IL-KUMMISSJONI EWROPEA

Brussell, 27.3.2024

COM(2024) 144 final

KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI

pjan ta’ azzjoni għal lawrja Ewropea

{SWD(2024) 74 final}

1.Introduzzjoni

L-edukazzjoni hija fundamentali għall-futur tal-UE. Hija pedament għas-sodisfazzjon personali, l-impjegabbiltà, l-eżitu u għal ċittadinanza attiva u responsabbli. Permezz tal-għoti ta’ edukazzjoni ta’ kwalità għolja, l-universitajiet 1 huma xempji tal-istil tal-ħajja Ewropea tagħna. Dan jinkludi l-promozzjoni tal-valuri akkademiċi u l-eċċellenza u tal-prattiki demokratiċi u d-drittijiet fundamentali, kif ukoll it-trawwim tal-ugwaljanza, id-diversità u l-inklużjoni.

Il-kompetittività u l-prosperità tal-Ewropa jiddependu fuq il-ħiliet li jibqgħu validi fil-futur tal-ġenerazzjonijiet attwali u li jmiss biex jaċċelleraw u jisfruttaw it-tranżizzjonijiet ekoloġiċi u diġitali, jikkompensaw għat-tendenzi demografiċi, u biex jiżguraw l-awtonomija strateġika miftuħa tal-Ewropa f’oqsma ewlenin. L-edukazzjoni hija wkoll kruċjali għall-iżvilupp ekonomiku u soċjali u r-reżiljenza tal-pajjiżi li jaspiraw li jissieħbu fl-UE. Irridu nkunu lesti li mmexxu din il-bidla u nsawru l-futur.

Hekk kif l-isfidi ewlenin ta’ żminijietna qed isiru dejjem aktar globali, u hekk kif l-Ewropa teħtieġ li ssaħħaħ l-awtonomija strateġika miftuħa tagħha, l-edukazzjoni tranżnazzjonali m’għadhiex għażla “sabiħa li jkollna” iżda ssir neċessità. Hija kundizzjoni biex il-ġenerazzjonijiet futuri jiġu mgħammra bil-kompetenzi u l-ħiliet li s-soċjetajiet Ewropej se jkollhom bżonn sabiex jirnexxu f’dinja dejjem aktar interkonnessa.

L-UE qed tikkompeti ma’ oqsma oħra tal-edukazzjoni fid-dinja. Il-kapaċità tagħha li tattira l-aħjar talent tiddependi, parzjalment, fuq il-lawrji li l-istituzzjonijiet ta’ edukazzjoni għolja tagħha jistgħu joffru. Huwa għalhekk li ħafna universitajiet fl-Ewropa jfittxu li jiġbru flimkien l-għarfien espert u li jgħaqqdu l-forzi komplementari li mhumiex disponibbli fl-ebda istituzzjoni, biex jipprovdu lill-gradwati u lill-istudenti tul il-ħajja b’ħiliet strateġiċi għall-futur tagħhom. 

Mit-tnedija taż-Żona Ewropea tal-Edukazzjoni fl-2020, sar progress notevoli. Il-kooperazzjoni tranżnazzjonali kienet fattur ewlieni wara r-riformi biex jiġi ffaċilitat u appoġġjat il-ħolqien ta’ mudelli innovattivi bħall-alleanzi tal-Universitajiet Ewropej li dalwaqt se jkunu 60 2 , bl-involviment ta’ madwar 500 istituzzjoni tal-edukazzjoni għolja mill-partijiet kollha tal-Ewropa, mill-bliet kapitali għaż-żoni rurali.  Huma jaġixxu bħala pijunieri għas-settur kollu tal-edukazzjoni għolja.

Il-kooperazzjoni bejn l-universitajiet bejn il-fruntieri tista’ tiżviluppa b’ħafna modi differenti. L-aktar forom ambizzjużi tal-għoti ta’ edukazzjoni konġunta bejn il-pajjiżi, huma programmi li jwasslu għal lawrja konġunta. Madankollu, ostakli legali u amministrattivi sinifikanti jkomplu jagħmlu l-għoti ta’ dawn il-lawrji diffiċli. Dan qed iżomm lura t-trasformazzjoni meħtieġa fis-settur tal-edukazzjoni għolja tal-Ewropa. L-istrateġija Ewropea għall-universitajiet 3 , adottata fl-2022, stabbiliet azzjonijiet ambizzjużi biex tinkiseb Żona Ewropea tal-Edukazzjoni fl-edukazzjoni għolja, bl-intenzjoni li tiġi żviluppata lawrja Ewropea. Din il-komunikazzjoni tpoġġi din l-intenzjoni f’azzjoni billi tipprovdi pjan ta’ azzjoni ċar biex lawrja Ewropea ssir realtà.

Il-lawrja Ewropea, hija tip ta’ kwalifika ġdida li għandha tiġi minquxa fil-leġiżlazzjoni nazzjonali, tagħmilha aktar faċli għall-universitajiet minn pajjiżi differenti biex jikkooperaw mingħajr problemi u jiżviluppaw programmi konġunti innovattivi li jwasslu għal lawrja konġunta, b’rispett sħiħ tal-awtonomija istituzzjonali tagħhom u tal-kompetenzi ta’ Stat Membru jew gvernijiet reġjonali. Lawrja Ewropea bħal din tikkontribwixxi wkoll għall-bini ta’ identità Ewropea komuni u sens ta’ appartenenza Ewropew aktar b’saħħtu.

Tkun ibbażata fuq kriterji Ewropej maqbula komunement li jirriflettu r-rilevanza tal-esperjenza tat-tagħlim, l-impenn għal valuri komuni u l-eċċellenza tal-arranġamenti ta’ kooperazzjoni bejn l-universitajiet. Tkompli tavvanza fehim kondiviż tal-ħtiġijiet tal-UE f’termini ta’ rekwiżiti akkademiċi u ta’ ħiliet, skont l-istrateġija Ewropea għall-universitajiet. Tista’ twassal għar-reviżjoni u biex jiġu indirizzati d-disparitajiet eżistenti li bħalissa jillimitaw il-kapaċità tal-universitajiet biex jikkooperaw fl-Ewropa.

Il-lawrja Ewropea tkun tinkludi sforzi kollaborattivi, approċċi interdixxiplinari, u perspettivi internazzjonali, li kollha jenfasizzaw ir-rieda tal-Ewropa li tappoġġja u tiżviluppa forza tax-xogħol Ewropea b’ħiliet ogħla, adattabbli u globalment kompetittiva. Programmi edukattivi konġunti li jwasslu għal lawrja Ewropea jkollhom il-potenzjal li jattiraw studenti minn madwar id-dinja u jgħinu biex jinstabu t-talenti meħtieġa għall-ekonomija tagħna, li hija partikolarment pertinenti f’oqsma kritiċi ta’ teknoloġija kruċjali għall-kompetittività u s-sovranità teknoloġika tagħna. Fl-istess ħin, l-offerta ta’ lawrja Ewropea tagħti spinta wkoll lill-mobbiltà għal tagħlim fl-UE, tindirizza l-ħtiġijiet tar-reġjuni li qed iħabbtu wiċċhom ma’ nassa tal-iżvilupp tat-talenti 4 , u tgħin biex tintlaħaq id-domanda tas-suq tax-xogħol għal gradwati b’mentalità Ewropea u globali.

Din il-Komunikazzjoni, flimkien ma’ żewġ proposti għal rakkomandazzjonijiet tal-Kunsill, waħda dwar sistema Ewropea ta’ assigurazzjoni u rikonoxximent tal-kwalità fl-edukazzjoni għolja, u oħra dwar karrieri attraenti u sostenibbli fl-edukazzjoni għolja, huma pass kbir lejn il-kisba taż-Żona Ewropea tal-Edukazzjoni.

Filwaqt li l-proposti għaż-żewġ rakkomandazzjonijiet tal-Kunsill imorru lil hinn mill-ambizzjoni li tiġi żviluppata lawrja Ewropea u huma rilevanti għat-tipi kollha ta’ istituzzjonijiet tal-edukazzjoni għolja u l-edukazzjoni li jipprovdu, huma interkonnessi mill-qrib. Sistema ta’ assigurazzjoni u rikonoxximent tal-kwalità hija kruċjali biex tinbena l-fiduċja fi programmi edukattivi konġunti. Professjonisti akkademiċi b’ħiliet għolja u motivati huma essenzjali biex jipprovdu tagħlim u riċerka ta’ kwalità għolja fl-universitajiet tagħna. Il-programmi konġunti spiss ma jitqisux bħala parti mill-attivitajiet ewlenin tal-persunal akkademiku u għalhekk jistgħu jkunu ta’ piż addizzjonali, u għaldaqstant hemm il-ħtieġa għal rikonoxximent u inċentivi addizzjonali.

2.Lawrja Ewropea: element ewlieni biex tinkiseb iż-Żona Ewropea tal-Edukazzjoni u biex tingħata spinta lill-kompetittività u l-attraenza tal-Ewropa

Lawrja Ewropea sservi bħala strument strateġiku biex tinkiseb iż-Żona Ewropea tal-Edukazzjoni, spazju komuni u inklużiv għal edukazzjoni ta’ kwalità u mobbiltà għal tagħlim bejn il-fruntieri għal kulħadd, b’sistemi tal-edukazzjoni u ta’ taħriġ interkonnessi mill-qrib. Ittejjeb il-kompetittività u l-attraenza tas-settur tal-edukazzjoni għolja tal-UE, filwaqt li tibni fuq snin ta’ esperjenza ta’ kooperazzjoni permezz ta’ programmi tal-UE.

2.1.Żieda fl-impjegabbiltà u r-rilevanza tal-ħiliet

L-impjegaturi, inklużi l-kumpaniji multinazzjonali u l-SMEs, ifittxu individwi b’taħlita ta’ ħiliet trasversali (intelliġenza kulturali, ħsieb kritiku, ħiliet għas-soluzzjoni tal-problemi, kreattività, u adattabbiltà) – li kollha huma ħiliet li mistennija jkunu meħtieġa biex jintlaħqu l-miri tat-tranżizzjoni ekoloġika tal-UE skont il-Previżjoni tal-Ħiliet tal-OECD tal-2023. It-tisħiħ tal-kapaċità tal-istituzzjonijiet tal-edukazzjoni għolja biex jgħammru aktar nies b’dawn il-ħiliet jgħin biex tintlaħaq din id-domanda.

