Il-Ftehim Ewro-Mediterranju ta’ Assoċjazzjoni bejn l-UE u l-Marokk

SOMMARJU TA’:

Il-Ftehim Ewro-Mediterranju li jistabbilixxi assoċjazzjoni bejn l-UE u l-Marokk

Id-Deċiżjoni 2000/204/KE, KEFA — dwar il-konklużjoni tal-Ftehim Ewro-Mediterranju li jistabbilixxi assoċjazzjoni bejn l-UE u l-Marokk

X’INHU L-GĦAN TAL-FTEHIM U TAD-DEĊIŻJONI?

L-għanijiet tal-ftehim huma li:

• jipprovdi bażi xierqa għad-djalogu politiku bejn l-UE u l-Marokk, li jippermetti l-iżvilupp ta’ relazzjonijiet mill-qrib fl-oqsma kollha li jqisu rilevanti għal tali djalogu;
• jistabbilixxi l-kundizzjonijiet għal-liberalizzazzjoni gradwali tal-kummerċ fil-merkanzija, fis-servizzi u fil-kapital;
• jippromwovi l-kummerċ u l-espansjoni ta’ relazzjonijiet ekonomiċi u soċjali armonjużi, b’mod partikolari permezz tad-djalogu u tal-kooperazzjoni, sabiex jitrawmu l-iżvilupp u l-prosperità tal-Marokk u tal-poplu tiegħu;
• iħeġġeġ l-integrazzjoni tal-pajjiżi tal-Magreb permezz tal-promozzjoni tal-kummerċ u tal-kooperazzjoni bejn il-Marokk u pajjiżi oħra tar-reġjun;
• jippromwovi l-kooperazzjoni ekonomika, soċjali, kulturali u finanzjarja.

Id-Deċiżjoni tikkonkludi l-ftehim f’isem l-UE.

PUNTI EWLENIN

Il-ftehim fih 8 intestaturi.

• 1.
  Djalogu politiku

  Id-djalogu politiku u l-kooperazzjoni bejn il-partijiet għandhom jiġu żviluppati aktar, b’mod partikolari biex:

  • jittejbu r-relazzjonijiet permezz tal-iżvilupp ta’ fehim reċiproku aħjar u koordinazzjoni regolari dwar kwistjonijiet internazzjonali ta’ interess komuni;
  • jippermettu lil kull parti tqis il-pożizzjoni u l-interessi tal-oħra;
  • jikkontribwixxu għall-konsolidazzjoni tas-sigurtà u tal-istabbiltà b’mod partikolari fir-reġjun tal-Mediterran u tal-Magreb;
  • jgħinu fl-iżvilupp ta’ inizjattivi konġunti.
• 2.
  Il-moviment liberu tal-merkanzija

  • Iż-żewġ partijiet jimpenjaw ruħhom biex jistabbilixxu b’mod gradwali żona ta’ kummerċ ħieles bilaterali fuq perjodu massimu ta’ 12-il sena.
  • Il-ftehim jistabbilixxi proċess għat-tnaqqis u għat-tneħħija ta’ tariffi doganali u kwoti fuq merkanzija kemm mill-UE kif ukoll mill-Marokk.
• 3.
  Stabbiliment u servizzi

  • Il-partijiet jaffermaw mill-ġdid l-obbligi tagħhom skont il-Ftehim Ġenerali dwar il-Kummerċ fis-Servizzi, b’mod partikolari l-obbligu li jingħata trattament reċiproku tan-nazzjon l-aktar iffavorit, jiġifieri li parti toffri lill-oħra l-aktar termini kummerċjali favorevoli, fis-setturi tas-servizzi koperti minn dak l-obbligu.
  • Il-partijiet jaqblu li jwessgħu l-kamp ta’ applikazzjoni tal-ftehim biex jiġi kopert id-dritt tal-kumpaniji minn parti waħda biex jistabbilixxu lilhom infushom fit-territorju tal-oħra u l-liberalizzazzjoni tal-għoti ta’ servizzi mid-ditti ta’ parti waħda lill-konsumaturi tas-servizzi fl-oħra.
• 4.
  Pagamenti, kapital, kompetizzjoni u dispożizzjonijiet ekonomiċi oħra

