IL-KUMMISSJONI EWROPEA
Brussell, 21.4.2021
COM(2021) 188 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
It-Tassonomija tal-UE, ir-Rappurtar dwar is-Sostenibbiltà Korporattiva, il-Preferenzi dwar is-Sostenibbiltà u d-Dazji Fiduċjarji:
Nidderieġu l-Finanzi lejn il-Patt Ekoloġiku Ewropew
Il-Patt Ekoloġiku Ewropew huwa l-istrateġija tal-Ewropa għat-tkabbir li se ttejjeb il-benesseri u s-saħħa taċ-ċittadini, tagħmel l-Ewropa newtrali għall-klima sal-2050 u tipproteġi, tikkonserva u ssaħħaħ il-kapital naturali u l-bijodiversità tal-UE. Ekonomija li Taħdem għan-Nies tfisser ukoll Tranżizzjoni ġusta li toħloq l-impjiegi u ma tħalli lil ħadd jaqa’ lura. Biex jintlaħqu dawn l-għanijiet, jeħtieġ li s-sistema finanzjarja Ewropea ssir aktar sostenibbli. Dan se jirrikjedi kemm leġiżlazzjoni finanzjarja robusta kif ukoll triq ta’ tranżizzjoni ċara għan-negozji. L-iskala ta’ investiment meħtieġa biex isiru l-bidliet meħtieġa se tpoġġi s-settur finanzjarju Ewropew fil-qalba ta’ rkupru ekonomiku sostenibbli u inklużiv mill-pandemija tal-COVID-19 u tal-iżvilupp ekonomiku sostenibbli itwal tal-Ewropa.
L-UE ħadet passi kbar biex tibni ekosistema finanzjarja sostenibbli. Ir-Regolament dwar it-Tassonomija tal-UE, ir-Regolament dwar l-Iżvelar tal-Finanzi Sostenibbli u r-Regolament dwar il-Parametri Referenzjarji jiffurmaw il-bażi biex jiżdiedu t-trasparenza u ċ-ċertezza u jiġu pprovduti għodod għall-investituri biex jidentifikaw opportunitajiet ta’ investiment sostenibbli.
Il-Kummissjoni qed tressaq l-Att Delegat dwar it-Tassonomija tal-UE dwar il-Klima, proposta għal Direttiva dwar ir-Rappurtar tas-Sostenibbiltà Korporattiva (CSRD), reviżjoni tad-Direttiva dwar ir-Rappurtar Mhux Finanzjarju, u emendi għall-atti delegati biex jiġu riflessi aħjar il-preferenzi tas-sostenibbiltà fil-konsulenza dwar l-assigurazzjoni u l-investiment u l-kunsiderazzjonijiet tas-sostenibbiltà fil-governanza tal-prodotti u d-dmirijiet fiduċjarji. Dawn se jgħinu biex imexxu Ewropa aktar ekoloġika, aktar ġusta u aktar sostenibbli u jappoġġaw l-implimentazzjoni tal-Għanijiet ta’ Żvilupp Sostenibbli.
It-Tassonomija tal-UE hija għodda ta’ trasparenza robusta u bbażata fuq ix-xjenza għall-kumpaniji u l-investituri. Hija tintroduċi kriterji ċari tal-prestazzjoni biex jiġi ddeterminat liema attivitajiet ekonomiċi jagħtu kontribut sostanzjali għall-objettivi tal-Patt Ekoloġiku. Dawn il-kriterji joħolqu lingwaġġ komuni għan-negozji u l-investituri, li jippermettilhom jikkomunikaw dwar attivitajiet ekoloġiċi b’aktar kredibbiltà u jgħinuhom jinnavigaw it-tranżizzjoni li diġà għaddejja. It-Tassonomija tal-UE se jkollha wkoll rwol importanti fil-ħolqien tal-Istandard tal-Bonds Ekoloġiċi tal-UE u l-Ekotikketta tal-UE għal ċerti prodotti finanzjarji għall-konsumatur.
Permezz tal-Att Delegat dwar il-Klima tat-Tassonomija tal-UE, l-attivitajiet ekonomiċi ta’ madwar 40 % tal-kumpaniji elenkati 1 , f’setturi li huma responsabbli għal kważi 80 % tal-emissjonijiet diretti ta’ gassijiet serra fl-Ewropa, diġà huma koperti, u aktar attivitajiet se jiżdiedu fil-futur 2 . Permezz ta’ din il-kopertura, it-Tassonomija tal-UE tista’ żżid b’mod sinifikanti l-potenzjal li joffri l-finanzjament ekoloġiku biex jappoġġa t-tranżizzjoni, b’mod partikolari għas-setturi intensivi fil-karbonju fejn il-bidla hija meħtieġa b’mod urġenti.
Il-proposta għad-Direttiva dwar ir-Rappurtar tas-Sostenibbiltà Korporattiva se tistabbilixxi regoli komuni Ewropej ta’ rappurtar li se jżidu t-trasparenza, li jirrikjedu li l-kumpaniji jirrappurtaw informazzjoni dwar is-sostenibbiltà b’mod konsistenti u komparabbli. Ir-rekwiżiti l-ġodda ta’ rappurtar japplikaw għall-kumpaniji kbar kollha u għal dawk kollha elenkati, inklużi l-intrapriżi żgħar u ta’ daqs medju (SMEs) elenkati. Il-Kummissjoni se tiżviluppa standards proporzjonati għall-SMEs. Dan tal-aħħar se jistabbilixxi referenza għal informazzjoni li l-kumpaniji li huma fil-kamp ta’ applikazzjoni tas-CSRD jistgħu jitolbu b’mod raġonevoli mingħand il-fornituri u l-klijenti tal-SMEs fil-katini tal-valur tagħhom.
I.INTRODUZZJONI
Ir-Regolament (UE) 2020/852 dwar l-istabbiliment ta’ qafas biex jiġi ffaċilitat l-investiment sostenibbli (ir-“Regolament dwar it-Tassonomija tal-UE”), daħal fis-seħħ fit-12 ta’ Lulju 2020 3 . Permezz ta’ dan ir-Regolament, il-Parlament Ewropew u l-Kunsill taw mandat lill-Kummissjoni Ewropea biex tipprovdi, f’atti delegati, kriterji tekniċi ta’ skrinjar biex jiġi ddeterminat jekk attività ekonomika tistax titqies li tikkontribwixxi b’mod sostanzjali għall-objettivi ambjentali. Dawn il-kriterji jgħinu biex jiġu stabbiliti definizzjonijiet xierqa għall-kumpaniji, l-investituri u l-parteċipanti fis-swieq finanzjarji li fuqhom l-attivitajiet ekonomiċi jistgħu jitqiesu ambjentalment sostenibbli.
Dan il-mandat huwa inkwadrat mir-rekwiżit li l-kriterji tekniċi ta’ skrinjar jeħtieġ li jkunu aġġornati u bbażati fuq evidenza xjentifika. Dawn il-kriterji għandhom ikunu ċari, prattikabbli u faċli biex jiġu applikati, u b’hekk jiġi evitat piż amministrattiv bla bżonn. Il-Parlament Ewropew u l-Kunsill irrikonoxxew ukoll l-importanza tal-konsultazzjoni pubblika, u taw mandat espliċitu lill-Kummissjoni biex tinvolvi lill-partijiet ikkonċernati rilevanti u biex tibni fuq il-parir ta’ esperti li għandhom għarfien u esperjenza ppruvati fl-oqsma rilevanti.
