L-irwol tad-Direttorat Ġenerali għall-Affarijiet Ekonomiċi u Finanzjarji tal-Kummissjoni Ewropea — DĠ ECFIN

SOMMARJU TA’:

l-Artikolu 121 tat-Trattat dwar il-Funzjonament tal-Unjoni Ewropea (TFUE)

l-Artikolu 126 tat-Trattat dwar il-Funzjonament tal-Unjoni Ewropea (TFUE)

X’INHU L-GĦAN TAL-ARTIKOLI 121 U 126 TAT-TRATTAT DWAR IL-FUNZJONAMENT TAL-UNJONI EWROPEA?

L-Artikoli 121 u 126 tat-TFUE jipprevedu s-sorveljanza tal-politiki ekonomiċi u l-prestazzjonijiet tal-Istati Membri tal-Unjoni Ewropea (UE), li jinvolvu l-Kummissjoni Ewropea.

• L-Istati Membri għandhom jipprovdu lill-Kummissjoni informazzjoni dwar il-politiki ekonomiċi tagħhom.
• Meta l-politiki ta’ pajjiż tal-UE jkun hemm riskju li jipperikolaw l-unjoni ekonomika u monterja, il-Kummissjoni tista’ toħroġ twissija u tipproponi rakkomandazzjonijiet lill-Kunsill (l-Art. 121).
• Il-Kummissjoni għandha timmonitorja l-iżvilupp tas-sitwazzjoni baġitarja fil-pajjiżi tal-UE u fil-każ ta’ żbalji fil-politika kbar tista’ tipproponi rakkomandazzjonijiet lill-Kunsill sabiex jiftaħ proċedura kontra l-pajjiż inkwistjoni.

Id-Direttorat Ġenerali għall-Affarijiet Ekonomiċi u Finanzjarji (DĠ ECFIN) huwa dipartiment tal-Kummissjoni li għandu l-għan li jikkontribwixxi għat-titjib fil-benessri ekonomiku taċ-ċittadini fl-UE u lil hinn billi jippromwovi l-iżvilupp ta’ ekonomiji kompetittivi u li joffru ħafna impjiegi.

PUNTI EWLENIN

Rwol

Id-dipartiment jikkontribwixxi għall-iżvilupp ta’ politiki mmirati lejn tkabbir ekonomiku sostenibbli u inklużiv filwaqt li jippreserva stabbilità makroekonomika u finanzjarja. Fost affarijiet oħra, huwa:

• jimplimenta riformi strutturali komprensivi;
• jimmira li jikseb u jżomm finanzi pubbliċi b’saħħithom u taħlita ta’ politiki xierqa (billi tinstab l-aħjar kombinazzjoni ta’ politiki biex jiġu mmassimizzati t-tkabbir u l-impjiegi);
• jippromwovi l-investiment fil-kapital produttiv (l-oġġetti u l-infrastruttura li jgħinu sabiex jiġi ġġenerat it-tkabbir) u fil-kapital uman (it-taħriġ u l-edukar tan-nies).

Objettivi ewlenin

L-isforzi tiegħu huma ffukati fuq il-kisba ta’ 2 mill-objettivi ġenerali tal-Kummissjoni:

• l-għoti ta’ spinta ġdida lill-impjiegi, lit-tkabbir u lill-investiment;
• unjoni ekonomika u monetarja aktar profonda u aktar ġusta.

Sabiex jagħmel dan, stabbilixxa strateġija li tikkonsisti mill-ilħuq ta’ 5 objettivi speċifiċi:

• il-promozzjoni ta’ politiki li jsaħħu t-tkabbir u l-impjieg fiż-Żona tal-Euro u fl-UE.
• il-promozzjoni ta’ stabbiltà makroekonomika u fiskali fiż-żona tal-euro u fl-UE,
• il-promozzjoni tal-investiment fl-UE,
• il-promozzjoni tal-prosperità lil hinn mill-UE,
• it-titjib tal-funzjonament effiċjenti tal-unjoni ekonomika u monetarja.

Semestru Ewropew

Is-Semestru Ewropew ġie stabbilit biex jikkoordina l-politiki ekonomiċi mal-UE kollha tul is-sena u biex jindirizza l-isfidi ekonomiċi tal-UE. L-ECFIN għandu rwol ewlieni billi:

• iwettaq analiżi dettaljata tal-isfidi baġitarji u ekonomiċi u l-pjanijiet politiċi ta’ kull pajjiż;
• jipprovdi gwida politika mfassla għal kull pajjiż tal-UE b’rakkomandazzjonijiet speċifiċi għall-pajjiż biex jiġu implimentati fi żmien it-12-18-il xahar sussegwenti; u mbagħad
• jimmonitorja l-iżviluppi ekonomiċi u l-implimentazzjoni tar-riforma.

Tnedija ta’ proċeduri

L-ECFIN għandu rwol importanti fit-tnedija ta’ proċeduri kontra pajjiżi tal-UE taħt il-Patt ta’ Stabbiltà u Tkabbir (SGP) u l-Proċedura ta’ Żbilanċ Makroekonomiku (MIP):

• F’sitwazzjonijiet fejn id-defiċit baġitarju jew id-dejn pubbliku ta’ pajjiż tal-UE jkunu meqjusa eċċessivi fir-rigward ta’ ċerti valuri ta’ referenza stabbiliti, il-Kummissjoni tista’ tħejji rapport biex tniedi Proċedura ta’ Defiċit Eċċessiv (PDE) u tirrakkomanda lill-Kunsill biex jiftaħ PDE. Il-Kummissjoni tista’ tindirizza wkoll twissija lil pajjiżi li ma jaderixxux mal-objettiv baġitarju ta’ terminu medju tagħhom.
• Id-DĠ ECFIN huwa l-fornitur ewlieni tal-analiżi fir-Rapport dwar il-Mekkaniżmu ta’ Twissija (AMR) u tal-biċċa l-kbira tal-analiżi fil-fond (IDRs) u għandu rwol ta’ koordinazzjoni f’ċerti aspetti ta’ sorveljanza tal-MIP. F’każijiet ta’ żbilanċi aktar serji, il-Kummissjoni tista’ tipproponi t-tnedija ta’ Proċedura ta’ Żbilanċ Eċċessiv (EIP) bħala parti mill-fergħa korrettiva tal-MIP. Wara, id-DĠ ECFIN jimmonitorja l-korrezzjoni tal-iżbilanċi eċċessivi.

SFOND

Għal aktar informazzjoni, ara:

• Affarijiet Ekonomiċi u Finanzjarji (Il-Kummissjoni Ewropea).

DOKUMENTI EWLENIN

Trattat dwar il-Funzjonament tal-Unjoni Ewropea (Verżjoni konsolidata) — It-Tielet Parti — Politika u azzjonijiet interni tal-Unjoni — Titolu VIII — Politika ekonomika u monetarja — Kapitolu 1 — Politika ekonomika — Artikolu 121 (ex Artikolu 99 TKE) (ĠU C 202, 7.6.2016, pp. 97-98)

Trattat dwar il-Funzjonament tal-Unjoni Ewropea (Verżjoni konsolidata) — It-Tielet Parti — Politika u azzjonijiet interni tal-Unjoni — Titolu VIII — Politika ekonomika u monetarja — Kapitolu 1 — Politika ekonomika — Artikolu 126 (ex Artikolu 104 TKE) (ĠU C 202, 7.6.2016, pp. 99-102)

l-aħħar aġġornament 03.09.2021