  • Il-pagamenti attwali għal tranżazzjonijiet attwali jridu jsiru b’munità konvertibbli b’mod liberu.
  • Il-kapital li jikkonċerna l-investimenti diretti fil-Marokk f’kumpaniji ffurmati skont il-liġijiet attwali jista’ jiġi mċaqlaq b’mod liberu u r-rendiment minn tali investimenti u kwalunkwe profitt li jakkumula jista’ jiġi likwidat u ttrasferit lura ’l barra mill-pajjiż.
  • Permezz ta’ konsultazzjoni l-partijiet jimmiraw li, fi żmien raġonevoli, jiffaċilitaw il-liberalizzazzjoni sħiħa tal-moviment tal-kapital bejn l-UE u l-Marokk.
  • Iż-żewġ naħat huma marbuta b’regoli ta’ kompetizzjoni, ibbażati fuq id-dritt tal-Unjoni, fir-rigward tal-azzjonijiet li jistgħu jaffettwaw il-kummerċ bejn iż-żewġ partijiet.
• 5.
  Kooperazzjoni ekonomika

  Il-ftehim għandu l-għan li jappoġġja l-isforzi proprji tal-Marokk biex jikseb żvilupp ekonomiku u soċjali sostenibbli.

  • Il-metodi ta’ kooperazzjoni jinkludu:
    • djalogu ekonomiku regolari li jkopri l-aspetti kollha tal-politika makroekonomika;
    • il-kooperazzjoni u l-iskambji ta’ informazzjoni;
    • pariri, l-użu tas-servizzi ta’ esperti u taħriġ;
    • impriżi konġunti;
    • assistenza rigward materji tekniċi, amministrattivi u regolatorji.
  • Huwa jkopri firxa wiesgħa ta’ oqsma ta’ politika, inkluż:
    • l-edukazzjoni u t-taħriġ;
    • l-ambjent;
    • il-kooperazzjoni reġjonali;
    • il-kooperazzjoni xjentifika, teknika u teknoloġika;
    • is-servizzi finanzjarji;
    • it-trasport.
• 6.
  Kooperazzjoni f’materji soċjali u kulturali

  • Iċ-ċittadini Marokkini li jaħdmu b’mod legali f’pajjiż tal-UE jridu jkunu liberi minn kwalunkwe forma ta’ diskriminazzjoni meta mqabbla maċ-ċittadini tal-pajjiż ikkonċernat. Iċ-ċittadini tal-UE li jaħdmu fil-Marokk iridu jirċievu l-istess trattament.
  • Il-partijiet jinvolvu ruħhom fi djalogu regolari dwar kwalunkwe kwistjoni soċjali li tinteressahom.
  • Il-partijiet se jinvolvu ruħhom f’kooperazzjoni kulturali kontinwa sabiex jgħinu biex tingħata spinta lill-għarfien u lill-fehim reċiproku.
• 7.
  Kooperazzjoni finanzjarja

  Minbarra l-oqsma diġà koperti, il-kooperazzjoni se tinkludi:

  • l-iffaċilitar ta’ riformi li għandhom l-għan li jimmodernizzaw l-ekonomija;
  • l-aġġornament tal-infrastruttura ekonomika, il-promozzjoni tal-attivitajiet ta’ investiment privat u tal-ħolqien ta’ impjiegi;
  • filwaqt li tqis l-effetti tal-ekonomija Marokkina tal-introduzzjoni progressiva ta’ żona ta’ kummerċ ħieles, b’mod partikolari fejn huwa kkonċernat l-aġġornament u r-ristrutturar tal-industrija;
  • il-ħarsien ta’ miżuri għall-politiki implimentati fis-setturi soċjali.
• 8.
  Dispożizzjonijiet istituzzjonali u ġenerali

  Kumitat ta’ Assoċjazzjoni, stabbilit bil-ftehim, huwa responsabbli għall-implimentazzjoni tal-ftehim. Il-Kumitat jiltaqa’ fil-livell tal-uffiċjali u jikkonsisti minn rappreżentanti tal-UE u tal-Marokk.