Kif mitlub mill-Parlament Ewropew u mill-Kunsill, l-Att Delegat dwar it-Tassonomija tal-UE dwar il-Klima 4 jipprovdi l-ewwel sett ta’ kriterji tekniċi ta’ skrinjar tat-Tassonomija tal-UE u lingwa komuni madwar attivitajiet sostenibbli. Ir-Regolament dwar it-Tassonomija tal-UE jirrikjedi li l-investituri u l-kumpaniji jużaw dawn il-kriterji għal divulgazzjonijiet relatati, li se jservu wkoll bħala gwida affidabbli għad-deċiżjonijiet ta’ investiment.
Dan huwa kumplimentat mill-proposta għad-Direttiva dwar ir-Rappurtar tas-Sostenibbiltà Korporattiva 5 , li se tiżgura li l-kumpaniji jipprovdu informazzjoni dwar is-sostenibbiltà tal-prattiki tan-negozju tagħhom b’mod trasparenti u komparabbli. Permezz ta’ informazzjoni dwar l-allinjament tat-Tassonomija, l-investimenti fit-tranżizzjoni u r-riskji għas-sostenibbiltà, il-kumpaniji finanzjarji jistgħu jevalwaw l-ambizzjoni u l-prestazzjoni ambjentali tal-attivitajiet iffinanzjati.
II. L-ATT DELEGAT DWAR IT-TASSONOMIJA TAL-UE DWAR IL-KLIMA
L-Att Delegat dwar it-Tassonomija tal-UE dwar il-Klima, soġġett għal skrutinju mill-Parlament Ewropew u mill-Kunsill, jagħti l-ewwel sett ta’ kriterji tekniċi għad-definizzjoni ta’ dawk l-attivitajiet li jikkontribwixxu b’mod sostanzjali għall-mitigazzjoni tat-tibdil fil-klima u l-adattament għalih, l-ewwel tnejn minn sitt objettivi ambjentali fit-Tassonomija tal-UE 6 .
Dawn il-kriterji ġew żviluppati abbażi ta’ rakkomandazzjonijiet mill-Grupp ta’ Esperti Tekniċi (TEG) u wara feedback u pariri pubbliċi mill-Pjattaforma dwar il-Finanzi Sostenibbli 7 .
Il-volum ta’ feedback li wasal mingħand il-partijiet ikkonċernati (inklużi ċ-ċittadini, l-awtoritajiet pubbliċi, in-negozji, l-organizzazzjonijiet mingħajr skop ta’ qligħ, u d-dinja akkademika fost l-oħrajn) irrifletta l-importanza tal-kwistjoni. Il-maġġoranza l-kbira ta’ dawk li wieġbu tennew l-importanza tat-Tassonomija tal-UE bħala għodda ewlenija li tappoġġa l-proċess ta’ tranżizzjoni skont il-Patt Ekoloġiku Ewropew. Is-sommarju tal-konsultazzjoni pubblika huwa disponibbli fuq is-sit web tal-Kummissjoni dwar il-finanzjament sostenibbli 8 .
Il-feedback żvela wkoll diversi punti ta’ tħassib, fosthom:
-L-implikazzjonijiet ta’ attività li tikkwalifika bħala ambjentalment sostenibbli jew le: Xi partijiet ikkonċernati kienu mħassba li attività li ma tikkwalifikax bħala ekoloġika skont l-Att Delegat dwar il-Klima tat-Tassonomija tal-UE tirriskja li titqies bħala mhux sostenibbli, b’konsegwenzi possibbli f’termini ta’ aċċess għall-finanzjament għal dawk l-attivitajiet. (Taqsima 1)
-Il-livell ta’ ambizzjoni u l-użu tal-kriterji: Filwaqt li ħafna partijiet ikkonċernati laqgħu l-livell ta’ ambizzjoni tal-kriterji jew saħansitra talbu għal ambizzjoni ogħla, partijiet ikkonċernati oħra kienu mħassba li l-ambizzjoni tal-kriterji kienet għolja wisq, u ssuġġerew titjib fl-użu tal-kriterji. (Taqsima 2)
-L-ambitu tat-Tassonomija tal-UE: Xi partijiet ikkonċernati kienu mħassba dwar l-ambitu tal-attivitajiet koperti mill-kriterji li huma limitati wisq u n-natura binarja tat-Tassonomija tal-UE, li jfisser li mhux se tipprovdi gwida lis-swieq dwar kif għandhom jiġu ttrattati l-attivitajiet li ma jissodisfawx, jew li mhumiex koperti, mill-kriterji elenkati fl-Att Delegat tal-Klima tat-Tassonomija tal-UE. (Taqsima 3)
It-tliet taqsimiet li ġejjin jiċċaraw il-kwistjonijiet ta’ hawn fuq u jispjegaw il-passi li l-Kummissjoni ħadet, jew li se tieħu fil-futur, biex tindirizzahom.
1.L-implikazzjonijiet ta’ attività li tikkwalifika bħala ambjentalment sostenibbli jew le
Ħafna partijiet ikkonċernati kienu mħassba li t-tassonomija tiddefinixxi liema attivitajiet jikkwalifikaw bħala “ambjentalment sostenibbli”, li jista’ jitqies li jfisser li jekk attività ma tiġix indirizzata fl-Att Delegat tat-Tassonomija tal-UE, din awtomatikament tikkwalifika bħala “mhux sostenibbli” mil-lat ambjentali. Dan mhuwiex il-każ. Is-sempliċi fatt li kumpanija ma jkollhiex attivitajiet allinjati mat-Tassonomija ma jfissirx li jistgħu jinsiltu konklużjonijiet dwar il-prestazzjoni ambjentali tal-kumpanija jew il-kapaċità tagħha li taċċessa l-finanzjament.
Attwalment, it-Tassonomija tal-UE ma tiddefinixxix kif attivitajiet għajr dawk ekoloġiċi għandhom jiġu ttrattati. Ma tiddefinixxix u lanqas tikkategorizza xi attività bħala li “ttejjeb il-livelli attwali tal-prestazzjoni ambjentali” iżda li ma tilħaqx il-livell ta’ kontribuzzjoni sostanzjali. Dawn l-attivitajiet — filwaqt li huma importanti fihom infushom biex jappoġġjaw it-trasformazzjoni wiesgħa meħtieġa tal-ekonomija tal-UE — fihom infushom mhux se jkunu biżżejjed biex jintlaħqu l-objettivi ekoloġiċi tagħna. Bl-istess mod, it-Tassonomija la tiddefinixxi u lanqas tikklassifika xi attività bħala “ambjentalment insostenibbli”. Barra minn hekk, mhux l-attivitajiet ekoloġiċi kollha li jistgħu jagħtu kontribut sostanzjali għall-objettivi ambjentali saru koperti mill-Att Delegat tat-Tassonomija tal-UE u huma parti mit-Tassonomija. It-Tassonomija tal-UE hija dokument ħaj li se jiżdied maż-żmien u jiġi aġġornat kif meħtieġ.