Il-lawrja Ewropea tappoġġja l-ħolqien ta’ aktar programmi konġunti li jirriflettu d-domandi ta’ ekonomija bbażata fuq l-għarfien. Il-kriterji sottostanti Ewropej maqbula komunement jistinkaw biex iżidu l-impjegabbiltà tal-gradwati billi jgħammruhom b’kompetenzi u ħiliet li jibqgħu validi fil-futur li huma mfittxija b’mod partikolari mill-impjegaturi.

L-evidenza minn studji u stħarriġiet miġbura fid-dokument ta’ ħidma tal-persunal li jakkumpanjah turi li l-gradwati minn programmi konġunti tranżnazzjonali jirrapportaw l-akbar impatt fuq il-karrieri u l-esperjenzi interkulturali tagħhom minn ħiliet imtejba relatati mal-impjiegi (bħal-lingwa, il-ħsieb kritiku, il-ħiliet speċifiċi għas-settur jew għall-qasam, il-ħiliet ta’ komunikazzjoni, analitiċi u ta’ soluzzjoni tal-problemi) u kapaċitajiet personali u interkulturali mtejba, inkluż id-disponibilità għal sfidi ġodda, it-tolleranza, il-kunfidenza, u l-għarfien akbar tal-forzi u d-dgħufijiet tagħhom stess.

Din it-taħlita ta’ ħiliet u kompetenzi trażversali u speċifiċi għas-settur iżżid l-impjegabbiltà tal-istudenti fuq skala Ewropea. Lawrja Ewropea tagħmel lill-gradwati aktar attraenti għal impjegaturi futuri. Tkun sinonima ma’ programmi ta’ kwalità għolja li jħejju individwi b’ħiliet għolja b’mentalità Ewropea u globali.

2.2.Tinqata’ l-burokrazija għal aktar trasparenza u viżibbiltà tas-sistemi tal-edukazzjoni għolja

Ħafna universitajiet li jixtiequ japprofondixxu l-kooperazzjoni tranżnazzjonali jitħabtu mad-diskrepanzi fil-leġiżlazzjoni nazzjonali. Dan jieħu r-riżorsi u jfixkel mix-xogħol reali tagħhom. Billi nissimplifikaw ix-xogħol għall-universitajiet, nistgħu nużaw riżorsi prezzjużi għall-benefiċċju tat-tagħlim u r-riċerka.

Fi stħarriġ tal-Ewrobarometru tal-2018, 92 % tal-universitajiet identifikaw l-eliminazzjoni tal-ostakli legali u amministrattivi għas-sħubijiet istituzzjonali strateġiċi internazzjonali bħala kwistjoni ewlenija li tagħti spinta lill-kooperazzjoni tranżnazzjonali 5 .

Minkejja 25 sena ta’ kooperazzjoni fi ħdan il-proċess intergovernattiv ta’ Bolonja, u l-iżvilupp ta’ diversi għodod biex tittejjeb it-trasparenza tas-sistemi nazzjonali tal-edukazzjoni għolja, l-assigurazzjoni tal-kwalità tal-offerti edukattivi u r-rikonoxximent tal-lawrji, għad hemm sfidi sinifikanti. Il-progress fiż-Żona Ewropea ta’ Edukazzjoni Għolja ġie mxekkel minn livelli differenti ta’ implimentazzjoni bejn u fi ħdan il-pajjiżi. L-UE teħtieġ li timxi lil hinn u aktar malajr biex tippermetti lill-universitajiet tagħha jikkooperaw mingħajr problemi u b’mod effiċjenti.

Fi studju reċenti 6 , 92 % tal-awtoritajiet nazzjonali u reġjonali mistħarrġa wieġbu li lawrja Ewropea tista’ ttejjeb l-implimentazzjoni tal-għodod eżistenti ta’ Bolonja, 84 % jgħidu li din ittejjeb ir-reputazzjoni globali tal-edukazzjoni għolja Ewropea, u 88 % jgħidu li din tgħin biex tiffaċilita l-kooperazzjoni bejn l-awtoritajiet nazzjonali dwar il-politiki edukattivi.

Il-proġetti ta’ esperimentazzjoni tal-politika tal-Erasmus+ 7 imwettqa flimkien ma’ 140 istituzzjoni tal-edukazzjoni għolja juru li lawrja Ewropea tista’ tissimplifika l-proċessi u taqta’ l-burokrazija fil-ħolqien ta’ programmi ta’ lawrji konġunti b’perkors ċar u komuni li jiżgura li t-tipi kollha ta’ universitajiet fl-Ewropa jkunu jistgħu jaħdmu flimkien b’mod effiċjenti.

2.3.Mutur għall-kooperazzjoni strateġika, il-kompetittività globali, u l-attraenza

Il-lawrja Ewropea se tippermetti lill-universitajiet isawru kooperazzjoni aktar profonda ma’ sħab aktar malajr u sempliċi, li se żżid il-prestazzjoni u l-eċċellenza tagħhom għall-attraenza u l-kompetittività globali. 

L-Indiċi ta’ Kooperazzjoni fl-Edukazzjoni Għolja tal-U-Multirank 8 juri li l-istituzzjonijiet tal-edukazzjoni għolja li jaħdmu flimkien ma’ istituzzjonijiet oħra, negozji, industriji, gvernijiet, korpi reġjonali, u bejn il-fruntieri, għandhom prestazzjoni aħjar minn dawk li huma inqas iffukati fuq il-kooperazzjoni. Hekk kif aktar u aktar universitajiet jipprijoritizzaw il-kollaborazzjoni, il-ħidma flimkien fi ħdan l-UE tkun mistennija li tkun l-aktar għażla faċli. Attwalment, hemm universitajiet li jirrapportaw li jista’ jkun aktar faċli li jiġu stabbiliti programmi ta’ lawrji konġunti ma’ sħab mhux tal-UE.

Il-pass tal-progress teknoloġiku qed ikompli jaċċellera, filwaqt li jmur lil hinn mill-fruntieri tradizzjonali bejn is-suġġetti u d-dixxiplini. Il-ħidma fost is-suġġetti b’approċċ interdixxiplinari tista’ twassal għal għarfien ġdid, toffri soluzzjonijiet ġodda għall-isfidi ta’ dinja kumplessa, u twassal għall-iżvilupp ta’ ħiliet ġodda. Karatteristika ewlenija tal-lawrja Ewropea tkun dik li jinkisbu aħjar il-benefiċċji tal-kooperazzjoni interdixxiplinari, ibbażata fuq l-aktar approċċ innovattiv ta’ tagħlim u riċerka fl-edukazzjoni għolja moderna. Lawrja Ewropea, bbażata fuq dan l-approċċ, issaħħaħ il-kapaċità tal-innovazzjoni tal-Ewropa u, fuq medda twila ta’ żmien, il-kompetittività globali tagħha.

3.Lawrja Ewropea: parametri ewlenin u valur miżjud

3.1.Xi tkun lawrja Ewropea?

Lawrja Ewropea tkun:

-mogħtija bħala lawrja konġunta fil-livell nazzjonali, reġjonali jew istituzzjonali, bħal kwalunkwe lawrja oħra, b’rispett sħiħ tal-prinċipji ta’ sussidjarjetà, l-awtonomija istituzzjonali u l-libertà akkademika.

-mogħtija fuq bażi volontarja minn universitajiet li jaħdmu flimkien madwar l-UE, li jiċċertifikaw l-eżiti tat-tagħlim miksuba bħala parti minn programmi tranżnazzjonali.

-abbażi ta’ sett ta’ kriterji komuni 9  miftiehma fil-livell Ewropew u applikati għall-programm konġunt tal-lawrji. Dawn il-kriterji Ewropej jirriflettu fehim komuni u ħtiġijiet speċifiċi biex il-forza tax-xogħol tal-Ewropa tiġi mgħammra b’kompetenzi u ħiliet rilevanti biex jagħtu spinta lill-kapaċità ta’ innovazzjoni tagħha, b’mod partikolari fid-dawl tat-tranżizzjoni doppja. L-aċċessibbiltà u l-attraenza għall-istudenti minn kull sfond, inklużi dawk b’inqas opportunitajiet, jiġu promossi permezz tal-kriterji ta’ inklużività.

-permessa mil-leġiżlazzjoni nazzjonali rilevanti tal-edukazzjoni għolja appoġġjata minn oqfsa nazzjonali tal-kwalifiki 10 biex l-istituzzjonijiet ikunu jistgħu jakkreditaw u jagħtu tali lawrji, flimkien ma’ lawrji nazzjonali oħra, fil-livelli ta’ Baċellerat, Master, u Dottorat.

-preferibbilment imwassla f’format diġitali 11 .

-rikonoxxuta awtomatikament 12 madwar l-UE.

3.2.Lawrja Ewropea waħda, ħafna benefiċċji

Ġew identifikati bosta benefiċċji u opportunitajiet assoċjati mal-ħolqien ta’ lawrja Ewropea permezz tar-riċerka, 40 rawnd ta’ konsultazzjoni mal-partijiet interessanti, sejħa għal evidenza, u s-sejbiet preliminari minn proġetti ta’ esperimentazzjoni tal-politika tal-Erasmus+ li għaddejjin bħalissa.

Is-sejbiet jenfasizzaw entużjażmu konsiderevoli mill-universitajiet għal perkors lejn simplifikazzjoni akbar u sħubija strateġika mtejba. L-istudenti jappellaw biex il-programmi konġunti jkunu ħafna aktar disponibbli. L-impjegaturi jesprimu interess qawwi fi strument viżibbli u faċli biex jinftiehem li effettivament jgħammar lill-ħaddiema futuri b’kompetenzi fuq il-post tax-xogħol ta’ valur għoli.

