Prodott tal-pensjoni personali pan-Ewropew

SOMMARJU TA’:

Ir-Regolament (UE) 2019/1238 dwar prodott tal-pensjoni personali pan-Ewropew

X’INHU L-GĦAN TAR-REGOLAMENT?

Dan jistabbilixxi l-bażi legali tal-prodott tal-pensjoni personali* pan-Ewropew (PEPP) billi jiżgura l-istandardizzazzjoni tal-karatteristiċi ewlenin tal-prodott, bħal:
- ir-rekwiżiti ta’ trasparenza;
- ir-regoli ta’ investiment;
- id-dritt li tbiddel fornituri; u
- għażliet differenti ta’ investiment.
Dan jistabbilixxi wkoll regoli uniformi dwar ir-reġistrazzjoni, il-manifattura, id-distribuzzjoni u s-superviżjoni tal-prodotti tal-pensjoni personali li huma mqassma fl-Unjoni Ewropea (UE) taħt id-deżinjazzjoni PEPP.
Il-PEPP hija skema volontarja ta’ pensjoni personali li tikkumplimenta s-sistemi eżistenti ta’ pensjonijiet pubbliċi u okkupazzjonali, kif ukoll l-iskemi nazzjonali ta’ pensjonijiet privati.
Ir-regolament għandu l-għan li jagħti lill-faddala aktar għażla u jipprovdilhom prodotti ta’ pensjoni personali aktar kompetittivi meta jfaddlu għall-irtirar, filwaqt li jgawdu protezzjoni tal-konsumatur qawwija.

PUNTI EWLENIN

Ir-regolament PEPP jistabbilixxi regoli uniformi dwar il-karatteristiċi ewlenin tal-PEPP, b’mod partikolari dwar il-punti ewlenin li ġejjin.

Il-fornituri tal-PEPP*

Il-PEPPs jistgħu jiġu offruti minn firxa wiesgħa ta’ istituzzjonijiet finanzjarji, inklużi l-impriżi tal-assigurazzjoni, il-maniġers tal-assi, il-banek, ċerti ditti tal-investiment u ċerti fondi tal-pensjonijiet okkupazzjonali.

Il-kuntratt tal-PEPP

Ir-regolament jistabbilixxi r-rekwiżiti minimi għall-kontenut tal-kuntratt miftiehem bejn il-fornituri tal-PEPP u l-faddala tal-PEPP*.

Ir-reġistrazzjoni tal-PEPPs

Il-fornituri li jixtiequ joffru PEPP għandhom isegwu proċess ta’ reġistrazzjoni. L-Awtorità Ewropea tal-Assigurazzjoni u l-Pensjonijiet tax-Xogħol tirreġistra PEPPs ġodda f’reġistru ċentrali, abbażi ta’ deċiżjoni meħuda mill-awtoritajiet kompetenti nazzjonali. Ladarba jiġi rreġistrat, il-prodott jista’ jiġi pprovdut u mqassam madwar l-UE.
Ir-regolament jiddeskrivi fid-dettall il-proċeduri ta’ reġistrazzjoni tal-PEPP, iċ-ċirkostanzi għad-dereġistrazzjoni ta’ PEPP, kif ukoll is-setgħat tal-awtoritajiet kompetenti tal-Istati Membri tal-UE tad-domiċilju u dawk ospitanti.

Il-passaport tal-UE

Il-fornituri u d-distributuri tal-PEPP jibbenefikaw minn passaport tal-UE li jippermettilhom ibigħu l-PEPPs fi Stati Membri differenti. Il-passaport jippermettilhom jaċċessaw is-suq kollu tal-UE b’reġistrazzjoni unika tal-prodott mogħtija abbażi ta’ sett wieħed ta’ regoli.

Il-portabbiltà

Meta jipproponu PEPP, il-fornituri jew id-distributuri għandhom jipprovdu lill-faddala prospettivi tal-PEPP informazzjoni dwar is-servizz tal-portabbiltà* u li fuqhom is-subkontijiet* huma disponibbli minnufih.
Meta l-faddala tal-PEPP ibiddlu r-residenza tagħhom għal ġo Stat Membru ieħor, dawn jistgħu jkomplu jikkontribwixxu għall-istess PEPP jew billi jiftħu subkont tal-PEPP mal-istess fornitur tal-PEPP fil-pajjiż ta’ residenza l-ġdid tagħhom (fejn din l-għażla tkun disponibbli mal-fornitur tal-PEPP tagħhom) jew billi jkomplu jikkontribwixxu għas-subkont tal-PEPP eżistenti tagħhom. Fil-każ li l-fornitur tal-PEPP tagħhom ma jipprovdix għal din l-għażla fil-pajjiż ta’ residenza l-ġdid tagħhom, il-faddala tal-PEPP għandhom id-dritt li jibdlu l-fornitur tal-PEPP immedjatament u mingħajr ħlas. Il-fornituri tal-PEPP għandhom jiftħu tal-anqas żewġ subkontijiet wara perjodu ta’ tranżizzjoni ta’ 3 snin.