It-Tassonomija tal-UE hija għodda ta’ trasparenza. Se tintroduċi obbligi ta’ divulgazzjoni fuq xi kumpaniji u parteċipanti fis-swieq finanzjarji, u tesiġi li dawn jiżvelaw is-sehem tagħhom ta’ attivitajiet allinjati mat-Tassonomija. Id-divulgazzjoni tal-proporzjon ta’ attivitajiet ekoloġiċi allinjati mat-Tassonomija se tippermetti t-tqabbil ta’ kumpaniji u portafolli ta’ investiment abbażi ta’ dan il-proporzjon. Il-kumpaniji, jekk jixtiequ, jistgħu jużaw it-Tassonomija tal-UE b’mod affidabbli biex jippjanaw it-tranżizzjoni klimatika u ambjentali tagħhom u jżidu l-finanzjament għal din it-tranżizzjoni. Il-parteċipanti fis-swieq finanzjarji, jekk jixtiequ, jistgħu jużaw it-Tassonomija tal-UE biex ifasslu prodotti finanzjarji ekoloġiċi kredibbli. Huwa mistenni li t-tassonomija se tkun faċilitatur tal-bidla u tħeġġeġ tranżizzjoni lejn is-sostenibbiltà. Madankollu, filwaqt li t-Tassonomija tista’ tiggwida lill-parteċipanti fis-suq fid-deċiżjonijiet ta’ investiment tagħhom, naturalment ma tipprojbixxi l-ebda investiment f’xi attività. Ma hemm l-ebda obbligu għall-kumpaniji li jkunu allinjati mat-Tassonomija, u l-investituri huma wkoll liberi li jagħżlu fiex jinvestu.
Il-qafas tat-Tassonomija se jżid l-aċċess għal finanzjament sostenibbli lil hinn mill-għodod ta’ finanzjament ekoloġiku eżistenti bbażati fuq is-suq. Dan jinkludi aktar attivitajiet ekonomiċi u aktar objettivi ambjentali milli ntużaw s’issa f’oqfsa ta’ finanzjament ekoloġiku bbażati fuq is-suq. B’mod partikolari, jinkludi xi setturi intensivi fil-karbonju, li jippermettu r-rikonoxximent tas-suq għal attivitajiet ta’ tranżizzjoni f’dawk is-setturi.
Il-kumpaniji se jkunu jistgħu jgħoddu mhux biss il-fatturat, iżda wkoll ċerta nefqa operazzjonali u kapitali bħala allinjata mat-Tassonomija tal-UE, li se tkompli twessa’ l-opportunitajiet li se toffri t-Tassonomija tal-UE. L-istimi u l-ittestjar bikri tal-kriterji tat-tassonomija klimatika wrew livell baxx ta’ allinjament ġenerali tat-tassonomija llum fl-attivitajiet tal-kumpaniji u fil-portafolli ta’ investiment (bejn wieħed u ħamsa fil-mija, b’ħafna kumpaniji u portafolli ta’ investiment ikunu żero). Filwaqt li din iċ-ċifra hija mistennija li tiżdied b’mod sinifikanti bl-implimentazzjoni tal-Patt Ekoloġiku, hija tenfasizza l-firxa tat-tranżizzjoni li għadha meħtieġa lejn in-newtralità tal-karbonju sal-2050.
It-Tassonomija tal-UE hija mfassla għall-iskop speċifiku li tipprovdi sistema ta’ klassifikazzjoni u ttejjeb it-trasparenza. Ir-Regolament dwar l-Irkupru u r-Reżiljenza 9 juża l-prinċipju “tagħmilx ħsara sinifikanti” tar-Regolament dwar it-Tassonomija tal-UE minqux fl-Artikolu 17 iżda mingħajr ma jirrikjedi l-użu tal-kriterji definiti fl-Atti Delegati tat-Tassonomija. Il-Kummissjoni ppubblikat gwida teknika ddedikata, 10 li tipprovdi aktar dettall dwar kif għandu jiġi applikat il-prinċipju “tagħmilx ħsara sinifikanti” għall-finijiet tal-Faċilità għall-Irkupru u r-Reżiljenza (RRF). Dan ifisser li l-kriterji definiti fl-Att Delegat dwar il-Klima tat-Tassonomija tal-UE ma għandhom l-ebda implikazzjoni vinkolanti diretta għall-implimentazzjoni tal-Faċilità għall-Irkupru u r-Reżiljenza. Ir-Regolament dwar il-Politika ta’ Koeżjoni jirrikjedi wkoll li l-objettiv tal-fondi tiegħu jrid juża l-prinċipju “tagħmilx ħsara sinifikanti” tar-Regolament dwar it-Tassonomija tal-UE fil-perjodu ta’ programmazzjoni 2021–2027, iżda mingħajr ma jirrikjedi l-użu tal-kriterji tal-Atti Delegati tat-Tassonomija. Fil-futur, l-iskop oriġinali tat-Tassonomija tal-UE għandu jiġi mtenni u l-implikazzjonijiet għandhom jiġu vvalutati bir-reqqa f’termini ta’ adegwatezza, proporzjonalità u spejjeż ta’ konformità, qabel l-inklużjoni tagħha f’politiki oħra.
2.Il-livell ta’ ambizzjoni u l-użu tal-kriterji fl-Att Delegat dwar il-Klima tat-Tassonomija tal-UE
Fit-tfassil tal-Atti Delegati biex tiddefinixxi l-kriterji għas-sostenibbiltà tal-attivitajiet ekonomiċi, il-Kummissjoni Ewropea hija marbuta li tikkonforma mal-mandat previst mill-Parlament Ewropew u mill-Kunsill biex tidentifika l-livell ta’ ambizzjoni meħtieġ għall-proġetti ekoloġiċi biex jintlaħqu l-objettivi ambjentali tal-UE.
It-Tassonomija tal-UE tirrikonoxxi bħala sostenibbli dawk l-attivitajiet li jagħtu kontribut sostanzjali, aktar milli marġinali, biex jintlaħqu l-objettivi ambjentali tal-UE. It-Tassonomija tal-UE tistabbilixxi l-kriterji għal kontribut sostanzjali u l-ebda ħsara sinifikanti abbażi tal-livell ta’ ambizzjoni tal-għanijiet tal-Patt Ekoloġiku Ewropew inkluż l-objettiv tan-newtralità klimatika tal-UE.