Lawrja Ewropea jkollha l-benefiċċji li ġejjin:

Għall-istudenti: L-istudenti jkunu fil-qalba tal-lawrja Ewropea, li tagħtihom l-opportunità li jkunu parti minn diversi komunitajiet akkademiċi, u b’hekk jikkontribwixxu għal Żona Ewropea tal-Edukazzjoni aktar diversa u interkonnessa. Fi stħarriġ reċenti 13 , disa’ minn kull għaxar studenti identifikaw dawn li ġejjin bħala l-benefiċċji potenzjali ewlenin ta’ lawrja Ewropea: -il-ħolqien ta’ aktar opportunitajiet ta’ studju f’diversi pajjiżi Ewropej, b’rikonoxximent awtomatiku tal-kreditu; -il-faċilitazzjoni tal-offerta ta’ programmi ta’ studju konġunti innovattivi u esperjenza akkademika bla problemi fil-kampusijiet; u -l-akkwist ta’ ħiliet u kompetenzi li jwasslu għal impjegabbiltà ogħla madwar id-dinja.

Għal min iħaddem u s-suq tax-xogħol: Min iħaddem u n-negozji japprezzaw ħafna l-kunċett ta’ lawrja Ewropea, li jfisser sett speċifiku ta’ kompetenzi trażversali apprezzati. Mill-perspettiva tagħhom, lawrja Ewropea twassal għal: -reklutaġġ aktar faċli b’aktar trasparenza u ċarezza bis-saħħa ta’ lawrja Ewropea li tkun faċli biex tinqara u tinftiehem, meta mqabbla ma’ lawrji multipli għall-istess programm ta’ studju; -aktar attraenza tal-Ewropa bħala destinazzjoni għal studenti b’talent biex ikunu mgħammra b’ħiliet rilevanti għas-suq tax-xogħol Ewropew; u -aktar-possibbiltajiet ta’ ħidma mal-universitajiet eż. bil-parteċipazzjoni fit-tfassil tal-kurrikuli.

Għall-persunal akkademiku: Lawrja Ewropea mhux biss issawwar il-vjaġġ akkademiku għall-istudenti iżda wkoll ix-xenarju għall-akkademiċi u l-persunal universitarju u tagħti s-setgħa lill-akkademiċi biex jinnavigaw il-kumplessitajiet ta’ xenarju akkademiku globalizzat. L-analiżi mir-Reġistru Ewropew tal-Edukazzjoni Terzjarja ta’ 1,500 università turi li l-internazzjonalizzazzjoni tal-persunal akkademiku mhijiex uniformi fost it-tipi ta’ istituzzjonijiet u pajjiżi. Għall-persunal akkademiku, lawrja Ewropea ġġib magħha: -aktar opportunitajiet għall-mobbiltà, biex jiġu ttestjati pedagoġiji ġodda u esperjenzi attraenti ta’ tagħlim; -Inqas problemi burokratiċi, li jippermettu lill-akkademiċi jiffukaw fuq il-kontenut u l-kwalità tal-kooperazzjoni aktar milli fuq l-amministrazzjoni tagħha; u -it-trasferiment tal-għarfien u t-titjib tal-ħiliet, il-promozzjoni ta’ kultura ta’ tagħlim kontinwu u żvilupp professjonali permezz ta’ kooperazzjoni tranżnazzjonali.

Għall-universitajiet: L-universitajiet qed jappellaw għal modi aktar sempliċi biex jaħdmu flimkien. Billi tipprovdi flessibbiltà u żżomm standards ta’ kwalità, filwaqt li tippermetti qafas komuni u simplifikat biex tinbena kooperazzjoni ġdida, lawrja Ewropea tippermetti lill-universitajiet: -jiġbru flimkien ir-riżorsi biex joffru opportunitajiet li ma setgħux joffru waħedhom; -ineħħu l-ostakli bla bżonn għat-twaqqif ta’ programm ta’ lawrja ma’ diversi universitajiet; -jinkorporaw il-perjodi ta’ tagħlim barra mill-pajjiż fil-kurrikuli; u -jiżguraw rikonoxximent awtomatiku madwar l-UE ta’ dawn il-kwalifiki.

Għall-Unjoni Ewropea u l-Istati Membri tagħha: L-istituzzjonijiet tal-edukazzjoni għolja huma strumentali fil-bini ta’ konnessjonijiet fl-Ewropa u mad-dinja u fil-promozzjoni tal-valuri u l-istil ta’ ħajja tal-Ewropej globalment. L-iffaċilitar tal-ħolqien ta’ aktar programmi ta’ lawrji konġunti jgħin biex jattira u jżomm aktar talent fl-Ewropa, u fir-reġjuni Ewropej fit-nases tal-iżvilupp tat-talenti, filwaqt li jappoġġja l-kooperazzjoni mal-universitajiet u s-sistemi madwar id-dinja kollha. Lawrja Ewropea: -issaħħaħ is-sens ta’ identità u appartenenza Ewropea; -issaħħaħ il-kompetittività u r-reputazzjoni globali tas-sistemi tal-edukazzjoni għolja Ewropej, li tippermettilhom jibnu offerti edukattivi konġunti aktar kompetittivi, filwaqt li jattiraw aktar talent minn pajjiżi mhux tal-UE; -trawwem mobbiltà bbilanċjata tal-istudenti u tat-talenti fl-UE u lil hinn minnha; u -trawwem spirtu Ewropew ta’ kooperazzjoni fiż-Żona Ewropea tal-Edukazzjoni.

4.It-tneħħija tal-ostakli għal lawrja Ewropea – l-isfidi li jridu jingħelbu

4.1.Rikkezza ta’ evidenza empirika

Għad hemm wisq ostakli fil-perkors lejn kooperazzjoni tranżnazzjonali bla problemi u aktar profonda fiż-Żona Ewropea tal-Edukazzjoni, kif diskuss fit-taqsima li ġejja. L-evidenza għal dan ħarġet wara aktar minn 3 snin ta’ konsultazzjonijiet mal-partijiet interessati tal-edukazzjoni għolja, u speċjalment mill-universitajiet involuti f’kooperazzjoni tranżnazzjonali profonda, bħall-alleanzi tal-Universitajiet Ewropej jew il-programmi tal-Masters Konġunti tal-Erasmus Mundus. Huma qed jappellaw għal soluzzjonijiet biex jingħelbu l-kumplessitajiet li jiffaċċjaw.

Ħafna minn dawn l-ostakli kienu diġà ġew identifikati fil-kuntest tar-Rakkomandazzjoni tal-Kunsill tal-2022 dwar il-bini ta’ konnessjonijiet għal kooperazzjoni effettiva Ewropea fl-edukazzjoni għolja 14 . Sforzi mġedda huma essenzjali biex isir progress fl-implimentazzjoni ta’ din ir-Rakkomandazzjoni tal-Kunsill. Barra minn hekk, għadhom qed jiġu identifikati aktar ostakli.

Dan jenfasizza l-ħtieġa li l-UE tiġi mgħammra b’lawrja Ewropea bħala qafas iddedikat u abilitanti biex jingħelbu l-ostakli.

Il-programm Erasmus+ 15 ilu jappoġġja proġetti ta’ esperimentazzjoni tal-politika li jinvolvu aktar minn 140 università u 60 awtorità nazzjonali u reġjonali inkarigati mill-akkreditazzjoni, mill-assigurazzjoni tal-kwalità u mir-regolamentazzjoni tal-edukazzjoni għolja mill-Istati Membri kollha, min-negozji, u mir-rappreżentanti tal-istudenti. Flimkien, huma mmappjaw aktar minn 1,000 programm konġunt u użaw dan ir-rikkezza ta’ għarfien u kompetenza esperta biex jesploraw il-kunċett ta’ lawrja Ewropea bħala tikketta, u bħala lawrja.

Permezz ta’ intervisti, stħarriġ ta’ eluf ta’ studenti u prattikanti, gruppi fokali, workshops u konsultazzjonijiet, il-proġetti wettqu riflessjoni minn isfel għal fuq dwar il-valur miżjud li lawrja Ewropea tista’ tipprovdi. Huma qiesu wkoll il-kriterji li jissodisfaw bl-aħjar mod in-natura tagħha u identifikaw l-ostakli ewlenin li jipprevjenu lill-programmi konġunti milli jilħqu l-potenzjal sħiħ tagħhom. Dawn l-ostakli jistgħu jinġabru kif ġej.

4.2.Leġiżlazzjoni u regolamenti diverġenti u kumplessi enfasizzati mill-proġetti ta’ esperimentazzjoni tal-politika ta’ Erasmus+

Is-sistemi nazzjonali tal-edukazzjoni u t-taħriġ u l-leġiżlazzjoni u r-regolamenti nazzjonali korrispondenti fil-biċċa l-kbira żviluppaw b’mod indipendenti, mingħajr ma tqiesu l-għażliet ta’ kooperazzjoni tranżnazzjonali. Dan iwassal għal disparitajiet li jipprevjenu lill-universitajiet milli jipprovdu programmi konġunti tranżnazzjonali u lawrji konġunti kompletament jew jagħmluha diffiċli ħafna.

Dawn l-ostakli jinkludu dawn li ġejjin:

-Regoli nazzjonali speċifiċi dwar il-forma ta’ eżamijiet finali, skali ta’ gradazzjoni u tagħbijiet ta’ xogħol applikati għal programmi konġunti jipprevjenu lill-universitajiet milli joffru programmi ta’ lawrja konġunti verament tranżnazzjonali u integrati u jimponu rekwiżiti addizzjonali artifiċjali fuq l-istudenti.

-Limitazzjonijiet għall-multilingwiżmu fi programmi ta’ lawrji konġunti. Biż-żieda fil-mobbiltà għat-tagħlim tal-lum, il-mudelli ta’ kooperazzjoni tranżnazzjonali għal programmi konġunti jiġu ffaċilitati billi titqies u tiġi indirizzata l-ħtieġa li jitneħħew l-ostakli għall-użu ta’ lingwi multipli fl-interess tal-istudenti, l-istituzzjonijiet, u s-suq tax-xogħol.