  Kunsill ta’ Assoċjazzjoni jiltaqa’ f’livell ministerjali. Ir-rwol ewlieni tiegħu huwa li jeżamina kwalunkwe kwistjoni ewlenija li tirriżulta fi ħdan il-qafas tal-ftehim u kwalunkwe kwistjoni bilaterali jew internazzjonali oħra ta’ interess reċiproku

DATA TAD-DĦUL FIS-SEĦĦ

Il-ftehim daħal fis-seħħ fl-1 ta’ Marzu 2000.

SFOND

• Il-ftehim huwa bbażat fuq is-sħubija Ewro-Mediterranja (EuroMed) stabbilita bejn l-UE u pajjiżi fin-Nofsinhar tal-Mediterran.
• EuroMed hija parti mill-politika Ewropea tal-viċinat.
• In-Negozjati għal Żona ta’ Kummerċ Ħieles Approfondita u Komprensiva (DCFTA) bejn l-UE u l-Marokk ġew imnedija fl-1 ta’ Marzu 2013.

Għal aktar informazzjoni, ara:

• il-Marokk (il-Kummissjoni Ewropea)
• Sħubija Ewro-Mediterranja (il-Kummissjoni Ewropea).

DOKUMENTI PRINĊIPALI

Id-Deċiżjoni tal-Kunsill u tal-Kummissjoni 2000/204/KE, KEFA tal-24 ta’ Jannar 2000 dwar il-konklużjoni ta’ Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, min-naħa l-waħda, u r-Renju tal-Marokk, min-naħa l-oħra (ĠU L 70, 18.3.2000, p. 1)

L-emendi suċċessivi għad-Deċiżjoni 2000/204/KE, KEFA ġew inkorporati fid-dokument oriġinali. Din il-verżjoni konsolidata għandha valur dokumentarju biss.

Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, minn naħa l-waħda, u r-Renju tal-Marokk min-naħa l-oħra — Protokoll 1 dwar l-arranġamenti li japplikaw għall-importazzjonijiet fil-Komunità ta’ prodotti agrikoli li joriġinaw fil-Marokk — Protokoll 2 dwar l-arranġamenti li japplikaw għall-importazzjonijiet fil-Komunità ta’ prodotti tas-sajd li joriġinaw fil-Marokk — Protokoll 3 dwar l-arranġamenti li japplikaw għall-importazzjonijiet fil-Marokk ta’ prodotti agrikoli li joriġinaw fil-Komunità — Protokoll 4 dwar id-definizzjoni ta’ prodotti oriġinarji u metodi ta’ kooperazzjoni amministrattiva — Protokoll 5 dwar l-assistenza reċiproka f’materji doganali bejn l-awtoritajiet amministrattivi — Att Finali — Dikjarazzjonijiet Konġunti — Ftehimiet fil-forma ta’ Skambju ta’ Ittri — Dikjarazzjoni mill-Komunità — Dikjarazzjonijiet mill-Marokk (ĠU L 70, 18.3.2000, pp. 2-204)

DOKUMENTI RELATATI

Dokument ta’ Ħidma tal-Persunal tal-Kummissjoni — Rapporti individwali u skedi informattivi dwar l-implimentazzjoni ta’ Ftehimiet tal-UE dwar il-Kummerċ Ħieles — Li jakkumpanja d-dokument — Rapport mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar l-Implimentazzjoni tal-Ftehimiet ta’ Kummerċ Ħieles l-1 ta’ Jannar 2017-il-31 ta’ Diċembru 2017 (SWD(2018) 454 final, 31.10.2018)

Ir-Regolament (UE) Nru 232/2014 tal-Parlament Ewropew u tal-Kunsill tal-11 ta’ Marzu 2014 li jistabbilixxi Strument Ewropew tal-Viċinat (ĠU L 77, 15.3.2014, p. 27-43).

