Pointe rochtana aonair Eorpach

PRÍOMHPHOINTÍ

Beidh na sonraí seo a leanas sa phointe rochtana, sonraí a thiomsóidh comhlachtaí sonracha bailiúcháin²:

• an fhaisnéis a cheanglaítear le dlí reatha an Aontais (liostaítear san Iarscríbhinn na 19 rialachán agus 16 threoir atá i bhfeidhm) agus aon ghníomhartha atá ceangailteach ó thaobh dlí de ina dhiaidh sin;
• faisnéis a chuirtear isteach go deonach.

Leagtar amach leis an rialachán amchlár le haghaidh taisceadh deonach:

• faoin 10 Eanáir 2028, ní mór do na húdaráis mhaoirseachta Eorpacha ábhartha na caighdeáin theicniúla riachtanacha a dhréachtú agus iad sin a chur faoi bhráid an Choimisiúin Eorpaigh;
• faoin 9 Eanáir 2030, ní mór do Bhallstáit AE comhlacht bailiúcháin amháin ar a laghad a ainmniú chun an fhaisnéis a fháil;
• ón 10 Eanáir 2030, féadfaidh eintiteas faisnéis a chur isteach chuig comhlacht bailiúcháin náisiúnta, mar aon leis meiteashonraí iomchuí³.

Maidir leis na comhlachtaí bailiúcháin:

• déanann siad an fhaisnéis a bhailiú, a stóráil agus a bhailíochtú;
• soláthraíonn siad an fhaisnéis agus na meiteashonraí don phointe rochtana aonair saor in aisce laistigh de theorainneacha ama;
• áirithíonn siad go mbeidh an fhaisnéis ar fáil don phointe rochtana ar feadh 10 mbliana ar a laghad nó ar feadh tréimhse nach faide ná 5 bliana i gcás ina bhfuil sonraí pearsanta san fhaisnéis, nó gur faisnéis stairiúil í⁴;
• féadfaidh siad diúltú d’fhaisnéis a mheasann siad gur léir go bhfuil sí míchuí, maslach nó lasmuigh de raon feidhme na reachtaíochta;

Maidir le ESMA:

• foilsíonn sé liosta de na comhlachtaí bailiúcháin agus coinníonn siad cothrom le dáta é;
• cuireann sé beartas slándála TF éifeachtach agus comhréireach ar bun don phointe rochtana, agus déanann sé athbhreithniú tréimhsiúil air i bhfianaise treochtaí agus forbairtí cibearshlándála;
• seiceálann sé go soláthraíonn an pointe rochtana na feidhmeanna atá liostaithe sa reachtaíocht;
• áirithíonn sé go bhfuil an rochtain ar fhaisnéis neamh–idirdhealaitheach agus go bhfuil rochtain dhíreach agus láithreach saor in aisce uirthi ag úsáideoirí, go háirithe institiúidí AE agus náisiúnta, eagraíochtaí nuachta, an saol acadúil agus eagraíochtaí neamhrialtasacha;
• féadfaidh sé táillí a ghearradh as seirbhísí sonracha lena mbaineann costais arda nó íoslódálacha de mhéideanna móra faisnéise;
• úsáideann sé bailíochtú uathoibrithe lena fhíorú go gcomhlíonann an fhaisnéis a chuir na comhlachtaí bailiúcháin isteach an rialachán;
• comhoibríonn sé go dlúth leis an Údarás Baincéireachta Eorpach agus leis an Údarás Eorpach um Árachas agus Pinsin Cheirde chun;
  • a áirithiú go mbeidh an fhaisnéis ar an bpointe rochtana inrochtana gan mhoill mhíchuí;
  • tacaíocht seirbhíse a sholáthar do chomhlachtaí bailiúcháin;
  • a áirithiú go mbeidh an pointe rochtana inrochtana 97% ar a laghad den am in aghaidh na míosa,
  • dul i gcomhairle leis na comhlachtaí bailiúcháin;
  • faireachán a dhéanamh ar obair an phointe rochtana, go cáilíochtúil agus go cainníochtúil araon, agus tuairisciú go bliantúil don Choimisiún, do Pharlaimint na hEorpa agus do Chomhairle an Aontais Eorpaigh.

Ní mór na feidhmeanna seo a leanas ar a laghad a bheith sa phointe rochtana:

• tairseach ghréasáin lena bhfuil comhéadan so–úsáidte, ina gcuirtear riachtanais daoine faoi mhíchumas san áireamh, lena soláthraítear faisnéis i dteangacha oifigiúla uile an Aontais;
• comhéadan feidhmchláir aonair lenar féidir rochtain éasca a fháil ar an bhfaisnéis;
• feidhm chuardaigh i ngach teanga oifigiúil AE lena n–éascaítear cuardach ar bhonn meiteashonraí éagsúla;
• amharcóir faisnéise;
• seirbhís íoslódála, lena n–áirítear chun méideanna móra sonraí a íoslódáil;
• seirbhís mheaisínaistriúcháin don fhaisnéise a aisghabhtar (faoin 10 Iúil 2028);
• seirbhís fógraí lena gcuirtear faisnéis nua in iúl do na húsáideoirí (faoin 10 Iúil 2028);
• an fhaisnéis a chuirtear isteach go deonach a chur i láthair ionas go mbeidh sé inaitheanta go héasca (faoin 9 Eanáir 2030).

Maidir leis an gCoimisiún:

• faoin 10 Eanáir 2029, i ndlúthchomhar le ESMA, tuairisceoidh sé don Pharlaimint agus don Chomhairle maidir le hobair agus éifeachtúlacht an phointe rochtana;
• féadfaidh sé gníomhartha tarmligthe a ghlacadh chun codanna den rialachán a fhorbairt.