This document is an excerpt from the EUR-Lex website
Document 52012DC0556
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS The EU's External Aviation Policy - Addressing Future Challenges
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SO\u266?JALI EWROPEW U LILL-KUMITAT TAR-RE\u288?JUNI Il-Politika Esterna tal-UE dwar l-Avjazzjoni \u8211? Nindirizzaw l-Isfidi tal-Futur
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SO\u266?JALI EWROPEW U LILL-KUMITAT TAR-RE\u288?JUNI Il-Politika Esterna tal-UE dwar l-Avjazzjoni \u8211? Nindirizzaw l-Isfidi tal-Futur
/* COM/2012/0556 final */
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SO\u266?JALI EWROPEW U LILL-KUMITAT TAR-RE\u288?JUNI Il-Politika Esterna tal-UE dwar l-Avjazzjoni \u8211? Nindirizzaw l-Isfidi tal-Futur /* COM/2012/0556 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI
EWROPEW U LILL-KUMITAT TAR-REĠJUNI Il-Politika Esterna tal-UE dwar l-Avjazzjoni
– Nindirizzaw l-Isfidi tal-Futur 1. Introduzzjoni 1. L-avjazzjoni għandha
rwol fundamentali fl-ekonomija Ewropea għaċ-ċittadini u
għall-industrija tal-UE. Issostni 5.1 miljun impjieg u
tikkontribwixxi EUR 365 biljun jew 2.4% mill-PDG Ewropew[1], u għalhekk hija
ta’ kontribuzzjoni vitali għat-tkabbir ekonomiku, ix-xogħol, it-turiżmu,
il-kuntatti bejn il-persuni kif ukoll għall-koeżjoni reġjonali u
soċjali tal-Unjoni. Kif stabbilit fil-White Paper dwar it-Trasport[2] tal-Kummissjoni
tal-2011, l-avjazzjoni għadha u tibqa' essenzjali biex tgħaqqad
l-Ewropa mal-bqija tad-dinja. Matul l-aħħar żewġ
deċennji, bit-tneħħija tal-ostakli storiċi, l-UE
ittrasformat u integrat swieq tal-avjazzjoni nazzjonali frammentati fl-uniku,
l-akbar u l-aktar suq tal-avjazzjoni reġjonali miftuħ fid-dinja. 2. Iżda l-Ewropa intlaqtet
aktar bil-qawwi mir-reċessjoni globali milli reġjuni oħra, u
l-pożizzjoni kompetittiva tal-linji tal-ajru internazzjonali tagħha
b’mod partikolari, tinsab taħt theddida minn għadd ta’ sfidi
differenti. Din il-Komunikazzjoni ssostni li l-politika esterna tal-UE dwar
l-avjazzjoni teħtieġ trasformazzjoni kbira u rapida biex tegħleb
dawn l-isfidi. L-Ewropa għandha żżomm industrija tal-avjazzjoni
qawwija u kompetittiva fiċ-ċentru tan-netwerk globali li
jgħaqqad l-UE mal-bqija tad-dinja. Irridu nirriflettu kif xieraq ir-rwol
strateġiku tal-avjazzjoni b’mod ġenerali, partikolarment ir-rwol li
għandhom it-trasportaturi, l-ajruporti, il-manifatturi u l-fornituri
tas-servizzi tal-UE f’termini ta' tkabbir, impjiegi u l-kontribuzzjoni ewlenija
li l-avjazzjoni tista' tagħti lill-istrateġija tat-tkabbir tal-UE
"Ewropa 2020" u l-irkupru tal-ekonomija Ewropea. Il-linji
tal-ajru Ewropej qegħdin fuq quddiem nett ta' din l-isfida kompetittiva u
qed jiġġieldu biex jgħixu f'suq internazzjonali iebes[3] li huwa kkaratterizzat
minn oqfsa u kulturi regolatorji diversi, minn ftehimiet bilaterali dwar
is-servizzi tal-ajru li jillimitaw l-aċċess tas-suq, u kompetizzjoni
li ħafna drabi tiġi mfixkla f'pajjiżi terzi minn sussidji
inġusti jew prattiki bħal restrizzjonijiet fuq titjiriet ta'
transitu. 3. Din il-Komunikazzjoni tevalwa
l-progress miksub mill-Komunikazzjoni tal-Kummissjoni tal-2005 rigward
l-iżvilupp ta' politika esterna tal-UE dwar l-avjazzjoni[4] Tiffoka fuq l-aspetti
“klassiċi” ta’ relazzjonijiet u ftehimiet internazzjonali tal-avjazzjoni,
iżda tiddiskuti wkoll diversi aspetti importanti oħra b’dimensjoni
internazzjonali qawwija li għandhom rwol dejjem aktar importanti
fit-tkabbir tas-suq u fil-kompetittività inġenerali tagħna
bħall-iżvilupp tal-Ajru Uniku Ewropew u l-pilastru
tat-teknoloġija relatat miegħu SESAR (Riċerka dwar
il-Ġestjoni tat-Traffiku bl-Ajru (ATM) tal-Ajru Uniku Ewropew);
il-politika Ewropea dwar is-sikurezza, bi rwol internazzjonali dejjem jikber
għall-Aġenzija Ewropea tas-Sikurezza tal-Avjazzjoni (EASA), il-ftehimiet bilaterali dwar is-sikurezza tal-avjazzjoni
(BASAs) kif ukoll il-kooperazzjoni teknika; il-politika Ewropea dwar
is-sikurezza tal-avjazzjoni, immirata biex iżżomm milli jkun hemm
indħil illegali fl-avjazzjoni ċivili u l-politika Ewropea dwar
l-ajruporti u l-infrastruttura li għandhom iwasslu għal
infrastruttura vijabbli u kosteffiċjenti. Kwalunkwe reviżjoni u
tisħiħ fil-politika esterna tal-UE dwar l-avjazzjoni għandu jqis
bis-sħiħ dawn l-elementi importanti. 4. Filwaqt li l-Komunikazzjoni
tikkonkludi li l-politika stabbilita fl-2005 timxi fid-direzzjoni t-tajba,
irridu nifhmu li, seba’ snin wara, id-dinja tal-avjazzjoni hija differenti
ħafna aktar milli kienet. L-avjazzjoni Ewropea teħtieġ
mill-aktar fis qafas aktar b’saħħtu fejn tista’ tifjorixxi l-kompetizzjoni
ġusta u miftuħa, u dan jista’ jiġi żgurat permezz ta’
approċċ Ewropew ħafna aktar ikkoordinat għar-relazzjonijiet
esterni rigward l-avjazzjoni. Huwa fl-interessi tal-konsumatur Ewropew u
tal-kompetittività tas-settur li jkun hemm rieda politika kondiviża biex
wieħed javvanza bin-negozjati fil-livell tal-UE fejn intewerew il-valur
miżjud u l-benefiċċji ekonomiċi. 5. L-UE teħtieġ
tuża l-firxa tal-għodod kollha disponibbli, inkluż
l-awtorizzazzjonijiet tal-Kunsill għan-negozjati fil-livell tal-UE
mas-sħab ewlenin kif ukoll ma’ pajjiżi Ewropej ġirien, u, fejn
meħtieġ, niddefendu lilna nfusna b’mod aktar effettiv kontra prattiki
inġusti. L-UE teħtieġ li turi li kapaċi tmexxi l-bidla lejn
sjieda u reġimi ta' kontroll internazzjonali li ser jiżguraw li
t-trasportaturi globali bbażati fl-UE jibqgħu prominenti fin-netwerk
globali għas-snin li ġejjin. Meta nagħmlu dan, irridu
nżommu dejjem f’moħħna li mhux biss qed infittxu li
nsaħħu l-kompetittività tal-katina sħiħa tal-valur
tal-avjazzjoni Ewropea, u l-elementi kollha fiha, iżda li qed nagħmlu
dan fl-interess tal-utent finali. 1.1. Nibnu fuq il-progress sa
mill-2005 – issa żmien l-evalwazzjoni 6. Is-suċċessi
tal-politika esterna tal-UE dwar l-avjazzjoni matul l-aħħar seba'
snin, ibbażati fuq tliet pilastri ewlenin – l-għoti mill-ġdid
ta' ċertezza legali; il-ħolqien ta’ spazju komuni tal-avjazzjoni ma'
pajjiżi ġirien; u l-ftehimiet komprensivi ma' sħab ewlenin –
huma stabbiliti fl-Anness. Fi ftit kliem, dawn kienu konsiderevoli.
Riżultat tal-isforzi konġunti bejn il-Kummissjoni Ewropea u l-Istati
Membri tal-UE, iċ-ċertezza legali reġgħet ingħatat
lura lil kważi 1000 ftehim tas-servizz tal-ajru bilaterali ma’ 117-il
pajjiż li mhumiex fl-UE. Sar ħafna progress fl-iżvilupp ta’
Spazju Komuni tal-Avjazzjoni mal-pajjiżi ġirien, bi ftehimiet
iffirmati diġà mal-Balkani tal-Punent, il-Marokk, il-Ġordan,
il-Ġorġja u l-Moldova. Qed jiġu nnegozjati aktar ftehimiet.
Il-benefiċċji ekonomiċi li rriżultaw mill-ewwel minn dawn
il-ftehimiet (il-Balkani tal-Lvant u l-Marokk) ġew stmati għal total
ta' EUR 6 biljun bejn l-2006 u l-2011[5]
Sa mill-2005, l-UE innegozjat ukoll ftehimiet komprensivi dwar it-trasport
bl-ajru ma' għadd ta' sħab kummerċjali ewlenin: l-Istati Uniti,
il-Kanada u l-Brażil. 7. Sa mill-2005, il-politika
esterna tal-UE dwar l-avjazzjoni kisbet riżultati sinifikanti, u b’hekk
ippermettiet lill-UE ssir protagonista importanti fl-avjazzjoni globali biex
tilħaq benefiċċji ekonomiċi tanġibbli u
vantaġġi oħra. Iżda huwa ċar ukoll li l-progress ma
kienx rapidu u estensiv daqs kemm kellu jkun. It-tranżizzjoni minn
relazzjonijiet bilaterali biss bejn l-Istati Membri tal-UE u pajjiżi
sħab għal taħlita ta' relazzjonijiet bilaterali u fil-livell
tal-UE wasslet għal xi konfużjoni fost il-pajjiżi sħab, u l-interessi
tal-UE mhux dejjem ġew definiti u mħarsa bl-aqwa mod. Dan jitlob
sforzi ulterjuri għall-koordinazzjoni fil-livell tal-UE bejn
il-Kummissjoni Ewropea u l-Istati Membri kif ukoll kooperazzjoni mal-partijiet
interessati tal-industrija. 8. Il-bidliet u l-isfidi li
l-komunità globali tal-avjazzjoni qed tħabbat wiċċha
magħhom ippermettew lill-UE turi li kapaċi tmexxi politika
internazzjonali tal-avjazzjoni ambizzjuża u koerenti (ara hawn taħt).
