Att dwar Ewropa Interoperabbli

PUNTI EWLENIN

Għanijiet

Ir-regolament:

• iwaqqaf qafas legali ċar li jappoġġa l-interoperabbiltà tas-servizzi pubbliċi diġitali trans-Ewropej f’firxa ta’ livelli u setturi amministrattivi;
• jippromwovi t-trasformazzjoni diġitali tal-amministrazzjonijiet pubbliċi bil-għan li jinkisbu servizzi pubbliċi kompletament interoperabbli sal-2030;
• itejjeb il-konnettività u l-inklużività, billi jimmira l-iżgurar li l-benefiċċji tat-trasformazzjoni diġitali jilħqu ż-żoni rurali u remoti.

Valutazzjoni tal-interoperabbiltà u soluzzjonijiet ta’ kondiviżjoni

L-entitajiet tal-UE u l-korpi tas-settur pubbliku għandhom il-kompitu li:

• iwettqu valutazzjonijiet tal-interoperabbiltà qabel ma jiġu implimentati sistemi diġitali ġodda jew modifikati;
• jevalwaw l-effetti ta’ tali sistemi diġitali ġodda jew modifikati fuq interoperabbiltà transfruntiera;
• jidentifikaw u jikkonsultaw il-partijiet ikkonċernati affettwati/ikkonċernati;
• jidentifikaw ostakli u jipproponu soluzzjonijiet għas-servizzi pubbliċi diġitali transfruntiera; u
• jikkondividu soluzzjonijiet ta’ interoperabbiltà — assi li jistgħu jerġgħu jintużaw li jippermettu l-interoperabbiltà transfruntiera bħal oqfsa, linji gwida, arkitetturi ta’ referenza, speċifikazzjonijiet tekniċi, standards, servizzi u applikazzjonijiet, u kodiċi tas-sors.

Il-kisba tal-interoperabbiltà Ewropea

Il-Kummissjoni Ewropea:

• twaqqaf il-Portal għal Ewropa Interoperabbli li jipprovdi aċċess għal soluzzjonijiet ta’ interoperabbiltà, irawwem il-kondiviżjoni tal-għarfien u jappoġġa t-trasformazzjoni diġitali tas-settur pubbliku;
• tippubblika soluzzjonijiet interoperabbli tal-Ewropa u l-Qafas Ewropew għall-Interoperabbiltà (EIF) fuq il-portal, filwaqt li tiżgura li dawn ikunu aċċessibbli, jistgħu jinqraw mill-magni u jistgħu jerġgħu jintużaw.

Appoġġ u taħriġ għall-governanza tal-Ewropa Interoperabbli

Il-Bord għal Ewropa Interoperabbli stabbilit bir-regolament:

• huwa magħmul minn rappreżentanti minn kull Stat Membru u l-Kummissjoni;
• jiżviluppa l-EIF, li jipprovdi rakkomandazzjonijiet għall-interoperabbiltà legali, organizzattiva, semantika u teknika;
• jirrakkomanda soluzzjonijiet interoperabbli tal-Ewropa, li mbagħad jiġu ppubblikati fuq il-portal;
• jiffaċilita kooperazzjoni strateġika u jipprovdi pariri dwar l-applikazzjoni tar-regolament;
• jadotta linji gwida u jipproponi miżuri biex tissaħħaħ l-interoperabbiltà tas-settur pubbliku.

Il-bord jista’ jipproponi dan li ġej lill-Kummissjoni:

• proġetti ta’ appoġġ għall-implimentazzjoni biex jassistu lill-korpi tas-settur pubbliku fl-implimentazzjoni tal-politika diġitali u jiżguraw l-interoperabbiltà transfruntiera;
• miżuri ta’ innovazzjoni li jappoġġaw l-iżvilupp u l-adozzjoni ta’ soluzzjonijiet innovattivi ta’ interoperabbiltà;
• ambjenti ta’ esperimentazzjoni regolatorja tal-interoperabbiltà biex irawmu l-innovazzjoni, jiffaċilitaw il-kooperazzjoni transfruntiera u jappoġġaw l-Ekosistemi Ewropej tal-GovTech, b’linji gwida stretti għall-ipproċessar tad-data u r-responsabbiltà tal-parteċipanti.

Taħriġ u reviżjoni

• Il-Kummissjoni, assistita mill-bord, tipprovdi materjali u korsijiet ta’ taħriġ dwar l-interoperabbiltà, inklużi programmi ta’ ċertifikazzjoni għall-promozzjoni tal-aħjar prattiki u kwalifiki.
• Mekkaniżmu ta’ evalwazzjoni bejn il-pari volontarju jappoġġja lill-korpi tas-settur pubbliku fl-implimentazzjoni ta’ soluzzjonijiet għal Ewropa Interoperabbli u fit-twettiq ta’ valutazzjonijiet.

Il-komunità interoperabbli tal-Ewropa

• Magħmula mill-partijiet ikkonċernati pubbliċi u privati, tipprovdi għarfien espert u pariri lill-bord.
• Kull Stat Membru jaħtar l-awtoritajiet kompetenti u punt uniku ta’ kuntatt responsabbli għall-applikazzjoni u l-koordinazzjoni tar-regolament.
• L-entitajiet tal-UE involuti fis-servizzi pubbliċi diġitali trans-Ewropej jaħtru koordinatur tal-interoperabbiltà biex jiġu żgurati l-konformità u l-appoġġ.

Ippjanar u monitoraġġ

• Il-bord jadotta aġenda annwali tal-Ewropa interoperabbli għall-koordinazzjoni tal-prijoritajiet għall-iżvilupp tal-interoperabbiltà transfruntiera.
• Il-Kummissjoni timmonitorja u tirrapporta dwar il-progress tas-servizzi pubbliċi diġitali trans-Ewropej, b’enfasi fuq l-interoperabbiltà transfruntiera, l-implimentazzjoni tal-EIF u l-iżvilupp ta’ soluzzjonijiet b’sors miftuħ.
• Rapporti annwali jintbagħtu lill-Parlament Ewropew u lill-Kunsill tal-Unjoni Ewropea.

Baġit

Il-baġit tal-UE ġenerali jkopri l-kostijiet relatati mal-iżvilupp u l-manutenzjoni tal-Portal tal-Ewropa Interoperabbli u l-miżuri ta’ appoġġ.