L-istrateġija tal-Kummissjoni Ewropea kontra l-frodi

PUNTI EWLENIN

• L-istrateġija għandha l-għan li ssaħħaħ il-protezzjoni tal-interessi finanzjarji tal-UE billi ttejjeb iċ-ċiklu sħiħ ta’ kontra l-frodi. Hija għalhekk tkopri l-prevenzjoni u s-sejba, kif ukoll investigazzjonijiet, sanzjonijiet u l-irkupru ta’ fondi miżapproprjati.
• Il-pajjiżi tal-UE jamministraw kważi d-dħul kollu mill-baġit tal-UE. Huma jaqsmu l-ġestjoni ta’ 80 % tan-nefqa mal-Kummissjoni, filwaqt li l-20% li jifdal huma ġestiti direttament mid-dipartimenti tal-Kummissjoni nnfisha jew ma’ msieħba oħra.

Il-prevenzjoni u s-sejbien

• L-entitajiet kollha li jimmaniġġaw il-fondi tal-UE għandhom jipprevjenu l-irregolaritajiet u l-frodi li jaffettwaw il-baġit tal-UE. Il-Kummissjoni, il-pajjiżi tal-UE u msieħba oħra (eż. awtoritajiet reġjonali jew aġenziji ta’ żvilupp) għandhom idaħħlu fis-seħħ proċeduri ta’ ġestjoni u kontroll intern biex jipprevjenu u jsibu l-irregolaritajiet, l-iżbalji u l-frodi.
• Billi r-responsabbiltà tal-atturi tvarja skont il-mod ta’ ġestjoni u l-qasam ta’ politika, għandhom jiġu adottati strateġiji settorjali kontra l-frodi mid-dipartimenti kollha tal-Kummissjoni. Dawn l-istrateġiji jeħtieġ li jadattaw il-prevenzjoni, l-investigazzjoni, l-irkupru u s-sanzjonijiet skont il-kuntest speċifiku ta’ kull settur.
• L-Uffiċċju Ewropew Kontra l-Frodi (OLAF) għandu jkun proattiv u jgħin lill-Kummissjoni timplimenta dawn l-istrateġiji settorjali kontra l-frodi kif ukoll ittejjeb il-valutazzjoni tar-riskju tal-frodi.
• Il-komunikazzjoni bejn id-dipartimenti għandha tissaħħaħ permezz ta’ sistemi ta’ skambju ta’ informazzjoni estiżi u sistema ta’ sejbien u esklużjoni bikrija, li ħadet post is-sistema ta’ twissija bikrija oriġinali.
• Il-persunal tal-Kummissjoni, kemm jekk il-maniġers tal-proġetti, il-persunal finanzjarju jew l-awdituri, għandhom isiru konxji tar-riskji tal-frodi u jkunu mħarrġa jiġġielduha.

Investigazzjonijiet

• L-OLAF għandu jinvestiga kull attività illegali li taffettwa l-interessi finazjarji tal-UE. Il-Kummissjoni ppreżentat proposta biex tirriforma lill-OLAF, imfassla biex tagħmel dawn l-investigazzjonijiet aktar effettivi. Dan irriżulta fir-Regolament (UE, Euratom) Nru 883/2013.
• Il-kooperazzjoni bejn l-OLAF u dipartimenti oħra tal-Kummissjoni, b’mod partikolari l-awdituri esterni, trid tissaħħaħ, l-istess bħall-kooperazzjoni bejn l-OLAF u istituzzjonijiet oħra li qed jinvestigaw is-servizzi fil-każ ta’ investigazzjoni interna. Il-pajjiżi tal-UE għandhom jinnominaw punti ta’ kuntatt biex iservu bħala konnessjoni diretta mal-OLAF f’investigazzjonijiet, u jinformaw lill-uffiċċju malli jiskopru frodi. Il-kuntratturi u l-benefiċjarji ta’ fondi tal-UE għandhom jipprovdu lill-OLAF aċċess għall-informazzjoni kollha fuq l-implimentazzjoni ta’ programmi u proġetti.
• Il-Kummissjoni beħsiebha teżamina kif aktar nies jistgħu jkunu mħeġġa jaqsmu informazzjoni dwar irregolaritajiet u frodi, u kif l-awtoritajiet ikkonċernati jistgħu jiżguraw li l-informaturi jirċievu gwida u protezzjoni aħjar.

Sanzjonijiet

• Il-Kummissjoni għandha tirranġa u tirrinforza l-użu tas-sanzjonijiet finanzjarji u/jew amministrattivi, inkluż l-esklużjoni mill-finanzjament tal-UE fil-każ ta’ irregolaritajiet, frodi u korruzzjoni serji.
• Hija se tivverifika wkoll li s-sanzjonijiet applikati mill-pajjiżi tal-UE huma effettivi, proporzjonati u dissważivi. Hija tikkunsidra li s-sanzjonijiet dixxiplinari għandhom jiġu kondiviżi ma’ istituzzjonijiet Ewropej, awtoritajiet nazzjonali u organizzazzjonijiet internazzjonali oħra. Hija tinkoraġġixxi wkoll lill-pajjiżi tal-UE biex jikkomunikaw lill-bażi tad-dejta ċentrali tal-Kummissjoni każijiet ta’ frodi li jistgħu jwasslu għall-esklużjoni ta’ finanzjament tal-UE.

Irkupru

• Fil-każ ta’ ġestjoni kondiviża, il-pajjiżi tal-UE għandhom jirkupraw il-fondi li ma kellhomx jitħallsu. Taħt ġestjoni diretta, is-servizzi tal-Kummissjoni huma responsabbli u għandhom joħorġu ordnijiet ta’ rkupru malajr kemm jista’ jkun.