Tagħlim tul il-ħajja – Kwalifiki Ewropej

SOMMARJU TA’:

Rakkomandazzjoni – Qafas Ewropew tal-Kwalifiki għat-tagħlim tul il-ħajja

X’INHU L-GĦAN TAR-RAKKOMANDAZZJONI?

Fir-reviżjoni tal-qafas ta’ referenza komuni għas-sistemi nazzjonali ta’ kwalifiki – il-Qafas Ewropew tal-Kwalifiki (QEK) għat-tagħlim tul il-ħajja* – ir-rakkomandazzjoni għandha l-għan li ttejjeb it-trasparenza, il-komparabilità u l-portabilità tal-kwalifiki tal-persuni fl-Ewropa.
L-għan usa’ huwa li tikkontribwixxi għall-immodernizzar tas-sistemi ta’ edukazzjoni u taħriġ u li żżid l-impjegabilità, il-mobbiltà u l-integrazzjoni soċjali tal-ħaddiema u l-istudenti.

PUNTI EWLENIN

Ir-reviżjoni tal-QEK tiżgura li t-tipi u l-livelli kollha tal-kwalifiki huma koperti, inklużi l-kwalifiki minn edukazzjoni ogħla, taħriġ vokazzjonali* u taħriġ u edukazzjoni ġenerali, kif ukoll kwalifiki mogħtija mis-settur privat u organizzazzjonijiet internazzjonali ta’ settur.

Rakkomandazzjonijiet lill-pajjiżi tal-UE

biex jużaw il-QEK bħala referenza għall-kwalifiki nazzjonali tagħhom – jiġifieri billi jirreferu għal-livelli tal-QEK kif stabbiliti fl-Anness II, il-kriterji stabbiliti fl-Anness III u l-prinċipji komuni għall-assigurazzjoni tal-kwalità stabbiliti fl-Anness IV – u biex isir paragun ma’ kwalifiki nazzjonali ta’ pajjiżi oħra tal-UE;
fejn xieraq, biex jippromwovu rabtiet bejn sistemi tal-krediti* u oqfsa jew sistemi ta’ kwalifiki nazzjonali filwaqt li jitqiesu l-prinċipji komuni dwar is-sistemi tal-krediti stabbiliti fl-Anness V;
biex jirrevedu u jaġġornaw, meta jkun rilevanti, ir-referenzar tal-kwalifiki nazzjonali tagħhom skont il-QEK rivedut;
biex jassiguraw trasparenza tal-proċess ta’ referenzar u informazzjoni lill-pubbliku adegwata dwaru, bl-użu tal-oqsma tad-data skont l-Anness VI;
biex iħeġġu l-użu tal-QEK mill-partijiet kollha interessati (imsieħba soċjali, servizzi pubbliċi tal-impjiegi, fornituri tal-edukazzjoni, korpi tal-assigurazzjoni tal-kwalità, awtoritajiet pubbliċi);
biex jassiguraw il-kontinwazzjoni u l-koordinazzjoni tal-kompiti implimentati mill-Punti ta’ Koordinazzjoni Nazzjonali tal-QEK* (QEK-PKN).

Rakkomandazzjonijiet lill-Kummissjoni Ewropea:

biex tikkoordina mal-pajjiżi tal-UE u organizzazzjonijiet oħrajn involuti fil-Grupp Konsultattiv tal-QEK* sabiex:
- tappoġġja l-implimentazzjoni konsistenti tal-QEK madwar l-UE jiġifieri permezz tal-iżvilupp ta’ metodoloġiji komuni għal-livellar tal-kwalifiki u permezz tal-iskambju ta’ informazzjoni u l-aqwa prattika bejn il-pajjiżi tal-UE;
- tiżviluppa gwida biex tikkomunika l-QEK; u
- tesplora l-kriterji u l-proċeduri possibbli għall-paragun ta’ sistemi ta’ kwalifiki nazzjonali u reġjonali tal-pajjiżi mhux imsieħba fl-UE mal-EQF;
biex tiżgura finanzjament xieraq tal-UE għall-implimentazzjoni tar-rakkomandazzjoni u l-governanza effettiva tal-QEK mal-Grupp Konsultattiv dwar l-QEK;
f’kooperazzjoni mal-pajjiżi tal-UE u l-partijiet interessati, tivvaluta u tevalwa l-azzjoni meħuda bi tweġiba għal din ir-rakkomandazzjoni u tirrapporta lill-Kunsill sal-2022. Ikun preferibbli wkoll li jiġu inklużi — fejn meħtieġ — analiżi u reviżjoni ta’ din ir-rakkomandazzjoni.

