Linji gwida ġenerali għall-politiki ekonomiċi (BEPGs)

Il-linji gwida ġenerali għall-politiki ekonomiċi (BEPGs) huma linji gwida dwar il-politiki makroekonomiċi u strutturali li għandhom l-għan li jikkoordinaw il-politiki ekonomiċi tal-pajjiżi tal-Unjoni Ewropea (UE) sabiex jintlaħqu miri komuni. Il-BEPGs jittrattaw il-politiki makroekonomiċi u strutturali kemm għall-UE b’mod ġenerali kif ukoll għall-pajjiżi individwali tal-UE. Il-linji gwida huma soġġetti għal mekkaniżmu ta’ sorveljanza multilaterali li għandu l-għan li jiżgura li l-pajjiżi tal-UE jikkonformaw magħhom.

Il-Kunsill jifformula rakkomandazzjoni mhux vinkolanti dwar linji gwida ġenerali għall-politiki ekonomiċi tal-pajjiżi tal-UE u jistgħu jagħmlu rakkomandazzjonijiet pubbliċi fejn il-politiki ekonomiċi mhumiex konsistenti mal-BEPGs.

L-Artikolu 121 tat-Trattat dwar il-Funzjonament tal-Unjoni Ewropea jeħtieġ li l-pajjiżi tal-UE jqisu l-politiki ekonomiċi tagħhom bħala kwistjoni ta’ tħassib komuni u jikkoordinawhom fil-Kunsill.

Fl-2010, il-BEPGs inġabu flimkien mal-linji gwida tal-impjiegi taħt intestatura waħda tal-linji gwidi integrati (IGs), u huma l-bażi tal-istrateġija Ewropea tal-impjiegi. L-IGs huma l-strument ewlieni għall-pajjiżi tal-UE li qed jikkoordinaw l-isforzi tar-riformi fil-qasam tal-politiki soċjali u tas-suq tax-xogħol.

ARA WKOLL

• Il-Kunsill tal-Unjoni Ewropea
• Unjoni Ekonomika u Monetarja (UEM)
• Il-Bank Ċentrali Ewropew
• Strateġija Ewropea dwar l-Impjiegi
• Semestru Ewropew
• Proċedura ta’ żbilanċ eċċessiv
• Il-Patt ta’ Stabbiltà u Tkabbir