Grúpa na Stát san Afraic, i Muir Chairib agus san Aigéan Ciúin (ACP)

Cuimsítear san iar-Ghrúpa ACP (a tháinig chun bheith mar Eagraíocht na Stát san Afraic, i Muir Chairib agus san Aigéan Chiúin (OACPS) in Aibreán 2020) 79 stát san Afraic, i Muir Chairib agus san Aigéan Ciúin a bhfuil caidreamh speisialta ag an Aontas Eorpach (AE) leo. Shínigh tíortha OACPS go léir, seachas Cúba, Comhaontú Cotonou (Comhaontú Comhpháirtíochta ACP-AE) in 2000. Le breis agus 20 bliain, bhí an comhaontú seo lárnach i mbeartas AE maidir le comhar forbartha atá leagtha síos in Airteagal 208 den Chonradh ar Fheidhmiú an Aontais Eorpaigh.

I dtosach bhí sé le dul in éag i mí Feabhra 2020, ach leathnaíodh an comhaontú go dtí Samhain 2021, agus tá sé bunaithe ar thrí cholún:

comhar forbartha,
comhar eacnamaíoch agus trádála,
an ghné pholaitiúil.

In Aibreán 2021, chuir an tAontas agus OACPS tús le comhaontú nua a thiocfaidh i bhfeidhm tar éis Comhaontú Cotonou. Tá sé mar aidhm ag an gcomhaontú sin acmhainneacht AE agus tíortha ACP a neartú chun aghaidh a thabhairt ar dhúshláin dhomhanda le chéile.

Leagann sé síos comhphrionsabail agus cumhdaítear leis na réimsí tosaíochta a leanas:

daonlathas agus cearta an duine,
fás agus forbairt eacnamaíoch inbhuanaithe,
an t-athrú aeráide
forbairt dhaonna agus shóisialta,
síocháin agus slándáil,
imirce agus soghluaisteacht.

Tá socruithe reatha trádála ACP-AE bunaithe ar chomhaontuithe comhpháirtíochta eacnamaíche. Nascann siad sin an tAontas le tíortha ACP i seacht ngrúpa réigiúnacha.

Réigiún FHÓRAM MHUIR CHAIRIB (An Mhuir Chairib). Antigua agus Barbúda, Na Bahámaí, Barbadós, an Bheilís, Cúba, Doiminice, an Phoblacht Dhoiminiceach, Greanáda, an Ghuáin, Háití, Iamáice, San Críostóir-Nimheas, Saint Lucia, San Uinseann agus na Greanáidíní, Suranam agus Oileán na Tríonóide agus Tobága.
Iarthar na hAfraice. Beinin, Buircíne Fasó, Cabo Verde, an Cósta Eabhair, Gána, an Ghuine, Guine-Bissau, an Libéir, Mailí, an Mháratáin, an Nígir, an Nigéir, an tSeineagáil, Siarra Leon, An Ghaimbia agus Tóga.
Lár na hAfraice. Camarún, Poblacht na hAfraice Láir, Sead, an Chongó, Poblacht Dhaonlathach an Chongó, an Ghuine Mheánchriosach, an Ghabúin agus São Tomé agus Príncipe.
Oirthear agus Deisceart na hAfraice. Oileáin Chomóra, Djibouti, Eiritré, an Aetóip, Madagascar, an Mhaláiv, Oileán Mhuirís, na Séiséil, an tSúdáin, an tSaimbia agus an tSiombáib.
Pobal Oirthear na hAfraice. An Bhurúin, an Chéinia, Ruanda, an Tansáin agus Uganda.
Pobal forbartha Dheisceart na hAfraice. An Bhotsuáin, Eswatini, Leosóta, Mósaimbíc, an Namaib agus an Afraic Theas.
Réigiún an Aigéin Chiúin. Oileáin Cook, Fidsí, Ciribeas, Oileáin Marshall, an Mhicrinéis, Nárú, Niue, Palau, Nua-Ghuine Phapua, Samó, Oileáin Sholamón, Tonga, Túvalú agus Vanuatú.

FÉACH FREISIN