Abbażi ta’ eżami bir-reqqa tal-feedback riċevut, saru modifiki, meta mqabbla mal-abbozz tal-att delegat ippubblikat għall-feedback pubbliku, mingħajr ma ddgħajjef il-livell ta’ ambizzjoni tal-objettivi tal-Patt Ekoloġiku Ewropew. Uħud minn dawk il-bidliet jinkludu:
-Bosta kjarifiki biex jissaħħu l-preċiżjoni teknika u l-użu tal-kriterji;
-Aktar titjib fl-użu f’termini ta’ simplifikazzjoni tal-kriterji, it-tnaqqis tal-kumplessità u l-piż ġenerali u, fejn xieraq, aġġustamenti biex isiru aktar speċifiċi u flessibbli;
-Kjarifiki li jirriflettu aħjar is-sussidjarjetà u l-kompetenza kondiviża bejn il-livelli tal-UE u tal-Istati Membri fejn xieraq (inklużi diversi kjarifiki biex jitqiesu aħjar ir-regolamenti nazzjonali);
-Konsistenza mtejba ma’ oqfsa eżistenti, leġiżlazzjoni settorjali, u kunsiderazzjoni tar-rieżamijiet li ġejjin fejn xieraq;
-Speċifikazzjonijiet għall-kamp ta’ applikazzjoni ta’ xi attivitajiet tranżitorji u abilitanti u aġġustamenti biex it-tassonomija tkun tista’ tintuża aktar mill-atturi ekonomiċi;
-Spjegazzjoni aħjar ta’ għadd żgħir ta’ attivitajiet li kienu koperti bħala parti minn attività oħra, fejn kien hemm domanda ċara mill-partijiet ikkonċernati u fejn huma konsistenti mal-objettivi u r-rekwiżiti tar-Regolament dwar it-Tassonomija tal-UE;
-Premessi aġġornati li jissottolinjaw il-ħtieġa għal reviżjonijiet futuri u l-introduzzjoni ta’ attivitajiet addizzjonali fi stadju aktar tard.
3.L-ambitu tat-Tassonomija tal-UE
Wara feedback pubbliku u b’kont meħud tar-rakkomandazzjonijiet tal-Pjattaforma dwar il-Finanzi Sostenibbli, il-Kummissjoni qed tikkunsidra li tkompli tiżviluppa t-Tassonomija tal-UE f’konformità mar-Regolament dwar it-Tassonomija tal-UE biex tindirizza t-tħassib tal-partijiet ikkonċernati li fadal, kif spjegat fit-Taqsima li jmiss.
B’mod partikolari, il-kamp ta’ applikazzjoni attwali tal-kriterji deskritti fl-Att Delegat dwar il-Klima tat-Tassonomija tal-UE se jespandi fil-futur. Il-kriterji huma dinamiċi u se jkunu soġġetti għal reviżjoni regolari. Dan jiżgura li setturi u attivitajiet ġodda, inklużi attivitajiet tranżitorji u abilitanti, jistgħu jiżdiedu mal-kamp ta’ applikazzjoni maż-żmien billi jiġi emendat dan l-Att Delegat. Il-partijiet ikkonċernati se jkollhom l-opportunità li jissuġġerixxu attivitajiet li għandhom jiġu inklużi fil-kriterji permezz ta’ portal tal-internet, li se jiġi stabbilit f’nofs l-2021 fuq is-sit web tal-Kummissjoni Ewropea. Il-Kummissjoni, b’kontributi mill-Pjattaforma dwar il-Finanzi Sostenibbli, se tivvaluta s-suġġerimenti.
Barra minnhekk, it-tassonomija se jkollha impatt fuq il-finanzjament sostenibbli fuq livell internazzjonali. Fit-twettiq tal-objettivi tal-Patt Ekoloġiku Ewropew, l-UE se tikkoopera mill-qrib mal-pajjiżi sħab tagħha, anke f’fora internazzjonali rilevanti bħall-Pjattaforma Internazzjonali dwar il-Finanzi Sostenibbli (IPSF), il-G7/G20, u l-Bord għall-Istabbiltà Finanzjarja (FSB). Dan jinkludi l-esplorazzjoni ta’ modi biex it-Tassonomija tal-UE tiġi operazzjonalizzata globalment b’mod xieraq u proporzjonat. Bħala parti minn dan, ser titwettaq aktar ħidma dwar l-użabbiltà u l-operabbiltà internazzjonali tat-Tassonomija tal-UE.
III.IL-PASSI LI JMISS FL-IŻVILUPP TAT-TASSONOMIJA TAL-UE
F’konformità mal-qafas legali u l-impenji tagħna tal-passat, il-Kummissjoni se tadotta att Delegat komplementari tar-Regolament dwar it-Tassonomija tal-UE li jkopri attivitajiet li għadhom mhumiex koperti fl-Att Delegat tat-Tassonomija tal-UE dwar il-Klima bħall-agrikoltura, ċerti setturi tal-enerġija u ċerti attivitajiet ta’ manifattura.
Dan l-Att Delegat komplementari se jkopri l-enerġija nukleari soġġetta għal u konsistenti mar-riżultati tal-proċess ta’ rieżami speċifiku li għaddej skont ir-Regolament dwar it-Tassonomija tal-UE. Dan il-proċess huwa bbażat fuq ir-rapport 11 tekniku indipendenti u xjentifiku ppubblikat f’Marzu 2021 miċ-Ċentru Konġunt tar-Riċerka, is-servizz tax-xjenza u l-għarfien tal-Kummissjoni Ewropea 12 . Bħalissa għaddejja reviżjoni ta’ dan ir-rapport permezz ta’ żewġ gruppi ta’ esperti, il-grupp ta’ esperti tal-Euratom skont l-Artikolu 31 u l-Kumitat Xjentifiku dwar is-Saħħa, l-Ambjent u r-Riskji Emerġenti (SCHEER), biex titlesta l-evalwazzjoni xjentifika u se jiġi ffinalizzat f’Ġunju 2021.
Dan l-Att Delegat komplementari se jkopri wkoll il-gass naturali u t-teknoloġiji relatati bħala attività tranżizzjonali sakemm dawn jaqgħu fil-limiti tal-Artikolu 10(2) tar-Regolament dwar it-Tassonomija tal-UE. Il-merti ta’ klawsola ta’ estinzjoni għall-attivitajiet tranżitorji se jiġu kkunsidrati f’dan il-kuntest.
Il-Kummissjoni se tadotta dan l-Att Delegat kumplimentari malajr kemm jista’ jkun wara t-tmiem tal-proċess ta’ rieżami speċifiku mistenni fis-sajf tal-2021.
Att Delegat separat se jkopri attivitajiet li jagħtu kontribut sostanzjali għall-erba’ objettivi ambjentali l-oħra kif stabbiliti fir-Regolament dwar it-Tassonomija tal-UE (l-użu sostenibbli u l-protezzjoni tal-ilma u tar-riżorsi tal-baħar, it-tranżizzjoni lejn ekonomija ċirkolari, il-prevenzjoni u l-kontroll tat-tniġġis, il-protezzjoni u r-restawr tal-bijodiversità u l-ekosistemi). Il-Pjattaforma dwar il-Finanzi Sostenibbli qed taħdem fuq rakkomandazzjonijiet għal dan l-Att.
Barra minn hekk, l-Artikolu 26 tar-Regolament dwar it-Tassonomija tal-UE jirrikjedi li l-Kummissjoni tivvaluta sa tmiem l-2021 jekk u kif il-kamp ta’ applikazzjoni tar-Regolament dwar it-Tassonomija jista’ jiġi estiż biex ikopri livelli oħra ta’ prestazzjoni ambjentali minbarra kontribuzzjoni sostanzjali, kif ukoll objettivi oħra, bħal objettivi soċjali.