Il-bdil

Il-faddala tal-PEPP jistgħu jbiddlu l-fornitur tal-PEPP wara minimu ta’ 5 snin mill-konklużjoni tal-kuntratt tal-PEPP u fil-każ ta’ bdil sussegwenti, wara 5 snin mill-aktar bidla riċenti. Il-fornitur tal-PEPP jista’ jippermetti lill-faddala tal-PEPP li jbiddlu l-fornituri tal-PEPP b’mod aktar frekwenti. It-tariffi u l-miżati għas-servizz tal-bdil għandhom ikunu limitati għall-ispejjeż amministrattivi attwali mġarrba mill-fornitur tal-PEPP trasferitur u limitati għal 0.5% tal-valur tal-assi trasferiti.

L-għażliet ta’ investiment

Il-fornituri tal-PEPP jistgħu jipprovdu sa sitt għażliet ta’ investiment, inkluża l-għażla ta’ inadempjenza ta’ investiment — imsejħa l-PEPP bażiku*. L-għażliet ta’ investiment kollha jridu jkunu mfassla mill-fornituri tal-PEPP abbażi ta’ garanzija jew teknika tal-mitigazzjoni tar-riskju li tiżgura protezzjoni suffiċjenti għall-faddala tal-PEPP.
Għall-PEPP bażiku, il-fornituri tal-PEPP għandhom jipproteġu l-kapital tal-faddala tal-PEPP jew permezz ta’ garanzija jew permezz ta’ tekniki tal-mitigazzjoni tar-riskju konsistenti mal-għan li jippermettu lill-faddala tal-PEPP li jirkupraw il-kapital. L-ispejjeż u t-tariffi għall-PEPP bażiku m’għandhomx jaqbżu l-1% tal-kapital akkumulat kull sena.
Il-faddala tal-PEPP għandhom id-dritt li jibdlu l-għażla ta’ investiment b’mod regolari sabiex jadattaw l-istrateġija ta’ investiment tagħhom. Dan id-dritt huwa mingħajr ħlas u jista’ jiġi eżerċitat wara minimu ta’ 5 snin mill-konklużjoni tal-kuntratt tal-PEPP u fil-każ ta’ bdil sussegwenti, wara 5 snin mill-aktar bidla riċenti tal-għażla ta’ investiment. Il-fornituri tal-PEPP jistgħu jippermettu lill-faddala tal-PEPP li jbiddlu l-għażla ta’ investiment tagħhom b’mod aktar frekwenti.

It-tip ta’ pagamenti maħruġa

Il-fornituri tal-PEPP jistgħu joffru lill-faddala tal-PEPP tip wieħed jew aktar ta’ pagamenti maħruġa (annwalitajiet, somma f’daqqa, pagamenti ta’ prelevament regolari ta’ ħlasijiet jew taħlita ta’ dawn).
Il-faddala tal-PEPP jistgħu jagħżlu l-forma ta’ pagamenti maħruġa għall-fażi ta’ dekumulazzjoni* fil-konklużjoni ta’ kuntratt u fil-ftuħ ta’ subkont ġdid. Il-forma ta’ pagamenti maħruġa tista’ tvarja minn subkont għal subkont. Jekk il-fornituri tal-PEPP jipprovdu forom differenti ta’ pagamenti maħruġa, il-faddala tal-PEPP jistgħu jimmodifikaw il-forma ta’ pagamenti maħruġa ta’ kull subkont sena qabel il-bidu tal-fażi ta’ dekumulazzjoni, fil-bidu tal-fażi ta’ dekumulazzjoni u fil-mument tal-bdil.