Madankollu, il-frammentazzjoni nazzjonali għadha prevalenti, b’nuqqas
ġenerali ta’ unità u sens ta’ solidarjetà fil-livell tal-UE. Għadna
ma lestejniex politika esterna komuni u komprensiva tal-UE dwar l-avjazzjoni;
għadna soġġetti wisq għall-interessi nazzjonali u
għadna niddependu ħafna fuq inizjattivi ad hoc ibbażati
fuq awtorizzazzjonijiet individwali għan-negozju. 9. Reċentement, fattur
ulterjuri kien ir-reazzjoni ta’ għadd kbir ta’ sħab internazzjonali
għall-inklużjoni tal-avjazzjoni fl-iskema tal-UE għan-negozjar
ta' emissjonijiet. Madankollu, minħabba l-importanza inġenerali
tad-dekarbonizzazzjoni tal-ekonomija, l-UE tara l-iżvilupp sostenibbli
tal-avjazzjoni bħala suġġett importanti għall-politika
tagħna dwar ir-relazzjonijiet esterni, b’mod bilaterali u globali permezz
tal-ICAO. Ir-reazzjoniet tal-UE għall-ETS juru l-ħtieġa ta’
kollaborazzjoni ulterjuri rigward il-kwistjonijiet dwar it-tibdil fil-klima
biex jingħelbu l-ostakli u jitwessa' l-ambitu għal kooperazzjoni ta'
benefiċċju reċiproku. L-UE tappoġġa bil-qawwa u ttenni
r-rieda kontinwa tagħha li taqbel dwar approċċ globali fl-ICAO
dwar il-kwistjoni tal-emissjonijiet tal-avjazzjoni sabiex tippermetti
żvilupp sostenibbli tal-industrija tal-avjazzjoni. 10. Dak li nkiseb s’issa tul
l-aħħar seba’ snin jirrappreżenta progress tajjeb iżda
jidher biċ-ċar li għad fadal xi jsir. Il-ħin kollu qed
jinbtu sfidi ġodda minħabba l-ambjent globali tal-avjazzjoni li huwa
dinamiku ħafna u li qed jinbidel malajr. Barra minn hekk, dawn l-isfidi
qegħdin dejjem aktar ikunu ta' livell globali, u dan jitlob risposti
konġunti mill-UE, minħabba li huwa diffiċli ħafna li
wieħed jikseb soluzzjonijiet fil-livell tal-Istati Membri tal-UE. 11. Issa ż-żmien li
l-politika barranija u l-viżjoni tal-UE dwar l-avjazzjoni tittieħed
pass sinifikanti ’l quddiem. Ir-reviżjoni u l-aġġornament
tal-politika għandhom isiru mill-aktar fis possibbli. Il-pass
tal-liberalizzazzjoni mhux koordinata tas-suq fil-livell tal-Istati Membri
tal-UE ma' ċerti pajjiżi mhux fl-UE huwa tali li jekk ma
naġixxux issa fi żmien ftit snin jaf ikun tard wisq. U għal dan
tista' tikkontribwixxi l-intenzjoni apparenti tal-Istati Membri li jibqgħu
jagħtu drittijiet tat-traffiku tal-ajru bilaterali lil pajjiżi terzi
mingħajr ma jaraw redditu raġonevoli, jew mingħajr ma jitqiesu
l-implikazzjonijiet fil-livell tal-UE. Barra minn hekk, ma għamilniex
biżżejjed progress biex negħlbu r-restrizzjonijiet
għas-sjieda u għall-kontroll. Dawn huma ta’ theddida
għall-iżvilupp ta’ industrija globali u jiċħdu
lit-trasportaturi tal-UE sorsi importanti ġodda ta’ kapital. Huwa
urġenti li l-ambitu tan-negozjati fil-livell tal-UE ta’ għadd ta’
sħab tal-avjazzjoni ewlenin u dejjem aktar importanti jiġi
estiż. 2. sfidi ewlenin f’ambjent
globali tal-avjazzjoni li qed jinbidel malajr 2.1. Ix-xejriet tas-suq fuq
perjodu medju u fit-tul 12. It-trasport bl-ajru fl-UE u
madwar id-dinja kważi sar dritt miksub li nqisuh bħala fatt.
It-trażżin tal-mobbiltà mhuwiex għażla: il-konnettività
hija essenzjali għall-kompetittività. L-ekonomiji emerġenti
għandhom, bir-raġun, aspirazzjonijiet għolja għall-aċċess
għal aktar ivvjaġġar bl-ajru u l-feġġ gradwali ta’ popolazzjoni
aktar affluwenti f’dawn is-swieq ser tikkontribwixxi b’mod konsiderevoli
għal domanda akbar għat-trasport bl-ajru. Il-klassi medja globali
mistennija li sal-2030 kważi tittriplika fid-daqs (minn 1.8 biljun
fl-2010 sa 4.9 biljun fl-2030) u togħla b'fattur ta’ aktar minn sitta
fir-reġjun Ażja-Paċifiku[6]
13. Minkejja l-kriżi
ekonomika attwali, it-trasport globali bl-ajru fuq perjodu fit-tul mistenni
jikber b'madwar 5% kull sena sal-2030[7],
żieda akkumulata ta' aktar minn 150%. Id-domanda għat-trasport
bl-ajru hija xprunata primarjament mit-tkabbir ekonomiku u l-ġid. B'rata
mistennija ta' tkabbir annwali medju tal-PDG għall-Ewropa ta' 1.9%[8] bejn l-2011 u l-2030
mqabbla, pereżempju, mar-rati ta' tkabbir għall-Indja u
ċ-Ċina ta' 7.5% u 7.2% rispettivament, it-tkabbir fl-avjazzjoni ser
jara bidla relattiva għal żoni 'il barra mill-UE, bl-Ażja u
l-Lvant Imbiegħed b'mod partikolari mistennija jsiru l-qofol tal-flussi
tat-traffiku internazzjonali bl-ajru. Nofs it-traffiku l-ġdid tad-dinja li
ser jiżdied matul l-20 sena li ġejjin ser ikun għal, minn, jew
fir-reġjun Ażja-Paċifiku, li għalhekk sal-2030 ser
jegħleb lill-Istati Uniti bħala l-mexxej fit-traffiku dinji u
jilħaq sehem fis-suq ta’ 38%. Minħabba rati ta' tkabbir inqas
mill-medja, f'ħafna reġjuni t-trasportaturi tal-UE ser ikunu qed
jitilfu xi sehem mis-suq għal linji tal-ajru mhux tal-UE. Fl-2003,
it-trasportaturi tal-UE kellhom sehem mis-suq ta’ 29% tal-kapaċità kollha
inter-reġjonali fid-dinja. Sal-2025, dan is-sehem mistenni jaqa’ għal
20%[9] Din ix-xejra tfisser
li, jekk ma jsir xejn, il-linji tal-ajru Ewropej se jiġġeneraw anqas
benefiċċji u tkabbir għall-ekonomija Ewropea. 14. Fl-istess ħin,
it-trasportaturi mhux tal-UE reġgħu saħħew
il-pożizzjoni globali tagħhom. Pereżempju, l-aktar tkabbir
mgħaġġel tat-traffiku reġjonali fid-dinja huwa mistenni li
jseħħ fil-Lvant Nofsani, fejn sal-2030 il-linji tal-ajru
tar-reġjuni ser ikunu qed jirrappreżentaw 11% tat-traffiku dinji, 'il
fuq minn 7% fl-2010. Il-mudell kompetittiv globali inbidel b’mod sinifikanti bl-iżvilupp
tat-trasportaturi tal-Golf li jipprovdu l-hekk imsejħa servizzi tas-sitt
(6) libertà (jgħaqqdu s-swieq bir-rotot interkontinentali permezz
taċ-ċentri (hubs) tagħhom)), ikabbru s-sehem tagħhom
fis-suq tagħhom, jieħdu pożizzjoni aggressiva għall-futur
permezz ta’ investimenti kbar ġodda fuq inġenji tal-ajru u ajruporti
u jieħdu vantaġġ minn netwerk dinji liberali ħafna ta’
ftehimiet bilaterali dwar is-servizzi tal-ajru. Gvernijiet fir-reġjun
tal-Golf investew somom kbar fl-infrastruttura tal-avjazzjoni, de facto
bidlu l-avjazzjoni fi strument strateġiku biex jippromovu r-rwol globali
tar-reġjun. Bl-istess mod, is-swieq fl-Amerika t’Isfel kibru, minkejja li
minn bażi iżgħar; it-trasportaturi Ażjatiċi
konsistentement ippromovew it-tkabbir; u linji tal-ajru tal-Istati Uniti
kkonsolidaw u tejbu aktar il-kompetittività, għalkemm din ġiet
iffaċilitata mil-leġiżlazzjoni dwar il-protezzjoni tal-kreditur. 2.2. Mudelli ta’ negozju
tal-avjazzjoni li jikkompetu bejniethom 15. Il-vijabbiltà tal-mudelli
varji tan-negozju li qed jiġu segwiti fl-UE, bħall-mudelli punt
għall-punt u tas-servizzi tan-netwerk u s-sistemi relatati tagħhom
tar-rotot, hija importanti fir-rigward ta’ trasportaturi tal-UE li
għandhom preżenza kompetittiva fi swieq esterni. 16. L-industrija Ewropea tal-linji
tal-ajru għaddejja minn bidliet sinifikanti. Il-linji tal-ajru
tradizzjonali issa qed jaffaċjaw kompetizzjoni qawwija mil-linji tal-ajru
bi prezz baxx. Dawn issa jirrappreżentaw 40% tal-kapaċità disponibbli
intra-UE u hija mistennija żieda sinifikanti ulterjuri[10] 17. Dan ovvjament għandu
impatt maġġuri fuq l-operazzjonijiet, il-prestazzjoni u
l-profitabbiltà tal-linji tal-ajru tradizzjonali tal-UE. Il-linji tal-ajru bi
prezz baxx irnexxilhom jisfruttaw il-libertajiet il-ġodda tas-suq li
nħolqu bil-liberalizzazzjoni ħafna aktar mil-linji tal-ajru
tradizzjonali, bl-istimolu ta’ domanda ġdida permezz ta' prezzijiet aktar
baxxi u billi joffru servizzi punt għal punt mingħajr ebda
restrizzjoni għal titjiriet ta’ konnessjoni. Iżda llimitaw ħafna
ruħhom għal operazzjonijiet fuq distanzi qosra u medji. Matul
l-aħħar snin, il-linji tal-ajru l-kbar tradizzjonali Ewropej
esperjenzaw telf sinifikanti fin-negozji intra-Ewropej tagħhom
għad-distanzi qosra u medji minħabba ż-żieda
fil-kompetizzjoni minn linji tal-ajru bi prezz baxx u ferroviji b’veloċità
għolja. Dan it-telf sa ċertu punt ġie ikkumpensat minn rotot fuq
distanzi twal, li huma s-sors ewlieni tad-dħul ta’ dawn it-trasportaturi.