IV.IL-FINANZJAMENT TAT-TRANŻIZZJONI LEJN IS-SOSTENIBBILTÀ
Filwaqt li r-Regolament dwar it-Tassonomija tal-UE huwa faċilitatur ewlieni biex jiġu mobilizzati l-investimenti f’soluzzjonijiet sostenibbli fit-tul, il-konsultazzjoni pubblika u r-reazzjonijiet mill-MEPs, l-Istati Membri, u partijiet ikkonċernati oħra f’dawn l-aħħar xhur enfasizzaw il-konfini tat-Tassonomija tal-UE. B’mod partikolari, preokkupazzjoni komuni hija li xi attivitajiet, li jikkontribwixxu għat-tranżizzjoni ekoloġika tal-ekonomija reali, mhumiex eliġibbli biex jiġu inklużi fit-Tassonomija.
Għalhekk, il-Kummissjoni se tikkunsidra li tipproponi leġiżlazzjoni li tappoġġa l-finanzjament ta’ ċerti attivitajiet ekonomiċi, primarjament fis-settur tal-enerġija, inkluż il-gass, li jikkontribwixxu għat-tnaqqis tal-emissjonijiet ta’ gassijiet serra b’mod li jappoġġa t-tranżizzjoni lejn in-newtralità klimatika matul id-deċennju attwali. Din il-proposta jkollha l-għan li tiddefinixxi perjodi ta’ żmien u passi intermedjarji għal dawk l-attivitajiet ekonomiċi, inkluż għal investimenti eżistenti, li jikkontribwixxu għall-proċess ta’ tranżizzjoni b’mod konsistenti mal-Patt Ekoloġiku Ewropew.
Tali approċċ jippermetti segwitu għall-konklużjonijiet tal-Kunsill Ewropew tal-11-12 ta’ Diċembru 2020, li jirrikonoxxu r-rwol tat-teknoloġiji ta’ transizzjoni bħall-gass naturali.
L-investimenti fi proġetti tal-gass naturali huma eliġibbli għal appoġġ finanzjarju mill-istrumenti tal-UE, fejn investimenti bħal dawn jappoġġaw l-objettivi tal-politika tal-UE b’mod konsistenti mal-Patt Ekoloġiku. Eżempji jinkludu l-Faċilità għall-Irkupru u r-Reżiljenza 13 , Invest EU, il-Fond Ewropew għall-Iżvilupp Reġjonali, u l-Fond għall-Modernizzazzjoni tal-Iskema għall-Iskambju tal-Kwoti tal-Emissjonijiet, li jippermettu li l-proġetti tal-gass naturali jikkwalifikaw soġġetti għal valutazzjonijiet każ b’każ.
It-tranżizzjoni lejn ekonomija newtrali għall-klima u sostenibbli mhijiex avveniment ta’ darba iżda proċess. Għall-kumpaniji, din it-tranżizzjoni tfisser li jitnaqqsu l-emissjonijiet tal-gassijiet serra, isiru reżiljenti u jnaqqsu l-ħsara ambjentali maż-żmien. Għall-investituri, it-tranżizzjoni tfisser li maż-żmien tittejjeb il-prestazzjoni ambjentali ta’ portafoll. L-Istati Membri jridu wkoll jippjanaw u jinċentivaw din it-tranżizzjoni.
Il-kumpaniji kollha jistgħu jinvestu f’attivitajiet ekoloġiċi. Bħala parti mill-istrateġija korporattiva tagħhom, il-kumpaniji jistgħu jużaw it-Tassonomija tal-UE biex jagħmlu pjanijiet għat-tranżizzjoni ta’ attivitajiet speċifiċi biex jissodisfaw il-limiti tat-Tassonomija. Metriċi oħra bbażati fuq ix-xjenza jistgħu jgħinuhom jistabbilixxu miri ta’ prestazzjoni tas-sostenibbiltà għall-kumpanija kollha kemm hi.
Il-pjattaforma dwar il-Finanzi Sostenibbli, inkarigata mill-Kummissjoni Ewropea, tat parir dwar kif għandu jiġi rikonoxxut ir-rwol tat-Tassonomija tal-UE fil-kontribut għat-tranżizzjoni ekoloġika. Fir-rapport tagħhom lill-Kummissjoni Ewropea ppubblikat f’Marzu 2021 14 , il-Pjattaforma rrakkomandat, fost kwistjonijiet oħra, li jiġu esplorati aktar l-għażliet biex jiġu rikonoxxuti — barra mill-qafas attwali tat-Tassonomija tal-UE — l-isforzi li saru biex tittejjeb il-prestazzjoni tal-attivitajiet lejn il-kriterji ta’ kontribuzzjoni sostanzjali.
V.RAPPURTAR SOSTENIBBLI KORPORATTIV KONSISTENTI U KOERENTI
1.Direttiva ġdida dwar ir-Rappurtar tas-Sostenibbiltà Korporattiva
Il-Kummissjoni qed tipproponi Direttiva ġdida dwar ir-Rappurtar tas-Sostenibbiltà Korporattiva (CSRD), li tirrevedi r-regoli eżistenti ta’ rappurtar li ġew introdotti mid-Direttiva dwar ir-Rappurtar Mhux Finanzjarju (NFRD). Id-Direttiva proposta dwar ir-Rappurtar tas-Sostenibbiltà Korporattiva tkun il-bażi ta’ fluss konsistenti ta’ informazzjoni dwar is-sostenibbiltà permezz tal-katina tal-valur finanzjarju u għal partijiet ikkonċernati oħra. Għalhekk, l-informazzjoni żvelata mill-kumpaniji tkun disponibbli għall-analisti fil-banek, il-kumpaniji tal-assigurazzjoni, il-kumpaniji tal-immaniġġjar tal-assi jew l-aġenziji tal-klassifikazzjoni tal-kreditu, għall-investituri finali u għall-NGOs u partijiet ikkonċernati oħra li jixtiequ jżommu l-kumpaniji responsabbli aħjar għall-impatti soċjali u ambjentali tagħhom. Fid-dawl tal-objettivi tal-Patt Ekoloġiku Ewropew, il-kumpaniji inklużi fil-kamp ta’ applikazzjoni jkollhom jirrapportaw dwar l-impatt tal-mudell tan-negozju u l-istrateġija tagħhom lejn it-tranżizzjoni lejn ekonomija sostenibbli u newtrali għall-klima. Id-Direttiva proposta tiżgura li r-rappurtar dwar is-sostenibbiltà tal-kumpaniji jikkorrispondi għall-ħtiġijiet tal-parteċipanti fis-swieq finanzjarji soġġetti għar-rekwiżiti ta’ divulgazzjoni tar-Regolament dwar id-Divulgazzjoni dwar il-Finanzi Sostenibbli 15 . Tqis ukoll l-intenzjoni tal-Kummissjoni li tressaq proposta għal Inizjattiva ta’ Governanza Korporattiva Sostenibbli aktar tard din is-sena.
Il-biċċa l-kbira tal-kumpaniji jiffaċċjaw spejjeż dejjem jiżdiedu minħabba talbiet ta’ informazzjoni mhux koordinati minn investituri u partijiet ikkonċernati oħra għal informazzjoni korporattiva dwar is-sostenibbiltà. Filwaqt li d-Direttiva proposta dwar ir-Rappurtar tas-Sostenibbiltà Korporattiva timplika spejjeż addizzjonali ta’ rappurtar għall-kumpaniji, għandha l-għan li tnaqqas dawn l-ispejjeż fuq terminu medju sa twil billi tibni kunsens dwar l-informazzjoni essenzjali li l-kumpaniji għandhom jiżvelaw.
