Comhtháthú eacnamaíoch, sóisialta agus críochach

Ón tús, bhí sé mar phríomhchuspóir de chuid an Aontais Eorpaigh (AE) na héagothromaíochtaí eacnamaíocha agus sóisialta idir a réigiúin an-éagsúil a laghdú trína bheartas comhtháthaithe. Chuir Conradh Liospóin an tríú gné isteach: comhtháthú críochach.

Baineann AE úsáid as cistí ar mhaithe le tacaíocht a thabhairt do Bhallstáit uile AE agus do réigiúin maidir lena bhforbairt eacnamaíoch agus shóisialta agus ar mhaithe le haghaidh a thabhairt ar fhadhbanna faoi leith de chatagóirí réigiún amhail:

• réigiúin ina bhfuil míbhuntáistí móra buana nádúrtha nó déimeagrafacha (e.g. réigiúin ina bhfuil dlús daonra an–íseal, oileáin, réigiúin trasteorann agus sléibhtiúla);
• ceantair a dtéann an t–aistriú glas agus an t–aistriú digiteach i bhfeidhm orthu; agus
• limistéir thuaithe.

Déantar bainistíocht ar mhaoiniú chun críocha comhtháthaithe de ghnáth i gcomhpháirtíocht idir an gCoimisiún Eorpach agus na húdaráis náisiúnta agus réigiúnacha. Tá sé dírithe ar thosaíochtaí AE agus cuirtear ar fáil é go príomha uathu seo a leanas:

• Ciste Forbraíochta Réigiúnaí na hEorpa
• Ciste Sóisialta na hEorpa
• an Ciste Eorpach Comhtháthaithe
• an Ciste um Aistriú Cóir.

Cistí AE eile a thacaíonn le comhtháthú trí na hinfheistíochtaí atá acu ná:

• an Ciste Eorpach Muirí agus Iascaigh
• an Ciste Eorpach Talmhaíochta um Fhorbairt Tuaithe
• an Banc Eorpach Infheistíochta.

Tugann Airteagail 174-178 den Chonradh ar Fheidhmiú AE an bunús dlí le haghaidh bheartas comhtháthaithe AE.