Is-sikurezza tal-makkinarju

PUNTI EWLENIN

Kamp ta’ applikazzjoni

• Id-Direttiva 2006/42/KE tkopri makkinarju, tagħmir interkambjabbli, komponenti tas-sikurezza, aċċessorji tal-irfigħ, ktajjen, ħbula u ċineg, apparati ta’ trażmissjoni mekkanika li jistgħu jitneħħew u makkinarju parzjalment komplut.
• Ma tkoprix tipi oħra ta’ makkinarju, bħal dak użat fil-fieri, l-industrija nukleari, il-laboratorji u l-minjieri, jew mill-militar jew il-pulizija.

L-obbligi tal-manifatturi

Il-manifatturi għandhom:

• iwettqu valutazzjoni tar-riskju biex jidentifikaw liema rekwiżiti tas-saħħa u sigurtà japplikaw għall-makkinarju tagħhom;
• Iżommu l-valutazzjoni tar-riskju f’moħħhom meta jfasslu u jibnu l-makkinarju tagħhom;
• Jiddeterminaw il-limiti dwar l-użu tal-makkinarju’
• Jidentifikaw kwalunkwe perikli li jista’ jkun hemm;
• jivvalutaw ir-riskju tal-makkinarju tagħhom li jikkawża ġrieħi gravi jew jagħmel ħsara jew jieħu miżuri biex isir iktar sigur;
• jassiguraw ruħhom li l-makkinarju tagħhom jikkonforma mar-rekwiżiti essenzjali tas-saħħa u s-sikurezza elenkati fl-Anness I għad-direttiva;
• jipprovdu dokument tekniku li jikkonferma li l-makkinarju jilħaq ir-rekwiżiti tad-direttiva;
• jassiguraw li japplikaw proċeduri ta’ assessjar għall-konformità u jipprovdu l-informazzjoni kollha meħtieġa, inkluż l-istruzzjonijiet għall-assemblaġġ u għall-użu;
• jimlew id-dikjarazzjoni ta’ konformità u jiżguraw li l-marka ta’ konformità CE tkun twaħħlet mal-makkinarju, sabiex ikun jista’ jintuża kullimkien fl-UE.

Il-Kummissjoni Ewropea qed tħejji li tadotta atti delegati u ta’ implimentazzjoni

Skont ir-Regolament emendatorju (UE) 2019/1243, il-Kummissjoni Ewropea ngħatat is-setgħa li tadotta atti delegati biex temenda l-lista indikattiva ta’ komponenti tas-sikurezza fl-Anness V tad-Direttiva 2006/42/KE.

Biex jiġu assigurati l-istess kundizzjonijiet għall-implimentazzjoni tad-DIrettiva 2006/42/KE, il-Kummissjoni tingħata setgħat li tintroduċi l-miżuri meħtieġa biex tittratta makkinarju li jista’ jkun perikoluż permezz ta’ atti ta’ implimentazzjoni. Dawn is-setgħat jeħtieġ li jiġu eżerċitati skont ir-Regolament (UE) Nru. 182/2011 (ara s-sommarju).

Modalità ta’ emerġenza tas-suq intern

Id-Direttiva Emendatorja (UE) 2024/2749 tfittex li tevita tfixkil fis-suq intern f’każ ta’ emerġenza billi tiżgura li, ladarba modalità ta’ emerġenza tas-suq intern, kif stipulat fir-Regolament (UE) 2024/2747 (l-Att dwar l-Emerġenza u r-Reżiljenza tas-Suq Intern), tkun ġiet attivata permezz ta’ att ta’ implimentazzjoni adottat mill-Kunsill tal-Unjoni Ewropea, l-oġġetti u s-servizzi rilevanti għall-kriżi² jistgħu jitqiegħdu fis-suq malajr kemm jista’ jkun.

Id-Direttiva (UE) 2024/2749 temenda d-Direttiva 2006/42/KE billi tistabbilixxi kif għandhom japplikaw dawn il-proċeduri ta’ emerġenza. Fost affarijiet oħra, ir-regoli l-ġodda:

• jirrikjedu li l-korpi tal-valutazzjoni tal-konformità³ jagħtu prijorità lill-applikazzjonijiet għall-konformità ta’ prodotti rilevanti għall-kriżi fuq dawk għal prodotti li mhumiex;
• jippermettu lill-Istati Membri tal-UE, fuq bażi eċċezzjonali u fejn ikun hemm talba debitament ġustifikata, li jawtorizzaw temporanjament it-tqegħid fis-suq ta’ makkinarju mingħajr ma jwettqu l-proċeduri normali ta’ valutazzjoni tal-konformità, fejn l-involviment ta’ korp notifikat ikun obbligatorju u jista’ jiżgura li r-rekwiżiti essenzjali kollha jiġu ssodisfatti;
• jippermettu lill-awtoritajiet nazzjonali kompetenti jippreżumu li l-prodotti manifatturati skont l-istandards tal-UE, l-istandards nazzjonali applikabbli rilevanti jew l-istandards internazzjonali applikabbli rilevanti żviluppati minn korp ta’ standardizzazzjoni internazzjonali rikonoxxut, identifikat mill-Kummissjoni bħala adattati biex jilħqu l-konformità u li jiżguraw livell ta’ protezzjoni ekwivalenti għal dak offrut mill-istandards armonizzati, jikkonformaw mar-rekwiżiti essenzjali applikabbli rilevanti;
• jagħtu lill-Kummissjoni l-possibbiltà li tadotta, permezz ta’ atti ta’ implimentazzjoni, speċifikazzjonijiet komuni li fuqhom il-manifatturi jistgħu jiddependu sabiex jibbenefikaw minn preżunzjoni ta’ konformità mar-rekwiżiti essenzjali applikabbli (atti ta’ implimentazzjoni li jistabbilixxu dawk l-ispeċifikazzjonijiet komuni jibqgħu applikabbli għat-tul tal-modalità ta’ emerġenza tas-suq intern).

Revoka

Id-Direttiva 2006/42/KE hija mħassra u sostitwita bir-Regolament (UE) 2023/1230 (ara s-sommarju) mill-20 ta’ Jannar 2027.