Ráitis airgeadais cuideachtaí atá inchomparáide agus soiléir ar fud an Aontais

PRÍOMHPHOINTÍ

• Tá feidhm ag an reachtaíocht seo maidir le cineálacha cuideachtaí atá faoi dhliteanas teoranta san Aontas Eorpach (AE).
• Sainmhínítear agus déantar idirdhealú sa reachtaíocht idir micreachuideachtaí, cuideachtaí beaga, cuideachtaí meánmhéide agus cuideachtaí móra, bunaithe ar an méid seo a leanas:
  • a gclár comhardaithe,
  • a nglanláimhdeachas,
  • meánlíon na bhfostaithe le linn bliain airgeadais.
• Maidir le gach ceann de na catagóirí seo a leanas, leagtar amach trí theorainn, agus ní cheadaítear dhá cheann díobh sin a shárú:
  • micreaghnóthais: clár comhardaithe (€350,000), glanláimhdeachas (€700,000), fostaithe (10);
  • gnóthais bheaga: clár comhardaithe (€4 mhilliún), glanláimhdeachas (€8 milliún), fostaithe (50);
  • gnóthais mheánmhéide: clár comhardaithe (€20 milliún), glanláimhdeachas (€40 milliún), fostaithe (250).
• Gnóthais mhóra a sháraíonn dhá cheann ar a laghad de na trí chritéar seo a leanas: clár comhardaithe (€20 milliún), glanioncam (€40 milliún), fostaithe (250).
• Le gníomh tarmligthe, Treoir (AE) 2023/2775, atá le comhlíonadh ag Ballstáit AE faoin 24 Nollaig 2024, déantar na critéir a choigeartú mar a leanas:
  • micreaghnóthais: clár comhardaithe (€450,000), glanláimhdeachas (€900,000), fostaithe (10);
  • gnóthais bheaga: clár comhardaithe (€5 mhilliún, nó suas le €7.5 milliún de rogha an Bhallstáit), glanláimhdeachas (€10 milliún, nó suas le €15 mhilliún), fostaithe (50);
  • gnóthais mheánmhéide: clár comhardaithe (€25 milliún), glanláimhdeachas (€50 milliún), fostaithe (250);
  • gnóthais mhóra a sháraíonn dhá cheann ar a laghad de na trí chritéar seo a leanas: clár comhardaithe (€25 milliún), glanioncam (€50 milliún), fostaithe (250).

Mar an gcéanna, leagtar amach sa treoir rialacha comhchosúla do ghrúpaí cuideachta (ina bhfuil máthairchuideachtaí agus fochuideachtaí) de mhéideanna éagsúla.