Id-distribuzzjoni tal-PEPPs

Ir-regolament jistabbilixxi l-kundizzjonijiet li taħthom il-fornituri tal-PEPP u d-distributuri tal-PEPP* jistgħu jqassmu l-PEPPs.
Ir-reġim ta’ distribuzzjoni tal-PEPP isegwi approċċ settorjali. Il-kumpaniji tal-assigurazzjoni u l-intermedjarji tal-assigurazzjoni li jiddistribwixxu PEPP huma soġġetti għad-Direttiva dwar id-Distribuzzjoni tal-Assigurazzjoni (id-Direttiva (UE). 2016/97), waqt li ditti tal-investiment u fornituri tal-PEPP u distributuri oħra ser ikollhom japplikaw ir-regoli fis- swieq fid-direttiva dwar l-istrumenti finanzjarji (Direttiva 2014/65/UE).

Il-parir

Il-fornituri tal-PEPP u d-distributuri tal-PEPP għandhom jipprovdu parir komprensiv lill-faddala prospettivi tal-PEPP qabel ma jiġi ffirmat il-kuntratt tal-PEPP, sabiex ikunu jistgħu jieħdu deċiżjoni infurmata bis-sħiħ u jagħżlu l-prodott li jkun l-aktar adattat għall-ħtiġijiet tagħhom. Il-parir għandu jkopri wkoll l-għażla tal-għażla ta’ investiment u projezzjonijiet personalizzati tal-benefiċċji tal-pensjoni. Qabel ma jiġi ffirmat il-kuntratt, il-fornitur u distributuri kollha tal-PEPP iridu jġiegħlu lill-faddala tal-PEPP biex jagħmlu test fuq it-talbiet u l-bżonnijiet relatati mal-irtirar tagħhom biex jiddeterminaw liema PEPPs ikunu addattati għalihom, jekk hemm. Dan it-test irid jinkludi wkoll verifika speċifika biex tiddetermina jekk il-faddala tal-PEPP għandhomx bżonn PEPP li joffri annwalitajiet, sabiex ikun żgurat protezzjoni adegwata kontra riskji ta’ lonġevità.
Barra minn hekk, għall-PEPP bażiku, il-fornituri tal-PEPP għandhom jipprovdu lill-faddala tal-PEPP parir personalizzat obbligatorju dwar l-ippjanar tal-irtirar fil-bidu tal-fażi ta’ dekumulazzjoni, b’rakkomandazzjoni personali dwar il-forma ottimali ta’ pagamenti maħruġa.

Informazzjoni

Sabiex jiġi żgurat livell għoli ta’ trasparenza, ir-regolament jipprovdi li l-faddala tal-PEPP għandhom jirċievu:
- Biex jiġi żgurat grad għoli ta’ protezzjoni tal-konsumatur, faddala tal-PEPP mhu ser ikollhom ebda possibbilità li jirrinunzjaw parir qabel il-konklużjoni tal-kuntratt, informazzjoni ewlenija dwar il-prodott permezz ta’ dokument standardizzat (jiġifieri d-dokument dwar informazzjoni ewlenija PEPP);
- kull sena, dikjarazzjoni tal-benefiċċju tal-PEPP b’informazzjoni ewlenija dwar l-evoluzzjoni tat-tfaddil tagħhom.
B’mod partikolari, l-ispejjeż u t-tariffi għandhom ikunu kompletament trasparenti.
Barra minn hekk, il-Kummissjoni Ewropea għandha tispeċifika aktar permezz ta’ standards tekniċi regolatorji d-dettalji tal-preżentazzjoni tal-informazzjoni li għandha tiġi pprovduta fid-dokument ta’ informazzjoni ewlenija tal-PEPP u d-dikjarazzjoni tal-benefiċċju tal-PEPP.

Il-fatturi ta’ sostenibbiltà

Il-fornituri tal-PEPP huma mħeġġa jqisu l-fatturi ambjentali, soċjali u ta’ governanza (il-fatturi ESG)*.
Il-fornituri tal-PEPP għandhom jipprovdu lill-faddala tal-PEPP l-informazzjoni, fejn disponibbli, relatata mal-prestazzjoni tal-investimenti tal-fornitur tal-PEPP f’termini tal-fatturi ESG.
Dawn għandhom jipprovdu wkoll lill-faddala tal-PEPP fid-dikjarazzjoni tal-benefiċċji tal-PEPP l-informazzjoni dwar kif il-politika ta’ investiment tqis il-fatturi ESG. Konformi mar-regola tal-persuna prudenti, il-fornituri tal-PEPP għandhom iqisu r-riskji relatati ma’ u l-impatt potenzjali fit-terminu twil tad-deċiżjonijiet ta’ investiment fuq il-fatturi ESG.