-Regoli preskrittivi dwar il-preżenza fiżika b’tul ta’ żmien minimu jew massimu impost. Dawn jirriflettu d-dinja qabel l-integrazzjoni Ewropea u t-trasformazzjoni diġitali u jaffettwaw b’mod negattiv il-mobbiltà tal-istudenti, u jillimitaw il-benefiċċji potenzjali tat-teknoloġiji diġitali għall-faċilitazzjoni tal-opportunitajiet ta’ tagħlim tranżnazzjonali.

-In-nuqqas ta’ rikonoxximent tat-tagħlim imħallat/online jipprevjeni l-użu sħiħ tal-potenzjal tal-għodod diġitali fl-edukazzjoni, inkluż li jitqiesu t-tagħlimiet meħuda mill-pandemija tal-COVID-19. L-universitajiet, il-persunal tagħhom, u l-istudenti jeħtieġ li jkunu jistgħu jibbenefikaw bis-sħiħ mit-trasformazzjoni diġitali.

-Limiti fuq il-parteċipazzjoni ta’ għalliema minn universitajiet sħab applikati għal programmi konġunti tranżnazzjonali jirrestrinġu b’mod artifiċjali l-aċċess ta’ università għal persunal b’esperjenza u jpoġġu limitu fuq il-prestazzjoni tagħha.

Dawn l-ostakli joħolqu sfidi għal kwalunkwe sħubija tranżnazzjonali. Ħafna minnhom imorru kontra l-idea ta’ Żona Ewropea tal-Edukazzjoni, li fiha l-istudenti jistgħu jiċċaqalqu liberament u jkollhom aċċess bla problemi għal edukazzjoni għolja inklużiva ta’ kwalità għolja.

L-għoti u l-kunsinna ta’ lawrji u diplomi lill-istudenti huma wkoll soġġetti għal regolamenti restrittivi, li jagħmlu dan kumpless ħafna. Dawn jinkludu restrizzjonijiet fuq il-lingwa, il-firem awtorizzati, il-formati tal-firma (diġitali jew fiżiċi), il-logos approvati, u rekwiżiti speċifiċi tal-karti (eż. id-dimensjonijiet, il-ħxuna, il-postijiet tal-istampar deżinjati). Il-proċess tal-għoti ta’ lawrja konġunta lil student jista’ jieħu s-snin, jekk ikun possibbli.

L-eżiti preliminari mill-proġetti ta’ esperimentazzjoni tal-politika tal-Erasmus+ juru b’mod ċar li lawrja Ewropea tista’ tkun mod kif jingħelbu dawn l-ostakli.

4.3.Implimentazzjoni irregolari u bil-mod tal-għodod tal-proċess ta’ Bolonja

Il-proċess intergovernattiv ta’ Bolonja, mibdi fl-1999 barra mill-qafas tal-UE, ifittex li jġib aktar konsistenza fis-sistemi tal-edukazzjoni għolja f’49 pajjiż, inklużi s-27 pajjiż tal-UE. Huwa stabilixxa ż-Żona Ewropea ta’ Edukazzjoni Għolja biex tiffaċilita l-mobbiltà tal-istudenti u tal-persunal, biex tagħmel l-edukazzjoni għolja aktar inklużiva u aċċessibbli, u biex tagħmilha aktar attraenti u kompetittiva madwar id-dinja. Il-proċess ta’ Bolonja huwa kruċjali biex tinbena l-fiduċja meħtieġa għal mobbiltà tat-tagħlim b’suċċess, kooperazzjoni akkademika transfruntiera u r-rikonoxximent reċiproku tal-perjodi ta’ studju u l-kwalifiki miksuba barra mill-pajjiż.

Filwaqt li l-proċess ta’ Bolonja jenfasizza l-importanza ta’ lawrji konġunti, il-progress kien bil-mod, parzjalment minħabba l-kamp ta’ applikazzjoni ġeografiku wiesa’ tiegħu u d-diversità tas-sistemi, it-tradizzjonijiet, il-kuntesti politiċi u ekonomiċi li jinkludi. B’riżultat ta’ dan, mhux l-Istati Membri kollha implimentaw ir-riformi meħtieġa, li wasslu għal ineffiċjenzi fil-kooperazzjoni fost id-49 pajjiż.

Minkejja l-ħolqien tal-approċċ Ewropew għall-assigurazzjoni tal-kwalità tal-programmi konġunti - strument pan-Ewropew li jippermetti evalwazzjoni ta’ darba biss tal-programmi konġunti – kienu ftit il-programmi li għamlu użu minn dan l-istrument f’dawn l-aħħar disa’ snin.

Xi strumenti tal-proċess ta’ Bolonja, b’mod partikolari fir-rigward tal-assigurazzjoni tal-kwalità u r-rikonoxximent, għad ma kellhomx ir-riżultati maħsuba. Fl-UE, mekkaniżmi stabbiliti għat-teħid ta’ deċiżjonijiet u l-implimentazzjoni ta’ kooperazzjoni tranżnazzjonali, jistgħu jkomplu jiffaċilitaw ir-realizzazzjoni ta’ Żona Ewropea tal-Edukazzjoni, b’soluzzjonijiet effettivi li jippermettu lill-universitajiet jikkooperaw b’mod effiċjenti bl-għajnuna ta’ lawrji fdati u ta’ valur għoli.

4.4.Is-sistemi ta’ assigurazzjoni u rikonoxximent tal-kwalità fl-edukazzjoni għolja għandhom jittejbu aktar

Kwalunkwe programm, konġunt jew mod ieħor, jeħtieġ li jiġi akkreditat permezz ta’ proċess robust ta’ assigurazzjoni tal-kwalità sabiex iwassal għal lawrja. Dan huwa importanti biex tiġi żgurata l-fiduċja meħtieġa fil-kwalità tal-provvista.

Ħafna istituzzjonijiet tal-edukazzjoni għolja fl-Ewropa jindikaw li l-proċessi tal-assigurazzjoni tal-kwalità għall-programmi tranżnazzjonali huma wisq twal u għaljin. Aktar ma jkunu involuti universitajiet minn pajjiżi differenti fi programm konġunt, aktar ikun kumpless il-proċess. Xi drabi, jista’ jieħu sa sentejn sabiex tinkiseb akkreditazzjoni. Proċeduri twal ma jippermettux lill-universitajiet jaġġustaw għar-realtajiet li qed jinbidlu u jirrispondu malajr għal ħtiġijiet politiċi, ekonomiċi jew soċjetali emerġenti.

Ir-rikonoxximent tal-kwalifiki u l-perjodi ta’ tagħlim barra mill-pajjiż għadu mhuwiex awtomatiku f’kull pajjiż, speċjalment fejn id-deċiżjoni tittieħed fil-livell ta’ istituzzjoni tal-edukazzjoni għolja. Dan iżid piż konsiderevoli għall-gradwati universitarji u jillimita l-kapaċità tagħhom li jiċċaqilqu liberament għal skopijiet ta’ tagħlim u professjonali.

Essenzjalment, filwaqt li l-assigurazzjoni tal-kwalità hija kruċjali biex tiġi żgurata l-fiduċja fis-sistema edukattiva, ħafna mid-disparitajiet huma skaduti u mhux adatti għall-iskop tagħhom, u dan joħloq burokrazija żejda.

4.5.Diżinċentivi għall-persunal biex jinvolvi ruħu f’kooperazzjoni tranżnazzjonali u lawrji konġunti

L-iżvilupp ta’ programm għal lawrja konġunta ta’ kwalità jeħtieġ żmien u sforz mill-persunal akkademiku. L-iżvilupp ta’ proġetti tranżnazzjonali ġodda jeħtieġ persunal dedikat b’ħiliet speċifiċi - u minħabba l-kwistjonijiet u l-ostakli speċifiċi, għandu t-tendenza li jkun impjieg full-time. Madankollu, l-esperjenza bi programmi tranżnazzjonali turi li hemm riskju: il-kooperazzjoni tranżnazzjonali għandha konsegwenza għan-nies li jinvolvu ruħhom fiha, peress li xogħolhom mhux dejjem jiġi rikonoxxut bl-apprezzament li jistħoqqlu. Barra minn hekk, il-persunal jeħtieġ żvilupp professjonali kontinwu biex isostni l-kwalità għolja ta’ dawn il-programmi pedagoġiċi transdixxiplinari.

Fi stħarriġ iddedikat 16 , 66 % tar-rispondenti mis-settur tal-edukazzjoni għolja qablu li l-kooperazzjoni tranżnazzjonali hija parti mill-istrateġija istituzzjonali tal-edukazzjoni għolja tagħhom, iżda 39 % biss jaqblu li l-perkorsi tal-karriera għall-persunal akkademiku jippermettu, jappoġġjaw u jinkoraġġixxu b’mod effettiv l-attivitajiet ta’ kooperazzjoni tranżnazzjonali. Dan huwa konformi mal-isfidi identifikati minn stħarriġiet preċedenti, inkluż “l-ammont ta’ xogħol addizzjonali minbarra dak normali” (80 % tar-rispondenti), u “l-kisba u s-sostenn tal-impenn tal-persunal akkademiku” (72 %).

5.Kif negħlbu dawn l-ostakli – passi speċifiċi lejn il-lawrja Ewropea

Il-lawrja Ewropea tipprovdi mod aġli biex jingħelbu dawn l-ostakli billi s-sistemi nazzjonali tal-edukazzjoni għolja fl-UE jiġu mgħammra bil-mezzi biex jiżviluppaw, jivvalutaw u jagħtu lawrji konġunti bbażati fuq kriterji Ewropej maqbula b’mod komuni li jmorru lil hinn mill-fruntieri nazzjonali jew reġjonali. Din toffri soluzzjoni komprensiva biex tittejjeb il-kooperazzjoni tranżnazzjonali bla problemi u aktar profonda fiż-Żona Ewropea tal-Edukazzjoni u tgħin biex jiġu indirizzati n-nuqqasijiet strateġiċi ta’ ħiliet tal-UE.