• Ní mór an méid seo a leanas a bheith ag baint leis na ráitis airgeadais bhliantúla:
  • ar a laghad, an clár comhardaithe, an cuntas brabúis agus caillteanais agus na nótaí leis na ráitis airgeadais¹;
  • tugtar léargas fíorcheart iontu maidir le sócmhainní, dliteanais, staid airgeadais agus brabús nó caillteanas na cuideachta;
  • foilsíonn gach cuideachta gach bliain iad sa chlár náisiúnta gnó ábhartha.
• Leagtar amach sa treoir prionsabail ghinearálta maidir le tuairisciú airgeadais, amhail cur i bhfeidhm comhsheasmhach na mbeartas cuntasaíochta agus na mbonn tomhais ó bhliain go chéile.
• Cumhdaítear i rialacha mionsonraithe cur i láthair na gclár comhardaithe, na gcuntas brabúis agus caillteanais agus na nótaí a ghabhann leis na ráitis airgeadais chomh maith le tuarascálacha bainistíochta, faisnéis neamhairgeadais, rialachas corparáideach agus ráitis chomhdhlúite.
• D’fhéadfadh na hoibleagáidí a bheith éagsúil ag brath ar mhéid na cuideachta agus déantar foráil sa treoir i leith díolúintí nó simplithe i mórán réimsí do mhicreaghnóthais agus do FBManna. Is faoi gach Ballstát AE atá sé méid na ndíolúintí nó na simplithe sin a chinneadh.
• Ní foláir go ndéanfaidh iniúchóirí reachtúla amháin nó níos mó ráitis airgeadais eintiteas leasa phoiblí agus gnóthas meánmhéide agus mór a iniúchadh.
• Cuideachtaí móra a bhfuil baint acu le mianadóireacht mianraí, ola, gás nádúrtha nó ábhair eile nó na cinn a bhfuil baint acu le lománaíocht i bhforaoisí príomhúla² ní mór sonraí faoi íocaíochtaí os cionn €100,000 san iomlán a fhoilsiú a rinne siad le rialtais in aon bhliain airgeadais.
• Ón 22 Meitheamh 2023 i leith, tá feidhm ag Caibidil 10a de Threoir 2013/34/AE a bhaineann le faisnéis faoi nochtadh cánach ioncaim ag grúpaí ilnáisiúnta a bhfuil ioncam comhdhlúite bliantúil de níos mó ná €750 milliún acu.
  • Ceanglófar ar mháthairchuideachtaí na ngrúpaí sin a dhearbhú, i dtuarascáil shonrach a fhoilsítear ar a suíomh gréasáin, a n–ioncam, a mbrabúis, an cháin ioncaim chorparáide a íocadh agus líon na bhfostaithe in aghaidh an Bhallstáit, agus in aghaidh na tíre nach tír den Aontas Eorpaigh í agus nach gcomhoibríonn leis an Aontas maidir le cúrsaí cánach nó nach gcomhlíonann na caighdeáin go léir ach a bhfuil gealltanas tugtha aici athchóiriú a dhéanamh;
  • Le cláir ghnó, soláthraítear rochtain phoiblí ar na tuarascálacha sin freisin.
  • Ní mór do ghrúpaí ilnáisiúnta nach bhfuil bunaithe san Aontas atá i mbun gnó san Aontas tuairisciú ar an gcaoi chéanna.
• Le rialacha maidir le tuairisciú inbhuanaitheachta corparáideach, ceanglaítear ar ghnóthais bheaga, mheánmhéide agus mhóra (ní micrighnóthais) atá liostaithe ar mhargaí arna rialáil ag an Aontas — agus máthairchuideachtaí grúpaí móra — a chuimsiú ina dtuarascáil um bainistíocht faisnéis a bhaineann le tionchar na cuideachta ar chúrsaí inbhuanaitheachta (amhail cearta comhshaoil, cearta sóisialta, cearta an duine agus tosca rialachais), chomh maith le faisnéis atá riachtanach chun tuiscint a fháil ar an dóigh a n–imríonn gnéithe inbhuanaitheachta tionchar ar a forbairt, a feidhmíocht agus a staid. Déanfar cur i bhfeidhm na rialacha sin a chéimniú amach de réir a chéile (féach thíos). Sna hiarscríbhinní agus sna haguisíní a ghabhann leis, leagtar amach i Rialachán Tarmligthe (AE) 2023/2772 rialacha mionsonraithe maidir le caighdeáin tuairiscithe inbhuanaitheachta an Aontais atá le húsáid ag cuideachtaí lena dtuairisciú inbhuanaitheachta a dhéanamh, de réir an tráthchláir a leagtar amach i dTreoir (AE) 2022/2464.
• Le Treoir leasaitheach (AE) 2023/2864, cuirtear isteach airteagal maidir le hinrochtaineacht na faisnéise atá le foilsiú faoi Threoir 2013/34/AE maidir leis an bpointe rochtana aonair Eorpach (ESAP) arna bhunú faoi Rialachán (AE) 2023/2859 — féach an achoimre. Soláthrófar leis an bpointe rochtana aonair Eorpach rochtain ar fhaisnéis phoiblí airgeadais agus faisnéis inbhuanaitheachta faoi chuideachtaí AE agus faoi tháirgí infheistíochta AE. Ón 10 Eanáir 2028, agus a dtuarascálacha agus a ráitis éagsúla á gcur ar fáil don phobal acu (e.g. tuarascálacha bainistíochta, ráitis airgeadais bhliantúla agus chomhdhlúite agus tuarascálacha iniúchóireachta, dearbhaithe agus inbhuanaitheachta), beidh ar chuideachtaí na tuarascálacha agus na ráitis sin a chur isteach ag an am céanna chuig an gcomhlacht bailiúcháin ainmnithe chun iad a dhéanamh inrochtana ar an ESAP.

Aisghairm

• Le Treoir 2013/34/AE, aisghairtear treoracha cuntasaíochta a bhí ann roimhe seo (Treoracha 78/660/CEE agus 83/349/CEE) agus leasaítear Treoir 2006/43/CE (féach an achoimre).