Politika qawwija tal-UE dwar l-avjazzjoni esterna mmirata għal swieq importanti
toħloq opportunitajiet kummerċjali ġodda tan-negozju
għat-trasportaturi tal-UE. 18. Il-linji tal-ajru
tradizzjonali mistennija jżommu rwol importanti fit-traffiku tal-ajru
internazzjonali, billi sal-2030 jkunu qed ikopru 74% tat-traffiku totali dinji[11] Il-linji tal-ajru
tradizzjonali għalhekk ser jibqgħu vitali biex jgħaqqdu l-Ewropa
mal-bqija tad-dinja u wieħed ma jistax jassumi li l-linji tal-ajru bi
prezz baxx se jikkontribwixxu ħafna għal dan ħlief billi jagħmlu
użu minn ajruporti minn fejn jitlaq traffiku inter-kontinentali. F’dak
is-sens, iż-żewġ mudelli tan-negozju jistgħu potenzjalment
jiżviluppaw sinerġiji u konverġenza bejniethom. 2.3. L-importanza tal-hubs 19. Il-benefiċċji
ekonomiċi tal-hubs huma magħrufa sew u jippermettu rotot “idjaq"
li jitħaddmu bi profitt bl-appoġġ tat-traffiku ta’ konnessjoni.
Sabiex tkun vijabbli, hub teħtieġ livell sinifikanti ta' domanda
lokali kif ukoll netwerk estensiv ta' servizzi ta’ kollegament (“feeder"),
u dan huwa għaliex l-aktar hubs ta’ suċċess ħafna drabi
jinsabu fl-ajruporti tal-ibliet ewlenin. 20. Bi ftit limitazzjonijiet, ma
hemm l-ebda raġuni għaliex wieħed għandu jassumi li l-linji
tal-ajru Ewropej mhumiex kapaċi joperaw hubs vijabbli, ikunux
tal-merkanzija jew tal-passiġġieri, issa jew fil-ġejjieni
prevedibbli. Madankollu, in-nuqqas ta’ investiment fl-infrastruttura
tal-ajruporti u ż-żieda fil-kriżi tal-kapaċità, li
f'ċerti hubs ta’ ajruporti Ewropej diġà qed jillimitaw l-għadd
ta’ rotot ta’ kollegament li jistgħu jiġu operati, għandhom
jiġu indirizzati b’mod effettiv jekk il-kompetittività Ewropea
għandha tinżamm. L-investimenti fl-infrastruttura tal-ajruporti u
l-iżvilupp tal-hubs, meta jkunu ġustifikati minn domanda qawwija u
sostenibbli, huma kruċjali biex jippermettu l-hubs Ewropej jikkompetu ma’
dawk li għadhom qed jiżviluppaw f’partijiet oħra tad-dinja. Huwa
għalhekk importanti li t-tfixkil għat-tkabbir jiġi identifikat
minn stadju bikri u jitneħħa jew għall-anqas jitnaqqas l-impatt
negattiv tiegħu billi jintużaw il-mezzi kollha disponibbli għal
użu aktar effiċjenti tal-kapaċità skarsa tal-ajruporti. 3. L-Għanijiet ewlenin
għall-politika esterna futura tal-ue dwar l-avjazzjoni 3.1. Il-Ħolqien ta'
Kompetizzjoni Ġusta u Miftuħa 21. Aspett importanti ieħor
huwa li t-trasportaturi tal-UE jkunu kapaċi jikkompetu fuq bażi
miftuħa, ġusta u mhux imxekkla. 22. L-UE tikkonsidra s-swieq
miftuħa bħala l-aqwa bażi għall-iżvilupp ta’
relazzjonijiet internazzjonali tal-avjazzjoni u għalhekk tħaddan
il-kompetittività. Din kienet lezzjoni fundamentali għall-istorja ta’
suċċess tas-suq intern tal-avjazzjoni tal-UE. Filwaqt li huwa vitali
li tiġi assigurata klima tan-negozju li tippermetti lit-trasportaturi
tal-UE jikkompetu internazzjonalment, il-politika esterna tal-UE dwar
l-avjazzjoni għandha tisħaq ukoll fuq l-importanza ta’ kompetizzjoni
ġusta u miftuħa. Meta, pereżempju, sussidji, prattiki
inġusti, applikazzjoni inkonsistenti tal-oqfsa regolatorji u nuqqas ta’
trasparenza fir-rappurtar finanzjarju ta’ kumpaniji jintużaw biex ifixklu
s-suq, huwa leġittimu li l-industrija titħares kontra kompetizzjoni
inġusta. 23. L-avjazzjoni tikkompeti
bħala industrija tas-servizzi f’suq globali, u għalhekk
il-kompetittività sostenibbli tiddependi fuq kundizzjonijiet ġusti ta’
kompetizzjoni. Fuq livell internazzjonali, il-linji tal-ajru bbażati
fl-Ewropa qegħdin fi żvantaġġ kompetittiv, jekk il-kosti
tal-produzzjoni tagħhom huma ogħla minn dawk ta’ linji tal-ajru
oħra. Il-kompetittività tat-trasportaturi tal-UE, li ħafna minnhom qed
jitħabtu finanzjarjament, tiġi mfixkla meta l-piżijiet
ekonomiċi li jwasslu għal kosti ogħla għal kull unità ta'
produzzjoni jkunu ogħla minn dawk ta' trasportaturi minn reġjuni
oħra tad-dinja. L-applikazzjoni ta’ taxxi nazzjonali differenti imposti
fuq is-settur tal-avjazzjoni jista' jkollha effett detrimental fuq is-suq
intern u fuq il-kompetittività tal-kumpaniji tal-avjazzjoni ibbażati
fl-UE, u għalhekk tkun teħtieġ analiżi ulterjuri. .
It-trasportaturi tal-UE huma wkoll imxekkla minn kosti ogħla li
jirriżultaw mill-konġestjoni fl-ajruporti u l-ispazji tal-ajru
fl-Ewropa, kif ukoll imposti ogħla tal-ATM (ġestjoni tat-traffiku
tal-ajru) u tal-ajruporti. L-ispejjeż tax-xogħol relatati ma'
standards għolja tax-xogħol u sistemi tal-ħarsien soċjali
żviluppati sew huma wkoll ogħla fl-Ewropa milli f’ħafna
mir-reġjuni l-oħra tad-dinja, u l-istess huma l-kosti relatati
mal-kumpens tad-drittijiet tal-passiġġieri u l-kosti
tal-emissjonijiet tal-karbonju. Xi wħud minn dawn il-piżijiet
ekonomiċi addizzjonali u kosti għal titjiriet għal u mill-Ewropa
meta kkumparati mas-sitwazzjoni f’reġjuni oħra jistgħu
jibqgħu, għall-anqas għal ftit żmien, filwaqt li
oħrajn jistgħu, sa ċertu punt, jiġu kkumpensati
mill-innovazzjoni, il-ħruġ minn aktar kmieni ta' teknoloġija
ġdida fl-Ewropa jew il-gwadanni mill-produttività, jew jistgħu
jiġu indirizzati f'negozjati ma' pajjiżi sħab li jimmiraw li
joħolqu kundizzjonijiet indaqs, e.ż. bl-osservanza tal-istandards
internazzjonali ambjentali u tax-xogħol. 24. Huwa għalhekk importanti
li titqies il-katina kollha tal-valur tal-avjazzjoni (ajruporti, fornituri
tas-servizzi tan-navigazzjoni bl-ajru, manifatturi, sistemi ta’ riservazzjoni
bil-kompjuter, groundhandlers eċċ.) u li l-istrutturi tal-kosti,
il-livell ta’ esponiment għall-kompetizzjoni f’partijiet oħra tal-katina
tal-valur u l-mekkaniżmi ta' finanzjament tal-infrastruttura fi swieq
oħra ewlenin jitqiesu meta tiġi vvalutata l-kompetittività tas-settur
tal-avjazzjoni tal-UE u b’mod partikolari l-linji tal-ajru tal-UE
internazzjonalment. Iżda l-linji tal-ajru tal-UE huma fl-aħħar
mill-aħħar responsabbli huma nfushom mill-kompetittività tagħhom
u mill-offerta tagħhom ta' tagħqida tajba ta' prezzijiet u livelli
ta' kwalità tas-servizz li tappella għall-konsumaturi. 25. Huwa daqstant importanti li
l-kompetizzjoni, fl-UE u lil hinn minnha ma tixxekkilx minn prattiki
inġusti. Fl-UE, il-Kummissjoni Ewropea reċentement fetħet serje
ta' investigazzjonijiet fil-fond f'każijiet ta' għajnuna potenzjali
mill-istat lil linji tal-ajru minn ajruporti reġjonali f'diversi Stati
Membri tal-UE. It-tħassib huwa li l-linji tal-ajru li qed jirċievu
tali għajnuna jiksbu vantaġġ ekonomiku eżaġerat li
l-kompetituri ma jgawdux minnu, u b'hekk ixekklu l-kompetizzjoni fis-suq uniku
tal-avjazzjoni tal-UE. Il-Kummissjoni fl-2012 ħabbret ukoll li ser
tirrevedi l-linji gwida tal-Komunità dwar il-finanzjament tal-ajruporti u
l-għajnuna inizjali għal-linji tal-ajru li jitilqu minn ajruporti
reġjonali. L-adozzjoni riċenti tar-regoli tal-UE[12] rigward is-sigurtà
soċjali għall-ħaddiema mobbli fl-UE
bħall-ekwipaġġ ser itejjeb ukoll il-funzjonament tas-suq uniku
minħabba li ma għadhiex tista' titkompla l-prattika adottata minn
ċerti linji tal-ajru li jużaw is-sistemi tas-sikurezza soċjali
l-anqas onerużi irrispettivament mill-bażi ta' domiċilju
tal-ekwipaġġ. L-adozzjoni jew l-emenda tal-leġiżlazzjoni
tal-UE għalhekk tista’ tikkontribwixxi għat-tisħiħ ta’
ambjent tan-negozju li jippermetti li t-trasportaturi tal-UE jikkompetu
internazzjonalment. 26. Fil-livell estern,
ir-Regolament 868/2004[13]
kien maħsub biex iħares kontra s-sussidju u l-prattiki ta' prezzijiet
inġusti li jikkawżaw dannu lit-trasportaturi tal-UE fil-provvista
tas-servizzi tal-ajru minn pajjiżi mhux tal-UE. Madankollu, saru
sejħiet qawwija għall-iżvilupp ta’ strumenti aktar effettivi tal-UE
fis-settur tal-avjazzjoni biex jitħarsu l-interessi Ewropej kontra
prattiki inġusti. Ir-Regolament 868/2004 għadu qatt ma
ntuża u l-industrija ssostni li r-Regolament mhuwiex prattikabbli
għaliex tfassal fuq għodod użati kontra d-dumping u s-sussidji
għall-prodotti u mhux adattat kif xieraq
għall-ispeċifiċitajiet tas-settur tas-servizzi tal-avjazzjoni.