Superviżjoni

Il-konformità mar-regolament tal-PEPP għandha tiġi sorveljata mill-awtoritajiet kompetenti nazzjonali tal-fornituri u d-distributuri tal-PEPP. Madankollu, l-Awtorità Ewropea tal-Assigurazzjoni u l-Pensjonijiet tax-Xogħol se jkollha setgħat ta’ intervent fuq il-prodott li jippermettulha tieħu miżuri effettivi fl-UE kollha fil-każ ta’ tħassib sinifikanti dwar il-protezzjoni ta’ faddal tal-PEPP jew ta’ theddida għall-funzjonament ikkontrollat u l-integrità tas-swieq finanzjarji jew għall-istabbiltà tas-sistema finanzjarja kollha tal-UE jew parti minnha, li mhumiex indirizzati b’mod adegwat mill-awtoritajiet kompetenti nazzjonali.

MINN META JAPPLIKA R-REGOLAMENT?

Ilu japplika mit-22 ta’ Marzu 2022.

SFOND

Għal iktar informazzjoni ara:

Il-Prodott tal-pensjoni personali (il-Kummissjoni Ewropea).

TERMINI EWLENIN

Prodott tal-pensjoni personali. hu bbażat fuq kuntratt bejn faddal individwuali u entità fuq bażi volontarja u huwa komplimentari għal kwalunkwe prodott tal-pensjoni statutorja jew okkupazzjonali. Dan jipprovdi għall-akkumulazzjoni tal-kapital fit-tul bl-objettiv espliċitu li jipprovdi introjtu mal-irtirar u b’possibbiltajiet limitati għall-irtirar bikri qabel dak iż-żmien. Dan la huwa prodott tal-pensjoni statutorja u lanqas prodott tal-pensjoni okkupazzjonali.

Il-fornitur tal-PEPP. Impriża finanzjarja awtorizzata biex timmanifattura PEPP u biex tqassam dak il-PEPP.

Faddal tal-PEPP. Individwu li jkun ikkonkluda kuntratt tal-PEPP ma’ fornitur tal-PEPP.

Servizz tal-portabbilità. Servizz li jagħti lill-faddala tal-PEPP id-dritt li jkomplu jikkontribwixxu fil-kont tal-PEPP eżistenti tagħhom, meta jbiddlu r-residenza tagħhom għal Stat Membru ieħor tal-UE.

Subkont. Taqsima nazzjonali li tinfetaħ ġo kull kont tal-PEPP u li tikkorispondi mar-rekwiżiti u kundizzjonijiet legali biex tuża inċentivi possibbli stabbiliti fil-livell nazzjonali biex tinvesti ġo PEPP mill-Istat Membru tar-residenza tal-faddal tal-PEPP. Għalhekk, individwu jista’ jkun faddal tal-PEPP jew benefiċjarju tal-PEPP f’kull subkont, skont ir-rekwiżiti legali tal-fażi tal-akkumulazzjoni. Il-fażi ta’ akkumulazzjoni hu perjodu li matulu l-assi jakkumulaw f’kont tal-PEPP u normalment tkompli sa meta tibda l-fażi ta’ dekumulazzjoni.

PEPP bażiku. Il-fornituri kollha tal-PEPP se jkollhom bżonn joffru għażla affordabbli ta’ inadempjenza ta’ investiment (il-PEPP bażiku) bi spejjeż u tariffi limitati għal 1% tal-kapital akkumulat kull sena.

Fażi ta’ dekumulazzjoni. Il-perjodu li matulu l-assi akkumulati f’kont tal-PEPP jistgħu jintużaw biex jiffinanzjaw l-irtirar jew rekwiżiti ta’ introjtu ieħor.

Distributur ta’ PEPP. Impriża finanzjarja awtorizzata biex tqassam PEPPs mhux manifatturati minnha, ditta ta’ investiment li tipprovdi pariri dwar investimenti, jew intermedjarja ta’ assigurazzjoni.

Fatturi ESG. Sett ta’ kriterji li l-investituri li huma soċjalment konxji jużaw biex jiskrinjaw investimenti potenzjali biex jiżguraw li jappoġġaw il-prinċipji tal-iżvilupp sostenibbli. Il-kriterji ambjentali huma relatati ma’ kif negozju jaħdem bħala amministratur tan-natura. Il-kriterji soċjali jħarsu lejn kif dan jimmaniġġja r-relazzjonijiet mal-impjegati, mal-fornituri, mal-klijenti, u mal-komunitajiet li jopera fihom. Il-kriterji ta’ governanza jikkonċernaw kwistjonijiet bħat-tmexxija korporattiva tiegħu u l-approċċ tiegħu għall-pagi eżekuttivi, l-awditjar, il-kontrolli interni u d-drittijiet tal-azzjonisti.

