Kooperazzjoni ġudizzjarja — Pjattaforma konġunta ta’ kollaborazzjoni tat-timijiet tal-investigazzjoni
SOMMARJU TA’:
Ir-Regolament (UE) 2023/969 li jistabbilixxi pjattaforma ta’ kollaborazzjoni biex tappoġġa l-funzjonament ta’ timijiet ta’ investigazzjoni konġunti
X’INHU L-GĦAN TAR-REGOLAMENT?
Għandu l-għan li jagħmilha aktar faċli għall-prosekuturi u l-imħallfin, li jaħdmu flimkien f’timijiet ta’ investigazzjoni konġunti (SIK), biex jiskambjaw informazzjoni u jressqu kriminali quddiem il-ġustizzja. Jagħmel dan billi:
- jistabbilixxi pjattaforma diġitali (il-pjattaforma ta’ kollaborazzjoni tas-SIK) għall-użu fuq bażi volontarja;
- jalloka responsabbiltajiet bejn l-utenti tal-pjattaforma u l-aġenzija li tmexxiha;
- jistabbilixxi kundizzjonijiet li taħthom l-utenti jingħataw aċċess;
- jistabbilixxi regoli speċifiċi tal-protezzjoni tad-data.
PUNTI EWLENIN
Il-pjattaforma għandha:
- sistema ta’ informazzjoni ċentralizzata għall-ħżin tad-data ċentrali temporanja;
- software għal komunikazzjoni sigura;
- konnessjonijiet u għodod tal-IT rilevanti biex jappoġġaw is-SIK.
Il-pjattaforma tiffaċilita:
- koordinament u ġestjoni tas-SIKs — timijiet maħluqa minn żewġ Stati Membri tal-Unjoni Ewropea (UE) jew aktar għal investigazzjonijiet speċifiċi kriminali u limitati biż-żmien;
- l-iskambju u l-ħażna temporanja ta’ data operazzjonali rapida u sigura;
- komunikazzjonijiet siguri għal messaġġi instantanji, chats u konferenzi bl-awdjo u bil-vidjow;
- it-traċċabilità tal-iskambji ta’ evidenza;
- l-evalwazzjonijiet ta’ SIKs.
Responsabbiltajiet
- L-Aġenzija tal-Unjoni Ewropea għat-Tmexxija Operattiva ta’ Sistemi tal-IT fuq Skala Kbira fil-Qasam tal-Libertà, is-Sigurtà u l-Ġustizzja (eu-LISA):
- tiddisinja, tiżviluppa u topera l-pjattaforma;
- timmonitorja l-iżvilupp tal-pjattaforma u tipprovdi statistika teknika regolari;
- tirrapporta lill-Parlament Ewropew u lill-Kunsill tal-Unjoni Ewropea ladarba tiġi ffinalizzata l-pjattaforma;
- tissottometti rapport annwali lill-Kummissjoni Ewropea, mhux aktar tard minn sentejn wara li l-pjattaforma tibda topera, dwar il-prestazzjoni teknika tagħha.
- L-Istati Membri:
- jiżguraw li l-awtoritajiet kompetenti tagħhom jistgħu teknikament jaċċessaw il-pjattaforma;
- jippermettu lill-utenti tal-pjattaforma tagħhom ikollhom aċċess għal korsijiet ta’ taħriġ.
- Il-Eurojust, il-Europol, l-Uffiċċju tal-Prosekutur Pubbliku Ewropew, l-OLAF u korpi, uffiċċji u aġenziji kompetenti oħra tal-UE jiżguraw li jistgħu jaċċessaw il-pjattaforma.
- Is-Segretarjat tan-Network tas-SIK:
- jipprovdi appoġġ amministrattiv, legali u tekniku u gwida u assistenza ta’ kuljum;
- ifassal u joffri korsijiet ta’ taħriġ;
- itejjeb kultura ta’ kooperazzjoni transfruntiera;
- jissottometti rapport annwali dwar il-modi kif tittejjeb il-pjattaforma;
- il-Bord ta’ Tmexxija tal-Programm, stabbilit mill-Bord ta’ Tmexxija tal-eu-LISA, jiżgura ġestjoni adegwata tal-fażi ta’ disinn u ta’ żvilupp tal-pjattaforma;
- Grupp Konsultattiv, stabbilit mill-eu-LISA, jipprovdi l-għarfien espert meħtieġ;
- L-amministraturi tal-ispazju tas-SIK jagħtu aċċess għall-pjattaforma lill-awtoritajiet tal-UE u mhux tal-UE u għall-korpi, l-uffiċċji u l-aġenziji tal-UE u l-awtoritajiet ġudizzjarji internazzjonali taħt ċerti kundizzjonijiet.