Ir-rimedji possibbli u l-aspetti proċedurali tar-Regolament huma wkoll
meqjusa mhux xierqa għal settur tas-servizzi. Jeħtieġ li
jiġi żviluppat strument aktar xieraq u effettiv biex jissalvagwardja
kompetizzjoni ġusta u miftuħa fir-relazzjonijiet esterni tal-UE dwar
l-avjazzjoni. 27. Is-sistemi tal-avjazzjoni li
kontrihom jikkompetu l-linji tal-ajru u l-hubs tal-UE fil-Golf huma
r-riżultat tad-deċiżjonijiet ċari meħuda
għall-iżvilupp tal-avjazzjoni bħala settur ekonomiku
strateġiku li jiġġenera benefiċċji
għall-ekonomija inġenerali. It-trasportaturi tal-Golf jinsistu li ma
jgawdux minn vantaġġi inġusti ta’ kompetizzjoni minn dawn is-sistemi.
Minħabba dan, jidher li mod immedjat kif wieħed jista' jimxi 'il
quddiem għandu jkun li jiġu żviluppati, bl-aktar mod xieraq
fil-livell tal-UE, "klawsoli ta' kompetizzjoni ġusta” standard li
jintlaħaq qbil dwarhom u li jiġu inklużi fil-ftehimiet
rispettivi tas-servizzi tal-ajru bilaterali mal-Istati Membri tal-UE. 28. F’dan il-kuntest
kummerċjali ġdid, huwa importanti u leġittimu li l-UE tkun
kapaċi taġixxi b'mod effettiv internazzjonalment u tissalvagwardja
l-kompetittività tal-linji tal-ajru tal-UE kontra kompetizzjoni inġusta
u/jew prattiki ġejjin minn fejn ġejjin. 3.2. Strateġija ta’ Tkabbir
ibbażata fuq “Aktar Ewropa” 29. Is-settur tal-avjazzjoni
tal-UE, partikolarment il-linji tal-ajru tradizzjonali internazzjonali
tal-Ewropa, għaddew minn perjodu diffiċli u ser ikunu qed
jiffaċċjaw sfidi serji ħafna fil-ġejjieni. Biex dawn
l-isfidi jingħelbu, huma meħtieġa sforzi konġunti u rapidi
fil-livell tal-UE, b’aktar azzjoni koordinata li teħtieġ tkun aktar
effettiva mis-sistema attwali ta’ negozjati u relazzjonijiet bilaterali. L-UE,
meta tkun magħquda, uriet li kapaċi twassal il-valur miżjud. Dan
japplika sew għan-negozjati sew għall-assigurazzjoni tal-funzjonament
xieraq tal-ftehimiet permezz ta', pereżempju, il-pożizzjonijiet
komuni fil-Kumitat Konġunt skont il-ftehimiet varji. 30. L-istudju indipendenti li
twettaq għall-Kummissjoni[14]
ikkalkula li permezz ta’ aktar ftehimiet komprensivi dwar it-trasport bl-ajru
fil-livell tal-UE ma’ pajjiżi ġirien u sħab ewlenin,
partikolarment fi swieq ristretti u/jew li qed jikbru b’rata
mgħaġġla, ikun hemm benefiċċji ekonomiċi
sinifikanti ħafna ta’ aktar minn EUR 12-il biljun fis-sena. Dawn
jinkludu, partikolarment, it-Turkija, iċ-Ċina, ir-Russja, Stati
tal-Golf[15],
il-Ġappun, l-Eġittu u l-Indja. 31. Huwa ta’ importanza
strateġika għall-UE li żżomm industrija tal-avjazzjoni
qawwija u kompetittiva ibbażata fl-Ewropa li torbot lill-UE mal-bqija
tad-dinja. Is-swieq tal-avjazzjoni li qed jikbru bl-aktar rata
mgħaġġla issa jinsabu ’l barra mill-Ewropa, u għalhekk huwa
vitali li l-industrija Ewropea jkollha l-opportunità li tikber f’dawn is-swieq
ukoll. L-isfida ser tkun biex l-industrija Ewropea tkun ippożizzjonata
b’tali mod li tkun tista’ tieħu vantaġġ mill-opportunitajiet
offruti mill-ambjent li qed jinbidel malajr u li jkollha aċċess
għas-swieq ġodda li qed jikbru b'rata mgħaġġla. Biex
din l-isfida tintlaħaq jeħtieġ viżjoni koerenti tal-UE kif
ukoll sinjali aktar ċari ta’ unità akbar fir-relazzjonijiet esterni tal-UE
dwar l-avjazzjoni. 32. Il-politika esterna tal-UE
dwar l-avjazzjoni għandha tkun xprunata minn tliet għanijiet
paralleli li jistgħu jiġu rrikonċiljati
għall-benefiċċju tal-ekonomija, it-tkabbir u l-impjiegi
inġenerali: (i) il-ħolqien ta’ benefiċċji
għall-konsumaturi (li jissuġġerixxi enfażi qawwi u kontinwu
fuq il-ftuħ tas-swieq); (ii) il-ħarsien tal-kompetittività, li
jimplika miżuri aktar qawwija fil-livell tal-UE li jinsistu fuq ir-riforma
tas-sjieda u l-kontroll, tnaqqis tal-piż regolatorju u kundizzjonijiet
internazzjonali indaqs (kollha iebsa biex jiġu assigurati fil-livell
tal-Istati Membri); u (iii) għanijiet usa' ta’ politika pubblika li jmorru
lil hinn mid-drittijiet tat-traffiku (l-approċċ tal-UE għalhekk
ser ifittex li jassigura s-sigurtà tal-pubbliku, is-sikurezza u
l-għanijiet ambjentali importanti). 33. Il-politika esterna u
l-inizjattivi tal-UE dwar l-avjazzjoni għandhom jippromwovu u jiddefendu
b’aktar qawwa l-interessi Ewropej u jkomplu jippromwovu u jikkondividu
l-valuri, l-istandards u l-aħjar prattiki Ewropej fuq bażi
kollaborattiva. Il-politika għandha tipprova tilħaq l-ogħla
standards possibbli li għandhom jiġu applikati fl-industrija, permezz
ta' kooperazzjoni u konverġenza regolatorja. Dawn l-għanijiet ma
jistgħux jintlaħqu mingħajr negozjati koordinati fil-livell
tal-UE mas-sħab ewlenin. 4. Tagħlimiet meħuda
u t-Triq 'il quddiem 4.1. X’baqa’ xi jsir mill-pjan
direzzjonali 2005? 34. Matul l-aħħar seba’
snin, kien hemm suċċessi sostanzjali kwantitattivi u kwalitattivi
fil-politika esterna tal-UE dwar l-avjazzjoni (ara d-dettalji fl-anness).
Iżda kien hemm ukoll nuqqasijiet u diżappunti reali, li wieħed
jista' jitgħallem minnhom. 35. Fl-ambitu tal-ewwel pilastru
(l-għoti mill-ġdid taċ-ċertezza legali) diġà inkiseb
ħafna. Madankollu, ir-relazzjoni kontinwa ma’ ċerti sħab u
approċċ koordinat u determinat tal-UE għal dawn il-ftit pajjiżi
għandhom jiġu segwiti bil-għan li jissolvew kwistjonijiet
pendenti. 36. Fl-ambitu tat-tieni pilastru
(ftehimiet tal-viċinat), ġew innegozjati għadd ta’ ftehimiet
importanti li ser jiġġeneraw benefiċċji dejjem akbar
għall-UE u għall-pajjiżi ġirien. Il-kuntatti u n-negozjati
mal-bqija tal-pajjiżi ġirien għandhom jiġu intensifikati u
aċċellerati bil-għan li sal-2015 jintlaħqu ftehimiet
mal-Ukranja, it-Turkija, it-Tuneżija, l-Azerbajġan, il-Libanu,
l-Alġerija, l-Armenja, l-Eġittu, il-Libja u s-Sirja (ovvjament
soġġetti għal kundizzjonijiet politiċi nazzjonali u
reġjonali). Importanti li, tul iż-żmien, minn dan
il-proċess tevolvi żona ta’ avjazzjoni komuni verament integrata fejn
ir-relazzjonijiet bejn il-pajjiżi ġirien infushom isiru miftuħa
u integrati wkoll. Fid-dawl tal-għanijiet simili li l-UE taqsam
mal-pajjiżi ġirien, ma jagħmilx aktar sens għall-Kunsill li
jkollu jqis l-għoti ta' awtorizzazzjonijiet għan-negozjar ta'
ftehimiet fuq bażi ta' pajjiż b'pajjiż. Ikun ħafna aktar
effiċjenti li l-Kummissjoni tingħata awtorizzazzjoni unika biex
tinnegozja mal-bqija tal-pajjiżi ġirien għalkemm xorta fuq
bażi ta' pajjiż b'pajjiż. Dan jippermetti wkoll aktar
flessibbiltà f'termini ta' kalendarju għat-tendija tan-negozjati. 37. Fl-ambitu tat-tielet pilastru
(ftehimiet komprensivi ma’ sħab ewlenin) ġew innegozjati għadd
ta’ ftehmiet importanti. Madankollu, huwa wkoll qasam fejn ċerti
għanijiet ewlenin xorta għad iridu jintlaħqu, partikolarment
skont il-ftehimiet UE-Stati Uniti u UE-Kanada rigward il-liberalizzazzjoni
tas-sjieda u l-kontroll tal-linji tal-ajru. 38. Minkejja l-progress li sar
madwar id-dinja lejn reġim regolatorju aktar liberali għat-trasport
internazzjonali bl-ajru, il-gvernijiet xorta għadhom ma rriformawx
ir-regoli arkajki għas-sjieda u għall-kontroll tal-linji tal-ajru.
Ħafna mill-pajjiżi għadhom iħaddnu regoli li jistipulaw li
l-linji tal-ajru għandhom ikollhom il-maġġoranza tal-ishma
f'idejn in-nazzjonali tagħhom u kkontrollati minnhom, u b'hekk dan
iċaħħad lit-trasportaturi tal-ajru l-aċċess għal
firxa aktar wiesgħa ta' investituri u swieq kapitali. L-effett kien li
ġiet imposta struttura ta' industrija artifiċjali fuq is-settur
tal-linji tal-ajru li ma teżistix f’industriji oħra. Minkejja l-firxa
globali tal-avjazzjoni, ma hemmx linja tal-ajru waħda verament globali
bil-mod li industriji oħra għandhom kumpaniji globali.