Id-Direttiva proposta dwar ir-Rappurtar tas-Sostenibbiltà Korporattiva tkun tapplika għal madwar 49 000 kumpanija, meta mqabbla ma’ madwar 11 000 li huma soġġetti għar-regoli eżistenti dwar ir-rappurtar dwar is-sostenibbiltà (id-Direttiva dwar ir-Rappurtar Mhux Finanzjarju). Il-kumpaniji l-kbar kollha, u l-kumpaniji kollha elenkati fis-swieq regolati tal-UE minbarra l-mikrointrapriżi elenkati, ikunu soġġetti għal dawn ir-rekwiżiti ta’ rappurtar. Huma jkollhom jirrappurtaw informazzjoni dwar il-firxa sħiħa ta’ kwistjonijiet ambjentali, soċjali u ta’ governanza rilevanti għan-negozju tagħhom. B’mod konsistenti mar-regoli eżistenti tad-Direttiva dwar ir-Rappurtar Mhux Finanzjarju, ikollhom jirrapportaw dwar ir-riskji għall-kumpanija li jirriżultaw minn kwistjonijiet ta’ sostenibbiltà, u dwar l-impatti tagħhom stess fuq in-nies u l-ambjent. Dan se jinkludi informazzjoni dwar il-ktajjen tal-provvista globali tal-kumpaniji rigward kwistjonijiet bħax-xogħol furzat u t-tħaddim tat-tfal u konsistenti ma’ prinċipji u oqfsa rikonoxxuti internazzjonalment bħad-Dikjarazzjoni tal-ILO dwar il-Prinċipji u d-Drittijiet Fundamentali fuq ix-Xogħol. L-informazzjoni li jirrapportaw tiġi awditjata, u tiġi ttikkettata b’mod diġitali sabiex tkun tista’ tikkontribwixxi għall-Punt ta’ Aċċess Uniku Ewropew previst skont il-Pjan ta’ Azzjoni tal-Unjoni tas-Swieq Kapitali 16 .
Id-Direttiva proposta dwar ir-Rappurtar tas-Sostenibbiltà Korporattiva tkun teħtieġ li l-kumpaniji jirrappurtaw skont l-istandards obbligatorji tal-UE dwar ir-rappurtar dwar is-sostenibbiltà. Il-Kummissjoni se tadotta atti delegati biex tipprovdi għal tali standards filwaqt li tqis il-parir tekniku mill-Grupp Konsultattiv Ewropew għar-Rappurtar Finanzjarju (EFRAG), li jaħdem mal-partijiet ikkonċernati ewlenin, u wara konsultazzjoni mal-Istati Membri u l-korpi rilevanti tal-UE, inklużi l-Awtoritajiet Superviżorji Ewropej, l-Aġenzija Ewropea għall-Ambjent, l-Aġenzija Ewropea għad-Drittijiet Fundamentali u l-Pjattaforma dwar il-Finanzi Sostenibbli. L-ewwel sett ta’ standards se jiġi adottat sa Ottubru 2022.
L-istandards se jitfasslu skont il-politiki tal-UE, filwaqt li jibnu fuq inizjattivi ta’ standardizzazzjoni internazzjonali u jikkontribwixxu għalihom. Għalhekk, filwaqt li timxi ‘l quddiem bl-istandards tal-UE biex tilħaq l-ambizzjoni tal-Patt Ekoloġiku u l-ħtiġijiet dejjem jikbru ta’ informazzjoni tal-investituri, l-Unjoni se tistinka lejn il-konverġenza tar-rappurtar dwar is-sostenibbiltà fil-livell globali, filwaqt li tibni fuq inizjattivi bħat-Task Force dwar id-Divulgazzjonijiet Finanzjarji relatati mal-Klima (TCFD).
Il-Kummissjoni qed tipproponi li tiżviluppa standards għal kumpaniji kbar u standards separati u proporzjonati għall-SMEs. Filwaqt li l-SMEs elenkati fi swieq regolati jkunu meħtieġa jużaw dawn l-istandards proporzjonati, l-SMEs mhux elenkati — li huma l-maġġoranza l-kbira tal-SMEs — jistgħu jagħżlu li jużawhom fuq bażi volontarja. Il-Kummissjoni tinsab lesta li tipprovdi appoġġ tekniku mfassal apposta lill-Istati Membri biex tippermetti r-rappurtar dwar is-sostenibbiltà mill-kumpaniji, b’mod partikolari mill-SMEs.
2.Rekwiżiti koerenti ta’ rappurtar dwar is-sostenibbiltà korporattiva
Id-Direttiva proposta dwar ir-Rappurtar tas-Sostenibbiltà Korporattiva għandha l-għan li tiżgura konsistenza bejn ir-rekwiżiti ta’ rappurtar skont ir-Regolament dwar it-Tassonomija tal-UE u r-rappurtar dwar is-sostenibbiltà tal-kumpaniji. L-Artikolu 8 tar-Regolament dwar it-Tassonomija jirrikjedi li l-kumpaniji li jaqgħu fil-kamp ta’ applikazzjoni tal-NFRD eżistenti, u kumpaniji addizzjonali li jaqgħu fil-kamp ta’ applikazzjoni tad-Direttiva proposta dwar ir-Rapportar tas-Sostenibbiltà Korporattiva, jirrapportaw ċerti indikaturi dwar il-punt sa fejn l-attivitajiet tagħhom huma sostenibbli kif definit mit-Tassonomija tal-UE. B’mod partikolari, dawn il-kumpaniji għandhom jiżvelaw il-proporzjon tal-fatturat, in-nefqa kapitali u l-infiq operattiv tagħhom li huma derivati jew assoċjati ma’ attivitajiet ekonomiċi li jikkwalifikaw bħala ambjentalment sostenibbli.
Dawn l-indikaturi se jiġu speċifikati f’att delegat separat li se japplika mill-2022. Billi jippubblikaw kull sena l-indikaturi ewlenin tal-prestazzjoni tagħhom dwar attivitajiet meqjusa ambjentalment sostenibbli skont it-Tassonomija tal-UE, il-kumpaniji se juru b’mod oġġettiv lill-investituri u lill-pubbliku inġenerali t-trajettorja tagħhom lejn is-sostenibbiltà ambjentali.
Il-kumpaniji se jkollhom jirrappurtaw dawn l-indikaturi flimkien ma’ informazzjoni oħra dwar is-sostenibbiltà b’mandat mid-Direttiva dwar ir-Rappurtar tas-Sostenibbiltà Korporattiva. L-istandards obbligatorji ta’ rappurtar li għandhom jiġu żviluppati skont id-Direttiva dwar ir-Rappurtar tas-Sostenibbiltà Korporattiva se jqisu bis-sħiħ dawn l-indikaturi, u se jibnu fuq il-kriterji ta’ skrinjar u l-limiti ta’ “tagħmilx ħsara sinifikanti” tat-Tassonomija tal-UE. B’mod partikolari, l-istandards ta’ rappurtar dwar is-sostenibbiltà żviluppati se jinkludu indikaturi li huma allinjati mal-indikaturi li l-parteċipanti fis-swieq finanzjarji se jkollhom jirrapportaw skont ir-Regolament dwar id-Divulgazzjoni dwar il-Finanzi Sostenibbli.
