Emittenti ta’ titoli — informazzjoni aktar trasparenti

PUNTI EWLENIN

Informazzjoni perjodika relatata ma’

• L-informazzjoni perjodika tirrelata mas-sitwazzjoni finanzjarja tal-emittent tat-titoli u dik tal-impriżi li tikkontrolla, flimkien mal-impatt tal-kumpanija fuq materji ta’ sostenibbiltà u l-informazzjoni li hemm bżonn biex tifhem kif aspetti ta’ sostenibbiltà jaffettwaw l-iżvilupp, il-prestazzjoni u l-pożizzjoni tal-kumpanija.
• Emittenti ta’ titoli jridu jikxfu rapporti finanzjarji ta’ kull sena (magħmula mid-dikjarazzjonijiet finanzjarji, rapport tal-management u dikjarazzjonijiet ta’ responsabbiltà) u rapporti finanzjarji interim (dikjarazzjonijiet interim tal-management). Waqt li d-direttiva ma tappoġġjax rapportar perjodiku aktar frekwenti (pereżempju rapporti finanzjarji trimestrali), dawn huma xorta permessi jekk ir-rapportar addizzjonali jkun proporzjonat.
• Ir-rapport finanzjarju jrid jibqa’ disponibbli għall-pubbliku għal tal-inqas 10 snin.
• Għas-snin finanzjarji li jibdew nhar jew wara l-1 ta’ Jannar 2020, ir-rapporti finanzjarji annwali kollha jridu jkunu ppreparati f’format ta’ rapportar uniku elettroniku ibbażat fuq speċifikazzjonijiet tekniċi maħruġa mill-Awtorità Ewropea tat-Titoli u Swieq (ESMA) u adottata minn Regolament Delegat (UE) 2019/815.
• Regoli li daħlu b’Direttiva emendatorja (UE) 2022/2464 dwar rapportar korporattiv dwar is-sostenibbilità tirrikjedi li l-kumpaniji kollha elenkati fis-swieq regolati tal-UE jinkludu fir-rapport tal-management tagħhom informazzjoni relatata mal-impatt tal-kumpanija fuq materji ta’ sostenibbilità (bħal drittijiet ambjentali, drittijiet soċjali, drittijiet tal-bniedem u fattturi ta’ governanza) u informazzjoni bżonnjuża biex tifhem kif aspetti ta’ sostenibbilità jaffettwaw l-iżvilupp, il-prestazzjoni u l-pożizzjoni tiegħu. L-applikazzjoni ta’ dawn ir-regoli ser jidħlu gradwalment (ara hawn taħt).

Notifika ta’ sjieda ta’ drittijiet sinifikanti ta’ vot

• Fejn azzjonisti jakkwistaw jew jbigħu l-isħma ta’ emittent li l-isħma tagħhom huma ammessi għall-kummerċ f’suq regolat u li jkollhom drittijiet għal vot, dawn iridu jgħarrfu lill-emittent dwar il-persentaġġ ta’ drittijiet ta’ vot li għandhom bħala riżultat tal-operazzjoni. Din ir-regola tapplika jekk il-persentaġġ li għandu jilħaq ċerti livelli limiti (5 %, 10 %, 15 %, 20 %, 25 %, 30 %, 50 % u 75 %) jew ikun ogħla jew taħt dawk il-livelli limiti. Dan huwa minnu wkoll f’każijiet oħrajn fejn persuna fiżika jew ġuridika jkollha d-dritt li takkwista, iċċedi jew teżerċita drittijiet tal-vot.
• Notifika għall-emittent, li trid tingħata mill-azzjonist fi żmien 4 ijiem ta’ negozjar trid tipprovdi informazzjoni dwar id-distribuzzjoni l-ġdida ta’ drittijiet ta’ vot, l-identità tal-azzjonist, id-data tal-bidla u l-livell limitu ta’ voti li ntlaħaq.
• L-emittenti jridu jagħmlu l-informazzjoni li jkun hemm fin-notifika ta’ parteċipazzjonijiet prinċipali li jirċievu pubblika mhux aktar tard minn 3 ijiem ta’ negozjar wara dan.
• Il-Gwida prattika — Regoli nazzjonali dwar notiki ta’ parteċipazzjonijiet maġġuri taħt id-direttiva dwar trasparenza inħarġet minn ESMA.

Rapport dwar pagamenti lil gvernijiet

Id-direttiva tirrikjedi li kumpaniji elenkati li huma attivi fl-estrattiva (żejt, gass u minerali) u industriji primarji tal-foresti jiddikjaraw pagamenti magħmula lil gvernijiet fl-Istati Membri fejn iwettqu l-attivitajiet tagħhom, f’rapport separat magħmul kull sena.