Il-konsolidazzjoni transfruntieri, li ħafna jarawha bħala
prerekwiżit għal industrija tal-linji tal-ajru aktar ekonomikament
sostenibbli, hija severament ristretta. Fl-Istati Uniti, pereżempju, is-sjieda
barranija tal-linji tal-ajru hija ristretta għal 25%. B’konsegwenza ta’
dawn ir-restrizzjonijiet nazzjonali għas-sjieda u għall-kontroll
feġġew tliet alleanzi globali tal-linji tal-ajru (Star Alliance, Sky
Team u oneworld), u b’mod speċifiku l-impriżi konġunti li
nħolqu bejn xi wħud mill-membri tagħhom għal ċerti
rotot.Dawn sar għandhom rwol importanti li joqrob ħafna għal dak
tal-linji tal-ajru globali. 39. Madanakollu, skont
il-leġiżlazzjoni eżistenti tal-UE, it-trasportaturi tal-UE,
mhumiex soġġetti għal restrizzjonijiet nazzjonali
għas-sjieda u għall-kontroll iżda jistgħu jkunu propjetà
ta' kwalunkwe interess tal-UE. Fl-aħħar snin, l-industrija tal-linji
tal-ajru Ewropea għaddiet minn proċess ta’ konsolidazzjoni
transfruntieri madwar tliet gruppi ewlenin Ewropej tat-trasportaturi tal-ajru.
il-Grupp Air France-KLM; il-Grupp Lufthansa ma' SWISS, l-Austrian Airlines u
sehem sinifikanti fi Brussels Airlines, u aktar riċenti l-International
Airline Group (IAG) li nħoloq bħala kumpanija possedenti tal-British
Airways, l-Iberia u issa wkoll il-bmi. Barra minn hekk, ir-rekwiżit
relattiv tal-UE għall-kwota tal-maġġoranza jista’ jiġi
rrinunzjat permezz ta’ ftehimiet komprensivi tal-UE ma’ pajjiżi sħab
u dan ikun jippermetti sjieda f'maġġoranża u kontroll barrani. 40. Ix-xejra ta’ konsolidazzjoni
fl-Ewropa hija unika, fis-sens li fużjonijiet u akkwiżizzjonijiet
transfruntieri huma permessi biss fl-UE filwaqt li s-sjieda u r-reġimi ta’
kontroll jibqgħu fundamentalment imwaħħla fejn kienu ġew
innegozjati fl-1944 fil-Konvenzjoni ta’ Chicago. Id-diffikultajiet li
rriżultaw mid-dispożizzjonijiet attwali dwar is-sjieda u l-kontroll
huma sinifikanti u jeħtieġu negozjati ma’ pajjiżi sħab u
strutturi governattivi kumplessi ħafna. Inevitabbilment dan ifisser li ma
jistgħux jinkisbu l-benefiċċji kollha tal-konsolidazzjoni.
Il-membri ta' alleanza jikkooperaw aktar u aktar mill-qrib biex joffru lill-konsumaturi
servizz tan-netwerk wieħed b’hub multiplu globali integrat. 41. Parti mill-problema
fir-rigward tat-tneħħija tar-restrizzjonijiet għas-sjieda u
għall-kontroll kienet il-ħtieġa, sabiex ir-riforma jkollha
tifsira b'xi mod reali, li jiġi assigurat il-ftehim ta’ massa kritika jew
proporzjon kbir ta’ pajjiżi. Biex ir-riforma globali tas-sjieda u
l-kontroll tavvanza, il-punt loġiku tat-tluq huwa s-suq transatlantiku.
Minħabba li bejniethom, l-UE u l-Istati Uniti jgħoddu għal
kważi nofs l-avjazzjoni globali, jirrappreżentaw blokk qawwi u
l-introduzzjoni ta' trasportaturi ġenwinament transatlantiċi tista'
toħloq momentum importanti. Wasal iż-żmien biex jittieħdu
l-passi addizzjonali previsti fil-ftehim dwar it-trasport bl-ajru bejn l-UE u
l-Istati Uniti biex jiġu liberalizzati s-sjieda u l-kontroll tal-linji
tal-ajru, sabiex il-linji tal-ajru jkunu jistgħu jħajru l-investiment
irrispettivament min-nazzjonalità tal-investitur. Madankollu, dan l-għan
importanti tal-politika li tippermetti u tħeġġeġ investiment
barrani fil-linji tal-ajru għandu jiġi segwit b'mod usa' - b’mod
bilaterali bejn l-UE u sħab ewlenin oħra, u fuq livell globali
multilaterali partikolarment permezz tal-ICAO. L-UE trid tadotta rwol aktar
deċiż fil-valutazzjoni ta’ kif jista' jiġi trattat it-tħassib
relatat mal-klawsoli attwali ta' sjieda u kontroll , partikolarment ma'
pajjiżi li jaħsbuha l-istess, filwaqt li tindirizza
l-ħtieġa għal linji tal-ajru biex ikollhom aċċess
għall-finanzjament tal-kapital u biex il-linji tal-ajru jkunu aktar
attraenti f'għajnejn is-swieq finanzjarji. In-negozjati tal-ftehimiet
tal-kummerċ ħieles jista' ikollhom rwol kumplimentari utli
fit-tneħħija ta' restrizzjonijiet. 42. Issa huwa wkoll importanti li
jiġu ffinalizzati n-negozjati mal-Awstralja u jiġi ffaċilitat
id-dħul tal-benefiċċji mill-ftehim UE-Brażil, li l-firma
tiegħu sfortunatament ġiet ittardjata. 43. It-tielet pilastru
jirrappreżenta wkoll potenzjal enormi għal aktar
benefiċċji. Fl-2005, pereżempju, il-Kummissjoni diġà wriet
benefiċċji ekonomiċi sinifikanti, mill-ftehimiet komprensivi
tal-futur mar-Russja, iċ-Ċina u l-Indja u għalhekk talbet
awtorizzazzjonijiet biex tkun tista' tinnegozja ftehimiet komprensivi dwar
it-trasport bl-ajru, li sa issa għadhom ma ngħatawx, ma’ kull
wieħed minn dawn il-pajjiżi. Dawn il-benefiċċji potenzjali
ġew ikkonfermati minn studju indipendenti mwettaq mill-Kummissjoni u
l-għan ta’ ftehimiet komprensivi ma' dawn l-isħab ewlenin għandu
għalhekk jinżamm u jiġi segwit. L-istudju wera wkoll
benefiċċji ekonomiċi potenzjali ewlenin minn ftehimiet
komprensivi ma' għadd ta’ sħab importanti oħra. 4.2. Prinċipji ewlenin li
jiggwidaw il-politika esterna futura tal-UE dwar l-avjazzjoni 44. Minħabba
t-tisħiħ tas-suq uniku, l-introduzzjoni ta’ trasportaturi verament
Ewropej li dejjem qed isiru aktar multi-nazzjonali fl-istruttura tas-sjieda
tagħhom u s-setgħat dejjem akbar tal-UE fi kważi l-oqsma kollha
tal-avjazzjoni, wasal iż-żmien biex l-UE issegwi approċċ
aktar koordinat u assertiv fir-relazzjonijiet esterni tal-avjazzjoni tagħha.
F’ċerti każijiet, jista' ikun biżżejjed li
ssaħħaħ il-livell eżistenti ta' koordinazzjoni bejn
il-Kummissjoni Ewropea, l-Istati Membri u l-industrija filwaqt li tkompli
ssegwi r-relazzjonijiet ma' pajjiżi sħab fuq bażi bilaterali.
Dan ikun jeħtieġ koordinazzjoni formalizzata tal-UE u ftehimiet
trasparenti. Madankollu, l-esperjenza turina li anke meta jkunu koordinati,
ir-relazzjonijiet bilaterali jġibu magħhom riskju serju ta’
riżultati inqas xierqa. In-negozjati fil-livell tal-UE li huma
bbażati fuq l-unità tal-UE u awtorizzati mill-Kunsill ġeneralment
jirrappreżentaw mod aktar xieraq u effettiv biex jitfittxew l-interessi
Ewropej. Dan l-approċċ għalhekk għandu aktar jiġi
żviluppat bħala l-prattika ġenerali mas-sħab ewlenin
kollha, milli bħala eċċezzjoni għar-regoli – kif inhu
fil-preżent. 45. L-UE għandha tkompli tkun
kuraġġuża fil-promozzjoni ta' aktar ftuħ u
liberalizzazzjoni fl-avjazzjoni, filwaqt li tassigura li jinkiseb livell
sodisfaċenti ta' konverġenza regolatorja. Fejn huwa
meħtieġ, għandha tkun lesta li tiġġieled ukoll
għall-industrija, l-ekonomija u l-impjiegi tal-UE u tassigura li
jitħaddmu l-istrumenti xierqa biex jiddefendu l-interessi tagħha.
Fin-negozjati ma' pajjiżi sħab, għandha tingħata
l-attenzjoni dovuta għall-istandards tax-xogħol u l-ambjent
fir-rigward tal-konvenzjonijiet u l-ftehimiet internazzjonali
fiż-żewġ oqsma biex tiġi evitata d-distorsjoni tas-suq u
wieħed jevita kompetizzjoni bir-ribass. 46. Meħtieġ ukoll tibdil
fil-kuntest globali tal-avjazzjoni. Dan huwa fejn l-ICAO jista' ikollha rwol
ewlieni fl-immodernizzar tal-qafas eżistenti li jiggverna s-suq globali
tal-avjazzjoni, hekk kif għandha f’oqsma oħra ewlenin
bħas-sikurezza u s-sigurtà. L-ICAO tista’ tgħin biex tiżviluppa
aktar il-qafas regolatorju ekonomiku għas-settur globali tal-avjazzjoni,
inkluż fil-liberalizzazzjoni tas-sjieda u l-kontroll tal-linji tal-ajru,
tassigura qafas madwar id-dinja għal kompetizzjoni ġusta u tassigura
żvilupp ambjentali sostenibbli tas-settur. 4.3. It-tisħiħ
tar-relazzjonijiet ma' sħab ewlenin 47. Il-Komunikazzjoni saħqet
fuq l-importanza strateġika għall-UE ta’ industrija tal-avjazzjoni
Ewropea kompetittiva li tinkludi l-linji tal-ajru tradizzjonali Ewropej b'firxa
globali. Bħala l-ewwel kundizzjoni biex jintlaħaq dan il-għan,
jeħtieġ li tiġi ssalvagwardjata l-kompetittività tal-industrija,
u t-tieni li jiġu assigurati opportunitajiet ta’ aċċess
għas-swieq biex tkun tista’ tikkompeti u topera fi swieq ewlenin.