Fl-istess ħin, ir-rappurtar skont id-Direttiva proposta dwar ir-Rappurtar tas-Sostenibbiltà Korporattiva se jipprovdi wkoll lill-kumpaniji bil-mezzi biex juru l-progress tagħhom lejn is-sostenibbiltà, minbarra l-livell ta’ allinjament tagħhom mat-Tassonomija. B’mod partikolari, il-kumpaniji għandhom jippreżentaw stampa komprensiva tal-impatti u d-dipendenzi tagħhom fuq is-sostenibbiltà.
Il-Kummissjoni se tiżgura li l-istandards tar-rapportar ma jirriflettux biss l-allinjament tat-tassonomija attwali tal-attivitajiet ta’ kumpanija, iżda wkoll il-pjanijiet tan-negozju tagħha li jħarsu ‘l quddiem, u li l-istandards jiffaċilitaw kemm il-finanzjament ibbażat fuq is-suq kapitali kif ukoll dak ibbażat fuq il-banek. Ir-rappurtar obbligatorju skont ir-Regolament dwar it-Tassonomija se japplika minn Jannar 2022 għall-objettivi tal-mitigazzjoni tat-tibdil fil-klima u l-adattament għalih, u minn Jannar 2023 għall-erba’ objettivi l-oħra, kif maqbul mill-Parlament Ewropew u mill-Kunsill fir-Regolament dwar it-Tassonomija tal-UE.
Il-Kummissjoni se tesplora, inkluż b’input mill-Pjattaforma dwar il-Finanzi Sostenibbli u l-Grupp Konsultattiv Ewropew għar-Rappurtar Finanzjarju, gwida u għażliet xierqa dwar kif l-entitajiet koperti mill-obbligi ta’ rapportar stabbiliti fir-Regolament dwar it-Tassonomija jistgħu jirrapportaw b’mod sinifikanti fl-ewwel sena tal-obbligi ta’ rapportar tagħhom, filwaqt li jitqiesu ċerti lakuni fid-data.
VI.PREFERENZI TA’ SOSTENIBBILTÀ U DMIRIJIET FIDUĊJARJI
Illum il-Kummissjoni qed tintroduċi l-valutazzjoni tal-preferenzi ta’ sostenibbiltà tal-klijenti f’atti delegati eżistenti skont id-Direttiva dwar is-Swieq fl-Istrumenti Finanzjarji (MiFID II) 17 u d-Direttiva dwar id-Distribuzzjoni tal-Assigurazzjoni (IDD) 18 , bħala żieda għall-valutazzjoni tal-adegwatezza. Il-konsulenti tal-assigurazzjoni u tal-investiment se jkunu meħtieġa jiksbu informazzjoni mhux biss dwar l-għarfien u l-esperjenza tal-investiment tal-klijent, il-kapaċità li jġorr it-telf, u t-tolleranza tar-riskju bħala parti mill-valutazzjoni tal-adegwatezza, iżda wkoll dwar il-preferenzi tas-sostenibbiltà tagħhom. Dan se jiżgura li l-kunsiderazzjonijiet ta’ sostenibbiltà jitqiesu fuq bażi sistematika meta l-konsulenti jivvalutaw il-firxa ta’ strumenti u prodotti finanzjarji fir-rakkomandazzjonijiet tagħhom lill-klijenti.
Din l-azzjoni se tagħti s-setgħa lill-investituri fil-livell tal-konsumatur biex jiddeċiedu fejn u kif għandu jiġi investit it-tfaddil tagħhom. B’dan il-mod, kulħadd ikollu l-opportunità li jagħmel impatt pożittiv tanġibbli fuq il-klima, l-ambjent u s-soċjetà jekk ikun jixtieq jagħmel dan. Il-bidla se żżid id-domanda għal strumenti u prodotti finanzjarji bi strateġiji ta’ investiment sostenibbli u dawk li jqisu impatt negattiv fuq is-sostenibbiltà.
Billi temenda r-regoli eżistenti dwar id-dmirijiet fiduċjarji fl-atti delegati għall-ġestjoni tal-assi, is-setturi tal-assigurazzjoni u l-assigurazzjoni mill-ġdid u tal-investiment, il-Kummissjoni qed tiċċara r-regoli attwali li jinkludu wkoll riskji għas-sostenibbiltà bħall-impatt tat-tibdil fil-klima u d-degradazzjoni ambjentali fuq il-valur tal-investimenti.
VII.KONKLUŻJONI
L-Att Delegat dwar it-Tassonomija tal-UE dwar il-Klima, il-proposta għad-Direttiva dwar ir-Rappurtar tas-Sostenibbiltà Korporattiva deskritti f’din il-Komunikazzjoni, kif ukoll l-emendi għall-atti delegati rigward il-preferenzi tas-sostenibbiltà, id-dmirijiet fiduċjarji u l-governanza tal-prodotti huma passi importanti fl-implimentazzjoni tal-Pjan ta’ Azzjoni eżistenti dwar il-Finanzjament tat-Tkabbir Sostenibbli u t-twettiq tal-Patt Ekoloġiku Ewropew.
Din l-ekosistema ta’ finanzjament sostenibbli hija parti minn strateġija usa’ biex tinkiseb il-bidla u tiġi żgurata tranżizzjoni ġusta biex jintlaħqu l-għanijiet tas-sostenibbiltà tagħna. Dawn huma l-pedamenti biex tiżdied it-trasparenza u jiġu pprovduti għodod għall-investituri biex jidentifikaw opportunitajiet ta’ investiment sostenibbli. Dawn se jippermettu li jiġu żviluppati għadd ta’ għodod futuri, bħall-ekotikketta għall-prodotti finanzjarji għall-konsumatur u l-Istandard tal-Bonds Ekoloġiċi tal-UE.
Id-djalogu, il-kooperazzjoni u s-sħubija b’saħħitha bejn l-awtoritajiet, l-atturi korporattivi u finanzjarji, is-sħab soċjali, is-soċjetà ċivili, u l-komunità tar-riċerka u dik akkademika se jkunu kruċjali biex ikomplu jiġu żviluppati l-għodod finanzjarji sostenibbli, inkluż permezz tal-Pjattaforma dwar il-Finanzi Sostenibbli.
Il-momentum qed jiżdied u ħafna mis-sħab internazzjonali tagħna qed iżidu l-ambizzjoni u jsegwu perkorsi ta’ żvilupp aktar sostenibbli allinjati mal-Ftehim ta’ Pariġi u għanijiet ambjentali oħra. L-aptit għal prodotti sostenibbli fis-swieq internazzjonali qed jikber ukoll, u joffri aktar opportunitajiet għal investimenti sostenibbli. Il-konverġenza globali tal-istandards hija essenzjali biex jiġu evitati swieq frammentati u biex l-investimenti transfruntiera jkunu jistgħu jgħinu biex jintlaħqu l-għanijiet klimatiċi u ambjentali globali. L-UE tibqa’ impenjata li jkollha rwol ewlieni fit-tisħiħ tal-kooperazzjoni globali permezz tal-Pjattaforma Internazzjonali dwar il-Finanzi Sostenibbli u fora internazzjonali oħra bħall-G20 u l-G7.