Id-Deċiżjoni tal-Kunsill 2012/497/EU tat-8 ta’ Marzu 2012 dwar il-konklużjoni ta’ Ftehim fil-forma ta’ Skambju ta’ Ittri bejn l-Unjoni Ewropea u r-Renju tal-Marokk li jittratta miżuri reċiproċi ta’ liberalizzazzjoni fuq il-prodotti agrikoli, il-prodotti agrikoli pproċessati, il-ħut u l-prodotti tas-sajd, is-sostituzzjoni tal-Protokolli Nri 1, 2 u 3 u tal-annessi tagħhom u l-emendi għall-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, minn naħa, u r-Renju tal-Marokk, min-naħa l-oħra (ĠU L 241, 7.9.2012, pp. 2-3)

Ftehim fil-forma ta’ Skambju ta’ Ittri bejn l-Unjoni Ewropea u r-Renju tal-Marokk li jittratta miżuri reċiproċi ta’ liberalizzazzjoni fuq il-prodotti agrikoli, il-prodotti agrikoli pproċessati, il-ħut u l-prodotti tas-sajd, is-sostituzzjoni tal-Protokolli Nri 1, 2 u 3 u tal-annessi tagħhom u l-emendi għall-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, minn naħa, u r-Renju tal-Marokk, min-naħa l-oħra (ĠU 241, 7.9.2012, pp. 4-47)

Id-Deċiżjoni tal-Kunsill 2011/392/UE tat-13 ta’ Mejju 2011 dwar il-konklużjoni ta’ Ftehim bejn l-Unjoni Ewropea u r-Renju tal-Marokk li jistabbilixxi mekkaniżmu għas-soluzzjoni tat-tilwim (OJ L 176, 5.7.2011, p. 1)

Ftehim bejn l-Unjoni Ewropea u r-Renju tal-Marokk li jistabbilixxi mekkaniżmu għas-soluzzjoni tat-tilwim (ĠU L 176, 5.7.2011, pp. 2-15)

Protokoll għall-ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom min-naħa waħda u r-Renju tal-Marokk min-naħa l-oħra biex titqies l-adeżjoni tar-Repubblika Ċeka, ir-Repubblika tal-Estonja, ir-Repubblika ta’ Ċipru, ir-Repubblika tal-Latvja, ir-Repubblika tal-Litwanja, ir-Repubblika tal-Ungerija, ir-Repubblika ta’ Malta, ir-Repubblika tal-Polonja, ir-Repubblika tas-Slovenja u r-Repubblika Slovakka fl-Unjoni Ewropea (ĠU L 242, 19.9.2005, pp. 2-35)

Ftehim fil-forma ta’ skambju ta’ Ittri bejn il-Komunità Ewropea u r-Renju tal-Marokk dwar miżuri ta’ liberalizzazzjoni reċiproka u l-bdil ta’ protokolli agrikoli mal-Ftehim ta’ Assoċjazzjoni bejn il-KE u l-Marokk — Protokoll Nru 1 rigward l-arranġamenti applikabbli għal importazzjoni fil-Komunità ta’ prodotti agrikoli li joriġinaw fil-Marokk — Protokoll Nru 3 rigward l-arranġamenti applikabbli għal importi fil-Marokk ta’ prodotti agrikoli li joriġinaw fil-Komunità (ĠU L 345, 31.12.2003, pp. 119-149)

Ftehim fil-forma ta’ skambju ta’ ittri bejn il-Komunità Ewropea u r-Renju tal-Marokk dwar ċerti emendi għall-Annessi 2, 3, 4 u 6 tal-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, min-naħa l-waħda, u r-Renju tal-Marokk, min-naħa l-oħra(OJ L 70, 18.3.2000, pp. 206-227)

l-aħħar aġġornament 05.06.2019