Minħabba l-karatteristiċi partikolari tagħha, l-industrija
Ewropea tal-merkanzija u l-posta rapida b’mod partikolari qed issofri mad-dinja
kollha minn ftehimiet bilaterali tas-servizzi bl-ajru u għandha
tingħata prijorità għolja meta jitneħħew l-ostakli
għall-aċċess tas-suq. L-UE teħtieġ tfassal ir-risposta
tagħha għall-isfidi relatati ma' uħud mis-swieq u s-sħab
strateġiċi, kif ġej. 48. It-Turkija, bħala attur
reġjonali ewlieni, tirrappreżenta għall-UE suq strateġiku
li huwa wieħed mill-aktar swieq li qed jikbru b'rata
mgħaġġla. Wara l-Istati Uniti, it-Turkija hija l-akbar
destinazzjoni għat-traffiku tal-passiġġieri għal u mill-UE
bi 30 miljun passiġġier ittrasportati fl-2010. Mill-1999,
it-traffiku tal-passiġġieri UE-Turkija kiber b'medja ta' aktar minn
9% fis-sena. Jirrappreżenta tliet darbiet aktar mit-traffiku
tal-passiġġieri UE-Marokk u huwa akbar mid-doppju tas-suq UE-Russja
għas-servizzi tal-passiġġieri. It-Turkija u l-UE għandhom
interessi komuni f’diversi oqsma tal-avjazzjoni u l-ambitu
għall-kooperazzjoni huwa wieħed konsiderevoli ħafna.
Fir-reġjun hemm ukoll xi kwistjonijiet diffiċli rigward l-avjazzjoni
li jeħtieġ jiġu riżolti għaliex huma ta' dannu
għaż-żewġ naħat. Għandha tiġi
żviluppata aġenda pożittiva u prammatika mat-Turkija li
tippermetti progress ta’ benefiċċju għaż-żewġ
partijiet biex jiġu riżolti kwistjonijiet konkreti fir-reġjun.
B’mod partikolari, għandu jiġi avvanzat ftehim bilaterali
tas-sigurtà. Dejjem jekk isir progress biex jiġu riżolti dawn
l-ostakli, imbagħad ikun jista' jiġi previst ftehim komprensiv. 49. Rigward ir-Russja, wasal
iż-żmien biex isir qbil dwar relazzjoni aktar koerenti, stabbli u
ambizzjuża li tista’ toffri prevedibbiltà ta’ ppjanar
għat-trasportaturi taż-żewġ naħat. Ir-Russja
mill-aktar fis possibbli jeħtieġ turi l-impenn tagħha
għall-ftehim tal-2011 dwar l-implimentazzjoni tal-“Prinċipji maqbula
dwar il-modernizzazzjoni tas-sistema tat-titjir fuq territorju Siberjan”. Lil
hinn minn dan, l-iskop għall-kooperazzjoni huwa vast u
l-benefiċċji potenzjali ta’ sħubija strateġika
ġenwina, jew anke relazzjoni normalizzata, għar-Russja u l-UE huma
ugwalment sinifikanti – kif inhuma l-kosti potenzjali jekk ir-relazzjoni ma
tittiħidx 'il quddiem. Hekk kif jiġu riżolti l-ostakli attwali,
l-UE għalhekk għandha tipproponi pjan direzzjonali li l-għan
aħħari tiegħu għandu jkun ftehim komprensiv tal-avjazzjoni
UE-Russja. 50. Ir-relazzjonijiet mal-Istati tal-Golf
fl-aħħar snin kienu fil-biċċa l-kbira proċess
f'direzzjoni unika ta' ftuħ tas-swieq tal-UE għat-trasportaturi
tal-Golf, li ħoloq żbilanċi sinifikanti fl-opportunitajiet.
Fl-istess ħin, jibqgħu dubji dwar jekk it-trasparenza tar-rappurtar
tal-prestazzjoni finanzjarja ta’ ċerti trasportaturi tal-Golf tilħaqx
l-istandards internazzjonali. Barra minn hekk, ċerti Stati tal-Golf sabuha
bi tqila biex jaċċettaw jew anke jiddiskutu klawżoli ta'
"kompetizzjoni ġusta" mal-Istati Membri tal-UE individwalment. Din
ix-xejra għandha tinqaleb, l-ewwel lejn l-assikurazzjoni ta’ trasparenza u
kompetizzjoni ġusta u miftuħa u mbagħad, abbażi ta’ dak,
lejn żvilupp kontinwu tas-suq. Ikun xieraq li dan il-proċess ikun
ikkoordinat fil-livell tal-UE permezz ta’ ftehimiet komperensivi tal-UE
mal-pajjiżi ewlenin. 51. L-Ażja qed tikber
bil-ħeffa fl-importanza fl-avjazzjoni globali u għalhekk hija
ovvjament suq fejn it-trasportaturi tal-UE ma jistgħux jaffordjaw ma
jkunux preżenti b'mod attiv. Diversi pajjiżi Ażjatiċi, li
ħafna minnhom issa jsegwu politiki tal-avjazzjoni aktar liberali, esprimew
l-interess li jikkonkludu ftehimiet komprensivi mal-UE. L-UE għandha
ssegwi tali opportunitajiet, kemm-il darba dawn il-pajjiżi jirrikonoxxu
bis-sħiħ il-liġi tal-avjazzjoni tal-UE inkluż il-prinċipju
tan-nomina tal-UE, u kemm il-darba dawn is-swieq joffru opportunitajiet ugwali
u kompetizzjoni ġusta għaż-żewġ naħat. Intwerew
benefiċċji ekonomiċi sinifikanti potenzjali mill-ftehimiet komprensivi
tal-UE dwar it-trasport bl-ajru maċ-Ċina, l-Indja u l-Ġappun.
Dawn il-ftehimiet għalhekk għandhom jiġu segwiti. L-UE
qiegħda ssegwi wkoll b’ħafna interess l-iżviluppi fl-ASEAN lejn
Suq Uniku tal-Avjazzjoni ASEAN sal-2015, li jixbah ħafna l-ħolqien
tas-suq reġjonali miftuħ tal-avjazzjoni fl-Ewropa. Dan ser joffri
opportunitajiet interessanti ġodda għall-kooperazzjoni bejn l-UE u
l-ASEAN u f'xi stadju għandu jwassal għal ftehim komprensiv dwar
l-avjazzjoni UE-ASEAN. Singapor ħa l-inizjattiva f’dan ir-rigward u
ppreżenta lilu nnifsu bħala gwida għall-UE biex
issaħħaħ il-preżenza tagħha fl-ASEAN, u lil hinn. 52. Żviluppi reġjonali
simili għaddejjin f'reġjuni oħra tad-dinja, inkluż
l-Amerika Latina fejn il-konsolidazzjoni kontinwa tal-linji tal-ajru
għandha tintlaqa' minħabba li toffri possibbiltajiet għall-iżvilupp
ta' relazzjonijiet eqreb blokk għal blokk li jistħoqqilhom ftuħ
ulterjuri tas-swieq. 53. Is-suq Afrikan tal-avjazzjoni
għandu potenzjal għat-tkabbir fit-tul. Fir-relazzjonijiet
tal-avjazzjoni UE-Afrika bħalissa, qed tingħata prijorità biex tittejjeb
is-sigurtà tal-avjazzjoni fl-Afrika bl-appoġġ għall-ħolqien
u l-operazzjonijiet tal-Organizzazzjonijiet Reġjonali tas- Sorveljanza
tas-Sikurezza u billi tiġi pprovduta għajnuna lill-pajjiżi
inklużi fil-lista tal-UE ta’ linji tal-ajru soġġetti għal
projbizzjoni fuq l-operat fl-UE. 4.4. L-għodod li
għandhom jiġu applikati 54. L-UE tixtieq tiżviluppa
relazzjonijiet qawwija, komprensivi u ta’ benefiċċju reċiproku
mas-sħab ewlenin tagħha. Dan imur lil hinn mill-kwistjoni
sempliċi tal-liberalizzazzjoni tad-drittijiet tat-traffiku u għandu
jinkludi, pereżempju, kooperazzjoni regolatorja, teknoloġika u
industrijali. Ftehimiet komprensivi dwar is-servizzi tal-ajru ma’ pajjiżi
ġirien u sħab ewlenin u tal-istess ħsieb għandhom
jindirizzaw u jissinkronizzaw il-kundizzjonijiet regolatorji għal
kompetizzjoni ġusta u għal industrija sostenibbli tal-avjazzjoni,
inkluż aspetti essenzjali bħas-sikurezza, is-sigurtà, l-ambjent u
r-regolazzjoni ekonomika. 55. Din il-Komunikazzjoni
saħqet fuq l-importanza li tinżamm industrija kompetittiva Ewropea
tal-avjazzjoni. Biex ikun assigurat li jintlaħaq dan l-għan
strateġiku ser tkun meħtieġa aktar koordinazzjoni sistematika,
solidarjetà aktar qawwija u l-użu ta’ firxa sħiħa ta’
għodod li huma disponibbli għall-UE, il-Kummissjoni Ewropea, l-Istati
Membri tal-UE, l-industrija tal-UE u istituzzjonijiet u aġenziji
tal-avjazzjoni Ewropej. B’dan il-mod ser jissaħħu wkoll
il-benefiċċji potenzjali għal sħab l-UE. Dan jista’ jkun
f'diversi forom li għandhom jitqiesu b'mod konġunt. 56. Huwa importanti li l-partijiet
kollha affettwati jkunu involuti kemm jista' ikun possibbli fit-twaqqif
tal-politika u mbagħad fin-negozjati, fit-tħejjijiet u
fid-diskussjonijiet infushom. Għal din ir-raġuni, il-Kummissjoni
lesta teżamina mill-ġdid l-arranġamenti prattiċi biex
tassigura li n-negozjati jkunu trasparenti u inklussivi. Fl-istess ħin,
irridu nassiguraw li l-proċessi li jiggvernaw ir-relazzjonijiet esterni
tal-avjazzjoni tal-UE jkunu effiċjenti, effettivi u mhux burokratiċi
wisq. 57. Il-Kummissjoni temmen li
strument aktar effettiv biex jassigura kompetizzjoni ġusta huwa parti
importanti mill-kaxxa tal-għodda li l-UE ser teħtieġ biex
tiżviluppa aktar il-politika esterna tal-UE dwar l-avjazzjoni.
