Passaġġi fuq l-Ilma Interni — Bastimenti

PUNTI EWLENIN

Id-Direttiva (UE) 2016/1629 tistabbilixxi rekwiżiti tekniċi għall-bastimenti tal-passaġġi fuq l-ilma interni. Din tistabbilixxi r-rekwiżiti tekniċi għan-navigazzjoni sikura fuq il-passaġġi fuq l-ilma interni elenkati f’anness, li huma kklassifikati bħala żoni 1, 2, 3 jew 4, flimkien maż-żona R (arranġamenti speċjali għall-Konvenzjoni Riveduta għan-Navigazzjoni fuq ir-Renu). Din ma tapplikax għal laneċ, bastimenti navali u l-biċċa l-kbira tal-bastimenti li jbaħħru, inklużi laneċ tal-irmonk u laneċ li jimbuttaw li jistgħu jaħdmu biss okkażjonalment f’ilmijiet interni.

Ċertifikati ta’ navigazzjoni interna

Il-pajjiżi tal-UE għandhom jiżguraw li l-inġenji li joperaw fuq passaġġi fuq l-ilma interni tal-UE jinbnew u jinżammu f’konformità ma’ din id-direttiva. Ċertifikat ta’ navigazzjoni interna għandu jinħareġ wara spezzjoni teknika qabel ma inġenju jitqiegħed fis-servizz.

• L-awtoritajiet jistgħu joħorġu ċertifikati provviżorji f’każ ta’ telf jew ħsara lil ċertifikat eżistenti jew taħt ċerti eżenzjonijiet kif elenkati fl-annessi.
• Il-perjodu ta’ validità taċ-ċertifikati ta’ navigazzjoni interna għal inġenji li jkunu għadhom kif inbnew m’għandux jaqbeż 5 snin (għall-bastimenti tal-passiġġieri u ta’ veloċità għolja) jew 10 snin (għall-inġenji l-oħra kollha).
• Eċċezzjonalment, il-validità tista’ tiġi estiża sa 6 xhur mingħajr spezzjoni ulterjuri.
• Meta alterazzjonijiet jew tiswijiet kbar jaffettwaw is-solidità strutturali, in-navigazzjoni, il-manuvrabbiltà jew il-funzjonijiet speċjali, l-inġenju għandu jerġa’ jiġi spezzjonat qabel kwalunkwe vjaġġ ieħor.
• Jekk ċertifikat ma jiġix imġedded, l-awtorità nazzjonali għandha tiddikjara r-raġuni għaliex, u tinforma lis-sid dwar il-proċedura ta’ appell u l-limiti ta’ żmien.
• Il-pajjiżi tal-UE jistgħu jirrikonoxxu ċ-ċertifikati ta’ navigazzjoni tal-inġenji minn pajjiżi mhux tal-UE sakemm jintlaħqu ftehimiet espliċiti.

Identifikazzjoni

Il-pajjiżi tal-UE jiżguraw li l-awtoritajiet nominati tagħhom jassenjaw lil kull inġenju numru uniku Ewropew ta’ identifikazzjoni tal-bastiment (ENI), li jibqa’ l-istess matul il-ħajja tal-inġenju.

Bażi tad-Data Ewropea dwar il-Buq

• Ir-Regolament Delegat tal-Kummissjoni (UE) 2020/474 jistabbilixxi regoli dwar il-ġbir, l-ipproċessar u l-aċċessar tad-data fl-EHDB. Il-Kummissjoni Ewropea hija responsabbli għaż-żamma tal-EHDB ta’ miżuri ta’ appoġġ biex tiżgura s-sikurezza, il-faċilità tan-navigazzjoni u kif tiġi applikata d-Direttiva (UE) 2016/1629. Il-pajjiżi tal-UE jiżguraw li l-awtoritajiet tagħhom jaġġornaw il-bażi tad-data għall-finijiet tal-applikazzjoni tad-Direttiva, il-ġestjoni tat-traffiku u l-infrastruttura tal-passaġġi fuq l-ilma, iż-żamma tas-sikurezza u l-ġbir tal-istatistika, billi:
  • idaħħlu data li tidentifika u tiddeskrivi l-inġenju;
  • idaħħlu ċertifikati maħruġa, imġedda, sostitwiti jew irtirati, b’kopja diġitali taċ-ċertifikati kollha maħruġa skont din id-Direttiva;
  • idaħħlu data dwar kwalunkwe applikazzjoni miċħuda jew pendenti għal ċertifikati;
  • iħassru data relatata ma’ inġenju meta l-inġenju jiġi skreppjat;
  • jirreġistraw kwalunkwe tibdil fid-data ta’ hawn fuq.
• L-awtoritajiet jistgħu jittrasferixxu data personali lil pajjiż mhux tal-UE jew organizzazzjoni internazzjonali fuq bażi ta’ każ b’każ. Kwalunkwe pproċessar ta’ data personali mill-pajjiżi tal-UE huwa skont il-liġi tal-UE dwar il-protezzjoni ta’ data personali, b’mod partikolari r-Regolament (UE) 2016/679 (GDPR). Il-Kummissjoni tista’, fuq bażi ta’ każ b’każ, tittrasferixxi data personali jew tagħti aċċess għall-EHDB lil awtorità ta’ pajjiż mhux tal-UE jew organizzazzjoni internazzjonali sakemm ir-rekwiżiti tar-Regolament (UE) 2018/1725 jiġu ssodisfati (ara s-sommarju).
• Il-Kummissjoni tingħata s-setgħa li tadotta atti delegati li jispeċifikaw:
  • id-data li għandha tiddaħħal fil-bażi tad-data mill-pajjiżi tal-UE;
  • it-tipi ta’ aċċess permessi;
  • l-istruzzjonijiet dwar l-użu u t-tħaddim tal-bażi tad-data, b’mod partikolari fir-rigward tas-sigurtà, il-kodifikazzjoni u l-ipproċessar tad-data.

