This document is an excerpt from the EUR-Lex website
Nós imeachta AE um fhógra a thabhairt do GCUI
ACHOIMRE AR:
CAD IS AIDHM LEIS AN RIALACHÁN?
Leagtar amach go mion ann na nósanna imeachta agus na foirmeacha a chaithfidh na húdaráis náisiúnta a úsáid agus faisnéis á tarchur acu chuig a chéile ar mhodh leictreonach arna cheangal le Treoir 2009/65/CE maidir le rialacha a bhaineann le gnóthais le haghaidh comhinfheistíochta in urrúis inaistrithe (GCUIanna).
Tá na nósanna imeachta agus na foirmeacha riachtanach lena áirithiú go bhfeidhmeoidh an próiseas agus an chumarsáid go réidh nuair is mian le GCUI* a tháirgí a chur ar an margadh i dtír eile AE.
PRÍOMHPHOINTÍ
Forbraítear leis an rialachán coinníollacha aonfhoirmeacha chun an reachtaíocht bhunúsach um GCUIanna (Treoir 2009/65/CE) a chur chun feidhme. Leis an treoir seo tugtar an chumhacht don Choimisiún Eorpach chun gníomhartha cur chun feidhme a ghlacadh lena soláthraítear eolas níos mine ar ghnéithe nós imeachta an dlí bhunaidh.
Ní mór do GCUI ar mian leis feidhmiú i dtír eile AE litir chaighdeánach fógra a chur isteach chuig a údaráis náisiúnta féin ar dtús maidir lena rún. Beidh sonraí bunaidh na cuideachta bainistíochta sin san fhoirm arna hordú san iarscríbhinn a ghabhann leis an rialachán seo.
Ní mór do na húdaráis náisiúnta:
- a dhearbhú go gcomhlíonann an fhaisnéis a cuireadh isteach na coinníollacha dlíthiúla riachtanacha;
- seoladh ríomhphoist ainmnithe don chumarsáid uile a bhunú;
- na doiciméid ábhartha ar fad a aistriú chuig na húdaráis inniúla i dtír eile AE i bhformáid chaighdeánach;
- féadfaidh siad a chomhaontú go mbainfidh siad úsáid as foirm cumarsáide leictreonaí atá níos sofaisticiúla ná ríomhphost;
- a dhearbhú, laistigh de 5 lá oibre ar a dhéanaí, go bhfuair siad na doiciméid a seoladh chucu.
Leis an rialachán seo bunaítear nósanna imeachta maidir le comhar i gcás fíoruithe agus imscrúduithe a dhéantar i gcrích thír eile AE.
Ní mór do na húdaráis inniúla:
- míniúcháin shoiléire agus go leor fógra a chur ar fáil agus an ceart chun imscrúdú nó agallaimh ar an láthair a dhéanamh i dtír eile AE á iarraidh acu;
- faisnéis ar bith arna hiarraidh ag a gcontrapháirteanna i dtír eile AE a chur ar fáil;
- a chinneadh cibé an ndéanfaidh siad an t-imscrúdú iad féin nó an ligfidh siad do na húdaráis inniúla i dtír eile AE é a dhéanamh.
Leagtar amach leis an rialachán seo chomh maith na caighdeáin maidir le malartú faisnéise idir na húdaráis inniúla in AE ina gcumhdaítear na bearta tromchúiseacha ar fad a rinneadh i gcoinne GCUI lena n-áirítear athrú ar stádas GCUO, amhail aistarraingt a údaraithe.
CÉN UAIR ATÁ TOSACH FEIDHME AN RIALACHÁIN?
Tá feidhm leis ón 1 Iúil 2011.
CÚLRA
Le haghaidh tuilleadh faisnéise, féach:
- Gnóthais le haghaidh comhinfheistíochta in urrúis inaistrithe (GCUIanna) — Treoir 2009/65/CE (An Coimisiún Eorpach).
PRÍOMHTHÉARMAÍ
PRÍOMHDHOICIMÉAD
Rialachán (AE) Uimh. 584/2010 ón gCoimisiún an 1 Iúil 2010 lena gcuirtear chun feidhme Treoir 2009/65/CE ó Pharlaimint na hEorpa agus ón gComhairle maidir le foirm agus ábhar litir chaighdeánach an fhógra agus an fhianaithe GCUI, úsáid cumarsáide leictreonaí idir na húdaráis inniúla chun críche fógra, agus nósanna imeachta maidir le fíorú agus imscrúduithe ar an láthair agus malartú faisnéise idir na húdaráis inniúla (IO L 176, 10.7.2010, lgh. 16-27)
DOICIMÉID GHAOLMHARA
Treoir 2009/65/CE ó Parlaimint na hEorpa agus ón gComhairle an 13 Iúil 2009 maidir le comhordú dlíthe, rialacháin agus forálacha riaracháin a bhaineann le gnóthais le haghaidh comhinfheistíochta in urrúis inaistrithe (GCUI) (IO L 302, 17.11.2009, lgh. 32–96)
Rinneadh leasuithe comhleanúnacha ar Threoir 2009/65/CE a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.
Nuashonraithe 22.10.2018