Ir-Regolament 868/2004 wera li kien kumpless u mhux prattiku
għall-industrija tas-servizzi tal-avjazzjoni u, wara valutazzjoni
sħiħa tal-impatt tiegħu, il-Kummissjoni se teżamina u
ladarba l-partijiet interessati kkonċernati kollha jkunu ġew
ikkonsultati, jekk ikun meħtieġ, tagħmel proposti għal
miżuri aktar xierqa. 5. Konklużjoni 58. Issa wasal iż-żmien
biex l-Istati Membri tal-UE, il-Kunsill u l-Parlament Ewropew iqisu bir-reqqa
kif l-aħjar ifasslu l-politika tal-futur tal-avjazzjoni esterna tal-UE u
biex jieħdu d-deċiżjonijiet li jkunu meħtieġa
għal politika aktar ambizzjuża li tħabbatha mal-isfidi serji li
qed jiffaċċja s-settur tal-avjazzjoni Ewropew illum il-ġurnata u
biex jiġi sfruttat il-potenzjal kollu li l-avjazzjoni tista'
tikkontribwixxi lill-ekonomija Ewropea. ANNESS X’inkiseb
s'issa mill-politika esterna tal-ue dwar l-avjazzjoni? L-introduzzjoni ta’ politika esterna tal-UE
dwar l-avjazzjoni 1. L-iżvilupp ta’ politika
esterna tal-UE dwar l-avjazzjoni kien konsegwenza loġika tal-ħolqien
tas-suq intern tal-UE u r-regoli komuni assoċjati. Punt kruċjali kien
is-sentenza "smewwiet miftuħa" (“open skies”) tal-Qorti Ewropea
tal-Ġustizzja fil-5 ta' Novembru 2002[16] li kkonkludiet (i) li
l-Unjoni tikseb kompetenza esterna esklussiva fejn l-impenn nazzjonali jaqa'
fl-ambitu tar-regoli komuni; u (ii) li r-rekwiżiti nazzjonali dwar
is-sjieda u l-kontroll għan-nomina tal-linji tal-ajru taħt ftehimiet
bilaterali tas-servizzi tal-ajru jiksru l-libertà tal-istabbiliment minquxa
fit-Trattati tal-UE. 2. F’Ġunju 2003,
il-Kunsill ta awtorizzazzjonijiet lill-Kummissjoni biex tinnegozja ftehim
komprensiv dwar it-trasport bl-ajru mal-Istati Uniti u biex tinnegozja
“Ftehimiet Orizzontali" mal-pajjiżi l-oħra kollha li mhumiex
fl-UE biex il-ftehimiet bilaterali tagħhom mal-Istati Membri tal-UE
jinġiebu f’konformità mal-liġi tal-UE. 3. F’Ġunju 2005,
il-Kunsill qabel fuq tliet “pilastri” ewlenin għal politika esterna tal-UE
dwar l-avjazzjoni immirata biex: (i) il-ftehimiet bilaterali kollha dwar
is-servizzi tal-ajru li l-Istati Membri tal-UE għandhom ma’ terzi pajjiżi
jinġiebu konformi mal-liġi tal-UE wara s-sentenza tal-Qorti
"smewwiet miftuħa”, partikolarment bit-tneħħija
tar-rekwiżiti nazzjonali tas-sjieda u l-kontroll u b'hekk tiġi
rikonoxxuta l-libertà li t-trasportaturi tal-ajru tal-UE jistabbilixxu
ruħhom; (ii) sal-2010 tiżviluppa Spazju Komuni tal-Avjazzjoni, biex
tinkorpora pajjiżi ġirien fin-nofsinhar u l-lvant tal-UE; u (iii)
tinnegozja ftehimiet komprensivi fil-livell tal-UE ma' sħab ewlenin
oħra ibbażati fuq awtorizzazzjonijiet individwali biex tinnegozja
fejn ikunu ntwerew il-benefiċċji ekonomiċi u l-valur miżjud
ta’ ftehim tal-UE. Filwaqt li jifdal sfidi sinifikanti u aktar
xogħol xi jsir, mill-2005 sar progress importanti fit-tliet pilastri. Kisbiet li saru fit-tliet pilastri L-ewwel pilastru – l-għoti mill-ġdid
taċ-ċertezza legali 4. Il-ħtieġa li
tingħata mill-ġdid bażi legali tajba għar-relazzjonijiet
tal-avjazzjoni mal-UE ġiet aċċettata mad-dinja kollha; bi ftit
eċċezzjonijiet, din ma għadhiex aktar kwistjoni reali. Madwar
117-il pajjiż mhux tal-UE irrikonoxxew il-prinċipju tan-nomina
tal-UE. Minn dawn, 55 pajjiż qablu li jemendaw il-ftehimiet bilaterali
kollha tagħhom mal-Istati Membri tal-UE permezz tal-Ftehimiet Orizzontali
mal-UE filwaqt li l-bqija tal-pajjiżi għamlu dan fuq bażi
bilaterali mal-Istati Membri individwali tal-UE. B’kollox kważi 1000
ftehim bilaterali tas-servizzi tal-ajru nġiebu f’konformità legali
mal-liġi tal-UE li tirrappreżenta 75% tat-traffiku kollu
tal-passiġġieri barra mill-UE. Madankollu, għad hemm xogħol
xi jsir ma’ xi ftit pajjiżi importanti tal-avjazzjoni, biex
l-implimentazzjoni tan-nomina tal-UE titlesta. Dawn jinkludu l-Indja,
iċ-Ċina, il-Korea t’Isfel u l-Afrika t'Isfel, il-Kenja,
in-Niġerja u l-Każakstan ukoll. Minn dawn il-pajjiżi, huma biss
l-Afrika t’Isfel, il-Kenja, in-Niġerja u l-Każakstan li għadhom
ma rrikonoxxewx il-prinċipju tan-nomina tal-UE. Fejn jeżistu
organizzazzjonijiet reġjonali, bħal fl-Afrika u x-xlokk
tal-Ażja, preferibbilment għandu jiġi segwit approċċ
reġjonali permezz tan-nnegozjar ta’ ftehimiet blokk għal blokk. Dawn il-Ftehimiet
Orizzontali blokk għal blokk għandu jkun fihom elementi ta'
reċiproċità (b'mod partikolari fir-rigward tad-dispożizzjonijiet
tas-sjieda u l-kontroll) li jippermettu rikonoxximent reċiproku progressiv
tas-swieq rispettivi reġjonali tal-avjazzjoni b'benefiċċji
għaż-żewġ naħat. L-għoti mill-ġdid
taċ-ċertezza legali, preferibbilment fuq bażi reġjonali
blokk għal blokk mal-Komunitajiet Ekonomiċi Reġjonali fejn
għandhom is-setgħa jikkonkludu Ftehim Orizzontali, jibqa'
prerekwiżit għal koordinazzjoni aktar wiesgħa f'oqsma ewlenin
tal-avjazzjoni bħas-sikurezza, is-sigurtà, ir-regolazzjoni ekonomika,
il-ġestjoni tat-traffiku tal-ajru u l-ambjent. 5. Ir-riżultati miksuba
huma sinifikanti. Dawn il-bidliet jirrikonoxxu t-tneħħija
tar-restrizzjonijiet nazzjonali tas-sjieda u tal-kontroll tat-trasportaturi
tal-UE kif mitlub mil-liġi tal-UE. Riżultat ta’ dan, it-trasportaturi
tal-UE jistgħu joffru servizzi minn kwalunkwe Stat Membru għal
pajjiżi mhux tal-UE, kemm-il darba i-drittijiet ta' nomina u d-drittijiet tat-traffiku
huma disponibbli skont il-ftehimiet bilaterali relevanti tas-servizzi tal-ajru.
Barra minn hekk, fużjonijiet bejn trasportaturi tal-UE huma rikonoxxuti.
Iżda fuq kollox, reġgħet ingħatat lura ċ-ċertezza
legali għal ftehimiet bilaterali, fatt relevanti għall-operaturi
kollha. It-tieni pilastru – Spazju Komuni
tal-Avjazzjoni għall-pajjiżi ġirien 6. Sar progress solidu
fl-iżvilupp ta’ Spazju Komuni tal-Avjazzjoni aktar wiesgħa. L-UE
innegozjat għadd ta' ftehimiet ta' servizzi tal-ajru importanti ma’
pajjiżi ġirien li biż-żmien ser jikkostitwixxu Spazju
Komuni tal-Ajru ibbażat fuq proċess parallel ta’ ftuħ gradwali
tas-swieq u konverġenza regolatorja lejn leġiżlazzjoni u
regolamenti tal-avjazzjoni tal-UE, li jkopru madwar 55 pajjiż u biljun (1)
abitant, jiġifieri d-doppju tal-popolazzjoni tal-UE. Barra mill-Isvezja,
in-Norveġja u l-Islanda, li jiffurmaw parti mis-suq intern tal-avjazzjoni,
ġew iffirmati ftehimiet komprensivi dwar it-trasport bl-ajru mal-Balkani
tal-Punent[17],
il-Marokk, il-Ġorġja, il-Ġordan u l-Moldova u nbeda ftehim
mal-Iżrael. Għaddejjin negozjati mal-Ukranja u l-Lebanon, u dalwaqt
mistennija jibdew mat-Tuneżija u l-Azerbajġan, u f'xi stadju
mal-Armenja wkoll. 7. L-impatt ekonomiku ta’ dawk
il-ftehimiet ta’ viċinat li ġew innegozjati l-ewwel kien wieħed
sinifikanti u li jista' jitkejjel. Studju indipendenti li sar mill-Kummissjoni
Ewropea[18]
ikkalkula li l-benefiċċju ekonomiku totali mill-ftehim UE-Marokk
(2006) qabeż it-€3.5 biljun bejn l-2006-2011, bi tkabbir massiv
fit-traffiku bl-ajru bejn l-UE u l-Marokk, u ħafna rotot ġodda u
trasportaturi, li jirriżultaw f'aktar kompetizzjoni, għażla u
prezzijiet aktar baxxi. Kien hemm tnaqqis reali fil-passaġġi ta'
madwar 40% mill-2005. Bl-istess mod, il-ftehim UE-Balkani tal-Punent (il-ftehim
ECAA) iġġenera benefiċċju ekonomiku totali ta' aktar minn
€2.4 biljun bejn l-2006 u l-2011. Mill-benefiċċju ekonomiku
totali, 80-85% huwa gwadann żejjed tal-konsumaturi minn passaġġi
aktar baxxi, fejn il-bqija jirrappreżenta dħul ieħor ta'
produttività u effiċjenza. 8. Il-pajjiżi ġirien
ħadmu ħafna biex jallinjaw il-qafas regolatorju tagħhom
mal-leġiżlazzjoni tal-UE f’oqsma ewlenin bħas-sikurezza
tal-avjazzjoni, is-sigurtà, il-ġestjoni tat-traffiku tal-ajru, l-ambjent,
id-drittijiet tal-passiġġieri, ir-regolamenti ekonomiċi u
l-aspetti soċjali. Dan isir fl-interess tal-konsumaturi u l-industrija
tal-avjazzjoni tal-UE u tal-pajjiżi ġirien. L-UE tagħti
għajnuna sinifikanti lill-pajjiżi ġirien biex jallinjaw
il-leġiżlazzjoni tagħhom mar-regoli tal-UE.