Iż-żewġ proposti għal Rakkomandazzjonijiet tal-Kunsill li jakkumpanjaw din il-Komunikazzjoni se jiżguraw ukoll li lawrja Ewropea tkun tista’ sserraħ fuq assigurazzjoni tal-kwalità u sistemi ta’ rikonoxximent adatti għall-iskop tagħhom, bi prospetti ta’ karriera attraenti għall-akkademiċi involuti fiha. F’kull pass, l-istat ta’ tħejjija u l-involviment tal-Istati Membri u, fejn rilevanti, tal-gvernijiet reġjonali ser jiddeterminaw is-suċċess tagħha.

5.1.Nagħmlu l-Ewropa bażi ta’ talent għall-innovazzjoni u l-kompetittività

5.1.1.Id-definizzjoni ta’ kriterji Ewropej komuni għal lawrja Ewropea

L-istituzzjonijiet tal-edukazzjoni għolja jkunu jistgħu jagħtu l-lawrja Ewropea abbażi ta’ valutazzjoni mill-istrutturi nazzjonali eżistenti kompetenti dwar jekk il-programm konġunt jissodisfax b’mod ċar kriterji Ewropej definiti u maqbula b’mod komuni. Il-kontenut ta’ dawn il-kriterji jifforma l-bażi tal-lawrja Ewropea u jiddetermina l-livell ta’ ambizzjoni tagħha, filwaqt li jistabbilixxi għal dak li tirrappreżenta u għaliex hija differenti minn lawrji mogħtija f’partijiet oħra tad-dinja.

Il-kriterji Ewropej proposti huma stabbiliti fl-Anness II għall-proposta għal rakkomandazzjoni tal-Kunsill dwar sistema Ewropea ta’ assigurazzjoni u rikonoxximent tal-kwalità fl-edukazzjoni għolja.

Il-kriterji proposti għal lawrja Ewropea huma: -l-eċċellenza tal-organizzazzjoni u l-ġestjoni tal-programm transnazzjonali: programmi konġunti jinbnew fuq l-għodda u l-istandards ta’ Bolonja u l-UE, jitfasslu b’mod konġunt u jitwasslu, abbażi ta’ akkordji dwar il-garanzija tal-kwalità. -ir-rilevanza tal-esperjenza tat-tagħlim: programmi konġunti ffukati fuq l-istudenti, li jinkludu opportunitajiet ta’ rilevanza fis-suq tax-xogħol, komponenti interdixxiplinarji, il-mobilità tal-istudenti, u l-akkwiżizzjoni ta’ ħiliet diġitali u oriżżontali. -l-aderenza mal-valuri Ewropej: programmi konġunti jippromwovu d-demokrazija, il-multilingwiżmu, l-inklużività u s-sostenibbiltà ambjentali.

Dawn għandhom l-għan li jrawmu l-iżvilupp ta’ aktar programmi konġunti f’konformità mal-viżjoni stabbilita fl-istrateġija Ewropea għall-universitajiet, b’mod partikolari f’dak li għandu x’jaqsam mal-iffaċilitar tal-iżvilupp ta’ studenti bħala ħassieba kreattivi u kritiċi, persuni li jsolvu l-problemi, ċittadini attivi u responsabbli, involuti bħala atturi tal-bidla fil-komunità tagħhom biex ikollhom impatt pożittiv fuq is-soċjetà ta’ madwarhom.

Billi jistabbilixxu standards impenjattivi, il-kriterji Ewropej jsejsu l-eċċellenza tal-kooperazzjoni tranżnazzjonali bejn l-istituzzjonijiet, l-għoti ta’ esperjenza ta’ tagħlim tranżnazzjonali, it-tagħlim u l-apprendiment iffukati fuq l-istudenti (inkluż xi provvista ta’ interdixxiplinarjetà, mobbiltà u approċċi ċċentrati fuq l-istudenti), ir-rilevanza għas-suq tax-xogħol u għall-ħtiġijiet tas-soċjetà (kooperazzjoni man-negozji, is-settur pubbliku u s-soċjetà ċivili, il-forniment ta’ ħiliet trażversali, ekoloġiċi u diġitali), u r-rispett għall-valuri komuni (il-multilingwiżmu, l-inklużività, il-valuri demokratiċi). Peress li ma tistax tinstab soluzzjoni waħda għal kulħadd, il-kriterji Ewropej huma flessibbli biżżejjed biex il-lawrja Ewropew tkun aċċessibbli għat-tipi kollha ta’ universitajiet, l-oqsma u d-dixxiplini kollha u fil-livelli kollha, filwaqt li tirrispetta d-diversità tat-tradizzjonijiet u s-sistemi akkademiċi.

Il-kriterji Ewropej proposti jibnu fuq l-użu tal-għodod eżistenti żviluppati fl-UE u fil-proċess ta’ Bolonja u jiżguraw li l-lawrja Ewropea tilħaq l-ogħla standards fil-kooperazzjoni fl-edukazzjoni għolja. Dawn joffru qafas biex l-universitajiet jaħdmu flimkien sabiex jindirizzaw in-nuqqas ta’ ħiliet strateġiċi fis-suq tax-xogħol Ewropew. Huma jirrispettaw is-sussidjarjetà, l-awtonomija istituzzjonali u l-libertà akkademika.

Peress li l-Ewropa għandha xenarju divers tal-edukazzjoni għolja, bi sfondi u tradizzjonijiet storiċi differenti, hemm bżonn riflessjoni komuni u sforz kollettiv biex ikun hemm fehim komuni tal-essenza ta’ lawrja Ewropea.

Dan il-proċess ta’ riflessjoni beda eżatt wara l-adozzjoni tal-konklużjonijiet tal-Kunsill dwar strateġija Ewropea li ssaħħaħ l-istituzzjonijiet tal-edukazzjoni għolja għall-futur tal-Ewropa f’April 2022 17 . L-abbozz preliminari tal-kriterji ġie żviluppat b’mod konġunt mal-awtoritajiet nazzjonali u reġjonali, l-istituzzjonijiet tal-edukazzjoni għolja, l-aġenziji tal-akkreditazzjoni u tal-assigurazzjoni tal-kwalità, l-organizzazzjonijiet tal-istudenti, u r-rappreżentanti mis-setturi pubbliċi u privati.

Ladarba ġew definiti, dawn ġew ittestjati minn sitt proġetti ta’ esperimentazzjoni tal-politika tal-Erasmus+. L-ittestjar involva aktar minn 140 istituzzjoni tal-edukazzjoni għolja madwar l-Istati Membri kollha, 60 awtorità nazzjonali u reġjonali li involvew 17-il ministeru u 20 aġenzija nazzjonali tal-assigurazzjoni tal-kwalità, organizzazzjonijiet tal-istudenti u sħab ekonomiċi u soċjali. B’riżultat ta’ dan, il-proġetti pilota pproponew reviżjoni tal-kriterji. Il-kriterji Ewropej proposti kif stabbiliti fl-Anness II għall-proposta għal rakkomandazzjoni tal-Kunsill dwar sistema Ewropea ta’ assigurazzjoni u rikonoxximent tal-kwalità fl-edukazzjoni għolja huma r-riżultati ta’ din ir-reviżjoni.

Bħala l-pass li jmiss, il-Kunsill tal-UE huwa mistenni li jmexxi ’l quddiem din il-proposta.

Il-kriterji ttestjati se jkunu l-bażi għal diskussjonijiet u djalogu profondi mal-Istati Membri, is-settur tal-edukazzjoni għolja, is-sħab ekonomiċi u soċjali biex jimxu ’l quddiem fil-passi li jmiss bil-ħolqien ta’ lawrja Ewropea u jipprovdu aktar gwida ulterjuri dwar l-implimentazzjoni tagħhom.

5.1.2.L-Istati Membri jridu jagħżlu l-livell ta’ dħul tagħhom fil-perkors lejn lawrja Ewropea

Minħabba l-punti tat-tluq, il-fehmiet u t-tradizzjonijiet rispettivi tal-Istati Membri, li inevitabbilment se jvarjaw, l-iżvilupp tal-lawrja Ewropea ma jistax iseħħ mil-lum għall-għada. Ma tistax tinkiseb lanqas abbażi ta’ approċċ “wieħed tajjeb għal kulħadd”.

Din il-Komunikazzjoni tistabbilixxi approċċ gradwali u livell aħħari ta’ ambizzjoni għall-Istati Membri li jagħżlu li jibdew il-perkors lejn il-lawrja Ewropea. Dan l-approċċ iħaddan id-diversità fost l-Istati Membri u l-istituzzjonijiet tal-edukazzjoni għolja tagħhom, u jippermettilhom jipproċedu lejn il-lawrja Ewropea bil-pass li jagħżlu huma. L-Istati Membri jistgħu jimxu ’l quddiem, pass pass, lejn għan definit b’mod komuni b’żewġ punti ta’ dħul: lawrja Ewropea u tikketta Ewropea preparatorja li tindika li l-kriterji Ewropej ġew issodisfati.

Kwalunkwe konsorzju ta’ istituzzjonijiet tal-edukazzjoni għolja jkun jista’, jekk ikunu jridu, isibu l-punt tat-tluq it-tajjeb u jimxu lejn perkors dejjem aktar integrat maż-żmien.