Sigurtà
Protezzjoni tad-data
- Data operattiva:
- tinħażen fis-sistema ta’ informazzjoni ċentralizzata sakemm l-utenti kollha tas-SIK iniżżluha;
- titħassar b’mod awtomatiku u permanenti ladarba tkun imniżżla.
- Data mhux operattiva:
- tinħażen għal massimu ta’ 5 snin jekk tkun prevista evalwazzjoni ta’ SIK kompluta;
- titħassar b’mod awtomatiku jekk ma ssir l-ebda evalwazzjoni.
- L-awtoritajiet nazzjonali u Ewropej li jużaw il-pjattaforma huma kkunsidrati bħala kontrolluri tad-data skont ir-regoli tal-UE; amministratur tas-SIK jissodisfa dan ir-rwol għall-awtoritajiet ġudizzjarji mhux tal-UE u internazzjonali.
- Id-data fil-pjattaforma tista’ tintuża biss għas-SIK relevanti.
- L-aċċess għall-pjattaforma huwa limitat għal uffiċjali awtorizzati.
Il-Kummissjoni:
- tadotta l-atti ta’ implimentazzjoni meħtieġa;
- tipprovdi evalwazzjoni ġenerali tal-pjattaforma lill-Parlament Ewropew u lill-Kunsill kull 4 snin abbażi tar-rapporti annwali li tirċievi mill-eu-LISA;
- tiddetermina meta l-pjattaforma tibda topera (dan ma għandux ikun aktar tard mis-7 ta’ Diċembru 2025).
MINN META BEDA JAPPLIKA R-REGOLAMENT?
Dan ilu japplika mis-6 ta’ Ġunju 2023.
SFOND
Timijiet ta’ investigazzjoni konġunti ilhom jeżistu mill-2002, iżda ffaċċjaw diffikultajiet tekniċi, bħall-iskambju sigur ta’ informazzjoni elettronika. Pjattaforma tal-IT iddedikata ser tegħleb dawn il-problemi.
Għal aktar informazzjoni, ara:
DOKUMENT PRINĊIPALI
Ir-Regolament (UE) 2023/969 tal-Parlament Ewropew u tal-Kunsill tal-10 ta’ Mejju 2023 li jistabbilixxi pjattaforma ta’ kollaborazzjoni sabiex tappoġġa l-funzjonament tal-iskwadri ta’ investigazzjoni konġunti u li jemenda r-Regolament (UE) 2018/1726 (ĠU L 132, 17.5.2023, pp. 1–20).
DOKUMENTI RELATATI
Ir-Regolament (UE) 2018/1726 tal-Parlament Ewropew u tal-Kunsill tal-14 ta’ Novembru 2018 dwar l-Aġenzija tal-Unjoni Ewropea għat-Tmexxija Operattiva ta’ Sistemi tal-IT fuq Skala Kbira fl-Ispazju ta’ Libertà, Sigurtà u Ġustizzja (eu-LISA), u li jemenda r-Regolament (KE) Nru 1987/2006 u d-Deċiżjoni tal-Kunsill 2007/533/ĠAI u li jħassar ir-Regolament (UE) Nru 1077/2011 (ĠU L 295, 21.11.2018, pp. 99–137).
L-emendi suċċessivi għar-Regolament (UE) 2018/1726 ġew inkorporati fit-test oriġinali. Din il-verżjoni konsolidata għandha valur dokumentarju biss.
Id-Deċiżjoni Kwadru tal-Kunsill 2002/465/ĠAI tat-13 ta’ Ġunju 2002 dwar skwadri ta’ investigazzjoni konġunti (ĠU L 162, 20.6.2002, pp. 1–3).
Ara l-verżjoni konsolidata.
Att tal-Kunsill tad-29 ta’ Mejju 2000 li jistabbilixxi konformi ma’ Artikolu 34 tat-Trattat dwar l-Unjoni Ewropea l-Konvenzjoni dwar l-Assistenza Reċiproka f’Materji Kriminali bejn l-Istati Membri tal-Unjoni Ewropea (ĠU C 197, 12.7.2000, pp. 1–23).
l-aħħar aġġornament 17.10.2023