SFOND

Il-QEK inħoloq oriġinarjament mir-Rakkomandazzjoni tal-Parlament Ewropew u tal-Kunsill tal-2008, bħala qafas ta’ referenza komuni ta’ tmien (8) livelli ġeneriċi Ewropej ta’ tagħlim li jservi bħala “grilja tat-traduzzjoni” bejn sistemi nazzjonali ta’ kwalifiki.
Għal aktar informazzjoni, ara:
- Opportunitajiet ta’ tagħlim u kwalifiki fl-Ewropa (Kummissjoni Ewropea).

TERMINI EWLENIN

Tagħlim tul il-ħajja: kull forma ta’ tagħlim utli, li jista’ jkun imwettaq fi kwalunkwe stadju tal-ħajja ta’ persuna, bil-għan li jitjiebu l-għarfien, il-ħiliet u l-kompetenzi.

Taħriġ vokazzjonali: edukazzjoni li tħejji lil-persuni biex jaħdmu f’ċerti professjonijiet jew setturi. Jista’ jsir f’livelli differenti, minn livell ta’ edukazzjoni sekondarja sa livell ta’ edukazzjoni ogħla.

Sistemi tal-krediti: għodda li turi b’mod trasperenti u li tiffaċilita r-rikonoxximent tal-kreditu(i) jiġifieri li parti minn kwalifika li tikkonsisti minn sett koerenti ta’ eżiti ta’ tagħlim ġiet ivvalutata u vvalidata minn awtorità kompetenti, skont standard miftiehem.

Punti ta’ Koordinazzjoni Nazzjonali tal-QEK: il-kompiti ewlenin tagħhom huma li jappoġġaw lill-awtoritajiet nazzjonali fir-refenzar tal-oqfsa jew sistemi nazzjonali tal-kwalifiki għall-QEK u jressqu l-QEK eqreb lejn individwi u organizzazzjonijiet.

Grupp konsultattiv dwar il-QEK: magħmul minn rappreżentanti tal-pajjiżi tal-UE u pajjiżi parteċipanti oħra, trade unions, gruppi ta’ impjegaturi u partijiet oħra, kif xieraq; ir-rwol tiegħu huwa li jiżgura koerenza ġenerali u jippromwovi trasparenza u fiduċja fil-proċess ta’ referenzar ta’ oqfsa jew sistemi ta’ kwalifiki nazzjonali għall-QEK.

DOKUMENT EWLIENI

Rakkomandazzjoni tal Kunsill tat-22 ta’ Mejju 2017 dwar il-Qafas Ewropew tal-Kwalifiki għat-tagħlim tul il-ħajja u li tħassar ir-Rakkomandazzjoni tal-Parlament Ewropew u tal-Kunsill tat-23 ta’ April 2008 dwar l-istabbiliment ta’ Qafas Ewropew tal-Kwalifiki għat-tagħlim tul il-ħajja (ĠU C 189, 15.6.2017, pp. 15-28)

DOKUMENTI RELATATI

Rakkomandazzjoni tal Parlament Ewropew u tal-Kunsill tat-23 ta’ April 2008 dwar l-istabbiliment ta’ Qafas Ewropew tal-Kwalifiki għat-tagħlim tul il-ħajja (ĠU C 111, 6.5.2008, pp. 1-7)

l-aħħar aġġornament 28.11.2017