Jistgħu jintużaw żewġ punti tad-dħul differenti fil-perkors lejn lawrja Ewropea:

5.1.3.Sistemi ta’ assigurazzjoni tal-kwalità adattati għall-iskop

Is-sistemi ta’ assigurazzjoni tal-kwalità huma kundizzjonijiet meħtieġa għar-responsabbiltà u għat-titjib tal-prestazzjonijiet tal-universitajiet. Huma jibnu l-pedament għall-fiduċja fil-kwalità tal-edukazzjoni għolja li tingħata lill-istudenti. Lawrja Ewropea, aktar minn kwalunkwe tip ieħor ta’ lawrja, tkun tiddependi fuq il-fiduċja reċiproka u sistemi kredibbli ta’ assigurazzjoni tal-kwalità. Huwa għalhekk li l-bini ta’ sistemi ta’ assigurazzjoni tal-kwalità adattati għall-iskop tagħhom huwa prekundizzjoni għar-realizzazzjoni ta’ lawrja Ewropea, filwaqt li jkollu wkoll benefiċċji għall-programmi kollha, inklużi dawk li jwasslu għal mikrokredenzjali, u jippermetti aktar ir-rikonoxximent awtomatiku tal-kwalifiki. Għal dan, l-Istati Membri jkollhom:

·jibnu proċessi ta’ assigurazzjoni tal-kwalità aktar b’saħħithom, aktar effettivi u aktar sempliċi għat-tipi kollha ta’ programmi;

·jistabbilixxu qafas Ewropew ġdid għal approċċ estern ibbażat fuq istituzzjonijiet multipli għall-assigurazzjoni tal-kwalità li jippermetti li alleanzi sostenibbli tal-istituzzjonijiet tal-edukazzjoni għolja jakkreditaw għalihom infushom il-programmi ta’ lawrji konġunti u l-mikrokredenzjali konġunti tagħhom, li jibnu fuq l-eżiti tal-proġetti tal-Erasmus+, l-QA fit 18 u l-IMINQA 19 ; u

·jużaw proċessi xierqa ta’ assigurazzjoni tal-kwalità biex jakkumpanjaw lill-istituzzjonijiet tal-edukazzjoni għolja fl-implimentazzjoni tar-rikonoxximent awtomatiku tal-kwalifiki u tal-perjodi ta’ tagħlim barra mill-pajjiż.

5.1.4.Karrieri akkademiċi aktar attraenti fl-edukazzjoni għolja

Fl-ekonomija globali tal-għarfien, il-futur tal-Ewropa se jissawwar mill-prestazzjoni tas-sistemi edukattivi tagħha u l-kompetittività fit-tellieqa globali għat-talent. It-twettiq ta’ din il-viżjoni ambizzjuża ta’ lawrja Ewropea se jiddependi fuq akkademiċi eċċellenti biex jgħallmu u jgħammru lill-gradwati bil-ħiliet it-tajba. Mhux se nkunu nistgħu nibnu programmi tranżnazzjonali eċċellenti mingħajr ma nipprovdu inċentivi għal persuni eċċellenti biex jinvolvu ruħhom f’dan l-isforz. Huwa għalhekk li meta l-karrieri akkademiċi fl-edukazzjoni għolja jsiru aktar attraenti, dawn ikunu fattur abilitanti ewlieni għal lawrja Ewropea. Għal dan, l-Istati Membri jkollhom:

·jippromwovu, jirrikonoxxu u japprezzaw aħjar il-ħidma tal-akkademiċi li jibnu kooperazzjoni tranżnazzjonali profonda, bħall-iżvilupp ta’ programmi konġunti ta’ lawrji;

·jippromwovu, jirrikonoxxu u japprezzaw aħjar ir-rwoli u l-kompiti akkademiċi diversi, inkluż tagħlim innovattiv u effettiv; u

·jippromwovu kundizzjonijiet tax-xogħol kompetittivi, sikuri, ġusti u mhux diskriminatorji biex jattiraw u jżommu l-persunal.

5.2.Il-Kummissjoni se taġixxi bħala faċilitatur u sostenitur

Filwaqt li tibni fuq bażi wiesgħa ta’ evidenza empirika, l-għan ta’ din il-Komunikazzjoni huwa li tipprovdi viżjoni dwar perkorsi possibbli biex il-lawrja Ewropea ssir realtà. Tfittex ukoll li tikkontribwixxi għal djalogu miftuħ mal-Istati Membri, mal-partijiet interessati tal-edukazzjoni għolja, u mas-sħab ekonomiċi u soċjali dwar il-passi li jmiss. Il-Kummissjoni se tiffaċilita u tappoġġja lill-Istati Membri bl-azzjonijiet li ġejjin.

5.2.1.Tiffaċilita djalogu dwar ir-riżultati u r-rakkomandazzjonijiet tal-esperimentazzjonijiet tal-politika tal-Erasmus+ fuq tikketta ta’ lawrja Ewropea u status legali għall-alleanzi tal-istituzzjonijiet tal-edukazzjoni għolja

Il-Kummissjoni se tippubblika rapport fil-ħarifa tal-2024 dwar l-eżiti finali tal-proġetti ta’ esperimentazzjoni tal-politika tal-Erasmus+.

Wara dan, fl-2025, qed tippjana li tistabbilixxi “laboratorju tal-politika dwar il-lawrja Ewropea”. Se titnieda sensiela ta’ diskussjonijiet fil-fond iddedikati u sessjonijiet iffukati, li jinvolvu esperti mill-Istati Membri, istituzzjonijiet tal-edukazzjoni għolja, aġenziji tal-assigurazzjoni/akkreditazzjoni tal-kwalità, rappreżentanti tal-istudenti, u sħab ekonomiċi u soċjali, bl-għan li titħaffef l-azzjoni u kwalunkwe riforma nazzjonali meħtieġa, u jiġu żviluppati linji gwida ta’ implimentazzjoni u pjanijiet ta’ azzjoni. L-għan tagħha jkun dak li trawwem it-tagħlim bejn il-pari u tipprovdi gwida dwar il-mixja lejn lawrja Ewropea.

5.2.2.Inċentivi ta’ finanzjament Ewropej

Il-programm Erasmus+ se jkompli joffri appoġġ lill-alleanzi tal-Universitajiet Ewropej, lill-Master Konġunt tal-Erasmus Mundus, lill-Programmi ta’ Dottorat Konġunti Marie Skłodowska-Curie (MSCA), u lill-programmi bit-tikketta tal-Istitut Ewropew tal-Innovazzjoni u t-Teknoloġija (EIT) li jaġixxu bħala pijunieri biex jimplimentaw il-lawrji Ewropej. Barra minn hekk, l-Erasmus+ se jappoġġja t-tfassil u l-adozzjoni ta’ lawrji Ewropej permezz ta’ appoġġ iddedikat, filwaqt li jibni fuq l-eżempju ta’ suċċess tal-Miżuri ta’ Disinn tal-Erasmus Mundus.

Fl-2025, il-Kummissjoni qed tippjana li tniedi “proġetti ta’ perkors għal-lawrja Ewropea” bħala parti mill-azzjoni ta’ proġetti ta’ kooperazzjoni li tħares ’l quddiem fi ħdan l-Erasmus+. Dan se jipprovdi inċentivi finanzjarji għall-Istati Membri, flimkien mal-aġenziji tal-akkreditazzjoni u tal-assigurazzjoni tal-kwalità tagħhom, l-universitajiet, l-istudenti, is-sħab ekonomiċi u soċjali, biex jinvolvu ruħhom fil-perkors lejn lawrja Ewropea.

L-Istrument ta’ Appoġġ Tekniku 21 jista’ jipprovdi wkoll għarfien espert tekniku għat-tfassil u l-implimentazzjoni tar-riformi meħtieġa bi gwida u appoġġ biex jittejbu l-oqfsa legali u amministrattivi, titrawwem il-kooperazzjoni bejn l-universitajiet, ir-riċerka u n-negozji, jittejbu l-mekkaniżmi ta’ assigurazzjoni tal-kwalità u l-attraenza tal-karrieri fl-edukazzjoni għolja.

5.2.3. Tappoġġja u taċċellera l-implimentazzjoni tar-Rakkomandazzjoni tal-Kunsill dwar il-bini ta’ pontijiet għal kooperazzjoni effettiva Ewropea fl-edukazzjoni għolja

L-adozzjoni sħiħa tar-Rakkomandazzjoni tal-Kunsill dwar il-bini ta’ pontijiet għal kooperazzjoni effettiva Ewropea fl-edukazzjoni għolja, adottata f’April 2022, tiffaċilita b’mod konsiderevoli l-perkors lejn lawrja Ewropea. Ir-rapport dwar l-implimentazzjoni tagħha, li għandu jiġi ppubblikat sa nofs l-2024, u li sommarju tiegħu huwa pprovdut fid-dokument ta’ ħidma tal-persunal li jakkumpanjah, juri d-diversità tax-xenarju Ewropew tal-edukazzjoni għolja f’termini ta’ miżuri li jippermettu kooperazzjoni tranżnazzjonali aktar profonda, bi progress irregolari f’dan il-qasam. Filwaqt li xi Stati Membri jidhru li qed jimplimentaw il-prinċipji differenti tar-Rakkomandazzjoni, u diġà bdew iwettqu riformi, pajjiżi oħra rrapportaw progress aktar bil-mod.

Abbażi tal-eżiti tar-rapport, il-Kummissjoni qed tipproponi li torganizza sensiela ta’ attivitajiet ta’ tagħlim bejn il-pari bejn l-Istati Membri mill-ħarifa tal-2024 biex tapprofondixxi d-diskussjoni dwar l-indirizzar tal-ostakli amministrattivi sabiex jitħaffef il-progress fl-implimentazzjoni tar-Rakkomandazzjoni.