DOKUMENT PRINĊIPALI

Ir-Regolament (UE) 2019/1238 tal-Parlament Ewropew u tal-Kunsill tal-20 ta’ Ġunju 2019 dwar Prodott tal-Pensjoni Personali pan-Ewropew (PEPP) (ĠU L 198, 25.7.2019, pp. 1-63).

DOKUMENTI RELATATI

Ir-Regolament ta’ Delega tal-Kummissjoni (UE) 2021/895 tal-24 ta’ Frar 2021 li jissupplimenta r-Regolament (UE) 2019/1238 tal-Parlament Ewropew u tal-Kunsill fir-rigward ta’ intervent fuq il-prodott (ĠU L 197, 4.6.2021, pp. 1-4).

Ir-Regolament Delegat tal-Kummissjoni (UE) 2021/896 tal-24 ta’ Frar 2021 li jissupplimenta r-Regolament (UE) 2019/1238 tal-Parlament Ewropew u tal-Kunsill fir-rigward ta’ informazzjoni addizzjonali għall-finijiet ta’ konverġenza tar-rappurtar superviżorju (ĠU L 197, 4.6.2021, pp. 5-6).

Ir-Regolament ta’ Implimentazzjoni tal-Kummissjoni (UE) 2021/897 tal-4 ta’ Marzu 2021 li jistabbilixxi standards tekniċi ta’ implimentazzjoni għall-applikazzjoni tar-Regolament (UE) 2019/1238 tal-Parliament Ewropew u tal-Kunsill fir-rigward tal-format tar-rapportar superviżorju lill-awtoritajiet kompetenti u l-kooperazzjoni u l-iskambju ta’ informazzjoni bejn l-awtoritajiet kompetenti u mal-Awtorità Ewropea tal-Assigurazzjoni u tal-Pensjonijiet tax-Xogħol (ĠU L 197, 4.6.2021, pp. 7-66).

Ir-Regolament Delegat tal-Kummissjoni (UE) 2021/473 tat-18 ta’ Diċembru 2020 li jissupplimenta r-Regolament (UE) 2019/1238 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw ir-rekwiżiti dwar dokumenti ta’ informazzjoni, l-ispejjeż u t-tariffi inklużi fil-kost massimu u dwar tekniki ta’ mitigazzjoni ta’ riskju għall-Prodott tal-Pensjoni Personali pan-Ewropew (ĠU L 99, 22.3.2021, p. 1-33).

Ir-Rakkomandazzjoni tal-Kummissjoni tad-29.6.2017 dwar it-trattament tat-taxxa ta’ prodotti tal-pensjoni personali, inkluż il-Prodott tal-Pensjoni Personali Pan-Ewropew (C(2017) 4393 final, 29.6.2017).

Id-Direttiva (UE) 2016/97 tal-Parlament Ewropew u tal-Kunsill tal-20 ta’ Jannar 2016 dwar id-distribuzzjoni tal-assigurazzjoni (riformulazzjoni) (ĠU L 26, 2.2.2016, pp. 19-59).

Emendi suċċessivi għad-Direttiva (UE) 2016/97 ġew inkorporati fit-test oriġinali. Din il-verżjoni konsolidata għandha valur dokumentarju biss.

Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE and d-Direttiva 2011/61/UE (ĠU L 173, 12.6.2014, pp. 349-496).

Ara l-verżjoni konsolidata.

Il-Komunikazzjoni mill-Kummissjoni lill-Parliament Ewropew, lill- Kunsill, lill-Kumitat Ekonomiku u Soċjali Ewropew - Pjan ta’ Azzjoni għall-Bini ta’ Unjoni tas-Swieq Kapitali (COM(2015) 468 final, 30.9.2015).

Regolament (UE) Nru 1094/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tal-Assigurazzjoni u l-Pensjonijiet tax-Xogħol), li jemenda d-Deċiżjoni Nru 716/2009/KE u li jħassar id-Deċiżjoni tal-Kummissjoni 2009/79/KE (ĠU L 331, 15.12.2010, pp. 48-83).

Ara l-verżjoni konsolidata.

l-aħħar aġġornament 01.07.2022