Iż-żewġ naħat qablu li jagħtu drittijiet addizzjonali
tat-traffiku (drittijiet tal-ħames (5) libertà, jiġifieri d-dritt li
jinġarr traffiku bejn pajjiż sieħeb u intermedju jew lil hinn
minn punti bħala parti minn servizz li jibda/jintemm fil-pajjiż ta’
oriġini tal-linja tal-ajru) biex jiġu applikati ladarba
l-proċess tal-armonizzazzjoni regolatorja jkun tlesta. Fil-każ
tal-Balkani tal-Punent, l-implimentazzjoni bikrija tar-regoli tal-avjazzjoni
tal-UE skont il-Ftehim tal-ECAA ser tikkontribwixxi wkoll għall-isforzi tagħhom
fil-kuntest tal-proċess ta’ adeżjoni mal-UE. 9. Ir-relazzjonijiet ma’
pajjiż ġar ewlieni – ir-Russja - kienu diffiċli. Ir-Russja hija
potenzjalment l-aktar sieħeb importanti għall-UE minħabba
l-prossimità ġeografika tagħha u d-dipendenza reċiproka li
toħloq opportunitajiet kummerċjali sinifikanti. Pereżempju,
aktar minn 40% tat-traffiku internazzjonali tal-passiġġieri Russu
għandu bħala destinazzjoni tiegħu l-UE. Madankollu,
il-possibbiltà li l-benefiċċji reċiproċi jiġu
realizzati għadha ma ġietx sfruttata kompletament. 10. L-2011 immarkat bidla rigward
ir-rikonoxximent tal-liġi tal-UE mir-Russja. F’Settembru 2011,
ir-Russja - għall-ewwel darba – qablet li tinkorpora l-prinċipju
tan-nomina tal-UE fil-ftehimiet biltaterali tas-servizzi tal-ajru tagħha mal-Istati
Membri tal-UE, proċess li qed jitlesta issa. 11. Madankollu, xorta għad
trid tiġi riżolta kwistjoni waħda ewlenija. is-sistema Russa
tal-iċċarġjar tat-trasportaturi tal-UE għall-użu ta'
rotot Siberjani biex itiru lejn destinazzjonijiet Ażjatiċi. Ġie
stmat li l-linji tal-ajru tal-UE biex itiru minn fuq is-Siberja kellhom
iħallsu aktar minn EUR 300 miljun kull sena, li parti kbira
minnhom għaddew għand kompetitur dirett. Fi tmiem l-2011,
il-Kummissjoni Ewropea u l-Gvern Russu skambjaw ittri bil-għan li
"Il-prinċipji dwar il-modernizzazzjoni tas-sistema tat-titjir fuq
is-Siberja li sar qbil dwarhom", li fl-2006 ġew innegozjati, maqbula
u ffirmati, jiġu implimentati kompletament
sal-1 ta' Lulju 2012. L-UE tistenna li r-Russja tonora dan
l-impenn internazzjonali u tirriserva d-dritt tagħha li tieħu
l-miżuri meħtieġa jekk dan ma jkunx il-każ. It-Tielet pilastru - ftehimiet komprensivi ma'
sħab oħra ewlenin 12. Fl-ambitu tat-tielet pilastru,
l-UE innegozjat xi ftehimiet ma' sħab ewlenin. Dawn il-ftehimiet
komprensivi jimmiraw għal tagħqida ta' ftuħ ta' swieq,
il-ħolqien ta' kundizzjonijiet għal kompetizzjoni ġusta u
miftuħa permezz ta' konverġenza regolatorja, il-liberalizzazzjoni
tas-sjieda u l-kontroll tal-linji tal-ajru u r-riżoluzzjoni ta’
kwistjonijiet ta' kif isir in-negozju”. 13. L-ewwel stadju tal-ftehim
mal-Istati Uniti ġie iffirmat f’April 2007 u l-ftehim dwar it-tieni
stadju f'Ġunju 2010. F'Diċembru 2009 ġie ffirmat
ftehim mal-Kanada li jipprovdi ftuħ tas-swieq ibbażat fuq il-bidliet
tal-Kanada fir-regolamenti tagħha dwar l-investiment barrani .
F'Marzu 2011, il-Brażil, ingħata bidu għal ftehim
komprensiv dwar it-trasport tal-ajru, għalkemm il-firma tal-Brażil
għadha pendenti. Il-Kunsill ta wkoll awtorizzazzjonijiet lill-Kummissjoni
biex tinnegozja ftehimiet komprensivi mal-Awstralja u n-New Zealand.
In-negozjati ma’ dawn il-pajjiżi għadhom ma tlestewx. 14. Il-ftehim UE-US kellu rwol
importanti biex imexxi l-ftehimiet internazzjonali tal-avjazzjoni lil hinn minn
sempliċiment negozjati ta' aċċess tas-suq ibbażati fuq
ir-reċiproċità. Għall-ewwel darba, ftehim ewlieni
internazzjonali irrikonoxxa li l-kundizzjonijiet għall-kompetizzjoni
kellhom jiġu indirizzati u armonizzati wkoll biex tiġi assigurata
kompetizzjoni ġusta. L-UE u l-Istati Uniti żviluppaw mudell ta’
ftehim ġdid li jiffaċilita ir-rwol tal-avjazzjoni. Filwaqt li
l-ftehimiet tal-Istati Uniti u l-Kanada s'issa ġew applikati biss matul
perjodu ta' kriżi ekonomika li kellha effetti negattivi fuq ħafna
mis-swieq tal-avjazzjoni, il-benefiċċji huma mistennija li jkunu
sinifikanti ħafna, u jirriflettu d-daqs tas-suq transatlantiku. Studju[19] li sar f’isem il-Kummissjoni kkonkluda li ftehim UE-Stati Uniti dwar
l-Ispazju Komuni tal-Avjazzjoni matul l-ewwel 5 snin ser jiġġenera
aktar minn 25 miljun passiġġier addizzjonali UE-Stati Uniti u
aktar minn €15-il biljun f'benefiċċji għall-konsumaturi kif
ukoll joħloq 80,000 impjieg ġdid fl-UE u l-Istati Uniti f'daqqa.
Il-benefiċċji u l-effiċjenzi li jirriżultaw minn
kooperazzjoni u konverġenza regolatorja, u l-effett tal-ħidma
tal-Kumitati Konġunti stabbilit mill-ftehimiet, huma ċari diġà.
Skont il-ftehim UE-Stati Uniti , pereżempju, il-Kumitat Konġunt
diġà indirizza firxa wiesgħa ta' kwistjonijiet inkluż l-aċċess
tas-swieq, il-kooperazzjoni regolatorja u l-konverġenza u
l-kundizzjonijiet għall-kompetizzjoni. Dan jipprovdi forum importanti
għall-monitoraġġ tal-implimentazzjoni tal-ftehim u biex
jiġu indirizzati l-ostakli għan-negozju. Il-Kumitat Konġunt,
pereżempju, kien katalist għall-ftehim tas-sikurezza tal-merkanzija
UE-Stati Uniti ta’ Ġunju 2012 li jippermetti operazzjonijiet
orħos u aktar bil-ħeffa tal-merkanija bl-ajru bħala
riżultat tar-rikonoxximent reċiproku tar-reġimi ta' sikurezza
rispettivi tal-merkanzija bl-ajru. [1] "Aviation Benefits Beyond Borders”, Rapport
imħejji minn Oxford Economics għal ATAG, Marzu 2012. Ta' min
wieħed jinnota li dawn il-figuri jinkludu effetti konsiderevoli indiretti
u indotti li jimmultiplikaw l-impatt tal-avjazzjoni fuq l-ekonomija. [2] Pjan direzzjonali għal Żona Unika Ewropea tat-Trasport
– Lejn sistema tat-trasport kompetittiva u li tuża r-riżorsi b’mod
effiċjenti" KOM (2011) 144 finali, 28.3.2011. [3] Waqt li tbassar dħul totali net ta’ $3 biljun
għall-2012 għal-linji tal-ajru kummerċjali tad-dinja,
fit-tbassir finanzjarju tagħha ta' Ġunju 2012, l-IATA tbassar
telf nett ta’ $1.1 biljun għal-linji tal-ajru kummerċjali
Ewropej. [4] Fl-2005, il-Kummissjoni ppreżentat Komunikazzjoni
intitolata “L-Iżvilupp tal-aġenda għall-politika esterna
tal-avjazzjoni tal-Komunità" [titlu
mhux uffiċjali], (COM(2005) 79 finali, 11.03.2005) li
abbażi tagħha l-Kunsill adotta l-Konklużjonijiet tal-Kunsill
f’Ġunju 2005 u l-Parlament Ewropew adotta Riżoluzzjoni
f’Diċembru 2005. [5] Booz & Company: "Development of the EU's Future
External Aviation Policy", Rapport Finali, April 2012. [6] Airbus: "Delivering the Future: Global Market
Forecast 2011-2030" [7] Airbus: "Delivering the Future: Global Market
Forecast 2011-2030" [8] Bombardier/Global Insight [9] Booz & Company: "Development of the EU's Future
External Aviation Policy", Rapport Finali, April 2012, ibbażat fuq
ir-Riċerka OAG u AEA. [10] Il-linji tal-ajru bi prezz baxx mistennija jikbru 1.4%
fis-sena aktar bil-għaġla minn linji tal-ajru tan-netwerk globali u
sal-2030 huma mistennija li joperaw 19% tat-traffiku dinji (Airbus: "Delivering
the Future: Global Market Forecast 2011-2030" L-assoċjazzjoni
tal-linji tal-ajru bi prezz baxx (ELFAA) ippubblikat studju ("Market Share
of Low Fares Airlines in Europe – Final Report – February 2011", minn York
Aviation għal ELFAA) li jindika li s-sehem fis-suq ta' linji tal-ajru bi
prezz baxx fl-Ewropa jista' jilħaq bejn 45% u 53% sal-2020. [11] Airbus: "Delivering the Future: Global Market
Forecast 2011-2030" [12] Il-Parlament Ewropew u l-Kunsill laħqu ftehim ta’
kodeċiżjoni fl-ewwel qari dwar proposta mill-Kummissjoni biex temenda
r-Regolament (KE) Nru 883/2004 dwar il-koordinazzjoni ta’ sistemi ta’
sigurtà soċjali u r-Regolament (KE) Nru 987/2009 li jistabbilixxi
l-proċedura dwar l-implimentazzjoni tar-Regolament (KE) Nru 883/2004. [13] Ir-Regolament (KE) Nru 868/2004 tal-Parlament Ewropew u
tal-Kunsill tal- 21 ta’ April 2004 – Il-Ġurnal
Uffiċjali 30.4.2004 (L 162/1). [14] Booz & Company: "Development of the EU's Future
External Aviation Policy", Rapport Finali, April 2012. [15] Speċjalment l-Emirati Għarab Magħquda u
l-Qatar [16] Każijiet tal-qorti istigati mill-Kummissjoni Ewropea
kontra tmien Stati Membri rigward il-ftehimiet bilaterali tas-servizzi tal-ajru
tagħhom mal-Istati Uniti. [17] Ftehim multilaterali ffirmat mill-imsieħba li
ġejjin: l-Albanija, il-Bosnija-Ħerzegovina, il-Kroazja, dik li kienet
ir-Repubblika Jugoslava tal-Maċedonja, il-Montenegro, is-Serbja u l-UNMIK [18] Booz & Company: "Development of the EU's Future
External Aviation Policy", Rapport Finali, April 2012 [19] "The Economic Impacts of an Open Aviation Area
between the EU and the US", Rapport Finali, Jannar 2007, Booz Allen,
Hamilton,