Trażmissjoni ta’ dokumenti ġudizzjarji u extraġudizzjarji bejn il-pajjiżi tal-UE

PUNTI EWLENIN

Ir-regolament japplika f’materji ċivili u kummerċjali meta dokumenti ġudizzjarji u extraġudizzjarji jkunu jridu jintbagħtu lil pajjiż ieħor tal-UE.

Dokumenti – talbiet, konfermi, riċevuti, ċertifikati u komunikazzjonijiet – huma trażmessi bejn l-aġenziji permezz ta’:

• sistema tal-IT deċentralizzata sikura u affidabbli (network ta’ sistemi nazzjonali tal-IT u punti ta’ aċċess interoperabbli);
• l-aktar alternattiva rapida u xierqa, jekk is-sistema jkollha ħsara.

Id-destinatarji jiġu nnotifikati minn:

• aġenziji riċeventi; jew
• aġenziji mittenti permezz ta’ ittra rreġistrata jew b’mezzi elettroniċi, soġġetti għal ċerti kundizzjonijiet.

Il-pajjiżi tal-UE:

• jagħżlu uffiċjali pubbliċi, awtoritajiet u persuni kompetenti oħra biex jibagħtu (“aġenziji mittenti”) u jirċievu (“aġenziji riċeventi”) d-dokumenti;
• jipprovdu lill-Kummissjoni Ewropea bid-dettalji ta’ dawk magħżula u informazzjoni fattwali oħra;
• jaħtru korp ċentrali biex:
  • iwassal informazzjoni lill-aġenziji mittenti;
  • isolvi xi diffikultajiet li jistgħu jinqalgħu;
  • jibgħat, f’każijiet eċċezzjonali, talbiet lill-aġenziji riċeventi kompetenti;
• jipprovdi assistenza biex jinstabu l-indirizzi mhux magħrufa ta’ individwi li qed jiġu nnotifikati b’dokument;
• ikopri l-ispejjeż tal-installazzjoni, l-operat u l-manutenzjoni tas-sistemi nazzjonali tal-IT użati.

Il-proċedura ta’ trażmissjoni u servizz tiddikjara li:

• id-dokumenti ġudizzjarji jridu:
  • jintbagħtu direttament u kemm jista’ jkun malajr bejn l-aġenziji,
  • jkunu akkumpanjati mill-formola għat-talba rilevanti b’lingwa uffiċjali tal-UE;
• l-aġenziji riċeventi għandhom:
  • jirrikonoxxu l-wasla tad-dokument mill-aktar fis possibbli,
  • jinformaw lill-aġenzija mittenti jekk ikun hemm xi informazzjoni nieqsa jew jekk it-talba tmur lil hinn mill-kamp ta’ applikazzjoni tal-leġiżlazzjoni,
  • jgħaddu d-dokument, jekk ma jkollhomx il-ġurisdizzjoni territorjali meħtieġa, lill-aġenzija xierqa,
  • jinnotifikaw id-dokument, jekk ikollhom is-setgħa li jagħmlu dan, fi żmien xahar,
  • jinformaw lill-aġenzija mittenti jekk id-dokument ikunx ġie nnotifikat jew irrifjutat;
• id-destinatarji jistgħu jirrifjutaw li jaċċettaw id-dokument:
  • jekk ma jkunx miktub bil-lingwa uffiċjali ta’ pajjiżhom jew b’waħda li jifhmu,
  • jew meta jiġi nnotifikat jew permezz ta’ dikjarazzjoni bil-miktub fi żmien ġimagħtejn;
• ir-regoli u l-iskedi speċifiċi japplikaw jekk il-konvenut ikun assenti meta dokument jibda proċedimenti legali.

B’mod ġenerali, l-applikanti m’għandhomx għalfejn ikopru l-ispejjeż biex jinnotifikaw dokumenti ġudizzjarji. Madankollu, miżata fissa waħda, stabbilita fuq livell nazzjonali, tapplika għall-użu ta’:

• uffiċjal ġudizzjarju jew individwu legalment kompetenti;
• forma partikolari ta’ servizz.

Il-Kummissjoni:

• tista’ tadotta atti delegati u ta’ implimentazzjoni dwar l-aspetti tekniċi tal-leġiżlazzjoni;
• hija responsabbli mill-ħolqien, iż-żamma, l-iżvilupp u l-finanzjament ta’ software li l-awtoritajiet nazzjonali jistgħu jużaw minflok is-sistemi nazzjonali tal-IT tagħhom stess;
• tfassal u taġġorna manwal elettroniku ta’ informazzjoni prattika li tirċievi mill-awtoritajiet nazzjonali u tagħmel disponibbli fuq in-Network Ġudizzjarju Ewropew fil-materji ċivili u kummerċjali (Deċiżjoni 2001/470/KE — ara s-sommarju) u fuq il-Portal Ewropew tal-Ġustizzja Elettronika;
• tistabilixxi, sat-2 ta’ Lulju 2023, programm dettaljat għall-monitoraġġ tal-eżitu, ir-riżultati u l-impatt tar-regolament;
• tippreżenta rapport ta’ evalwazzjoni lill-Parlament Ewropew u lill-Kunsill u lill-Kumitat Ekonomiku u Soċjali Ewoprew.

Id-dokumenti extraġudizzjarji jiġu trażmessi u nnotifikati bl-istess kundizzjonijiet bħal dawk ġudizzjarji.

Ir-regolament:

• ma japplikax għal:
  • dħul, dwana jew kwistjonijiet amministrattivi,
  • ir-responsabbiltà ta’ gvern meta jeżerċita l-awtorità legali tiegħu,
  • destinatarji li l-indirizz tagħhom mhuwiex magħruf.

Revoka

Ir-Regolament (UE) 2020/1784 jirrevedi u jissostitwixxi r-Regolament (KE) Nru 1393/2007 u l-emendi sussegwenti tiegħu (ara s-sommarju).