzjoni, l-operatur tan-negozju tal-għalf għandu jinħeles mill-obbligu li janalizza dak il-lott.

5.

Kull lott ta' prodotti analizzat skont il-punt 2 għandu jkun akkumpanjat minn prova dokumentata li turi li dawn il-prodotti, jew il-komponenti kostitwenti kollha tagħhom, ġew analizzati jew ġew sottomessi għal analiżi f'laboratorju akkreditat imsemmi fil-punt 1, ħlief għal-lottijiet ta' prodotti msemmija fil-punt 2 (a)(ii), (b)(i), (c)(iii), (c)(iv), (d)(iii), (e)(iii), (f)(ii), (g)(ii) u (h)(ii).

Il-prova ta' analiżi għandha toħloq, mingħajr ebda ambigwità, ħolqa bejn il-konsenja u l-lott ittestjat jew lottijiet ittestjati. Din il-ħolqa għandha tiġi deskritta fis-sistema dokumentata ta' traċċar fis-seħħ fl-istabbiliment tal-fornitur. B'mod partikolari, meta l-konsenja tinkiseb għal aktar minn lott jew komponent wieħed, il-prova dokumentata li trid tingħata għandha sservi ta' prova għal kull wieħed mill-komponenti tal-konsenja. F'każijiet fejn l-ittestjar jitwettaq fuq prodott li jkun ħiereġ, il-prova li l-prodott ikun ġie analizzat għandha tkun ir-rapport analitiku.

Kull konsenja ta' prodotti kif imsemmi fil-punt 2(b)(i) jew (c)(iii) għandha tkun akkumpanjata minn evidenza li dawn il-prodotti huma konformi mar-rekwiżiti tal-punti 2(b)(i) jew (c)(iii). Jekk ikun meħtieġ, il-prova ta' analiżi li tinkludi l-lott jew il-lottijiet ikkonsenjati għandha tingħata lid-destinatarju meta l-operatur jirċievi l-analiżi mingħand il-laboratorji awtorizzati.

6.

Jekk il-lottijiet kollha li deħlin ta' prodotti msemmija fil-punt 2(g)(i) li jaslu għal proċess ta' produzzjoni jkunu ġew analizzati skont ir-rekwiżiti ta' dan ir-Regolament, u jekk ikun jista' jiġi żgurat li l-proċess ta' produzzjoni, l-immaniġġar u l-ħażna ma jżidux il-kontaminazzjoni mid-diossini, l-operatur tan-negozju tal-għalf għandu jinħeles mill-obbligu li janalizza l-prodott li jkun ħiereġ u minflok għandu janalizzah skont is-sistema tal-HACCP.”
Top