An Comhaontú Idirnáisiúnta Caife 2007

PRÍOMHPHOINTÍ

Tá AE ina bhall den Eagraíocht Idirnáisiúnta Caife mar institiúid idirnáisiúnta, mar aon le 31 tír allmhairíochta agus 45 tír onnmhairíochta. Arna shíniú ag 77 ball den Eagraíocht Idirnáisiúnta Caife, tá sé mar aidhm leis an gComhaontú Idirnáisiúnta Caife 2007 forbairt inbhuanaithe na hearnála caife ar fud an domhain a fheabhsú agus a chur chun cinn ar na bealaí a leanas:

• comhar idirnáisiúnta maidir le cúrsaí caife a chur chun cinn;
• fóram a sholáthar le haghaidh comhairliúcháin i measc rialtas agus leis an earnáil phríobháideach;
• sínitheoirí a spreagadh chun earnáil caife inbhuanaithe a fhorbairt ón taobh eacnamaíoch, sóisialta agus comhshaoil de;
• féachaint le cothromaíocht a fháil idir soláthar agus éileamh agus praghsáil chóir do thomhaltóirí agus do tháirgeoirí araon;
• méadú agus trédhearcacht na trádála idirnáisiúnta caife a éascú agus díothú bacainní ar thrádáil a chur chun cinn;
• faisnéis eacnamaíoch, theicniúil agus eolaíoch, staidreamh agus staidéir ar chúrsaí a bhaineann le caife a bhailiú, a scaipeadh agus a fhoilsiú;
• forbairt tomhaltais agus margaí le haghaidh gach cineál caife a chur chun cinn, lena n-áirítear tíortha ina dtáirgtear caife;
• maoiniú a fhorbairt agus a iarraidh i leith tionscadal lena mbaineann tairbhe do gheilleagar caife an domhain;
• cáilíocht chaife a chur chun cinn chun sásamh custaiméirí agus tairbhí do tháirgeoirí a fheabhsú;
• tacú le forbairt nósanna imeachta um shábháilteacht bia san earnáil;
• tacú le forbairt straitéisí chun feabhas a chur ar acmhainn feirmeoirí ar mhionscála chun tairbhe a bhaint as táirgeadh caife, agus is féidir leis sin cur le laghdú na bochtaineachta;
• infhaighteacht faisnéise maidir le huirlisí agus seirbhísí airgeadais atá ábalta cuidiú le táirgeoirí a éascú.

Sa chomhthéacs sin, sonraítear sa chomhaontú go gcaithfidh a shínitheoirí iarracht a dhéanamh teorainn a chur le bacainní a bhaineann le taraifí agus bacainní rialála ar thomhaltas caife, amhail taraifí fabhracha, cuótaí, monaplachtaí agus fóirdheontais an rialtais. Ní mór dóibh chomh maith breathnú go cuí ar bhainistíocht inbhuanaithe acmhainní caife, i gcomhréir leis na prionsabail agus na cuspóirí maidir le forbairt inbhuanaithe atá cuimsithe i gClár Oibre 21 (plean gníomhaíochta de chuid na Náisiún Aontaithe i ndáil le forbairt inbhuanaithe a comhaontaíodh ag Comhdháil na Náisiún Aontaithe ar Chomhshaol agus Forbairt 1992, ar cuireadh Clár Oibre 2030 ina ionad ag an gCruinniú Mullaigh maidir le Forbairt Inbhuanaithe, 2015), agus ar an bhfeabhas ar chaighdeán maireachtála agus ar dhálaí oibre na ndaoine a oibríonn san earnáil caife.

Ceanglaítear leis an gcomhaontú chomh maith ar thíortha onnmhairíochta córas na nDeimhnithe Tionscnaimh a chur chun feidhme arna bhunú ag an gCumann Idirnáisiúnta Lucht Tráchtála chun bailiú staidrimh maidir leis an trádáil idirnáisiúnta caife a éascú, agus faisnéis ar bith a mheasann sé is gá maidir le táirgeadh, allmhairí, onnmhairí, tomhaltas agus praghsanna a chur ar fáil don Chumann Idirnáisiúnta Lucht Tráchtála.

Tagann cúrsaí a rialaítear leis an gcomhaontú faoi inniúlacht eisiach AE faoin gcomhbheartas trádála.