5.2.4.Appoġġ għall-implimentazzjoni tar-rakkomandazzjoni futura tal-Kunsill dwar l-Assigurazzjoni tal-Kwalità u r-rikonoxximent

Biex lawrja Ewropea ssir realtà jeħtieġ approċċ volontarju li joffri lis-sistemi kollha tal-edukazzjoni għolja mod kif jibdew dan il-vjaġġ, ikun xi jkun il-punt tat-tluq tagħhom stess. Dan jirrikjedi wkoll l-involviment attiv tal-istudenti u l-mexxejja istituzzjonali biex jinħoloq ambjent favorevoli għall-universitajiet biex jistabbilixxu lawrji Ewropej, filwaqt li jiġi żgurat li dawn ikunu ffukati fuq l-istudenti, immexxija strateġikament, u allinjati mal-aħjar prattiki fiż-Żona Ewropea tal-Edukazzjoni. Fil-proposta tagħha għal rakkomandazzjoni tal-Kunsill dwar sistema Ewropea ta’ assigurazzjoni u rikonoxximent tal-kwalità fl-edukazzjoni għolja, il-Kummissjoni qed tipproponi:

·it-twaqqif ta’ laboratorju tal-politika dwar il-lawrja Ewropea: minbarra li jipprovdi gwida u pjanijiet ta’ azzjoni konkreti dwar il-mixja lejn lawrja Ewropea (ara t-taqsima 5.2.1), jiżviluppa wkoll linji gwida dwar l-implimentazzjoni ta’ qafas ta’ assigurazzjoni tal-kwalità tranżistituzzjonali tal-alleanzi tal-istituzzjonijiet tal-edukazzjoni għolja;

·l-istabbiliment ta’ “forum dwar il-lawrja Ewropea” bħala avveniment annwali, organizzat mill-Kummissjoni, f’kooperazzjoni mal-Presidenza tal-Kunsill, biex il-partijiet interessati kollha jiltaqgħu u jieħdu kont tal-progress ġenerali li jkun sar lejn lawrja Ewropea, inkluż permezz tal-laboratorju tal-politika dwar il-lawrja Ewropea. Il-Forum ikun jinkludi rappreżentanti ta’ livell għoli mill-Istati Membri u r-reġjuni, l-organizzazzjonijiet tal-partijiet interessati l-aktar rappreżentattivi fl-assigurazzjoni tal-kwalità (eż. ENQA, EQAR), in-network ta’ Ċentri Nazzjonali ta’ Informazzjoni dwar ir-Rikonoxximent Akkademiku (NARIC), l-oqfsa nazzjonali tal-kwalifiki, is-sħab soċjali tal-edukazzjoni u r-rappreżentanti mis-sħab ekonomiċi u soċjali;

·l-iżvilupp ulterjuri tal-bażi tad-data tar-riżultati tal-assigurazzjoni tal-kwalità esterna (DEQAR) 22 biex issir aktar faċli għall-utent u biex tintrabat direttament mar-rikonoxximent awtomatiku tal-kwalifiki;

·tkompli tappoġġja l-implimentazzjoni tas-sistema Ewropea ta’ monitoraġġ tal-gradwati 23 biex ittejjeb il-kwalità u r-rilevanza tal-edukazzjoni għolja billi tipprovdi feedback dwar l-eżiti tal-gradwati, kif ukoll ittejjeb it-tqabbil u l-valutazzjoni komparattiva bejn il-pajjiżi u l-istituzzjonijiet.

5.2.5.Appoġġ għall-implimentazzjoni tar-rakkomandazzjoni tal-Kunsill dwar karrieri attraenti u sostenibbli fl-edukazzjoni għolja

Kooperazzjoni tranżnazzjonali effettiva u innovattiva fl-edukazzjoni għolja teħtieġ l-impenn ta’ persunal akkademiku ta’ kwalità għolja li jista’ jinvolvi ruħu fi sħubijiet profondi fit-tul ma’ pari minn istituzzjonijiet oħra. Fil-proposta tagħha għal rakkomandazzjoni tal-Kunsill dwar karrieri attraenti u sostenibbli fl-edukazzjoni għolja, il-Kummissjoni qed tipproponi li:

·tħejji linji gwida dwar prattika tajba f’karrieri fl-edukazzjoni għolja u politiki dwar il-persunal, kif ukoll qafas ta’ kompetenza għall-persunal akkademiku, li jibni fuq oqfsa ta’ kompetenza rilevanti eżistenti fil-livell tal-Unjoni, bħall-Qafas Ewropew ta’ Kompetenzi għar-Riċerkaturi;

·tappoġġja l-organizzazzjoni ta’ djalogu soċjali ddedikat;

·timmonitorja l-elementi ewlenin tar-Rakkomandazzjoni permezz tal-Osservatorju Ewropew tas-Settur tal-Edukazzjoni Għolja 24 ;

·trawwem sinerġiji mar-Rakkomandazzjoni tal-Kunsill dwar l-istabbiliment ta’ Qafas Ewropew biex jiġu attirati u miżmuma t-talenti fir-riċerka, l-innovazzjoni u l-intraprenditorija fl-Ewropa, żviluppati fil-kuntest taż-Żona Ewropea tar-Riċerka u applikabbli għall-karrieri fir-riċerka fis-setturi kollha, inkluża l-akkademja;

·tiffaċilita t-tagħlim bejn il-pari fost l-Istati Membri, l-istituzzjonijiet tal-edukazzjoni għolja, il-prattikanti tal-Erasmus Mundus u l-alleanzi tal-Universitajiet Ewropej dwar ir-rikonoxximent xieraq tal-persunal akkademiku involut fil-kooperazzjoni u t-tagħlim tranżnazzjonali; prospettivi ta’ karriera sostenibbli; u miżuri ta’ ġestjoni tat-talenti għall-persunal involut fil-koordinazzjoni u l-iżvilupp ta’ alleanzi sostenibbli, bħall-alleanzi tal-Universitajiet Ewropej.

5.2.6.Sinerġiji ma’ azzjonijiet relatati oħra

Il-Kummissjoni hija impenjata li tiżgura sinerġiji ma’ azzjonijiet u politiki rilevanti oħra biex tappoġġja perkors bla xkiel u ta’ suċċess lejn lawrja Ewropea. Għal dan l-għan, hemm ippjanat li:

·tkompli tappoġġja l-implimentazzjoni tal-istrumenti tal-proċess ta’ Bolonja u n-network taċ-Ċentru Nazzjonali ta’ Informazzjoni dwar ir-Rikonoxximent Akkademiku (NARIC), permezz ta’ “timijiet ta’ appoġġ għall-aċċellerazzjoni”, iffinanzjati mill-programm Erasmus+, biex jiġi żgurat progress aktar rapidu fir-rikonoxximent awtomatiku tal-kwalifiki;

·tkompli tippromwovi l-opportunitajiet biex jintużaw il-programmi ta’ tagħlim, il-kontenut u l-materjali prodotti mill-Akkademji Ewropej tal-Industrija b’Emissjonijiet Żero Netti għal lawrji konġunti mmirati lejn in-nuqqas ta’ ħiliet għat-tranżizzjoni ekoloġika u l-industriji tat-teknoloġiji b’emissjonijiet żero netti;

·tesplora sinerġiji u rabtiet bejn id-Direttiva li tistabbilixxi qafas tal-UE dwar ir-rikonoxximent tal-kwalifiki għall-aċċess għall-professjonijiet regolati 25 u l-lawrja Ewropea; u

·tiżgura l-konsistenza u s-sinerġiji bejn il-lawrja Ewropea u l-ħidma ulterjuri fuq il-Qafas Ewropew tal-Kwalifiki 26 , il-pjattaforma multilingwi tal-Europass 27 , il-kredenzjali diġitali Ewropej għat-tagħlim 28 u l-klassifikazzjoni Ewropea ta’ ħiliet, kompetenzi, kwalifiki u impjiegi (ESCO) 29 .

5.2.7.Tieħu kont tal-progress f’kooperazzjoni mill-qrib mal-Istati Membri u l-partijiet interessati

Abbażi tal-progress miksub u l-valutazzjoni tal-idoneità għall-fini taż-żewġ punti tad-dħul għal lawrja Ewropea, il-Kummissjoni qed tippjana li tniedi aktar ħidma orjentata lejn il-futur, inkluż biex:

·tirrevedi l-progress fl-Istati Membri lejn lawrja Ewropea, flimkien mal-laboratorju tal-politika dwar il-lawrja Ewropea u l-forum dwar il-lawrja Ewropea;

·taħdem mal-Istati Membri biex tieħu passi ulterjuri lejn l-istabbiliment ta’ status legali għall-alleanzi tal-istituzzjonijiet tal-edukazzjoni għolja 30 .

Azzjoni: Il-Kummissjoni qed tippjana li tevalwa l-progress, f’kooperazzjoni mal-Istati Membri u l-partijiet interessati, f’kull pass lejn l-istabbiliment ta’ lawrja Ewropea. Il-Kummissjoni tistieden lill-Istati Membri biex jaħdmu lejn lawrja Ewropea billi jagħmlu użu mill-appoġġ ipprovdut permezz tal-istrumenti tal-UE u t-tagħlim bejn il-pari, biex jinvolvu ruħhom fir-riformi meħtieġa.

5.2.8.Monitoraġġ u appoġġ għar-riformi

Il-Kummissjoni hija impenjata ħafna li tiżgura appoġġ kontinwu lill-Istati Membri fil-perkors tagħhom lejn riformi effettivi li jwasslu għal lawrja Ewropea u tħeġġiġhom jieħdu passi biex jimmassimizzaw l-użu tal-baġit tal-UE u biex jisfruttaw bis-sħiħ l-appoġġ ta’ strumenti ta’ finanzjament tal-UE xierqa u eżistenti. Barra minn hekk, il-Kummissjoni tfakkar lill-Istati Membri dwar ir-rilevanza u l-importanza kbira tal-Monitor tal-Edukazzjoni u t-Taħriġ u l-proċess tas-Semestru Ewropew fl-appoġġ u l-aċċellerazzjoni tal-pass tar-riformi nazzjonali.

Fir-rigward tal-appoġġ futur lil hinn mill-2027, il-Kummissjoni tfakkar li l-proposta tagħha għall-Qafas Finanzjarju Pluriennali li jmiss u l-eżitu relatat tan-negozjati ma jistgħux jiġu ppreġudikati f’dan l-istadju.

Azzjoni: Il-Kummissjoni qed tippjana li tappoġġja lill-Istati Membri fir-riformi tagħhom lejn lawrja Ewropea u tistedinhom jagħmlu użu mill-istrumenti xierqa tal-UE biex jinvolvu ruħhom fir-riformi meħtieġa.

6.Konklużjoni

B’din il-Komunikazzjoni dwar pjan ta’ azzjoni lejn lawrja Ewropea, il-Kummissjoni tistieden lill-Istati Membri, lill-gvernijiet reġjonali kompetenti u lill-komunitajiet tal-edukazzjoni għolja tagħhom biex jingħaqdu flimkien għall-benefiċċju tal-istudenti, l-impjegaturi, l-universitajiet u l-Unjoni Ewropea kollha kemm hi.