L-istrateġija aġġornata dwar il-Finanzi Sostenibbli li għandha tiġi adottata mill-Kummissjoni f’Ġunju 2021 se tkompli tistabbilixxi kif il-finanzjament sostenibbli se jrawwem it-tranżizzjoni lejn ekonomija sostenibbli u newtrali għall-klima.
Is-sehem ta’ kumpaniji domiċiljati fl-UE b’aktar minn 500 impjegat attivi f’setturi ekonomiċi koperti mill-Att Delegat dwar it-Tassonomija tal-UE dwar il-Klima (Sors: Bloomberg).
Sors: il-Eurostat.
Ir-Regolament (UE) 2020/852 tal-Parlament Ewropew u tal-Kunsill tat-18 ta' Ġunju 2020 dwar l-istabbiliment ta' qafas biex jiġi ffaċilitat l-investiment sostenibbli, u li jemenda r-Regolament (UE) 2019/2088, ĠU L 198, 22.6.2020, p. 13.
Ir-Regolament Delegat tal-Kummissjoni li jissupplimenta r-Regolament (UE) 2020/852 tal-Parlament Ewropew u tal-Kunsill billi jistabbilixxi l-kriterji tekniċi ta’ skrinjar biex jiġu ddeterminati l-kundizzjonijiet li taħthom attività ekonomika tikkwalifika bħala li tikkontribwixxi b’mod sostanzjali għall-mitigazzjoni tat-tibdil fil-klima jew għall-adattament għat-tibdil fil-klima u biex jiġi ddeterminat jekk dik l-attività ekonomika tikkawżax ħsara sinifikanti lil xi wieħed mill-objettivi ambjentali l-oħra, ara https://ec.europa.eu/info/law/sustainable-finance-taxonomy-regulation-eu-2020-852/amending-and-supplementary-acts/implementing-and-delegated-acts_en.
Proposta għal direttiva li temenda d-Direttiva 2013/34/UE, id-Direttiva 2004/109/KE, id-Direttiva 2006/43/KE u r-Regolament (UE) Nru 537/2014, fir-rigward tar-rappurtar korporattiv minn ċerti impriżi, COM (2021) 189.
L-Artikolu 9 tar-Regolament dwar it-Tassonomija tal-UE jispeċifika s-sitt objettivi ambjentali li ġejjin: (a) il-mitigazzjoni tat-tibdil fil-klima, (b) l-adattament għat-tibdil fil-klima, (c) l-użu sostenibbli u l-protezzjoni tar-riżorsi tal-ilma u tal-baħar, (d) it-tranżizzjoni lejn ekonomija ċirkolari, (e) il-prevenzjoni u l-kontroll tat-tniġġis, (f) il-protezzjoni u r-restawr tal-bijodiversità u l-ekosistemi.
Il-Pjattaforma dwar il-finanzjament sostenibbli nħolqot mill-Artikolu 20 tar-Regolament dwar it-Tassonomija tal-UE. Hija magħmula minn esperti mis-settur privat u pubbliku li jagħtu pariri lill-Kummissjoni dwar l-iżvilupp ulterjuri tat-Tassonomija tal-UE.
Ir-Regolament (UE) 2021/241 tal-Parlament Ewropew u tal-Kunsill tat-12 ta’ Frar 2021 li jistabbilixxi l-Faċilità għall-Irkupru u r-Reżiljenza, ĠU L 57, 18.2.2021, p. 17.
Avviż tal-Kummissjoni dwar il-Gwida teknika dwar l-applikazzjoni ta’ “tagħmilx ħsara sinifikanti” skont ir-Regolament dwar l-Irkupru u r-Reżiljenża ,2021/C 58/01, ĠU C 58, 18.2.2021, p. 1.
Iċ-Ċentru Konġunt tar-Riċerka, Valutazzjoni teknika tal-enerġija nukleari fir-rigward tal-kriterji “tagħmilx ħsara sinifikanti” tar-Regolament dwar it-Tassonomija tal-UE, Marzu 2021. Disponibbli permezz tal- link li ġejja.
Ir-rapport taċ-Ċentru Konġunt tar-Riċerka huwa maqsum f’żewġ partijiet: l-ewwel parti tiffoka fuq l-istudju tal-indikaturi ambjentali rilevanti dwar il-kriterju “tagħmilx ħsara sinifikanti” fuq iċ-ċiklu tal-ħajja nukleari kollu u t-tieni parti tiffoka fuq il-kwistjoni speċifika relatata mal-iskart li kienet ġiet enfasizzata mit-TEG. Ir-rapport sab li: “L-analiżijiet ma żvelaw l-ebda evidenza bbażata fuq ix-xjenza li l-enerġija nukleari tagħmel aktar ħsara lis-saħħa tal-bniedem jew lill-ambjent minn teknoloġiji oħra tal-produzzjoni tal-elettriku li diġà huma inklużi fit-Tassonomija bħala attivitajiet li jappoġġaw il-mitigazzjoni tat-tibdil fil-klima.
Soġġett għall-kundizzjonijiet speċifiċi fl-Anness III tal-Avviż tal-Kummissjoni dwar Gwida teknika dwar l-applikazzjoni ta’ “tagħmilx ħsara sinifikanti” skont ir-Regolament dwar il-Faċilità għall-Irkupru u r-Reżiljenza.
Pjattaforma dwar Finanzi Sostenibbli, rapport dwar il-Finanzi għat-Tranżizzjoni, Marzu 2021. Disponibbli permezz tal- link li ġejja.
Ir-Regolament (UE) 2019/2088 tal-Parlament Ewropew u tal-Kunsill tas-27 ta' Novembru 2019 dwar divulgazzjonijiet relatati mas-sostenibbiltà fis-settur tas-servizzi finanzjarji, ĠU L 317, 9.12.2019, p. 1.
Il-Komunikazzjoni tal-Kummissjoni dwar Unjoni tas-Swieq Kapitali għall-persuni u n-negozji – pjan ta’ azzjoni ġdid, COM(2020) 590 final.
Ir-Regolament Delegat tal-Kummissjoni (UE) 2017/565 tal-25 ta' April 2016 li jissupplimenta d-Direttiva 2014/65/UE tal-Parlament Ewropew u tal-Kunsill rigward rekwiżiti organizzazzjonali u kundizzjonijiet għall-operat għal ditti tal-investiment u termini definiti għall-finijiet ta' dik id-Direttiva, ĠU L 87, 31.3.2017, p. 1.
Ir-Regolament Delegat tal-Kummissjoni (UE) 2017/2359 tal-21 ta' Settembru 2017 li jissupplimenta d-Direttiva (UE) 2016/97 tal-Parlament Ewropew u tal-Kunsill fir-rigward ta' rekwiżiti ta' informazzjoni u regoli tal-kondotta tal-operazzjonijiet applikabbli għad-distribuzzjoni ta' prodotti ta' investiment fl-assigurazzjoni, ĠU L 341, 20.12.2017, p. 8.