Rekwiżiti tekniċi

Ir-rekwiżiti tekniċi applikabbli għall-inġenji fiż-żoni 1, 2, 3 u 4 huma dawk stabbiliti fl-istandard ES-TRIN 2019/1 imfassal mill-Kumitat Ewropew għat-tfassil tal-Istandards fin-Navigazzjoni Interna (CESNI).

Spezzjoni

• Il-korpi ta’ spezzjoni huma stabbiliti mill-pajjiżi tal-UE, li jikkonsistu f’mill-inqas wieħed minn dawn li ġejjin:
  • uffiċjal mill-amministrazzjoni responsabbli għan-navigazzjoni interna;
  • espert dwar id-disinn tal-bastimenti tal-passaġġi fuq l-ilma interni u l-magni tagħhom;
  • espert nawtiku b’liċenzja ta’ kaptan fuq il-passaġġi fuq l-ilma interni li tawtorizza lid-detentur biex ibaħħar il-bastiment li għandu jiġi spezzjonat;
  • espert tal-inġenji tradizzjonali għall-ispezzjoni ta’ inġenji tradizzjonali.
• Il-pajjiżi tal-UE għandhom jiżguraw li l-korpi maħtura jwettqu l-ispezzjonijiet inizjali, perjodiċi, speċjali u volontarji msemmija fid-Direttiva.

Eżenzjonijiet għal ċerti kategoriji ta’ inġenji

• Filwaqt li jżommu livell adegwat ta’ sikurezza, il-pajjiżi tal-UE jistgħu jawtorizzaw eżenzjonijiet għal inġenji li joperaw fuq passaġġi fuq l-ilma interni mhux konnessi jew ċerti inġenji li għandhom piż li ma jaqbiżx it-350 tunnellata jew li mhumiex maħsuba għall-ġarr ta’ merkanzija.
• Sabiex tinkoraġġixxi l-innovazzjoni u t-teknoloġiji l-ġodda, il-Kummissjoni tista’ tippermetti eżenzjonijiet temporanji għal installazzjonijiet jew disinji minbarra dawk inklużi fl-annessi — jew għal skopijiet ta’ prova — sakemm tiġi żgurata sikurezza ekwivalenti.

Leġiżlazzjoni relatata

• Id-Direttiva 2008/68/KE tistabbilixxi regoli għat-trasport ta’ oġġetti perikolużi b’mod sikur u sigur bit-triq, bil-ferrovija jew bil-passaġġi fuq l-ilma interni fl-UE. Din tkopri wkoll aspetti bħat-tagħbija u l-ħatt, it-trasferiment lejn modi oħra tat-trasport, kif ukoll il-waqfiet matul il-proċess tat-trasport. Din testendi r-regoli internazzjonali biex ikopru t-trasport nazzjonali ta’ oġġetti perikolużi. Diversi atti ta’ implimentazzjoni jintroduċu eżenzjonijiet li jippermettu li jitqiesu ċirkostanzi nazzjonali speċifiċi, ġeneralment fir-rigward tal-limiti kwantitattivi u l-piżijiet imħallta.
• Id-Direttiva 2009/100/KE dwar ir-rikonoxximent reċiproku ta’ liċenzji ta’ navigabbilità tapplika għall-bastimenti tal-passaġġi fuq l-ilma interni li jiżnu 20 tunnellata jew aktar, li huma anqas minn 20 metru fit-tul jew 100 m³ fil-volum, li jintużaw għat-trasport ta’ merkanzija fuq passaġġi fuq l-ilma interni. Skont il-leġiżlazzjoni, il-pajjiżi tal-UE:
  • jistabbilixxu proċeduri għall-ħruġ ta’ liċenzji ta’ navigabbiltà;
  • jirrikonoxxu liċenzja ta’ navigabbiltà maħruġa minn pajjiż ieħor tal-UE daqs li kieku kien ħareġ il-liċenzja huwa stess;
  • jistgħu jwaqqfu bastiment jekk ikun f’kundizzjoni li tkun perikoluża għall-inħawi ta’ madwaru, sakemm jissewwew id-difetti.
• Id-Direttiva 2010/35/UE tintroduċi regoli dettaljati dwar l-apparat ta’ pressjoni li jista’ jinġarr¹ sabiex tittejjeb is-sikurezza u jiġi żgurat il-moviment liberu fl-UE. Din taġġorna l-leġiżlazzjoni preċedenti, b’mod partikolari dwar ir-rekwiżiti tal-konformità, il-valutazzjonijiet tal-konformità u l-ispezzjonijiet perjodiċi. Id-Direttiva tkopri t-trasport bit-triq u bil-ferrovija, kif ukoll il-passaġġi fuq l-ilma interni, u hija relatata mill-qrib mad-Direttiva 2008/68/KE.
• Ir -Regolament (UE) 2016/1628 (ara s-sommarju) jistabbilixxi l-limiti tal-emissjonijiet tas-sustanzi niġġiesa għall-magni l-ġodda li għandhom jiġu installati f’makkinarju mobbli mhux tat-triq (inklużi l-bastimenti tal-passaġġi fuq l-ilma interni). Dan jiddefinixxi b’mod speċifiku l-limiti tal-emissjonijiet ta’ sustanzi niġġiesa tal-istadju V u d-dati tal-applikazzjoni tagħhom. Ir-regolament għandu l-għan li jnaqqas l-emissjonijiet tas-sustanzi niġġiesa u li gradwalment jelimina t-tagħmir bil-magni li jniġġsu l-aktar.