Il-lawrja Ewropea hija maħsuba bħala soluzzjoni volontarja u flessibbli biex jingħelbu l-ostakli eżistenti li jipprevjenu liż-Żona Ewropea tal-Edukazzjoni milli tilħaq il-potenzjal sħiħ tagħha. L-approċċ fi stadji se jippermetti lis-sistemi edukattivi kollha, b’rispett sħiħ tad-diversità tagħhom, jagħżlu l-punt tad-dħul tagħhom fil-perkors lejn lawrja Ewropea. L-Istati Membri se jkunu f’pożizzjoni ta’ tmexxija u javvanzaw bil-pass tagħhom stess b’appoġġ mill-Kummissjoni biex jiffaċilitaw id-djalogu u t-tagħlim bejn il-pari, jipprovdu inċentivi u jesploraw sinerġiji ma’ inizjattivi oħra.

Bħalma l-Erasmus+ kellu effetti kollaterali fil-ħolqien ta’ aktar opportunitajiet ta’ skambju u ambjent ta’ tagħlim aktar flessibbli, il-lawrja Ewropea tgħin biex il-programmi edukattivi konġunti jsiru aktar mifruxa għall-istituzzjonijiet kollha tal-edukazzjoni għolja, b’rispett sħiħ tas-sussidjarjetà.

Billi nieħdu pass ulterjuri lejn il-ħolqien ta’ lawrja Ewropea, u billi ningranaw id-dimensjoni Ewropea unika tagħhom, qed nonoraw l-isforzi kollaborattivi tranżnazzjonali tal-istituzzjonijiet Ewropej tal-edukazzjoni għolja biex jipprovdu lill-istudenti b’opportunitajiet bla preċedent għat-tkabbir personali, il-kisba akkademika, u ċ-ċittadinanza Ewropea, li jagħtuhom opportunità aħjar biex jirnexxu fl-ekonomija globali tal-lum.

Lawrja Ewropea tħejji lill-istudenti biex jinnavigaw u jirnexxu f’dinja fejn l-isfidi u l-opportunitajiet ma għandhomx fruntieri. Dan huwa l-mod kif għandna nħejju lill-istudenti tagħna biex mhux biss jipparteċipaw fl-ekonomija globali iżda biex imexxuha. B’dan il-mod, mhux biss qed inżidu l-kompetittività tal-Unjoni tagħna, inkunu qegħdin nikkontribwixxu għal dinja aktar prospera u aktar konnessa.

(1)

It-terminu “università” jintuża bħala referenza għas-settur usa’, li jirrappreżenta l-qasam kollu tal-edukazzjoni terzjarja, u b’hekk jinkludi kull tip ta’ istituzzjoni ta’ edukazzjoni għolja, li jinkludu universitajiet ta’ riċerka, kulleġġi universitarji, universitajiet tax-xjenzi applikati, edukazzjoni vokazzjonali għolja u istituzzjonijiet ta’ taħriġ, u istituzzjonijietgħolja tal-arti.

(2)

  Inizjattiva tal-Universitajiet Ewropej .

(3)

  Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar strateġija Ewropea għall-universitajiet, tat-18 ta’ Jannar 2022, COM(2022) 16 final .

(4)

  Inforegio - Sfruttar tat-talent fir-reġjuni tal-Ewropa (europa.eu)  

(5)

  Stħarriġ tal-Ewrobarometru tal-2018 .

(6)

  Kummissjoni Ewropea, Direttorat Ġenerali għall-Edukazzjoni, iż-Żgħażagħ, l-Isport u l-Kultura, Burneikaitė, G., Pocius, D., Potapova, E. et al., The road towards a possible joint European degree – Identifying opportunities and investigating the impact and feasibility of different approaches – Rapport finali, Uffiċċju tal-Pubblikazzjonijiet tal-Unjoni Ewropea, 2023 .

(7)

  Tikketta ta’ Lawrja Ewropea konġunta u status legali għall-alleanzi tal-Universitajiet Ewropej: għaxar proġetti tal-Erasmus+ biex dawn jiddaħħlu fis-seħħ .

(8)

  U-Multirank. L-indikaturi użati huma sħubijiet strateġiċi, lawrji konġunti internazzjonali, internships, kopubblikazzjonijiet internazzjonali, kopubblikazzjonijiet ma’ sħab industrijali, kopubblikazzjonijiet reġjonali, u koprivattivi mal-industrija.

(9)

Fl-2022 ġie żviluppat sett ta’ kriterji mal-Istati Membri u mal-partijiet interessati fl-edukazzjoni għolja. Dawn ġew ittestjati minn sitt proġetti pilota ta’ esperimentazzjoni tal-Erasmus+ bejn April 2023 u Marzu 2024. Il-proġetti pilota pproponew bidliet fil-kriterji li jirriżultaw fil-lista stabbilita fl-Anness 2 tal-proposta għal rakkomandazzjoni tal-Kunsill dwar l-assigurazzjoni tal-kwalità u r-rikonoxximent.

(10)

  Oqfsa Nazzjonali tal-Kwalifiki (QNK) ifisser strument għall-klassifikazzjoni tal-kwalifiki skont sett ta’ kriterji għal livelli speċifiċi ta’ tagħlim miksub, li għandu l-għan li jintegra u jikkoordina s-sottosistemi nazzjonali tal-kwalifiki u jtejjeb it-trasparenza, l-aċċess, il-progressjoni u l-kwalità tal-kwalifiki fir-rigward tas-suq tax-xogħol u s-soċjetà ċivili.

(11)

Il-format diġitali għandu jkun sigur u kompatibbli mal-Mudell Ewropew tat-Tagħlim bħala mudell ta’ data multilingwi fil-qasam tat-tagħlim.

(12)

  Rakkomandazzjoni tal-Kunsill tas-26 ta’ Novembru 2018 dwar il-promozzjoni tar-rikonoxximent reċiproku awtomatiku ta’ kwalifiki tal-edukazzjoni għolja u tal-edukazzjoni u t-taħriġ fil-livell sekondarju għoli u l-eżiti tal-perjodi ta’ apprendiment barra mill-pajjiż (ĠU C 444, 10.12.2018, p. 1) .

(13)

  Kummissjoni Ewropea, Direttorat Ġenerali għall-Edukazzjoni, iż-Żgħażagħ, l-Isport u l-Kultura, Burneikaitė, G., Pocius, D., Potapova, E. et al., The road towards a possible joint European degree – Identifying opportunities and investigating the impact and feasibility of different approaches – Rapport finali, Uffiċċju tal-Pubblikazzjonijiet tal-Unjoni Ewropea, 2023 .

(14)

  Rakkomandazzjoni tal-Kunsill tal-5 ta’ April 2022 dwar il-bini ta’ konnessjonijiet għal kooperazzjoni effettiva Ewropea fl-edukazzjoni għolja (ĠU C 160, 13.4.2022, p. 1 ).

(15)

  Ir-Regolament (UE) 2021/817 tal-Parlament Ewropew u tal-Kunsill tal-20 ta’ Mejju 2021 li jistabbilixxi Erasmus+: il-Programm tal-Unjoni għall-edukazzjoni u taħriġ, żgħażagħ u sport (ĠU L 189, 28.5.2021, p. 1).

(16)

Ara r-riżultati fid-Dokument ta’ Ħidma tal-Persunal mehmuż SWD(2024)74.

(17)

  Konklużjonijiet tal-Kunsill dwar strateġija Ewropea li ssaħħaħ l-istituzzjonijiet tal-edukazzjoni għolja għall-futur tal-Ewropa (ĠU C 167, 21.4.2022, p. 9).

(18)

Quality Assurance Fit for the Future (QA-FIT) .

(19)

  L-implimentazzjoni u l-Innovazzjoni fl-Assigurazzjoni tal-Kwalità permezz tat-tagħlim bejn il-pari (IMINQA) .

(20)

  Rakkomandazzjoni tal-Kunsill tat-18 ta’ Diċembru 2023 dwar qafas Ewropew biex jiġu attirati u miżmuma t-talenti fir-riċerka, fl-innovazzjoni u intraprenditorjali fl-Ewropa (ĠU C, C/2023/1640, 29.12.2023) .

(21)

  Strument ta’ Appoġġ Tekniku .

(22)

DEQAR hija l-Bażi tad-Data tar-Riżultati tal-Assigurazzjoni tal-Kwalità Esterna għall-aġenziji tal-assigurazzjoni tal-kwalità elenkati fir-Reġistru Ewropew għall-Assigurazzjoni tal-Kwalità fl-Edukazzjoni Għolja (EQAR). L-aġenziji kollha rreġistrati fl-EQAR jistgħu jippubblikaw ir-rapporti tagħhom fil-Bażi tad-Data. Il-parteċipazzjoni fid-DEQAR hija volontarja ( https://www.eqar.eu/qa-results/search/ ).

(23)

  Rakkomandazzjoni tal-Kunsill tal-20 ta’ Novembru 2017 dwar il-monitoraġġ tal-perkors fil-karriera tal-gradwati (ĠU C 423, 9.12.2017, p. 1).

(24)

  il-programm ta’ ħidma annwali 2024 “Erasmus+”: Programm tal-Unjoni għall-Edukazzjoni, it-Taħriġ, iż-Żgħażagħ u l-Isport

C(2023)6157 tat-18 ta’ Settembru 2023.

(25)

  Direttiva 2005/36/KE tal-Parlament Ewropew u tal-Kunsill tas-7 ta’ Settembru 2005 dwar ir-Rikonoxximent ta’ Kwalifiki Professjonali ( ĠU L 255, 30.9.2005, p. 22 ).

(26)

  Rakkomandazzjoni tal-Kunsill tat-22 ta’ Mejju 2017 dwar il-Qafas Ewropew tal-Kwalifiki għat-tagħlim tul il-ħajja (ĠU C 189, 15.6.2017, p. 15 ).

(27)

  Europass .

(28)

  Kredenzjali Diġitali Ewropej għat-tagħlim .

(29)

  Klassifikazzjoni Ewropea tal-ħiliet u l-okkupazzjonijiet .

(30)

Kif imħabbar fil-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar strateġija Ewropea għall-universitajiet, tat-18 ta’ Jannar 2022, COM(2022) 16 final.