Żvelar ta’ informazzjoni addizzjonali

• Kemm jista jkun possibbli, u mhux aktar tard minn 4 ijiem ta’ negozjar wara l-akkwist jew bejgħ tal-isħma propji fejn il-proporzjon jliħaq, jeċċedi jew jaqa’ taħt il-5 %, jew 10 %, tad-drittijiet tal-vot, l-emittent irid jagħmel pubblika l-proporzjon tal-isħma tiegħu.
• Fit-tmiem ta’ kull xahar kalendarju, l-emittenti jridu jagħmlu pubbliku n-numru totali tad-drittijiet tal-vot u l-kapital.
• Mingħajr dewmien, emittent irid jagħmel pubbliku kull tibdil fid-drittijiet marbuta mal-klassijiet varji ta’ isħma.

Disseminazzjoni, ħażna u aċċess għal informazzjoni regolata

• L-Istati Membri jridu jassikuraw li l-emittent, jew il-persuna li tkun applikat biex tidħol għan-negozjar fis-suq regolat mingħajr il-kunsens tal-emittent, jikxef informazzjoni regolata b’mod li tassikura aċċess mgħaġġel għal tali informazzjoni fuq bażi nondiskriminatorja u tagħmlu disponibbli għall-mekkaniżmu maħtur uffiċjalment
• Barra minn dan, kull Stat Membru jrid jassikura li jkun hemm tal-inqas mekkaniżmu maħtur uffiċjalment biex jaħżen l-informazzjoni li tkun inkixfet minn kumpaniji u jagħmilha aċċessibbli għall-pubbliku għal 10 snin.
• ESMA ngħatat il-kompitu li tibni punt ta ’aċċess uniku Ewropew (ESAP) li ser jinkludi u jagħmel aċċessibbli l-informazzjoni t’hawn fuq sa nofs l-2027. Id-Direttiva Emendatorja (UE) 2023/2864 iddaħħal artikolu fid-Direttiva 2004/109/KE li tirrekjedi li Stati Membri, mill-10 ta’ Lulju 2026, jassikuraw li, meta jagħmlu pubblika kull informazzjoni regolata kif hemm riferut fid-direttiva dwar trasparenza, l-emittent jew il-persuna li tkun applikat biex tkun ammessa għall-kummerċ f’suq regolat mingħajr il-kunsens tal-emittent jissottometti dik l-informazzjoni fl-istess ħin lill-mekkaniżmu li jkun appuntat uffiċjalment (jiġifieri l-entità ta’ ġbir), f’format diġitali u flimkien mal-metadejta rilevanti, għall-iskop li dik l-informazzjoni ssir aċċessibbli fuq l-ESAP, stabbilita skont ir-Regolament (UE) 2023/2859.

Pajjiżi mhux tal-UE

Fejn l-uffiċċju reġistrat ta’ emittent ikun ġo pajjiż mhux tal-UE, dan jista’ jagħżel minn fost l-Istati Membri fejn it-titoli tiegħu jkunu ammessi għal negozjar f’suq regolat. L-awtorità kompetenti tal-Istat Membru li jagħżel tista’ tħalli lil dak l-emittent isegwi r-regoli nazzjonali tiegħu (bħal regoli rigward informazzjoni perjodika u informazzjoni oħra li trid tinkixef) diment li l-liġi tal-pajjiż mhux tal-UE in kwistjoni jistipula rekwiżiti simili għal dawk fl-UE. L-awtorità kompetenti mbagħad trid tinforma lil ESMA dwar kull eżenzjoni mgħotija.

Superviżjoni ta’ rapportar dwar sostenibbilità

ESMA trid toħroġ linji gwida dwar is-superviżjoni ta’ rapportar dwar sostenibbilità minn awtoritajiet nazzjonali kompetenti, wara li tkun ikkonsultat l-Aġenzija Ewropea għall-Ambjent u l-Aġenzija tal-Unjoni Ewropea għad-Drittijiet Fundamentali

Atti ta’ implimentazzjoni u delegati

Il-Kummissjoni Ewropea adottat bosta atti ta’ implimentazzjoni u atti delegati fir-rigward ta’ Direttiva 2004/109/KE.

• Direttiva 2007/14/KE u d-direttivi emendatorji tagħha stipulaw regoli dettaljati bħal:
  • arranġamenti proċedurali għall-għażla tal-Istat Membru domiċiljari.
  • kontenut minimu għal dikjarazzjonijiet finanzjarji mhux konsolidati ta’ kull sitt xhur.
  • mekkaniżmi ta’ kontroll minn awtoritajiet kompetenti fir-rigward ta’ ġeneraturi tas-suq.
• Regolament (KE) Nru. 1569/2007 u l-emendi tiegħu jistabbilixxu mekkaniżmu li jiddetermina l-ekwivalenza ta’ standards kontabilistiċi applikati minn emittenti ta’ titoli ta’ pajjiżi mhux tal-UE.
• Regolament Delegat (UE) 2015/761 jirregwarda ċerti standards tekniċi regolatorji dwar parteċipazzjonijiet maġġuri.
• Regolament Delegat (UE) 2016/1437 hu dwar standards tekniċi regolatorji dwar aċċess għal informazzjoni regolata fil-livell tal-UE.
• Regolament Delegat (UE) 2019/815 hu dwar standards tekniċi regolatorji li jispeċifikaw format ta’ rapportar elettroniku uniku, inklużi aġġornamenti jew emendi sussegwenti.